ஹார்முஸ் ஜலசந்தியில் உள்ள அனைத்து கண்ணிவெடிகளும் அகற்றப்பட்டுவிட்டன அல்லது அழிக்கப்பட்டுவிட்டன என்று அமெரிக்க அதிபர் டொனால்ட் ட்ரம்ப் கூறியுள்ளார். இதுகுறித்து அமெரிக்க கடற்படை தன்னிடம் தெரிவித்ததாகவும் அவர் தெரிவித்துள்ளார். ட்ரூத் சோஷியல் (TruthSocial) தளத்தில் பதிவிட்ட ஒரு பதிவில், புதிய கண்ணிவெடிகளை புதைக்கும் எந்த கப்பல்களும் உடனடியாக அழிக்கப்படும் என்று ட்ரம்ப் ஈரானுக்கு எச்சரிக்கை விடுத்துள்ளார்.
அமெரிக்க விண்வெளிப் படை, நீர்வழிப்பாதையின் ஒவ்வொரு அங்குலத்தையும், மூலையையும் மற்றும் பிக்காக்ஸ் மலையையும் கண்காணித்து வருவதாக ட்ரம்ப் கூறியுள்ளார்.
அசோசியேட்டட் பிரஸ்ஸின் தகவல்படி, அதிகாரப்பூர்வமாக குஹ்-இ-கொலாங் கஜ் லா என்று அழைக்கப்படும் பிக்காக்ஸ் மலை, தற்போது கட்டுமானத்தில் உள்ள ஈரானின் நடன்ஸ் அணுசக்தி நிலையத்திற்கு அருகில், ஒரு மலைக்கு அடியில் ஆழமாகக் கட்டப்பட்ட ஒரு அணுசக்தி தளமாகும்.
“கண்ணிவெடிகளை புதைப்பதற்கு எதிராக சகிப்புத்தன்மையற்ற கொள்கை“
முன்னதாக தாக்கப்பட்ட மூன்று ஈரானிய அணுசக்தித் தளங்களையும் அமெரிக்க ராணுவம் கண்காணித்து வருவதாக ட்ரம்ப் கூறியுள்ளார். "கண்ணிவெடிகளைப் புதைப்பதற்குச் சகிப்புத்தன்மையற்ற கொள்கை பின்பற்றப்படுகிறது," என்றும் அவர் குறிப்பிட்டுள்ளார். முன்னதாக, ஈரான் ஒரு மாபெரும் மனிதாபிமான நெருக்கடியை எதிர்கொண்டுள்ளதாக ட்ரம்ப் கூறியிருந்தார்.
ஈரானில் மனிதாபிமான நெருக்கடி நிலவுகிறது - ட்ரம்ப்
மேலும், "ஈரானில் ஒரு மாபெரும் மனிதாபிமான நெருக்கடி நிலவுகிறது," என்று கூறிய ட்ரம்ப், தோல்வியுற்று வரும் ஈரான் இஸ்லாமியக் குடியரசு தனது ராணுவத்தின் பெரும்பகுதிக்கு சம்பளம் வழங்க இயலாமல் தவிப்பதாகவும், ஈரானில் போராட்டக்காரர்கள் கொல்லப்படுவதாகவும் கூறினார். "இது இதற்கு முன் கண்டிராத அளவில் நிகழ்கிறது. இது ஒரு மாபெரும் மனிதாபிமான நெருக்கடி, இதை உடனடியாக தடுத்து நிறுத்த வேண்டும்," என்றும் அவர் தெரிவித்தார்.
ஈரான் மீது அழுத்தத்தை அதிகரிக்கும் அமெரிக்கா
புதிய தடைகளை விதிப்பதன் மூலம் அந்நாட்டின் மீது பொருளாதார அழுத்தத்தை அதிகரிக்க அமெரிக்கா முயன்று வரும் வேளையில், ஹார்முஸ் குறித்து ட்ரம்ப் இந்த எச்சரிக்கையை விடுத்துள்ளார். இந்த புதிய நடவடிக்கைகள், ஈரானுடன் வர்த்தகம் செய்யும் நாடுகள், நிறுவனங்கள் மற்றும் பிற அமைப்புகளைக் குறிவைக்கக்கூடிய இரண்டாம் நிலை தடைகளின் வரம்பை விரிவுபடுத்துகின்றன.