world

US Iran War: யப்பா, உங்க சண்டை ஓயவே ஓயாதா.? ஈரான் பகுதிக்குள் நுழைய முயன்ற கப்பலை தாக்கிய அமெரிக்கா; போச்சா.?!

ஸ்ரீராம் ஆராவமுதன் — Tue, 11 Aug 2026 20:40:21 +0530

ஈரானில், தங்கள் முற்றுகையை உடைக்க முயன்ற கப்பல் ஒன்றின் மீது அமெரிக்கா தாக்குதல் நடத்தியுள்ளது. பனாமா நாட்டுக் கொடியை ஏந்திய கப்பல் ஒன்று, ஹெலிகாப்டரிலிருந்து சுடப்பட்டது. இந்த சம்பவம் இன்று நிகழ்ந்தது. பனாமா நாட்டுக் கொடியை ஏந்திய கப்பல் மீது அமெரிக்க ராணுவம் துப்பாக்கிச் சூடு நடத்தியதாக அமெரிக்க அதிகாரி ஒருவர் இன்று தெரிவித்துள்ளார். ஈரானிய துறைமுகங்கள் மீதான அமெரிக்க முற்றுகையை உடைக்க அந்தக் கப்பல் முயன்றுகொண்டிருந்ததாக கூறப்படுகிறது.

அமெரிக்க அதிகாரி கூறியத என்ன.?

இந்த தாக்குதல் குறித்து குறிப்பிட்ட அந்த அமெரிக்க அதிகாரி, "ஈரானிய துறைமுகங்களுக்கு கடற்படை முற்றுகையை அமல்படுத்தியபோது, கப்பல் குழுவினர் அமெரிக்காவின் எச்சரிக்கைகளை புறக்கணித்தனர். இதைத் தொடர்ந்து, ஒரு அமெரிக்க ராணுவ ஹெலிகாப்டர் கப்பலின் ரேடாரை நோக்கி சுட்டது. இதற்கிடையே, ட்ரம்ப் நிர்வாகம் ஈரானிய அரசாங்கத்தின் மீது தொடர்ந்து பொருளாதார அழுத்தத்தை ஏற்படுத்த முயற்சித்து வருகிறது. மேலும், இந்த நடவடிக்கை அந்த முயற்சியின் ஒரு பகுதியாகும்." என்று கூறியுள்ளார்.

ஈரானிய துறைமுகத்திற்குள் நுழைய முயன்ற பனாமா நாட்டுக் கொடி கொண்ட கப்பல் மீது அமெரிக்க ராணுவம் துப்பாக்கிச் சூடு நடத்தியதாக வால்டர் ப்ளூம்பெர்க் தெரிவிக்கிறார். எச்சரிக்கைகளை புறக்கணித்ததால், அந்த கப்பல் தாக்கப்பட்டது. ஓமான் வளைகுடாவில், ஒரு அமெரிக்க ராணுவ ஹெலிகாப்டர், கப்பலின் ரேடாரை நோக்கிச் சுட்டதில், கப்பலில் தீப்பிடித்தது. பின்னர் தீ அணைக்கப்பட்டது. வான்கார்ட் என்ற கடல்சார் பாதுகாப்பு நிறுவனம், அந்த கப்பலை வேலா நோவா என அடையாளம் கண்டுள்ளது. உயிரிழப்புகள் எதுவும் ஏற்படவில்லை, மேலும் 17 மாலுமிகள் பாதுகாப்பாக உள்ளனர்.

ஏமனில் ஹவுதி தாக்குதலில் கொல்லப்பட்ட 3 பேர்

இதற்கிடையே, இன்று அல் மாண்டேப் பகுதியில் ஒரு சிறிய சரக்குக் கப்பல் தாக்கப்பட்டதாகவும், இதில் மூன்று பணியாளர்கள் கொல்லப்பட்டதாகவும் ஏமன் கடலோரக் காவல்படை தெரிவித்துள்ளது. தான்சானியக் கொடியை ஏந்திய 'திஹாமா' என்ற கப்பல், ஏமனின் அல் மோக்கா கடற்கரைக்கு அப்பால் அடையாளம் தெரியாத எறிபொருளால் தாக்கப்பட்டதாக, ஐக்கிய ராச்சியத்தின் கடல்சார் வர்த்தக நடவடிக்கைகள் அமைப்பு தெரிவித்துள்ளது.

ஈரான் ஆதரவு ஹவுதிக்களால் இந்த கப்பல் குறிவைக்கப்பட்டது. இருப்பினும், இந்த தாக்குதலுக்கு அந்த அமைப்பு பொறுப்பேற்கவில்லை. இந்த தாக்குதலில் இரண்டு பாகிஸ்தானியர்கள் மற்றும் ஒரு இந்தோனேசியர் என மூன்று பணியாளர்கள் கொல்லப்பட்டனர். இந்த தாக்குதல் நடந்தபோது, அந்த கப்பல் ஓமனின் சலாலாவிலிருந்து ஜிபூட்டிக்குச் சென்று கொண்டிருந்தது.

ஓயாத சண்டை

ஒருபுறம் அமைதிப் பேச்சுவார்த்தை நடைபெற்று வந்தாலும், அதையே விரும்புவதாக ட்ரம்ப் கூறினாலும், மறுபுறம் தாக்குதல்களும் தொடர்ந்து வருகின்றன. தங்கள் மீது தாக்குதல் நடந்தால், பதிலடி கொடுக்கப்படும் என்று ஈரான் தொடர்ந்து கூறிவரும் நிலையில், அமெரிக்காவும் தாக்குதல்களை நிறுத்தாமல் இருக்கிறது. இரு தரப்பும் இப்படி இருந்தால், சண்டை எப்போது ஓய்வது என்ற கேள்வியே உலக நாடுகள் மத்தியில் எழுந்துள்ளது.

இதற்கிடையே, ட்ரம்ப் புதிதாக ஒரு விஷயத்தை கையில் எடுத்துள்ளார். அதாவது, அமெரிக்காவிடம் ஈரான் இழப்பீடு கேட்டுவந்த நிலையில், தற்போது, ஈரான் இழப்பீடு வழங்க வேண்டும் என்று புதிய சர்ச்சையை கிளப்பியுள்ளார் ட்ரம்ப். இதன் மூலம், சண்டை இப்போதைக்கு முடியாது என்பது தெளிவாகிறது.

Trump Vs Iran: ''என்னைய அடிச்சதுக்கு பணத்த குடு'': ஈரானிடம் இழப்பீடு கோரும் ட்ரம்ப்; இது ரொம்ப புதுசா இருக்கே.!

ஸ்ரீராம் ஆராவமுதன் — Tue, 11 Aug 2026 16:11:49 +0530

பல தசாப்தங்களாக நடந்த தாக்குதல்கள் மற்றும் மோதல்களில் கொல்லப்பட்ட அல்லது காயமடைந்த அமெரிக்கர்களுக்காக ஈரான் இழப்பீடு வழங்க வேண்டும் என்று அமெரிக்க அதிபர் டொனால்ட் ட்ரம்ப் கோரியுள்ளார். மேலும், டெஹ்ரானுடனான எதிர்கால அமைதிப் பேச்சுவார்த்தைகள் அனைத்திலும் இந்த விவகாரம் எழுப்பப்படும் என்றும் அவர் கூறியுள்ளார்.

இது குறித்து தனது ட்ரூத் சோஷியல் பக்கத்தில் பதிவிட்ட அவர், அமெரிக்கா உடனான ஐந்தாண்டு கால ராணுவ மோதலின் போது ஏற்பட்ட சேதங்களுக்கு ஈரானிய பிரதிநிதிகள் இழப்பீடு கோருவது ஒரு “சுவாரஸ்யமான யோசனை” என்று தாம் கருதுவதாக ட்ரம்ப் கூறினார். முந்தைய பேச்சுவார்த்தைகளின் போது ஈரானின் இந்தக் கோரிக்கை ஒருபோதும் எழுப்பப்படவில்லை என்றும் அவர் குறிப்பிட்டார்.

இதற்கு பதிலாக, டெஹ்ரான் மீது சுமத்தப்பட்ட தாக்குதல்கள் மற்றும் மோதல்களில் கொல்லப்பட்டதாக கூறப்படும் அல்லது படுகாயமடைந்த மக்களுக்காக ஈரானிடம் இருந்து இழப்பீடு கோரப்போவதாக ட்ரம்ப் கூறினார்.

ஈரானிடம் இருந்து இழப்பீடு கோரும் ட்ரம்ப்

"...இது ஒரு சுவாரஸ்யமான யோசனை, ஏனென்றால், ஈரான் தங்களது சாலையோர குண்டுகள் மற்றும் பல மோதல்கள் மூலம் கொன்ற மற்றும் படுகாயப்படுத்திய அனைத்து மக்களுக்காகவும், நானும் இப்போது அவர்களிடமிருந்து இழப்பீடு கோருகிறேன்," என்று ட்ரம்ப் தனது சமூக வலைதள பக்கதில் பதிவிட்டுள்ளார்.

முன்னாள் இஸ்லாமிய புரட்சிகர பாதுகாப்புப் படைத் தளபதி ஜெனரல் காசெம் சுலைமானியுடன் தொடர்புடையவை உட்பட, ஈரானுடன் தொடர்புடையதாகக் கூறப்படும் மோதல்கள் மற்றும் தாக்குதல்களை அவர் குறிப்பிட்டார். மேலும், யுஎஸ்எஸ் கோல் தாக்குதலில் கொல்லப்பட்டவர்களின் குடும்பங்களையும், "போரில் கொல்லப்பட்ட ஆயிரக்கணக்கான மற்றவர்களையும்" ட்ரம்ப் சுட்டிக்காட்டினார்.

கடந்த 50 ஆண்டுகளில், ஈரானில் நடந்த மக்கள் எழுச்சிகளின் போது கொல்லப்பட்ட போராட்டக்காரர்களின் குடும்பங்களுக்கும் இழப்பீடு வழங்கப்படும் என்று தனது கோரிக்கையில் ட்ரம்ப் கூறினார்.

மேலும், கடந்த ஐந்து மாதங்களில், ஈரானில் 52,000 பேர் கொல்லப்பட்டதாக அவர் கூறினார். ஆனால், அந்த எண்ணிக்கையை உறுதிப்படுத்தும் எந்த விவரங்களையும் அவர் வழங்கவில்லை.

இனிவரும் பேச்சுவார்த்தைகளில் ட்ரம்ப் கோரிக்கையை முன்வைப்பார்

ஈரானுடனான எதிர்கால பேச்சுவார்த்தைகள் அனைத்திலும் இழப்பீடு கோரிக்கையை ஒரு உறுதியான அங்கமாக ஆக்குமாறு தனது பிரதிநிதிகளுக்கு அறிவுறுத்தியுள்ளதாக ட்ரம்ப் கூறினார்.

"எதிர்காலத்தில் நடைபெறவிருக்கும் அனைத்து பேச்சுவார்த்தைகளிலும் இதை உறுதியாக சேர்க்குமாறு எனது பிரதிநிதிகளுக்கு அறிவுறுத்தியுள்ளேன்," என்று அவர் கூறியுள்ளார்.

ஐந்து மாத கால ராணுவ மோதலைத் தொடர்ந்து, வாஷிங்டனுக்கும் டெஹ்ரானுக்கும் இடையே தொடரும் பதற்றங்களுக்கு மத்தியில், இந்த கோரிக்கை எழுந்துள்ளது. அணு ஆயுதத் தயாரிப்பை கைவிட ஈரான் மறுத்ததாலேயே இந்த மோதல் தொடங்கியது என்று ட்ரம்ப் கூறியுள்ளார்.

மோதலின் போது தங்கள் நாட்டிற்கு ஏற்பட்ட சேதங்களுக்கு ஈரானியப் பிரதிநிதிகள் இழப்பீடு கோரியுள்ளதாக ட்ரம்ப் தெரிவித்துள்ளார். கடந்தகால ஈரானிய நடவடிக்கைகளுடன் தொடர்புடைய இழப்பீடுகளுக்கான அமெரிக்க கோரிக்கைகளும், எதிர்காலத்தில் நடைபெறும் எந்தவொரு அமைதிப் பேச்சுவார்த்தையிலும் இடம்பெறக்கூடும் என்று அமெரிக்க அதிபர் தற்போது சமிக்ஞை அளித்துள்ளார்.

கோரப்பட்ட இழப்பீட்டுத் தொகையை ட்ரம்ப் குறிப்பிடவில்லை. மேலும், எதிர்கால பேச்சுவார்த்தைகளில் அந்த கோரிக்கை எவ்வாறு கணக்கிடப்படும் அல்லது அமல்படுத்தப்படும் என்பதையும் அவர் விளக்கவில்லை.

Donald Trump: கேட்டரிங் வாகனம், மிலிட்டரி விமானம் - துருக்கியில் ஈரான் அச்சுறுத்தலில் இருந்து ட்ரம்ப் தப்பியது எப்படி?

குலசேகரன் முனிரத்தினம் — Tue, 11 Aug 2026 10:26:33 +0530

Donald Trump Escort: வழக்கமான ஏர் ஃபோர்ஸ் ஒன் விமானத்தில் முதலில் ஏறிய ட்ரம்ப், பின்பு ரகசியமாக வேறு வாகனத்திற்கு மாற்றப்பட்டுள்ளார்.

ட்ரம்புக்கு கொலை மிரட்டல்

ஈரானிடமிருந்து படுகொலைக்கான அச்சுறுத்தல் தொடர்பாக மேற்கொள்ளப்பட்ட ஒரு ரகசிய நடவடிக்கையின் ஒரு பகுதியாக, அமெரிக்க அதிபர் டொனால்ட் டிரம்ப் அங்காராவில் ஏர் ஃபோர்ஸ் ஒன் விமானத்தில் ஏறிய பிறகு, விமான நிலைய உணவு வழங்கும் லாரி மூலம் ஒரு சிறிய ராணுவ விமானத்திற்கு ரகசியமாக மாற்றப்பட்டார் என்ற தகவல் வெளியாகியுள்ளது.

ரகசியமாக துருக்கியிலிருந்து வெளியேறிய ட்ரம்ப்

துருக்கியில் நடந்த நேட்டோ உச்சி மாநாட்டில் கலந்துகொண்ட பிறகு, ட்ரம்ப் முதலில் கேமராக்களின் முன்னிலையில், பழைய இளநீல நிற ஏர் ஃபோர்ஸ் ஒன் விமானத்தில் ஏறினார்.
ஆனால், விமானத்தில் ஏறிய பிறகு, விமான நிலைய உணவு வழங்கும் லாரி ஒன்று மூலம் அவர் ரகசியமாக விமானப்படையின் சி-32ஏ விமானத்திற்கு அழைத்துச் செல்லப்பட்டுள்ளார். அந்த விமானம் பின்னர் அவரை பிரிட்டனுக்குக் கொண்டு சென்றதாக, 'தி போஸ்ட்' ஊடகம் செய்தி வெளியிட்டுள்ளது.

ட்ரம்ப் பயணம் - பாதுகாப்பு அச்சுறுத்தல்

ஈரானுடனான மோதல்கள் தீவிரமடைந்து வந்த வேளையில் இந்த அசாதாரண பாதுகாப்பு நடவடிக்கை மேற்கொள்ளப்பட்டது. ஈரானானது துருக்கியுடன் தனது நாட்டு எல்லையை பகிர்ந்து கொண்டுள்ளது. அங்குதான் ட்ரம்ப் நேட்டோ உச்சி மாநாட்டிற்காக பயணம் செய்திருந்தார். மேலும், கத்தார் நன்கொடையாக வழங்கிய, புதிதாகப் புதுப்பிக்கப்பட்ட ஒரு ஜெட் விமானத்தில் தனது முதல் சர்வதேசப் பயணத்தையும் மேற்கொண்டிருந்தார். அங்காராவிலிருந்து புறப்படுவதற்கு முன்பு ட்ரம்ப் புதிய விமானத்திலிருந்து பழைய ஏர் ஃபோர்ஸ் ஒன் விமானத்திற்கு திடீரென மாறியது, கத்தார் நன்கொடையாக வழங்கிய அந்த விமானத்தின் பாதுகாப்பு குறித்து கேள்விகளை எழுப்பியுள்ளது.

ட்ரம்ப் சொன்னது என்ன?

இதனிடையே, அங்காராவிலிருந்து புறப்படுவதற்கு முன்பு ட்ரம்ப் வெளியிட்டு இருந்த சமூக வலைதள பதிவில், ”பிரிட்டனில் உள்ள ஆர்ஏஎஃப் மில்டன்ஹாலுக்குப் பறந்து செல்ல, பழைய நினைவுகளுக்காக பழைய இளநீல நிற ஏர் ஃபோர்ஸ் ஒன் விமானத்தைப் பயன்படுத்தப் போவதாகவும், அதே சமயம் அங்கு பணியில் உள்ள அமெரிக்கப் படை வீரர்கள் தளத்தைச் சுற்றிப் பார்ப்பதற்காகப் புதிய விமானமும் அதே தளத்தில் நிறுத்தப்படும்” என்றும் ப்குறிப்பிட்டு இருந்தார்.

க்ளிண்டன் வரிசையில் ட்ரம்ப்..!

ஆனால், கேமராக்கள் முன்னிலையில் ட்ரம்ப் பழைய விமானத்தில் ஏறிய பிறகு, விமான நிலைய உணவு வழங்கும் லாரி ஒன்றைப் பயன்படுத்தி அவர் ரகசியமாக சி-32ஏ விமானத்திற்கு மாற்றப்பட்டாராம், டிரம்பின் உயிருக்கு அச்சுறுத்தல் இருப்பதாக கிடைத்த நம்பகமான தகவல் அடிப்படையில் இந்த நடவடிக்கை மேற்கொள்ளப்பட்டுள்ளதாம். இதேபோன்ற ஒரு நடவடிக்கை 2000-ஆம் ஆண்டில் நடைபெற்றது. அப்போது. அதிபர் பில் கிளிண்டன், தனது அதிகாரப்பூர்வ ஏர் ஃபோர்ஸ் ஒன் விமானத்தை ஒரு திசைதிருப்பலாக அனுப்பிவிட்டு, அடையாளம் தெரியாத ஒரு நிர்வாக ஜெட் விமானத்தைப் பயன்படுத்தி பாகிஸ்தானுக்குள் பறந்தார் என்பது குறிப்பிடத்தக்கது.

இதையும் படியுங்கள்:RBI Loan Recovery: லோன் வசூல் நடவடிக்கைகள் - கடும் கட்டுப்பாடுகளை விதித்த ஆர்பிஐ - புதிய விதிகள் என்ன?

ஊடகவியலாளர்களிடம் உண்மையை மறைத்த ட்ரம்ப்

இதனிடையே, பழைய ஏர் ஃபோர்ஸ் ஒன் விமானத்தில் டிரம்புடன் பயணம் செய்வதற்காக் தயாராக் இருந்த பத்திரிகையாளர்கள், தங்கள் அறையில் உள்ள ஜன்னல் திரைகளை மூடியே வைத்திருக்க வேண்டும் என அறிவுறுத்தப்பட்டுள்ளனர். சில வெள்ளை மாளிகை ஊழியர்களும் அதிபர் விமானத்தில் இருந்தனராம். ட்ரம்ப் பயணித்த சி-32ஏ விமானம் இரவு சுமார் 10:20 மணியளவில் பிரிட்டனை வந்தடைந்தது என்றும், சில நிமிடங்களுக்குப் பிறகு பழைய ஏர் ஃபோர்ஸ் ஒன் விமானமும் ஊடகவியலாளர்கள் உடன் அங்கு வந்தடைந்துள்ளது. அதேநேரம், சி-32ஏ விமானத்திலிருந்து பழைய ஏர் ஃபோர்ஸ் ஒன் விமானத்திற்கு டிரம்ப் எவ்வாறு மாற்றப்பட்டார் என்பது தொடர்பான தகவல் ஏதும் வெளியாகவில்லை.

Trump Vs Netanyahu: ஓ.. உனக்கு அவ்ளோ தில்லா.? ட்ரம்ப்பின் அமைதித் திட்டத்தை நிராகரித்த நெதன்யாகு.! என்ன நடக்கும்.?

ஸ்ரீராம் ஆராவமுதன் — Sun, 9 Aug 2026 18:05:48 +0530

காசாவிற்கான 15 அம்ச அமைதி வாரியத் திட்டத்தை உள்ளடக்கிய அமெரிக்க அதிபர் ட்ரம்ப்பின் திட்டத்தை, இஸ்ரேலியப் பிரதமர் பெஞ்சமின் நெதன்யாகு நிராகரித்துள்ளார். ஹமாஸ் தனது ஆயுதங்களை முழுமையாக ஒப்படைக்கும் வரை, காசாவிலிருந்து இஸ்ரேலிய ராணுவம் வெளியேறாது என்று நெதன்யாகு தெளிவாகக் கூறியதாக இஸ்ரேலிய ஊடகங்கள் தெரிவிக்கின்றன.

நெதன்யாகு கூறியது என்ன.?

இது குறித்து பேசியுள்ள நெதன்யாகு, "ஹமாஸின் உண்மையான மற்றும் முழுமையான அழிவை இஸ்ரேல் கோருகிறது. அந்த அமைப்பை வெறுமனே பலவீனப்படுத்துவதால் விரும்பிய பலன் கிடைக்காது," என்று கூறியுள்ளார்.

மேலும், இந்த விவகாரம் தொடர்பாக அமெரிக்காவுடன் பேச்சுவார்த்தைகள் நடைபெற்று வருவதாக இஸ்ரேலியப் பிரதமர் தெரிவித்தார். ட்ரம்ப் நிர்வாகத்தின் சில திட்டங்களை இஸ்ரேல் ஏற்றுக்கொள்கிறது. ஆனால் அதே சமயம், மற்றவற்றுடன் அது உடன்படவில்லை.

கடந்த வாரம் வாரியத்தின் இயக்குநருக்கும் நெதன்யாகுவுக்கும் இடையே நடந்த சந்திப்பைத் தொடர்ந்து, ஹமாஸின் ஆயுதங்கள் முழுமையாக பறிமுதல் செய்யப்பட்ட பின்னரே காசாவிலிருந்து இஸ்ரேலியப் படைகள் வெளியேறும் என்று அந்த வாரியம் கூறியதாக அல் ஜசீரா தெரிவித்துள்ளது.

போரை முடிவுக்குக் கொண்டுவரும் திட்டம் பெரும் வெற்றி பெற்றுள்ளதாக கூறிய ட்ரம்ப்

இதற்கிடையே, போரை முடிவுக்குக் கொண்டுவரும் தனது திட்டம் ஒரு பெரும் திருப்புமுனையை எட்டியுள்ளதாக ட்ரம்ப் கடந்த மாதம் அறிவித்தார். கடந்த ஆண்டு, இஸ்ரேலும் ஹமாஸும் ஒப்புக்கொண்ட இந்தத் திட்டம், ஒரு போர் நிறுத்தத்துடன் தொடங்கியது. கடந்த அக்டோபர் முதல் போர் நிறுத்தம் அமலில் இருந்தபோதிலும், இஸ்ரேல் காசா மீது தொடர்ந்து தாக்குதல் நடத்தி வருகிறது.

"ஹமாஸ் தனது ஆயுதங்களைக் கைவிட ஒப்புக்கொண்டது. 2023 அக்டோபர் 7 அன்று இஸ்ரேலைத் தாக்கி காசா போரைத் தொடங்குவதற்கு முன்பு, ஹமாஸ் கிட்டத்தட்ட இரண்டு தசாப்தங்களாக ஆட்சி செய்தது," என்று அதிபர் ட்ரம்ப் கூறினார்.

புதிய பின்னடைவை சந்தித்த ட்ரம்பின் காசா அமைதித் திட்டம்

காசாவில் உள்ள ஆயுதக் குழுக்களை நிராயுதபாணி ஆக்குவதற்கான ஒரு முன்மொழிவை ஏற்றுக்கொண்டதாக ஹமாஸ் அறிவித்ததைத் தொடர்ந்து, நீடித்த அமைதி மற்றும் பாதுகாப்பை நோக்கிய ஒரு முக்கிய நடவடிக்கையாக அந்த திட்டத்தை ட்ரம்ப் விவரித்திருந்தார்.

இந்த செயல்திட்டம், ஹமாஸின் ஆயுதக் களைவு, இஸ்ரேலிய ராணுவத்தின் வெளியேற்றம் மற்றும் காசாவின் புனரமைப்பு ஆகியவற்றுடன், அமலாக்கத்தை மேற்பார்வையிட ஒரு அமைதி வாரியத்தை உருவாக்குவதையும் முன்மொழிகிறது.

இந்நிலையில், நெதன்யாகுவின் இந்த நிராகரிப்பு, அமெரிக்க ஆதரவு திட்டத்திற்கு மற்றுமொரு சவாலாக அமைந்துள்ளது. மேலும், முன்மொழியப்பட்ட இந்த ஏற்பாட்டை கைவிடுமாறு, தீவிர வலதுசாரி கூட்டணி நாடுகளிடமிருந்தும் இஸ்ரேலிய பிரதமருக்கு அழுத்தம் கொடுக்கப்படுகிறது. தேசிய பாதுகாப்பு அமைச்சர் இட்டாமர் பென் கிவிர், இந்த வரைவை “ஏற்றுக்கொள்ள முடியாதது” என்று கூறியுள்ளார்.

''போர் முடிவுக்கு வரும், ஆனா அதுக்கு ட்ரம்ப் ஒரு உத்தரவாதம் கொடுக்கணும்.!'' ஈரான் அதிபர் கேட்பது என்ன.?

ஸ்ரீராம் ஆராவமுதன் — Sun, 9 Aug 2026 16:30:06 +0530

அமெரிக்காவுடன் சமீபத்தில் கையெழுத்திட்ட புரிந்துணர்வு ஒப்பந்தத்தின்படி, வாஷிங்டன் நம்பிக்கையான சூழலை பேணினால், டெஹ்ரான் அமைதிப் பாதையில் தொடர்ந்து பயணிக்கும் என்று ஈரான் அதிபர் மசூத் பெஷெஷ்கியன் கூறியுள்ளார். ஈரான், போரை முடிவுக்குக் கொண்டுவரும், ஆனால் அதற்கு அமெரிக்க அதிபர் டொனால்ட் ட்ரம்ப்பின் முழு ஆதரவும் தேவைப்படும் என்றும் அவர் கூறினார்.

புரிந்துணர்வு ஒப்பந்தத்தில் கூறப்பட்டுள்ளதன் அடிப்படையில், ஈரான் அமைதிப் பாதையில் முன்னேற முயற்சிப்பதாக பெஷெஷ்கியன் நேற்று தெரிவித்தார். மேலும், "நாட்டில் ஒற்றுமை, வலிமை மற்றும் ஒருமைப்பாடு நிலவுவதால், ஒரு உடன்பாட்டை எட்டுவதற்கு இதுவே சிறந்த தருணம். அமெரிக்கா அவநம்பிக்கை சூழலை முடிவுக்குக் கொண்டுவந்தால், புரிந்துணர்வு ஒப்பந்தத்தின் அடிப்படையில் நாங்கள் முன்னேற உறுதியாக உள்ளோம்" என்றும் அவர் கூறியுள்ளார்.

அமெரிக்கா தாக்கினால், தகுந்த பதிலடி கொடுப்போம் - பெஷேஷ்கியன்

அமெரிக்கா ஒப்புக்கொள்ளும் நிபந்தனைகளுக்கு ஏற்ப, ஈரான் தனது கடமைகளை நிறைவேற்றும் என்று அவர் கூறினார். மேலும், எதிர் தரப்பு பலத்தை பயன்படுத்த முடிவு செய்தால், ஈரான் அதை ஏற்றுக்கொள்ளாது என்றும் பெஷெஷ்கியன் கூறினார். ஈரானின் நடவடிக்கைகளுக்கான இறுதி அடிப்படை, அதன் உச்ச தலைவர் மொஜ்தபா கமேனியின் முடிவுகளாகவே இருக்கும். தாக்கப்பட்டால், கடுமையான பதிலடி கொடுக்கப்படும் என்றும் அமெரிக்காவை பெஷெஷ்கியன் எச்சரித்தார்.

முன்னதாக, ஈரான் அதிபர் தனது உரிமைகளை பாதுகாப்பதற்கான பேச்சுவார்த்தையைத் தொடர்வதில் நாட்டின் உறுதிப்பாட்டை மீண்டும் வலியுறுத்தியதோடு, டெஹ்ரான் பணிந்துபோக நிர்பந்திக்கப்படாது என்றும் குறிப்பிட்டார்.

கடந்த வெள்ளிக்கிழமை (உள்ளூர் நேரம்) தனது அலுவலக இணையதளத்தில் வெளியிடப்பட்ட ஒரு பேட்டியில் பெஷெஷ்கியன் இந்த கருத்துக்களை தெரிவித்துள்ளார். போரை முடிவுக்குக் கொண்டுவருவதற்காக அமெரிக்காவுடன் பேச்சுவார்த்தையில் ஈடுபடுவதற்கும், புரிந்துணர்வு ஒப்பந்தத்தில் கையெழுத்திடுவதற்கும் ஈரான் அரசாங்கம் எடுத்த முடிவை அவர் ஆதரித்துப் பேசினார்.

அமெரிக்கா அமைதியாக இருக்கும் வரை, ஈரானும் அதை ஆதரிக்கும் - பெஷெஷ்கியன்

"புரிந்துணர்வு ஒப்பந்தத்தின் கீழ் அமெரிக்கா தனது கடமைகளை நிறைவேற்றும் வரை, ஈரான் தனது உறுதிமொழிகளை கடைபிடிக்கும். அவர்கள் தங்களது உறுதிமொழிகளை நிறைவேற்றத் தவறும் இடங்களில், நாங்கள் தொடர்ந்து செயல்பட எந்தக் கடமையும் இல்லை," என்று ஈரான் அதிபர் கூறினார்.

இந்த வாரத்தின் தொடக்கத்தில், தாம் பதவி விலகுவதாகக் கூறப்படுவதை மறுத்த பெஷெஷ்கியன், தனது முழு பணிகளையும் தொடர்ந்து செய்வேன் என்றும் கூறினார். புரிந்துணர்வு ஒப்பந்தம் தொடர்பாக ஈரான் தலைமைக்குள் கருத்து வேறுபாடுகள் நிலவுவதாக வதந்திகள் பரவிய நிலையில், அந்நாட்டு அதிபர் பெஷெஷ்கியனின் இந்த கருத்துக்கள் வெளியாகியுள்ளன.

Mojtaba Khamenei Video: ஈரான் தலைவர் மொஜ்தபா எங்கே, எப்படி இருக்கிறார்.? உடல்நிலை குறித்த யூகங்களுக்கிடையே வெளியான வீடியோ

ஸ்ரீராம் ஆராவமுதன் — Sun, 9 Aug 2026 15:53:56 +0530

ஈரான் உச்ச தலைவர் மொஜ்தபா கமேனியின் உடல்நிலை மற்றும் இருப்பிடம் குறித்த ஊகங்கள் தொடரும் நிலையில், ஈரானின் செய்தி நிறுவனமான மெஹர் நியூஸ், ஒரு காணொளியை வெளியிட்டுள்ளது. தேதி குறிப்பிடப்படாத அந்தக் காணொளியில், கமெனி நல்ல உடல்நிலையில் இருப்பது தெரிகிறது. கமேனி கவலைக்கிடமான நிலையில் மருத்துவமனைக்குக் கொண்டு செல்லப்பட்டதாக இஸ்ரேலிய ஊடகங்கள் கூறியதைத் தொடர்ந்து, இந்த காணொளி வெளியாகியுள்ளது. இந்த காணொளியை முதன் முறையாக வெளியிடுவதன் மூலம், கமெனியின் உடல்நிலை மற்றும் இருப்பிடம் குறித்த அதிகரித்து வரும் ஊகங்களைத் தணிக்க மெஹர் நியூஸ் முயன்றுள்ளது. மெஹர் நியூஸ், ஈரானிய அரசாங்கத்தின் இஸ்லாமிய மேம்பாட்டு அமைப்புடன் தொடர்புடையது.

https://t.co/j8OfnYg64P
— وكالة مهر للأنباء (@mehrnewsarabic) August 8, 2026

இஸ்ரேலிய ஊடகங்கள் மிகவும் மோசமான நிலை குறித்து வெளியிட்ட செய்தி

வெள்ளிக்கிழமை அன்று, மொஜ்தபா கமெனியின் உடல்நிலை மிகவும் கவலைக்கிடமாக இருப்பதாக சில இஸ்ரேலிய ஊடக அறிக்கைகள் தெரிவித்தன. சேனல் 14, ஈரானுக்குள் இருக்கும் வட்டாரங்களை மேற்கோள் காட்டி, இந்த கூற்றை வெளியிட்டது. முன்னதாக, ஈரான்வயர் மற்றும் ஈரான் அதிபர் மசூத் பெஷேஷ்கியனின் நிர்வாகத்திற்கு நெருக்கமான வட்டாரங்களை மேற்கோள் காட்டி, கமேனியின் உடல்நிலை குறித்து ஈரான் தலைமைக்கு கவலை இருப்பதாக ஜெருசலேம் போஸ்ட் செய்தி வெளியிட்டிருந்தது.

கமேனியின் மரணம் குறித்த செய்தி விரைவில் வெளிவருவதற்கான சாத்தியக்கூற்றை நிராகரிக்க முடியாது என்று ஜெருசலேம் போஸ்ட் பத்திரிகையின் ஓர் ஆதாரம் கூறியுள்ளது.

தந்தையின் மரணத்திற்குப் பிறகு உச்ச தலைவரானார்

பிப்ரவரி 28 அன்று அமெரிக்க மற்றும் இஸ்ரேலிய கூட்டு ராணுவத் தாக்குதலில் தனது தந்தை அயதுல்லா அலி கமேனி படுகொலை செய்யப்பட்டதை அடுத்து, மொஜ்தபா கமேனி உச்ச தலைவர் பதவியை ஏற்றார். மொஜ்தபா கமெனி பதவியேற்றதிலிருந்து பொதுவெளியில் காணப்படவில்லை. அவர் இதுவரை எழுத்துப்பூர்வ அறிக்கைகள் மூலம் மட்டுமே பேசியுள்ளார்.

ஆரம்பகட்டத் தாக்குதல்களில் மொஜ்தபா கமெனி காயமடைந்ததாகவும், அவரது முகத்திலோ அல்லது உடலிலோ கடுமையான காயங்கள் ஏற்பட்டிருக்கக்கூடும் என்றும் அறிக்கைகள் கூறுகின்றன. அதைத் தொடர்ந்து, அவர் பொது நிகழ்ச்சிகளில் கலந்துகொள்வதை தவிர்த்து வருவதாகவும், தலைமறைவாக இருப்பதாகவும் கூறப்படுகிறது.

காயங்கள் சிறியவை என கூறும் ஈரான் அதிகாரிகள்

ஈரானிய அரசாங்க அதிகாரிகள், மொஜ்தபா கமேனியின் ஆரம்பகட்ட காயங்கள் மேலோட்டமானவை என்று கூறி, அவற்றின் தீவிரத்தை முன்னதாக குறைத்து மதிப்பிட்டிருந்தனர். நாட்டின் மூலோபாய முடிவுகள் மற்றும் செயல்பாடுகள் தொடர்பான அறிவுறுத்தல்களை மொஜ்தபா கமேனி தொடர்ந்து வழங்கி வருவதாக மூத்த ஈரானிய அதிகாரிகளும் தெரிவித்துள்ளனர்.

அவர் நேரலையில் தோன்றாததால் தொடரும் யூகங்கள்

ஈரானிய அரசாங்க அதிகாரிகளின் கூற்றுக்களுக்கு மாறாக, மொஜ்தபா கமெனி பொது வாழ்வில் இருந்து நீண்டகாலம் விலகியிருப்பது, அவரது உடல்நிலை மற்றும் தலைமைத்துவ நிலை குறித்த ஊகங்களுக்கு வழிவகுத்துள்ளது.

இந்த சூழலில் தான் தற்போது இந்த வீடியோ வெளியாகியுள்ளது. எனினும், அவர் நல்ல உடல்நலத்துடனும், முகத்தில் எந்த காயத் தழும்புகளோ இல்லாமலும் இருப்பதால், இந்த வீடியோ பழையதா அல்லது சமீபத்தில் எடுக்கப்பட்டதாக என்ற சந்தேகமும் ஒரு புறம் உலவுகிறது.

Zelensky Serbia Weapons: பலே கில்லாடி மா நீ.! ரஷ்யாவின் நட்பு நாட்டிடமே ஆயுதங்களை கேட்கும் உக்ரைன் அதிபர் ஜெலன்ஸ்கி; கிடைக்குமா.?

ஸ்ரீராம் ஆராவமுதன் — Sat, 8 Aug 2026 21:19:04 +0530

உக்ரைன் அதிபர் வொலோடிமிர் ஜெலென்ஸ்கியும், செர்பிய அதிபர் அலெக்சாண்டர் வுசிச்சும் கடந்த காலத்தில் பலமுறை சந்தித்துள்ளனர். பெரும்பாலும் பலதரப்பு மாநாடுகளின் இடையே இந்த சந்திப்புகள் நிகழ்ந்தன. மிக அண்மையில், ஜூலை 15 அன்று உக்ரைனின் தலைநகரான கீவ்வில் இந்த சந்திப்பு நடைபெற்றது. இந்நிலையில், நேற்று, ஜெலென்ஸ்கி தனது முதல் அதிகாரப்பூர்வ அரசுமுறைப் பயணத்திற்காக செர்பியா வந்தடைந்தார்.

இருப்பினும், இந்தப் பேச்சுவார்த்தைகளுக்கு கவனமான அரசியல் சமநிலைப்படுத்தல் தேவைப்படக்கூடும். உக்ரைனுக்கு எதிராக ரஷ்யா தொடர்ந்து போரை நடத்தி வந்தபோதிலும், ஐரோப்பாவின் மிகவும் ரஷ்ய ஆதரவு நாடாக செர்பியா பரவலாகக் கருதப்படுகிறது.

பெல்கிரேடிற்கும் கீவிற்கும் இடையே நெருங்கிய உறவுகள் ஏற்படுவதற்கான பல அறிகுறிகள் சமீபகாலமாக தென்பட்டுள்ளன. உக்ரைனின் முதல் பெண்மணியான ஒலெனா ஜெலென்ஸ்கா, இரண்டு ஆண்டுகளுக்கு முன்பு பெல்கிரேடிற்கு வருகை தந்தார். ஆனால், உக்ரைனிய அதிபரின் பயணம் பலமுறை ஒத்திவைக்கப்பட்டுள்ளது.

வூசிச்-ன் நோக்கம் என்ன.?

கடந்த 14 ஆண்டுகளாக செர்பியாவை இரும்புக்கரம் கொண்டு ஆண்டு வரும் வூசிச்சைப் பொறுத்தவரை, வரவிருக்கும் முக்கிய நாடாளுமன்றத் தேர்தல்களுக்கு முன்னதாக, இந்த பயணம் ஒரு சமநிலைப்படுத்தும் முயற்சியாகும். மாணவர்கள் தலைமையிலான ஒரு போராட்ட இயக்கம், தனது சொந்த தேர்தல் பட்டியலை வெளியிடத் திட்டமிட்டுள்ளது; இதன் மூலம் முதல் முறையாக வூசிச்சிற்கு ஒரு வலுவான சவாலை முன்வைப்பதற்கான யதார்த்தமான வாய்ப்பு உள்ளது. அதிபர் மீது ஊழல் குற்றச்சாட்டும், ஊடகங்கள் மற்றும் நீதித்துறை மீது ஆதிக்கம் செலுத்தும் குற்றச்சாட்டும் சுமத்தப்பட்டுள்ளது.

கருத்துக் கணிப்புகளின்படி, வுசிச்சின் விசுவாசமான ஆதரவாளர்களில் பெரும்பான்மையானோர் ரஷ்யாவுக்கு ஆதரவாக இருப்பதோடு, செர்பியா ஐரோப்பிய ஒன்றியத்தில் இணைவதையும் எதிர்க்கின்றனர். இன்ஃபார்மர் போன்ற மஞ்சள் பத்திரிகைகள் , இந்தப் போரில் மாஸ்கோவை வெளிப்படையாக ஆதரித்துள்ளன.

இருப்பினும், ஜெலென்ஸ்கியின் பயணத்தை ஒரு சாதாரண அரசுமுறைப் பயணமாக சித்தரித்த வுசிச், "நாம் விவாதிக்க வேண்டிய பல முக்கியமான விஷயங்கள் உள்ளன. முதலாவது, ஐரோப்பாவை நோக்கிய உக்ரைன் மற்றும் செர்பியாவின் பாதை; இரண்டாவது, நமது இருதரப்பு மற்றும் எரிசக்தி ஒத்துழைப்பு" என்று கூறினார்.

செர்பியாவில் தயாரிக்கப்பட்ட பீரங்கி குண்டுகள்

இதனிடையே, ஜெலென்ஸ்கி செர்பிய ஆயுதங்களை பெறவும் முயலக்கூடும். செர்பியாவின் ரஷ்ய ஆதரவு நிலைப்பாடு மற்றும் ரஷ்ய எதிர்ப்புத் தடைகளுக்கு அதன் எதிர்ப்பு இருந்தபோதிலும், பெருமளவிலான செர்பிய பீரங்கிக் குண்டுகள் இடைத்தரகர்கள் மூலம் உக்ரைனுக்கு ஏற்கனவே வழங்கப்பட்டுள்ளன. 2024-ம் ஆண்டில் உக்ரைனுக்கு வழங்கப்பட்ட ராணுவப் பொருட்களின் மொத்த மதிப்பு 1 பில்லியன் யுரோ (1.15 பில்லியன் டாலர்) என்று ஃபைனான்சியல் டைம்ஸ் செய்தித்தாள் மதிப்பிட்டுள்ளது.

சமீபத்தில் செர்பியாவுக்கான தூதர் பதவியிலிருந்து ஓய்வு பெற்ற, அனுபவம் வாய்ந்த அமெரிக்க ராஜதந்திரியான கிறிஸ்டோபர் ஹில், உக்ரேனிய ராணுவத்தையும் செர்பிய பாதுகாப்புத் தொழில்துறையையும் எவ்வாறு ஒன்றிணைத்தார் என்பது குறித்து வெளிப்படையாகப் பேசினார்.

செய்தித்தாள் தகவலின்படி, உக்ரேனிய நிபுணத்துவம், செர்பிய தொழிலாளர்கள் மற்றும் ஐக்கிய அரபு அமீரகத்தின் முதலீட்டைப் பயன்படுத்தி ஒரு கூட்டு ட்ரோன் தொழிற்சாலையை அமைப்பது குறித்தும் திரைமறைவில் பேச்சுவார்த்தைகள் நடைபெற்று வருகின்றன. ஜெலென்ஸ்கியின் குழுவினர் சாத்தியமான இடங்களை ஏற்கெனவே ரகசியமாக ஆய்வு செய்துள்ளதாகக் கூறப்படுகிறது.

"ரஷ்யா மீது பொருளாதாரத் தடைகளை விதிக்காத நாடுகள் உட்பட, தனது ஐரோப்பிய கூட்டாளிகளின் வட்டத்தை விரிவுபடுத்த உக்ரைன் முயன்று வருகிறது," என்று பெல்கிரேடைத் தளமாகக் கொண்ட ஐரோப்பிய கொள்கை மையம் என்ற சிந்தனைக் குழுவின் ஸ்ர்ஜான் மஜ்ஸ்டோரோவிக் DW-யிடம் கூறினார். "அதே நேரத்தில், செர்பியா ஒரு பாதுகாப்புத் தொழில்துறையைக் கொண்டுள்ளது, அதன் தயாரிப்புகள் உக்ரைனின் போர் முயற்சிக்கு முக்கியமானவை."

ஐரோப்பிய ஒன்றியத்தில் சேர்வதற்கான பேச்சுவார்த்தைகள்

வூசிச் மீதான ஐரோப்பிய ஒன்றியத்தின் விமர்சனம் இதுவரை நிதானமாகவும், சில சமயங்களில் முரண்பாடாகவும் இருந்து வருகிறது. செர்பியாவை இணைக்கும் பேச்சுவார்த்தைகளை முன்னெடுத்துச் செல்ல ஐரோப்பிய ஆணையம் பரிந்துரைத்த போதிலும், அந்த பால்கன் நாட்டில் ஜனநாயகப் பற்றாக்குறைகள் குறித்த கவலைகள் காரணமாக சில ஐரோப்பிய ஒன்றிய உறுப்பு நாடுகள் இதை எதிர்க்கின்றன.

இருப்பினும், சர்வதேச உச்சிமாநாடுகளின் போது ஜெலென்ஸ்கியைச் சந்திக்கும்போதெல்லாம், வுசிச் தனது உள்நாட்டு ஆதரவாளர்களிடம் தவறாமல் பயன்படுத்தும் ஒரு துருப்புச் சீட்டும் அவரிடம் உள்ளது. ரஷ்யாவைப் போலவே, உக்ரைனும், முன்னாள் செர்பிய மாகாணமான கொசோவோவின் சுதந்திரத்தை ஒருபோதும் அங்கீகரித்ததில்லை. இந்த உண்மை வூசிச்சின் வாக்காளர்களுக்கு சாதகமாக அமைகிறது.

US Iran War: “சும்மா மேல இருந்து மட்டும் குண்டு போட்டா வேலைக்கு ஆகாது“; ட்ரம்ப்புக்கு US ராணுவ ஜெனரல் வார்னிங்

ஸ்ரீராம் ஆராவமுதன் — Sat, 8 Aug 2026 20:40:56 +0530

அமெரிக்காவுக்கும் ஈரானுக்கும் இடையே கிட்டத்தட்ட 6 மாதங்களாக நீடித்து வரும் போர் ஒரு நெருக்கடியான கட்டத்தை நெருங்கி வருவதாகத் தெரிகிறது. இந்நிலையில், அமெரிக்க கூட்டுப் படைகளின் தலைமைத் தளபதியும், அதிபர் டொனால்ட் ட்ரம்பின் நெருங்கிய நம்பிக்கைக்குரியவருமான ஜெனரல் டான் கேன், இந்த மோதலில் இருந்து ஒரு தீர்வைக் காணுமாறு நிர்வாகத்தை வலியுறுத்தி வருகிறார்.

வெள்ளை மாளிகையின் மூத்த அதிகாரிகளுடனான சந்திப்பின்போது, அமெரிக்க ராணுவ அழுத்தத்தை மட்டுமே அதிகரிப்பது எதிர்விளைவுகளை ஏற்படுத்தக்கூடும் என்றும், ஈரான் மீதான வான்வழித் தாக்குதல்கள் மூலம் மட்டுமே ட்ரம்ப் கூறிய நோக்கங்களை அடைய முடியாது என்றும் கேன் வாதிட்டதாகக் கூறப்படுகிறது.

வான்வழித் தாக்குதல்களை நம்பியிருக்க வேண்டாம் - அமெரிக்க தளபதி எச்சரிக்கை

சிஎன்என் அறிக்கையின்படி, ஜெனரல் டான் கேன், வெளியுறவுத்துறை செயலாளர் மார்கோ ரூபியோ மற்றும் சிஐஏ இயக்குனர் ஜான் ராட்க்ளிஃப் உள்ளிட்ட பல மூத்த அதிகாரிகள் இந்தக் கூட்டத்தில் கலந்துகொண்டனர்.

ஈரான் மீது குண்டுவீசுவது டெஹ்ரானை சரணடையச் செய்யாது என ராணுவ மற்றும் உளவுத்துறை மதிப்பீடுகள் சுட்டிக்காட்டுவதாக கேன் கூறினார். மேலும், கிட்டத்தட்ட 6 மாத காலப் போருக்குப் பிறகு, அமெரிக்காவின் ஆயுதக் கையிருப்பு குறைந்துவிட்டதையும் அவர் எடுத்துரைத்தார்.

கேனுக்கும் அதிபர் ட்ரம்புக்கும் இடையே திட்டமிடப்பட்டிருந்த சந்திப்புக்கு முன்னதாக இந்தக் கூட்டம் நடைபெற்றது. பல்வேறு முகமைகளுக்கு இடையேயான ஒருங்கிணைப்பை மேம்படுத்துவதற்கும், அமெரிக்காவிடம் உள்ள ராணுவத் தேர்வுகள் குறித்து ஒரு பொதுவான புரிதலை எட்டுவதற்கும் அதிகாரிகள் கூடியிருந்தனர்.

அமெரிக்கப் படைகளை தரைப்படையில் நிலைநிறுத்தும் சாத்தியக்கூறு உட்பட, அந்தத் தேர்வுகளுடன் தொடர்புடைய வரம்புகள் மற்றும் அபாயங்கள் குறித்து விவாதங்கள் கவனம் செலுத்தின. "அமெரிக்கப் படைகளை பாதுகாப்பதற்கும், பெரிய இழப்புகள் ஏற்படுவதை தடுப்பதற்கும், இது அவர்களின் வழி என்று நான் நினைக்கிறேன்," என ஓர் வட்டாரம் கூறியதாக மேற்கோள் காட்டப்பட்டுள்ளது.

அமெரிக்க ராணுவம் சேதம் விளைவிக்கும் திறன் கொண்டது, ஆனால் தரைப்படைகள் கவலைக்குரியவை

மேலும், ராணுவ நடவடிக்கை எடுப்பதால் ஏற்படக்கூடிய கடுமையான விளைவுகள் குறித்து அக்குழு ட்ரம்பை எச்சரித்த அதேவேளையில், அவர் உத்தரவிட்டால் ஈரானுக்குக் கணிசமான சேதத்தை விளைவிக்கும் திறன் அமெரிக்க ராணுவத்திற்கு இன்னும் உள்ளது என்றும் அவருக்கு உறுதியளித்துள்ளது.

ஈரானிய மண்ணில் படைகளை நிலைநிறுத்தும் வாய்ப்பு அமெரிக்காவிற்கு உள்ளது. இருப்பினும், அத்தகைய நடவடிக்கை ஆயிரக்கணக்கான அமெரிக்க வீரர்களின் உயிர்களுக்கு ஆபத்தை ஏற்படுத்தக்கூடும் என்பதால், ட்ரம்ப்பும் அவரது அதிகாரிகளும் அதனை ஆதரிக்கவில்லை.

நிர்வாகம் தனது ராணுவ மற்றும் ராஜதந்திர வழிமுறைகளை ஆராய்ந்து வரும் நிலையில், அடுத்தகட்ட நடவடிக்கை குறித்த ட்ரம்பின் முடிவுக்காக அமெரிக்க ராணுவம் தற்போது காத்திருக்கிறது.

ராஜதந்திர வழியை நாடும் அமெரிக்கா

போர் தொடங்கி 6 மாதங்கள் ஆன நிலையில், பிராந்தியத்தில் பதற்றங்களை தணிக்கும் அதே வேளையில், அமெரிக்க பொதுமக்கள் மத்தியில் அதிபர் ஒரு அடையாளப்பூர்வமான வெற்றியை பறைசாற்ற வழிவகுக்கும் ஒரு ராஜதந்திர வழியை கண்டறிவதில் ட்ரம்ப் நிர்வாகம் அதிக கவனம் செலுத்தி வருகிறது.

ஹார்முஸ் ஜலசந்தியை மீண்டும் திறப்பதும், ஈரானுடன் ஒரு சாத்தியமான ராஜதந்திர ஒப்பந்தத்தை இறுதி செய்வதும் நிர்வாகத்தின் இரண்டு உடனடி முன்னுரிமைகள் ஆகும்.

மோதலை மேலும் தீவிரப்படுத்தாமலும், அமெரிக்கப் படைகளுக்கு பெரும் இழப்புகளை ஏற்படுத்தாமலும், ட்ரம்ப் கூறியுள்ள நோக்கங்களை எவ்வாறு அடைவது என்பது குறித்து நிர்வாகம் ஆலோசித்து வரும் வேளையில், இந்த சமீபத்திய விவாதங்கள் நடைபெறுகின்றன.

China Firm Unhappy Leave: அட, இது லிஸ்ட்லயே இல்லையே.! மன வருத்தத்துல இருக்குற பணியாளர்களுக்கு விடுப்பு கொடுக்கும் கம்பெனி; எங்கே.?

ஸ்ரீராம் ஆராவமுதன் — Sat, 8 Aug 2026 17:22:09 +0530

சீனாவைச் சேர்ந்த சில்லறை விற்பனை நிறுவனமான பாங் டோங் லாய், தனது ஊழியர்களின் மனநலனை கருத்தில் கொண்டு, தற்போது தலைப்புச் செய்திகளில் இடம்பிடித்துள்ள ஒரு தனித்துவமான விடுப்புக் கொள்கையை செயல்படுத்தியுள்ளது. சமீபத்தில், இந்நிறுவனம் தனது ஊழியர்களுக்காக "மன வருத்த விடுப்பு" என்ற திட்டத்தை அறிமுகப்படுத்தியுள்ளது. இந்த புதிய கொள்கையின் கீழ், ஊழியர்கள் மனரீதியாகவோ அல்லது உணர்ச்சி ரீதியாகவோ நலமில்லாமல் உணர்ந்தால், ஒவ்வொரு ஆண்டும் 10 நாட்கள் வரை விடுப்பு எடுக்கலாம்.

அறிக்கைகளின்படி, நிறுவனத்தின் நிறுவனர் மற்றும் தலைவரான யூ டோங்லாய், எந்தவொரு ஊழியரும் மகிழ்ச்சியற்ற நிலையில் அல்லது அழுத்தத்தில் இருக்கும்போது வேலை செய்யக் கட்டாயப்படுத்தப்படக்கூடாது என்று கூறுகிறார். ஒரு ஊழியருக்கு உடல்நிலை சரியில்லை என்றால், அவர்கள் ஓய்வெடுத்து தங்களை மேம்படுத்திக் கொள்ள நேரம் வழங்கப்பட வேண்டும் என்றும் அவர் கூறுகிறார்.

மகிழ்ச்சியற்ற விடுப்புக் கொள்கை என்றால் என்ன.?

இந்த புதிய கொள்கையின் கீழ், ஊழியர்கள் மன அழுத்தம், மனநிலை மாற்றங்கள் அல்லது சோர்வை உணர்ந்தால் அப்போது விடுப்பு எடுக்கலாம். இதில் மிக முக்கியமான விஷயம் என்னவென்றால், அவர்கள் தனியாக மருத்துவச் சான்றிதழ் வழங்கத் தேவையில்லை. மேலும், விடுப்புக் காலத்தில் சம்பளத்தில் எந்த பிடித்தமும் இருக்காது. அதாவது, விடுப்புக்கான முழு ஊதியமும் வழங்கப்படும். இருப்பினும், ஒரு ஊழியரின் விடுப்புக் கோரிக்கையை மேலாளர்கள் மறுக்க முடியாது.

நிறுவனம் ஏன் இந்த முயற்சியை தொடங்கியது.?

ஊழியர்களின் உடல்நலத்தைப் போலவே அவர்களின் மனநலமும் முக்கியமானது என்று நிறுவனம் கூறுகிறது. எனவே, தொடர்ச்சியான வேலை அழுத்தம், மன அழுத்தம் மற்றும் சோர்வு போன்ற காலகட்டங்களில், ஊழியர்களுக்கு தேவையான ஓய்வு நேரத்தை வழங்குவது மிகவும் அவசியம். அப்போதுதான், சிறிது காலத்திற்குப் பிறகு அவர்கள் சிறந்த மனநிலையுடன் பணிக்குத் திரும்ப முடியும் என்று நிறுவனம் கூறுகிறது.

ஆர்பிஜி குழுமத் தலைவர் ஹர்ஷ் கோயங்கா என்ன கூறினார்.?

சமூக ஊடகங்களில் இந்தத் தனித்துவமான கொள்கை குறித்துக் குறிப்பிட்ட ஆர்பிஜி குழுமத் தலைவர் ஹர்ஷ் கோயங்கா, சீன நிறுவனம் தனது ஊழியர்களுக்கு 10 நாட்கள் 'மகிழ்ச்சியற்ற விடுப்பு' அளிப்பதாகவும், ஊழியர்கள் மகிழ்ச்சியாக இல்லாவிட்டால் அவர்கள் வேலைக்குச் செல்லத் தேவையில்லை என்ற புதிய சிந்தனையை இது முன்வைப்பதாகவும் கூறினார்.

ஊழியர்களின் மனநலத்தை பேணுவதற்கும், மனச்சோர்வைக் குறைப்பதற்கும் இந்திய நிறுவனங்கள் இதுபோன்ற கொள்கைகளை கருத்தில் கொள்ள வேண்டுமா என்றும் கோயங்கா கேள்வி எழுப்பினார். மேலும், 'மகிழ்ச்சியற்ற விடுப்பு' போன்ற கொள்கைகள் அவசியமானவையா அல்லது ஊழியர்கள் மகிழ்ச்சியாகப் பணிக்கு வரும் வகையில் அவர்களுக்கு ஒரு சிறந்த சுகாதாரச் சூழலை உருவாக்க வேண்டுமா என்பது குறித்து இந்தியா விவாதிக்க வேண்டும் என்றும் அவர் கூறினார்.

US Tariff on India: இந்தியாவிற்கு பெரிய ஆப்பாக வைத்த US நாடாளுமன்றம்; 100% வரி விதிக்க வழிவகுக்கும் மசோதா நிறைவேற்றம்

ஸ்ரீராம் ஆராவமுதன் — Sat, 8 Aug 2026 16:24:30 +0530

ரஷ்யாவையும், அந்நாட்டின் எண்ணெய் மற்றும் எரிவாயுவை வாங்கும் நாடுகளையும் குறிவைக்கும் சட்டத்திற்கு அமெரிக்க செனட் சபை பெருவாரியான வாக்குகளுடன் ஒப்புதல் அளித்துள்ளது. இதன் மூலம், இந்தியா மற்றும் சீனா உள்ளிட்ட ரஷ்ய எரிசக்தியின் முக்கிய இறக்குமதியாளர்களிடமிருந்து வரும் பொருட்கள் மீது 100% வரை வரி விதிக்கும் அதிகாரத்தை அதிபர் டொனால்ட் ட்ரம்ப் பெற்றுள்ளார்.

லிண்ட்சே ஓ. கிரஹாம், ரஷ்யா மற்றும் ஈரான் மீதான தடைகள் சட்டம், 2026, 86-11 என்ற வாக்கு வித்தியாசத்தில் நிறைவேற்றப்பட்டது. இந்தச் சட்டம், ஆகஸ்ட் 31 அன்று மீண்டும் கூடும் பிரதிநிதிகள் சபைக்குச் செல்லும்.

இந்த மசோதாவின் கீழ், ரஷ்ய எண்ணெய் மற்றும் எரிவாயுவை இறக்குமதி செய்யும் முதல் ஐந்து பெரிய நாடுகளில் உள்ள நாடுகளின் பொருட்களுக்கு ட்ரம்ப் 100% சுங்க வரியை விதிக்க முடியும். தற்போது சீனா, இந்தியா, அஜர்பைஜான், ஹங்கேரி மற்றும் ஸ்லோவாக்கியா ஆகியவை அந்த வாங்குபவர்களின் பட்டியலில் இடம்பெற்றுள்ளன.

ரஷ்யாவின் எரிசக்தி வர்த்தகத்தை குறிவைக்கும் மசோதா

உக்ரைனில் நடக்கும் போரின்போது மாஸ்கோவின் பொருளாதாரத்தைத் தக்கவைக்க உதவும் வகையில் ரஷ்ய எரிசக்தியை கொள்முதல் செய்யும் நாடுகளை தண்டிப்பதை இந்தச் சட்டம் நோக்கமாகக் கொண்டுள்ளது. இதில், அதிபர் விளாடிமிர் புடின் உள்ளிட்ட ரஷ்யத் தலைவர்கள் மற்றும் அதிகாரிகள், அத்துடன் பெரும் செல்வந்தர்கள் மற்றும் நிதி நிறுவனங்களை இலக்காகக் கொண்ட தடைகளும் அடங்கும்.

இந்த மசோதா, ஈரானின் எரிசக்தித் துறையில் முதலீடு செய்யும் நிறுவனங்களை தண்டிக்கும் 1996-ம் ஆண்டின் ஈரான் மீதான தடைகள் சட்டத்தை 2031 வரை கூடுதலாக நீட்டிக்கும்.

இருகட்சி ஆதரவு பெற்ற இந்தச் சட்ட மசோதாவை, குடியரசுக் கட்சி செனட்டர் லிண்ட்சே ஓ. கிரஹாம் மற்றும் ஜனநாயகக் கட்சி செனட்டர் ரிச்சர்ட் ப்ளூமென்டல் ஆகியோர் முன்னெடுத்தனர். கீவ் நகருக்குப் பயணம் மேற்கொண்டிருந்த கிரஹாம், ஜூலை 11 அன்று காலமானார்.

கிரஹாமின் மரணத்திற்குப் பிறகு அவரது செனட் இடத்திற்கு நியமிக்கப்பட்ட அவரது சகோதரி டார்லைன் கிரஹாம், வாக்கெடுப்பைத் தொடர்ந்து அந்த சட்டத்தை ஆதரித்துப் பேசினார்.

"இந்த மசோதா, ரஷ்யாவின் பொருளாதாரத்தைத் தாங்கி நிற்கும் முதன்மை நாடுகளை, அமெரிக்காவுடன் வர்த்தகம் செய்வதா அல்லது மலிவான ரஷ்ய எரிசக்தியை வாங்குவதா என்ற ஒரு எளிய ஆனால் முக்கியமான தேர்வை மேற்கொள்ளக் கட்டாயப்படுத்துகிறது," என்று அவர் கூறினார். செனட்டின் இந்த நடவடிக்கையை கிரஹாம் வரவேற்றிருப்பார் என்று ப்ளூமென்டல் கூறினார்.

"துணிச்சலான சுதந்திர மக்களுக்கு எதிரான இந்த கொலைகார, குற்றவியல் ஆக்கிரமிப்புப் போரில் உடந்தையாக இருக்கும் அனைவரையும் இந்தக் கடுமையான தடைகளும் வரிகளும் தடுத்து நிறுத்தும்," என்று ப்ளூமென்டல் கூறினார்.

சுங்கவரி குறித்த கவலைகளை எழுப்பும் ஜனநாயகக் கட்சியினர்

குறிப்பாக, ட்ரம்ப் தனது வர்த்தகக் கொள்கையில், சுங்க வரிகளை ஒரு முக்கிய அங்கமாக ஆக்கியுள்ள நிலையில், இந்த மசோதா அதிபரின் சுங்க வரி அதிகாரங்களை விரிவுபடுத்துவது குறித்து சில ஜனநாயகக் கட்சியினர் கவலைகளை எழுப்பியுள்ளனர்.

ஜனநாயகக் கட்சியைச் சேர்ந்த காங்கிரஸ் உறுப்பினர்களான கிரிகோரி மீக்ஸ் மற்றும் டான் பேயர் ஆகியோர், இந்தச் சட்டம் சுங்க வரிகளை விதிப்பதற்கு அதிபருக்குப் பரந்த புதிய அதிகாரத்தை வழங்கக்கூடும் என்று கூறினர்.

இந்தச் சட்ட மசோதா தற்போது பிரதிநிதிகள் சபையில் பரிசீலனைக்கு வந்துள்ளது. அங்கு, நாடாளுமன்ற உறுப்பினர்கள் ஆகஸ்ட் 31 அன்று மீண்டும் கூட உள்ளனர்.