Soppana Sundari : அப்ளாஸ் அள்ளும் ஐஸ்வர்யா ராஜேஷ்..எப்படி இருக்கு சொப்பன சுந்தரி படம்?

‘லாக்கப்’ பட இயக்குநர் எஸ்.ஜி.சார்லஸின் அடுத்த படைப்பு, சொப்பன சுந்தரி. இதில், ஐஸ்வர்யா ராஜேஷுடன் இணைந்து தீபா, லக்ஷமி பிரியா, மைம் கோபி, ரெடின் கிங்ஸ்லி, சுனில் ரெட்டி என பல நட்சத்திரங்கள் நடித்துள்ளனர்.

கதைக்கரு : நகைக்கடையில் வேலை பார்க்கும் சாதாரண குடும்பத்து பெண், அகல்யா (ஐஸ்வர்யா ராஜேஷ்). இவர் வாங்கிய நகைக்கு பம்பர் பரிசாக கார் ஒன்று கிடைக்கிறது. அகல்யாவின் வாய்பேச முடியாத அக்கா தேன்மொழி(லக்ஷமி பிரியா) ஒருநாள் அந்த காரை எடுத்துக்கொண்டு தனது வருங்கால கணவருடன் இரவில் பயணம் போகிறார். அப்போது எதிர்பாராத விதமாக ஒருவரை அடித்து தூக்கி விடுகிறார். விபத்தில் சிக்கிய அந்த உடலை எடுத்து, கார் டிக்கியில் வைத்துக்கொள்கின்றனர்.

இவர்கள் ஒரு புறமிருக்க, அகல்யாவின் அண்ணன் துரையும் காரை அபகரிக்க தனது மச்சானுடன் சேர்ந்து பல்வேறு திட்டங்களை தீட்டுகிறார். இறுதியில் அந்த கார் யாருக்கு கிடைத்தது? காரில் இருக்கும் பிணத்திற்கு என்ன ஆனது? போன்ற கேள்விகளுக்கு காமெடியாக விடையளிக்கிறது மீதி கதை.

த்ரில்லர் படம் என்றால், முகத்தை இருக்கமாக வைத்திருக்க வேண்டும் என்று அவசியம் இல்லை, வாய் விட்டு சிரிக்கவும் செய்யலாம் என்பதை, சொப்பன சுந்தரி படம் ரசிகர்களுக்கு உணர்த்தியுள்ளது.

டார்க் ஹியூமர் பாணியில், 2021ஆம் ஆண்டு வெளியாகி ரசிகர்கள் மத்தியில் புதுமை காட்டிய படம் டாக்டர். இப்படத்தில் நடித்திருந்த பாதி நட்சத்திரங்கள் இதிலும் நடித்துள்ளனர்.

காமெடி-கொஞ்சம் த்ரில்லர் என சில சிறப்பான அம்சங்கள் படத்தில் இருந்தாலும், கொஞ்சம் சொதப்பலான திரைக்கதையினால் அவை வெளியில் தெரியாமலேயே போகின்றன. இருப்பினும், சிம்பிளான-வித்தியாசமான கதையமைப்பை கொண்டுள்ளதால் ரசிகர்களின் பாராட்டை பெருகிறது, சொப்பன சுந்தரி.