Israel Attack Lebanon: அடங்காத இஸ்ரேல்; ஆட்டம் கண்ட அமெரிக்க-ஈரான் ஒப்பந்தம்; முடங்கிய பேச்சுவார்த்தை; என்ன நடக்குது.?

தெற்கு லெபனானில் இஸ்ரேல் நடத்திய புதிய தாக்குதல்களும், சுவிட்சர்லாந்தில் நடைபெறவிருந்த அமெரிக்க-ஈரான் பேச்சுவார்த்தைகள் ஒத்திவைக்கப்பட்டதும், சமீபத்தில் கையெழுத்தான அமைதி ஒப்பந்தத்தின் எதிர்காலம் குறித்த கவலைகளை ஏற்படுத்தியுள்ளன.

US Iran War: தெற்கு லெபனான் முழுவதும் இன்று நடைபெற்ற இஸ்ரேலிய வான்வழித் தாக்குதல்களில், குறைந்தது 16 பேர் கொல்லப்பட்டதாக லெபனான் அரசு ஊடகங்களை மேற்கோள் காட்டி அசோசியேட்டட் பிரஸ் செய்தி வெளியிட்டுள்ளது. சுவிட்சர்லாந்தில் அமெரிக்காவுக்கும் ஈரானுக்கும் இடையே திட்டமிடப்பட்டிருந்த பேச்சுவார்த்தைகள் ரத்து செய்யப்பட்ட நிலையில், இந்த சம்பவம் நிகழ்ந்துள்ளது. இது, சமீபத்தில் கையெழுத்திடப்பட்ட அமைதி ஒப்பந்தத்தின் நிலைத்திருக்குமா என்ற சந்தேகங்களை எழுப்பியுள்ளது.

தெற்கு லெபனானில் இரவு முழுவதும் பல இலக்குகள் மீது தங்கள் படைகள் தாக்குதல் நடத்தியதாகவும், நடவடிக்கைகள் தொடர்வதாகவும் இஸ்ரேலிய ராணுவம் தெரிவித்துள்ளது. லெபனான் உட்பட அனைத்து முனைகளிலும் ராணுவ நடவடிக்கைகளை உடனடியாக நிறுத்த வேண்டும் என அமெரிக்க-ஈரான் ஒப்பந்தம் கோரும் சூழலில், ஈரான் ஆதரவு ஹெஸ்புல்லா குழுவுடன் மீண்டும் மோதல்கள் தொடங்கியுள்ள நிலையில், இந்த தாக்குதல்கள் நடந்துள்ளன.

அமைதி ஒப்பந்தத்திற்கு சவாலாக அமைந்த தாக்குதல்

இஸ்ரேலியர்களின் சமீபத்திய தாக்குதல்களில் குறைந்தது 16 பேர் கொல்லப்பட்டதாக லெபனானின் அரசுக்கு சொந்தமான தேசிய செய்தி நிறுவனம் தெரிவித்துள்ளது. பல மாத கால மோதலுக்கு முற்றுப்புள்ளி வைப்பதையும், லெபனானின் "பிராந்திய ஒருமைப்பாடு மற்றும் இறையாண்மையைப்" பாதுகாப்பதற்கான உறுதிமொழிகளை உள்ளடக்கியிருக்கும் அமெரிக்க-ஈரான் ஒப்பந்தத்திற்கு இந்த தாக்குதல் சம்பவம் ஒரு சவாலாக அமைகிறது. 

இதனிடையே, ஹெஸ்புல்லாவின் அச்சுறுத்தல்கள் அகற்றப்படும் வரை, இஸ்ரேலிய படைகள் லெபனானில் நிலைத்திருக்கும் என்று இஸ்ரேலியப் பிரதமர் பெஞ்சமின் நெதன்யாகு தெரிவித்துள்ளார்.

ஒத்திவைக்கப்பட்ட சுவிட்சர்லாந்து பேச்சுவார்த்தைகள்

இன்று சுவிட்சர்லாந்தில் நடைபெறவிருந்த, அமெரிக்க மற்றும் ஈரானிய பேச்சுவார்த்தையாளர்களுக்கு இடையேயான தொழில்நுட்பப் பேச்சுவார்த்தைகள் ஒத்திவைக்கப்பட்ட அதே நேரத்தில், இந்த தாக்குதல் சம்பவமும் நிகழ்ந்தது.

அமெரிக்க அதிபர் டொனால்ட் ட்ரம்ப் மற்றும் ஈரான் அதிபர் மசூத் பெஷெஷ்கியன் ஆகியோரால் இந்த வாரத் தொடக்கத்தில் கையெழுத்திடப்பட்ட 14 அம்ச புரிந்துணர்வு ஒப்பந்தத்தை செயல்படுத்துவது குறித்து விவாதிப்பதே இந்த பேச்சுவார்த்தைகளின் நோக்கமாக இருந்தது.

இந்நிலையில், திட்டமிட்டபடி பேச்சுவார்த்தைகள் நடைபெறாது என்று சுவிட்சர்லாந்தின் வெளியுறவு அமைச்சகம் உறுதிப்படுத்தியது. ஆனால் அதற்கான விரிவான விளக்கத்தை அளிக்கவில்லை. அமெரிக்கத் தூதுக்குழுவிற்கு தலைமை தாங்குவார் என எதிர்பார்க்கப்பட்ட நிலையில், சுவிட்சர்லாந்து பயணத்தை ஒத்தி வைத்தார் அமெரிக்க துணை அதிபர் ஜே.டி. வான்ஸ். அதைத் தொடர்ந்தே இந்த அறிவிப்பு வெளியானது.