cricket

CSK: ப்ளே ஆஃப் வாய்ப்பை கோட்டை விட்ட சென்னை! ஓட்டையை சரிகட்டுமா சிஎஸ்கே நிர்வாகம்?

சுகுமாறன் — Fri, 22 May 2026 09:28:49 +0530

ஐபிஎல் தொடர் விறுவிறுப்பாக நடந்து வருகிறது. ஐபிஎல் கிரிக்கெட் தனது அடுத்தகட்டத்தை நோக்கி நகர்ந்துள்ளது.ப்ளே ஆஃப் சுற்றுக்கு முன்னேறப்போகும் கடைசி அணி யார்? என்பதற்கான போட்டியில் இருந்து சென்னை சூப்பர் கிங்ஸ் அணி நேற்று அதிகாரப்பூர்வமாக வெளியேறியது.

தொடரை விட்டு வெளியேறிய சென்னை:

இந்த தொடர் தொடங்கும் முன்பு கோப்பையை வெல்லும் அணிகளில் ஒன்றாக கருதப்பட்ட அணி சென்னை சூப்பர் கிங்ஸ். ஆனால், இந்த தொடர் தொடங்கியது முதலே சென்னை சூப்பர் கிங்ஸ் அணி சொல்லிக்கொள்ளும்படி ஆடவில்லை. தொடர் தொடங்கும் முன்பே தோனி காயத்தால் ஒரு வாரம் ஆடமாட்டார் என்று கூறிய நிலையில், அவர் தொடர் முழுவதும் ஆடவே இல்லை.

முதல் 3 போட்டிகளில் தோற்ற சென்னை அணி அதன்பின்பு டெல்லி, கொல்கத்தா அணியுடன் வென்று கம்பேக் கொடுத்தது. அதன்பின்பு ஒரு கலவையான ஆட்டத்தை ஆடி ரசிகர்களுக்கு நம்பிக்கை கொடுத்தது. ஒரு கட்டத்தில் ப்ளே ஆஃப் வாய்ப்பை பிரகாசப்படுத்திய சென்னை கடைசியாக ஆடிய 3 போட்டிகளில் இரண்டு போட்டிகளில் வெற்றி பெற்றாலே ப்ளே ஆஃப் வாய்ப்பை பிரகாசப்படுத்தலாம் என்ற நிலை இருந்தது.

நழுவிய ப்ளே ஆஃப் வாய்ப்பு:

ஆனால், லக்னோ, சன்ரைசர்ஸ் மற்றும் குஜராத் என அடுத்தடுத்து 3 போட்டிகளிலும் தோற்று தொடரை விட்டு வெளியேறியுள்ளது. சென்னை அணி ஆரம்பம் முதலே காயங்களாலும், நிலையான ஃபார்ம் இல்லாமலும் தவித்து வந்தது. ருதுராஜ், சாம்சன் மட்டுமே பேட்ஸ்மேன்களாக தொடர் முழுவதும் விளையாடினார்கள். ஆனாலும் அதில் சாம்சன் மட்டுமே சென்னை அணிக்காக சிறப்பாக ஆடினார்கள்.

ஆயுஷ் மாத்ரே, கலீல் அகமது, ஓவர்டன் என அந்த அணியின் முக்கிய வீரர்கள் காயத்தால் தொடரை விட்டு வெளியேறிய நிலையில் வாய்ப்பு கிடைத்த பிரசாந்த் வீர், கார்த்திக் சர்மா, உர்வில் படேல் தொடர்ந்து சிறப்பாக ஆட தவறிவிட்டனர். முக்கிய வீரர் ப்ரெவிசும் பெரிய தாக்கத்தை ஏற்படுத்தவில்லை. தொடக்க போட்டிகளில் சிறப்பாக வீசிய அன்சுல் கம்போஜ் தொடரின் முடிவில் ரன்களை வாரி வழங்கும் ரன் மெஷினாக மாறினார். ருதுராஜ் கெய்க்வாட்டின் கேப்டன்சியிலும் கடைசி போட்டிகளில் தடுமாற்றம் தெரிந்தது.

விரைவில் முக்கிய வீரர்களுக்கு கல்தா:

ஆல்ரவுண்டர் ஜடேஜாவின் வெற்றிடம் அப்பட்டமாக தெரிந்தது. ஷிவம் துபே பேட்டிங் மற்றும் பந்துவீச்சு இரண்டிலும் சென்னை அணிக்கு ஏதும் பலமாகவே இல்லை. முகமது நூர், அகில் ஹுசைன் ஆகியோர் சுழலில் சற்று தாக்கம் ஏற்படுத்தினர். இருப்பினும் சென்னை அணி இந்த தொடரில் ஏராளமான தவறுகை செய்து மீண்டு வந்தது. ப்ளே ஆஃப் செல்லும் பொன்னான வாய்ப்பு கிடைத்தும் அதை தவறவிட்டனர்.

சென்னை அணி இந்த முறை தொடரை விட்டு வெளியேறியிருப்பது அந்த அணியின் ரசிகர்களுக்கு வேதனையை உண்டாக்கியுள்ளது. ஆனாலும், அந்த அணி ஏலத்தில் எடுத்துள்ள வீரர்கள் நீண்ட காலத்திற்கான முதலீடாக இருப்பதால் எதிர்காலத்தில் மீண்டும் சென்னை அணியால் சிறப்பாக ஆட முடியும் என்று கருதப்படுகிறது. அதேசமயம் ஷிவம் துபே போன்ற சில வீரர்கள் விரைவில் சென்னை அணியில் இருந்து விலக்கப்படுவார்கள் என்றும் கருதப்படுகிறது.

Ravindra Jadeja: முடிவுக்கு வருகிறதா ஜடேஜா சகாப்தம்? ஸ்கெட்ச் போட்டு ஓரங்கட்டுகிறார்களா கம்பீர் அன் கோ?

சுகுமாறன் — Tue, 19 May 2026 17:34:12 +0530

இந்திய கிரிக்கெட் அணி வீரர்கள் தற்போது ஐபிஎல் தொடரில் ஆடி வருகின்றனர். ஐபிஎல் தொடருக்கு பிறகு இந்திய கிரிக்கெட் அணி ஆப்கானிஸ்தான் அணியுடன் மோத உள்ளது.

ஜடேஜாவுக்கு நோ:

இந்தியா - ஆப்கானிஸ்தான் அணிகள் டெஸ்ட் மற்றும் ஒருநாள் தொடரில் ஆட உள்ளது. டெஸ்ட் மற்றும் ஒருநாள் அணிக்கு சுப்மன்கில் கேப்டனாக நியமிக்கப்பட்டுள்ளார். டெஸ்ட் தொடரில் ஓய்வு பெற்றுள்ள ரோகித் சர்மா மற்றும் விராட் கோலி இருவரும் ஒருநாள் தொடரில் இடம்பெற்றுள்ளனர். டி20 தொடரில் மட்டும் ஓய்வு பெற்றுள்ள ஜடேஜா, டெஸ்ட் அல்லது ஒருநாள் போட்டிகளில் ஆடுவார் என்று எதிர்பார்க்கப்பட்ட நிலையில் அவர் அணியில் இடம்பெறவில்லை.

ஓரங்கட்டப்படுகிறாரா ஜடேஜா?

தலைசிறந்த ஆல்ரவுண்டரான ஜடேஜா டெஸ்ட் மற்றும் ஒருநாள் ஆகிய இரண்டு தொடருக்கான இந்திய அணியிலும் இடம்பிடிக்காமல் போனது அனைவருக்கும் அதிர்ச்சியை உண்டாக்கியுள்ளது. இதன் மூலமாக ரவீந்திர ஜடேஜா ஓரங்கட்டப்படுகிறாரா? என்ற கேள்வி எழுந்துள்ளது.

37 வயதான ஜடேஜா இதுவரை 89 டெஸ்ட் போட்டிகளில் ஆடி 133 இன்னிங்சில் பேட் செய்து 4 ஆயிரத்து 95 ரன்களை எடுத்துள்ளார். அதில் 6 சதங்கள், 28 அரைசதங்கள் அடங்கும். அதிகபட்சமாக 175 ரன்களை விளாசியுள்ளார். 210 ஒருநாள் போட்டிகளில் ஆடி 2 ஆயிரத்து 905 ரன்களை எடுத்துள்ளார். அதிகபட்சமாக 87 ரன்கள் எடுத்துள்ளார். 13 அரைசதங்கள் விளாசியுள்ளார்.

இந்திய சுழற்பந்துவீச்சின் முக்கிய தூணாக திகழும் ஜடேஜா டெஸ்ட் போட்டிகளில் 348 விக்கெட்டுகளும், ஒருநாள் போட்டிகளில் 232 விக்கெட்டுகளும் வீழ்த்தியுள்ளார். ரோகித் சர்மா மற்றும் விராட் கோலி போல ஜடேஜாவும் அடுத்தாண்டு நடைபெற உள்ள 50 ஓவர் உலகக்கோப்பையில் ஆட ஆர்வத்துடன் உள்ளார்.

விரும்பாத பிசிசிஐ:

ஆனால், அணியின் பயிற்சியாளரான கவுதம் கம்பீர் மற்றும் அணித்தேர்வுக்குழு தலைவரான அஜித் அகர்கர் ஆகிய இருவரும் ரோகித் சர்மா, விராட் கோலி மற்றும் ஜடேஜா அணியில் இடம்பிடிப்பதை விரும்பவில்லை என்றே கூறப்படுகிறது. இவர்களின் அழுத்தம் காரணமாகவே விராட் கோலி டெஸ்ட் கிரிக்கெட் தொடரில் இருந்து ஓய்வு பெற்றதாகவும் கூறப்படுகிறது.

பும்ரா மற்றும் ஜடேஜா இருவருக்கும் ஓய்வு அளிக்கப்பட்டிருப்பதாக தகவல்கள் வெளியானாலும் பும்ரா மீண்டும் அணியில் இடம்பிடிப்பது உறுதியாகும். ஆனால், அடுத்தடுத்த தொடர்களில் ஜடேஜா இடம்பிடிப்பாரா? என்பது கேள்விக்குறியாகும்.

ஆப்கானிஸ்தான் அணிக்கு எதிரான இந்திய அணி:

ஒருநாள் அணி:

சுப்மன்கில் ( கேப்டன்), ரோகித் சர்மா, விராட் கோலி, ஸ்ரேயாஸ் ஐயர், (துணை கேப்டன்), கே.எல்.ராகுல், இஷான் கிஷன், ஹர்திக் பாண்ட்யா, நிதிஷ்குமார், வாஷிங்டன் சுந்தர், குல்தீப் யாதவ், அர்ஷ்தீப்சிங், ப்ரசித் கிருஷ்ணா, குர்னூர் ப்ரார், ஹர்ஷ் துபே, ப்ரின்ஸ் யாதவ்.

டெஸ்ட் அணி:

சுப்மன் கில் ( கேப்டன்), ஜெய்ஸ்வால், கே.எல்.ராகுல் ( துணை கேப்டன்), சாய் சுதர்சன், ரிஷப்பண்ட், தேவ்தத் படிக்கல், வாஷிங்டன் சுந்தர், குல்தீப் யாதவ், முகமது சிராஜ், பிரசித் கிருஷ்ணா, மானவ் சுதர், குர்னூர் ப்ரார், ஹர்ஷ் துபே, துருவ் ஜுரல்

IPL PlayOff: சென்னையின் பிடியில் பஞ்சாப்! நொடிக்கு நொடி சூடு பிடிக்கும் ப்ளே ஆஃப் ரேஸ்!

சுகுமாறன் — Mon, 18 May 2026 20:51:47 +0530

ஐபிஎல் தொடர் விறுவிறுப்பான கட்டத்தை எட்டியுள்ளது. ப்ளே ஆஃப் சுற்றுக்கு ஆர்சிபி அணி மட்டும் தகுதி பெற்றுள்ள நிலையில், குஜராத் அணி ஏறத்தாழ தனது ப்ளே ஆஃப் வாய்ப்பை உறுதி செய்துள்ளது. இந்த சூழலில் ப்ளே ஆஃப் சுற்றுக்குள் செல்வதற்கு சன்ரைசர்ஸ், சென்னை, பஞ்சாப் மற்றும் ராஜஸ்தான் அணிகள் மல்லுகட்டி வருகிறது.

அடுத்தடுத்து 6 தோல்வி:

இந்த தொடர் தொடங்கியபோது வெற்றி மட்டுமே பெற்று வந்த பஞ்சாப் அணியின் தற்போதைய நிலை பரிதாபமாக உள்ளது. அவர்கள் தொடர்ச்சியாக 7 போட்டிகளில் வெற்றி பெற்று வந்த நிலையில், தொடர்ச்சியாக 6 போட்டிகளில் தோல்வி அடைந்து தங்களது ப்ளே ஆஃப் வாய்ப்பையே கேள்விக்குறியாக்கி வைத்துள்ளது.

சென்னையின் பிடியில் பஞ்சாப்:

சென்னை அணி தங்களது அடுத்த இரண்டு போட்டிகளில் வெற்றி பெற்றால் ப்ளே ஆஃப் வாய்ப்பை சாத்தியப்படுத்தலாம். அதேசமயம், ராஜஸ்தான் அணியும் அடுத்த இரண்டு போட்டிகளில் வெற்றி பெற்றால் அவர்களின் ப்ளே ஆஃப் வாய்ப்பும் சாத்தியம் ஆகும். அவ்வாறு நடந்தால் பஞ்சாப் அணியின் ப்ளே ஆஃப் வாய்ப்பு வெறும் கனவாகவே மாறிவிடும்.

இதனால், தற்போது சென்னை அணி மற்றும் ராஜஸ்தான் அணி தோற்றால் மட்டுமே பஞ்சாப் அணிக்கு வெற்றி வாய்ப்பு பிரகாசம் ஆகும். இதனால், தற்போது சென்னை மற்றும் ராஜஸ்தான் அணியின் பிடியில் பஞ்சாப் அணி சிக்கியுள்ளது. பஞ்சாப் அணி தனது கடைசி போட்டியில் லக்னோவுடன் ஆடுகிறது.

காத்திருக்கும் த்ரில்லர்:

லக்னோ கடைசியாக ஆடிய போட்டிகளில் அசத்தலாக ஆடி வெற்றி பெற்று வரும் நிலையில், இந்த போட்டியில் கட்டாயம் வெற்றி பெறுவதுடன் சென்னை, ராஜஸ்தான் அணிகள் தாங்கள் அடுத்தடுத்த ஆடும் போட்டிகளில் கட்டாயம் ஒரு போட்டியில் தோற்பதுடன் சன்ரைசர்ஸ் அணியும் தற்போது சென்னையுடன் நடந்து வரும் போட்டி அல்லது அடுத்து ஆர்சிபி-யுடன் மோதும் போட்டி இரண்டில் ஒன்றால் தோற்றாலோ அல்லது இரண்டிலும் தோற்றாலுமோ வாய்ப்பு பிரகாசம் ஆகலாம்.

எதுவாகினும் அடுத்தடுத்து நடக்க உள்ள ஒவ்வொரு போட்டியும் சென்னை, ராஜஸ்தான், பஞ்சாப் ஆகியோரின் ப்ளே ஆஃப் வாய்ப்பை பறிக்கும் அல்லது அனுமதிக்கும் ஒரு போட்டியாகவே அமைகிறது. இதனால், ஐபிஎல் சூடுபிடிக்கத் தொடங்கியுள்ளது.

மும்பை, லக்னோ அதிகாரப்பூர்வமாக வெளியேறியுள்ளது. டெல்லி மற்றும் கொல்கத்தா அணிகள் இனி ப்ளே ஆஃப் வாய்ப்பிற்கு செல்லும் சூழல் கிடையாது.

ப்ளே ஆஃப் எப்போது?

ப்ளே ஆஃப் சுற்று வரும் 26ம் தேதி தொடங்குகிறது. குவாலிஃபயர் 1 போட்டியில் புள்ளிப்பட்டியலில் முதலிடம் மற்றும் புள்ளிப்பட்டியலில் 2ம் இடம்பிடிக்கும் அணியும் மாேதுவார்கள். 27ம் தேதி தொடரை விட்டு வெளியேறும் அணி எது? என்பதை தீர்மானிக்கும் எலிமினேட்டரும், 29ம் தேதி குவாலிஃபயர் 2ம் நடக்கிறது. இறுதிப்போட்டி மே 31ம் தேதி நடக்கிறது.

CSK Playoff: லக்னோவிடம் தோல்வி..தனக்கு தானே மண்ணைவாரி போட்ட சிஎஸ்கே... பிளே ஆஃப் கணக்கு என்ன?

ஜேம்ஸ் — Sat, 16 May 2026 08:26:04 +0530

லக்னோ சூப்பர் ஜெயண்ட்ஸ் அணியிடம் சென்னை சூப்பர் கிங்ஸ் அடைந்த தோல்வி, ருதுராஜ் தலைமையிலான சிஎஸ்கே அணியின் பிளேஆஃப் வாய்ப்புகளுக்கு பெரிய பின்னடைவை ஏற்ப்படுத்தியுள்ளது.

சிஎஸ்கே தோல்வி

தொடரிலிருந்து வெளியேற்றப்பட்ட லக்னோ அணியிடம், சிஎஸ்கே 7 விக்கெட் வித்தியாசத்தில் படுதோல்வியைச் சந்தித்தது. எகானா மைதானத்தில் நடந்த இந்தப் போட்டியில் மிட்செல் மார்ஷ் வெறும் 38 பந்துகளில் 90 ரன்கள் குவித்து லக்னோவின் வெற்றிக்கு உதவினார். இதனால் 188 ரன்கள் இலக்கை லக்னோ அணி 16.4 ஓவர்களிலேயே எட்டியது. இந்தத் தோல்வியால் சிஎஸ்கே 12 போட்டிகளில் 12 புள்ளிகளுடன் புள்ளிப்பட்டியலில் 6-வது இடத்தில் நீடிக்கிறது. இப்போது ரசிகர்களின் ஒரே கேள்வி, சிஎஸ்கே இன்னும் பிளேஆஃப் சுற்றுக்குத் தகுதி பெற முடியுமா என்பதுதான்.

சிஎஸ்கேவின் தற்போதைய நிலை

சிஎஸ்கேவின் தற்போதைய நிலை மிகவும் எளிமையானது. அவர்கள் மீதமுள்ள இரண்டு போட்டிகளிலும் கட்டாயம் வெற்றி பெற வேண்டும். அவ்வாறு செய்தால் 16 புள்ளிகளுடன் முதல் நான்கு இடங்களுக்குள் வர வாய்ப்பு இருக்கும். இருப்பினும், இப்போது அவர்களின் வாய்ப்பு மற்ற அணிகளின் வெற்றி தோல்விகளைச் சார்ந்தே இருக்கிறது. சிஎஸ்கே தனது இறுதி லீக் ஆட்டங்களில் சன்ரைசர்ஸ் ஹைதராபாத் மற்றும் குஜராத் டைட்டன்ஸ் அணிகளை எதிர்கொள்கிறது. இந்த இரண்டு அணிகளும் பிளேஆஃப் ரேசில் வலுவாக உள்ளன. குஜராத் அதிகபட்சமாக 20 புள்ளிகளையும், ஹைதராபாத் 18 புள்ளிகளையும் பெற வாய்ப்புள்ளது.

குறுக்கே வரும் கெளஷிக்

மற்ற அணிகளால் சிஎஸ்கேவிற்குச் சில சிக்கல்கள் உள்ளன. குறிப்பாக ராஜஸ்தான் ராயல்ஸ் அணி 11 போட்டிகளில் 12 புள்ளிகளுடன் உள்ளது. அவர்களுக்கு இன்னும் டெல்லி, லக்னோ மற்றும் மும்பை அணிகளுக்கு எதிராக 3 போட்டிகள் உள்ளன. ராஜஸ்தான் மீதமுள்ள 3 போட்டிகளிலும் வென்றால், சிஎஸ்கேவின் வாய்ப்பு கிட்டத்தட்ட முடிவுக்கு வந்துவிடும். எனவே, ராஜஸ்தான் குறைந்தபட்சம் ஒரு போட்டியிலாவது தோற்க வேண்டும் என சிஎஸ்கே விரும்பும். தற்போது சிஎஸ்கேவின் நிகர ரன் ரேட் +0.027 ஆக உள்ளது. இது மற்ற அணிகளுடன் ஒப்பிடுகையில் மிகவும் குறைவாக இருப்பதால், ரன் ரேட் அடிப்படையில் முன்னேறுவது சிஎஸ்கேவிற்கு சவாலான காரியம். அதேபோல் பஞ்சாப் கிங்ஸ் அணியின் செயல்பாடுகளையும் சிஎஸ்கே கவனிக்க வேண்டியுள்ளது. பஞ்சாப் அணி தனது கடைசி இரண்டு போட்டிகளில் பெங்களூரு மற்றும் லக்னோ அணிகளைச் சந்திக்கிறது. பஞ்சாப் ஒரு போட்டியில் தோற்றால் கூட, அது சிஎஸ்கேவிற்குச் சாதகமாக அமையும்.

14 புள்ளிகளுடன் தகுதி பெறுவது சாத்தியமா?

ஒருவேளை சிஎஸ்கே ஒரு போட்டியில் தோற்று 14 புள்ளிகளுடன் தகுதி பெற முடியுமா என்று கேட்டால், அது மிகவும் சிக்கலானது. ஆர்சிபி, குஜராத் மற்றும் ஹைதராபாத் ஆகிய அணிகள் ஏற்கனவே 14 புள்ளிகளுடன் வலுவான ரன் ரேட்டில் உள்ளன. சிஎஸ்கே 14 புள்ளிகளுடன் உள்ளே நுழைய வேண்டுமானால், பஞ்சாப் கிங்ஸ் மீதமுள்ள 2 போட்டிகளிலும் தோற்க வேண்டும் மற்றும் ராஜஸ்தான் ராயல்ஸ் மீதமுள்ள 3 போட்டிகளில் 2-ல் தோற்க வேண்டும். இவை அனைத்தும் நடந்தாலும், சிஎஸ்கே தனது கடைசி போட்டியில் மிகப்பெரிய வெற்றியைப் பெற்று ரன் ரேட்டை உயர்த்தினால் மட்டுமே பிளேஆஃப் கனவு நனவாகும். சுருக்கமாகச் சொன்னால், சிஎஸ்கேவின் தலைவிதி இப்போது அவர்கள் கையில் மட்டும் இல்லை.

IPL 2026: கப்-ஐ விடுங்க.. ப்ளே ஆஃப்யே கனவுதான் போல! புயலாய் தொடங்கி புஸ்வானமா போகுதா பஞ்சாப்?

சுகுமாறன் — Fri, 15 May 2026 19:21:41 +0530

ஐபிஎல் கிரிக்கெட் தொடரின் 19வது சீசன் விறுவிறுப்பாக நடந்து வருகிறது. ப்ளே ஆஃப் சுற்றுக்குச் செல்லப்போவது யார்? என்பதற்கான மோதல் விறுவிறுப்பாக நடந்து வருகிறது.

புயலாய் தொடங்கி புஸ்வானமான பஞ்சாப்:

கடந்தாண்டு புதிய கேப்டன், புதிய பயிற்சியாளர், இளம் பட்டாளத்துடன் ஐபிஎல் களத்திற்குள் வந்த பஞ்சாப் அனைத்து அணிகளுக்கும் கடும் சவால் அளித்து வருகிறது. இந்தாண்டு தொடங்கிய ஐபிஎல் தொடரிலும் எந்த அணியாலும் வீழ்த்த முடியாத அணியாக தொடக்கம் முதலே அசத்தி வந்த பஞ்சாப் டெல்லி அணிக்கு எதிராக 264 ரன்களை எட்டிப்பிடித்து மிகப்பெரிய வரலாறு படைத்தது.

ஆனால், அதற்கு அடுத்தடுத்து நடந்த 5 போட்டிகளிலும் தொடர் தோல்வியைச் சந்தித்துள்ளது. ராஜஸ்தான், குஜராத், ஹைதரபாத், டெல்லி, மும்பை அணி அடுத்தடுத்த தோல்விகளால் தற்போது பஞ்சாப் அணியின் ப்ளே ஆஃப் வாய்ப்பே கேள்விக்குறியாக மாறிவிட்டது.

ப்ளே ஆஃப்-க்கு மல்லுகட்டு:

13 புள்ளிகளுடன் புள்ளிப்பட்டியலில் 4வது இடத்தில் உள்ள பஞ்சாப் அணி தற்போது ப்ளே ஆஃப் சுற்றுக்குச் செல்வதற்கு மற்ற அணிகளின் முடிவுகளைப் பொறுத்தே அமைந்துள்ளது. ஆர்சிபி, குஜராத் அணிகள் தலா 16 புள்ளிகள் பெற்று தங்களது ப்ளே ஆஃப் வாய்ப்பை ஏறத்தாழ உறுதி செய்துவிட்டது. சன்ரைசர்ஸ் அணிக்கு இன்னும் 2 போட்டிகளில் ஒரு போட்டியில் வெற்றி பெற்றால் அவர்களது ப்ளே ஆஃப் வாய்ப்பும் சாதகமாக அமைந்துவிடும்.

சென்னை அணி தொடக்க போட்டிகளில் தோல்வி அடைந்தாலும் அவர்களுக்கு எஞ்சியுள்ள லக்னோ, சன்ரைசர்ஸ், குஜராத் அணிகளுக்கு எதிரான போட்டிகளில் 2ல் வெற்றி பெற்றாலே ப்ளே ஆஃப் வாய்ப்பு பிரகாசமாக மாறும். 3 போட்டிகளிலும் வெற்றி பெற்றால் ப்ளே ஆஃப் செல்வது உறுதியாகும்.

சென்னையா? பஞ்சாப்பா?

பஞ்சாப் அணி இனி தாங்கள் ஆடும் 2 போட்டிகளிலும் கட்டாயம் வெற்றி பெற்றாக வேண்டிய நெருக்கடியில் உள்ளனர். மே 17ம் தேதி அவர்கள் ஆர்சிபி அணியுடனும், மே 23ம் தேதி லக்னோ அணியுடனும் விளையாட உள்ளனர். இந்த இரண்டு போட்டிகளிலும் கட்டாயம் வெற்றி பெற்று 17 புள்ளிகள் பெற்றாக வேண்டும். அதேசமயம், சென்னை அணி தாங்கள் விளையாடும் மீதமுள்ள 3 போட்டிகளில் 1 போட்டியில் கட்டாயம் தோற்றாக வேண்டும். 2 போட்டியில் தோற்றால் பஞ்சாப்பிற்கு வாய்ப்பு பிரகாசம் ஆகும்.

லக்னோ, மும்பை, கொல்கத்தா, டெல்லி அணிகள் தொடரை விட்டு வெளியேறிய நிலையில் 4வது இடத்திற்கு மிகப்பெரிய போட்டி உருவாகியுள்ளது.

ராஜஸ்தானும் ஆர்வம்:

ராஜஸ்தான் அணி தங்களது எஞ்சிய 3 போட்டிகளில் வெற்றி பெற்றால் அவர்களது ப்ளே ஆஃப் வாய்ப்பு மிகவும் பிரகாசமாக மாறும். ஆர்சிபி, குஜராத் அணிகளின் ப்ளே ஆஃப் இடங்கள் ஏறத்தாழ உறுதியாகியுள்ள நிலையில் சன்ரைசர்ஸ், பஞ்சாப் மற்றும் ராஜஸ்தான் அணிகள் ப்ளே ஆஃப் சுற்றுக்குச் செல்ல கடும் போட்டியிடுகின்றனர். குறிப்பாக, ப்ளே ஆஃப் சுற்றுக்குச்செல்லப்போகும் 4வது அணி யார்? என்பதைத் தீர்மானிப்பதில் ரன்ரேட் மிகவும் முக்கிய பங்கு வகிக்கும்.

Virat Kohli: "இப்படி நடந்தா விளையாடமாட்டேன்.." 2027 உலகக்கோப்பையில் விராட் கோலி விளையாடமாட்டாரா?

சுகுமாறன் — Fri, 15 May 2026 17:47:05 +0530

உலக கிரிக்கெட்டின் அரசன் என்று ரசிகர்களால் கொண்டாடப்படுபவர் விராட் கோலி. இந்திய கிரிக்கெட் அணிக்கு வீரராகவும், கேப்டனாகவும் பல வெற்றிகளைப் பெற்றுத் தந்தவர். டெஸ்ட் மற்றும் டி20 கிரிக்கெட் போட்டிகளில் இருந்து ஓய்வு பெற்றுள்ள விராட் கோலி தற்போது ஒருநாள் போட்டிகளில் மட்டும் ஆடி வருகிறார்.

உலகக்கோப்பையில் விராட் கோலி ஆடுவாரா?

ஐபிஎல் கிரிக்கெட் தொடரில் ஆடி வரும் விராட் கோலி அடுத்தாண்டு நடக்கும் 50 ஓவர் ஒருநாள் கிரிக்கெட் போட்டிகளில் ஆடுவாரா? என்ற கேள்வி ரசிகர்கள் மத்தியில் எழுந்துள்ளது. இந்த சூழலில், அவர் அளித்துள்ள பேட்டியில் கூறியிருப்பதாவது,

நான் உடற்பயிற்சி செய்கிறேன். சத்தான உணவையே சாப்பிடுகிறேன். அதுவே எனது அன்றாட வாழ்க்கை. நான் அந்த வாழ்க்கையையே விரும்புவதால் அவ்வாறு வாழவே விரும்புகிறேன். இது கிரிக்கெட் விளையாடுவதற்காக மட்டும் அல்ல.

2027ம் ஆண்டு உலகக்கோப்பையில் நீங்கள் விளையாட விரும்புகிறீர்களா? என்ற கேள்வி என்னிடம் பல முறை கேட்கப்பட்டுள்ளது. எனக்கு அதற்கான பதில் தெரியும். நான் என் வீட்டை விட்டு எனது உடைமைகளுடன் வந்து எனக்கு என்ன வேண்டும் என்றே தெரியவில்லை என்றா சொல்லப்போகிறேன்? நான் விளையாட வந்தால் நிச்சயமாக விளையாடவே விரும்புகிறேன். கண்டிப்பாக நான் கிரிக்கெட் விளையாட வேண்டுமென்றால் நான் விளையாடுவேன். இந்திய அணிக்காக உலகக்கோப்பை விளையாடுவது ஒரு அற்புதமான தருணம். ஆனால், அந்த மதிப்பு இரண்டு தரப்பு சார்ந்ததாக இருக்க வேண்டும்.

மரியாதை இருந்தால் இருப்பேன்:

நான் மிகவும் தெளிவாக இருக்கிறேன். அந்த சூழலுக்கு என்னால் மதிப்பு கூடும் என்றால், நான் அங்கம் வகிப்பதால் மதிப்பு உயரும் என்று அந்த சூழலும் கருதினால் நான் அங்கு இருப்பேன். ஒருவேளை, நான் எனது திறமையையும், தகுதியையும் நிரூபிக்க வேண்டும் என்று கருதினால் அங்கு நான் இருக்க மாட்டேன்.

நான் பயிற்சியில் நேர்மையாக இருக்கிறேன். ஆட்டத்தை அணுகும் விதத்திலும் நான் நேர்மையை கடைபிடிக்கிறேன். கடினமாக உழைக்கிறேன். களத்தில் விளையாடும்போது மற்றவர்களைப் போல அல்லது அவர்களை விட கூடுதலாக உழைக்கிறேன். ஆட்டத்தை சரியான முறையில் விளையாடுகிறேன்.

அற்புதம்:

விஜய் ஹசாரே தொடரில் சென்று விளையாடி நான் யாருக்கும் எதையும் நிரூபிக்கப் போவதில்லை என்பதில் எனது மனம் தெளிவாக இருந்தது. நான் அங்கே செல்வது விளையாடுவதற்காக மட்டுமே. ஏனென்றால், எனக்கு விளையாடுவது மிகவும் பிடிக்கும். விஜய் ஹசாரே தொடரில் அப்படித்தான் விளையாடினேன். அது மிகவும் அற்புதமாக இருந்தது.

இவ்வாறு அவர் பேட்டி அளித்தார்.

கம்பீர் - அகர்கர் அழுத்தம்:

ஒட்டுமொத்த இந்திய ரசிகர்களின் எதிர்பார்ப்பும் விராட் கோலி மற்றும் ரோகித் சர்மா இருவரும் அடுத்தாண்டு நடக்கும் ஒருநாள் உலகக்கோப்பையில் ஆடுவார்களா? என்பதே ஆகும். அணியின் பயிற்சியாளர் கவுதம் கம்பீர் மற்றும் அணித் தேர்வுக்குழு தலைவர் அஜித் அகர்கர் இருவரும் ரோகித் சர்மா மற்றும் விராட் கோலி அணியில் நீடிக்க முழு ஒத்துழைப்பு அளிக்க மறுப்பதாக தொடர்ந்து தகவல்கள் வெளியாகி வருகிறது.

விராட் கோலி முழு உடற்தகுதியுடன், ஆட்டத்திறனுடனும் இருக்கும்போதும் அவரை டெஸ்ட் அணியில் இருந்து ஓய்வு பெற கட்டாயப்படுத்தப்பட்டதாகவே குற்றச்சாட்டு உள்ளது.

பேட்டிங் தூண்கள்:

இந்திய கிரிக்கெட் அணியின் ஒருநாள் அணியின் கடந்த கால செயல்பாட்டின் தரவுகளை எடுத்துப் பார்த்தால் விராட் கோலி மற்றும் ரோகித் சர்மா ஆகிய இருவர் மட்டுமே அணியின் பேட்டிங் ஆர்டரை தாங்கும் தூணாக தொடர்ச்சியாக உள்ளனர். மற்ற வீரர்களிடம் நிலையான மற்றும் ஸ்திரத்தன்மையான பேட்டிங் காணப்படவில்லை. இதனால், விராட் கோலி மற்றும் ரோகித் சர்மா இருவரும் இந்திய அணிக்காக தொடர்ந்து ஆட வேண்டும் என்று ரசிகர்களும், கிரிக்கெட் விமர்சகர்களும் வேண்டுகோள் விடுத்து வருகின்றனர்.

Jamie Overton Injury: பிளே ஆஃப் கனவு தானா? காயத்தால் வெளியேறிய ஜேமி ஓவர்டன்... சிஎஸ்கே-வின் அடுத்த பிளான் என்ன?

ஜேம்ஸ் — Thu, 14 May 2026 07:38:53 +0530

ஐபிஎல் 2026 சீசன் இறுதிக்கட்டத்தை எட்டியுள்ள நிலையில், சென்னை சூப்பர் கிங்ஸ் அணிக்குத் தற்பொழுது ஒரு பின்னடைவு ஏற்பட்டுள்ளது. அணியின் முக்கிய வேகப்பந்து வீச்சு ஆல்-ரவுண்டரான ஜேமி ஓவர்டன், காயம் காரணமாக எஞ்சியுள்ள லீக் போட்டிகளில் விளையாட மாட்டார் என அறிவிக்கப்பட்டுள்ளது.

பிளே-ஆஃப் முனைப்பில் சிஎஸ்கே

நடப்பு சீசனில் தொடக்கத்தில் தடுமாறினாலும், அடுத்தடுத்து வெற்றிகளைக் குவித்து சிஎஸ்கே தற்போது ஃபார்முக்கு வந்துள்ளது. இதுவரை 11 போட்டிகளில் விளையாடியுள்ள சென்னை அணி, 6 வெற்றிகளுடன் புள்ளிகள் பட்டியலில் 5-வது இடத்தில் உள்ளது. பிளே-ஆஃப் சுற்றுக்குத் தகுதி பெற இன்னும் 3 போட்டிகளே எஞ்சியுள்ள நிலையில், ஓவர்டனின் விலகல் அணிக்குச் சவாலாக அமையலாம்.

ஜேமி ஓவர்டனுக்கு என்ன ஆனது?

சிஎஸ்கே அணி நிர்வாகம் வெளியிட்டுள்ள அதிகாரப்பூர்வ தகவலின்படி: ஜேமி ஓவர்டனுக்கு வலது தொடைப்பகுதியில் காயம் (Right thigh injury) ஏற்பட்டுள்ளது. மேல் சிகிச்சை மற்றும் பரிசோதனைக்காக அவர் இங்கிலாந்திற்குத் திரும்பியுள்ளார்.அவர் மீண்டும் எப்போது அணிக்குத் திரும்புவார் என்பது குறித்த தெளிவான தகவல் இன்னும் வெளியாகவில்லை. எனினும், அடுத்த 3 போட்டிகளில் அவர் விளையாட வாய்ப்பில்லை என்றே கூறப்படுகிறது.

Official Announcement

Jamie Overton has a right thigh injury and will be returning to the UK for further assessment and management. pic.twitter.com/pzlO5qE9Dp
— Chennai Super Kings (@ChennaiIPL) May 13, 2026

சிஎஸ்கே-வில் புதிய வீரர் சேர்ப்பு

ஜேமி ஓவர்டனின் நிலை குறித்து இன்னும் இறுதி முடிவு எடுக்கப்படாத நிலையில், காலில் ஏற்பட்ட எலும்பு முறிவு காரணமாகத் தொடரிலிருந்து விலகிய வேகப்பந்து வீச்சாளர் ராமகிருஷ்ணா கோஷிற்கு பதிலாக, கர்நாடகாவைச் சேர்ந்த ஆல்-ரவுண்டர் மெக்னீல் நோரோன்ஹாவை (Macneil Noronha) சிஎஸ்கே ஒப்பந்தம் செய்துள்ளது.

சிஎஸ்கேவுக்கு ஏன் முக்கியம்?

இந்த சீசனில் சிஎஸ்கே-வின் வெற்றிகளில் ஓவர்டன் முக்கியப் பங்கு வகித்துள்ளார். 11 போட்டிகளில் விளையாடிய அவர் 14 விக்கெட்டுகளை வீழ்த்தி, சிஎஸ்கே-வின் இரண்டாவது அதிக விக்கெட் எடுத்த வீரராக உள்ளார்.லக்னோ அணிக்கு எதிரான கடந்த ஆட்டத்தில் 36 ரன்கள் விட்டுக்கொடுத்து 3 விக்கெட்டுகளை வீழ்த்தி அசத்தினார்.

நாளை (மே 15) நடைபெறவுள்ள முக்கியமான ஆட்டத்தில் லக்னோ சூப்பர் ஜெயண்ட்ஸ் அணியை மீண்டும் சென்னை எதிர்கொள்கிறது. ஓவர்டன் இல்லாதது சிஎஸ்கே-வின் பந்துவீச்சு பலத்தைக் குறைக்குமா அல்லது மாற்று வீரர்கள் கைகொடுப்பார்களா என்பதைப் பொறுத்திருந்து தான் பார்க்க வேண்டும்.

Hardik Pandya: ஹர்திக் பாண்ட்யாவிற்கு குட் பை சொல்லப்போகும் மும்பை இந்தியன்ஸ்?

சுகுமாறன் — Mon, 11 May 2026 21:27:39 +0530

ஐபிஎல் தொடரில் மும்பை இந்தியன்ஸ் அணிக்காக பல முறை வெற்றியைப் பெற்றுக்கொடுத்தவர் ஹர்திக் பாண்ட்யா. பின்னர் குஜராத் அணிக்காக ஆடினார். அங்கு சென்ற முதல் சீசனிலே கோப்பையைப் பெற்றுக்கொடுத்தவர் பின்னர் மீண்டும் மும்பை அணிக்காக திரும்பினார்.

ஹர்திக் பாண்ட்யா தலைமையில் சொதப்பும் மும்பை:

மும்பை அணிக்கு திரும்பி வந்ததும் கேப்டனாக தனது ஆட்டத்தை தொடங்கிய ஹர்திக் பாண்ட்யாவிற்கு சறுக்கல் மேல் சறுக்கல் இருந்தது. 2024ம் ஆண்டு மும்பைக்கு கேப்டனாக திரும்பிய ஹர்திக் பாண்ட்யா தலைமையில் மும்பை இந்தியன்ஸ் அணி கடந்த 3 சீசன்களிலும் மிக மோசமாக ஆடி தோல்வியைத் தழுவியுள்ளது.

இந்த சீசனிலும் தொடரை விட்டு மும்பை இந்தியன்ஸ் அணி வெளியேறியுள்ள நிலையில், ஹர்திக் பாண்ட்யாவின் கேப்டன்சியும், அவரது பேட்டிங் மற்றும் பந்துவீச்சும் மும்பை நிர்வாகத்திற்கு பெரும் அதிருப்தியை உண்டாக்கியுள்ளதாக கூறப்படுகிறது. கடந்த 2 போட்டிகளில் அவருக்கு பதிலாக சூர்யகுமார் யாதவ் அந்த அணியை வழிநடத்தி வருகிறார்.

கழட்டிவிடப்போகிறார்களா?

ஹர்திக் பாண்ட்யாவிற்கு காயம் ஏற்பட்டிருப்பதாலும் அதன் காரணமாகவே அவர் அணியில் ஆடவில்லை என்று அணியின் பயிற்சியாளர் ஜெயவர்தனே கூறினாலும் அணி நிர்வாகம் அவரை விடுவிக்கத் தயாராகி இருப்பதாகவே தகவல்கள் வெளியாகி வருகிறது. ஹர்திக் பாண்ட்யாவும் தனது இன்ஸ்டாகிராம் பக்கத்தில் மும்பை இந்தியன்ஸ் அணியை பின்தொடர்வதை நிறுத்தியுள்ளார். இது இந்த தகவலை மேலும் வலுப்படுத்தியுள்ளது.

ஹர்திக் பாண்ட்யா தலைமையில் 2024 களமிறங்கிய மும்பை அணி 10வது இடத்திற்கு சென்றது. கடந்த சீசனில் ப்ளே ஆஃப் சுற்றுக்குச் சென்று 4வது இடத்தில் தோற்றது. இந்த சீசனில் முதல் அணியாக தொடரை விட்டு வெளியேறியுள்ளது. குறிப்பாக, சென்னை அணிக்கு எதிராக மும்பையில் நடந்த போட்டியில் 208 ரன்கள் இலக்கை நோக்கி களமிறங்கிய மும்பை அணி அடுத்தடுத்து விக்கெட்டுகளை இழந்து தோல்வி உறுதியானபோது அந்த அணியின் உரிமையாளர் ஆனந்த் அம்பானி அதிருப்தியில் ரசிகர்களிடம் கையை காட்டி புறப்படுங்கள் என்று சைகை செய்து விட்டுச் சென்ற சம்பவம் பெரும் பரபரப்பை ஏற்படுத்தியது.

எந்த அணிக்கு போவார்?

இந்த சூழலில், ஹர்திக் பாண்ட்யாவின் ஒப்பந்தத்தை முடித்துக் கொள்ள அணி நிர்வாகம் தயாராகிவிட்டதாக தகவல்கள் வெளியாவதும், நடக்கும் நிகழ்வுகளும் அதை உறுதிப்படுத்துவதாகவே அமைகிறது. ஹர்திக் பாண்ட்யா அப்படி வெளியேறினால் எந்த அணிக்காக ஆடுவார்? அவ்வாறு சென்றால் அவர் கேப்டனாக களமிறங்குவாரா? அல்லது வீரராக தொடர்வாரா? என்ற பல்வேறு கேள்விகள் எழுந்துள்ளது. இந்த நிகழ்வுகளால் இந்திய அணியில் அவரது ஆட்டத்திறன் பாதிக்குமா? என்ற கேள்வியும் ரசிகர்கள் மத்தியில் எழுந்துள்ளது.

ஹர்திக் பாண்ட்யா 160 ஐபிஎல் போட்டிகளில் ஆடி 2 ஆயிரத்து 895 ரன்கள் எடுத்துள்ளார். 91 ரன்களை அதிகபட்சமாக விளாசியுள்ளார். 10 அரைசதங்கள் விளாசியுள்ளார். 44 முறை அவுட்டாகாமல் ஆடியுள்ளார். அதேபோல பந்துவீச்சில் 82 விக்கெட்டுகளையும் வீழ்த்தியுள்ளார்.

"MI-ஐ அன்பாலோ செய்தாரா ஹர்திக்? பிளே-ஆஃப் கனவு கலைந்த நிலையில் வைரலாகும் தகவல்கள்.. நடந்தது என்ன?

ஜேம்ஸ் — Mon, 11 May 2026 13:32:59 +0530

ஐபிஎல் 2026 தொடரில் ராயல் சேலஞ்சர்ஸ் பெங்களூரு அணிக்கு எதிரான கடைசி பந்து தோல்வியைத் தொடர்ந்து, மும்பை இந்தியன்ஸ் அணியின் பிளே-ஆஃப் கனவு கலைந்தது.

பாண்டியாவுடன் விரிசல்?

இந்தத் தோல்வியைத் தாண்டி, தற்போது கேப்டன் ஹர்திக் பாண்டியாவுக்கும் மும்பை இந்தியன்ஸ் நிர்வாகத்திற்கும் இடையே சுமூகமான உறவு இல்லையோ என்ற விவாதம் சமூக வலைதளங்களில் பேசுபொருளாகியுள்ளது. ஹர்திக் பாண்டியா உடல்நலக்குறைவால் விளையாட முடியாத நிலையில் சூர்யகுமார் யாதவ் அணியை வழிநடத்தினார். இருப்பினும், இந்த சீசன் முழுவதும் மும்பை இந்தியன்ஸ் அணி மிக மோசமான ஆட்டத்தையே வெளிப்படுத்தியது. ஐந்து முறை சாம்பியன் பட்டம் வென்ற அந்த அணிக்கு, இது வரலாற்றிலேயே ஒரு மோசமான தொடராக அமைந்தது.

இன்ஸ்டாகிராம் 'அன்பாலோ' வதந்திகள்

தொடரில் இருந்து மும்பை இந்தியன்ஸ் வெளியேறிய உடனே, ஹர்திக் பாண்டியா தனது இன்ஸ்டாகிராம் பக்கத்தில் இருந்து மும்பை இந்தியன்ஸ் அணியுடன் இணைந்து பதிவிட்ட (Collaborative posts) புகைப்படங்களை நீக்கிவிட்டதாகவும், அந்த அணியின் அதிகாரப்பூர்வ கணக்கை 'அன்பாலோ' (Unfollow) செய்துவிட்டதாகவும் தகவல்கள் பரவின. இந்த சீசனில் அணியின் மோசமான செயல்பாடு காரணமாக, அவருக்கும் நிர்வாகத்திற்கும் இடையே மோதல் வெடித்திருக்கலாம் என ரசிகர்கள் கேள்வி எழுப்பத் தொடங்கினர். இது சமூக வலைதளங்களில் பெரும் விவாதத்தை ஏற்படுத்தியது.

வதந்திகளுக்கு முற்றுப்புள்ளி?

ஆனால், பாண்டியாவின் இன்ஸ்டாகிராம் பக்கத்தை உற்று நோக்கினால் இந்தத் தகவல்கள் உண்மைக்குப் புறம்பானவை என்பது தெரிகிறது. 2026 ஐபிஎல் தொடர்பான பதிவுகள் அவரது பக்கத்தில் குறைவாக இருந்தாலும், மார்ச் 23 அன்று மும்பை இந்தியன்ஸ் அணியுடன் இணைந்து அவர் பதிவிட்ட புகைப்படம் இன்னும் அவரது பக்கத்தில் அப்படியே உள்ளது. அதுமட்டுமின்றி, அவர் இன்னமும் மும்பை இந்தியன்ஸ் அணியின் இன்ஸ்டாகிராம் பக்கத்தைப் பின்தொடர்ந்து (Follow) வருகிறார். இதன் மூலம், சமூக வலைதளங்களில் பரவி வரும் வதந்திகளில் உண்மை ஏதுமில்லை என்பது உறுதியாகியுள்ளது. இருப்பினும், அடுத்த சீசனை முன்னிட்டு மும்பை அணியில் பெரிய மாற்றங்கள் இருக்குமா என்ற எதிர்பார்ப்பு நிலவுகிறது.

CSK Ipl Match : சென்னையில் மிரட்டும் மழை.! சிஎஸ்கே போட்டி நடக்குமா.? தமிழ்நாடு வெதர்மேன் லேட்டஸ்ட் அப்டேட்

கு. அஜ்மல்கான் — Sun, 10 May 2026 08:30:28 +0530

முக்கிய கட்டத்தில் ஐபிஎல் போட்டி

கிரிக்கெட் ரசிகர்களின் பெரும் வரவேற்பை பெற்றுள்ள ஐபிஎல் போட்டி முக்கிய கட்டத்தை எட்டியுள்ளது. யார் பிளே ஆப் சுற்றை எட்டுவார்கள் என எதிர்பார்ப்பு எழுந்துள்ளது. அந்த வகையில் சன் ரைசஸ் ஹைதராபாத் 11 போட்டிகளில் விளையாடி 7 போட்டிகளில் வெற்றிபெற்று முதல் இடத்தில் உள்ளது. அடுத்த இடத்தில் குஜராத் டைட்டன்ஸ் அணியும், பஞ்சாப் கிங்ஸ் அணியும் உள்ளது. அந்த வகையில் அதிகளவு ரசிகர் பட்டாளங்களை கொண்ட சென்னை சூப்பர் கிங்ஸ் 10 போட்டிகளில் விளையாடி 5 போட்டிகளில் வெற்றி பெற்று 6வது இடத்தில் உள்ளது. இந்த நிலையில் சென்னை அணி பிளேஆப் சுற்றை எட்ட அடுத்து நடைபெறவுள்ள போட்டிகளில் வெற்றி பெற வேண்டிய கட்டாயத்தில் உள்ளது.

சென்னையில் ஐபிஎல் போட்டி

இந்த நிலையில் இன்று சென்னையில் மதியம் சிஎஸ்கே- லக்னோ அணிகளுக்கு இடையிலான போட்டியானது நடைபெறவுள்ளது. இந்த போட்டியில் சென்னை அணி வெற்றி பெற்று பிளே ஆப் சுற்றை எட்டும் அணிகள் பட்டியலில் இணையும் என எதிர்பார்க்கப்படுகிறது. எனவே இன்றைய போட்டி முக்கியத்துவம் வாய்ந்தாக கருதப்படும் நிலையில், சென்னையில் கடந்த 2 நாட்களாக விட்டு விட்டு மழையானது பெய்து வருகிறது. இதனால் ஒரு சில இடங்களில் மழை நீர் தேங்கியுள்ளது. இன்று காலையிலும் மழையானது பெய்தது. மாலையிலும் மழை பெய்ய வாய்ப்பிருப்பதாக தகவல் வெளியானது.

சிஎஸ்கே போட்டி- மழை பாதிக்குமா.?

இதனால் சென்னை சூப்பர் கிங்ஸ் ரசிகர்கள் அதிர்ச்சி அடைந்துள்ளனர். எனவே திட்டமிட்டப்படி போட்டி நடைபெறுமா.? என்ற சந்தேகம் எழுந்துள்ள நிலையில், சென்னையில் இன்று மாலை மழை பெய்ய வாய்ப்பு இல்லையென தனியார் வானிலை ஆய்வாளர் தமிழ்நாடு வெதர்மேன் பிரதீப் ஜான் தெரிவித்துள்ளார். இது தொடர்பாக அவர் வெளியிட்டுள்ள பதிவில், CSK vs LSG கிரிக்கெட் போட்டியை மழை போட்டியை பாதிக்காது என குறிப்பிட்டுள்ளவர், இன்று காலை கடைசி சுற்று மழை சென்னையில் பெய்துள்ளது. எனவே இன்று மாலை கிரிக்கெட் போட்டியை மழை பாதிக்காது என தெரிவித்துள்ளார். இன்று காலைக்குப் பிறகு சென்னையில் பெரிய அளவில் மழை பெய்யாது என குறிப்பிட்டுள்ளார்.