villupuram

26 ஆயிரம் வரி செலுத்துவோருக்கு நிம்மதி! புதுச்சேரியில் புதிய ஜி.எஸ்.டி. தீர்ப்பாயம் தொடக்கம்!

சிவரஞ்சித் — Sun, 1 Nov 2026 21:55:19 +0530

புதுச்சேரி: புதுச்சேரி மாநிலத்தில் ஜி.எஸ்.டி. வரி செலுத்தும் வர்த்தகர்கள் மற்றும் வியாபாரிகளின் நீண்டநாள் கோரிக்கையை ஏற்று, ஜி.எஸ்.டி. மேல்முறையீட்டு தீர்ப்பாயத்தின் (GST Appellate Tribunal) புதுச்சேரி சர்க்யூட் பெஞ்ச் தொடங்கப்பட்டுள்ளது. இதன் மூலம் ஜி.எஸ்.டி. வரி தொடர்பான அபராதம் மற்றும் வரி விதிப்பு உத்தரவுகளால் பாதிக்கப்படும் வர்த்தகர்கள், மேல்முறையீடு செய்வதற்காக சென்னை உள்ளிட்ட பிற நகரங்களுக்குச் செல்ல வேண்டிய சிரமம் குறைந்துள்ளது.

புதுச்சேரியில் மத்திய சரக்கு மற்றும் சேவை வரியின் (Central GST) கீழ் சுமார் 11 ஆயிரம் பேரும், மாநில சரக்கு மற்றும் சேவை வரியின் (State GST) கீழ் சுமார் 15 ஆயிரம் பேரும் என மொத்தம் 26 ஆயிரம் பேர் ஜி.எஸ்.டி. வரி செலுத்துவோராக உள்ளனர். இவர்கள் தங்களது தொழில் மற்றும் வணிக நடவடிக்கைகளின் அடிப்படையில் குறிப்பிட்ட கால இடைவெளியில் ஜி.எஸ்.டி. கணக்குகளை தாக்கல் செய்து வரி செலுத்தி வருகின்றனர்.

இதில், முறையாக வரி செலுத்தாமல் இருப்பது, வரி ஏய்ப்பில் ஈடுபடுவது, வரி கணக்குகளில் தவறான விவரங்களை அளிப்பது உள்ளிட்ட விதிமீறல்களுக்காக சம்பந்தப்பட்ட வர்த்தகர்கள் மீது ஜி.எஸ்.டி. துறை சார்பில் நடவடிக்கை எடுக்கப்படுகிறது. அதேபோல், உரிய காலக்கெடுவுக்குள் ஜி.எஸ்.டி. கணக்குகளை தாக்கல் செய்யத் தவறினால் தாமதக் கட்டணம் மற்றும் அபராதமும் வசூலிக்கப்படுகிறது.

மேல்முறையீடு செய்ய இருந்த சிரமம்

இவ்வாறு ஜி.எஸ்.டி. துறையால் அபராதம் விதிக்கப்படும்போது அல்லது வரி தொடர்பாக உத்தரவுகள் பிறப்பிக்கப்படும்போது, அதில் ஆட்சேபனை இருந்தால் சம்பந்தப்பட்டவர்கள் முதலில் ஜி.எஸ்.டி. முதல் மேல்முறையீட்டு அதிகாரியிடம் முறையிடலாம். அங்கு வழங்கப்படும் உத்தரவுகளிலும் திருப்தி இல்லாதவர்கள், அடுத்தகட்டமாக ஜி.எஸ்.டி. மேல்முறையீட்டு தீர்ப்பாயத்தை அணுகி தங்களது தரப்பு நியாயங்களை எடுத்துரைத்து மேல்முறையீடு செய்யலாம்.

ஆனால், புதுச்சேரியில் இதுவரை ஜி.எஸ்.டி. மேல்முறையீட்டு தீர்ப்பாயத்தின் தனி அமர்வு இல்லாததால், மேல்முறையீடு செய்ய வேண்டிய வர்த்தகர்கள் சென்னை உள்ளிட்ட பிற நகரங்களுக்குச் செல்ல வேண்டிய நிலை இருந்து வந்தது. இதனால் பயணச் செலவு, நேர விரயம், வழக்கறிஞர்களை அணுகுவதில் ஏற்படும் சிரமம் உள்ளிட்ட பல்வேறு நடைமுறைப் பிரச்னைகளை அவர்கள் எதிர்கொண்டு வந்தனர்.

இதையடுத்து, புதுச்சேரியிலேயே ஜி.எஸ்.டி. மேல்முறையீட்டு தீர்ப்பாயத்தின் சர்க்யூட் பெஞ்ச் அமைக்க வேண்டும் என வர்த்தகர்கள், வியாபாரிகள் மற்றும் வரி செலுத்துவோர் நீண்டகாலமாக மத்திய அரசிடம் கோரிக்கை விடுத்து வந்தனர்.

ஓம் சக்தி என்.எஸ்.சி. போஸ் ஹாலில் சர்க்யூட் பெஞ்ச்

இந்நிலையில், வர்த்தகர்களின் கோரிக்கையை ஏற்று புதுச்சேரி மறைமலை அடிகள் சாலையில் அமைந்துள்ள ஓம் சக்தி என்.எஸ்.சி. போஸ் ஹாலில் ஜி.எஸ்.டி. மேல்முறையீட்டு தீர்ப்பாயத்தின் புதுச்சேரி சர்க்யூட் பெஞ்ச் அமைக்கப்பட்டுள்ளது.

இதன் தொடக்க விழா நேற்று நடைபெற்றது. புதுடில்லியில் செயல்பட்டு வரும் ஜி.எஸ்.டி. மேல்முறையீட்டு தீர்ப்பாயத்தின் முதன்மை பெஞ்ச் தலைவர் சஞ்சய் குமார் மிஸ்ரா காணொலி காட்சி வாயிலாக புதுச்சேரி சர்க்யூட் பெஞ்சை தொடங்கி வைத்தார்.

இந்த நிகழ்ச்சியில் புதுச்சேரி மத்திய ஜி.எஸ்.டி. ஆணையர் மிலிந்த் லஞ்சேவார், புதுச்சேரி அரசு செயலர் அனூப் தாகூர் உள்ளிட்ட அதிகாரிகள் கலந்து கொண்டனர். தொடர்ந்து, புதுச்சேரி சர்க்யூட் பெஞ்சின் முதல் வழக்கு விசாரணையும் நடைபெற்றது. இதன் மூலம் புதுச்சேரியில் ஜி.எஸ்.டி. தொடர்பான மேல்முறையீட்டு வழக்குகளை விசாரிப்பதற்கான நடைமுறை அதிகாரப்பூர்வமாக தொடங்கியுள்ளது.

மாதந்தோறும் இரண்டு வெள்ளிக்கிழமைகளில் விசாரணை

புதிய நடைமுறையின்படி, ஒவ்வொரு மாதமும் நான்காவது மற்றும் ஐந்தாவது வெள்ளிக்கிழமைகளில் புதுச்சேரி சர்க்யூட் பெஞ்சில் மேல்முறையீட்டு வழக்குகள் விசாரணைக்கு எடுத்துக்கொள்ளப்பட உள்ளன.

இந்த அமர்வுகளில் ஜி.எஸ்.டி. மேல்முறையீட்டு தீர்ப்பாயத்தின் துணைத் தலைவர் பிரவீன் குமார் ஜெயின் மற்றும் தொழில்நுட்ப உறுப்பினர் ஷேக் காதர் ரஹ்மான் ஆகியோர் அடங்கிய அமர்வு வழக்குகளை விசாரிக்க உள்ளது.

இதன் மூலம் புதுச்சேரி மற்றும் அதனைச் சுற்றியுள்ள பகுதிகளைச் சேர்ந்த வரி செலுத்துவோர், தங்களது ஜி.எஸ்.டி. மேல்முறையீட்டு வழக்குகளை உள்ளூரிலேயே விசாரிக்கச் செய்வதற்கான வாய்ப்பு கிடைத்துள்ளது.

எளிதாக அணுக முடியும் - தொழில்நுட்ப உறுப்பினர் கருத்து

இதுகுறித்து சென்னை பெஞ்சின் தொழில்நுட்ப உறுப்பினர் ஷேக் காதர் ரஹ்மான் கூறுகையில், புதுச்சேரிக்கு என தனியாக சர்க்யூட் பெஞ்ச் அமைக்கப்பட்டிருப்பது மிக முக்கியமான நடவடிக்கையாகும். இதன் மூலம் புதுச்சேரி மற்றும் அதன் சுற்றுவட்டாரப் பகுதிகளைச் சேர்ந்த வரி செலுத்துவோர், வர்த்தகர்கள் மற்றும் வியாபாரிகள் மேல்முறையீட்டு வழக்குகளுக்காக தீர்ப்பாயத்தை மிகவும் எளிதாக அணுக முடியும். இதனால் அவர்கள் எதிர்கொண்டு வந்த பயணச் சிரமங்கள் குறைவதுடன், தங்களது வழக்குகளைத் தொடர்ந்து நடத்துவதற்கும் வசதியாக இருக்கும் என்று தெரிவித்தார்.

புதுச்சேரியில் ஜி.எஸ்.டி. மேல்முறையீட்டு தீர்ப்பாயத்தின் சர்க்யூட் பெஞ்ச் தொடங்கப்பட்டிருப்பது, மாநிலத்தின் வர்த்தகத் துறையினருக்கு முக்கியமான நிர்வாக மற்றும் சட்டரீதியான முன்னேற்றமாகப் பார்க்கப்படுகிறது. 26 ஆயிரம் வரி செலுத்துவோர் பயன்பெறும் வகையில் அமைந்துள்ள இந்த புதிய வசதி, வரி தொடர்பான மேல்முறையீடுகளை எளிதாக்குவதுடன், புதுச்சேரி வர்த்தகர்களின் நீண்டநாள் கோரிக்கைக்கும் தீர்வாக அமைந்துள்ளது.

ஷாக் நியூஸ்: நவம்பரில் இந்த ரயில்கள் எல்லாம் ரத்தா? முழு விவர ரயில் பட்டியல் இதோ!

எஸ்.ஜெகநாதன், மயிலாடுதுறை — Sun, 1 Nov 2026 11:59:01 +0530

திருச்சி: தெற்கு ரயில்வேயின் திருச்சிராப்பள்ளி மற்றும் மதுரை கோட்டங்களுக்கு உட்பட்ட பல்வேறு பிரிவுகளில் பராமரிப்பு மற்றும் பொறியியல் பணிகள் தீவிரமாக நடைபெற்று வருவதால், பயணிகளின் பாதுகாப்பு மற்றும் வசதியை கருத்தில் கொண்டு ரயில் தேதிகளில் பல்வேறு மாற்றங்கள் செய்யப்பட்டுள்ளன.

இந்த பொறியியல் பணிகள் காரணமாக நவம்பர் மாதத்தில் குறிப்பிட்ட சில நாட்களில் சில ரயில்கள் முழுமையடையாமல் இயக்கப்படுவதும், சில ரயில்களின் வழித்தடங்கள் மாற்றப்படுவதும், மற்றும் சில ரயில்கள் கால தாமதமாக இயக்கப்பட உள்ளது. இது தொடர்பான விரிவான விவரங்களை தெற்கு ரயில்வேயின் திருச்சிராப்பள்ளி கோட்ட மக்கள் தொடர்பு அலுவலர் என். ஜெயந்த் வெளியிட்டுள்ள செய்திக்குறிப்பில் தெரிவித்துள்ளார்.

திருச்சிராப்பள்ளி கோட்டத்தில் பகுதியாக ரத்து மற்றும் தொடக்க மாற்றம்

திருச்சிராப்பள்ளி கோட்டத்திற்கு உட்பட்ட பல்வேறு பிரிவுகளில் நடைபெறும் பொறியியல் பணிகள் காரணமாக பல முக்கிய ரயில்களின் இயக்கத்தில் மாற்றம் கொண்டு வரப்பட்டுள்ளது. அதன்படி, திருச்சிராப்பள்ளியிலிருந்து காலை 08.40 மணிக்கு காரைக்கால் செல்லும் டெமு ரயில் (வண்டி எண்: 76820) நவம்பர் 1, 2, 4, 5, 6, 7, 8 மற்றும் 9 ஆகிய தேதிகளில் திருவாரூர் நிலையத்துடன் நிறுத்தப்படும். இந்த ரயில்கள் திருச்சிராப்பள்ளியிலிருந்து திருவாரூர் வரை மட்டுமே இயக்கப்படும் என்றும், திருவாரூரிலிருந்து காரைக்கால் வரை பகுதியாக ரத்து செய்யப்பட்டுள்ளதாகவும் தெரிவிக்கப்பட்டுள்ளது.

இதேபோல், தாம்பரத்திலிருந்து காலை 09.45 மணிக்கு விழுப்புரம் செல்லும் மெமு பயணிகள் ரயில் (வண்டி எண்: 66045) நவம்பர் 2, 4 மற்றும் 7 ஆகிய தேதிகளில் முண்டியம்பாக்கம் வரை மட்டுமே இயக்கப்படும் என்றும், அங்கிருந்து தாம்பரம் திரும்பும் என்றும் அறிவிக்கப்பட்டுள்ளது. மறுமார்க்கமாக இயக்கப்படும் சில ரயில்களின் தொடக்க இடங்களிலும் மாற்றங்கள் செய்யப்பட்டுள்ளன.

காரைக்காலிலிருந்து பிற்பகல் 14.55 மணிக்கு திருச்சிராப்பள்ளி புறப்படும் டெமு ரயில் (வண்டி எண்: 76819) நவம்பர் 1, 2, 4, 5, 6, 7, 8 மற்றும் 9 ஆகிய தேதிகளில் காரைக்கால் மற்றும் திருவாரூர் இடையே பகுதியாக ரத்து செய்யப்படுகிறது. இந்த ரயில் தனது பயணத்தை திருவாரூர் நிலையத்திலிருந்து வழக்கமான நேரமான பிற்பகல் 16.15 மணிக்குத் தொடங்கும்.

மேலும், விழுப்புரத்திலிருந்து சென்னை கடற்கரை செல்லும் மெமு ரயில் (வண்டி எண்: 66046) மற்றும் விழுப்புரம் - மயிலாடுதுறை மெமு ரயில் (வண்டி எண்: 66019) ஆகியவையும் குறிப்பிட்ட தேதிகளில் முண்டியம்பாக்கம் மற்றும் சேர்தனூர் போன்ற மாற்றுத் தொடக்க நிலையங்களிலிருந்து இயக்கப்படும் என ரயில்வே நிர்வாகம் அறிவித்துள்ளது.

ரயில் ஒழுங்குபடுத்துதல் மற்றும் புறப்படும் நேரம் மாற்றம்

பராமரிப்பு பணிகள் நடைபெறும் பாதைகளில் பாதுகாப்பான ரயில் போக்குவரத்தை உறுதி செய்யும் நோக்கில் சில விரைவு மற்றும் எக்ஸ்பிரஸ் ரயில்கள் வழியில் குறிப்பிட்ட நிமிடங்கள் வரை ஒழுங்குபடுத்தப்பட்டு (நிறுத்தி வைக்கப்பட்டு) இயக்கப்பட உள்ளன. இதன் அடிப்படையில், பெரோஸ்பூர் கன்ட் - ராமேஸ்வரம் சூப்பர்பாஸ்ட் ஹம்சஃபர் எக்ஸ்பிரஸ் (வண்டி எண்: 20498) மற்றும் ஜோத்பூர் - மன்னார்குடி எக்ஸ்பிரஸ் (வண்டி எண்: 22673) ஆகிய ரயில்கள் வழியில் உள்ள பாதுகாப்பான இடங்களில் முறையே 120 நிமிடங்கள் வரை ஒழுங்குபடுத்தப்படும்.

மேலும், திருச்சிராப்பள்ளி - மயிலாடுதுறை மெமு எக்ஸ்பிரஸ் (வண்டி எண்: 16834), புதுச்சேரி - ஹவுரா சூப்பர்பாஸ்ட் எக்ஸ்பிரஸ் (வண்டி எண்: 12868), மற்றும் சார்லப்பள்ளி - திருச்சிராப்பள்ளி எக்ஸ்பிரஸ் (வண்டி எண்: 17077) உள்ளிட்ட ரயில்களும் குறிப்பிட்ட கால அவகாசத்திற்கு வழியில் நிறுத்தி இயக்கப்படும் எனத் தெரிவிக்கப்பட்டுள்ளது.

இது தவிர, சில முக்கிய ரயில்களின் புறப்படும் நேரத்திலும் மாற்றம் செய்யப்பட்டுள்ளது. சென்னை எழும்பூரிலிருந்து குருவாயூர் செல்லும் எக்ஸ்பிரஸ் ரயில் (வண்டி எண்: 16127) நவம்பர் 2, 4 மற்றும் 7 ஆகிய தேதிகளில் சென்னை எழும்பூரிலிருந்து புறப்படுவதற்குப் பதிலாக, தாம்பரத்திலிருந்து 60 நிமிடங்கள் தாமதமாக அதாவது பிற்பகல் 12.10 மணிக்கு இயக்கப்படும்.

அதேபோல், புதுச்சேரியில் இருந்து இயக்கப்படும் காகிநாடா போர்ட் சர்க்கார் எக்ஸ்பிரஸ் (வண்டி எண்: 17656) மற்றும் திருச்சிராப்பள்ளியில் இருந்து சென்னை எழும்பூர் செல்லும் சோழன் சூப்பர்பாஸ்ட் எக்ஸ்பிரஸ் (வண்டி எண்: 22676) ஆகிய ரயல்களும் குறிப்பிட்ட தேதிகளில் மாற்றப்பட்ட நேரத்தில்கூட இயக்கப்படும் என அறிவிக்கப்பட்டுள்ளது.

மதுரை கோட்டம்: கள்ளிக்குடி - திருமங்கலம் இடையே வழித்தட மாற்றம்

மதுரை கோட்டத்திற்கு உட்பட்ட கள்ளிக்குடி மற்றும் திருமங்கலம் இடையே இன்ஜினியரிங் பணிகள் தீவிரமாக நடைபெற்று வருவதன் காரணமாக, சில விரைவு ரயில்களின் வழித்தடங்கள் முற்றிலுமாக மாற்றியமைக்கப்பட்டு இயக்கப்படுகின்றன.

குருவாயூரிலிருந்து இரவு 23.15 மணிக்குப் புறப்பட்டு சென்னை எழும்பூர் செல்லும் எக்ஸ்பிரஸ் ரயில் (வண்டி எண்: 16128) நவம்பர் 1 மற்றும் 3 ஆகிய தேதிகளில் விருதுநகர், மானாமதுரை, காரைக்குடி மற்றும் திருச்சிராப்பள்ளி வழியாக மாற்றுப் பாதையில் இயக்கப்படும். இந்த மாற்றப்பட்ட வழித்தடத்தின் காரணமாக இவ்வண்டி மதுரை, சோழவந்தான், கொடைக்கானல் ரோடு, திண்டுக்கல் மற்றும் மணப்பாறை ஆகிய ரயில் நிலையங்களுக்குச் செல்லாது. மாறாக, அருப்புக்கோட்டை, மானாமதுரை, சிவகங்கை, காரைக்குடி மற்றும் புதுக்கோட்டை ஆகிய நிலையங்களில் இந்த ரயிலுக்கு கூடுதல் நின்று செல்லும் வசதி (Stoppages) அளிக்கப்படும்.

இதேபோன்று, நாகர்கோவிலில் இருந்து கோயம்புத்தூர் செல்லும் எக்ஸ்பிரஸ் ரயிலும் (வண்டி எண்: 16321) நவம்பர் 2 மற்றும் 4 ஆகிய தேதிகளில் வழக்கமான பாதையை மாற்றி அமைத்து இயக்கப்படுகிறது. இந்த ரயில் விருதுநகர், மானாமதுரை, காரைக்குடி, திருச்சிராப்பள்ளி மற்றும் கரூர் வழியாக இயக்கப்படும். இதனால் திருமங்கலம், திருப்பரங்குன்றம், மதுரை, சோழவந்தான், கொடைக்கானல் ரோடு, அம்பத்துரை, திண்டுக்கல், எரியோடு மற்றும் பாளையம் ஆகிய நிலையங்களில் வழக்கமான நிறுத்தங்கள் தவிர்க்கப்பட்டு, அதற்குப் பதிலாக அருப்புக்கோட்டை, மானாமதுரை, சிவகங்கை, காரைக்குடி, புதுக்கோட்டை மற்றும் திருச்சிராப்பள்ளி ஆகிய நிலையங்களில் கூடுதல் நிறுத்தங்கள் வழங்கப்படும் என தெற்கு ரயில்வே நிர்வாகம் சார்பில் தெரிவிக்கப்பட்டுள்ளது. பயணிகள் இந்த மாற்றங்களைக் கருத்தில் கொண்டு தங்களது பயணங்களைத் திட்டமிடுமாறு அறிவுறுத்தப்பட்டுள்ளனர்.

சிதம்பரம் நடராசர் கோயில் சீரழிவு? உயர்நீதிமன்றத் தீர்ப்பை பாதுகாக்க வேண்டும் - அன்புமணி

சிவரஞ்சித் — Sun, 1 Nov 2026 11:10:25 +0530

சென்னை: சிதம்பரம் தில்லை நடராஜர் கோயிலில் ஏற்பட்டுள்ள நிர்வாகச் சீர்கேடுகள் மற்றும் கட்டமைப்பு சீரழிவுகளைச் சரிசெய்ய, சென்னை உயர்நீதிமன்றம் ஓய்வுபெற்ற நீதிபதிகள் தலைமையில் புதிய நிர்வாகக் குழுவை அமைத்துள்ள தீர்ப்பை தமிழக அரசு பாதுகாக்க வேண்டும் என்று பா.ம.க. தலைவர் மருத்துவர் அன்புமணி இராமதாஸ் வலியுறுத்தியுள்ளார்.

இதுதொடர்பாக அவர் வெளியிட்டுள்ள அறிக்கையில் கூறியிருப்பதாவது:

சிதம்பரம் நடராசர் கோயில் நிர்வாகத்தில் முறைகேடுகள் அதிகரித்து விட்டதாகவும், மோசமான நிர்வாகத்தால் பழமைச் சிறப்புமிக்க கோயில் கட்டமைப்புகள் சீரழிந்து வருவதாகவும் குற்றஞ்சாட்டியிருக்கும் சென்னை உயர்நீதிமன்றம், அக்கோயிலை நிர்வகிக்க சென்னை உயர்நீதிமன்றத்தின் ஓய்வு பெற்ற நீதிபதிகள் இருவர் உள்ளிட்ட 5 பேர் கொண்ட புதிய நிர்வாகக் குழுவை அமைத்திருக்கிறது. மிக முக்கியத்துவம் வாய்ந்த இத்தீர்ப்பு செயல்படுத்தப்படுவதையும், சட்ட நடவடிக்கைகளில் பாதுகாக்கப்படுவதையும் அரசு உறுதி செய்ய வேண்டும்.

வரலாற்று சிறப்பு மிக்க சிதம்பரம் நடராசர் ஆலயத்தின் கனகசபை மீது பக்தர்கள் ஏறி நின்று தேவாரம், திருவாசகம் பாட அனுமதி அளித்து 2022&ஆம் ஆண்டு மே மாதம் தமிழக அரசு அரசாணை பிறப்பித்தது. அதை எதிர்த்து பொது தீட்சிதர்கள் சார்பில் தொடரப்பட்ட வழக்கு உள்ளிட்ட பல்வேறு வழக்குகளை விசாரித்த சென்னை உயர்நீதிமன்றத்தின் இரு நீதிபதிகள் கொண்ட அமர்வு, தில்லை நடராசர் கோயிலை நிர்வகிக்க ஓய்வுபெற்ற உயர்நீதிமன்ற நீதிபதிகள் வீ.பாரதிதாசன், ஆர். சுரேஷ்குமார் ஆகியோரை தலைவர் மற்றும் துணைத் தலைவராகக் கொண்ட 5 பேர் குழுவை அமைத்து ஆணையிட்டிருக்கிறது. இத்தீர்ப்பு வரவேற்கத்தக்கது.

நடராசர் கோயில் நிர்வாகத்தை ஓய்வுபெற்ற நீதிபதிகள் வசம் ஒப்படைப்பதற்காக சென்னை உயர்நீதிமன்றம் கூறியுள்ள காரணங்கள் மிகவும் முக்கியமானவை. உச்சநீதிமன்றத் தீர்ப்பின் அடிப்படையில், 2014&ஆம் ஆண்டில் நடராசர் கோயில் நிர்வாகம் பொது தீட்சிதர்கள் வசம் ஒப்படைக்கப்பட்ட பிறகு, 12 ஆண்டுகளில் பெரும் சீரழிவை சந்தித்து வருவதாக குற்றஞ்சாட்டியுள்ள நீதிமன்றம், கோயில் வளாகத்திற்குள் தேவையில்லாத கட்டிடங்களை அனுமதியின்றி கட்டியதால், பக்தர்களுக்கு பெரும் பாதிப்பு ஏற்பட்டுள்ளது; சட்டவிரோதமான இந்தக் கட்டுமானங்களால் கோயிலின் புராதன கட்டிடங்கள் சேதமடைந்துள்ளன; கோயில் வரவு & செலவு கணக்குகள் முறையாக பராமரிக்கப்படவில்லை; கோயிலின் சொத்துகள் சூறையாட அனுமதிக்கப்பட்டன; வழிபாட்டுத் தலமான நடராசர் ஆலையத்தை உணவு வளாகமாக மாற்றி விட்டனர் என்றும் விமர்சித்துள்ளது. இந்தக் குற்றச்சாட்டுகளுக்கான ஆதாரங்களையும் சென்னை உயர்நீதிமன்றம் தீர்ப்பில் இணைத்துள்ளது.

சிதம்பரம் நடராசர் கோயில் வரலாற்று சிறப்பு மிக்கதாகும். சிதம்பரம் நடராசர் ஆலயம் குறைந்தது 1400 ஆண்டுகளுக்கு முன், ஆறாம் நூற்றாண்டுக்கு முன்பே கட்டப்பட்டிருக்க வேண்டும். கி.பி. பத்தாம் நூற்றாண்டில் சோழ மன்னர்களால் புதுப்பிக்கப்பட்டு, மேம்படுத்தப்படுத்தப்பட்ட இந்த ஆலயம், அவர்களின் குலதெய்வக் கோயிலாக விளங்கியது. சோழ மன்னர்கள் இந்தக் கோயிலில் முடிசூடிக் கொள்வதை பெருமையாக கருதியுள்ளனர். சிதம்பரம் சில காலம் சோழர்களின் தலைநகரமாகவும் திகழ்ந்ததாக வரலாற்றுக் குறிப்புகள் உணர்த்துகின்றன. இப்படியாக சோழப் பேரரசுடன் மட்டுமின்றி, தமிழர்களின் கலை, ஆன்மிகம் மற்றும் பண்பாட்டுச் சின்னமாகவும் திகழும் சிதம்பரம் நடராசர் கோயில் சீரழிக்கப்படுவதை தமிழக அரசு அனுமதிக்கக் கூடாது.

சிதம்பரம் நடராசர் கோயில் வளாகத்தில் கடந்த 12 ஆண்டுகளில் நிகழ்ந்த அனைத்து குளறுபடிகளையும், முறைகேடுகளையும் சரி செய்து, கோயிலை மீட்டெடுக்க வேண்டும் என்று தமிழக அரசுக்கும், புதிதாக அமைக்கப்பட்டுள்ள நீதிபதிகள் தலைமையிலான நிர்வாகக் குழுவுக்கும் உயர்நீதிமன்றம் ஆணையிட்டுள்ளது. இந்தக் கடமையை நிர்வாகக் குழு அர்ப்பணிப்பு உணர்வுடன் நிறைவேற்ற வேண்டும். அதற்குத் தேவையான அனைத்து உதவிகளையும் தமிழ்நாடு அரசும், இந்து சமய அறநிலையத் துறையும் குழுவுக்கு வழங்க வேண்டும்.

அதைவிட முக்கியம் சிதம்பரம் நடராசர் கோயிலை பாதுகாப்பதற்கான சென்னை உயர்நீதிமன்றத்தின் இந்தத் தீர்ப்பை பாதுகாக்க வேண்டியது தான். அதற்காக இந்த வழக்கில் தமிழக அரசின் சார்பில் வாதிட மூத்த வழக்கறிஞர்களை நியமித்து, உயர்நீதிமன்றத்தின் தீர்ப்பை உறுதி செய்ய நடவடிக்கை எடுக்க வேண்டும். இவ்வாறு அவர் தெரிவித்துள்ளார்.

இனி இப்படி நடக்காது.. மன்னிப்பு கேட்ட அமைச்சர்.. நடந்தது என்ன?

வினோத்குமார் — Sat, 31 Oct 2026 21:41:06 +0530

கால்நடை துறை உதவி மருத்துவர் நபர் ஒருவரை ஆபாசமாக பேசிய வீடியோ வைரலானதை அடுத்து சங்கரநாராயணன் பணியிடம் நீக்கம் செய்யப்பட்ட நிலையில் இந்த சம்பவத்திற்கு அமைச்சர் மன்னிப்பு கேட்டுள்ளார்.

கொலை மிரட்டல்

விழுப்புரம் மாவட்டம் மரக்காணம் வட்டம் கூனிமேடு பகுதியில் உள்ள கால்நடை துறை மருந்தகம் உதவி மருத்துவராக சங்கரநாராயணன் பணியாற்றி வருகிறார். அதே பகுதியை சேர்ந்த இளைஞர் ஒருவர் உடல்நிலை சரியில்லாத பசுமாட்டை அழைத்துக் கொண்டு மருத்துவமனைக்கு வந்துள்ளார். அப்போது பணியில் இருந்த சங்கரநாராயணனிடம் பசுவுக்கு சிகிச்சை அளிக்குமாறு இளைஞர் கூறியுள்ளார். அதற்கு சங்கரநாராயணன் தகாத வார்த்தைகளால் பேசியுள்ளார். அதுமட்டுமல்லாமல் தட்டிக்கேட்டதால் அந்த நபருக்கும் கொலை மிரட்டல் விடுத்துள்ளார். இதுதொடர்பான வீடியோ வைரலாகி பெரும் அதிர்ச்சியை ஏற்படுத்தியது.

சஸ்பெண்ட்

இந்நிலையில் நாமக்கல் மாவட்டம் ராசிபுரத்தில் கால்நடைத்துறை அமைச்சர் கமலி செய்தியாளர்களை சந்திக்கையில்: பாதிக்கப்பட்ட நபர் தனிப்பட்ட முறையில் வீடியோ அனுப்பியதாகவும், அந்த வீடியோவை கொண்டு தான் நடந்த சம்பவம் உண்மைதான என விசாரணை மேற்கொண்டேன். விசாரணையில் அவர் பேசியது உண்மை என தெரிய வந்த நிலையில் அவர் மீது கடுமையான நடவடிக்கை எடுக்க வேண்டும் என நேற்று அவரை சஸ்பெண்ட் செய்ய உத்தரவிட்டுள்ளேன் என்றார்.

மன்னிப்பு கேட்ட அமைச்சர்

உதவி மருத்துவர் சங்கரநாராயணன் அந்த நபரை பேசியதற்காக, தான் அந்த துறை சார்ந்த அமைச்சர் பொறுப்பில் இருப்பதால் உண்மையிலே மன்னிப்பு கேட்பதாக கூறினார். மேலும் இது போன்ற சம்பவம் மீண்டும் நடைபெறாது, அனைத்து மருத்துவர்களிடம் பணிவாக நடக்க சொல்லி இருப்பதாக தெரிவித்தார்.

மனநலம் பாதிக்கப்பட்ட சிறுமிக்கு கொடூரம்... அக்காவையும் விட்டுவைக்காத முதியவர்! நீதிமன்றம் அதிரடி தீர்ப்பு!

சிவரஞ்சித் — Sat, 31 Oct 2026 17:28:24 +0530

விழுப்புரம்: மனநலம் பாதிக்கப்பட்ட 14 வயது சிறுமி மற்றும் அவரது 25 வயது அக்கா ஆகிய இருவரையும் பாலியல் வன்கொடுமை செய்த வழக்கில், குற்றவாளியான 50 வயது முதியவருக்கு இயற்கை மரணம் ஏற்படும் வரை சிறை தண்டனை விதித்து விழுப்புரம் போக்சோ சிறப்பு நீதிமன்றம் அதிரடி தீர்ப்பளித்துள்ளது. மேலும், பாதிக்கப்பட்ட இரு சகோதரிகளுக்கும் தமிழக அரசு சார்பில் தலா ரூ.10 லட்சம் இழப்பீடு வழங்க நீதிபதி உத்தரவிட்டுள்ளார்.

சிறுமிக்கு நேர்ந்த கொடுமை

விழுப்புரம் மாவட்டம், திண்டிவனம் அடுத்த கிராண்டிபுரம் பகுதியைச் சேர்ந்தவர் கன்னியப்பன் (50). இவர் கடந்த 2019-ஆம் ஆண்டு ஜனவரி 15-ஆம் தேதி மனநலம் பாதிக்கப்பட்ட 14 வயது சிறுமியை பாலியல் வன்கொடுமை செய்துள்ளார்.

இந்தச் சம்பவம் தொடர்பாக பாதிக்கப்பட்ட சிறுமி தரப்பில் அளிக்கப்பட்ட புகாரின் அடிப்படையில், திண்டிவனம் அனைத்து மகளிர் போலீசார் போக்சோ சட்டத்தின் கீழ் வழக்குப்பதிவு செய்து விசாரணை மேற்கொண்டனர். தொடர்ந்து கன்னியப்பனை கைது செய்து விசாரணை நடத்தினர்.

அக்காவையும் பாலியல் வன்கொடுமை செய்தது அம்பலம்

போலீசார் நடத்திய விசாரணையில், பாதிக்கப்பட்ட 14 வயது சிறுமியின் 25 வயது அக்காவையும் கன்னியப்பன் பாலியல் வன்கொடுமை செய்தது தெரியவந்தது. இதனால் இந்த வழக்கு மேலும் அதிர்ச்சியை ஏற்படுத்தியது.

இதையடுத்து, இரு சகோதரிகளும் பாதிக்கப்பட்டது தொடர்பான குற்றச்சாட்டுகளின் அடிப்படையில் போலீசார் விசாரணையைத் தொடர்ந்து முடித்து, வழக்கை நீதிமன்ற விசாரணைக்கு கொண்டு சென்றனர்.

இயற்கை மரணம் ஏற்படும் வரை சிறை – நீதிபதி அதிரடி தீர்ப்பு

இந்த வழக்கு விழுப்புரத்தில் உள்ள போக்சோ சிறப்பு நீதிமன்றத்தில் நடைபெற்று வந்தது. பல்வேறு கட்ட விசாரணைகள் மற்றும் சாட்சியங்களின் அடிப்படையில் வழக்கை விசாரித்த நீதிபதி வினோதா, குற்றம் சாட்டப்பட்ட கன்னியப்பன் மீதான குற்றச்சாட்டுகள் நிரூபிக்கப்பட்டதைத் தொடர்ந்து தண்டனை விவரங்களை அறிவித்தார்.

அதன்படி, கன்னியப்பனுக்கு இயற்கை மரணம் ஏற்படும் வரை சிறை தண்டனை விதித்து தீர்ப்பளித்த நீதிபதி, அவருக்கு ரூ.14 ஆயிரம் அபராதமும் விதித்தார்.

இரு சகோதரிகளுக்கும் தலா ரூ.10 லட்சம் இழப்பீடு

மேலும், இந்த வழக்கில் பாதிக்கப்பட்ட 14 வயது சிறுமி மற்றும் அவரது 25 வயது அக்கா ஆகிய இருவருக்கும் அரசு சார்பில் தலா ரூ.10 லட்சம் வீதம் மொத்தம் ரூ.20 லட்சம் இழப்பீட்டுத் தொகை வழங்க வேண்டும் என்றும் நீதிபதி உத்தரவிட்டார்.

ஒரே குடும்பத்தைச் சேர்ந்த இரு சகோதரிகளையும் பாலியல் வன்கொடுமை செய்த வழக்கில், குற்றவாளிக்கு இயற்கை மரணம் ஏற்படும் வரை சிறை தண்டனை விதிக்கப்பட்டுள்ளதும், பாதிக்கப்பட்ட இருவருக்கும் தலா ரூ.10 லட்சம் இழப்பீடு வழங்க உத்தரவிடப்பட்டுள்ளதும் விழுப்புரம் மாவட்டத்தில் பரபரப்பை ஏற்படுத்தியுள்ளது.

சிறுமிகள் மற்றும் பெண்களுக்கு எதிரான பாலியல் குற்றங்களில் கடுமையான சட்ட நடவடிக்கைகள் எடுக்கப்பட வேண்டும் என்ற எதிர்பார்ப்புக்கு மத்தியில் இந்தத் தீர்ப்பு முக்கியத்துவம் பெற்றுள்ளது.

20 நாட்களாகியும் கிடைக்காத துப்பு! செஞ்சி சிறுமி ஹேமலதா எங்கே? சிபிசிஐடி போலீசார் திணறல்!

சிவரஞ்சித் — Sat, 31 Oct 2026 12:12:54 +0530

விழுப்புரம் : விழுப்புரம் மாவட்டம் செஞ்சி அருகே ஆலம்பூண்டி கிராமத்தில் 7 வயது சிறுமி மாயமான வழக்கில், இதுவரை உறுதியான துப்பு கிடைக்காததால் சிபிசிஐடி போலீசார் தொடர்ந்து விசாரணை நடத்தி வருகின்றனர். சிறுமி மாயமாகி பல நாட்களைக் கடந்தும் அவர் எங்கு சென்றார், என்ன ஆனார் என்பது குறித்த எந்தத் தெளிவான தகவலும் கிடைக்காததால் இந்த வழக்கில் மர்மம் நீடித்து வருகிறது.

சிறுமி மாயமானது எப்படி?

விழுப்புரம் மாவட்டம் செஞ்சியை அடுத்த ஆலம்பூண்டி கிராமத்தைச் சேர்ந்த கூலித் தொழிலாளர்களான வடிவேலு – பவானி தம்பதியின் 7 வயது மகள் ஹேமலதா. இவர் அங்குள்ள ஊராட்சி ஒன்றிய தொடக்கப் பள்ளியில் 2-ம் வகுப்பு படித்து வந்தார்.

கடந்த அக்டோபர் 11-ஆம் தேதி சிறுமியின் பிறந்தநாள் கொண்டாடப்பட்ட நிலையில், மறுநாள் அக்டோபர் 12-ஆம் தேதி அதிகாலை வீட்டில் தாயின் அருகே தூங்கிக் கொண்டிருந்த சிறுமி திடீரென மாயமானார். அதிகாலையில் கண்விழித்துப் பார்த்த பெற்றோர், சிறுமியைக் காணாததால் அதிர்ச்சியடைந்து பல்வேறு இடங்களில் தேடினர். உறவினர்கள், அக்கம் பக்கத்தினர் வீடுகள் மற்றும் சுற்றுவட்டாரப் பகுதிகளில் தேடியும் சிறுமி கிடைக்கவில்லை.

இதையடுத்து சத்தியமங்கலம் காவல் நிலையத்தில் புகார் அளிக்கப்பட்டது. போலீசார் வழக்குப்பதிவு செய்து விசாரணையைத் தொடங்கினர்.

சிபிசிஐடிக்கு மாற்றப்பட்ட வழக்கு

சிறுமியைத் தேடி மாவட்ட காவல்துறை சார்பில் ஐந்து தனிப்படைகள் அமைக்கப்பட்டு விசாரணை நடத்தப்பட்டது. விழுப்புரம் டிஐஜி மற்றும் மாவட்ட காவல் கண்காணிப்பாளர் தலைமையிலும் பல்வேறு கட்ட விசாரணைகள் மேற்கொள்ளப்பட்டன. இருப்பினும், சிறுமி மாயமானதற்கான காரணம் தெரியாததால், தமிழக காவல்துறை டிஜிபி உத்தரவின் பேரில் அக்டோபர் 21-ஆம் தேதி இந்த வழக்கு சிபிசிஐடி விசாரணைக்கு மாற்றப்பட்டது.

இதைத்தொடர்ந்து சிபிசிஐடி போலீசார் ஆலம்பூண்டியில் முகாமிட்டு விசாரணையைத் தொடங்கினர். சிறுமியின் வீட்டிற்குச் சென்று தாய் பவானியிடம் விசாரணை நடத்தியதுடன், அக்கம்பக்கத்தினர் மற்றும் ஏற்கெனவே விசாரணைக்கு உட்படுத்தப்பட்டவர்களிடமும் மீண்டும் தகவல்களைச் சேகரித்தனர்.

பள்ளி ஆசிரியர்கள், உறவினர்களிடம் விசாரணை

சிறுமி படித்த ஆலம்பூண்டி ஊராட்சி ஒன்றிய தொடக்கப்பள்ளிக்குச் சென்ற சிபிசிஐடி அதிகாரிகள், மாணவர்களின் வருகைப் பதிவேட்டை ஆய்வு செய்து ஆசிரியர்களிடம் விசாரணை நடத்தினர். சிறுமியின் பள்ளி நடவடிக்கைகள், நண்பர்கள், பழக்கவழக்கங்கள் உள்ளிட்ட விவரங்களையும் கேட்டறிந்தனர்.

மேலும், சிறுமியின் பாட்டி, உறவினர்கள், சகோதரியின் கல்லூரித் தோழிகள் மற்றும் அவருக்குத் திருமணம் செய்யப் பார்த்த மாப்பிள்ளையின் குடும்பத்தினரிடமும் விசாரணை நடத்தப்பட்டதாக செய்திகள் வெளியாகியுள்ளன.

சிறுமி மாயமான நாளில் வீட்டிற்கு யார் யார் வந்து சென்றனர், பிறந்தநாள் கொண்டாட்டத்தில் பங்கேற்றவர்கள் யார், சிறுமியை கடைசியாகப் பார்த்தவர்கள் யார் என்பது உள்ளிட்ட பல்வேறு தகவல்களை அதிகாரிகள் ஆய்வு செய்து வருகின்றனர்.

செல்போன், சிசிடிவி பதிவுகள் ஆய்வு

இந்த வழக்கில் தொழில்நுட்ப ஆதாரங்களுக்கும் சிபிசிஐடி போலீசார் முக்கியத்துவம் அளித்துள்ளனர். சிறுமி மாயமானதாகக் கூறப்படும் நாளில் அந்தப் பகுதியில் பதிவான கண்காணிப்பு கேமரா காட்சிகள், செல்போன் அழைப்பு விவரங்கள் (CDR), செல்போன் கோபுரத் தரவுகள் உள்ளிட்டவற்றை ஆய்வு செய்து வருகின்றனர்.

மேலும், சிறுமியின் குடும்பத்தினருடன் தொடர்பில் இருந்தவர்கள் மற்றும் சந்தேகத்திற்குரிய நபர்களின் நடமாட்டம் குறித்தும் விசாரணை விரிவுபடுத்தப்பட்டுள்ளது. பெங்களூருவில் வசிக்கும் சில உறவினர்கள் தொடர்பாகவும் விசாரணை மேற்கொள்ளப்பட்டதாக தகவல்கள் வெளியாகியுள்ளன.

20 நாட்களைக் கடந்தும் கிடைக்காத துப்பு - கண்ணீருடன் காத்திருக்கும் தாய்!

சிறுமி மாயமாகி அக்டோபர் 31-ஆம் தேதியுடன் 20 நாட்களைக் கடந்துள்ள நிலையில், இதுவரை ஹேமலதா எங்கு இருக்கிறார் என்பது குறித்த உறுதியான தகவல் வெளியாகவில்லை. சிபிசிஐடி போலீசார் பல்வேறு கோணங்களில் விசாரணையைத் தொடர்ந்து வருகின்றனர்.

மறுபுறம், தனது மகள் எப்படியாவது உயிருடன் வீடு திரும்பிவிடுவாள் என்ற நம்பிக்கையில் தாய் பவானி தினமும் கோவிலுக்குச் சென்று வழிபட்டு வருகிறார். மகளைப் பிரிந்து தவிக்கும் அவரது நிலை அப்பகுதி மக்களிடையே பெரும் சோகத்தை ஏற்படுத்தியுள்ளது. சிறுமி உயிருடன் இருப்பார் என்ற நம்பிக்கையுடன் பெற்றோர் காத்திருக்கின்றனர்.
பார்த்ததும் கிராமமே பெரும் சோகத்தில்..

பல கோணங்களில் விசாரணை... எப்போது கிடைக்கும் விடை?

சிறுமி தானாகவே வீட்டை விட்டு வெளியே சென்றாரா? யாரேனும் அவரைக் கடத்திச் சென்றார்களா? அல்லது குடும்பத்தினருக்கும் தெரிந்த நபர்கள் யாருக்காவது இந்தச் சம்பவத்தில் தொடர்பு உள்ளதா? எனப் பல்வேறு கோணங்களில் விசாரணை நடைபெற்று வருகிறது.

இருப்பினும், இந்தக் கோணங்களில் எதிலும் இதுவரை உறுதியான ஆதாரம் கிடைத்ததாக அதிகாரப்பூர்வமாக அறிவிக்கப்படவில்லை. விசாரணை தொடர்பான பல்வேறு தகவல்கள் வெளியாகி வந்தாலும், அவற்றில் எதுவும் சிறுமி இருக்கும் இடத்தை உறுதிப்படுத்தவில்லை.

சிறுமி மாயமான வழக்கில் ஏற்கெனவே மாவட்ட காவல்துறை மேற்கொண்ட தேடுதல் பணியும், தற்போது சிபிசிஐடி மேற்கொண்டு வரும் விசாரணையும் நீடித்து வரும் நிலையில், 7 வயது சிறுமி ஹேமலதா எங்கே இருக்கிறார் என்ற கேள்விக்கு இன்னும் விடை கிடைக்கவில்லை.

20 நாட்களைக் கடந்தும் துப்பு கிடைக்காமல் நீடிக்கும் இந்த மர்மத்திற்கு சிபிசிஐடி போலீசார் எப்போது முற்றுப்புள்ளி வைப்பார்கள்? தங்களது மகளை மீண்டும் காணும் நாள் எப்போது வரும்? என்ற ஏக்கத்துடன் பெற்றோரும், சிறுமி விரைவில் மீட்கப்பட வேண்டும் என்ற எதிர்பார்ப்புடன் கிராம மக்களும் காத்திருக்கின்றனர்.

Villuppuram Power Cut: விழுப்புரத்தில் இன்று மின்தடை... எந்தெந்த பகுதிகள் தெரியுமா?... இதோ லிஸ்ட்!

சிவரஞ்சித் — Sat, 31 Oct 2026 08:32:57 +0530

விழுப்புரம்: விழுப்புரம் மாவட்டத்தில் மின் பராமரிப்புப் பணிகள் நடைபெற உள்ளதால், இன்று (அக்டோபர் 31, 2026) காலை 10 மணி முதல் மதியம் 2 மணி வரை பல்வேறு பகுதிகளில் மின் விநியோகம் நிறுத்தப்பட உள்ளதாக மின்வாரியம் அறிவித்துள்ளது.

விழுப்புரம் மாவட்டத்தில் உள்ள மாம்பழப்பட்டு, ஜானகிபுரம் மற்றும் விழுப்புரம் தொழிற்சாலை ஆகிய மூன்று மின்னூட்டிகளில் (பீடர்கள்) பராமரிப்புப் பணிகள் மேற்கொள்ளப்பட உள்ளன. இதன் காரணமாக, இந்த மின்னூட்டிகளின் கீழ் வரும் பகுதிகளில் நான்கு மணி நேரம் மின்சாரம் இருக்காது.

மின்தடை ஏற்படும் பகுதிகள்

தெளி, சிறுவாக்கூர், கல்பட்டு, நத்தமேடு, ஒட்டன்காடுவெட்டி, வி.ஆர். பாளையம், நன்னாடு, விராட்டிக்குப்பம், ஆலத்தூர், இந்திரா நகர், தோகைப்பாடி, திருப்பச்சாவடிமேடு, கொண்டங்கி, சத்திப்பட்டு, வெண்மணியாத்தூர், கப்பூர், கண்டம்பாக்கம், ஸ்டாலின் நகர், கொட்டப்பாக்கத்துவேலி, திருச்சி மெயின் ரோடு, எல்லீஸ்சத்திரம் ரோடு, கலைஞர் கருணாநிதி நகர், சுதாகர் நகர், வள்ளலார் நகர், வழுதரெட்டி, பாண்டியன் நகர், கட்டபொம்மன் நகர், பாலாஜி நகர், ஜானகிபுரம், அரசு ஊழியர் நகர் மற்றும் டி.எஸ்.ஆர். நகர் ஆகிய பகுதிகளில் மின் விநியோகம் நிறுத்தப்படும்.

விழுப்புரம் நகரின் முக்கியப் பகுதிகளிலும் மின்தடை

மேலும், ஜானகிபுரம், தொழிற்பேட்டை, ராஜேஸ்வரி நகர், நாராயணன் நகர், தனலட்சுமி நகர், பெரியார் நகர், அஷ்ரப் நகர், கீழ்பெரும்பாக்கம் ஹவுசிங் போர்டு, கிழக்கு பாண்டி ரோடு, மகாராஜபுரம் இ.பி. காலனி, காகுப்பம் ரோடு, காலேஜ் ரோடு, எம்.டி.ஜி. நகர், பவர் ஆபீஸ் ரோடு, சண்முகாபுரம் காலனி, கீழ்பெரும்பாக்கம் பஜனை கோவில், இந்திரா நகர், ஏ.டி.எஸ். காலனி மற்றும் திருக்குறிப்புத் தொண்டர் தெரு உள்ளிட்ட பகுதிகளிலும் மின்சார விநியோகம் நிறுத்தப்படும் என அறிவிக்கப்பட்டுள்ளது.

பொதுமக்களுக்கு மின்வாரியம் அறிவுறுத்தல்

பராமரிப்புப் பணிகள் காரணமாக காலை 10 மணி முதல் மதியம் 2 மணி வரை மின்சாரம் இருக்காது என்பதால், பொதுமக்கள் தங்களுக்குத் தேவையான குடிநீர், மின்சாதனப் பயன்பாடு உள்ளிட்ட அத்தியாவசிய வசதிகளை முன்கூட்டியே திட்டமிட்டு வைத்துக்கொள்ளுமாறு மின்வாரியம் கேட்டுக்கொண்டுள்ளது. பராமரிப்புப் பணிகள் முடிவடைந்ததும் மின் விநியோகம் மீண்டும் தொடங்கப்படும் என எதிர்பார்க்கப்படுகிறது.

பொதுமக்களுக்கு அறிவுறுத்தல்

மின்தடை காரணமாக பொதுமக்களின் அன்றாட பணிகள் பாதிக்கப்பட வாய்ப்புள்ளதால், தேவையான மின்சாரப் பயன்பாடுகளுக்கு முன்கூட்டியே மாற்று ஏற்பாடுகளை செய்து கொள்ளுமாறு மின்வாரியம் அறிவுறுத்தியுள்ளது.

மேலும், மின் பராமரிப்பு பணிகளில் ஈடுபடும் மின்வாரிய ஊழியர்களுக்கு பொதுமக்கள் ஒத்துழைப்பு வழங்க வேண்டும் என்றும், பணிகளை மேற்கொள்ளும் ஊழியர்களுக்கு இடையூறு ஏற்படுத்தாமல் இருக்க வேண்டும் என்றும் விழுப்புரம் மாவட்ட மின்வாரியம் கேட்டுக்கொண்டுள்ளது.

நாளை காலை 9 மணி முதல் மாலை 4 மணி வரை மின்தடை என்பதால், மேற்கண்ட பகுதிகளைச் சேர்ந்த பொதுமக்கள் தேவையான முன்னெச்சரிக்கை நடவடிக்கைகளை மேற்கொள்ளுமாறு அறிவுறுத்தப்பட்டுள்ளனர்.

புதுச்சேரி அரசு மருத்துவக் கல்லூரியில் MBBS இடங்கள் 200 ஆக உயர்வு! மாணவர்களுக்கு முதல்வர் ரங்கசாமி குட் நியூஸ்!

சிவரஞ்சித் — Sat, 31 Oct 2026 08:23:08 +0530

புதுச்சேரி: புதுச்சேரி மாநிலத்தில் மருத்துவம் படிக்க விரும்பும் மாணவர்களுக்கு மகிழ்ச்சியளிக்கும் முக்கிய அறிவிப்பை முதலமைச்சர் என். ரங்கசாமி வெளியிட்டுள்ளார். புதுச்சேரி கதிர்காமத்தில் இயங்கி வரும் இந்திரா காந்தி அரசு மருத்துவக் கல்லூரி மற்றும் ஆராய்ச்சி நிறுவனத்தில் (IGMC&RI) தற்போது 180 ஆக உள்ள எம்பிபிஎஸ் (MBBS) இடங்களின் எண்ணிக்கை 200 ஆக உயர்த்தப்பட உள்ளது. இதன் மூலம் கூடுதலாக 20 மருத்துவப் படிப்பு இடங்கள் கிடைக்க உள்ளன. இந்தப் புதிய இடங்களுக்கான மாணவர் சேர்க்கை அடுத்த கல்வியாண்டு முதல் அமலுக்கு வரும் என்றும் முதல்வர் தெரிவித்துள்ளார்.

புதுச்சேரி மாணவர்களின் நீண்ட நாள் கோரிக்கை!

புதுச்சேரி மாநிலத்தில் மருத்துவக் கல்வி பயில விரும்பும் மாணவர்களின் எண்ணிக்கை ஆண்டுதோறும் அதிகரித்து வருகிறது. குறிப்பாக அரசு மருத்துவக் கல்லூரிகளில் குறைந்த கட்டணத்தில் மருத்துவம் படிக்க வேண்டும் என்பது ஏழை மற்றும் நடுத்தரக் குடும்பங்களைச் சேர்ந்த மாணவர்களின் முக்கிய எதிர்பார்ப்பாக இருந்து வருகிறது.

இந்த நிலையில், புதுச்சேரி கதிர்காமத்தில் செயல்பட்டு வரும் இந்திரா காந்தி அரசு மருத்துவக் கல்லூரி மற்றும் ஆராய்ச்சி நிறுவனத்தில் எம்பிபிஎஸ் இடங்களின் எண்ணிக்கையை அதிகரிக்க வேண்டும் என்று மாணவர்கள், பெற்றோர்கள் மற்றும் பல்வேறு தரப்பினர் நீண்ட காலமாகக் கோரிக்கை விடுத்து வந்தனர்.

தற்போது இக்கல்லூரியில் ஆண்டுக்கு 180 மாணவர்கள் எம்பிபிஎஸ் மருத்துவப் படிப்பில் சேர்ந்து வருகின்றனர். இந்த எண்ணிக்கையை 200 ஆக உயர்த்த வேண்டும் என்ற கோரிக்கை இருந்து வந்த நிலையில், முதல்வர் ரங்கசாமி தற்போது அதற்கான அறிவிப்பை வெளியிட்டுள்ளார்.

180 இடங்களில் இருந்து 200 ஆக உயர்வு!

புதுச்சேரி முதலமைச்சர் என். ரங்கசாமி செய்தியாளர்களைச் சந்தித்தபோது, அரசு மருத்துவக் கல்லூரியின் எம்பிபிஎஸ் இடங்கள் அதிகரிக்கப்படுவது தொடர்பான முக்கிய அறிவிப்பை வெளியிட்டார்.

அதன்படி, தற்போது 180 இடங்களைக் கொண்டுள்ள இந்திரா காந்தி அரசு மருத்துவக் கல்லூரியில் கூடுதலாக 20 இடங்கள் அதிகரிக்கப்பட்டு, மொத்த இடங்களின் எண்ணிக்கை 200 ஆக உயர்த்தப்பட உள்ளது.

இந்தக் கூடுதல் இடங்களுக்கான மாணவர் சேர்க்கை அடுத்த கல்வியாண்டு முதல் நடைமுறைக்கு வரும் என்றும் அவர் தெரிவித்துள்ளார்.
MBBS இடங்கள் – புதிய அறிவிப்பு

தற்போதைய இடங்கள் : 180
புதிய மொத்த இடங்கள் : 200
கூடுதலாக அதிகரிப்பு : 20
சேர்க்கை தொடங்கும் காலம் - அடுத்த கல்வியாண்டு

ஏழை, எளிய மாணவர்களுக்கு கூடுதல் வாய்ப்பு!

அரசு மருத்துவக் கல்லூரியில் மருத்துவப் படிப்பு இடங்கள் அதிகரிக்கப்படுவது ஏழை மற்றும் நடுத்தரக் குடும்பங்களைச் சேர்ந்த மாணவர்களுக்கு கூடுதல் வாய்ப்பை உருவாக்கும்.

தனியார் மருத்துவக் கல்லூரிகளில் எம்பிபிஎஸ் படிப்புக்கான கல்விக் கட்டணம் அதிகமாக இருப்பதால், பொருளாதார வசதி குறைந்த குடும்பங்களைச் சேர்ந்த பல மாணவர்களால் மருத்துவக் கல்வியைத் தொடர முடியாத நிலை உள்ளது.

ஆனால் அரசு மருத்துவக் கல்லூரியில் இடம் கிடைத்தால் ஒப்பீட்டளவில் குறைந்த கல்விக் கட்டணத்தில் மருத்துவப் படிப்பைத் தொடர முடியும். எனவே, கூடுதலாக அறிவிக்கப்பட்டுள்ள 20 இடங்களும் மருத்துவம் படிக்க வேண்டும் என்ற கனவுடன் நீட் தேர்வுக்குத் தயாராகும் மாணவர்களுக்கு முக்கியமான வாய்ப்பாக அமையக்கூடும்.

சென்டாக் மூலம் மாணவர் சேர்க்கை – அதிகரிக்கும் எதிர்பார்ப்பு!

புதுச்சேரியில் அரசு மற்றும் அரசு ஒதுக்கீட்டு மருத்துவ இடங்களுக்கான மாணவர் சேர்க்கை சென்டாக் (CENTAC) மூலம் நடைபெற்று வருகிறது. இந்த நிலையில், அரசு மருத்துவக் கல்லூரியின் இடங்கள் 200 ஆக உயர்த்தப்படும்போது, சேர்க்கை நடைமுறைகளுக்கு ஏற்ப கூடுதல் இடங்கள் ஒதுக்கீடு செய்யப்படும் என எதிர்பார்க்கப்படுகிறது.

இதனால் புதுச்சேரி மாநிலத்தைச் சேர்ந்த மாணவர்களுக்கு மருத்துவக் கல்வி பயில கூடுதல் வாய்ப்பு கிடைக்கும் என்ற நம்பிக்கை ஏற்பட்டுள்ளது.

இருப்பினும், இந்த 20 கூடுதல் இடங்களில் புதுச்சேரி மாணவர்களுக்கான இடஒதுக்கீடு எவ்வாறு இருக்கும், அரசு ஒதுக்கீடு மற்றும் அகில இந்திய ஒதுக்கீட்டுக்கான இடங்கள் எவ்வாறு பிரிக்கப்படும் என்பது தொடர்பான விரிவான விவரங்கள் அதிகாரப்பூர்வ சேர்க்கை அறிவிப்பில் தெரியவரும்.

மருத்துவக் கல்வித் துறையில் புதுச்சேரிக்கு முக்கிய அறிவிப்பு!

புதுச்சேரியில் மருத்துவக் கல்வி மற்றும் சுகாதாரக் கட்டமைப்பை மேம்படுத்துவதற்கான நடவடிக்கைகளில் அரசு மருத்துவக் கல்லூரியின் இடங்களை அதிகரிப்பது முக்கியமானதாகப் பார்க்கப்படுகிறது.

இந்த நிலையில், 180 இடங்களில் இருந்து 200 இடங்களாக உயர்த்தப்படும் என்ற முதல்வர் ரங்கசாமியின் அறிவிப்பு, மருத்துவம் படிக்க விரும்பும் மாணவர்கள் மற்றும் அவர்களது பெற்றோர்களிடையே எதிர்பார்ப்பை ஏற்படுத்தியுள்ளது.

கூடுதல் இடங்களுக்கான மாணவர் சேர்க்கை அடுத்த கல்வியாண்டு முதல் தொடங்கும் நிலையில், நீட் தேர்வுக்குத் தயாராகும் புதுச்சேரி மாணவர்கள் இந்த வாய்ப்பை எதிர்பார்த்துக் காத்திருக்கின்றனர்.

மொத்தத்தில், புதுச்சேரி அரசு மருத்துவக் கல்லூரியில் மேலும் 20 எம்பிபிஎஸ் இடங்கள் அதிகரிக்கப்படுவதன் மூலம் ஆண்டுதோறும் கூடுதல் மாணவர்கள் மருத்துவக் கல்வி பயில வாய்ப்பு உருவாக உள்ளது.

தீபாவளிக்கு மறுநாளும் அரசு விடுமுறை! புதுச்சேரியில் 3 நாட்கள் தொடர் விடுமுறை - ரங்கசாமி அறிவிப்பு!

சிவரஞ்சித் — Sat, 31 Oct 2026 08:13:36 +0530

புதுச்சேரி: தமிழகத்தைத் தொடர்ந்து புதுச்சேரியிலும் தீபாவளிப் பண்டிகைக்கு மறுநாள் அரசு விடுமுறை அறிவிக்கப்பட்டுள்ளது. இதன்படி, வரும் நவம்பர் 9ஆம் தேதி திங்கட்கிழமை புதுச்சேரியில் உள்ள அரசு அலுவலகங்கள், பள்ளிகள் மற்றும் கல்லூரிகளுக்கு விடுமுறை அளித்து முதலமைச்சர் என். ரங்கசாமி உத்தரவிட்டுள்ளார். ஏற்கெனவே சனி, ஞாயிற்றுக்கிழமைகளில் வார விடுமுறை என்பதால், புதுச்சேரி மக்களுக்கு தொடர்ந்து மூன்று நாட்கள் விடுமுறை கிடைக்க உள்ளது.

நவம்பர் 8ஆம் தேதி தீபாவளிப் பண்டிகை!

இந்துக்களின் முக்கியமான பண்டிகைகளில் ஒன்றான தீபாவளித் திருநாள் ஆண்டுதோறும் நாடு முழுவதும் உற்சாகமாகக் கொண்டாடப்பட்டு வருகிறது. இந்தப் பண்டிகையை முன்னிட்டு பொதுமக்கள் புத்தாடைகள் அணிந்து, பட்டாசுகள் வெடித்து, இனிப்புகள் வழங்கி குடும்பத்தினருடன் மகிழ்ச்சியாகக் கொண்டாடுவது வழக்கம்.

குறிப்பாக வெளியூர்களில் வேலை செய்து வரும் தொழிலாளர்கள், அரசு மற்றும் தனியார் நிறுவன ஊழியர்கள், மாணவர்கள் எனப் பலரும் தீபாவளிப் பண்டிகையைக் கொண்டாட தங்களது சொந்த ஊர்களுக்குச் செல்வார்கள். இதனால் தீபாவளி காலகட்டத்தில் பேருந்து, ரயில் உள்ளிட்ட பொதுப் போக்குவரத்துகளில் பயணிகளின் கூட்டம் அதிகரிப்பதுடன், முக்கியச் சாலைகளிலும் போக்குவரத்து நெரிசல் ஏற்படுவது வழக்கம்.

சொந்த ஊர்களுக்குச் செல்லும் மக்களுக்கு கூடுதல் விடுமுறை!

தீபாவளிப் பண்டிகையைக் கொண்டாட சொந்த ஊர்களுக்குச் செல்லும் மக்கள், பண்டிகை முடிந்த உடனேயே அவசரமாகப் பணிக்குத் திரும்ப வேண்டிய நிலையைத் தவிர்க்கும் வகையில் தமிழகத்தில் தீபாவளிக்கு மறுநாள் அரசு விடுமுறை அறிவிக்கப்பட்டுள்ளது.

இதன் மூலம் வெளியூர்களில் இருந்து சொந்த ஊர்களுக்குச் சென்று பண்டிகையைக் கொண்டாடும் மக்கள், கூடுதல் நேரம் குடும்பத்தினருடன் செலவிடுவதற்கும், மீண்டும் பணியிடங்களுக்குத் திரும்புவதற்கும் வாய்ப்பு ஏற்படுகிறது.

புதுச்சேரியிலும் நவம்பர் 9ஆம் தேதி அரசு விடுமுறை!

இந்த நிலையில், தமிழகத்தைத் தொடர்ந்து புதுச்சேரியிலும் தீபாவளிக்கு மறுநாள் அரசு விடுமுறை அறிவிக்கப்பட்டுள்ளது. புதுச்சேரி முதலமைச்சர் என். ரங்கசாமி, வரும் நவம்பர் 9ஆம் தேதி திங்கட்கிழமை அரசு அலுவலகங்கள், பள்ளிகள் மற்றும் கல்லூரிகளுக்கு விடுமுறை அளிக்க உத்தரவிட்டுள்ளார்.

இதனால் புதுச்சேரி அரசு ஊழியர்கள், ஆசிரியர்கள், மாணவர்கள் மற்றும் பெற்றோர்கள் மகிழ்ச்சி அடைந்துள்ளனர். குறிப்பாக வெளியூர்களில் இருந்து புதுச்சேரிக்கு வந்து பணியாற்றுபவர்கள் மற்றும் படித்து வருபவர்கள் தங்களது சொந்த ஊர்களுக்குச் சென்று தீபாவளியைக் கொண்டாட கூடுதல் அவகாசம் கிடைத்துள்ளது.

புதுச்சேரி மக்களுக்கு 3 நாட்கள் தொடர் விடுமுறை!

இந்த ஆண்டு தீபாவளிப் பண்டிகை நவம்பர் 8ஆம் தேதி ஞாயிற்றுக்கிழமை கொண்டாடப்பட உள்ள நிலையில், அதற்கு முந்தைய நவம்பர் 7ஆம் தேதி சனிக்கிழமை வார விடுமுறையாகவும், நவம்பர் 9ஆம் தேதி திங்கட்கிழமை அரசு விடுமுறையாகவும் அமைந்துள்ளது. இதனால் புதுச்சேரி மக்களுக்கு நவம்பர் 7, 8, 9 ஆகிய மூன்று நாட்களும் தொடர்ந்து விடுமுறை கிடைக்கிறது. இந்தத் தொடர் விடுமுறையைப் பயன்படுத்தி பலரும் தங்களது சொந்த ஊர்களுக்குச் செல்லவும், குடும்பத்தினருடன் சுற்றுலா செல்லவும் திட்டமிடுவார்கள் என எதிர்பார்க்கப்படுகிறது.

ஏற்கெனவே ரூ.700 மதிப்பிலான தீபாவளி மளிகைத் தொகுப்பு அறிவிப்பு!

இதற்கிடையே, தீபாவளிப் பண்டிகையை முன்னிட்டு புதுச்சேரியில் குடும்ப அட்டைதாரர்களுக்கு ரூ.700 மதிப்பிலான மளிகைப் பொருட்கள் அடங்கிய சிறப்புத் தொகுப்பு வழங்கப்படும் என்று முதலமைச்சர் ரங்கசாமி ஏற்கெனவே அறிவித்துள்ளார்.

தீபாவளிப் பண்டிகையை முன்னிட்டு குடும்ப அட்டைதாரர்களுக்கு மளிகைப் பொருட்கள் வழங்கும் அறிவிப்புடன், தற்போது கூடுதல் விடுமுறையும் அறிவிக்கப்பட்டுள்ளதால் புதுச்சேரி மக்களுக்கு ஒரே நேரத்தில் இரண்டு முக்கிய அறிவிப்புகள் வெளியாகியுள்ளன.

சுற்றுலாப் பயணிகளின் வருகையும் அதிகரிக்க வாய்ப்பு!

புதுச்சேரி ஒரு முக்கியமான சுற்றுலாத் தலமாக விளங்குவதால், தொடர் விடுமுறைக் காலங்களில் வெளிமாநிலங்கள் மற்றும் தமிழகத்தின் பல்வேறு மாவட்டங்களில் இருந்து ஏராளமான சுற்றுலாப் பயணிகள் வருவது வழக்கம். கடற்கரை, ஒயிட் டவுன், பாரதி பூங்கா, அரவிந்தர் ஆசிரமம் உள்ளிட்ட சுற்றுலாத் தலங்களைப் பார்வையிடவும், குடும்பத்தினருடன் பொழுதைக் கழிக்கவும் பலர் புதுச்சேரிக்கு வருவார்கள்.

இந்த நிலையில், தீபாவளி தொடர் விடுமுறையை முன்னிட்டு புதுச்சேரிக்கு சுற்றுலாப் பயணிகளின் வருகை அதிகரிக்க வாய்ப்புள்ளதாக எதிர்பார்க்கப்படுகிறது. மொத்தத்தில், தீபாவளிக்கு ரூ.700 மதிப்பிலான மளிகைப் பொருட்கள் தொகுப்பு, கூடுதலாக ஒரு நாள் அரசு விடுமுறை என புதுச்சேரி மக்களுக்கு பண்டிகைக் காலத்தில் அடுத்தடுத்து அறிவிப்புகள் வெளியாகியுள்ளன.

புதுச்சேரி இளைஞர்களுக்கு குட் நியூஸ்! இன்னும் சில ஆண்டுகளில் 2,000 அரசு வேலை - ரங்கசாமி உறுதி!

சிவரஞ்சித் — Sat, 31 Oct 2026 07:59:39 +0530

புதுச்சேரி: புதுச்சேரியில் இன்னும் ஒரு சில ஆண்டுகளில் 2,000 பேருக்கு நிச்சயம் அரசு வேலை வழங்கப்படும் என்றும், அரசு பணியிடங்கள் எவ்வித முறைகேடுகளுக்கும் இடமின்றி வெளிப்படைத்தன்மையுடன் நிரப்பப்பட்டு வருவதாகவும் முதல்வர் ரங்கசாமி தெரிவித்துள்ளார். ஏற்கனவே தேசிய ஜனநாயகக் கூட்டணி ஆட்சியில் சுமார் 5,000 படித்த இளைஞர்களுக்கு பல்வேறு அரசுத் துறைகளில் வேலைவாய்ப்பு வழங்கப்பட்டுள்ளதாகவும் அவர் பெருமிதத்துடன் குறிப்பிட்டார்.

115 பேருக்கு இளநிலை எழுத்தர் பணி நியமன ஆணை!

புதுச்சேரி கருவடிக்குப்பத்தில் உள்ள காமராஜர் மணிமண்டபத்தில், பணியாளர் மற்றும் நிர்வாக சீர்திருத்தத் துறையின் சார்பில் புதிதாகத் தேர்வு செய்யப்பட்ட 115 இளநிலை எழுத்தர்களுக்கு பணி நியமன ஆணைகள் வழங்கும் விழா நடைபெற்றது.

இந்த விழாவில் புதுச்சேரி முதல்வர் என். ரங்கசாமி கலந்து கொண்டு, தேர்வு செய்யப்பட்ட இளைஞர்களுக்கு பணி நியமன ஆணைகளை வழங்கினார். அப்போது அமைச்சர்கள், அரசு உயர் அதிகாரிகள் மற்றும் புதிதாகப் பணியில் சேர உள்ளவர்கள் உள்ளிட்டோர் கலந்து கொண்டனர்.

விழாவில் பேசிய முதல்வர் ரங்கசாமி, அரசு வேலைவாய்ப்பின் முக்கியத்துவம், இளைஞர்களின் எதிர்காலம் மற்றும் அரசு நிர்வாகத்தில் புதிய பணியாளர்களின் பங்களிப்பு குறித்து விரிவாக எடுத்துரைத்தார்.

படித்த இளைஞர்களுக்கு அரசு வேலை என்பது மிகப்பெரிய மகிழ்ச்சி!

தொடர்ந்து பேசிய முதல்வர் ரங்கசாமி, “இன்றைய காலகட்டத்தில் பி.டெக்., எம்.டெக். போன்ற உயர்கல்வி படித்தவர்கள் கூட நான்காம் நிலை அரசு வேலை கிடைக்காதா என்று ஏங்கும் சூழ்நிலை உள்ளது. அந்த அளவிற்கு வேலைவாய்ப்பின் தேவை அதிகரித்துள்ளது.

அதேபோல், இளநிலை எழுத்தர் (LDC), மேல்நிலை எழுத்தர் (UDC) போன்ற பணிகளுக்குத் தேர்வு செய்யப்பட்டு அரசு வேலைக்குச் செல்லும்போது, சம்பந்தப்பட்ட இளைஞர்களுக்கு மிகுந்த மகிழ்ச்சி ஏற்படுகிறது. ஏனென்றால் தற்போதைய காலகட்டத்தில் வேலைவாய்ப்பு என்பது இளைஞர்களுக்கு மிகவும் அவசியமான ஒன்றாக உள்ளது.

இளைஞர்களுக்கு நல்ல கல்வி பெறுவதற்கான வாய்ப்புகள் இருக்கின்றன. அதே நேரத்தில் அவர்களுக்கு உரிய வேலைவாய்ப்புகளை உருவாக்கிக் கொடுக்க வேண்டிய பொறுப்பும் அரசுக்கு உள்ளது. இதனைக் கருத்தில் கொண்டுதான் அரசு பல்வேறு துறைகளில் காலியாக உள்ள பணியிடங்களை நிரப்பி வருகிறது” என்றார்.

அரசு நிர்வாகத்தின் அடிப்படை பணியில் இளநிலை எழுத்தர்களின் பங்கு முக்கியம்!

மேலும், புதிதாகப் பணியில் சேரும் இளநிலை எழுத்தர்களுக்கு அறிவுரை வழங்கிய முதல்வர், அரசு நிர்வாகத்தில் அவர்களுடைய பொறுப்புகள் மிகவும் முக்கியமானவை என்று தெரிவித்தார். அரசின் பல்வேறு திட்டங்கள் மற்றும் நிர்வாகப் பணிகளுக்கான கோப்புகள் ஆரம்ப நிலையில் இளநிலை எழுத்தர்களின் கைகளில்தான் செல்கின்றன. எனவே, ஒவ்வொரு கோப்பையும் கவனமாகக் கையாள வேண்டும்.

மக்களுக்காகப் பணியாற்றுகிறோம் என்ற எண்ணத்துடன் தங்களது கடமைகளைச் செய்ய வேண்டும். அரசு நிர்வாகத்தில் பல்வேறு விதிமுறைகள் உள்ளன. அவற்றை முழுமையாகத் தெரிந்து கொண்டு, உரிய நடைமுறைகளைப் பின்பற்றி கோப்புகளைத் தயார் செய்து அனுப்ப வேண்டும். புதிதாகப் பணியில் சேர்ந்துள்ள அனைவரும் தங்களது பணியின் முக்கியத்துவத்தை உணர்ந்து, பொறுப்புடனும் நேர்மையுடனும் செயல்பட வேண்டும் என்று அறிவுறுத்தினார்.

ஏற்கனவே 5,000 இளைஞர்களுக்கு அரசு வேலை!

தொடர்ந்து அரசு வேலைவாய்ப்பு குறித்து பேசிய முதல்வர் ரங்கசாமி, “கடந்த முறையும் தற்போதும் தேசிய ஜனநாயகக் கூட்டணி அரசுதான் ஆட்சியில் உள்ளது. ஆட்சிப் பொறுப்பேற்றபோது அரசு காலிப் பணியிடங்கள் நிரப்பப்படும் என்று நாங்கள் உறுதியளித்திருந்தோம்.

அதன்படி, இதுவரை சுமார் 5,000 படித்த இளைஞர்களுக்கு பல்வேறு அரசுத் துறைகளில் பணியிடங்கள் வழங்கப்பட்டுள்ளன. குறிப்பாக சுகாதாரத் துறையில் செவிலியர் அதிகாரிகள் உள்ளிட்ட பணியிடங்களும், காவல்துறையில் காலியாக உள்ள பணியிடங்களும் நிரப்பப்பட்டு வருகின்றன. மேலும், பல்வேறு துறைகளிலும் காலியாக உள்ள பணியிடங்களை நிரப்புவதற்கான நடவடிக்கைகள் தொடர்ந்து மேற்கொள்ளப்பட்டு வருகின்றன” என்று தெரிவித்தார்.

இன்னும் சில ஆண்டுகளில் 2,000 பேருக்கு அரசு வேலை!

புதுச்சேரியில் அரசு வேலைக்காகக் காத்திருக்கும் இளைஞர்களுக்கு நம்பிக்கை அளிக்கும் வகையில் முக்கிய அறிவிப்பையும் முதல்வர் வெளியிட்டார். அவர் பேசுகையில், “இன்னும் ஒரு சில ஆண்டுகளில் 2,000 பேருக்கு நிச்சயமாக அரசு பணியிடங்கள் வழங்கப்படும். அரசு வேலைவாய்ப்புகளை நிரப்புவதில் எந்தவிதமான முறைகேடுகளும் நடைபெறாமல் பார்த்துக் கொள்ளப்படுகிறது.

தகுதியானவர்கள் தேர்வு செய்யப்பட்டு அவர்களுக்கு வேலைவாய்ப்பு வழங்கப்படுகிறது. யாருக்கும் சிறிய அளவில்கூட சந்தேகம் வந்துவிடக்கூடாது என்ற நோக்கத்தில், தேர்வு முடிவுகள் வெளியான பிறகு ஓரிரு நாட்களிலேயே பணி நியமன ஆணைகள் வழங்கப்படுகின்றன. நன்றாகப் படித்து தேர்வு எழுதினால் அரசு வேலை கிடைக்கும் என்ற நம்பிக்கை தற்போது இளைஞர்கள் மத்தியில் ஏற்பட்டுள்ளது” என்று தெரிவித்தார்.

அரசு வேலைக்காகக் காத்திருக்கும் இளைஞர்களுக்கு நம்பிக்கை!

புதுச்சேரியில் பல்வேறு அரசுத் துறைகளில் காலியாக உள்ள பணியிடங்களை நிரப்ப வேண்டும் என்பது படித்த இளைஞர்களின் நீண்டகால எதிர்பார்ப்பாக இருந்து வருகிறது. இந்த நிலையில், ஏற்கனவே 5,000 பேருக்கு வேலைவாய்ப்பு வழங்கப்பட்டுள்ளதாகவும், அடுத்த சில ஆண்டுகளில் மேலும் 2,000 பேருக்கு அரசு வேலை வழங்கப்படும் என்றும் முதல்வர் ரங்கசாமி தெரிவித்திருப்பது அரசு வேலைக்காகத் தயாராகி வரும் இளைஞர்களிடையே எதிர்பார்ப்பை ஏற்படுத்தியுள்ளது. குறிப்பாக, 115 இளநிலை எழுத்தர்களுக்கு பணி நியமன ஆணைகள் வழங்கப்பட்டுள்ள நிலையில், அடுத்தகட்டமாக எந்தெந்தத் துறைகளில் எத்தனை பணியிடங்கள் நிரப்பப்பட உள்ளன என்ற எதிர்பார்ப்பும் எழுந்துள்ளது.