cricket

Watch Video: ஃபயர் மோடில் டிஎஸ்பி சிராஜ் பேட்டிங்.. ஹாட்ரிக் சிக்ஸர்.. கொண்டாடும் ரசிகர்கள்!

சுகுமாறன் — Mon, 10 Aug 2026 17:01:03 +0530

இந்திய கிரிக்கெட் அணி இலங்கைக்கு சுற்றுப்பயணம் மேற்கொண்டு டெஸ்ட் தொடரில் ஆட உள்ளது. இந்திய அணி இலங்கை கிரிக்கட் லெவனுடன் பயிற்சி ஆட்டத்தில் மோதியது. இந்த போட்டியில் முதல் இன்னிங்சில் இலங்கை அணி 363 ரன்கள் குவித்த நிலையில், இந்திய அணி படிக்கல்லின் அபார சதத்தால் 357 ரன்கள் குவித்து டிக்ளேர் செய்தது.

207 ரன்கள் டார்கெட்:

இதையடுத்து, இரண்டாவது இன்னிங்சில் இலங்கை 200 ரன்கள் குவித்து டிக்ளேர் செய்ய இந்திய அணிக்கு 207 ரன்கள் எடுத்தால் வெற்றி என்ற இலக்குடன் களமிறங்கியது. 45 ஓவரில் 207 ரன்கள் எடுத்தால் வெற்றி என்ற இலக்குடன் களமிறங்கிய இந்தியாவிற்கு ஜெய்ஸ்வால் 61 ரன்கள் எடுத்து ரிட்டையர்ட் ஆகினார்.

சுப்மன்கில் 44 ரன்கள் எடுத்து அவுட்டாக ரிஷப்பண்ட் 28 ரன்களுக்கும், துருவ் ஜுரல் 17 ரன்களுக்கும் அவுட்டாகினர். ஜடேஜா 22 ரன்களுக்கும், மானவ் சுதர் 4 ரன்களுக்கும் அவுட்டாக கடைசி ஓவரில் இந்தியாவின் வெற்றிக்கு 16 ரன்கள் தேவைப்பட்டது. கடைசி ஓவரை கேஷரா நுவந்தா வீசினார்.

Hey #Siraj won warm-up match with hat-trick sixes. #GauthamGambhir smile pic.twitter.com/jmmo6P3H98
— Studio Flicks (@StudioFlicks) August 10, 2026

ஹாட்ரிக் சிக்ஸர்:

அப்போது ஸ்ட்ரைக்கில் இருந்த முகமது சிராஜ் முதல் பந்தை சிக்ஸருக்கு விளாசினார். பின்னர், அதற்கு அடுத்த இரண்டு பந்துகளையும் சிக்ஸருக்கு விளாசி இந்தியாவை வெற்றி பெற வைத்தார். 15 பந்துகளில் 1 பவுண்டரி 4 சிக்ஸருடன் 32 ரன்கள் எடுத்து சிராஜ் ஆட்டமிழக்காமல் இருந்தார். ஹாடரிக் சிக்ஸர் அடித்து இந்திய அணியை வெற்றி பெற வைத்த முகமது சிராஜிற்கு பாராட்டுகள் குவிந்து வருகிறது.

இந்திய அணியின் நட்சத்திர வேகப்பந்துவீச்சாளர் முகமது சிராஜ். டெஸ்ட், ஒருநாள் மற்றும் டி20 போட்டிகளில் மிகவும் தவிர்க்க முடியாத பந்துவீச்சாளராக சிராஜ் உள்ளார். பும்ரா காயத்தால் அவதிப்படும் தருணங்களில் தனி ஆளாக இந்திய அணியை பல முறை காப்பாற்றியுள்ளார்.

சிறந்த பந்துவீச்சாளர்:

முகமது சிராஜ் மிகப்பெரிய அளவில் பேட்டிங்கில் ஜொலிப்பவர் இல்லையென்றாலும் அவரது பலம் காரணமாக அவர் நல்ல ஹிட்டராக உள்ளார். இந்திய அணிக்காக அர்ப்பணிப்பு உணர்வுடன் ஆடும் முகமது சிராஜ் தொடர்ந்து சமீபகாலமாக இந்திய அணியில் இடம் முறையாக கிடைக்காமல் அவதிப்பட்டு வருகிறார்.

அடுத்தாண்டு உலகக்கோப்பை நடைபெற உள்ள நிலையில், முகமது சிராஜ் கண்டிப்பாக இந்திய அணியில் இடம்பிடிக்க வேண்டும் என்று ரசிகர்கள் பலரும் கருத்து தெரிவித்து வருகின்றனர். முகமது சிராஜ் இந்திய அணிக்காக டெஸ்ட் போட்டிகளில் 46 போட்டிகளில் 140 விக்கெட்டுகளையும், 50 ஒருநாள் போட்டிகளில் 76 விக்கெட்டுகளையும், 17 டி20 போட்டிகளில் 17 விக்கெட்டுகளையும் வீழ்த்தியுள்ளார். ஐபிஎல் தொடரில் 125 போட்டிகளில் 128 விக்கெட்டுகளை வீழ்த்தியுள்ளார்.

Devdutt Padikkal: ஒன் டவுன் வீரராக களமிறங்கும் படிக்கல்? தடைக்கல்லை உடைத்து வரலாறு படைப்பாரா?

சுகுமாறன் — Sun, 9 Aug 2026 18:44:56 +0530

இந்திய அணி தற்போது இலங்கைக்கு சுற்றுப்பயணம் மேற்கொண்டு ஆடி வருகிறது. தற்போது நடந்த பயிற்சி போட்டியில் இந்திய அணி அபார வெற்றி பெற்றுள்ளது. இந்திய அணி இந்த தொடரில் இரு டெஸ்ட் போட்டிகளில் ஆடுகிறது.

3வது இடத்திற்கு தடுமாறும் இந்தியா:

இரு அணிகளும் முதல் டெஸ்ட் போட்டி காலேவில் வரும் ஆகஸ்ட் 15ம் தேதி நடைபெறது. இந்திய அணி சமீபகாலமாகவே டெஸ்ட் போட்டிகளில் மோசமாகவே ஆடி வருகிறது. விராட் கோலி டெஸ்ட் போட்டிகளில் இருந்து ஓய்வு பெற்ற பிறகு அவரது இடத்தில் சுப்மன்கில் ஆடி வருகிறார்.

3வது இடத்தில் புஜாரா ஆடுவார். அவருக்கு பிறகு தற்போது வரை இந்திய அணி 3வது இடத்திற்கான சிறந்த வீரரை கண்டுபிடிக்க இயலாமல் தடுமாறி வருகிறது. அதற்காக சாய் சுதர்சனை களமிறக்கி ஆடி வருகின்றனர். அவர் மிகப்பெரிய தாக்கத்தை ஏற்படுத்தாவிட்டாலும் சிறப்பாக ஆடி வருகிறார். இந்த சூழலில், இலங்கைத் தொடருக்கு முன்பு அவர் காயத்தில் சிக்கியிருப்பதால் அவர் இந்த தொடரில் ஆடுவதில் கேள்வி எழுந்துள்ளது.

படிக்கலுக்கு பொன்னான வாய்ப்பு:

இதனால், அவருக்கு பதிலாக தேவ்தத் படிக்கல் களமிறங்க வாய்ப்பு இருப்பதாக கருதப்படுகிறது. இவர் கொழும்புவில் நடந்த பயிற்சி போட்டியில் 164 பந்துகளில் 18 பவுண்டரியுடன் 142 ரன்களை விளாசினார். 26 வயதான தேவ்தத் படிககல் இதுவரை 2 டெஸ்ட் போட்டிகளில் ஆடியுள்ளார். அதில் 90 ரன்கள் விளாசியுள்ளார். அதிகபட்சமாக 65 ரன்கள் எடுத்துள்ளார். 2022ம் ஆண்டு அவர் கடைசியாக பெர்த் மைதானத்தில் ஆஸ்திரேலியாவிற்கு எதிராக டெஸ்ட் போட்டியில் ஆடினார்.

அதன்பின்பு, கடந்த 4 ஆண்டுகளாக இந்திய அணியில் டெஸ்ட் போட்டியில் ஆடுவதற்கு வாய்ப்பு கிடைக்காத தேவ்தத் படிக்கல்லுக்கு இந்த தொடரில் மீண்டும் அணியில் இடம்பிடிக்க வாய்ப்பு கிடைத்துள்ளது. இந்த டெஸ்ட் தொடரில் அவர் சிறப்பாக ஆடினால் இந்திய அணியில் நீண்ட காலத்திற்கு 3வது இடத்தை ஆக்கிரமிக்கும் அரிதான வாய்ப்பை படிக்கல் பெறலாம். கிடைத்த வாய்ப்பை தேவ்தத் படிக்கல் சிறப்பாக பயன்படுத்திக் கொள்வாரா? தன்னை ஒரு அடுத்த நட்சத்திரமாக உருவாக்கிக் கொள்வாரா? என்ற கேள்வியும் எழுந்துள்ளது.

3 வடிவத்திலும் அசத்தும் வீரர்:

டெஸ்ட், ஒருநாள் மற்றும் டி20 போட்டி என 3 வடிவங்களிலும் ஆடும் ஆற்றல் கொண்டவராக திகழும் தேவ்தத் படிக்கல் சிறப்பாக ஆடினால் 3 வடிவ போட்டியிலும் தவிர்க்க முடியாத வீரராக திகழ்வார் என்று கருதப்படுகிறது. கடந்த ஐபிஎல் தொடரில் ஆர்சிபி அணி வெற்றி பெறுவதற்கு மிக மிக முக்கிய காரணமாக தேவ்தத் படிக்கல் திகழ்ந்தார் என்பது குறிப்பிடத்தக்கது.

26 வயதான படிக்கல் 90 ஐபிஎல் போட்டிகளில் ஆடி 89 இன்னிங்சில் 2 ஆயிரத்து 2270 ரன்கள் எடுத்துள்ளார். அதிகபட்சமாக 101 ரன்கள் எடுத்துள்ளார். 4 முறை நாட் அவுட்டாக திகழ்ந்துள்ளார்.

Asia Cup 2027: ஆசிய கோப்பை அட்டவணை - வங்கதேசத்தில் பவுன்சர் பிட்ச்கள் -இந்தியா பயணிக்குமா?

குலசேகரன் முனிரத்தினம் — Sun, 9 Aug 2026 12:38:39 +0530

Asia Cup 2027 Ind Vs Ban: உலகக் கோப்பையை மனதில் கொண்டு பவுன்சிங் மைதானங்களை தயார்படுத்த வங்கதேசம் திட்டமிட்டுள்ளதாம்.

ஆசியக் கோப்பை கிரிக்கெட்..!

அடுத்த ஆண்டின் இறுதியில் தென்னாப்பிரிக்கா, ஜிம்பாப்வே மற்றும் நமீபியாவில் நடைபெறவிருக்கும் ஒருநாள் உலகக் கோப்பைக்கு முன்னதாக, 2027ம் ஆண்டிற்கான ஆசிய கோப்பையை 50 ஓவர் எடிஷனாக நடத்த வங்கதேசம் திட்டமிட்டுள்ளதாம். ஆசிய கிரிக்கெட் கவுன்சில் இன்னும் தேதிகளை அதிகாரப்பூர்வமாக அறிவிக்கவில்லை என்றாலும், 2027 ஜூன் 18 முதல் ஜூலை 4 வரை போட்டிகள் நடைபெறும் என எதிர்பார்க்கப்படுகிறது. இப்போட்டியை வங்கதேசம் நடத்தும் என பரவலாக கூறப்படுகிறது.

ஆசிய கோப்பை 2027 தேதி & இடங்கள்

வெளியாகியுள்ள தகவல்களின்படி, ஆசியக் கோப்பைத் தொடர் ஜூன் 18 அன்று தொடங்கி, அதன் இறுதிப் போட்டி ஜூலை 4 அன்று நடைபெற உள்ளது. இதற்கான உத்தேச இடங்களாக மிர்ப்பூர், சட்டோகிராம் மற்றும் சில்ஹெட் ஆகியவை அடையாளம் காணப்பட்டுள்ளன. வங்கதேச கிரிக்கெட் வாரியம் மூன்று மைதானங்கள் குறித்த விவரங்களை ஆசிய கிரிக்கெட் சம்மேளனத்துடன் பகிர்ந்துள்ளதாம். இருப்பினும், இறுதி போட்டி நடத்தும் ஏற்பாடுகள் மற்றும் முழுமையான அட்டவணை ஆகியவை இன்னும் அதிகாரப்பூர்வ உறுதிப்படுத்தவில்லையாம். 2027ம் ஆண்டின் பிற்பகுதியில் நடைபெறவிருக்கும் 50 ஓவர் உலகக் கோப்பைக்குத் தயாராகும் அணிகளுக்கு இந்தப் போட்டி மிகவும் பொருத்தமானதாக அமையும் என கூறப்படுகிறது.

தயாராகும் பவுன்சி மைதானங்கள்?

தென்னாப்பிரிக்காவில் நடைபெறவிருக்கும் 2027 ஒருநாள் உலகக் கோப்பைக்கு சில மாதங்களுக்கு முன்பு ஆசியக் கோப்பை நடைபெறுகிறது. இதனால், வங்கதேசம் தனது நாட்டில் வழக்கமாக அமைக்கும் ஆடுகளங்களுக்கு மாற்றாக, அதிக வேகம் மற்றும் பவுன்ஸ் உடன் கூடிய ஆடுகளங்களைத் தயார் செய்யக்கூடும் என தகவல்கள் வெளியாகியுள்ளது. தென்னாப்பிரிக்காவில் எதிர்பார்க்கப்படும் சூழல்களுக்கு நெருக்கமான நிலைமைகளை ஆசிய அணிகளுக்கு வழங்குவதற்காக, இந்தப் போட்டித் தொடருக்கு வேகமான, அதிக பவுன்ஸ் கொண்ட ஆடுகளங்களை ஆசிய கிரிக்கெட் சம்மேளனம் விரும்புவதாக தெரிகிறது. இது ஆசிய அணிகளின் பந்துவீச்சாளர்கள் தங்களை மேம்படுத்திக்கொள்ள உதவுவது மட்டுமின்றி ஆஸ்திரேலியா, இங்கிலாந்து மற்றும் தென்னாப்ரிக்கா பந்துவீச்சாளர்களை எதிர்கொள்ள ஆசிய அணிகளின் பேட்ஸ்மேன்களுக்கும் மிகப்பெரிய பயிற்சி தொடராக அமையும் என எதிர்பார்க்கப்படுகிறது.

இதையும் படியுங்கள்: Minister Ramesh: DMKவினர் தூங்கிக் கொண்டு இருந்தார்களா? பஞ்ச் பேசினார்களே? - அமைச்சர் ரமேஷ் அதிரடி கேள்விகள்

வங்கதேசம் செல்லுமா இந்தியா?

இந்தியா மற்றும் வங்கதேசம் இடையேநிலவும் அரசியல் பதற்றங்கள் காரணமாக, இந்தியாவின் பங்கேற்பு உன்னிப்பாகக் கவனிக்கப்படுகிறது. தற்போது, ஆசியக் கோப்பைப் போட்டியில் பங்கேற்க இந்தியா மறுக்கும் என்பதற்கு உறுதியான அறிகுறி எதுவும் இல்லை. இந்தியாவின் பங்கேற்பு குறித்த எந்தவொரு முடிவும், இறுதி அட்டவணை, பாதுகாப்பு ஏற்பாடுகள் மற்றும் சம்பந்தப்பட்ட கிரிக்கெட் அதிகாரிகளுக்கு இடையேயான கலந்துரையாடல்களைப் பொறுத்தே அமையும்.

தற்போதைக்கு, முக்கிய விவரங்கள் தற்காலிகமானவையாகவே உள்ளன. அறிவிக்கப்பட்ட ஜூன் 18 முதல் ஜூலை 4 வரையிலான காலக்கட்டம், முன்மொழியப்பட்ட வங்கதேச மைதானங்கள் மற்றும் வேகமான ஆடுகளங்களுக்கான திட்டங்கள் ஆகிய அனைத்தும் இறுதியானதும் ஆசிய கிரிக்கெட் சம்மேளனத்தால் அதிகாரப்பூர்வ அறிவிப்பு வெளியிடப்படும் என எதிர்பார்க்கப்படுகிறது.

உள்நாட்டு கிரிக்கெட்டில் அதிரடி மாற்றம்: புதுச்சேரி அணியில் களம் இறங்கும் பஞ்சாப் கிங்ஸ் துணை கேப்டன்!

சிவரஞ்சித் — Tue, 4 Aug 2026 19:34:09 +0530

புதுச்சேரி: ஸ்ரேயஸ் அய்யர் தலைமையிலான பஞ்சாப் கிங்ஸ் ஐபிஎல் அணியின் துணை கேப்டன் ஷஷாங்க் சிங் உள்நாட்டு கிரிக்கெட்டில் சத்திஸ்கர் அணியிலிருந்து விலகி அடுத்த உள்நாட்டுக் கிரிக்கெட் தொடர் சீசனில் புதுச்சேரி அணியில் ஆடவிருக்கிறார்.

7 ஆண்டு கால பயணம் நிறைவு:

ஐபிஎல் கிரிக்கெட் தொடரில் பஞ்சாப் கிங்ஸ் அணியின் துணை கேப்டனாகச் செயல்பட்டு வரும் முன்னணி ஆல்ரவுண்டர் ஷஷாங்க் சிங், உள்நாட்டு கிரிக்கெட்டில் சத்தீஸ்கர் அணியில் இருந்து விலகி, வரவிருக்கும் புதிய சீசனில் புதுச்சேரி அணிக்காக விளையாடத் தீர்மானித்துள்ளார். சத்தீஸ்கர் அணிக்காக கடந்த 7 ஆண்டுகளாக விளையாடி வந்த ஷஷாங்க் சிங், அந்த அணிக்காக 24 முதல்தரப் போட்டிகளில் (First-Class) பங்கேற்று 29.19 சராசரியுடன் 905 ரன்களை எடுத்துள்ளார்.

அவரது 'லிஸ்ட் ஏ' (List A) ஒருநாள் போட்டிப் புள்ளிவிவரங்கள் மிகவும் சிறப்பானவையாக உள்ளன. 31 போட்டிகளில் விளையாடியுள்ள அவர், 40.30 சராசரி மற்றும் 111.95 ஸ்ட்ரைக் ரேட்டுடன் 927 ரன்களைக் குவித்ததுடன் 35 விக்கெட்டுகளையும் வீழ்த்தியுள்ளார். மேலும், சத்தீஸ்கர் அணிக்காக 42 டி20 போட்டிகளில் களமிறங்கி 129.30 ஸ்ட்ரைக் ரேட்டுடன் 653 ரன்கள் எடுத்து, 18 விக்கெட்டுகளையும் கைப்பற்றியுள்ளார்.

ஐபிஎல் தொடரில் எழுச்சியும் சவால்களும்:

ஐபிஎல் 2024 சீசனில் பஞ்சாப் கிங்ஸ் அணியில் ஒரு சிறந்த ஃபினிஷராக உருவெடுத்த ஷஷாங்க் சிங், 164.65 என்ற அதிரடி ஸ்ட்ரைக் ரேட்டில் 354 ரன்களைக் குவித்து அசத்தினார். பெரும்பாலான போட்டிகளில் 5 மற்றும் 6-வது வரிசைகளில் களமிறங்கி இவர் காட்டிய அதிரடி ஆட்டம், மெகா ஏலத்திற்கு முன்பாகவே பஞ்சாப் அணி இவரைத் தக்கவைக்கக் காரணமாக அமைந்தது.

தொடர்ந்து 2025 சீசனில் பஞ்சாப் கிங்ஸ் அணி 2-வது இடத்தைப் பிடித்து சாதனை படைத்ததில் முக்கியப் பங்காற்றிய போதிலும், ஃபார்ம் இழப்பு, தவறவிட்ட கேட்சுகள் மற்றும் காயம் காரணமாக அந்த சீசனில் அவர் சில சவால்களைச் சந்திக்க நேரிட்டது.

தனது புதிய மாற்றம் குறித்துப் பேசிய ஷஷாங்க் சிங், "புதுச்சேரி அணிக்கு மாறுவது எனக்கு ஒரு புதிய தொடக்கம். காயங்களில் இருந்து முழுமையாக மீண்டுள்ள நிலையில், லிமிட்டெட் ஓவர் 'ஒயிட்-பால்' கிரிக்கெட்டில் எனது பழைய திறமையை மீண்டும் நிரூபிக்க இது ஒரு சிறந்த வாய்ப்பு" என நம்பிக்கை தெரிவித்தார்.

சத்தீஸ்கர் கிரிக்கெட் சங்கத்துடன் அதிருப்தி:

சத்தீஸ்கர் மாநில கிரிக்கெட் சங்க நிர்வாகிகள் தன்னைச் சரியாக நடத்தவில்லை என்ற குற்றச்சாட்டை முன்வைத்த ஷஷாங்க் சிங், வேறு மாநிலத்திற்கு மாற ஆட்சேபனை இல்லாச் சான்றிதழ் (NOC) கோரி விண்ணப்பித்தார். அதனை ஏற்றுச் சங்கமும் என்.ஓ.சி வழங்கியுள்ளது.

நிர்வாகத்துடனான பிரச்சினை குறித்து கிரிக்கெட் இணையதளம் ஒன்றுக்குப் பேட்டியளித்த அவர் கூறியதாவது:

"நிர்வாகத்திற்கும் எனக்கும் இடையேயான கருத்து வேறுபாடுகள் நீண்ட காலமாகவே இருந்து வருகின்றன. ஐபிஎல் சீசன் முடிந்தவுடனேயே மாநிலச் சங்க அதிகாரிகளிடம் பேச முயன்றேன்; ஆனால் அவர்களிடம் இருந்து எந்தப் பதிலும் வரவில்லை.

2026 சத்தீஸ்கர் கிரிக்கெட் பிரீமியர் லீக் தொடரில் நான் ஏன் சேர்க்கப்படவில்லை என்பதற்கோ, மாநில அணிக்கான பயிற்சி முகாமில் (Conditioning camp) எனது பெயர் ஏன் பரிசீலிக்கப்படவில்லை என்பதற்கோ அவர்களிடம் எந்த விளக்கமும் இல்லை.

எனக்கு எந்த ஒரு சிறப்புச் சலுகையும் தர வேண்டும் என நான் கேட்கவில்லை. ஆனால், 2023-24 ஆம் ஆண்டிற்கான சிறந்த உள்நாட்டு 'ஒயிட்-பால்' ஆல்ரவுண்டருக்கான பிசிசிஐ (BCCI) விருதை வென்ற ஒரு வீரருக்கு, கேலி-கிண்டல்கள் இல்லாமல் குறைந்தபட்சம் என்ன நடக்கிறது என்ற தெளிவான விளக்கமாவது கிடைத்திருக்க வேண்டும்."

இவ்வாறு தனது அதிருப்தியை வெளிப்படுத்திய ஷஷாங்க் சிங், வரவிருக்கும் உள்நாட்டுச் சீசனில் புதுச்சேரி அணியைப் பிரதிநிதித்துவப்படுத்துவதை ஒரு நல்வாய்ப்பாகக் கருதுவதாக மகிழ்ச்சியுடன் தெரிவித்துள்ளார்.

Hardik Pandya: சிஎஸ்கே வருகிறாரா ஹர்திக் பாண்ட்யா? மும்பைக்கு போகப்போகும் சென்னை வீரர் யார்?

சுகுமாறன் — Sun, 2 Aug 2026 21:02:20 +0530

ஐபிஎல் கிரிக்கெட் தொடருக்கு இந்தியாவில் மிகப்பெரிய ரசிகர்கள் பட்டாளம் உள்ளனர். ஐபிஎல் கிரிக்கெட் தொடரிலே அதிக ரசிகர்கள் கொண்ட அணிகளாக ஆர்சிபி, சிஎஸ்கே மற்றும் மும்பை இந்தியன்ஸ் அணிகள் உள்ளனர். நட்சத்திர வீரர்கள் இருப்பதே இதற்கு முக்கிய காரணம் ஆகும்.

சென்னைக்கு வருகிறாரா ஹர்திக்?

மும்பை இந்தியன்ஸ் அணியின் கேப்டனும் நட்சத்திர வீரருமானவர் ஹர்திக் பாண்ட்யா. மும்பை இந்தியன்ஸ் அணியில் இருந்து குஜராத் அணிக்கு சென்றவர் கேப்டனாக களமிறங்கிய முதல் தொடரிலே கோப்பையை வென்றார். இதையடுத்து, மீண்டும் மும்பைக்கு கேப்டனாக வந்தவரால் தனது அணியை திறம்பட வழிநடத்த இயலவில்லை.

அவரது தலைமையில் மும்பை ஆடிய 3 சீசன்களிலும் படுதோல்வி அடைந்த நிலையில், நடப்பாண்டில் அவர் அணியில் இருந்து கழட்டிவிடப்பட உள்ளதாக தகவல்கள் வெளியாகியுள்ளது. ட்ரேடிங் முறையில் அவர் மும்பையில் இருந்து சென்னைக்கு மாற்றப்பட உள்ளதாக தகவல் வெளியாகியுள்ளது.

மும்பை செல்லப்போவது யார்?

மும்பை அணியில் இருந்து சென்னை சூப்பர் கிங்ஸ் அணிக்கு அவர் மாற்றிக்கொள்ளப்பட உள்ள நிலையில் அவருக்கு பதிலாக ஆயுஷ் மாத்ரே அல்லது ப்ரெவிஸ் மாற உள்ளதாக தகவல்கள் வெளியாகியுள்ளது. இதுதொடர்பாக, அதிகாரப்பூர்வ தகவல் வெளியாகாவிட்டாலும் விரைவில் வெளியாகும் என்று கருதப்படுகிறது.

கடந்த சீசனில் சென்னை அணியில் ஜடேஜா, சாம் கரண் ராஜஸ்தான் அணிக்கு அனுப்பப்பட்டு சென்னைக்கு சாம்சன் வந்தார். சாம்சன் கடந்த தொடரில் சிறப்பாக ஆடினாலும் அணி தொடரை விட்டு வெளியேறியது. ஹர்திக் பாண்ட்யா மும்பை அணியின் கேப்டனாக இருக்கும் சூழலில், அவர் சிஎஸ்கே அணிக்கு வந்தால் கேப்டனாக வருவாரா? அல்லது வீரராக வருவாரா? என்ற கேள்வி எழுந்துள்ளது.

மும்பையின் புது கேப்டன் யார்?

ஹர்திக் பாண்ட்யா சென்னைக்கு வந்தால் மும்பை அணியை கேப்டனாக முன்னாள் கேப்டன் ரோகித் சர்மா வழிநடத்துவாரா? அல்லது சூர்யகுமார் யாதவ் கேப்டன் பொறுப்பை ஏற்பாரா? என்ற கேள்வி எழுந்துள்ளது.

ஹர்திக் பாண்ட்யா இதுவரை 162 ஐபிஎல் போட்டிகளில் ஆடி 2 ஆயிரத்து 955 ரன்களை எடுத்துள்ளார். அதிகபட்சமாக 91 ரன்களை எடுத்துள்ளார். சிறந்த ஆல்ரவுண்டரான ஹர்திக் பாண்ட்யா 82 விக்கெட்டுகளையும் வீழ்த்தியுள்ளார்.

கருத்து வேறுபாடு:

ஹர்திக் பாண்ட்யா மும்பை அணியில் இருந்து ட்ரேடிங் முறையில் மாற்றப்படுகிறார் என்று தொடர்ந்து தகவல்கள் வெளியாகி வரும் சூழலில் மும்பை அணி நிர்வாகம் அதை மறுத்துள்ளது. ஆனாலும், கடந்த சீசனில் மும்பை அணியின் உரிமையாளர்கள் நீதா அம்பானி, ஆனந்த் அம்பானி மும்பை வீரர்கள் விளையாட்டால் அதிருப்தி அடைந்து பாதியிலே மைதானத்தை விட்டு வெளியேறியது குறிப்பிடத்தக்கது.

Ajinkya Rahane Pension: ரகானேவிற்கு ரூ.70 ஆயிரம் பென்ஷன்..! அப்ப ரோகித் & கோலிக்கு எவ்வளவு கிடைக்கும்? விவரம் இதோ

குலசேகரன் முனிரத்தினம் — Sun, 2 Aug 2026 10:49:03 +0530

Ajinkya Rahane Pension: சர்வதேச கிரிக்கெட் போட்டிகளில் இருந்து ஓய்வு பெற்ற அஜிங்க்யா ரகானேவிற்கு, மாத ஓய்வூதியமாக ரூ.70 ஆயிரம் பிசிசிஐ தரப்பில் வழங்கப்படுகிறது.

ரகானேவிற்கான ஓய்வூதியம்

இந்திய கிரிக்கெட் அணியின் மூத்த வீரர் மற்றும் வெளிநாட்டு சுற்றுபயணங்களின் போது நம்பிக்கை நட்சத்திரமாக திகழ்ந்த அஜிங்க்யா ரகானே கடந்த 30ம் தேதி உடன் சர்வதேச போட்டிகளில் இருந்து ஓய்வு பெறுவதாக அறிவித்தார். கடந்த 2021ம் ஆண்டு ஆஸ்திரேலியா சுற்றுப்பயணத்தின் போது, பார்டர் கவாஸ்கர் தொடரை வென்ற வரலாற்று சிறப்புமிக்க வெற்றியை இவரது தலைமையின் கீழ் தான் இந்தியா கண்டது. ஓய்வை தொடர்ந்து ரகானேவின் வருமானம் மற்றும் சொத்து தொடர்பான விவரங்கள் ரசிகர்களிடையே பல்வேறு சந்தேகங்களை எழுப்பியுள்ளது. அந்த வகையில் இந்திய கிரிக்கெட் சம்மேளனத்திடம் இருந்து கணிசமான மாதாந்திர ஓய்வுத்தொகையை வாழ்நாள் முழுவதும் அவர் பெற உள்ளார்.

ரகானேவிற்கு ரூ.70 ஆயிரம் ஓய்வூதியம்

ஓய்வுபெற்ற கிரிக்கெட் வீரர்களுக்கான ஓய்வூதியத் தொகையை கடந்த 2022ம் ஆண்டு திருத்தி அமைத்து பிசிசிஐ அறிவித்தது. அதன்படி, இந்தியாவுக்காக 85 டெஸ்ட் போட்டிகளில் விளையாடியுள்ள ரகானே, உயர் ஓய்வூதியப் பிரிவில் இடம்பிடிக்கிறார். இதற்கு முன்பு, அவருக்கு இணையாக அனுபவமுள்ள வீரர்கள் மாதம் ரூ.50,000 பெற்றுவந்த நிலையில், நான்கு ஆண்டுகளுக்கு முன்பு மேற்கொள்ளப்பட்ட திருத்தத்தின்படி மாத ஓய்வூதியம் ரூ.70,000 ஆகத் திருத்தி அமைக்கப்பட்டது. அந்த வகையில், ரகானே இனி மாதம் ரூ.70,000 நிலையான ஓய்வூதியமாகப் பெறுவார். ஓய்வூதியத் தொகையைத் திருத்தியமைக்கும் இந்த முடிவு, சௌரவ் கங்குலி பிசிசி தலைவராக இருந்த காலத்தில் அறிவிக்கப்பட்டது குறிப்பிடத்தக்கது..

ரகானேவின் சர்வதேச கிரிக்கெட் அனுபவம்

85 டெஸ்ட், 90 ஒருநாள் மற்றும் 20 டி20 போட்டிகளில் இந்தியாவிற்காக களமிறங்கியுள்ள ரகானே, தனது அடுத்த அத்தியாயம் எப்படி இருக்கும் என்பதை இன்னும் உறுதிப்படுத்தவில்லை. இருப்பினும், அடுத்த தலைமுறை கிரிக்கெட் வீரர்களுக்கு வழிகாட்ட ஆவலுடன் இருப்பதாக அவர் சூசகமாகத் தெரிவித்துள்ளார். பிசிசிஐ அமைப்பில் அதிகாரப்பூர்வப் பதவியை ஏற்காத வரை மட்டுமே அவரது ஓய்வூதியம் செல்லுபடியாகும். ஒருவேளை ரகானே வாரியத்தின் நிர்வாகியாகவோ அல்லது பயிற்சியாளராகவோ பதவியேற்கும் பட்சத்தில், அந்தப் பணிகளுக்காக அவர் சம்பளம் பெறும் வரை அவரது ஓய்வூதியம் தற்காலிகமாக நிறுத்தி வைக்கப்படும்.

இதையும் படியுங்கள்: Tiruvannamalai Bypass Project: திருவண்ணாமலை புறவழிச்சாலை திட்டம் ரெடி - சாமி தரிசனம் டூ பொருளாதாரம் - 100KM ஸ்பீட்

ரோகித் சர்மா, கோலிக்கான ஓய்வூதியம் என்ன?

25 அல்லது அதற்கு மேற்பட்ட டெஸ்ட் போட்டிகளில் விளையாடிய முன்னாள் ஆடவர் கிரிக்கெட் வீரர்கள், மாதம் ரூ.70,000 என்ற அதிகப்படியான ஓய்வூதியத் தொகையை பெற தகுதி பெறுகிறார்கள். அந்த வகையில் இந்திய அணியின் முன்னாள் கேப்டன்களான ரோகித் சர்மா (67 டெஸ்ட் போட்டிகள்) மற்றும் விராட் கோலி (120 போட்டிகள்)ஆகிய இரு வீரர்களும் இந்த வரம்பை எளிதாகக் கடக்கின்றனர். எனவே இருவரும் சர்வதேச போட்டிகளில் இருந்து முழுமையாக ஓய்வு பெற்ற பிறகு வாழ்நாள் முழுவதும் ஒவ்வொரு மாதமும் ரூ.70 ஆயிரத்தை ஓய்வூதியமாக பெறுவர்.

75-க்கும் அதிகமான முதல் தர போட்டிகளில் விளையாடிவர்களுக்கு மாதம் ரூ.52,500 ஓய்வூதியம்
50 முதல் 74 முதல் தர போட்டிகளில் விளையாடிவர்களுக்கு மாதம் ரூ.45,000 ஓய்வூதியம்
25 முதல் 49 முதல் தர போட்டிகளில் விளையாடிவர்களுக்கு மாதம் ரூ.30,000 ஓய்வூதியம்

பிசிசிஐ ஓய்வூதிய விதிகள்

25-க்கும் குறைவான டெஸ்ட் போட்டிகளில் விளையாடிய வீரர்கள், மாதம் ரூ.60,000 என்ற குறைக்கப்பட்டதிருத்தப்பட்ட ஓய்வூதியத்தை பெறுவார்கள்
ஐபிஎல் போன்ற வடிவங்கள் ஓய்வூதிய அடிப்படைத் தொகையை நிர்ணயிப்பதில் கணக்கில் எடுத்துக்கொள்ளப்படுவதில்லை
பிசிசிஐ-யின் ஓய்வூதிய தகுதி என்பது டெஸ்ட் மற்றும் முதல் தரப் போட்டிகளின் எண்ணிக்கையை மட்டுமே சார்ந்துள்ளது

Ajinkya Rahane: 36 ரன்களுக்கு ஆல்-அவுட் - இந்தியாவை கரையேற்றி சம்பவம் செய்த கேப்டன் ரகானே - ஓய்வு அறிவிப்பு

குலசேகரன் முனிரத்தினம் — Thu, 30 Jul 2026 12:35:03 +0530

Ajinkya Rahane: மும்பையை சேர்ந்த 36 வயதான அஜிங்க்யா ரகானே, இந்திய அணிக்காக மூன்று விதமான கிரிக்கெட் போட்டிகளிலும் பங்கேற்றுள்ளார்.

ஓய்வை அறிவித்த அஜிங்க்யா ரகானே..!

இந்திய கிரிக்கெட் அணியின் முன்னாள் கேப்டன் அஜிங்க்யா ரகானே சர்வதேச போட்டிகளிலிருந்து ஓய்வு பெறுவதாக அறிவித்துள்ளார். இன்ஸ்டாகிராமில் வெளியிட்ட வீடியோவில், தனக்கு ஆதரவையும் அன்பையும் வழங்கிய அனைவருக்கும் நன்றி என குறிப்பிட்டுள்ளார். 36 வயதான இவர் இந்திய அணிக்காக 85 டெஸ்ட் போட்டிகள், 90 ஒருநாள் போட்டிகள் மற்றும் 20 டி20 போட்டிகளில் விளையாடியுள்ளார். டெஸ்டில் 12 சதங்கள் மற்றும் 26 அரைசதங்கள் உட்பட 5 ஆயிரத்து 77 ரன்கள், ஒருநாள் போட்டிகளில் 3 சதங்கள் மற்றும் 26 அரைசதங்கள் உட்பட 2 ஆயிரத்து 962 ரன்கள் விளாசியுள்ளார். அதேநேரம், ரகானே என்றாலே 2021ம் ஆண்டு அவரது தலைமையில் ஆஸ்திரேலியா மண்ணில் இந்திய அணி 2-1 என பார்டர் கவாஸ்கர் கோப்பையை வென்றது தான் ரசிகர்களின் நினைவிற்கு வரும்.

36 ரன்களுக்கு ஆல்-அவுட் - கேப்டன் செஞ்சுரி

ஆஸ்திரேலியாவில் விராட் கோலி தலைமையில் இந்திய அணி மேற்கொண்ட சுற்றுப்பயணம் மிகவும் இக்கட்டான நிலையில் இருந்தது. அடிலெய்டில் இந்தியா 36 ரன்களுக்கு ஆட்டமிழந்தது. டெஸ்ட் போட்டிகளில் இந்திய அணியின் முகவும் குறைந்தபட்ச ஸ்கோர் இதுவாகும். இதனிடையே தனது தந்தை உயிரிழந்த்தால் விராட் கோலி அவசரமாக நாடு திரும்பினார். முழு பலம் வாய்ந்த வேகப்பந்து வீச்சுத் தாக்குதலுடன் இருந்த ஆஸ்திரேலியா, தொடரின் மீதமுள்ள போட்டிகளில் ஆதிக்கம் செலுத்தும் நிலையில் காணப்பட்டது. அந்த நேரத்தில், இந்தியாவுக்கு மிகவும் தேவைப்பட்ட நிதானமான கேப்டனாக ரகானே செயல்பட தொடங்கினார். ஆக்ரோஷமான வழிகாட்டுதல்கள் மூலம் உத்வேகம் அளிக்க முயலும் கேப்டன்களைப் போலல்லாமல், ரகானே அமைதியான உறுதியுடன் வழிநடத்தினார். பாக்சிங் டே டெஸ்டில் மெல்போர்ன் கிரிக்கெட் மைதானத்தில் அவர் ஆட்டமிழக்காமல் அடித்த 112 ரன்கள், அதிர்ச்சியில் உறைந்திருந்த ஆட்டக்காரர்கள் அறைக்கு நம்பிக்கையை மீட்டெடுத்ததுடன், தொடரையும் சமன் செய்தது.

காயங்களால் கவலையில் இந்தியா

இதனிடியே காயங்கள் அதிகரித்ததாலும், ஆட்டத்தின் வெவ்வேறு கட்டங்களில் முகமது ஷமி, உமேஷ் யாதவ், ஜஸ்பிரித் பும்ரா, ரவீந்திர ஜடேஜா, ரவிச்சந்திரன் அஸ்வின் மற்றும் ஹனுமா விஹாரி போன்ற இந்திய வீரர்கள் அடுத்தடுத்து தொடரிலிருந்து வெளியேறினர். ஆனாலும், ரகானே தற்காப்பு ஆட்டத்திற்குப் பின்வாங்கும் எண்ணத்தைத் தவிர்த்தார். அதற்குப் பதிலாக, முகமது சிராஜ், சுப்மன் கில், வாஷிங்டன் சுந்தர், டி. நடராஜன் மற்றும் ஷர்துல் தாக்கூர் ஆகியோர் அடங்கிய அனுபவமற்ற குழுவை நம்பி களமிறங்கினார். அந்த நம்பிக்கை, டெஸ்ட் கிரிக்கெட்டின் மாபெரும் வெற்றிகளில் ஒன்றை பதிவு செய்ய உதவியது.

இதையும் படியுங்கள்: Ramayana Trailer: ரூ.4.000 கோடி ப்ராஜெக்ட் - ராமாயணா திரைப்பட ட்ரெய்லர் எப்படி இருக்கு? சீரியல் & கார்டூனா?

இந்தியாவி வரலாற்று வெற்றி

கப்பா மைதானத்தில் ஆஸ்திரேலியாவின் கோட்டையை தகர்த்து, அங்கு 32 ஆண்டுகளாக தோல்வியே கண்டிராத ஆஸ்திரேலியாவை வீழ்த்தி இந்தியா 2-1 என்ற கணக்கில் தொடரைக் கைப்பற்றியது. ஆறு டெஸ்ட் போட்டிகளில் ஒரு தோல்வி கூட இல்லாமல், நான்கு வெற்றிகள் மற்றும் இரண்டு சமன்களுடன் அவர் பெற்றுள்ள கேப்டன்சி சாதனை, அவரது அமைதியான செயல்திறனைப் பிரதிபலிக்கிறது. ஆனால், வெறும் புள்ளிவிவரங்களால் மட்டும் அவரது தாக்கத்தை முழுமையாக வெளிப்படுத்த முடியாது. 2020-21 பார்டர்-கவாஸ்கர் கோப்பை இந்திய கிரிக்கெட்டின் மிக முக்கியமான சாதனைகளில் ஒன்றாகத் திகழ்கிறது. அந்த வெற்றியை நினைக்கும்போதெல்லாம், இந்திய ரசிகர்களிடையே ரகானேவின் பெயர் ஒலித்துக்கொண்டே இருக்கும்.

IND vs ZIM: வாஷ்.. வாஷ்.. ஒயிட்வாஷ்.. ஜிம்பாப்வேயை துடைத்து வீசிய இந்தியா! கடைசி டி20யிலும் வெற்றி!

சுகுமாறன் — Sun, 26 Jul 2026 21:07:20 +0530

இந்திய கிரிக்கெட் அணி ஜிம்பாப்வேயில் சுற்றுப்பயணம் மேற்கொண்டு ஆடியது. இரு அணிகளும் மோதிய கடைசி டி20 போட்டி இன்று ஹராரேவில் நடந்தது. இந்த போட்டியில் முதலில் பேட் செய்த இந்திய அணிக்கு அபிஷேக் சர்மா 2 ரன்னில் அவுட்டானார்.

சூர்யவன்ஷி அதிரடி:

அதன்பின்பு வந்த இஷான் கிஷன் நிதானமாக ஆட வைபவ் சூர்யவன்ஷி மறுமுனையில் அதிரடி காட்டினார். அவரது அதிரடியால் இந்திய அணியின் ஸ்கோர் மளமளவென ஏறியது. இஷான் கிஷன் 26 ரன்களில் அவுட்டாக அதிரடி காட்டிய சூர்யவன்ஷி 49 பந்துகளில் 8 பவுண்டரி 4 சிக்ஸருடன் 81 ரன்கள் எடுத்து அவுட்டானார். கடைசியில் ரிங்கு சிங் 25 ரன்கள் எடுக்க இந்திய அணி 20 ஓவர்களில் 192 ரன்கள் எடுத்தது.

193 ரன்கள் டார்கெட்:

193 ரன்கள் இலக்குடன் ஆட்டத்தை தொடர்ந்த ஜிம்பாப்வே அணியின் தொடக்க வீரர் ப்ரையன் பென்னட் ஆட்டத்தின் முதல் பந்திலே அவுட்டாக அடுத்து வந்த பென் கரன் - மயர்ஸ் ஜோடி நிதானம் காட்டியது. மயர்ஸ் 19 ரன்களில் அவுட்டாக அடுத்து வந்த கேப்டன் சிக்கந்தர் ராசா முதல் பந்திலே அவுட்டானார். 32 ரன்களுக்கு 3 விக்கெட்டுகளை இழந்த நிலையில், பென் கரனும் 20 ரன்களில் அவுட்டானார்.

பந்துவீச்சு மிரட்டல்:

வெஸ்லி மாதவரே ஒத்துழைப்புடன் ரியான் பர்ல் பொறுப்புடன் ஆடினார். ஆனால், மயங்க் யாதவ், யஷ் தாக்கூர், அசோக் சர்மா, ரவி பிஷ்னோய் சிறப்பாக பந்துவீசி நெருக்கடி அளித்தனர். சூர்யான்ஷ் ஷெட்கே, அபிஷேக் சர்மாவும் நெருக்கடி சிறப்பாக பந்துவீச ஜிம்பாப்வே தடுமாறியது. வெஸ்லி மாதவரே 28 ரன்களில் அவுட்டாக, ப்ராட் எவன்ஸ் 14 ரன்கள் எடுத்து அவுட்டானார்.

கடைசி வரை தனி ஆளாக போராடிய ரியான் பர்ல் 43 பந்துகளில் 5 பவுண்டரியுடன் 54 ரன்கள் எடுத்து ஆட்டமிழக்காமல் இருந்தார். ஜிம்பாப்வே அணி 20 ஓவர்களில் 7 விக்கெட் இழப்பிற்கு 157 ரன்கள் எடுத்தது. இதனால், இந்திய அணி 35 ரன்கள் வித்தியாசத்தில் அபார வெற்றி பெற்றது. இந்திய அணிக்காக மயங்க் யாதவ் 3 விக்கெட்டுகளை வீழ்த்தினார். யஷ் தாக்கூர் 2 விக்கெட்டுகளையும், அசோக் சர்மா, ரவி பிஷ்னோய் தலா 1 விக்கெட் வீழ்த்தினர்.

ஒயிட்வாஷ்:

சூர்யவன்ஷி ஆட்டநாயகன் விருது பெற்றார். அயர்லாந்து, இங்கிலாந்து தொடரை இழந்த இந்திய அணி 3-0 என்ற கணக்கில் ஜிம்பாப்வேயை வீழ்த்தி தொடரை முழுமையாக கைப்பற்றியுள்ளது. கேப்டனாக ஸ்ரேயாஸ் ஐயர் தொடரை முழுமையாக வென்றுள்ளார்.

Sooryavanshi: இனி நான்தான் ஓப்பனர்.. சூறாவளி பேட்டிங்கால் சுளுக்கெடுக்கும் சூர்யவன்ஷி!

சுகுமாறன் — Sun, 26 Jul 2026 18:14:12 +0530

இந்திய கிரிக்கெட் அணியின் தவிர்க்க முடியாத வீரராக உருவெடுத்துள்ளார் சூர்யவன்ஷி. ஐபிஎல் தொடரில் 14 வயதிலே இவரை ஏலத்தில் ராஜஸ்தான் அணி எடுத்தபோது யார் இந்த சிறுவன் என்று அனைவரும் திரும்பி பார்த்தனர்.

சூர்யவன்ஷி:

சென்னை, மும்பை, பெங்களூர் என ஐபிஎல்-லின் அனைத்து ஜாம்பவான் அணிகளையும் தனது பேட்டால் அலறவிட்டார். இவரது அபார திறமையால் 15 வயதிலே இந்திய அணியில் இடம்பிடித்தார். இங்கிலாந்து மண்ணில் முதன்முறையாக டி20 தொடரில் அறிமுகமான சூர்யவன்ஷி பெரியளவு ரன்களை குவிக்காவிட்டாலும் அதிரடியாக ஆடினார்.

தொடர்ந்து அதிரடியில் மிரட்டல்:

இந்த சூழலில், ஜிம்பாப்வே தொடரில் 3 டி20 போட்டியிலும் ஆடுவதற்கு அவருக்கு வாய்ப்பு கிடைத்தது. முதல் போட்டியிலே 19 பந்துகளில் 50 ரன்களை விளாசி தனது அதிரடியை அனைவருக்கும் ஞாபகப்படுத்தினார். அடுத்த போட்டியிலும் 9 பந்துகளில் 20 ரன்களை விளாசினார். இன்று ஹராரேவில் நடந்து வரும் கடைசி டி20 போட்டியில் 49 பந்துகளில் 8 பவுண்டரி 4 சிக்ஸருடன் 81 ரன்கள் எடுத்து அசத்தினார்.

15 வயதிலே அதிரடியாக தொடக்க வீரராக அசத்தும் சூர்யவன்ஷி இந்திய கிரிக்கெட்டின் நீண்டகால சொத்தாக மாறியுள்ளார். இவரது அதிரடி தொடர்வதாலும் இவருக்கு பெரியளவு அழுத்தம் இல்லாததாலும் இந்திய டி20 அணியின் தொடக்க வீரராக நீண்டகாலம் இவர் ஆடுவார் என்று கருதப்படுகிறது.

தவிர்க்க முடியாத தொடக்க வீரர்:

மேலும், தற்போது டி20 போட்டிகளில் மட்டும் இந்திய அணிக்காக ஆடி வரும் சூர்யவன்ஷியை ஒருநாள் போட்டிகளில் ஆடும் அளவிற்கும் அணி நிர்வாகம் தயார் செய்து வருகிறது. சூர்யவன்ஷி தொடர்ந்து தனது அதிரடியை காட்டினால் இந்திய அணியில் தொடக்க வீரருக்காக போட்டியிட்டு வரும் மற்ற வீரர்களின் இடம் கண்டிப்பாக கேள்விக்குறியாகும். அவர்கள் மற்ற இடங்களில் ஆடுவதற்கு தங்களைத் தயார் செய்து கொள்ள வேண்டியதும் அவசியம் ஆகிறது.

காய் நகர்த்தும் பிசிசிஐ:

தோனி, ரோகித், கோலி ஆகியோருக்கு பிறகு இந்திய கிரிக்கெட்டில் மிகப்பெரிய ரசிகர்கள் பட்டாளம் கொண்ட வீரர் என்று தற்போது ஆடும் அணியில் யாரும் இல்லை. ரோகித்தும், கோலியும் ஒருநாள் போட்டிகளில் மட்டும் ஆடி வரும் சூழலில் அவர்கள் இல்லாத போட்டிகளில் ரசிகர்கள் எண்ணிக்கை நேரடியாகவும், தொலைக்காட்சியிலும் குறைந்து வருகிறது. இதனால், இந்திய அணியின் மிகப்பெரிய நட்சத்திர வீரராக சூர்யவன்ஷியை முன்னிறுத்தவும் பிசிசிஐ திட்டமிட்டு வருகிறது.

இந்த போட்டியில் இஷான் கிஷன் 26 பந்துகளில் 29 ரன்களும், கேப்டன் ஸ்ரேயாஸ் ஐயர் 27 ரன்களும் எடுத்தனர். ரிங்குசிங் கடைசியில் 25 ரன்கள் எடுக்க இந்தியா 20 ஓவர்களில் 192 ரன்கள் எடுத்தது. இந்திய அணி ஏற்கனவே தொடரை கைப்பற்றிய நிலையில், இந்த போட்டியில் வெற்றி பெற்றால் 3-0 என்ற கணக்கில் வெற்றி பெறலாம்.

IND vs ZIM: கேப்டனாக முதன்முறையாக தொடரை வெல்வாரா ஸ்ரேயாஸ்? ஜிம்பாப்வேயுடன் இன்று மீண்டும் மோதல்!

சுகுமாறன் — Sat, 25 Jul 2026 12:27:04 +0530

இந்திய கிரிக்கெட் அணி தற்போது ஜிம்பாப்வேயில் சுற்றுப்பயணம் மேற்கொண்டு கிரிக்கெட் போட்டியில் ஆடி வருகிறது. டி20 தொடரில் ஆடுவதற்காக இந்திய அணி ஜிம்பாப்வே சென்றுள்ளது.

தொடரை வெல்லுமா இந்தியா?

ஜிம்பாப்வே அணியுடன் மோதிய முதல் டி20 போட்டியில் இந்தியா வெற்றி பெற்ற நிலையில் இரு அணிகளும் மோதும் 2வது டி20 போட்டி இன்று ஹராரேவில் நடக்கிறது. அயர்லாந்து, இங்கிலாந்து டி20 தொடரில் ஒரு வெற்றிகூட பெறாத இந்திய அணி ஜிம்பாப்வே மண்ணில் மீண்டும் தனது வெற்றியைத் தொடங்கியுள்ளது.

பேட்டிங் பலம்:

இதையடுத்து, இன்று நடக்கும் போட்டியிலும் வெற்றி பெற்று தொடரை வெல்லும் முனைப்புடன் இந்திய அணி களமிறங்குகிறது. முதல் போட்டியில் களமிறங்கிய அதே அணி இந்த போட்டியிலும் களமிறங்கும் என்று கருதப்படுகிறது. முதல் போட்டியில் அசத்திய சூர்யவன்ஷி இன்றைய போட்டியிலும் தனது அதிரடியைத் தொடர்வார் என்று கருதப்படுகிறது. அபிஷேக் சர்மா இந்த போட்டியில் தனது அதிரடிக்குத் திரும்புவார் என்று கருதப்படுகிறது. கேப்டன் ஸ்ரேயாஸ், திலக் வர்மா, ரிங்குசிங், ஷிவம் துபே என்று பேட்டிங் ஆர்டர் வலுவாக உள்ளது.

ஜிம்பாப்வே அணியின் கேப்டன் சிக்கந்தர் ராசா, ப்ரையன் பென்னட், பென் கரன், மருமணி, டையன் மையர்ஸ், ரியான் பர்ல் என மிகப்பெரிய பேட்டிங் பட்டாளமே உள்ளனர். இவர்கள் தங்களது பேட்டிங் திறனை முழுமையாக வெளிக்காட்டினால் இவர்களுக்கு வெற்றி வாய்ப்பு பிரகாசமாக அமையும்.

பந்துவீச்சு பலம்:

பந்துவீச்சைப் பொறுத்தமட்டில் இந்திய அணியில் கடந்த போட்டியில் பிரின்ஸ் யாதவ், அசோக் சர்மா, மயங்க் யாதவ் சிறப்பாக வீசினார்கள். ஷிவம் துபே கூடுதல் பந்துவீச்சாளராக சிறப்பாக வீசினார். இன்றைய போட்டியிலும் அவர்கள் சிறப்பாக பந்துவீச வேண்டியது அவசியம்.

ஜிம்பாப்வே அணியும் பந்துவீச்சில் சிறந்த அணியாகவே உள்ளது. முசரபானி, ரிச்சர்ட் இங்கரவா, இவான்ஸ், நியாம்ஹியூரி, சிக்கந்தர் ராசா பந்துவீச்சில் பலமாக உள்ளனர். இவர்கள் இந்திய பேட்டிங் பட்டாளத்தை திறம்பட எதிர்கொண்டால் நிச்சயம் இந்திய அணிக்கு சவால் அளிக்கலாம்.

ஸ்ரேயாஸ் ஆர்வம்:

ஒரு கேப்டனாக இரண்டு தொடர்களை இழந்த பிறகு முதன்முறையாக டி20 தொடரை வெல்லும் வாய்ப்பை பெற்றுள்ள ஸ்ரேயாஸ் ஐயர் இந்த போட்டியில் வெற்றி பெற்று தொடரை வெல்ல ஆர்வமுடன் அணியை வழிநடத்துவார் என்று கருதப்படுகிறது. இன்றைய போட்டியை ஃபேன்கோட் ஓடிடி தளத்தில் ரசிகர்கள் பார்க்கலாம்.

இந்திய அணியை இந்த தொடருக்கு கம்பீருக்கு பதிலாக லட்சுமணன் பயிற்சியாளராக பயிற்சி அளிக்கிறார் என்பது குறிப்பிடத்தக்கது.