வாஷிங்டனுடனான வர்த்தகப் பேச்சுவார்த்தைகள் தோல்வியடைந்ததைத் தொடர்ந்து, மோசமான வர்த்தக ஒப்பந்தம் காரணமாக பேச்சுவார்த்தைகளில் இருந்து விலகுவதாகவும், பல்வேறு அமெரிக்கப் பொருட்கள் மீது கனடா பதிலடித் தீர்வைகளை விதிக்கும் என்று பிரதமர் மார்க் கார்னி நேற்று அறிவித்தார். அமெரிக்கா விதித்துள்ள புதிய நிபந்தனைகள் பொருளாதார ரீதியாகப் பயனளிக்காதவை மற்றும் நியாயமற்றவை என்றும் கார்னி குற்றம் சாட்டினார். இது, நீண்டகாலமாக நட்பு நாடுகளாக விளங்கும் இரு நாடுகளுக்கும் இடையிலான உறவுகளை மேலும் மோசமாக்கியுள்ளது.
செப்டம்பர் 8-ம் தேதி அன்று அமலுக்கு வரும் இந்த வரிகள், புதிய அமெரிக்க வரிகளுக்கு 'டாலருக்கு டாலர்' இணையாக இருக்கும். மேலும், எஃகு, மின்னணுப் பொருட்கள், பால் பொருட்கள், வீட்டு உபகரணங்கள், விவசாய உபகரணங்கள், காகிதக்கூழ் மற்றும் காகிதம் உள்ளிட்ட பொருட்களை இவை உள்ளடக்கும்.
மார்க் கார்னி என்ன கூறினார்.?
அமெரிக்காவின் நிபந்தனைகள் குறித்து பேசிய கார்னி, "இவை கனடாவிற்கான ஒட்டுமொத்த நன்மைகளைப் பாதிக்கும்" என்றார். அமெரிக்க அதிபர் டொனால்ட் ட்ரம்ப் ஒரு வர்த்தகப் போரைத் தொடங்கிவிட்டதாக அவர் குற்றம் சாட்டியதோடு, "நீங்கள் தாக்கப்படும்போது, நீங்கள் ஒரு போர் நிலையில் இருக்கிறீர்கள். நாங்கள் தாக்கப்பட்டிருக்கிறோம்" என்றும் கூறினார்.
"அவர்கள் வழங்கியதை எங்களால் ஏற்றுக்கொள்ள முடியாது. மேலும், அவர்கள் கேட்டதை நாங்கள் அவர்களுக்குக் கொடுக்க மாட்டோம்," என்று கார்னி கூறினார். அண்டை நாடுகளுக்கு இடையேயான பேச்சுவார்த்தைகள் வெள்ளிக்கிழமை வாஷிங்டனில் தோல்வியடைந்ததைத் தொடர்ந்து, அமெரிக்காவிற்கு ஏற்றுமதி செய்யப்படும் சுமார் 20 பில்லியன் டாலர் மதிப்புள்ள பொருட்களுக்கு 50 சதவீத புதிய அமெரிக்க வரி விதிக்கப்பட்டது.
இந்தப் பொருட்கள் ஹாக்கி மட்டைகள் முதல் சிமெண்ட் வரை பரந்துள்ளன. கார்னியுடனான தனது நல்லுறவு, கனடாவுடன் ஒரு வர்த்தக ஒப்பந்தத்தை எட்டுவதற்கு அமெரிக்காவிற்கு உதவும் என்று ட்ரம்ப் கூறியிருந்த போதிலும், வாஷிங்டனின் நிபந்தனைகள் இறுதியில் ஏற்றுக்கொள்ள முடியாதவை என்று கனடா பிரதமர் கூறினார்.
அமெரிக்காவின் வரிவிதிப்புகளுக்கு , அதே அளவு
பதிலடி கொடுப்பதாக உறுதியளித்த கார்னி, தனது எக்ஸ் தளத்தில் வெளியிட்ட பதிவில், "நமது தொழிலாளர்கள், விவசாயிகள், குடும்பங்கள் மற்றும் வணிகங்களைப் பாதுகாப்பதற்காக, புதிய அமெரிக்க வரிவிதிப்புகளுக்கு கனடா அதே அளவு பதிலடி கொடுக்கும். இது கனடாவின் நலன்களுக்கு உகந்தது என்ற நம்பிக்கையுடன் நாங்கள் இந்த நடவடிக்கையை எடுக்கிறோம்."
கனடாவின் புதிய வரிகள் முதன்மையாக அமெரிக்க எஃகு மற்றும் பால் தொழில்களை இலக்காகக் கொண்டுள்ளன. மேலும், அவை செப்டம்பர் 8 அன்று அமலுக்கு வரும். அடுத்த வாரம் கூடுதல் விவரங்கள் வழங்கப்படும் என்று கார்னி கூறினார். கனடாவிடமிருந்து சலுகைகளைப் பெறுவதற்கு ஈடாக, எஃகு, அலுமினியம், வாகனங்கள் மற்றும் மரக்கட்டைகள் மீதான வரிகளில் குறிப்பிடத்தக்க குறைப்புகளை வாஷிங்டன் முன்மொழிந்துள்ளதாக அமெரிக்க வர்த்தகப் பிரதிநிதி ஜேம்சன் கிரீர் வெள்ளிக்கிழமை தெரிவித்தார்.
இந்த வரிகள் நாட்டின் பொருளாதாரத்தை கடுமையாகப் பாதித்து, வேலை இழப்புகளுக்கு வழிவகுத்து, வர்த்தக உறவிலும் விரிசலை ஏற்படுத்தியுள்ளன. அமெரிக்க ஒயின், வாகனங்கள் மற்றும் பால் பொருட்கள் மீது வரிகளை விதிப்பதன் மூலம் கனடா, அமெரிக்காவிற்கு எதிராகப் பாகுபாடு காட்டுவதாக வெள்ளை மாளிகை குற்றம் சாட்டியுள்ளது.