world

ஏவுகணைகளை பெற அமெரிக்காவுடன் ஒப்பந்தம்! - தீவிரமடையும் போர்: ஆயுதங்களை வாங்கிக்குவிக்கும் உக்ரைன்!

விவேக் தங்கராஜ் — Sat, 31 Oct 2026 12:06:38 +0530

மீண்டும் தீவிரமடையும் ரஷ்யா - உக்ரைன் போர்!

2.1 பில்லியன் டாலர் மதிப்பீட்டில் 500 பேட்ரியாட் ஏவுகணைகளை உக்ரைனுக்கு வழங்க அமெரிக்கா ஒப்புதல் அளித்துள்ளது.பல ஆண்டுகளாக நீடித்துவரும் ரஷ்யா - உக்ரைன் இடையேயான போரில் இராணுவ வீரர்களும், அப்பாவி மக்களும் கொல்லப்பட்டு வருகின்றனர். சமீபத்தில் உக்ரைனின் டினிப்ரோ ரயில் நிலையம் மீது ரஷிய படைகள் நடத்திய ட்ரோன் தாக்குதலில் 14 பேர் கொல்லப்பட்ட நிலையில், பலர் காயமடைந்தனர்.
இந்நிலையில் ரஷ்யாவின் தாக்குதலை எதிர்க்கொண்டு பதில் தாக்குதல் நடத்தும் நோக்கில் ஆயுதங்களை வாங்கிக்குவிக்கும் பணியில் உக்ரைன் இறங்கியுள்ளது.

ஏவுகணைகளை விற்க அமெரிக்கா ஒப்புதல்

ரஷ்யாவை எதிர்க்கொள்ளும் வகையில் 500 பேட்ரியாட் ஏவுகணைகளை பெற உக்ரைன் விருப்பம் தெரிவித்த நிலையில், 2.1 பில்லியன் டாலர் மதிப்பிலான இந்த ஒப்பந்தத்திற்கு அமெரிக்கா ஒப்புதல் அளித்துள்ளது. ரஷ்யாவிடமிருந்து டீசலை கொள்முதல் செய்ய சமீபத்தில் அந்நாட்டுடன் அமெரிக்கா ஒப்பந்தம் செய்தது. இது தொடர்பாக அமெரிக்கா - உக்ரைன் இடையே கருத்து வேறுபாடு எழுந்த நிலையில் அந்நாட்டுக்கு ஏவுகணைகளை விற்க அமெரிக்க அரசு ஒப்புதல் அளித்துள்ளது.இந்நிலையில் ரஷ்யாவுடன் மோதலை கடைபிடித்து வந்த அமெரிக்கா, அந்நாட்டிடம் இருந்தே டீசலை கொள்முதல் செய்ய திட்டமிட்டுள்ளதோடு, உக்ரைனுக்கும் ஏவுகணைகளை வழங்க ஒப்பந்தம் செய்துள்ளது.

ஆயுதங்களை பெற தீவிரம் காட்டும் உக்ரைன்!

அண்டை நாடுகள் மற்றும் நட்பு நாடுகளின் பொருளாதார உதவியுடன் தாக்குதலுக்கு தேவையான ஆயுதங்களை உக்ரைன் பெற்றுவரும் நிலையில், அமெரிக்காவிடமிருந்து ஏவுகணைகளை பெற தீவிரம் காட்டி வருகிறது. ஒப்பந்தத்தின்படி ஏவுகணைகளை வழங்க சில காலம் எடுக்கும் எனவும் முழுமையாக வழங்க சில ஆண்டுகளாகும் என கூறப்படுகிறது.

உலகையே உற்றுநோக்க வைக்கும் இஸ்ரேல் தேர்தல் முடிவுகள்! - மீண்டும் பிரதமராவாரா நெதன்யாகு?

விவேக் தங்கராஜ் — Fri, 30 Oct 2026 11:25:28 +0530

இஸ்ரேலில் நாடாளுமன்ற தேர்தல் நடைபெற்று முடிவுகள் வெளியான நிலையில் தனிப்பட்ட கட்சிக்கோ அல்லது கூட்டணிக்கோ பெரும்பான்மை கிடைக்கவில்லை.

எந்தக்கட்சிக்கு எத்தனை இடங்கள்?

இஸ்ரேலில் மொத்தமுள்ள 121 இடங்களில் நெதன்யாகுவின் லிகுத் கட்சி தனித்து 27 இடங்களையும் அதான் கூட்டணி மொத்தமாக 53 இடங்களையும் கைப்பற்றியுள்ளது. இதற்கு அடுத்தப்படியாக எதிரணிக்கு தலைமை தாங்கும் காடி ஐசன்கோட் கட்சி தனித்து 21 இடங்களையும், அதன் கூட்டணி மொத்தமாக 48 இடங்களிலும் வென்றுள்ள நிலையில் அரபுக்கட்சிகள் 19 இடங்களை கைப்பற்றியுள்ளன. பெரும்பான்மைக்கு தேவையான 61 இடங்களை எந்தக்கூட்டணியும் பெறாததால் ஆட்சியமைப்பதில் இழுபறி நீடிக்கிறது.

ஆட்சியமைக்க போவது யார்? தொடரும் சர்ப்ரைஸ்!

வெளிப்படையாக சொல்லப்போனால் தேர்தல் முடிவுகளின் படி அரபுக்கட்சிகள்தான் கிங்மேக்கராகும் சூழல் உள்ளது. இந்நிலையில் கூட அரபுக்கட்சிகளுடன் கூட்டணி இல்லையென நெதன்யாகு திட்டவட்டமாக அறிவித்துள்ளார். இந்த யூத சித்தாந்த ரீதியிலான முடிவை அவர் அறிவித்தது அனைவராலும் எதிர்பார்க்கப்பட்டதுதான் என்றாலும், பெரும்பான்மை யூத மக்களின் ஆதரவை பெரும்நோக்கில் நெதன்யாகு அறிவித்த இம்முடிவின் மூலம் எதிரணியினருக்கும் அரபுக்கட்சிகளுடன் கூட்டணி அமைப்பதற்கான சிக்கலையும் அவர் ஏற்படுத்தியுள்ளார்.

அரசியலில் அனைத்தும் சாத்தியமா?

நெதன்யாகு மீண்டும் ஆட்சியமைக்க அவருக்கு இருக்கும் வாய்ப்பு என்னவென்றால் எதிரணியில் இருக்கும் சில கூட்டணி கட்சிகளின் ஆதரவை பெறுவது மட்டும்தான். அவ்வாறு ஆட்சியமைக்க ஆதரவு கிடைக்குமானால் ஏற்கனவே இஸ்ரேலின் நீண்டகால பிரதமர் என்ற சாதனையை படைத்த நெதான்யாகு மீண்டும் 7-வது முறையாக பிரதமராக பதவியேற்பார். ஆனால், காடி ஐசன்கோட்டிற்கு இரு வாய்ப்புகள் உள்ளன, ஒன்று அரபுக்கட்சிகளின் ஆதரவை பெற்று ஆட்சியமைப்பது. அவ்வாறு அரபுக்கட்சிகளின் ஆதரவுடன் காடி ஐசன்கோட் ஆட்சியமைத்தால் பாலஸ்தீனம் மீதான இஸ்ரேலின் நிலைபாடு மற்றும் ஆதிக்கத்தில் மாற்றம் ஏற்பட வாய்ப்புள்ளது. மற்றொறு வாய்ப்பு என்னவென்றால் நெதன்யாகு தரப்பில் உள்ள கூட்டணி கட்சிகளை தன்வசப்படுத்தி பிரதமராவது. இந்நிலையில் அரபுக்கட்சிகள் வெளிநாடுகளின் ஆதரவுடன் தேர்தலில் முறைகேடு செய்து 19 இடங்களில் வென்றதாக நெதன்யாகு குற்றம்சாட்டி விசாரணை நடத்த கோரிக்கை விடுத்துள்ளார். இந்நிலையில் இஸ்ரேலில் இதே நிலை நீடித்து, எந்தக்காட்சியாலும் பெரும்பான்மையை நிருபிக்க இயலவில்லை என்றால் மறு தேர்தல்தான் ஒரே வழி என அரசியல் வட்டாரங்கள் தெரிவிக்கின்றன.

கியூபாவை கைப்பற்றப்போவதாக ட்ரம்ப் மிரட்டல் - 67 ஆண்டுகளாக நிறைவேறாத அமெரிக்காவின் ஆசை!

விவேக் தங்கராஜ் — Mon, 26 Oct 2026 21:08:42 +0530

கியூபாவை கைப்பற்ற படைகளை அனுப்பப்போவதாக அமெரிக்க அதிபர் பேசிய விவகாரம் சர்வதேச அளவில் சர்ச்சையை ஏற்படுத்தியுள்ளது. புளோரிடாவில் நடைபெற்ற இடைத்தேர்தலுக்கான பிரச்சாரக்கூட்டத்தில் உரையாற்றிய அதிபர் ட்ரம்ப்,மத்திய கிழக்கில் நிலவும் பதற்ற்ம் முடிவுக்கு வந்தவுடன் அமெரிக்காவுக்கு அருகாமையில் உள்ள கியூபாவிற்கு போர்கப்பல்களை அனுப்ப உள்ளதாக பகிரங்கமாக அறிவித்து புதுப்பதற்றத்தை ஏற்படுத்தினார்.

கியூபா மீது அமெரிக்காவின் பார்வை திரும்ப காரணமென்ன?

உலகிற்கே நாட்டாமை போல் திகழும் அமெரிக்காவிற்கு அதனருகாமையில் இருந்தும் அடிபணிய மறுத்த நாடுதான் இந்த கியூபா. பரப்பளவிலோ, பொருளாதாரத்திலோ இராணுவ பலத்திலோ அமெரிக்காவுக்கு ஈடு இணையற்ற கியூபா அதற்கு பெரும் தலைவலியாக இருந்தது எனக்கூறுவதே பொறுத்தமாக இருக்கும். 1959-இல் அமெரிக்க ஆதரவாளராக செயல்பட்டு வந்த ஃபுல்ஜென்சியோ பாடிஸ்டாவின் அரசை வீழ்த்தி கியூபாவில் ஆட்சியை பிடித்த பிடல் காஸ்ட்ரோ சோவித் யூனியனி ஆதரவாளராக செயல்பட்டார். கியூபாவில் பெருமளவிற்கு எண்ணெய் வளமோ, ஆயுத உற்பத்தியோ,வாகன உற்பத்தியோ இல்லாத நிலையில் அதன் பொருளாதாரத்திற்கு மூலதனமாக இருந்தது சர்க்கரை உற்பத்திதான். அதனால்தான் இன்றைக்கும் உலகின் சர்க்கரை கிண்ணம் என கியூபா அழைக்கப்படுகிறது.

அமெரிக்காவின் 67 ஆண்டுகால நிறைவேறாத ஆசை

கியூபாவில் பொதுவுடமை அரசை நிறுவி அமெரிக்காவிற்கு தொல்லையாக உருவெடுத்திருந்த ஃபிடல் காஸ்ட்ரோ, நாட்டிலிருந்த அனைத்து சர்க்கரை ஆலைகள் மற்றும் எண்ணெய் சுத்திகரிப்பு ஆலைகளை தேசியமயமாக்கினார். இதில் கவனிக்க வேண்டிய விஷயம் என்னவென்றால், அதில் பெரும்பாலானவை அமெரிக்கர்களுக்கு சொந்தமானவை. சோவித் யூனியனுடன் சர்க்கரை ஏற்றுமதி ஒப்பந்தத்தை உறுதி செய்தது உள்ளிட்ட விவகாரங்கள் காஸ்ட்ரோ அரசை வீழ்த்தியே ஆக வேண்டுமென்ற எண்ணத்தை அமெரிக்காவுக்கு ஏற்படுத்தியது. இரு நாடுகளுக்கும் இடையே பனிப்போர் நிலவிவந்த நிலையில், கியூபாவில் அணு ஆயுத தளத்தை நிறுவி அமெரிக்காவிற்கு பேரதிர்ச்சி கொடுத்தது ரஷ்யா.

கியூபாவை கைப்பற்றத்துடிக்கும் ட்ரம்ப்!

கடந்த 67 ஆண்டுகளாக அமெரிக்கா பல்வேறு பொருளாதாரத் தடைகளையும், பல்வேறு இன்னல்களையும் ஏற்படுத்தியும் அசராத நாடான கியூபா, கடந்த சில ஆண்டுகளாக சொல்லொண்ணா துயரத்திற்கு ஆளாகி வருகிறது. பொருளாதார சிக்கல்கள், கச்சா எண்ணெய் கிடைக்காத நிலை, மின்சாரப்பற்றாக்குறை ஆகியவை கியூபாவை புரட்டி எடுத்து வருவதே உண்மை. பல்வேறு அமெரிக்க அதிபர்களும் கியூபாவிற்கு அழுத்தம் அளித்து வந்த நிலையில், தற்போதைய அதிபரான ட்ரம்ப் பகிரங்கமாகவே மிரட்டல் விடுத்துள்ளது சர்வதேச அளவில் கவனம் பெற்றுள்ளது.

ஈரான், அமெரிக்கா இடையே அமைதி ஒப்பந்தம் ? - ட்ரம்பின் மாற்றத்திற்கு காரணமென்ன?

விவேக் தங்கராஜ் — Sun, 25 Oct 2026 13:57:01 +0530

மத்திய கிழக்கில் ஈரான் மற்றும் அமெரிக்கா - இஸ்ரேல் கூட்டுப்படைகளுக்கு இடையே மோதல் நீடித்து வந்த நிலையில் இன்றளவும் அதன் பதற்றம் ஓய்ந்தபாடில்லை. இதன் தாக்கம் சுற்றுலா, வணிகம், முக்கிய கச்சா எண்ணெய் போக்குவரத்து என அனைத்து வகைகளிலும் பாதிப்பை ஏற்படுத்தி வருகிறது.

ஈரான் மீது தாக்குதல் நடத்தப்படும் - ட்ரம்ப்

மத்திய கிழக்கில் அமெரிக்க கடற்படை முற்றுகையை நீக்குவதற்கு ஈடாக, ஹோர்முஸ் ஜலசந்தியை மீண்டும் திறப்பது தொடர்பாக முன்மொழியப்பட்ட ஒரு திட்டத்தை ஈரான் அரசு நிராகரித்ததாகக் கூறப்படும் நிலையில், இதற்கு எதிர்வினையாக ஈரான் மீது தாக்குதல் நடத்தப்படும் என சமீபத்தில் அதிபர் ட்ரம்ப் பகிரங்கமாகவே அறிவித்தார்.

அமைதிக்கான ஒப்பந்தம் - ட்ரம்ப் சூசக பதில்

இதன்பின்னர் புளோரிடாவில் செய்தியாளர்களை சந்தித்த ட்ரம்பிடம், ஈரான் மீது தாக்குதல் நடத்தப்படுமா என கேட்கப்பட்ட கேள்விக்கு, தாக்குதல் நடத்தப்படலாம் அல்லது அமைதிக்கான ஒப்பந்தமும் ஏற்படலாம் என சூசகமாக பதிலளித்தார். தொடர்ந்து பேசிய ட்ரம்ப், கடுமையான சேதத்தை சந்தித்த போதிலும் ஈரான் அரசு அமைதியை விரும்ப மறுப்பதாகவும் ராணுவபலம், பொருளாதாரம், நட்பு நாடுகள் என அனைத்தையும் இழந்தபிறகு அவர்களிடம் எஞ்சியிருப்பது வரலாறு காணாத பணவீக்கம் மட்டுமே எனவும் கடுமையாக சாடினார். ஈரானை விமர்சித்த போதி அமைதி ஒப்பந்தம் குறித்த ட்ரம்பின் பேச்சு முக்கியத்துவம் வாய்ந்ததாக பார்க்கப்படுகிறது.

மீசையுடன் பிறந்த குழந்தை..இணையத்தில் வைரலாகும் வீடியோ நிஜமா? போலியா?

ராகேஷ் தாரா — Sat, 24 Oct 2026 16:20:55 +0530

சமூக வலைதளங்களில் அவ்வப்போது வித்தியாசமான வீடியோக்கள் வைரலாவது வழக்கம். அந்த வகையில், பிறந்த குழந்தையின் முகத்தில் அடர்த்தியான கருப்பு மீசை இருப்பது போன்ற வீடியோ தற்போது இணையத்தில் கவனம் பெற்றுள்ளது. குழந்தை மீசையுடன் பிறந்ததாகப் பலரும் பகிர்ந்து வரும் நிலையில், இந்த வீடியோ உண்மையா போலியா என்கிற குழப்பம் உருவாகியுள்ளது

மீசையுடன் பிறந்த குழந்தை

தற்போது வைரலாகி வரும் இந்த வீடியோவில் மத்துவமனையில் படுக்கையில் இருக்கும் குழந்தையின் முகத்தில் தெளிவான மீசையும் தாடையைச் சுற்றி முடிகளும் இருப்பதுபோல் தெரிகிறது. குழந்தை கண்களைத் திறப்பதும், தலையை அசைப்பதும், சிரிப்பதுபோன்ற முகபாவனைகளைக் காட்டுவதும் வீடியோவைப் பார்ப்பவர்களின் கவனத்தை ஈர்த்துள்ளது. இதனால், குழந்தை உண்மையிலேயே மீசையுடன் பிறந்தது என பலரும் நம்பி வருகிறார்கள்

INSOLITE | Un bébé arrivé au monde avec une moustache fait le tour des réseaux sociaux https://t.co/bs1j6xMztW
— 75 Secondes 🗞️ (@75secondes) October 24, 2026

நிஜமா ? போலியா ?

இந்த வீடியோ அக்டோபர் 20ஆம் தேதி ‘Newborn Cuteness’ என்ற ஃபேஸ்புக் பக்கத்தில் பகிரப்பட்டதாக உண்மைச் சரிபார்ப்பு ஆய்வில் தெரியவந்துள்ளது. இதே பக்கத்தில் மீசை மற்றும் தாடியுடன் இருப்பதுபோன்ற குழந்தைகளின் பல்வேறு வீடியோக்களும் இடம்பெற்றுள்ளன. அவற்றில் சில செயற்கை நுண்ணறிவால் உருவாக்கப்பட்டவை என்று குறிப்பிடப்பட்டுள்ளன.

லெபனானைச் சேர்ந்த ‘அந்நஹார்’ செய்தி நிறுவனத்தின் உண்மைச் சரிபார்ப்புப் பிரிவு இந்த வீடியோவை ஆய்வு செய்து, அது செயற்கை நுண்ணறிவால் உருவாக்கப்பட்டதாக முடிவு செய்துள்ளது. Hive என்ற கருவியின் ஆய்விலும், வீடியோ AI மூலம் உருவாக்கப்பட்டிருப்பதற்கான வாய்ப்பு 87.9 சதவீதமாகக் காட்டப்பட்டுள்ளது. எனவே, குழந்தை மீசையுடன் பிறந்ததாகப் பரவும் தகவல் உண்மையல்ல என்று அந்த ஆய்வு தெரிவித்துள்ளது.

பிறந்த குழந்தைகளுக்கு முடி இருக்குமா?

உண்மையில், சில குழந்தைகள் பிறக்கும்போதே உடலிலும் முகத்திலும் மெல்லிய முடிகளுடன் இருக்கலாம். இதற்கு ‘லானுகோ’ (Lanugo) என்று பெயர். கருவில் இருக்கும்போது உருவாகும் இந்த மென்மையான முடிகள் பொதுவாகப் பிறந்த பிறகு இயற்கையாக உதிர்ந்துவிடும். ஆனால், வைரல் வீடியோவில் இருப்பதுபோன்ற அடர்த்தியான, தெளிவான மீசையை இதனுடன் ஒப்பிட முடியாது.

செயற்கை நுண்ணறிவு மூலம் உருவாக்கப்படும் காட்சிகள் உண்மையான வீடியோக்களைப் போலவே தோன்றும் காலகட்டத்தில், சமூக வலைதளங்களில் பரவும் வித்தியாசமான காட்சிகளை உடனடியாக நம்பிப் பகிராமல், அவற்றின் உண்மைத்தன்மையைச் சரிபார்ப்பது அவசியமாகியுள்ளது.

கொண்டாடப்படும் ஐ.நா சபை தினம் ! - ஐ.நா சபை எதற்காக உருவாக்கப்பட்டது தெரியுமா?

விவேக் தங்கராஜ் — Sat, 24 Oct 2026 16:09:06 +0530

இரு நாடுகளுக்கோ அல்லது பலநாடுகள் சார்ந்த சர்வதேச பிரச்சனை என்றால் நாம் அடிக்கடி கேள்விப்படும் அமைப்பின் பெயர் ஐ.நா சபை. உலக நாடுகளுக்கு இடையிலான அமைதி, பாதுகாப்பு, மனித உரிமைகள் மற்றும் நிலையான வளர்ச்சிக்காக உருவாக்கப்பட்ட ஒரு சர்வதேச அமைப்புதான் இந்த ஐ.நா சபை.

உலகப்போருக்கு பின் உருவான ஐ.நா சபை

1945 முன்னர் உலக அளவில் இயங்கிவந்த சர்வதேச சங்கமானது, இரண்டாம் உலகப் போதைத் தடுக்கத் தவறியதால் ஒரு வலிமையான அமைப்பை உருவாக்கும் நோக்கில் உருவாக்கப்பட்டதுதான் இந்த ஐக்கிய நாடுகள் சபை. 1945-ஆம் ஆண்டு ஏப்ரல் 25 முதல் ஜூன் 26 வரை, கலிபோர்னியாவின் சான் பிரான்சிஸ்கோவில் நடைபெற்ற மாநாட்டில் 50 நாடுகளின் பிரதிநிதிகள் கூடி ஐக்கிய நாடுகள் சபைக்கான சாசனத்தை உருவாக்கினர். இதன் தொடர்ச்சியாக அதே ஆண்டு அக்டோபர்-24 ஆம் தேதி அதிகாரப்பூர்வமாக ஐக்கியநாடுகள் சபை செயல்பாட்டுக்கு வந்தது.

எப்படி இயங்குகிறது ஐ.நாபை

ஐ.நா சபை என்பது பொதுச்சபை, பாதுகாப்பு கவுன்சில், பொருளாதார மற்றும் சமூக சபை உள்ளிட்ட பிரிவுகளையும் உலக சுகாதார அமைப்பு, ஐக்கிய நாடுகளின் சிறுவர் நிதியம் (UNICEF),ஐக்கிய நாடுகள் கல்வி,அறிவியல் மற்றும் பண்பாட்டு அமைப்பு (UNESCO) உறுப்பு அமைப்புகளை கொண்டு செயல்படுகிறது. இதில் மொத்தமாக 193 நாடுகள் உள்ள நிலையில் ஐ.நா சபையில் பாதுகாப்பு கவுன்சிலின் நிரந்தர உறுப்பு நாடுகளே ஆதிக்கம் செலுத்தி வருகின்றன. பாதுகாப்பு கவுன்சிலின் நிரந்தர உறுப்பு நாடுகளாக அமெரிக்கா, ரஷ்யா, சீனா, பிரிட்டன் மற்றும் பிரான்சு ஆகிய 5 நாடுகள் உள்ளன.

ஐ.நா சபையின் பணி என்ன?

உலகில் அமைதியை நிலை நாட்டுவது, நாடுகளுக்கிடையேயான பிரச்சனையை சுமூகமான முறையில் தீர்ப்பதே இவ்வமைப்பின் தலையாய பணி ஆகும். மேலும் ஒவ்வொரு மனிதனுக்கு அடிப்படை உரிமைகளை கிடைக்கச்செய்வது, சிறுவர்களின் கல்வியை உறுதி செய்வது, சுற்றுச்சூழல் மேம்பாடு மற்றும் தீவிரவாதத்தை ஒழித்தல், மனித உரிமைகள் மீறப்பட்டால் விசாரித்து நீதி வழங்குவது உள்ளிட்டப்பணிகளை செவ்வனே செய்து வருகிறது ஐ.நா அமைப்பு. இதன் தலைமை அதிகாரியாக செயல்படும் பொதுச்செயலாளர் 5 ஆண்டுகளுக்கு ஒருமுறை தேர்ந்தெடுக்கப்படுகிறார். ஐ.நாவின் தற்போதைய பொதுச்செயலாளராக போர்ச்சுகல் நாட்டின் முன்னாள் பிரதமர் ஆண்டோனியோ குட்ரஸ் செயல்படுகிறார்.

தைவானை சீர்குலைத்த 'சாம்பி': 500 பேர் படுகாயம் - 1000 விமான சேவைகள் ரத்து

விவேக் தங்கராஜ் — Sat, 24 Oct 2026 11:11:40 +0530

தைவானை கடந்து சென்ற சாம்பி புயலின் தாக்கத்தால் ஒட்டுமொத்த நாடும் சீர்குலைந்துள்ள நிலையில், மக்கள் தங்கள் உடமைகளை இழந்துள்ளனர். தைவானை சில நாட்களாக புரட்டி எடுத்த இப்புயல், நள்ளிரவில் இலான் கடற்கரையை நோக்கி நகர்ந்தபோது சுமார் 227 கி.மீ வேகத்தில் காற்றுவீசிய நிலையில், மின்கம்பங்கள் மற்றும் மரங்கள் வேரோடு சாய்ந்தன. இதன் தாக்கத்தால் சுமார் 3 லட்சம் குடும்பங்கள் மின்சாரம் இன்றி தவித்து வருவதோடு ஆயிரக்கணக்கான மக்களின் வீடுகள், வாகனங்கள் உள்ளிட்ட உடமைகள் கடும் சேதத்திற்கு ஆளாகின.

ஒருவர் பலி: 500-க்கும் மேற்பட்டோர் படுகாயம்

சூறைக்காற்று மற்றும் கனமழையால் ஏற்பட்ட வெள்ளத்தில் சிக்கி ஒருவர் உயிரிழந்ததாகவும், 500-க்கும் மேற்பட்டோர் உயிரிழந்ததாகவும் முதற்கட்ட தகவல் வெளியாகி உள்ளது. மேலும், மோசமான வானிலை காரணமாக கடந்த இரண்டு நாட்களில் மட்டும் உள்நாடு மற்றும் வெளிநாடு என மொத்தமாக ஆயிரத்திற்கு மேற்பட்ட விமான சேவைகள் ரத்து செய்யப்பட்டுள்ளது. இதன் காரணமாக தைவானில் பள்ளிகள், கல்லூரிகளுக்கு விடுமுறை அளிக்கப்பட்டு மீட்புப்பணிகள் முடுக்கிவிடப்பட்டுள்ளன.

விலங்கிலிருந்து மனிதனுக்கு பரவிய வைரஸ்: ஷமோண்டா பாதிப்பால் ஒருவர் பலி?

விவேக் தங்கராஜ் — Fri, 23 Oct 2026 15:37:33 +0530

உயிரைப்பறிக்கும் ஷமோண்டா வைரஸ்?

பிரான்ஸில் இதுவரை விலங்குகளிடம் மட்டுமே கண்டறியப்பட்டதாகக் கூறப்படும் ஷமோண்டா வைரஸ் மனிதரிடம் முதன்முறையாகப் பதிவாகியுள்ளதாக அதிர்ச்சியளிக்கும் தகவல் வெளியாகி உள்ளது.பிரான்ஸில் உயிரிழந்த ஒரு நோயாளிக்கு ஷமோண்டா வைரஸ் தொற்று ஏற்பட்டிருந்தது ஆய்வில் தெரியவந்துள்ளது. பிரான்சின் லியோன் நகரில் உள்ள மருத்துவமனையில் உடல்நலக்கோளாறு காரணமாக சிகிச்சை பெற்று வந்த ஒருவருக்கு, ஏற்கெனவே நோய் எதிர்ப்பு சக்தி மிகவும் பலவீனமாக இருந்ததாகவும் அவருக்கு ஷமோண்டா வைரஸ் தொற்று ஏற்பட்டு பின்னர் உயிரிழந்ததாகவும் கூறப்படுகிறது.

விலங்குகளில் இருந்து மனிதர்களுக்கு பரவியது எப்படி?

விலங்குகளில் மட்டுமே இதுவரை கண்டறியப்பட்டதாக அறியப்பட்ட இந்த வைரஸ், மனிதரிடம் பதிவாகியிருப்பது மருத்துவத் துறையினரின் கவனத்தை ஈர்த்துள்ளது. நோயாளியின் உயிரிழப்புக்குக் வைரஸ் தொற்றுதான் காரணமா அல்லது ஏற்கெனவே இருந்த தீவிர உடல்நலப் பிரச்சினைகள் காரணமாக உயிரிழப்பு நிகழ்ந்ததா என்பது இன்னும் உறுதிப்படுத்தப்படவில்லை.இந்த வைரஸ் ஜெர்மனி, பிரான்ஸ் மற்றும் நெதர்லாந்து நாடுகளின் விலங்குகளில் முதன்முறையாக கண்டறியப்பட்ட நிலையில் தற்போது பூச்சுக்கடியின் விளைவாக இந்த வைரஸ் மனிதர்களுக்கும் பரவியுள்ளதாக முதற்கட்ட தகவல் வெளியாகி உள்ளது.

மும்முரமாக நடைபெறும் ஆய்வு

இந்த வைரஸ் குறித்த ஆய்வின் முடிவுகள் முழுமையாக வெளிவந்த பின்னரே ஷமோண்டா வைரஸ் தாக்கத்தின் விளைவுகள் என்ன என்பதும், இது உயிரை பறிக்கும் அளவுக்கு ஆபத்தானதா என்பது குறித்த முழுமையான விவரங்கள் வெளிவரும் என்பது குறிப்பிடத்தக்கது.

இஸ்ரேலின் சுதந்திர தின விழாவில் பங்கேற்க பிரதமர் மோடிக்கு அழைப்பு

விவேக் தங்கராஜ் — Thu, 22 Oct 2026 19:49:23 +0530

சுதந்திரதின விழாவில் பங்கேற்க அழைப்பு

இஸ்ரேலின் சுதந்திர தினத்தன்று இந்திய விமானி ஸ்மித் மச்சாருடன் இணைந்து தீபம் ஏற்ற, பிரதமர் நரேந்திர மோடிக்கு இஸ்ரேலிய பிரதமர் பெஞ்சமின் நெதன்யாகு அழைப்பு விடுத்துள்ளார். இது குறித்த இஸ்ரேலிய பிரதமர் நெதன்யாகு வெளியிட்டுள்ள எக்ஸ் தளப்பதிவில், நண்பரான இந்தியப் பிரதமர் நரேந்திர மோடியிடம் பேசியதாகவும், இஸ்ரேலின் சுதந்திர தினத்தன்று துணிச்சலான இந்திய விமானி ஸ்மித் மச்சாருடன் இணைந்து தீபத்தை ஏற்றுமாறு அழைப்பு விடுத்ததாகவும் குறிப்பிட்டுள்ளார்.

துணிச்சலான இந்திய விமானிக்கு கௌரவம்

இந்த அழைப்பிற்கு பிரதமர் மோடி நன்றி தெரிவித்ததோடு, நிலத்திலும் வான்வெளியிலும் இந்தியாவும் இஸ்ரேலும் இணைந்து பயங்கரவாதத்திற்கு எதிராகப் போராடி வருவதாக தெரிவித்ததாகவும் இஸ்ரேல் பிரதமர் நெதன்யாகு குறிப்பிட்டுள்ளார். இந்நிலையில் சில நாட்களுக்கு முன்பாக துபாயில் இருந்து இஸ்ரேலின் டெல் அவிவ் நகருக்கு புறப்பட்ட பிளை துபாய் விமானத்தை, துணை விமானி ஒருவர் கடத்த முயன்ற நிலையில், அதனை துணிச்சலாக முறியடித்து உலகம் முழுவதும் புகழ்பெற்றவர் இந்திய விமானி ஸ்மித் மச்சார் என்பது குறிப்பிடத்தக்கது.

இந்தியா - ஈரான் உறவில் விரிசல் ஏற்படுமா?

இஸ்ரேல் சுதந்திர தின விழாவில் பங்கேற்க பிரதமர் மோடிக்கு அழைப்பு விடுக்கப்பட்டுள்ளது உலக அளவில் முக்கியத்துவம் வாய்ந்ததாக பார்க்கப்படுகிறது. அமெரிக்கா, இஸ்ரேலுக்கும் - ஈரானுக்கும் இடையே முரண்பாடு நிலவிவரும் நிலையில் இஸ்ரேலுடனான இந்தியாவின் நெருக்கம் ஈரானுடனான உறவில் எவ்வகை தாக்கத்தை ஏற்படும் என்பதற்கு காலமே பதில் கூற இயலும்.

சவூதி விமான நிலையம் மீதான தாக்குதலில் இந்தியர் பலி - இந்தியா கடும் கண்டனம்

விவேக் தங்கராஜ் — Thu, 22 Oct 2026 16:30:20 +0530

சவுதி அரேபியாவின் தம்மம் நகரில் உள்ள கிங் ஃபஹத் சர்வதேச விமான நிலையத்தில் நடத்தப்பட்ட தாக்குதலில் இந்தியர் உள்பட 2 பேர் பலியாகி உள்ளனர். சவூதி அரேபியாவிற்கும், ஹவுதி அமைப்பிற்கும் இடையேயான மோதல் நாளுக்கு நாள் அதிகரித்து வந்த நிலையில் தற்போது பூதாகரமாக வெடிக்கத்தொடங்கியுள்ளது. இந்நிலையில் தம்மம் நகரில் விமான நிலையம் மற்றும் கிழக்கு மாகாணத்தில் உள்ள ஷைபா எண்ணெய் வயல் மீது கடுமையான தாக்குதல் நடத்தப்பட்டது.

இந்தியர் பலியான சோகம்

விமான நிலையத்தில் நடத்தப்பட்ட தாக்குதலில் இந்தியர் உட்பட இருவர் உயிரிழந்த நிலையில் மேலும் பலர் காயமடைந்தனர். இதேபோன்று எண்ணெய் வயல் மீதான தாக்குதலில் இந்தியர் உள்ளிட்ட பலர் படுகாயம் அடைந்ததாகவும் தகவல்கள் வெளியாகி உள்ளன. முக்கிய பகுதிகளில் நடத்தப்பட்ட இத்தகைய தாக்குதல் ஒட்டுமொத்த சவூதி அரேபியாவையும் உருக்குலைய செய்துள்ளது. இத்தாக்குதலை நடத்தியது யார் என்பது குறித்து இதுவரை அதிகாரப்பூர்வ தகவல்கள் வெளியாகவில்லை.

இந்தியா கடும் கண்டனம்

சவூதி அரேபியா மீது தாக்குதல் நடத்தப்பட்டதற்கும், அதில் இந்தியர் கொல்லப்பட்டதற்கும் இந்திய வெளியுறவுத்துறை அமைச்சகம் கடும் கண்டனம் தெரிவித்துள்ளது. விமான நிலையம் உள்ளிட்ட பொதுமக்கள் பயன்படுத்தும் இடங்களின் மீதான தாக்குதல்கள் ஏற்றுக்கொள்ள முடியாதவை எனவும், இது போன்ற தாக்குதல்கள் உடனடியாக நிறுத்தப்பட வேண்டுமென்றும் இந்திய வெளியுறவுத்துறை அமைச்சகம் வலியுறுத்தியுள்ளது.