வெறும் சைக்கிளில் 12 ஜோதிர்லிங்க தரிசனம்! - 14 மாநிலங்கள் கடந்து திருப்பத்தூர் சிவபக்தர் செய்த அசாத்திய சாதனை

12 ஜோதிர்லிங்கத்தை பார்ப்பதற்காக 14 மாநிலங்கள் வழியாக 114 நாட்கள்  சைக்கிளில் பயணம் செய்த திருப்பத்தூர் இளைஞர்.

சைக்கிளில் சென்று 12 ஜோதி லிங்கத்தை தரிசித்த சிவ பக்தர்

Source : சிறப்பு ஏற்பாடு

திருப்பத்தூர் அருகே 14 மாநிலங்கள் வழியாக 114 நாட்கள் சைக்கிளில் பயணம் செய்து 12 ஜோதி லிங்கத்தை தரிசித்த சிவ பக்தர் செயல் பொதுமக்கள் இடையே  நெகிழ்ச்சியை ஏற்படுத்தியுள்ளது.

திருப்பத்தூர் மாவட்டம் நாட்றம்பள்ளி டிவி துரைசாமிநகர் பகுதியை சேர்ந்தவர் டெல்லிபாபு. சிவன் பக்தரான இவர் 12 ஜோதிர்லிங்கத்தை தரிசிக்க இந்தியா முழுவதும் சைக்கிள் பயணம் தொடங்கினார். தமிழ்நாடு, ஆந்திரா, தெலுங்கானா, கர்நாடக, மகாராஷ்டிரா, குஜராத், மத்தியபிரதேசம், ராஜஸ்தான், உத்தரபிரதேசம், உத்தரகாண்ட், பீகார், ஜார்கண்ட், மேற்கு வங்கம், ஒடிசா உள்ளிட்ட 14 மாநிலங்கள் வழியாக சுமார் 114 நாட்கள் பயணம் செய்து 9000 கிலோமீட்டர் தூரம் பயணித்து கிருஷ்ணேஷ்வர், பீமாஷங்கர், திரிம்பகேஷ்வர், சோம்நாத், நாகேஷ்வர், கேதார்நாத், மகாகாலேஷ்வர், ஓம்காரேஸ்வர், காசி, பைதிநாத், மல்லிகார்ஜுன், ராம்நாத் ராமேஷ்வர் ஆகிய 12 ஜோதிர்லிங்கங்களை வெற்றிகரமாகவும் மனநிறைவாகவும் தரிசனம் செய்து முடித்துள்ளார்.

 

அதனை தொடர்ந்து மாவட்ட ஆட்சியர் அலுவலகம் அருகே சிவன்பக்தர் டெல்லிபாபு பேட்டி அளித்ததுள்ளார். அதில், “திருப்பத்தூர் மாவட்டத்தில் இருந்து பனிரெண்டு ஜோதிர் லிங்கத்தை தரிசிக்க இந்தியா முழுவதும் பயணம் மேற்கொண்டேன். இந்த பயணத்தை கடந்த பிப்ரவரி 9ஆம் தேதி தொடங்கினேன். திருப்பத்தூரில் தொடங்கிய இந்தப்பயணம் 14 மாநிலங்கள், அதாவது, தமிழ்நாடு, ஆந்திரா, கர்நாடகா வழியாக சென்று முதலில் மகாராஷ்டிராவை அடைந்தேன்.

அதன்பிறகு, குஜராத், மத்திய பிரதேசம், கேதர்நாத், காசி, ஜார்க்கண்ட், ஆந்திரா, கடைசியாக ராமேஸ்வரத்தில் பயணம் முடிந்தது. இன்று திருப்பத்துரை வந்தடைந்தேன். இந்தப் பயணத்தின்போது, எனக்கு கிடைத்த அனுபவம் என்றால்,  14 மாநிலங்களின் உணவு வகைகள், கலாச்சாரம் மற்றும் மனிதர்களை கண்டு ரசித்தேன். 12 ஜோதிர் லிங்கத்தை தரிசிக்க முதன்முதலில் பயணம் மேற்கொண்டது நான் என்று நினைக்கிறேன். 20 வருட பழைய சைக்கிளில் இந்தப் பயணத்தை மேற்கொண்டேன். உடல் ஆரோக்கியத்தை மேம்படுத்த வலியுறுத்தியும், அனைவரையும் பயணம் மேற்கொள்ள வேண்டும் என்ற விழிப்புணர்வையும் ஏற்படுத்த இவ்வாறு செய்தேன்” என்று கூறினார்.

மேலும், 12 ஜோதிர்லிங்கத்தை பார்ப்பதற்காக 14 மாநிலங்கள் வழியாக 114 நாட்கள்  சைக்கிளில் பயணம் செய்த சம்பவம் பொதுமக்கள் இடையே நெகிழ்ச்சியை ஏற்படுத்தியுள்ளது.

.