இஸ்ரேல் தனது வழிகாட்டுதல்களை பின்பற்றுகிறது என்ற அமெரிக்க அதிபர் டொனால்ட் ட்ரம்பின் கூற்றுகளை இஸ்ரேலிய பிரதமர் பெஞ்சமின் நெதன்யாகு மறுத்துள்ளார். மேலும், இரு நாடுகளும் சுதந்திரமாகவும் அவரவரது தேசிய நலன்களுக்கு ஏற்பவும் செயல்படுகின்றன என்றும் அவர் கூறியுள்ளார்.
இஸ்ரேலிய ராணுவ நடவடிக்கைகளில் செல்வாக்கு செலுத்த முடியுமா என்றும் லெபனான் மீதான தாக்குதல்களை தடுக்க முடியுமா என்றும் ட்ரம்ப்பிடம் ஒரு நேர்காணலில் கேட்கப்பட்டபோது, இஸ்ரேல் "நான் சொல்வதைத்தான் செய்யும்" என்று அவர் கூறியதைத் தொடர்ந்து, நெதன்யாகுவின் இந்த கருத்துக்கள் வெளிவந்துள்ளன.
இஸ்ரேல் தான் சொன்னதையே செய்யும் என்று கூறும் ட்ரம்ப்
தி ஆக்சியோஸ் ஷோ நிகழ்ச்சியில் அளித்த ஒரு பேட்டியின் போது, பிராந்தியத்தில் இஸ்ரேலிய ராணுவ நடவடிக்கைகள், குறிப்பாக லெபனான் மீதான சாத்தியமான தாக்குதல்கள் குறித்து, அவரால் செல்வாக்கு செலுத்த முடியுமா என்று கேட்கப்பட்டபோது, அத்தகைய முடிவுகள் மீது தன்னால் கட்டுப்பாட்டை செலுத்த முடியும் என்று ட்ரம்ப் கூறினார்.
அதாவது, "ஆம், நான் அப்படியே செய்வேன். அதாவது, அவர்கள் என் மீது மிகுந்த மரியாதை வைத்திருக்கிறார்கள், நான் சொல்வதை அப்படியே செய்கிறார்கள்," என்று ட்ரம்ப் கூறினார்.
இஸ்ரேலியப் பிரதமர் பெஞ்சமின் நெதன்யாகுவை குறிப்பிட்ட ட்ரம்ப், அவருடன் தாம் ஒரு வலுவான ஆனால் நெருக்கமாக நிர்வகிக்கப்படும் உறவை பேணி வருவதாகக் கூறினார். "அது நல்லது, ஆனால் நாம் அவரை ஓரளவுக்குச் சமநிலையுடன் வைத்திருக்க வேண்டும்," என்றும் அவர் குறிப்பிட்டார்.
நெதன்யாகு குற்றச்சாட்டுகளை நிராகரிக்கிறார்
இந்நிலையில், ஜெருசலேம் நியூஸ் சிண்டிகேட் (JNS) 2026 சர்வதேச கொள்கை உச்சிமாநாட்டில் உரையாற்றிய நெதன்யாகு, இரு தலைவர்களில் யார் மற்றவரின் அறிவுறுத்தல்களின்படி செயல்படுகிறார்கள் என்ற கருத்துக்களை நிராகரித்தார்.
"அதிபர் டொனால்ட் ட்ரம்ப் நான் விரும்புவதையெல்லாம் செய்வதில்லை, நானும் அவர் விரும்புவதையெல்லாம் செய்வதில்லை. நாங்கள் சுதந்திரமான மற்றும் பெருமைமிக்க நாடுகளின் தலைவர்கள். சில சமயங்களில் எங்கள் கருத்துக்கள் வேறுபடுகின்றன," என்று நெதன்யாகு கூறினார்.
மேலும், இரு நாடுகளின் சுதந்திரத்தை வலியுறுத்திய அவர், இஸ்ரேலும் அமெரிக்காவும் அடிக்கடி பொதுவான நிலைப்பாடுகளை பகிர்ந்து கொண்டாலும், எல்லா விஷயங்களிலும் அவை எப்போதும் உடன்படுவதில்லை என்று கூறினார்.
"நாங்கள் சுதந்திரமான மற்றும் பெருமைமிக்க நாடுகளின் தலைவர்கள். நாங்கள் எங்கள் நலன்களுக்காக நிற்கிறோம். நான் இஸ்ரேலின் நலன்களுக்காகவும் அதன் பாதுகாப்பிற்காகவும் நிற்கிறேன். பல நேரங்களில் நாங்கள் ஒருமித்த கருத்துடன் இருப்போம்; சில சமயங்களில் அவ்வாறு இருப்பதில்லை. ஆனால், ஒருவருக்கொருவரின் இறையாண்மை, தலைமைத்துவம் மற்றும் நம் மக்கள் மீதான அர்ப்பணிப்பை நாங்கள் மதிக்கிறோம்," என்று அவர் கூறினார்.
ஈரான் ஒப்பந்தம் தொடர்பாக அதிகரித்து வரும் பதற்றம்
கடந்த வாரம் எட்டப்பட்ட அமெரிக்க-ஈரான் ஒப்பந்தத்தைத் தொடர்ந்து, வாஷிங்டனுக்கும் டெல் அவிவிற்கும் இடையே உரசல் ஏற்படுவதற்கான அறிகுறிகள் தென்படும் வேளையில் இந்த கருத்துக்கள் வெளியாகியுள்ளன.
லெபனானில் இஸ்ரேல் தனது ராணுவ நடவடிக்கைகளைத் தொடர்வதை ட்ரம்ப் முன்னதாக விமர்சித்திருந்தார்; இத்தகைய நடவடிக்கைகள், ஈரான் ஒப்பந்தம் தொடர்பான ராஜதந்திர முயற்சிகளை பலவீனப்படுத்தும் அபாயம் உள்ளதாக அவர் வாதிட்டார்.
அமெரிக்க துணை ஜனாதிபதி ஜே.டி. வேன்ஸ், இந்த ஒப்பந்தத்தை பகிரங்கமாக விமர்சித்த இஸ்ரேலிய அதிகாரிகளுக்குக் கடுமையான எச்சரிக்கையையும் விடுத்தார். தான் இஸ்ரேலிய அரசாங்கத்தில் அங்கம் வகித்தால், உலகில் இஸ்ரேலுக்கு எஞ்சியிருக்கும் "ஒரே சக்திவாய்ந்த கூட்டாளியை" தாக்குவதை தவிர்ப்பேன் என்றும் அவர் மேலும் கூறினார்.