மத்திய கிழக்கு போரை முடிவுக்கு கொண்டுவருவதற்காக, அமெரிக்கா - ஈரான் இடையே பாகிஸ்தானில் பேச்சுவார்த்தை நடைபெற்ற நிலையில், அது தோல்வியில் முடிந்தது. இதைத் தொடர்ந்து, பேச்சுவார்த்தையில் பங்குபெற்ற அமெரிக்க துணை அதிபர் ஜே.டி. வான்ஸ், ட்ரம்ப்பிடம் சென்று விளக்கமளித்துள்ளார். அதைத் தொடர்ந்து, ஹார்முஸ் ஜலசந்தி வழியாக எந்த கப்பல்களும் செல்ல அனுமதிக்க மாட்டோம் எனக் கூறி, அமெரிக்க அதிபர் ட்ரம்ப் ஒரு நீண்ட பதிவை வெளியிட்டுள்ளார். அவர் என்ன கூறியுள்ளார் என்பதை இப்போது பார்க்கலாம்.
ட்ரம்ப்பின் பதிவில் என்ன கூறியிருக்கிறார்.?
இது குறித்து தனது ட்ரூத் சோசியல் பக்கத்தில் பதிவிட்ட அமெரிக்க அதிபர் ட்ரம்ப், “ஆக, இதோ பாருங்கள், கூட்டம் நன்றாக நடந்தது, பெரும்பாலான விஷயங்கள் ஏற்றுக்கொள்ளப்பட்டன. ஆனால், உண்மையில் மிக முக்கிய விஷயமான அணு ஆயுதம் மட்டும் ஏற்றுக்கொள்ளப்படவில்லை. உடனடியாக அமலுக்கு வரும் வகையில், உலகின் தலைசிறந்த அமெரிக்கக் கடற்படை, ஹார்முஸ் ஜலசந்திக்குள் நுழையவோ அல்லது வெளியேறவோ முயற்சிக்கும் அனைத்து கப்பல்களையும் முற்றுகையிடும் செயல்முறையை தொடங்கும்“ என்று கூறியுள்ளார்.
மேலும், “ஒரு கட்டத்தில், "அனைவரும் உள்ளே செல்ல அனுமதிக்கப்படுவார்கள், அனைவரும் வெளியே செல்ல அனுமதிக்கப்படுவார்கள்" என்ற நிலையை நாம் எட்டுவோம். ஆனால், ஈரான், "அவர்களைத் தவிர வேறு யாருக்கும் தெரியாத ஒரு கண்ணிவெடி அங்கே எங்காவது இருக்கலாம்" என்று வெறுமனே கூறி, அதை நடக்க அனுமதிக்கவில்லை. இது உலகளாவிய மிரட்டல். மேலும், நாடுகளின் தலைவர்கள், குறிப்பாக அமெரிக்கா, ஒருபோதும் மிரட்டலுக்கு பணிய மாட்டார்கள். சர்வதேச கடல் பகுதியில் ஈரானுக்கு சுங்கக் கட்டணம் செலுத்தி பயணிக்கும் ஒவ்வொரு கப்பலையும் தேடிப்பிடித்து இடைமறிக்குமாறும் நமது கடற்படைக்கு நான் உத்தரவிட்டுள்ளேன் என்று ட்ரம்ப் தெரிவித்துள்ளார்.
அதோடு, “சட்டவிரோதமாக சுங்கம் செலுத்தும் எவருக்கும் ஆழ்கடலில் பாதுகாப்பான பயணம் கிடைக்காது. ஈரானியர்கள் ஜலசந்தியில் பதித்த கண்ணிவெடிகளை அழிக்கும் பணியையும் நாம் தொடங்குவோம். எங்கள் மீதோ அல்லது அமைதியான கப்பல்கள் மீதோ துப்பாக்கிச் சூடு நடத்தும் எந்தவொரு ஈரானியரும் நரகத்திற்கு தகர்க்கப்படுவார்கள்! தங்கள் நாட்டை ஏற்கனவே பேரழிவுக்கு உள்ளாக்கியுள்ள இந்த சூழ்நிலையை எப்படி முடிவுக்குக் கொண்டுவருவது என்பது ஈரானுக்கு வேறு யாரையும் விட நன்றாகத் தெரியும். அவர்களின் கடற்படை அழிந்துவிட்டது, அவர்களின் விமானப்படை அழிந்துவிட்டது, அவர்களின் விமான எதிர்ப்பு மற்றும் ரேடார் கருவிகள் பயனற்றவை, கொமேனியும், அவர்களின் பெரும்பாலான "தலைவர்களும்" இறந்துவிட்டனர், இவை அனைத்தும் அவர்களின் அணுசக்தி லட்சியத்தின் காரணமாகவே நிகழ்ந்தன என அவர் கூறியுள்ளார்.
தொடர்ந்து, “முற்றுகை விரைவில் தொடங்கும். இந்த முற்றுகையில் மற்ற நாடுகளும் ஈடுபடுத்தப்படும். இந்த சட்டவிரோத மிரட்டிப் பறிக்கும் செயலால் ஈரான் லாபம் ஈட்ட அனுமதிக்கப்படாது. அவர்களுக்கு பணம் வேண்டும், அதைவிட முக்கியமாக, அவர்களுக்கு அணு ஆயுதம் வேண்டும். மேலும், ஒரு பொருத்தமான தருணத்தில், நாங்கள் முழுமையாக தயாராக இருக்கிறோம். ஈரானில் எஞ்சியிருக்கும் கொஞ்சத்தையும் எங்கள் ராணுவம் முடித்துவிடும்!“ என்று தனது பதிவில் ட்ரம்ப் கூறியுள்ளார்.
மேலும், இதன் தொடர்ச்சியாக, பேச்சுவார்த்தை குறித்த தகவல்களுடன் மற்றொரு நீண்ட பதிவையும் ட்ரம்ப் போட்டுள்ளார்.