Twitter Bluetick : ’உனை காணவில்லையே நேற்றோடு..’ப்ளூ டிக்கை இழந்து சோக ட்வீட் வெளியிட்ட பிரபலங்கள்!

நேற்று ட்விட்டரில் பணம் செலுத்தாத பயனாளர்கள் மற்றும் நட்சத்திரங்களின் ப்ளு டிக் நீக்கப்பட்டது. ப்ளூ டிக்கை இழந்த பிரபலங்கள் வெவ்வேறு கருத்துகளை பதிவிட்டு வருகின்றனர்.

முதலில் மீசைய முறுக்கு திரைப்படத்தின் மூலம் அறிமுகமாகி பிரபலம் ஆனவர் நடிகை ஆத்மிகா, இவர் ப்ளூ டிக்கை இழந்ததையடுத்து தனது பெயரின் அருகில் இங்கு ப்ளூ டிக் இருப்பதாக கற்பனை செய்து கொள்ளுங்கள் என்று குறிப்பிட்டுள்ளார்.

இந்தியில் பழம்பெரும் நடிகரான அமிதாப் பச்சன், “ட்விட்டர் சகோதரரே! பணத்தை செலுத்திவிட்டேன், எனது ப்ளூ டிக்கை திருப்பி தாருங்கள் என்று பதிவிட்டுள்ளார்.

தென்னிந்திய திரை துறையில் முக்கிய நடிகரான பிரகாஷ் ராஜ், “நீங்கள் என்னுடன் இருந்ததில் மகிழ்ச்சி.. எனது பயணம்.. எனது உரையாடல்கள்.. எனது பகிர்வு... எனது மக்களுடன் தொடரும்... டேக் கேர்” என்று ப்ளூ டிக்கிற்கு பிரியா விடை கொடுத்துள்ளார்.

பிக் பாஸ் நிகழ்ச்சி மூலம் பிரபலம் ஆனவர், நடிகை மற்றும் மாடல் சனம் ஷெட்டி, இவர் “வட போச்சே” என்று ட்வீட் செய்துள்ளார்.

பாலிவுட் பிரபல நடிகரான ஷாகித் கபூர், “என் ப்ளூ டிக்கை தொட்டது யார்? எலான், அங்கேயே இரு நான் வருகிறேன்” என்று தனது கபீர் சிங் திரைப்பட காட்சியுடன் ஒப்பிட்டு நக்கலாக பதிவிட்டுள்ளார்.