trichy

ஷாக் நியூஸ்: நவம்பரில் இந்த ரயில்கள் எல்லாம் ரத்தா? முழு விவர ரயில் பட்டியல் இதோ!

எஸ்.ஜெகநாதன், மயிலாடுதுறை — Sun, 1 Nov 2026 11:59:01 +0530

திருச்சி: தெற்கு ரயில்வேயின் திருச்சிராப்பள்ளி மற்றும் மதுரை கோட்டங்களுக்கு உட்பட்ட பல்வேறு பிரிவுகளில் பராமரிப்பு மற்றும் பொறியியல் பணிகள் தீவிரமாக நடைபெற்று வருவதால், பயணிகளின் பாதுகாப்பு மற்றும் வசதியை கருத்தில் கொண்டு ரயில் தேதிகளில் பல்வேறு மாற்றங்கள் செய்யப்பட்டுள்ளன.

இந்த பொறியியல் பணிகள் காரணமாக நவம்பர் மாதத்தில் குறிப்பிட்ட சில நாட்களில் சில ரயில்கள் முழுமையடையாமல் இயக்கப்படுவதும், சில ரயில்களின் வழித்தடங்கள் மாற்றப்படுவதும், மற்றும் சில ரயில்கள் கால தாமதமாக இயக்கப்பட உள்ளது. இது தொடர்பான விரிவான விவரங்களை தெற்கு ரயில்வேயின் திருச்சிராப்பள்ளி கோட்ட மக்கள் தொடர்பு அலுவலர் என். ஜெயந்த் வெளியிட்டுள்ள செய்திக்குறிப்பில் தெரிவித்துள்ளார்.

திருச்சிராப்பள்ளி கோட்டத்தில் பகுதியாக ரத்து மற்றும் தொடக்க மாற்றம்

திருச்சிராப்பள்ளி கோட்டத்திற்கு உட்பட்ட பல்வேறு பிரிவுகளில் நடைபெறும் பொறியியல் பணிகள் காரணமாக பல முக்கிய ரயில்களின் இயக்கத்தில் மாற்றம் கொண்டு வரப்பட்டுள்ளது. அதன்படி, திருச்சிராப்பள்ளியிலிருந்து காலை 08.40 மணிக்கு காரைக்கால் செல்லும் டெமு ரயில் (வண்டி எண்: 76820) நவம்பர் 1, 2, 4, 5, 6, 7, 8 மற்றும் 9 ஆகிய தேதிகளில் திருவாரூர் நிலையத்துடன் நிறுத்தப்படும். இந்த ரயில்கள் திருச்சிராப்பள்ளியிலிருந்து திருவாரூர் வரை மட்டுமே இயக்கப்படும் என்றும், திருவாரூரிலிருந்து காரைக்கால் வரை பகுதியாக ரத்து செய்யப்பட்டுள்ளதாகவும் தெரிவிக்கப்பட்டுள்ளது.

இதேபோல், தாம்பரத்திலிருந்து காலை 09.45 மணிக்கு விழுப்புரம் செல்லும் மெமு பயணிகள் ரயில் (வண்டி எண்: 66045) நவம்பர் 2, 4 மற்றும் 7 ஆகிய தேதிகளில் முண்டியம்பாக்கம் வரை மட்டுமே இயக்கப்படும் என்றும், அங்கிருந்து தாம்பரம் திரும்பும் என்றும் அறிவிக்கப்பட்டுள்ளது. மறுமார்க்கமாக இயக்கப்படும் சில ரயில்களின் தொடக்க இடங்களிலும் மாற்றங்கள் செய்யப்பட்டுள்ளன.

காரைக்காலிலிருந்து பிற்பகல் 14.55 மணிக்கு திருச்சிராப்பள்ளி புறப்படும் டெமு ரயில் (வண்டி எண்: 76819) நவம்பர் 1, 2, 4, 5, 6, 7, 8 மற்றும் 9 ஆகிய தேதிகளில் காரைக்கால் மற்றும் திருவாரூர் இடையே பகுதியாக ரத்து செய்யப்படுகிறது. இந்த ரயில் தனது பயணத்தை திருவாரூர் நிலையத்திலிருந்து வழக்கமான நேரமான பிற்பகல் 16.15 மணிக்குத் தொடங்கும்.

மேலும், விழுப்புரத்திலிருந்து சென்னை கடற்கரை செல்லும் மெமு ரயில் (வண்டி எண்: 66046) மற்றும் விழுப்புரம் - மயிலாடுதுறை மெமு ரயில் (வண்டி எண்: 66019) ஆகியவையும் குறிப்பிட்ட தேதிகளில் முண்டியம்பாக்கம் மற்றும் சேர்தனூர் போன்ற மாற்றுத் தொடக்க நிலையங்களிலிருந்து இயக்கப்படும் என ரயில்வே நிர்வாகம் அறிவித்துள்ளது.

ரயில் ஒழுங்குபடுத்துதல் மற்றும் புறப்படும் நேரம் மாற்றம்

பராமரிப்பு பணிகள் நடைபெறும் பாதைகளில் பாதுகாப்பான ரயில் போக்குவரத்தை உறுதி செய்யும் நோக்கில் சில விரைவு மற்றும் எக்ஸ்பிரஸ் ரயில்கள் வழியில் குறிப்பிட்ட நிமிடங்கள் வரை ஒழுங்குபடுத்தப்பட்டு (நிறுத்தி வைக்கப்பட்டு) இயக்கப்பட உள்ளன. இதன் அடிப்படையில், பெரோஸ்பூர் கன்ட் - ராமேஸ்வரம் சூப்பர்பாஸ்ட் ஹம்சஃபர் எக்ஸ்பிரஸ் (வண்டி எண்: 20498) மற்றும் ஜோத்பூர் - மன்னார்குடி எக்ஸ்பிரஸ் (வண்டி எண்: 22673) ஆகிய ரயில்கள் வழியில் உள்ள பாதுகாப்பான இடங்களில் முறையே 120 நிமிடங்கள் வரை ஒழுங்குபடுத்தப்படும்.

மேலும், திருச்சிராப்பள்ளி - மயிலாடுதுறை மெமு எக்ஸ்பிரஸ் (வண்டி எண்: 16834), புதுச்சேரி - ஹவுரா சூப்பர்பாஸ்ட் எக்ஸ்பிரஸ் (வண்டி எண்: 12868), மற்றும் சார்லப்பள்ளி - திருச்சிராப்பள்ளி எக்ஸ்பிரஸ் (வண்டி எண்: 17077) உள்ளிட்ட ரயில்களும் குறிப்பிட்ட கால அவகாசத்திற்கு வழியில் நிறுத்தி இயக்கப்படும் எனத் தெரிவிக்கப்பட்டுள்ளது.

இது தவிர, சில முக்கிய ரயில்களின் புறப்படும் நேரத்திலும் மாற்றம் செய்யப்பட்டுள்ளது. சென்னை எழும்பூரிலிருந்து குருவாயூர் செல்லும் எக்ஸ்பிரஸ் ரயில் (வண்டி எண்: 16127) நவம்பர் 2, 4 மற்றும் 7 ஆகிய தேதிகளில் சென்னை எழும்பூரிலிருந்து புறப்படுவதற்குப் பதிலாக, தாம்பரத்திலிருந்து 60 நிமிடங்கள் தாமதமாக அதாவது பிற்பகல் 12.10 மணிக்கு இயக்கப்படும்.

அதேபோல், புதுச்சேரியில் இருந்து இயக்கப்படும் காகிநாடா போர்ட் சர்க்கார் எக்ஸ்பிரஸ் (வண்டி எண்: 17656) மற்றும் திருச்சிராப்பள்ளியில் இருந்து சென்னை எழும்பூர் செல்லும் சோழன் சூப்பர்பாஸ்ட் எக்ஸ்பிரஸ் (வண்டி எண்: 22676) ஆகிய ரயல்களும் குறிப்பிட்ட தேதிகளில் மாற்றப்பட்ட நேரத்தில்கூட இயக்கப்படும் என அறிவிக்கப்பட்டுள்ளது.

மதுரை கோட்டம்: கள்ளிக்குடி - திருமங்கலம் இடையே வழித்தட மாற்றம்

மதுரை கோட்டத்திற்கு உட்பட்ட கள்ளிக்குடி மற்றும் திருமங்கலம் இடையே இன்ஜினியரிங் பணிகள் தீவிரமாக நடைபெற்று வருவதன் காரணமாக, சில விரைவு ரயில்களின் வழித்தடங்கள் முற்றிலுமாக மாற்றியமைக்கப்பட்டு இயக்கப்படுகின்றன.

குருவாயூரிலிருந்து இரவு 23.15 மணிக்குப் புறப்பட்டு சென்னை எழும்பூர் செல்லும் எக்ஸ்பிரஸ் ரயில் (வண்டி எண்: 16128) நவம்பர் 1 மற்றும் 3 ஆகிய தேதிகளில் விருதுநகர், மானாமதுரை, காரைக்குடி மற்றும் திருச்சிராப்பள்ளி வழியாக மாற்றுப் பாதையில் இயக்கப்படும். இந்த மாற்றப்பட்ட வழித்தடத்தின் காரணமாக இவ்வண்டி மதுரை, சோழவந்தான், கொடைக்கானல் ரோடு, திண்டுக்கல் மற்றும் மணப்பாறை ஆகிய ரயில் நிலையங்களுக்குச் செல்லாது. மாறாக, அருப்புக்கோட்டை, மானாமதுரை, சிவகங்கை, காரைக்குடி மற்றும் புதுக்கோட்டை ஆகிய நிலையங்களில் இந்த ரயிலுக்கு கூடுதல் நின்று செல்லும் வசதி (Stoppages) அளிக்கப்படும்.

இதேபோன்று, நாகர்கோவிலில் இருந்து கோயம்புத்தூர் செல்லும் எக்ஸ்பிரஸ் ரயிலும் (வண்டி எண்: 16321) நவம்பர் 2 மற்றும் 4 ஆகிய தேதிகளில் வழக்கமான பாதையை மாற்றி அமைத்து இயக்கப்படுகிறது. இந்த ரயில் விருதுநகர், மானாமதுரை, காரைக்குடி, திருச்சிராப்பள்ளி மற்றும் கரூர் வழியாக இயக்கப்படும். இதனால் திருமங்கலம், திருப்பரங்குன்றம், மதுரை, சோழவந்தான், கொடைக்கானல் ரோடு, அம்பத்துரை, திண்டுக்கல், எரியோடு மற்றும் பாளையம் ஆகிய நிலையங்களில் வழக்கமான நிறுத்தங்கள் தவிர்க்கப்பட்டு, அதற்குப் பதிலாக அருப்புக்கோட்டை, மானாமதுரை, சிவகங்கை, காரைக்குடி, புதுக்கோட்டை மற்றும் திருச்சிராப்பள்ளி ஆகிய நிலையங்களில் கூடுதல் நிறுத்தங்கள் வழங்கப்படும் என தெற்கு ரயில்வே நிர்வாகம் சார்பில் தெரிவிக்கப்பட்டுள்ளது. பயணிகள் இந்த மாற்றங்களைக் கருத்தில் கொண்டு தங்களது பயணங்களைத் திட்டமிடுமாறு அறிவுறுத்தப்பட்டுள்ளனர்.

பயணிகளுக்கு செம ஜாக்பாட்! பயணப் பாதுகாப்பு இனி உறுதி - ஜெர்மன் தொழில்நுட்ப எல்.எச்.பி. புதிய ரயில் பெட்டிகள்..

எஸ்.ஜெகநாதன், மயிலாடுதுறை — Sun, 1 Nov 2026 11:29:18 +0530

திருச்சி: இந்தியாவின் பொதுப் போக்குவரத்தில் மிக முக்கிய பங்கு வகிக்கும் ரயில்வே துறை, பயணிகளின் பாதுகாப்பையும், அவர்களது பயணத்தை மிகவும் வசதியாகவும் மாற்றுவதற்காக பல்வேறு தொடர் நடவடிக்கைகளை எடுத்து வருகிறது. இதன் ஒரு பகுதியாக, தென்னக ரயில்வே நிர்வாகம் திருச்சிராப்பள்ளி கோட்டத்திற்கு உட்பட்ட எக்ஸ்பிரஸ் ரயில்களில் இதுவரை பயன்பாட்டில் இருந்த பழைய வகை மரபுசார் (Conventional) பெட்டிகளை மாற்றிவிட்டு, நவீன தொழில்நுட்பத்துடன் கூடிய அதிநவீன எல்.எச்.பி. (Linke-Hofmann-Busch - LHB) பெட்டிகளை இணைக்கவுள்ளதாக அதிகாரப்பூர்வமாக அறிவித்துள்ளது. இந்த மாற்றமானது பயணிகளின் நீண்ட நாள் கோரிக்கையை நிறைவேற்றுவதோடு, விபத்து காலங்களில் உயிரிழப்புகளைத் தவிர்க்கும் வகையில் மேம்பட்ட பாதுகாப்பு அம்சங்களைக் கொண்டுள்ளது என்பது குறிப்பிடத்தக்கது.

பயணிகளின் பாதுகாப்பும் வசதியும் முதன்மை நோக்கம்

ரயில் பயணத்தின் போது பயணிகளுக்குத் தடையற்ற பாதுகாப்பு வழங்குவதையும், அதிர்வற்ற சுகமான பயண அனுபவத்தை உறுதி செய்வதையுமே தென்னக ரயில்வே தனது முதன்மைக் குறிக்கோளாகக் கொண்டுள்ளது. வழக்கமான ரயில் பெட்டிகளுடன் ஒப்பிடும்போது, ஜெர்மன் தொழில்நுட்பமான எல்.எச்.பி. பெட்டிகள் எடையில் மிகவும் குறைவானதாகவும், ஆனால் அதிக உறுதி கொண்டதாகவும் தயாரிக்கப்படுகின்றன.

மேலும், இந்த நவீன பெட்டிகள் அதிநவீன ஏர் சஸ்பென்ஷன் (Air Suspension) அமைப்பைக் கொண்டுள்ளதால், ரயில் வேகமாகவும் வளைவுகளில் செல்லும்போது ஏற்படும் அதிர்வுகள் பெரிதும் குறைக்கப்பட்டு பயணிகளுக்கு மிகவும் வசதியான சூழல் உருவாக்கப்படுகிறது. இந்த எல்.எச்.பி. பெட்டிகள் அறிமுகப்படுத்தப்படுவதன் மூலம் ரயிலின் ஒட்டுமொத்த தரம் மேம்படுவதுடன், பயண நேரம் மற்றும் பயணத்தின் போது ஏற்படும் சோர்வு போன்றவையும் குறையும் என எதிர்பார்க்கப்படுகிறது.

எக்ஸ்பிரஸ் ரயிலில் எல்.எச்.பி. பெட்டிகள் இணைப்பு

தென்னக ரயில்வே வெளியிட்டுள்ள செய்திக்குறிப்பின்படி, தாம்பரம் மற்றும் ராமேஸ்வரம் இடையே இயக்கப்படும் எக்ஸ்பிரஸ் ரயில்களில் இந்த புதிய பெட்டிகள் மாற்றப்பட உள்ளன. அதன்படி, ரயில் எண் 16751 மற்றும் 16752 கொண்ட தாம்பரம் - ராமேஸ்வரம் - தாம்பரம் எக்ஸ்பிரஸ் ரயில் ஆனது, முழுமையான நவீன எல்.எச்.பி. பெட்டிகளுடன் இயங்கும் வகையில் மாற்றியமைக்கப்படவுள்ளது.

தாம்பரத்தில் இருந்து புறப்படும் ரயில்களுக்கு வருகிற 2026 -ஆம் ஆண்டு டிசம்பர் மாதம் 31-ஆம் தேதி முதல் இந்த புதிய எல்.எச்.பி. பெட்டிகள் நடைமுறைக்கு வரவுள்ளன. அதேபோல், மறுமார்க்கமாக ராமேஸ்வரத்தில் இருந்து தாம்பரம் நோக்கி இயக்கப்படும் ரயிலுக்கு 2027-ஆம் ஆண்டு ஜனவரி மாதம் 03-ஆம் தேதி முதல் இந்த நவீன பெட்டிகள் இணைக்கப்பட்டு இயக்கப்படவுள்ளன என்பதை ரயில்வே நிர்வாகம் தெளிவாகத் தெரிவித்துள்ளது.

புதிய பெட்டிகளின் அமைப்பு மற்றும் விவரங்கள்

இந்த எல்.எச்.பி. பெட்டி மாற்றத்தைத் தொடர்ந்து, தாம்பரம் - ராமேஸ்வரம் - தாம்பரம் எக்ஸ்பிரஸ் ரயிலின் ஒட்டுமொத்த பெட்டி அமைப்பும் (Composition) முழுமையாக மாற்றிமைக்கப்பட்டு திருத்தப்பட்டுள்ளது. புதிய கட்டமைப்பின்படி, இந்த ரயிலில் மொத்தம் 22 பெட்டிகள் இணைக்கப்படவுள்ளன. இதில் 1 குளிர்சாதன முதலாம் வகுப்புப் பெட்டியும் (AC First Class Coach), 1 இரண்டாம் வகுப்பு குளிர்சாதனப் பெட்டியும் (AC Two Tier Coach), மற்றும் 4 மூன்றாம் வகுப்பு குளிர்சாதனப் பெட்டிகளும் (AC Three Tier Coaches) இடம்பெறுகின்றன. மேலும், நடுத்தர மற்றும் சாதாரண வர்க்கப் பயணிகளின் வசதிக்காக 10 ஸ்லீப்பர் வகுப்புப் பெட்டிகளும் (Sleeper Class Coaches), 4 பொது இரண்டாம் வகுப்புப் பெட்டிகளும் (General Second Class Coaches) இணைக்கப்பட்டுள்ளன.

குறிப்பாக, மாற்றுத்திறனாளி பயணிகளின் நலனைப் பாதுகாக்கும் வகையில் திவ்யாங்ஜன் நட்புணர்வு கொண்ட (Divyangjan Friendly) 1 இரண்டாம் வகுப்புப் பெட்டியும், மற்றும் 1 லக்கேஜ் மற்றும் பிரேக் வேன் (Luggage cum Brake Van) பெட்டியும் இந்த புதிய ரயிலின் கட்டமைப்பில் சேர்க்கப்பட்டுள்ளன என்பது குறிப்பிடத்தக்கது.

திருச்சியில் சிக்கிய 5 சிம் பாக்ஸ்: அதிரடியாக பறிமுதல் செய்த போலீசார்: பொதுமக்களுக்கு எச்சரிக்கை

என்.நாகராஜன் — Sat, 31 Oct 2026 07:12:36 +0530

திருச்சி: திருச்சியில் டிஜிட்டல் அரெஸ்ட் மோசடிக்கு பயன்படுத்த இருந்ததாக 5 சிம் பாக்ஸ்சை போலீசார் அதிரடியாக பறிமுதல் செய்துள்ளனர். இந்த வழக்கில் ஒருவர் கைது செய்யப்பட்டுள்ளார்.

தொலைபேசி அழைப்புகள் மூலம் பொதுமக்களை ஏமாற்றி பணம் பறிக்கும் ஆன்லைன் மோசடிகளுக்கு பயன்படுத்தப்பட்டதாகக் கூறப்படும் நவீன சிம் பாக்ஸ் கருவிகளை திருச்சி மாநகர சைபர் கிரைம் போலீசார் பறிமுதல் செய்துள்ளனர். உறையூர் பகுதியில் மேற்கொள்ளப்பட்ட இந்த அதிரடி நடவடிக்கையில் 5 சிம் பாக்ஸ் கருவிகள் உள்ளிட்ட மின்னணு சாதனங்கள் கைப்பற்றப்பட்டதுடன், அவற்றைப் பயன்படுத்தியதாகக் கூறப்படும் ஒருவரும் கைது செய்யப்பட்டுள்ளார்.

சமீபகாலமாக நாடு முழுவதும் டிஜிட்டல் அரெஸ்ட் என்ற பெயரில் நடைபெறும் இணையவழி மோசடிகள் பொதுமக்களிடையே பெரும் அச்சத்தை ஏற்படுத்தி வருகின்றன. காவல்துறை, நீதிமன்றம், விசாரணை அமைப்புகள் அல்லது அரசு அதிகாரிகள் போலத் தங்களை அறிமுகப்படுத்திக் கொண்டு, தொலைபேசியில் தொடர்பு கொள்ளும் மோசடி நபர்கள், சட்ட நடவடிக்கை எடுக்கப்படும் என மிரட்டி பணம் பறிப்பதாகப் புகார்கள் அதிகரித்துள்ளன.

இதுபோன்ற மோசடிகளுக்குப் பயன்படுத்தப்படும் தொழில்நுட்ப வசதிகளில் சிம் பாக்ஸ் கருவிகளும் முக்கியமானதாகக் கூறப்படுகிறது. திருச்சி உறையூர் பகுதியில் இருந்து டிஜிட்டல் அரெஸ்ட் மற்றும் ஆன்லைன் மோசடிகளுக்குப் பயன்படுத்தப்படும் ஜி.எஸ்.எம். கேட்வே எனப்படும் சிம் பாக்ஸ் கருவிகள் இயக்கப்படுவதாக பி.எஸ்.என்.எல். நிறுவனம் சார்பில் மாநகர சைபர் கிரைம் போலீசாருக்கு புகார் அளிக்கப்பட்டது.

இந்தப் புகாரின் அடிப்படையில் போலீசார் ரகசிய விசாரணை மேற்கொண்டனர். பின்னர் சம்பந்தப்பட்ட இடத்தில் சோதனை நடத்தினர். அப்போது ஒரு அறையில் வைக்கப்பட்டிருந்த 5 சிம் பாக்ஸ் கருவிகள், கேமராக்கள், மோடம் மற்றும் அவற்றுடன் தொடர்புடைய மின்னணு உபகரணங்கள் உள்ளிட்டவை பறிமுதல் செய்யப்பட்டன.

அந்த அறையில் கருவிகளைப் பயன்படுத்தி வந்த நபரையும் போலீசார் கைது செய்தனர். விசாரணை தொடர்ந்து நடைபெற்று வருவதால் கைது செய்யப்பட்டவரின் பெயர் உள்ளிட்ட விவரங்களை உடனடியாக போலீசார் வெளியிடவில்லை.

சிம் பாக்ஸ் கருவியின் செயல்பாடு குறித்து காவல்துறை விளக்கியுள்ள தகவல்கள் பொதுமக்கள் கவனிக்க வேண்டியவை. வெளிநாடுகளில் இருந்து வரும் தொலைபேசி அழைப்புகளை உள்ளூர் அழைப்புகள் போல மாற்றிக் காட்டும் வகையில் இக்கருவிகள் பயன்படுத்தப்படலாம்.

இதன் மூலம் சர்வதேச அழைப்புகளுக்கான தொலைத்தொடர்பு நடைமுறைகளைத் தவிர்த்து, அழைப்பின் உண்மையான மூலத்தை மறைப்பதற்கும் முயற்சி செய்யப்படலாம். இதனால் அழைப்பு எங்கிருந்து வருகிறது, யார் தொடர்பு கொள்கிறார்கள் என்பதை கண்டறிவது விசாரணை அமைப்புகளுக்கு சிக்கலாக மாறும் அபாயம் உள்ளது.

இத்தகைய தொழில்நுட்பம் தெரிந்தவர்களால் மட்டுமே இந்தக் கருவிகளை இயக்க முடியும் என்பதால், கைது செய்யப்பட்ட நபர் தனியாகச் செயல்பட்டாரா அல்லது அவருக்குப் பின்னால் வேறு நபர்கள் உள்ளனரா என்ற கோணத்திலும் போலீசார் விசாரணை நடத்தி வருகின்றனர்.

கருவிகளின் பயன்பாடு, அவற்றில் பயன்படுத்தப்பட்ட சிம் அட்டைகள், தொடர்பு கொண்ட எண்கள், பணப் பரிமாற்ற விவரங்கள் உள்ளிட்டவற்றை ஆய்வு செய்வது விசாரணையில் முக்கியமாக இருக்கும்.

பொதுமக்கள் அறியாத எண்ணிலிருந்து வரும் அழைப்புகளில் தங்களை போலீஸ் அதிகாரி அல்லது நீதிமன்ற அதிகாரி என அறிமுகப்படுத்துபவர்களை உடனடியாக நம்ப வேண்டாம். கைது, வழக்கு, விசாரணை என மிரட்டி பணம் அனுப்பச் சொன்னால் எந்தச் சூழலிலும் பணம் அனுப்பக் கூடாது. சந்தேகத்துக்குரிய அழைப்புகளை காவல்துறையின் சைபர் குற்றப்பிரிவிடம் தெரிவிக்க வேண்டும்.

திருச்சியில் சிம் பாக்ஸ் கருவிகள் பறிமுதல் செய்யப்பட்டுள்ள சம்பவம், இணையவழி மோசடிகள் எவ்வளவு தொழில்நுட்ப ரீதியாக வளர்ந்து வருகின்றன என்பதை வெளிப்படுத்தியுள்ளது. இந்தக் கருவிகளின் பின்னணியில் செயல்படும் முழு வலையமைப்பையும் கண்டறிந்து நடவடிக்கை எடுக்க வேண்டும் என்பதே பொதுமக்களின் எதிர்பார்ப்பாக உள்ளது.

Trichy Power Cut: திருச்சியில் நாளை (31-10-2026) எங்கெல்லாம் மின் நிறுத்தம்? - மின் வாரியம் வெளியிட்ட லிஸ்ட்

ராஜேஷ். எஸ் — Fri, 30 Oct 2026 20:59:26 +0530

Trichy Power shutdown (31-10-2026): திருச்சி மாவட்டத்தில் பல்வேறு பகுதிகளில் (அக்டோபர் 31, 2026, சனிக்கிழமை) மின் பாதையில் பராமரிப்புப் பணிகள் நடைபெற உள்ளதால், காலை 9 மணி முதல் மதியம் 2 மணி வரை மின்சாரம் தடை செய்யப்பட உள்ளது.

மாதாந்திர பராமரிப்புப் பணிகள்

தமிழ்நாட்டில் மாதாந்திர மின் பராமரிப்புப் பணிகள் காரணமாக மின்சாரம் நிறுத்தப்படும்போது, அது குறித்து முந்தைய நாள் அறிவிக்கப்படும். இந்த பராமரிப்புப் பணிகளின்போது, சிறிய பழுதுகளைச் சரிசெய்வது, மின்கம்பங்கள் மற்றும் மின்வழித்தடங்களில் உள்ள மரக்கிளைகளை அகற்றுவது போன்ற பல்வேறு பணிகளில் மின்சார வாரிய ஊழியர்கள் ஈடுபடுவார்கள். இந்நிலையில், திருச்சி மாவட்டத்தில் பல்வேறு பகுதிகளில் நாளை காலை 9 மணி முதல் மதியம் 2 மணி வரை மின்தடை செய்யப்படுவதாக அறிவிப்பு வெளியாகியுள்ளது.

மின் விநியோகம் தடைப்படும் பகுதிகள்

திருச்சி மாவட்டம்

எல்.அபிஷேகபுரம் துணை மின் நிலையம்

பரமசிவபுரம், ஏகே நகர், இடையாற்றுமங்கலம், டிவி நகர், அந்திமேடு, திருமணமேடு, மூமூடிச்சலமங்கலம், தண்ணீர்பந்தல், சாத்தமங்கலம், வரதராஜன் நகர்.

மின்தடை நேரத்தில் செய்ய வேண்டியவை

மின்தடை காலங்களில் தகவல்களைப் பெறுவது மிகவும் முக்கியம். மின்சாரம் மீண்டும் வழங்கப்படும் நிலை மற்றும் அவசர அறிவிப்புகள் குறித்து தெரிந்துகொள்ள, குடியிருப்போர் பேட்டரி சக்தியில் இயங்கும் வானொலிகள் அல்லது முழுமையாக சார்ஜ் செய்யப்பட்ட மொபைல் போன்களை பயன்படுத்த வேண்டும். மொபைல் பேட்டரி ஆயுளை பாதுகாக்க, பவர் சேவிங் மோடினை இயக்கி, அவசர அழைப்புகள் மற்றும் குறுந்தகவல்கள் போன்ற தேவையான பயன்பாட்டிற்கு மட்டுமே போனைக் கொண்டு செயல்படுவது நல்லது.

பாதுகாப்பாக சமாளிக்க முடியும்

மின்தடை நேரத்தில் திடீர் மின்வெட்டு ஏற்படும் அபாயத்தைத் தவிர்க்க, லிப்டைப் பயன்படுத்தாமல் இருக்க வேண்டும். மேலும், அவசர தொடர்பு எண்கள் எளிதில் கிடைக்கும் வகையில் வைத்திருப்பதோடு, தண்ணீர், சிற்றுண்டி, மற்றும் முதலுதவி பெட்டி போன்ற அத்தியாவசிய பொருட்களையும் தயாராக வைத்திருக்க வேண்டும். இந்த முன்னெச்சரிக்கைகளைப் பின்பற்றுவதன் மூலம், குடியிருப்போர் மின்தடை நேரத்தை பாதுகாப்பாக சமாளிக்க முடியும்.

வருண பகவான் காட்டிய கருணை... செழித்து வளர்ந்த பொங்கல் கரும்பு: விலை உயருமா என எதிர்பார்ப்பு

என்.நாகராஜன் — Thu, 29 Oct 2026 17:01:13 +0530

திருச்சி: சமீபத்தில் பெய்த பருவமழை கைகொடுத்ததால், திருச்சி மாவட்டம் திருவளர்ச்சோலை பகுதியில் பொங்கல் பண்டிகைக்காகச் சாகுபடி செய்யப்பட்டுள்ள கரும்புகள் செழிப்பாக வளர்ந்து வருகின்றன. ஆயிரத்திற்கும் மேற்பட்ட ஏக்கர் பரப்பளவில் மேற்கொள்ளப்பட்டுள்ள கரும்பு சாகுபடியில், தற்போது களை எடுப்பது, பூச்சித் தாக்குதலைத் தடுப்பதற்காக மருந்து தெளிப்பது உள்ளிட்ட பராமரிப்புப் பணிகளில் விவசாயிகள் தீவிரமாக ஈடுபட்டுள்ளனர். இந்த ஆண்டு பொங்கல் பண்டிகையின்போது கரும்புக்கு நல்ல விலை கிடைக்கும் என்ற எதிர்பார்ப்புடன் விவசாயிகள் காத்திருக்கின்றனர்.

பொங்கல் பண்டிகையின் அடையாளம் கரும்பு

தமிழர்களின் பாரம்பரியத்தையும் உழவுத் தொழிலின் பெருமையையும் பறைசாற்றும் முக்கியமான பண்டிகையாக பொங்கல் திருநாள் கொண்டாடப்படுகிறது. புதுப்பானையில் பொங்கலிட்டு, சூரியனுக்கு நன்றி தெரிவித்து, விவசாயத்திற்குத் துணையாக இருக்கும் கால்நடைகளை வழிபட்டு மகிழும் இந்தத் திருவிழாவில் கரும்பு முக்கிய இடம் பிடிக்கிறது. வீடுகளிலும், பொங்கல் விழா நடைபெறும் இடங்களிலும் கரும்புகளை வைத்து வழிபடுவது தமிழர்களின் நீண்டகாலப் பாரம்பரியமாகத் தொடர்கிறது.

இதனால், பொங்கல் பண்டிகையை முன்னிட்டு கரும்புக்கான தேவை ஆண்டுதோறும் அதிகரிப்பது வழக்கம். பண்டிகைக் காலத்தில் கிடைக்கும் விற்பனை வருவாய், கரும்பு சாகுபடி செய்யும் விவசாயிகளுக்கு முக்கியமான வருமானமாக அமைகிறது. இதைக் கருத்தில் கொண்டு, திருச்சி மாவட்டத்தில் காவிரி மற்றும் கொள்ளிடம் ஆற்றங்கரையோரப் பகுதிகள் உள்ளிட்ட பல இடங்களில் விவசாயிகள் கரும்பு சாகுபடியில் ஈடுபட்டு வருகின்றனர்.

அந்த வகையில், திருவளர்ச்சோலை கிராமம் கரும்பு சாகுபடியில் முக்கியப் பகுதியாக விளங்கி வருகிறது. இப்பகுதியில் ஆண்டுதோறும் பொங்கல் பண்டிகையை இலக்காகக் கொண்டு கரும்பு பயிரிடப்படுகிறது. இந்த ஆண்டும் விவசாயிகள் ஆர்வத்துடன் சாகுபடிப் பணிகளை மேற்கொண்டுள்ளனர்.

ஆயிரம் ஏக்கருக்கு மேல் சாகுபடி

திருவளர்ச்சோலை பகுதியில் தலைமுறை தலைமுறையாக கரும்பு சாகுபடி செய்து வரும் விவசாயிகள், இந்த ஆண்டும் ஆயிரத்திற்கும் மேற்பட்ட ஏக்கர் பரப்பளவில் கரும்புகளைப் பயிரிட்டுள்ளனர். கரும்பு பயிருக்கு ஏற்ற மண் வளம், நீர்வளம் மற்றும் பருவநிலை ஆகியவை இப்பகுதியில் சாகுபடிக்கு ஆதரவாக உள்ளன.

சமீபத்தில் பெய்த பருவமழை, கரும்புப் பயிர்களின் வளர்ச்சிக்குச் சாதகமாக அமைந்துள்ளது. மண்ணில் ஈரப்பதம் அதிகரித்ததால், பயிர்கள் செழிப்பாக வளர்ந்து வருவதாக விவசாயிகள் நம்பிக்கை தெரிவிக்கின்றனர். தற்போதைய சீதோஷ்ண நிலையும் கரும்பின் வளர்ச்சிக்கு ஏற்ற வகையில் இருப்பதால், பச்சைப் பசேலென வளர்ந்துள்ள கரும்புத் தோட்டங்கள் விவசாயிகளுக்கு மகிழ்ச்சியை அளித்துள்ளன.

இருப்பினும், கரும்பு சாகுபடியில் நல்ல விளைச்சலைப் பெறுவதற்கு மழை மட்டும் போதுமானதல்ல. பயிர்களின் வளர்ச்சிக் கட்டத்துக்கு ஏற்ப உரமிடுதல், களை அகற்றுதல், நீர் மேலாண்மை மற்றும் பூச்சித் தாக்குதலைக் கட்டுப்படுத்துதல் உள்ளிட்ட பணிகளையும் முறையாக மேற்கொள்ள வேண்டியுள்ளது.

களையெடுப்பு, பூச்சித் தடுப்புப் பணிகள் தீவிரம்

கரும்புகள் நன்றாக வளர்ந்து வரும் நிலையில், வயல்களில் களைகள் அதிகரித்து பயிர்களின் வளர்ச்சியைப் பாதிக்காமல் இருக்க விவசாயிகள் களையெடுக்கும் பணியில் ஈடுபட்டுள்ளனர். அதேபோல், கரும்புகளைத் தாக்கக்கூடிய பூச்சிகளைக் கட்டுப்படுத்துவதற்காகத் தேவையான இடங்களில் பயிர்ப் பாதுகாப்பு மருந்துகளையும் தெளித்து வருகின்றனர்.

பொங்கல் பண்டிகைக்கு இன்னும் கால அவகாசம் இருப்பதால், பயிர்களைத் தொடர்ந்து கண்காணித்து உரிய பராமரிப்பை மேற்கொள்வது அவசியமாக உள்ளது. பயிர்கள் நல்ல உயரம் பெற்று, கரும்பின் தடிமன் மற்றும் இனிப்புத் தன்மை சிறப்பாக அமையும் வகையில் விவசாயிகள் கவனம் செலுத்தி வருகின்றனர்.

பருவமழை தொடர்ந்து சாதகமாக அமைந்து, நோய் மற்றும் பூச்சித் தாக்குதல்கள் கட்டுக்குள் இருந்தால் எதிர்பார்த்த விளைச்சலைப் பெற முடியும் என்ற நம்பிக்கை விவசாயிகளிடம் காணப்படுகிறது. அதே நேரத்தில், அறுவடை நேரத்தில் மழை, போக்குவரத்து மற்றும் சந்தை நிலவரம் உள்ளிட்ட காரணிகளும் விற்பனையைப் பாதிக்கக்கூடும் என்பதால் அவர்கள் தொடர்ந்து நிலைமையைக் கவனித்து வருகின்றனர்.

திருச்சியைத் தாண்டியும் செல்லும் திருவளர்ச்சோலை கரும்பு

திருவளர்ச்சோலை பகுதியில் அறுவடை செய்யப்படும் கரும்புகள் திருச்சி மாவட்டத்தின் பல்வேறு சந்தைகளுக்கு அனுப்பப்படுகின்றன. உள்ளூர் விற்பனையைக் கடந்து, தமிழகத்தின் பிற மாவட்டங்களுக்கும் இந்தப் பகுதியில் விளையும் கரும்புகள் கொண்டு செல்லப்படுகின்றன. இதனால், பொங்கல் பண்டிகைக் காலத்தில் திருவளர்ச்சோலை கரும்புகளுக்கு விற்பனை வாய்ப்பு கிடைக்கும் என விவசாயிகள் எதிர்பார்க்கின்றனர்.

பண்டிகை நெருங்கும் நேரத்தில் வியாபாரிகள் வயல்களுக்கு நேரடியாக வந்து கரும்புகளைப் பார்வையிட்டு கொள்முதல் செய்வதும், அறுவடை செய்யப்பட்ட கரும்புகளைச் சந்தைகளுக்கு அனுப்புவதும் விவசாயிகளின் வருமானத்தில் முக்கியப் பங்கு வகிக்கின்றன. ஆனால், விளைச்சல் நன்றாக இருந்தாலும் விற்பனை விலை எதிர்பார்த்த அளவுக்கு அமையாவிட்டால் விவசாயிகளின் லாபம் குறையும் அபாயம் உள்ளது.

கரும்பு சாகுபடிக்கான நிலத் தயாரிப்பு, விதைக் கரும்பு, உரம், தொழிலாளர் கூலி, களை எடுப்பு, பூச்சித் தடுப்பு மருந்துகள், அறுவடை மற்றும் போக்குவரத்து எனப் பல்வேறு செலவுகளை விவசாயிகள் எதிர்கொள்ள வேண்டியுள்ளது. எனவே, சந்தையில் கிடைக்கும் விலை மட்டுமின்றி, இந்தச் செலவுகளையும் கணக்கிட்ட பிறகே சாகுபடியின் உண்மையான லாபத்தை மதிப்பிட முடியும்.

நல்ல விலை கிடைக்குமா? விவசாயிகள் எதிர்பார்ப்பு

இந்த ஆண்டு பருவமழை சாதகமாக அமைந்துள்ளதாலும், கரும்புகள் செழிப்பாக வளர்ந்து வருவதாலும் பொங்கல் பண்டிகையின்போது நல்ல விளைச்சலும் விற்பனையும் கிடைக்கும் என விவசாயிகள் நம்புகின்றனர். ஆனால், கரும்புகளுக்கு என்ன விலை கிடைக்கும் என்பது சந்தைத் தேவை, வியாபாரிகளின் கொள்முதல், போக்குவரத்துச் செலவு மற்றும் பண்டிகைக் கால விற்பனை நிலவரம் ஆகியவற்றைப் பொறுத்தே அமையும்.

கரும்பு சாகுபடியில் விவசாயிகள் ஆண்டு முழுவதும் உழைக்கின்றனர். விதைப்பிலிருந்து அறுவடை வரை தொடர்ந்து செலவுகளைச் செய்த பிறகே வருமானம் கிடைக்கிறது. எனவே, விளைச்சல் நன்றாக இருப்பதுடன், விவசாயிகளுக்கு நியாயமான விலையும் கிடைப்பது அவசியமாகும்.

இடைத்தரகர்களின் தலையீட்டைத் தடுக்க வேண்டும்

கரும்பு சாகுபடி செய்யும் விவசாயிகள் முன்வைக்கும் முக்கியக் கோரிக்கைகளில் ஒன்று, இடைத்தரகர்களின் தலையீட்டைக் குறைத்து நேரடி விற்பனைக்கான வாய்ப்புகளை அதிகரிக்க வேண்டும் என்பதாகும். விவசாயிகள் தங்களுடைய கரும்புகளை விற்பனை செய்யும்போது, கொள்முதல் விலை வெளிப்படையாக நிர்ணயிக்கப்பட வேண்டும் என்றும், உற்பத்திச் செலவுகளுக்கு ஏற்ற நியாயமான விலை கிடைக்க நடவடிக்கை எடுக்க வேண்டும் என்றும் அவர்கள் வலியுறுத்துகின்றனர்.

அரசு உரிய ஆய்வு மேற்கொண்டு, சாத்தியமான இடங்களில் விவசாயிகளிடமிருந்து நேரடியாகக் கரும்புகளை வாங்குவதற்கான ஏற்பாடுகளைச் செய்ய வேண்டும் என்பதும் அவர்களின் கோரிக்கையாக உள்ளது. நேரடிக் கொள்முதல் மையங்கள் அல்லது விவசாயிகள், வியாபாரிகள் நேரடியாகப் பரிவர்த்தனை செய்யும் சந்தை வாய்ப்புகள் உருவாக்கப்பட்டால், தேவையற்ற இடைத்தரகர் செலவுகளைக் குறைக்க உதவலாம்.

மேலும், பொங்கல் பண்டிகையை முன்னிட்டு கரும்பின் தேவை அதிகரிக்கும் காலத்தில் விவசாயிகள் தங்களுடைய விளைபொருட்களை உரிய நேரத்தில் சந்தைக்குக் கொண்டு செல்லத் தேவையான போக்குவரத்து வசதிகளும், விற்பனைத் தகவல்களும் கிடைக்க நடவடிக்கை எடுக்க வேண்டும் என எதிர்பார்க்கப்படுகிறது.

மொத்தத்தில், திருவளர்ச்சோலையில் பருவமழை கைகொடுத்ததால் கரும்புத் தோட்டங்கள் செழிப்பாகக் காட்சியளிக்கின்றன. பசுமையாக வளர்ந்துள்ள கரும்புகள் விவசாயிகளிடம் நம்பிக்கையை ஏற்படுத்தியுள்ள நிலையில், அந்த நம்பிக்கை நல்ல விளைச்சலாக மட்டுமல்லாமல் நியாயமான விலையுடனான வருமானமாகவும் மாறுமா என்பதே தற்போது அவர்களின் எதிர்பார்ப்பாக உள்ளது.

திருவளர்ச்சோலை விவசாயிகளின் உழைப்புக்கு உரிய பலன் கிடைக்க, விளைச்சலுடன் விற்பனை விலையும் சாதகமாக அமைய வேண்டும் என்பதே அனைவரின் விருப்பமாகும்.

“திருச்சி கிழக்கு இடைத்தேர்தல்; நான் இல்லாவிட்டாலும் தொண்டர்கள் இருப்பார்கள்” - ரெய்டு குறித்து கே.என்.நேரு பரபரப்பு பேட்டி

ராஜேஷ். எஸ் — Thu, 29 Oct 2026 15:39:55 +0530

பிரச்சனைகளை திசை திருப்பவே தன் வீட்டில் சோதனை நடத்தப்பட்டதாவும், தான் இல்லாவிட்டாலும் திருச்சி கிழக்கு தொகுதி இடைத்தேர்தலில் தொண்டர்கள் வேலை செய்வார்கள் என்றும் திமுக முன்னாள் அமைச்சர் கே.என்.நேரு கூறியுள்ளார்.

நிறைவு பெற்ற சோதனை

திருச்சி தில்லை நகரில் உள்ள திமுக முன்னாள் அமைச்சர் கே.என்.நேரு வீட்டில் லஞ்ச ஒழிப்புத் துறை நடத்திய சோதனை நிறைவு பெற்றது. சுமார் 7 மணி நேரத்துக்கு மேல் இந்த சோதனை நடைபெற்றது.

இதனைத்தொடர்ந்து, சோதனை தொடர்பாக செய்தியாளர்களை சந்தித்த முன்னாள் அமைச்சர் கே.என்.நேரு, பிரச்சனைகளை திசை திருப்பவே தன் வீட்டில் சோதனை செய்யப்பட்டதாக அவர் தெரிவித்துள்ளார். அவர் அளித்த பேட்டியில், “ கொலை, கொள்ளை, சட்டம் ஒழுங்கு சீர்கேட்டை திசை திருப்பவே சோதனை நடத்தியிருக்கிறார்கள். என்னிடம் விசாரணை எதுவும் நடைபெறவில்லை. எந்த ஆவணங்களும் கைப்பற்றப்படவில்லை; அதிகாரிகள் என் வீட்டில் இருந்து இரண்டு லேப்டாப்களை பறிமுதல் செய்துள்ளனர். எடுத்த பொருட்களுக்கு கையெப்பம் பெற்றனர்” என்றார்.

நான் இல்லாவிட்டாலும் தொண்டர்கள் இருப்பார்கள்

மேலும், திருச்சி கிழக்கு இடைத்தேர்தல் தொடர்பாக செய்தியாளர்கள் எழுப்பிய கேள்விக்கு, தான் இல்லாவிட்டாலும் திருச்சி கிழக்கு இடைத்தேர்தலில் தொண்டர்கள் திமுகவுக்கு வேலை பார்ப்பார்கள் என்றும் திமுக என்றென்றும் நிலைத்திருக்கும்; அதை எதிர்ப்பவர்கள்தான் மாறிக் கொண்டே இருக்கிறார்கள் என்றும் கூறினார்.

முன்னாள் அமைச்சர் கே.என்.நேரு வீட்டில் லஞ்ச ஒழிப்புத்துறை போலீசார் சோதனை ஈடுபட்டு வருகின்றனர். கடந்த திமுக ஆட்சியில் நகராட்சி நிர்வாக துறை அமைச்சராக கே என் நேரு இருந்தபோது அந்த துறையில் பணி நியமனம் செய்வதற்கு லஞ்சம் பெற்றதாக எழுந்த புகாரின் அடிப்படையில் இந்த சோதனை நடத்தப்பட்டது.

இது தொடர்பாக லஞ்ச ஒழிப்புத்துறை போலீசார் வழக்கு பதிவு செய்ய உயர்நீதிமன்றம் அனுமதி வழங்கிய நிலையில் அதற்கு எதிராக கே.என்.நேரு நீதிமன்றத்தில் வழக்கு தாக்கல் செய்திருந்தார். அந்த வழக்கை விசாரித்த உயர்நீதிமன்றம் கடந்த திங்கட்கிழமை லஞ்ச ஒழிப்புத்துறை வழக்கு பதிவு செய்து விசாரிக்கலாம் என தீர்ப்பு வழங்கியது. இந்த நிலையில், இந்த சோதனை நடைபெற்றது. கடந்த மாதம் டெண்டர் முறைகேடு தொடர்பாக லஞ்ச ஒழிப்புத்துறை போலீசார் கே.என்.நேரு வீட்டில் சோதனை செய்த நிலையில் தற்போது மீண்டும் சோதனை நடத்தப்பட்டது பரபரப்பை ஏற்படுத்தி உள்ளது.

9 நாட்கள் பக்தர்களுக்கு அருள்பாலிக்கும் நம்பெருமாள் – வரும் நவ 5-ல் தீர்த்தவாரியுடன் நிறைவு

என்.நாகராஜன் — Thu, 29 Oct 2026 11:54:51 +0530

திருச்சி: பூலோக வைகுண்டம் என்று போற்றப்படும் ஸ்ரீரங்கம் அருள்மிகு அரங்கநாத சுவாமி திருக்கோவிலில், நம்பெருமாள் ஊஞ்சல் உற்சவம் நேற்று மாலை கோலாகலமாகத் தொடங்கியது. இதையொட்டி, உற்சவர் நம்பெருமாள் உபயநாச்சியார்களுடன் ஊஞ்சல் மண்டபத்தில் எழுந்தருளி, சிறப்பு அலங்காரத்தில் ஊஞ்சலில் ஆடியவாறு பக்தர்களுக்குச் சேவை சாதித்தார். ஒன்பது நாட்கள் நடைபெறும் இந்த உற்சவத்தின் போது, பல்வேறு சிறப்பு நிகழ்ச்சிகள் மற்றும் வழிபாடுகள் நடைபெற உள்ளன.

பூலோக வைகுண்டத்தில் தொடங்கிய திருவிழா

108 திவ்யதேசங்களில் முதன்மையானதாகப் போற்றப்படும் ஸ்ரீரங்கம் ரெங்கநாதர் கோவில், வைணவ சமயத்தின் மிக முக்கியமான திருத்தலங்களில் ஒன்றாக விளங்குகிறது. காவிரி மற்றும் கொள்ளிடம் ஆறுகளுக்கு இடையே அமைந்துள்ள ஸ்ரீரங்கம் தீவில் அமைந்திருக்கும் இக்கோவில், ஆன்மிகம், வரலாறு, கலை மற்றும் கட்டிடக்கலை ஆகியவற்றின் தனித்துவமான அடையாளமாகத் திகழ்கிறது.

பெருமாள் ஆதிசேஷன் மீது பள்ளிகொண்ட திருக்கோலத்தில் அருள்பாலிக்கும் இத்தலம், தொன்றுதொட்டு வைணவ பக்தர்களின் வழிபாட்டில் சிறப்பிடம் பெற்றுள்ளது. இக்கோவிலில் ஆண்டு முழுவதும் பல்வேறு உற்சவங்கள் விமரிசையாக நடைபெறுகின்றன. அவற்றில் நம்பெருமாள் ஊஞ்சல் உற்சவமும் குறிப்பிடத்தக்க ஒன்றாகும்.

ஒவ்வோர் ஆண்டும் நடைபெறும் இந்த உற்சவத்தில், உற்சவர் நம்பெருமாள் உபயநாச்சியார்களுடன் ஊஞ்சல் மண்டபத்தில் எழுந்தருளி பக்தர்களுக்குக் காட்சியளிப்பது முக்கிய நிகழ்வாகும். பெருமாளை ஊஞ்சலில் தரிசிப்பது பக்தர்களுக்கு ஆன்மிக மகிழ்ச்சியையும் மனநிறைவையும் அளிப்பதாக நம்பப்படுகிறது.

ஊஞ்சல் மண்டபத்தில் எழுந்தருளிய நம்பெருமாள்

இந்த ஆண்டுக்கான ஊஞ்சல் உற்சவம் நேற்று மாலை தொடங்கியது. இதையொட்டி, உற்சவர் நம்பெருமாள் உபயநாச்சியார்களுடன் மூலஸ்தானத்தில் இருந்து புறப்பட்டார். கோவிலின் தங்கக் கொடிமரத்திற்குக் கிழக்குப் பகுதியில் அமைந்துள்ள ஊஞ்சல் மண்டபத்தில் எழுந்தருளினார்.

அங்கு நம்பெருமாளுக்கு சிறப்பு அலங்காரங்கள் செய்யப்பட்டு, அலங்காரம் வகையறா நிகழ்ச்சிகள் நடைபெற்றன. பின்னர் இரவு ஊஞ்சல் சேவை நடைபெற்றது. உபயநாச்சியார்களுடன் ஊஞ்சலில் ஆடியவாறு நம்பெருமாள் பக்தர்களுக்குச் சேவை சாதித்தார். அப்போது பக்தர்கள் பெருமாளைத் தரிசித்து வழிபட்டனர்.

ஊஞ்சல் உற்சவத்தின் முதல் நாளில் நடைபெற்ற இந்த நிகழ்ச்சி, கோவிலின் பாரம்பரிய வழிபாட்டு முறைகளின்படி நடைபெற்றது. இரவு 9 மணியளவில் ஊஞ்சல் மண்டபத்தில் இருந்து புறப்பட்ட நம்பெருமாள், மீண்டும் மூலஸ்தானத்தைச் சென்றடைந்தார்.

நவம்பர் 2 வரை தினமும் ஊஞ்சல் சேவை

ஊஞ்சல் உற்சவத்தின் அடுத்தடுத்த நாட்களிலும் நம்பெருமாள் மாலை நேரத்தில் ஊஞ்சல் மண்டபத்தில் எழுந்தருளி பக்தர்களுக்குக் காட்சியளிக்கிறார்.

அதன்படி, இன்று வியாழக்கிழமை முதல் நவம்பர் 2-ஆம் தேதி வரை தினமும் மாலை நம்பெருமாள் ஊஞ்சல் மண்டபத்துக்கு எழுந்தருளி ஊஞ்சல் உற்சவம் கண்டருளுகிறார். இந்த நாட்களில் பக்தர்கள் பெருமாளைத் தரிசிக்கலாம்.

உற்சவத்தின் ஒரு பகுதியாக நவம்பர் 3-ஆம் தேதி சிறப்பு நிகழ்ச்சிகள் நடைபெற உள்ளன. அன்று உபயநாச்சியார்களுடன் நம்பெருமாள் புறப்பட்டு மாலை 6.45 மணியளவில் கொட்டாரத்தில் நெல்லளவு கண்டருளுகிறார். அதன்பிறகு தாயார் சன்னதியில் திருவந்திக்காப்பு நிகழ்ச்சி நடைபெறுகிறது.

இரவு 7.15 மணியளவில் நம்பெருமாள் ஊஞ்சல் மண்டபத்தைச் சென்றடைகிறார். அங்கு இரவு 7.45 மணி முதல் ஊஞ்சல் உற்சவம் நடைபெறும். பின்னர் இரவு 9 மணியளவில் ஊஞ்சல் மண்டபத்தில் இருந்து புறப்பட்டு மூலஸ்தானத்தைச் சென்றடைவார்.

நெல்லளவு நிகழ்ச்சியின் சிறப்பு

ஸ்ரீரங்கம் கோவிலில் நடைபெறும் நெல்லளவு நிகழ்ச்சி, ஊஞ்சல் உற்சவத்தின் முக்கிய அங்கங்களில் ஒன்றாகும். இதில் நம்பெருமாள் கொட்டாரத்தில் எழுந்தருளி நெல்லளவு கண்டருளுகிறார். கோவிலின் பாரம்பரிய வழிபாட்டு நடைமுறைகளுடன் தொடர்புடைய இந்த நிகழ்ச்சி, உற்சவத்தின் தனித்துவத்தை எடுத்துக்காட்டுகிறது.

இதனைத் தொடர்ந்து தாயார் சன்னதியில் நடைபெறும் திருவந்திக்காப்பு நிகழ்ச்சியும் பக்தர்களின் கவனத்தை ஈர்க்கும். பின்னர் ஊஞ்சல் மண்டபத்தில் நடைபெறும் சேவையில் நம்பெருமாளைத் தரிசிக்க பக்தர்கள் திரளாக வருவார்கள் என எதிர்பார்க்கப்படுகிறது.

நவம்பர் 5-ல் தீர்த்தவாரியுடன் நிறைவு

ஊஞ்சல் உற்சவத்தின் நிறைவு நாளான நவம்பர் 5-ஆம் தேதி காலையில் சிறப்பு நிகழ்ச்சிகள் நடைபெற உள்ளன.

அன்று காலை 9.15 மணியளவில் நம்பெருமாள் புறப்பட்டு, காலை 9.45 மணியளவில் சந்திர புஷ்கரணிக் கரையில் தீர்த்தவாரி கண்டருளுகிறார். இதனைத் தொடர்ந்து காலை 10.15 மணியளவில் ஊஞ்சல் மண்டபத்தைச் சென்றடையும் நம்பெருமாளுக்கு திருமஞ்சனம் நடைபெறுகிறது.

மாலை 6 மணி முதல் இரவு 8 மணி வரை ஊஞ்சல் சேவை நடைபெறும். இதன்பின் நம்பெருமாள் ஊஞ்சல் மண்டபத்தில் இருந்து புறப்பட்டு மூலஸ்தானத்தைச் சென்றடைவார். இதனுடன் இந்த ஆண்டுக்கான ஊஞ்சல் உற்சவம் நிறைவடைகிறது.

வரலாறும் ஆன்மிகப் பெருமையும் கொண்ட திருத்தலம்

ஸ்ரீரங்கம் ரெங்கநாதர் கோவில், அதன் பிரம்மாண்டமான ராஜகோபுரம், பல பிரகாரங்கள், சிற்ப வேலைப்பாடுகள் மற்றும் பழமையான மண்டபங்கள் ஆகியவற்றால் உலகப் புகழ்பெற்றுள்ளது. கோவிலின் ஏழு பிரகார அமைப்பு, பாரம்பரியத் திராவிடக் கட்டிடக்கலையின் சிறப்பை வெளிப்படுத்துகிறது. பல நூற்றாண்டுகளாகப் பல்வேறு அரச வம்சங்களின் ஆதரவும் திருப்பணிகளும் இத்தலத்தின் வளர்ச்சிக்குப் பங்களித்துள்ளன.

வைணவ ஆழ்வார்களின் மங்களாசாசனப் பெருமை பெற்ற இந்தத் தலம், ராமானுஜர் உள்ளிட்ட வைணவ ஆச்சாரியர்களின் வரலாற்றுடனும் நெருங்கிய தொடர்புடையது. வைகுண்ட ஏகாதசி, பங்குனி உத்திரம் உள்ளிட்ட முக்கிய விழாக்களின்போது இங்கு நடைபெறும் வழிபாடுகள், தமிழகத்தின் ஆன்மிகப் பாரம்பரியத்தை எடுத்துக்காட்டுகின்றன.

இத்தகைய சிறப்புமிக்க ஸ்ரீரங்கம் கோவிலில் நடைபெறும் நம்பெருமாள் ஊஞ்சல் உற்சவம், பக்தர்களுக்கு பெருமாளை அருகிலிருந்து தரிசிக்கும் ஆன்மிக அனுபவத்தை வழங்கும் முக்கிய விழாவாக விளங்குகிறது. ஒன்பது நாட்கள் நடைபெறும் இந்த உற்சவத்தில், நம்பெருமாளின் பல்வேறு சேவைகளைக் கண்டு வழிபட பக்தர்கள் ஆர்வத்துடன் காத்திருக்கின்றனர்.

ஸ்ரீரங்கம் கோவிலில் நடைபெறும் ஊஞ்சல் உற்சவம், பாரம்பரிய வழிபாட்டு முறைகளையும் வைணவ சமயத்தின் தொன்மையான ஆன்மிக மரபுகளையும் தொடர்ந்து பாதுகாத்து வரும் திருவிழாக்களில் ஒன்றாகத் திகழ்கிறது.

திருச்சியில் பரபரப்பு... முன்னாள் அமைச்சர் கே.என்.நேரு வீட்டில் சோதனை: திமுகவினர் குவிந்தனர்

என்.நாகராஜன் — Thu, 29 Oct 2026 10:09:11 +0530

திருச்சி: திருச்சியில் முன்னாள் அமைச்சர் கே.என்.நேரு இல்லத்தில் லஞ்ச ஒழிப்புத்துறை அதிரடி சோதனை மேற்கொண்டுள்ளனர்.

திமுக முதன்மை செயலாளரும், முன்னாள் நகராட்சி நிர்வாகத்துறை அமைச்சருமான கே.என்.நேருவின் திருச்சி தில்லைநகரில் உள்ள இல்லத்தில், இன்று காலை முதல் லஞ்ச ஒழிப்புத்துறை அதிகாரிகள் அதிரடி சோதனையில் ஈடுபட்டு வருகின்றனர்.

இன்று காலை 3 பொலிரோ வாகனங்களில் வந்த 15-க்கும் மேற்பட்ட லஞ்ச ஒழிப்புப் பிரிவு காவல்துறையினர், தில்லை நகரில் உள்ள கே.என்.நேருவின் வீடு மற்றும் அலுவலக வளாகத்தை தங்கள் கட்டுப்பாட்டுக்குள் கொண்டுவந்து தீவிர சோதனையைத் தொடங்கியுள்ளனர். பாதுகாப்பு கருதி வீட்டின் நுழைவு வாயிலில் கூடுதல் போலீஸாரும் குவிக்கப்பட்டுள்ளனர்.

நகராட்சி நிர்வாகம் மற்றும் குடிநீர் வழங்கல் துறையில் பல்வேறு பணியிடங்களை நிரப்புவதில் முறைகேடு செய்து, சுமார் ₹634 கோடி ரூபாய் வரை லஞ்சம் பெற்றதாக எழுந்துள்ள குற்றச்சாட்டு மற்றும் அது தொடர்பான வழக்கு விசாரணையின் அடிப்படையில் இந்த சோதனை நடத்தப்பட்டு வருவதாக முதற்கட்ட தகவல்கள் வெளியாகியுள்ளன. வரும் 16-ஆம் தேதி கே.என்.நேருவின் தம்பி ரவிச்சந்திரன் மகனுக்குத் திருமணம் நடைபெற உள்ளது.

இதற்கான ஏற்பாடுகள் தீவிரமாக நடைபெற்று வரும் சூழலில், இந்த திடீர் லஞ்ச ஒழிப்புத்துறை சோதனை அரசியல் வட்டாரத்தில் பெரும் பரப்பரப்பை ஏற்படுத்தியுள்ளது. மேலும், திருமண சுபநிகழ்ச்சி நெருங்கும் வேளையில் நடைபெற்றுள்ள இந்த நடவடிக்கை அவரது குடும்பத்தினர் மற்றும் உறவினர்களிடையே பெரும் அதிர்ச்சியையும் சோகத்தையும் ஏற்படுத்தியுள்ளது.

தொடர்ந்து ஆவணங்கள் மற்றும் சான்றுகள் சரிபார்க்கப்பட்டு வரும் நிலையில், சோதனையின் முடிவிலேயே கைப்பற்றப்பட்ட பொருட்கள் மற்றும் கூடுதல் விவரங்கள் குறித்த அதிகாரப்பூர்வ தகவல்கள் வெளியாகும் என எதிர்பார்க்கப்படுகிறது.

சோதனை நடைபெறும் தகவல் அறிந்து திமுகவினர் முன்னாள் அமைச்சர் கே.என்.நேரு வீட்டின் முன்பு குவிந்துள்ளனர். திருச்சி மாவட்டத்தைச் சேர்ந்த மற்றொரு முன்னாள் அமைச்சரான அன்பில் மகேஷ் பொய்யாமொழி கடந்த இரு தினங்களுக்கு முன்பு கைது செய்யப்பட்டு சிறையில் அடைக்கப்பட்டுள்ளார்.

இந்த வகையில் திருச்சி மாவட்டத்தை சேர்ந்த திமுக முன்னாள் அமைச்சரான கேஎன்.நேரு வீட்டில் லஞ்ச ஒழிப்பு துறை சோதனை நடத்தி வருவது திமுக வட்டாரத்தில் பரபரப்பை ஏற்படுத்தியுள்ளது .

திருச்சி சினிமா ரசிகர்களுக்கு மெகா சர்ப்ரைஸ்! 60 அடி பிரம்மாண்டத் திரை, 770 இருக்கைகள்… புதிய அனுபவத்துக்கு ரெடியா?

என்.நாகராஜன் — Thu, 29 Oct 2026 07:07:44 +0530

திருச்சி: சென்னையில் கிடைக்கும் பிரம்மாண்டத் திரையரங்கு அனுபவம் இனி திருச்சியிலும்! நவீனத் தொழில்நுட்பம், பிரம்மாண்டமான திரை, அதிநவீன ஒலி அமைப்பு என சினிமா ரசிகர்களைக் கவரும் வகையில் திருச்சியில் உள்ள மெகாஸ்டார் சினிமாஸ் திரையரங்கு புதுப்பிக்கப்பட்டு செயல்பட்டு வருகிறது.

பெரிய திரையில் திரைப்படங்களைக் காண விரும்பும் ரசிகர்களுக்கு இந்த வசதிகள் புதிய அனுபவத்தை வழங்கும் என எதிர்பார்க்கப்படுகிறது.

60 அடி திரை… ரசிகர்களைக் கவரும் பிரம்மாண்டம்!

திருச்சியில் உள்ள மெகாஸ்டார் சினிமாஸ் திரையரங்கின் முக்கியச் சிறப்பம்சம் அதன் 60 அடி அகலமும் 32 அடி உயரமும் கொண்ட பிரம்மாண்டத் திரையாகும். பிரீமியம் லார்ஜ் ஃபார்மேட் (PLF) வசதியுடன் அமைக்கப்பட்டுள்ள இந்தத் திரை, திரைப்படக் காட்சிகளைப் பெரிய அளவில் ரசிக்க உதவுகிறது.

ஹாலிவுட் படங்கள் மட்டுமின்றி தமிழ் திரைப்படங்களையும் பிரம்மாண்டமான காட்சியமைப்பில் பார்க்க விரும்பும் ரசிகர்களுக்கு இந்தத் திரையரங்கு கூடுதல் தேர்வாக அமைகிறது. வழக்கமான திரையரங்குகளுடன் ஒப்பிடும்போது திரையின் அளவு, காட்சித் தெளிவு, ஒலி அமைப்பு போன்றவை பார்வையாளர்களின் அனுபவத்தைத் தீர்மானிக்கும் முக்கிய அம்சங்களாக உள்ளன.

770 இருக்கைகள்… சொகுசு வசதிகளும் தயார்!

இந்தத் திரையரங்கில் மொத்தம் 770 இருக்கைகள் உள்ளன. நீண்ட நேரம் அமர்ந்து திரைப்படம் பார்ப்பவர்களின் வசதியைக் கருத்தில் கொண்டு பிரீமியம் சோஃபாக்கள், கால்களை நீட்டி ஓய்வாக அமரக்கூடிய இருக்கைகள் மற்றும் பின்னால் சாய்ந்து அமரக்கூடிய ரெக்லைனர் இருக்கைகள் உள்ளிட்ட வசதிகள் அமைக்கப்பட்டுள்ளன.

இதனால் குடும்பத்துடன் திரைப்படம் பார்க்க வருபவர்கள், நண்பர்களுடன் வருபவர்கள் எனப் பலதரப்பட்ட ரசிகர்களுக்கும் ஏற்ற அனுபவத்தை வழங்குவதே இதன் நோக்கமாகும்.

4K லேசர் புரொஜெக்டர்… 360 டிகிரி ஒலி அனுபவம்!

திரையரங்கில் காட்சித் தெளிவை மேம்படுத்தும் வகையில் கிறிஸ்டி 4K RGB லேசர் புரொஜெக்டர் பொருத்தப்பட்டுள்ளது. 3D திரைப்படங்களுக்காக டிரிபிள்-பீம் தொழில்நுட்பமும் பயன்படுத்தப்படுகிறது.

மேலும், ஸ்கோப் மற்றும் பிளாட் ஆகிய இருவிதமான திரை வடிவங்களுக்கும் ஏற்ற தொழில்நுட்ப வசதிகள் உள்ளன. 64 சேனல் டால்பி அட்மாஸ் ஒலி அமைப்பு மூலம் அரங்கின் பல்வேறு பகுதிகளிலும் ஒலியைத் தெளிவாகக் கேட்கும் அனுபவத்தை வழங்கும் வகையில் ஏற்பாடுகள் செய்யப்பட்டுள்ளன.

திருச்சிக்கு மட்டுமல்ல… சுற்றியுள்ள மாவட்ட ரசிகர்களுக்கும் புதிய தேர்வு!

திருச்சி மாநகரம் கல்வி, வணிகம், மருத்துவம் மற்றும் போக்குவரத்தில் முக்கிய மையமாக விளங்குகிறது. திரையரங்குகளிலும் நவீன வசதிகள் அதிகரிப்பது நகரின் பொழுதுபோக்குத் துறைக்கு ஊக்கமளிக்கும் அம்சமாகும்.

தஞ்சாவூர், புதுக்கோட்டை, கரூர், பெரம்பலூர் உள்ளிட்ட சுற்றுவட்டார மாவட்டங்களில் இருந்து திருச்சிக்கு வரும் சினிமா ரசிகர்களுக்கும் இத்தகைய பிரம்மாண்டத் திரையரங்குகள் கூடுதல் தேர்வை வழங்குகின்றன.

திரையரங்கின் தற்போதைய வசதிகள் குறித்து வெளியான தகவல்களின்படி, மெகாஸ்டார் சினிமாஸ் நவீனத் தொழில்நுட்ப வசதிகளுடன் செயல்பட்டு வருகிறது. திரைப்படங்களின் திரையிடல் அட்டவணை, டிக்கெட் கட்டணம் மற்றும் இருக்கைகள் கிடைப்பது போன்ற விவரங்களைப் பார்வையாளர்கள் முன்கூட்டியே உறுதிப்படுத்திக் கொள்வது நல்லது.

திருச்சியில் சினிமா பார்க்கும் அனுபவம் அடுத்த கட்டத்துக்குச் செல்லுமா? பிரம்மாண்டத் திரையும் நவீன ஒலி அமைப்பும் ரசிகர்களின் வரவேற்பைப் பெறுமா? நிச்சயம் வரவேற்பு கிடைக்கும் என்று விபரமறிந்த வட்டாரங்கள் உறுதியாக தெரிவிக்கின்றன.

தீபாவளி ஸ்பெஷல் ரயில்கள்: அக்டோபர் 29 முதல் முன்பதிவு தொடக்கம்

எஸ்.ஜெகநாதன், மயிலாடுதுறை — Wed, 28 Oct 2026 13:36:01 +0530

திருச்சி: தீபாவளிப் பண்டிகைக் காலத்தில் பயணிகளின் தப்ப முடியாத கூட்ட நெரிசலைக் குறைக்கவும், பொதுமக்கள் தங்கள் சொந்த ஊர்களுக்கு எவ்வித சிரமமுமின்றி பாதுகாப்பாகப் பயணம் செய்வதை உறுதி செய்யவும் தெற்கு ரயில்வேயின் திருச்சிராப்பள்ளி கோட்டம் சார்பில் சிறப்பு ரயில்கள் இயக்கப்படுவதற்கான அறிவிப்பு அதிகாரப்பூர்வமாக வெளியிடப்பட்டுள்ளது. இதன்படி, தாம்பரம் மற்றும் நாகர்கோவில் இடையே பயணிகள் சிறப்பு விரைவு ரயில்கள் இயக்கப்படவுள்ளதாகத் தெரிவிக்கப்பட்டுள்ளது.

இந்த சிறப்பு ரயில் சேவைகள் குறித்த முழுமையான விவரங்கள் மற்றும் அட்டவணைகள் தற்போது வெளியிடப்பட்டு பொதுமக்களின் கவனத்திற்குக் கொண்டுவரப்பட்டுள்ளன. பண்டிகைக் காலங்களில் வழக்கமாக ஏற்படும் கடுமையான இடநெருக்கடியைத் தவிர்க்க இந்த சிறப்பு ஏற்பாடு மிகவும் பயனுள்ளதாக அமையும் என்று ரயில் பயணிகள் கருத்தாக உள்ளது.

சிறப்பு ரயில் இயக்க அட்டவணை மற்றும் வழித்தடம்

இந்த சிறப்பு ரயில் சேவையின் ஒரு பகுதியாக, தாம்பரத்தில் இருந்து நாகர்கோவிலுக்கும், மறுமார்க்கத்தில் நாகர்கோவிலில் இருந்து தாம்பரத்திற்கும் ரயில்கள் இயக்கப்படவுள்ளன. அதன்படி, ரயில் எண் 06153 கொண்ட தாம்பரம் - நாகர்கோவில் விரைவு சிறப்பு ரயில், வரும் நவம்பர் 6, 2026 அன்று வெள்ளிக்கிழமையன்று நள்ளிரவு 11.55 மணிக்குத் தாம்பரத்தில் இருந்து புறப்பட்டு, மறுநாள் சனிக்கிழமை பிற்பகல் 3.30 மணிக்கு நாகர்கோவில் சென்றடையும்.

இந்தச் சேவையானது குறிப்பிட்ட தேதியில் ஒரே ஒரு முறை மட்டுமே இயக்கப்படும். மறுமார்க்கத்தில் இயக்கப்படும் ரயில் எண் 06154 கொண்ட நாகர்கோவில் - தாம்பரம் விரைவு சிறப்பு ரயில், நவம்பர் 9, 2026 அன்று திங்கட்கிழமையன்று இரவு 9.00 மணிக்கு நாகர்கோவிலில் இருந்து புறப்பட்டு, மறுநாள் செவ்வாய்க்கிழமை காலை 11.30 மணிக்குத் தாம்பரம் வந்து சேரும். இந்தச் சேவையும் குறிப்பிட்ட தேதிக்கான ஒற்றைச் சேவையாக மட்டுமே அறிவிக்கப்பட்டுள்ளது.

ரயில் நின்று செல்லும் முக்கிய நிலையங்கள் மற்றும் நேர விவரங்கள்

இரு திசைகளிலும் இயக்கப்படும் இந்தச் சிறப்பு விரைவு ரயிலானது பயணிகளின் வசதிக்காக பல்வேறு முக்கிய ரயில் நிலையங்களில் நின்று செல்லும் வகையில் வழித்தடங்கள் அமைக்கப்பட்டுள்ளன. தாம்பரத்தில் இருந்து புறப்படும் இந்த ரயில் செங்கல்பட்டு, விழுப்புரம், திருப்பாதிரிப்புலியூர், சிதம்பரம், சீர்காழி, மயிலாடுதுறை, கும்பகோணம், பாபநாசம், தஞ்சாவூர் மற்றும் திருச்சிராப்பள்ளி ஆகிய முக்கிய சந்திப்பு நிலையங்களை அடைந்து செல்லும்.

தொடர்ந்து திண்டுக்கல், மதுரை, விருதுநகர், சாத்தூர், கோவில்பட்டி, திருநெல்வேலி மற்றும் வள்ளியூர் ஆகிய பகுதிகள் வழியாகச் சென்று நாகர்கோவிலைச் சென்றடையும். இதே போன்று மறுமார்க்கத்திலும் இதே வழித்தடங்களில் நிலையங்களை அடைந்து தாம்பரத்தை வந்தடையும் வகையில் நேர அட்டவணை திட்டமிடப்பட்டுள்ளது. இந்த வழித்தடங்களில் உள்ள அனைத்துப் பயணிகளும் இந்தச் சேவைகளைப் பயன்படுத்தித் தங்களது பயணங்களைத் திட்டமிட்டுக் கொள்ளுமாறு கேட்டுக்கொள்ளப்பட்டுள்ளனர்.

ரயிலின் பெட்டி அமைப்பு மற்றும் முன்பதிவு தொடங்கும் நேரம்

பயணிகளின் வசதியைப் பெருக்கும் வகையில் இந்தச் சிறப்பு ரயிலில் பல்வேறு வகையான பெட்டிகள் இணைக்கப்பட்டுள்ளன. இந்தத் ரயிலில் இரண்டு குளிரூட்டப்பட்ட இரண்டாம் வகுப்புப் பெட்டிகள் (2-AC), மூன்று குளிரூட்டப்பட்ட மூன்றாம் வகுப்புப் பெட்டிகள் (3-AC), பதினொரு படுக்கை வசதி கொண்ட பெட்டிகள் (Sleeper Class), நான்கு பொது இரண்டாம் வகுப்புப் பெட்டிகள் (General Second Class) மற்றும் இரண்டு லக்கேஜ் மற்றும் பிரேக் வேன்கள் (Luggage cum Brake Vans) இடம்பெற்றுள்ளன. இதனால் அனைத்துப் பிரிவு பயணிகளும் தங்களது வசதிக்கு ஏற்ப இடங்களைப் பெற முடியும்.

இந்தத் பண்டிகைக் கால சிறப்பு ரயில்களுக்கான முன்கூட்டிய முன்பதிவு அக்டோபர் 29, 2026 அன்று காலை 8.00 மணி முதல் தொடங்குகிறது. பொதுமக்கள் அனைவரும் இந்த வாய்ப்பைப் பயன்படுத்தித் தங்களது பயணச் சீட்டுகளை முன்கூட்டியே முன்பதிவு செய்து கொள்ளுமாறு திருச்சிராப்பள்ளி கோட்ட மக்கள் தொடர்புத்துறை சார்பில் வெளியிடப்பட்டுள்ள செய்திக்குறிப்பில் தெரிவிக்கப்பட்டுள்ளது.