tiruvannamalai

Tamil Nadu School Holiday Today: மாணவர்களுக்கு ஹேப்பி நியூஸ்! எந்தெந்த மாவட்டங்களுக்கு லீவு? முழு விவரம் இதோ!

சிவரஞ்சித் — Fri, 23 Oct 2026 08:06:44 +0530

புதுச்சேரி: தமிழகத்தில் வடகிழக்குப் பருவமழை தீவிரமடைந்துள்ள நிலையில், தொடர் கனமழை காரணமாக புதுச்சேரி, காரைக்கால், விழுப்புரம், கள்ளக்குறிச்சி ஆகிய பகுதிகளில் பள்ளிகளுக்கு மட்டும் இன்று (அக்டோபர் 23) விடுமுறை அறிவிக்கப்பட்டுள்ளது. திருவண்ணாமலை மாவட்டத்தில் பள்ளிகள் மற்றும் கல்லூரிகளுக்கு விடுமுறை அறிவிக்கப்பட்டுள்ளது.

கனமழை எச்சரிக்கை

தமிழகம் மற்றும் புதுச்சேரியில் வடகிழக்குப் பருவமழை தீவிரமடைந்து வருகிறது. இதன் காரணமாக பல்வேறு மாவட்டங்களில் மழை பெய்து வரும் நிலையில், சில இடங்களில் கனமழை முதல் மிக கனமழை வரை பெய்ய வாய்ப்புள்ளதாக வானிலை ஆய்வு மையம் எச்சரித்துள்ளது. மேலும், இடி, மின்னல் மற்றும் பலத்த காற்றுடன் மழை பெய்யக்கூடும் எனவும் தெரிவிக்கப்பட்டுள்ளது.

தொடர் மழையால் மாணவர்கள் பள்ளிகளுக்குச் சென்று திரும்புவதில் சிரமம் ஏற்படக்கூடும் என்பதால், முன்னெச்சரிக்கை நடவடிக்கையாக மாவட்ட நிர்வாகங்கள் விடுமுறை அறிவித்துள்ளன.

எந்தெந்த மாவட்டங்களில் விடுமுறை?

புதுச்சேரி, காரைக்கால்: கனமழை காரணமாக புதுச்சேரி மற்றும் காரைக்காலில் அரசு, தனியார் பள்ளிகளுக்கு மட்டும் விடுமுறை அறிவிக்கப்பட்டுள்ளது. இதுகுறித்து புதுச்சேரி கல்வித்துறை அமைச்சர் நமச்சிவாயம் அறிவிப்பு வெளியிட்டுள்ளார்.

விழுப்புரம்: மாவட்டத்தில் தொடர்ந்து பெய்து வரும் கனமழையைக் கருத்தில் கொண்டு, இன்று ஒருநாள் மட்டும் பள்ளிகளுக்கு விடுமுறை அறிவித்து மாவட்ட ஆட்சியர் ஷேக் அப்துல் ரகுமான் உத்தரவிட்டுள்ளார்.

கள்ளக்குறிச்சி: தொடர் மழை காரணமாக மாவட்டத்தில் உள்ள பள்ளிகளுக்கு இன்று விடுமுறை அறிவிக்கப்பட்டுள்ளது.

திருவண்ணாமலை: கனமழை காரணமாக மாணவர்களின் பாதுகாப்பைக் கருத்தில் கொண்டு, மாவட்டத்தில் உள்ள பள்ளிகள் மற்றும் கல்லூரிகளுக்கு இன்று விடுமுறை அறிவிக்கப்பட்டுள்ளது.

மாணவர்கள் கவனத்திற்கு!

இன்று விடுமுறை அறிவிக்கப்பட்டுள்ள பகுதிகளில் மாணவர்கள் மற்றும் பெற்றோர்கள் அந்தந்த மாவட்ட நிர்வாகம், பள்ளி நிர்வாகம் வெளியிடும் அறிவிப்புகளைப் பின்பற்ற வேண்டும். பள்ளிகளுக்கு விடுமுறை அறிவிக்கப்பட்டுள்ள மாவட்டங்களில் கல்லூரிகளுக்கும் விடுமுறை எனக் கருத வேண்டாம்; திருவண்ணாமலை மாவட்டத்தில் மட்டும் பள்ளி, கல்லூரிகள் இரண்டுக்கும் விடுமுறை அறிவிக்கப்பட்டுள்ளதாகத் தெரிவிக்கப்பட்டுள்ளது.

பொதுமக்களுக்கு அறிவுறுத்தல்

தொடர் மழை காரணமாக தாழ்வான பகுதிகளில் மழைநீர் தேங்கும் வாய்ப்பு உள்ளதால் பொதுமக்கள் எச்சரிக்கையுடன் இருக்க வேண்டும். மழைநீர் தேங்கிய சாலைகள் மற்றும் நீர்நிலைகளுக்கு அருகில் தேவையின்றிச் செல்வதைத் தவிர்க்க வேண்டும். இடி, மின்னல் ஏற்படும் நேரங்களில் திறந்தவெளிகளில் நிற்பதைத் தவிர்த்து பாதுகாப்பான இடங்களில் இருக்க வேண்டும். மழை நிலவரத்தைப் பொறுத்து அடுத்தகட்ட நடவடிக்கைகள் மேற்கொள்ளப்படலாம் என்பதால், பொதுமக்கள் அதிகாரப்பூர்வ அறிவிப்புகளைத் தொடர்ந்து கவனிக்க வேண்டும்.

சென்னை உட்பட தமிழகம் முழுவதும் பரவலாக மழை

தனியார் வானிலை ஆய்வாளர் பிரதீப் ஜான் வெளியிட்டுள்ள புதிய அறிக்கையில், “ பல மணிநேரங்களுக்குப் பிறகு, தெற்குச் சென்னையிலிருந்து மேகங்கள் மெல்ல சென்னை நகருக்குள் நகர்ந்து வருகின்றன. சென்னையின் கடலோரப் பகுதிகளில் மழை தொடங்கத் தொடங்கி, நகரின் பெரும்பாலான பகுதிகளுக்கும் பரவும். இன்று சென்னைக்கு மிக முக்கியமான நாள் அல்ல; 24, 25 மற்றும் 26 ஆகிய தேதிகள் சென்னைக்கு மிகவும் சாதகமான நாட்களாக இருக்கும். தமிழகத்தின் உட்புறப் பகுதிகள் - டெல்டா மற்றும் தெற்குத் தமிழகப் பகுதிகள், கடலூர் விருதுநகர், திண்டுக்கல், தேனி, ஈரோடு, தென்காசி, திருப்பூர், அரியலூர், டெல்டா பகுதிகள், திருவாரூர், கடலூர் மற்றும் நாகப்பட்டினம் ஆகிய இடங்களில் பரவலான மழை பெய்துள்ளது.” என விவரித்துள்ளார்.

இன்று மிக கன மழைக்கான எச்சரிக்கை:

இதனிடையே, வானிலை மையம் வெளியிட்டுள்ள அறிக்கையில், “தமிழக கடலோர பகுதிகளுக்கு அப்பால் உள்ள தென்மேற்கு வங்கக்கடல் பகுதிகளில் நிலவிய காற்றழுத்த தாழ்வுப் பகுதி குமரிக்கடல் பகுதிகள் மற்றும் அதனை ஒட்டிய தென் தமிழக பகுதிகள் மற்றும் கேரள பகுதிகளில் நிலவுகிறது. அதனால் இன்று கன்னியாகுமரி, நீலகிரி மற்றும் கோயம்புத்தூர் மாவட்டங்களில் ஓரிரு இடங்களில் இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) கூடிய கன முதல் மிக கன மழை பெய்யக்கூடும்.

கன மழைக்கான எச்சரிக்கை:

மேலும், ஈரோடு, சேலம், நாமக்கல், கரூர், திருச்சிராப்பள்ளி, தேனி, தென்காசி, திண்டுக்கல், மதுரை, விருதுநகர், புதுக்கோட்டை, தஞ்சாவூர், திருவாரூர், நாகப்பட்டினம். மயிலாடுதுறை, சிவகங்கை, ராமநாதபுரம், தூத்துக்குடி, திருநெல்வேலி, அரியலூர், கடலூர், விழுப்புரம், திருப்பூர், பெரம்பலூர், சென்னை மற்றும் திருவள்ளூர்' மாவட்டங்களில் ஓரிரு இடங்களிலும், புதுவை மற்றும் காரைக்கால் பகுதிகளிலும் இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) கூடிய கன மழை பெய்யக்கூடும். ஏனைய தமிழகத்தில் அநேக இடங்களில் இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) கூடிய மிதமான மழை பெய்யக்கூடும்.

சென்னை பகுதிகளுக்கான இன்றைய வானிலை

சென்னையை பொறுத்தவரை இன்று வானம் பொதுவாக மேகமூட்டத்துடன் காணப்படும். நகரின் ஒருசில பகுதிகளில் இடி மின்னலுடன் கூடிய மிதமான / கன மழை பெய்ய வாய்ப்புள்ளது. அதிகபட்ச வெப்பநிலை 31-32° செல்சியஸை ஒட்டியும், குறைந்தபட்ச வெப்பநிலை 25-26° செல்சியஸை ஒட்டியும் இருக்கக்கூடும்.

அண்ணாமலையாருக்கு அரோகரா! திருவண்ணாமலை மகா தீபம் எப்போது? எத்தனை மணிக்கு?

ராஜேஷ். எஸ் — Sun, 18 Oct 2026 07:54:51 +0530

கார்த்திகை தீப திருவிழாவை முன்னிட்டு அண்ணாமலையார் கோயிலில் மேற்கொள்ள வேண்டிய பணிகள் குறித்து இந்து சமய அறநிலைத்துறை அமைச்சர் ரமேஷ் மற்றும் பொதுப்பணித்துறை அமைச்சர் ஆதவ் அர்ஜுனா ஆய்வு மேற்கொண்டனர். மேலும், அண்ணாமலையார் கோயிலுக்கு வந்த 8 வயது யானைக்கு நமச்சிவாயா என பெயர் சூட்டி பக்தர்களுடன் அன்னதானம் சாப்பிட்டனர்.

திருவண்ணாமலையில் ஆண்டுதோறும் வெகு விமர்சையாக திருக்கார்த்திகை தீபத் திருவிழா நடைபெறும். அடுத்த மாதம் 15 ஆம் தேதி அண்ணாமலையார் கோயிலில் கார்த்திகை தீபத் திருவிழா கொடியேற்றத்துடன் தொடங்கி 24 ஆம் தேதி அதிகாலையில் அண்ணாமலையார் கோயில் கருவறையில் பரணி தீபமும், மாலை ஆறு மணிக்கு 2668 அடி உயரம் உள்ள அண்ணாமலையார் மலையின் மீது மகாதீபம் ஏற்றப்படும்.

இந்த நிகழ்வை காண சுமார் 40 லட்சத்துக்கு மேற்பட்ட வெளி மாநில மற்றும் வெளி மாவட்ட பக்தர்கள் திருவண்ணாமலைக்கு வருவார்கள் என்பதால் அண்ணாமலையார் கோயில் மற்றும் கிரிவலப் பாதையில் மேற்கொள்ள வேண்டிய அடிப்படை கட்டமைப்புகள் மற்றும் பாதுகாப்பு ஏற்பாடுகள், தற்காலிக பேருந்து நிலையங்கள் ஆகியவற்றினை இந்து சமய அறநிலை துறை அமைச்சர் ரமேஷ் மற்றும் பொதுப்பணித்துறை அமைச்சர் ஆதவ் அர்ஜுனா ஆகியோர் ஆய்வு செய்தனர்.

கோயிலில் நடைபெறும் பரணி தீபம் மற்றும் மகா தீபத்திற்காக எவ்வளவு பக்தர்களை கோயிலின் உள்ளே அனுமதிப்பது மற்றும் பக்தர்களுக்கான மருத்துவ வசதி, சுகாதார வசதி பாதுகாப்பு வசதி ஆகியவற்றை குறித்து அதிகாரிகளுடன் ஆய்வு மேற்கொண்டார். ஆய்வு கூட்டத்தில் மாவட்ட ஆட்சியர் வந்தனா கார்க், மற்றும் துறை சார்ந்த அதிகாரிகள் பங்கேற்றனர்.

பின்னர் அண்ணாமலையார் கோவிலில் புதிதாக வரவழைக்கப்பட்ட எட்டு வயது யானைக்கு நமச்சிவாயா என ஆதவ் அர்ஜுனா பெயர் சூட்டினார்.

பின்னர் பக்தர்களுக்கு அளிக்கப்படும் அன்னதானம் குறித்து ஆய்வு செய்த அமைச்சர்கள் மற்றும் மாவட்ட ஆட்சியர் ஆகியோர் பக்தர்களோடு பக்தர்களாக அமர்ந்து அன்னதான உணவை உண்டனர்.

தி.மலை கோவிலுக்குள் தொப்பியுடன் இஸ்லாமியரை அழைத்து செல்வதா? கொதிக்கும் நாராயணன் திருப்பதி!

வினோத்குமார் — Sat, 17 Oct 2026 21:05:33 +0530

உலக புகழ்பெற்ற திருவண்ணாமலை அண்ணாமலையார் கோவிலில் ஒவ்வொரு ஆண்டும் கார்த்திகை தீபத்திருவிழா வெகு விமர்சியாக நடைபெறுவது வழக்கம். இந்நிலையில் இந்த ஆண்டுக்கான கார்த்திகை தீபத் திருவிழா நவம்பர் 15ம் தேதி கோலாகலமாகத் தொடங்க உள்ளது. அன்றைய தினம் லட்சக்கணக்கான பக்தர்கள் வருகை தருவார்கள் என எதிர்பார்க்கப்படுகிறது. இதற்கான பாதுகாப்பு மற்றும் முன்னேற்பாடுகளை அறநிலையத்துறை மற்றும் கோவில் நிர்வாகம் சார்பில் செய்யப்பட்டு வருகின்றன.

அண்ணாமலையார் கோவிலில் ஆய்வு

இந்நிலையில், மாவட்ட பொறுப்பு அமைச்சரும், பொதுப்பணித்துறை மற்றும் நெடுஞ்சாலைத்துறை அமைச்சர் ஆதவ் அர்ஜுனா மற்றும் இந்து சமய அறநிலையத்துறை அமைச்சர் ரமேஷ் ஆகியோர் கோவிலுக்கு சென்று ஆய்வு மேற்கொண்டனர். அப்போது அமைச்சரின் உதவியாளர் ஒருவர் இஸ்லாமிய மத அடையாளத்தைக் குறிக்கும் வகையிலான தொப்பியை அணிந்தபடி கோயிலுக்குள் நுழைந்துள்ளார்.

இதையும் படிங்க: School Student: 10-ம் வகுப்பு தேர்வு எழுதும் மாணவர்களுக்கு! அக்டோபர் 31 வரை கெடு! அரசு தேர்வுத்துறை முக்கிய அறிவிப்பு!

அரசியல் தலைவர்கள் கண்டனம்

இதற்கு அங்கிருந்த கோயில் நிர்வாகிகளும் சில தரப்பினரும் கடும் எதிர்ப்பு தெரிவித்தனர். இதனால் சிறிது நேரம் சலசலப்பு ஏற்பட்டது. இதையடுத்து தொப்பியைக் கழற்றிவிட்டு ஆய்வில் அமைச்சர் ஆதவ் அர்ஜூனாவின் உதவியாளர் பங்கேற்றதாக கூறப்படுகிறது. இதற்கு பல்வேறு தரப்பிலும் கண்டனம் எழுந்து வரும் நிலையில் இஸ்லாமியர் சட்டப்படி ஹிந்து கடவுளை ஏற்றுக்கொள்கிறேன் என்ற உறுதிமொழியை எழுதி கொடுத்தாரா? என நாராயணன் திருப்பதி கேள்வி எழுப்பியுள்ளார்.

இதுதொடர்பாக தமிழக பாஜகவின் தலைமைச் செய்தித் தொடர்பாளர் நாராயணன் திருப்பதி வெளியிட்டுள்ள எக்ஸ் தளத்தில்: திருவண்ணாமலை கோவிலில் தங்கள் மத அடையாளமான தொப்பி அணிந்த இஸ்லாமியரை அழைத்து சென்ற ஹிந்து அறநிலையத்துறை அமைச்சர் ரமேஷ் மற்றும் அமைச்சர் ஆதவ் அர்ஜுனா அவர்களை வன்மையாக கண்டிக்கிறேன்.

சென்னை உயர்நீதிமன்றத்தின் தீர்ப்பின் (30 ஜனவரி 2024)படி கொடிமரம்/ துவஜஸ்தம்பம் தாண்டி ஹிந்துக்கள் அல்லாதவர்களுக்கு நுழைய அனுமதி இல்லை.ஒரு வேளை, ஹிந்து அல்லாத ஒருவர் வழிபட விரும்பினால், தனக்கு அந்த கடவுளின் மீது முழு நம்பிக்கை இருப்பதாகவும், ஹிந்து கலாச்சாரம் மற்றும் கோவிலின் விதிகளை பின்பற்றுவதாகவும் எழுத்து பூர்வமாக தெரிவிப்பதோடு அந்த கோவிலின் பதிவேட்டில் பதிய வேண்டும்.

சட்டத்தை மதிக்காத அமைச்சர்கள்

இந்த நடைமுறைகள் பின்பற்றப்பட்டதா? அந்த இஸ்லாமியர் சட்டப்படி ஹிந்து கடவுளை ஏற்றுக்கொள்கிறேன் என்ற உறுதிமொழியை எழுதி கொடுத்தாரா? இதே போன்று மற்ற வழிபாட்டு தளங்களில் நடைபெற்றால் அந்த விதிகளை மீறுவார்களா அமைச்சர்கள்? ஐயோ! சிறுபான்மை மக்களின் உரிமைகளை பறிக்கிறார்களே என்று பொங்கியெழுவார்களே தமிழக அரசியல்வாதிகள்? சட்டத்தை மதிக்காத அமைச்சர்கள் எப்படி சட்டத்தை அமல்படுத்துவார்கள்? என கேள்வி எழுப்பியுள்ளார்.

ஒரே ஏத்து.. தூள் தூள் ஆனா துப்பாக்கிகள்..கலெக்டர் வந்தனாவின் அதிரடி ஆக்‌ஷன்

ராஜேஷ். எஸ் — Tue, 6 Oct 2026 13:03:19 +0530

திருவண்ணாமலை மாவட்ட ஆட்சியர் வந்தனா கார்க் முன்னிலையில் இன்று (06.10.2026) மாவட்ட ஆட்சியர் அலுலவக வளாகசத்தில் வனத்துறை சார்பில் வன உயிரின வார விழாவை முன்னிட்டு சட்ட விரோத நாட்டு துப்பாக்கிகள் சாலை உருளை (Road roller) கொண்டு அழிக்கப்பட்டது.

வன உயிரின பாதுகாப்புச் சட்டம், 1972ன் கீழ் வன விலங்குகளை திறம்பட பாதுகாக்கவும், சட்ட விரோத வேட்டையை தடுக்கவும், சட்ட விரோத நாட்டுத்துப்பாக்கிகளை தானாக முன் வந்து வனப்பகுதிகளில் வாழும் மக்கள் ஒப்படைக்கும் திட்டம் திருவண்ணாமலை வனக்கோட்டத்தில் செயல்படுத்தப்பட்டது.

அதனை முன்னிட்டு, திருவண்ணாமலை வனக்கோட்டத்தில் உரிமம் இல்லாமல் சட்ட விரோத துப்பாக்கிகள் வைத்திருக்க வாய்ப்புள்ள கிராமங்களின் பட்டியல் வனச்சரக வாரியாக தயாரிக்கப்பட்டது. பின்பு மேற்படி கிராமங்களில் ஒலிப்பெருக்கியின் மூலம் அறிவிப்பு செய்தல், பொதுமக்கள் விழிப்புணர்வு கூட்டம் நடத்துதல், கிராம வனக்குழு மற்றும் சூழல் மேம்பாட்டுக்குழு தலைவர்கள் மற்றும் உறுப்பினர்கள் கூட்டம் நடத்துதல், வீடு வீடாக சென்று துண்டு பிரசுரங்கள் விநியோகம் செய்தல், வனம் மற்றும் வன உயிரின குற்றங்களில் ஈடுபட்ட முன்னாள் குற்றவாளிகளிடம் உரையாடுதல், களப்பணியாளர்கள் மற்றும் பொதுமக்களுடன் விழிப்புணர்வு அணி வகுப்பு நடத்துதல், வன உரிமைச்சட்டத்தின் கீழ் உரிமை பெற்றவர்களின் கடமைகளை எடுத்துரைத்தல் போன்ற செயல்பாடுகள் களப்பணியாளர்களால் முன்னெடுக்கப்பட்டது.

அதன் விளைவாக ஒவ்வொரு கிராமங்களிலும் களப்பணியாளர்களால் குறிப்பிடப்பட்ட பொதுவான இடங்கள், மறைவான இடங்கள், கிராமக் கோவில்கள் போன்ற இடங்களில் பொதுமக்கள் தானாக முன் வந்து துப்பாக்கிகளை வைத்தனர். அவ்வாறு வைக்கப்பட்ட சட்ட விரோத துப்பாக்கிகள் 9 வனச்சரகங்கள் மூலம் 125 கைப்பற்றப்பட்டு சாலை உருளை (Road roller) கொண்டு அழிக்கப்பட்டது. அதிகபட்சமாக நாடானூர் வனச்சரகத்தில் - 41, இதர சரகங்களான சந்தவாசல் - 22, மேல்பட்டு - 19, போளூர் - 17, ஜமுனாமரத்தூர் - 15, தானிப்பாடி - 3, சாத்தனூர - 3, திருவண்ணாமலை - 3, செங்கம் - 2 ஆகிய எண்ணிக்கையிலான துப்பாக்கிகள் கைப்பற்றப்பட்டன. தீவிரமான பொது ஈடுபாட்டின் விளைவாக பல கிராம வாசிகள் சட்ட விரோத துப்பாக்கிகளை தாங்களாகவே முன் வந்து ஒப்படைத்து, அதன் மூலம் வன விலங்குப் பாதுகாப்பிற்கு பங்களித்துள்ளனர்.

இந்நிகழ்ச்சியில் திருவண்ணாமலை மாவட்ட காவல் கண்காணிப்பாளர் ரா.உதயகுமார், மாவட்ட வன அலுவலர் கு.சுதாகர், மாவட்ட வருவாய் அலுவலர் அ.சிவசுப்பிரமணியன், உதவி வனப்பாதுகாவலர் க.வினோத்ராஜ், வனச்சரக அலுவலர்கள் எம்.முருகன், குணசேகரன், வெங்கடாச்சலம், விஜயசாரதி, மணிகண்டன், தமிழரசன், கமலாசணன், கோகுல்நாத், சக்திவேல் மற்றும் துறை சார்ந்த அலுவலர்கள் உடனிருந்தனர்.

EV Velu Case: எ.வ.வேலு மற்றும் அவரது மகன் மீதான வழக்கு.. அலறிய படி கோர்ட் கதவை தட்டிய முன்னாள் அமைச்சர்!

வினோத்குமார் — Sat, 3 Oct 2026 18:07:06 +0530

கடந்த 2025-ம் ஆண்டு டிசம்பர் 14-ம் தேதி திமுக வடக்கு மண்டல இளைஞரணி மாநாடு திருவண்ணாமலையில் நடைபெற்றது. இந்த மாநாட்டு திடலை சமன் செய்வதற்காக அருகில் உள்ள மலப்பம்பாடி ஏரியில் இருந்து அனுமதிக்கப்பட்ட அளவை விட சட்டவிரோதமாக 12 ஏக்கர் பரப்பளவுக்கு, 10 முதல் 23 அடி ஆழத்துக்கு மண் எடுக்கப்பட்டுள்ளது. இதன்மூலம் அரசுக்கு 8 கோடி ரூபாய் அளவுக்கு இழப்பு ஏற்பட்டுள்ளதாக அறப்போர் இயக்கம் சார்பில் கடந்த ஆகஸ்ட் 13-ம் தேதி லஞ்ச ஒழிப்புத் துறையிடம் புகார் அளிக்கப்பட்டது.

லஞ்ச ஒழிப்புத்துறை வழக்குப் பதிவு

இந்த புகாரின் அடிப்படையில், முன்னாள் அமைச்சர் எ.வ.வேலு, அவரது மகன் எ.வ.குமரன் மீது லஞ்ச ஒழிப்புத்துறை வழக்குப் பதிவு செய்துள்ளனர். இந்த வழக்கை ரத்து செய்யக் கோரி முன்னாள் அமைச்சர் எ.வ.வேலு மற்றும் அவரது மகன் எ.வ.குமரன் தரப்பில் சென்னை உயர்நீதிமன்றத்தில் மனு தாக்கல் செய்யப்பட்டுள்ளது.

இதையும் படிங்க: TASMAC: குடிமகன்களுக்கு ஷாக்கிங் நியூஸ்! டாஸ்டாக் கடைகள் 4 நாட்கள் மூடல்! எந்தெந்த மாவட்டங்களுக்கு?

இந்நிலையில் முதல் தகவல் அறிக்கை இல்லாமல் வழக்கை ரத்து செய்யக் கோரிய மனுவை விசாரணைக்கு பட்டியலிடக் கோரி இருவர் தரப்பிலும் மனுக்கள் தாக்கல் செய்யப்பட்டிருந்தன. இந்த மனுக்களை விசாரித்த நீதிபதி வி.லட்சுமி நாராயணன், முதல் தகவல் அறிக்கை இல்லாமல், வழக்கை ரத்து செய்யக் கோரிய மனுவை எண்ணிட்டு, விசாரணைக்கு பட்டியலிட உத்தரவிட்டுள்ளார்.

விரைவில் விசாரணை

இதன் காரணமாக, சட்டவிரோதமாக ஏரி மண் எடுத்தது தொடர்பான வழக்கை ரத்து செய்யக் கோரி எ.வ.வேலு, அவரது மகன் தாக்கல் செய்த மனுக்கள் விரைவில் விசாரணைக்கு பட்டியலிடப்படும் என எதிர்பார்க்கப்படுகிறது.

ஏற்கனவே ஒப்பந்ததாரரிடம் இருந்து 1,131 கோடி ரூபாய் பண பரிமாற்றம் செய்யப்பட்டது தொடர்பான வழக்கில் முன்னாள் அமைச்சர் எ.வ.வேலுவிடம் விசாரணை செய்ய அனுமதி அளிக்க வேண்டும் என்று சென்னை உயர்நீதிமன்றத்தில் லஞ்ச ஒழிப்புத்துறை கோரிக்கை விடுத்தது. இதனை ரத்து செய்யக்கோரி முன்னாள் அமைச்சர் எ.வ வேலு சென்னை உயர்நீதிமன்றத்தில் மனு தாக்கல் செய்து குறிப்பிடத்தக்கது.

18 ஆண்டுகளாக இழுபறி... ரூ.1,400 கோடி திண்டிவனம்-திருவண்ணாமலை ரயில் திட்டத்தில் புதிய எதிர்பார்ப்பு!

சிவரஞ்சித் — Mon, 28 Sep 2026 10:11:23 +0530

விழுப்புரம்: திண்டிவனம்–செஞ்சி–திருவண்ணாமலை இடையே புதிய ரயில் பாதை அமைக்கும் திட்டத்தை விரைவுபடுத்துவதற்காக, திட்டத்துக்குத் தேவையான நிலம் கையகப்படுத்தும் பணிகளை தமிழக அரசு துரிதப்படுத்த வேண்டும் என்ற கோரிக்கை வலுத்துள்ளது. இதற்காக திட்டம் செயல்படுத்தப்படும் பகுதிகளைச் சேர்ந்த எம்.பி., எம்.எல்.ஏ.,க்கள் ஒருங்கிணைந்து நடவடிக்கை எடுக்க வேண்டும் என பொதுமக்கள் மற்றும் ரயில் பயணிகள் வலியுறுத்தியுள்ளனர்.

2006-ல் அறிவிக்கப்பட்ட திட்டம்

திண்டிவனம்-செஞ்சி-திருவண்ணாமலை இடையே சுமார் 71 கி.மீ. தொலைவுக்கு புதிய ரயில் பாதை அமைக்கும் திட்டம் கடந்த 2006-07-ம் ஆண்டு ரயில்வே திட்டத்தில் சேர்க்கப்பட்டது. இதையடுத்து, 2008-ம் ஆண்டு செஞ்சியில் திட்டத்துக்கான அடிக்கல் நாட்டு விழாவும் நடைபெற்றது.

ஆனால், திட்டம் அறிவிக்கப்பட்டு பல ஆண்டுகள் கடந்தும் பணிகள் முழுமையாக தொடங்காததால், பொதுமக்களிடையே அதிருப்தி ஏற்பட்டது. குறிப்பாக, திட்டத்துக்குத் தேவையான நிலத்தை கையகப்படுத்தும் பணிகள் முழுமையாக நிறைவு பெறாதது முக்கிய காரணமாக கூறப்பட்டது.

கைவிடப்படும் நிலைக்கு சென்ற திட்டம்

திட்டத்துக்கான நிலம் கையகப்படுத்தும் பணிகளில் ஏற்பட்ட தாமதம் காரணமாக, கடந்த சில ஆண்டுகளுக்கு முன்பு இந்த ரயில் பாதை திட்டத்தை கைவிடும் நிலைக்கு ரயில்வே சென்றதாக தெரிவிக்கப்பட்டது. இதனால் திண்டிவனம், செஞ்சி, திருவண்ணாமலை மற்றும் சுற்றுவட்டார பகுதிகளைச் சேர்ந்த மக்கள் ஏமாற்றமடைந்தனர்.

இந்நிலையில், நீண்ட காலமாக பொதுமக்கள் தொடர்ந்து வலியுறுத்தி வந்ததன் காரணமாக, திண்டிவனம்–செஞ்சி-திருவண்ணாமலை புதிய ரயில் பாதை திட்டத்தை மீண்டும் செயல்படுத்த ரயில்வே வாரியம் முடிவு செய்தது.

மீண்டும் உயிர்பெற்ற திட்டம்

இந்த திட்டத்தை மீண்டும் செயல்படுத்துவது தொடர்பான அறிவிப்பை ரயில்வே துறை அமைச்சர் கடந்த மார்ச் மாதம் நாடாளுமன்றத்தில் தெரிவித்ததாக கூறப்படுகிறது.

தற்போதைய மதிப்பீட்டின்படி, திட்டத்தை செயல்படுத்த சுமார் ரூ.1,400 கோடி செலவாகும் என மதிப்பிடப்பட்டுள்ளது. மேலும், திட்டத்தை 2028-ம் ஆண்டுக்குள் நிறைவு செய்ய மத்திய அரசு இலக்கு நிர்ணயித்துள்ளதாக தெரிவிக்கப்பட்டுள்ளது.

இதனால், பல ஆண்டுகளாக கிடப்பில் இருந்த திண்டிவனம்-செஞ்சி-திருவண்ணாமலை ரயில் பாதை திட்டம் மீண்டும் செயல்பாட்டுக்கு வரும் என்ற எதிர்பார்ப்பு பொதுமக்களிடையே ஏற்பட்டுள்ளது.

276 ஹெக்டேர் நிலம் தேவை

புதிய ரயில் பாதை அமைக்கும் பணிக்காக மொத்தம் 276 ஹெக்டேர் நிலம் தேவைப்படுவதாக ரயில்வே தரப்பில் தெரிவிக்கப்பட்டுள்ளது. இதில் இதுவரை 33 ஹெக்டேர் நிலம் மட்டுமே கையகப்படுத்தப்பட்டுள்ளதாகவும், இன்னும் 243 ஹெக்டேர் நிலம் கையகப்படுத்த வேண்டியுள்ளதாகவும் கூறப்படுகிறது.

திட்டத்தை 2028-ம் ஆண்டுக்குள் நிறைவேற்ற இலக்கு நிர்ணயிக்கப்பட்டுள்ள நிலையில், மீதமுள்ள நிலத்தை கையகப்படுத்தும் பணிகள் தாமதமானால், மீண்டும் திட்டம் காலதாமதமாகும் சூழல் ஏற்படலாம் என பொதுமக்கள் அச்சம் தெரிவித்துள்ளனர்.

மூன்று லோக்சபா தொகுதிகள்

திண்டிவனம் முதல் திருவண்ணாமலை வரையிலான பகுதிகளை உள்ளடக்கிய இந்த ரயில் பாதை திட்டத்தின் வழித்தடத்தில் விழுப்புரம், ஆரணி மற்றும் திருவண்ணாமலை ஆகிய மூன்று லோக்சபா தொகுதிகள் இடம்பெறுகின்றன.

தற்போது விழுப்புரம் தொகுதி எம்.பி.யாக வி.சி.க.வைச் சேர்ந்த ரவிக்குமார், ஆரணி தொகுதி எம்.பி.யாக தி.மு.க.வைச் சேர்ந்த தரணிவேந்தன், திருவண்ணாமலை தொகுதி எம்.பி.யாக தி.மு.க.வைச் சேர்ந்த அண்ணாதுரை ஆகியோர் உள்ளனர்.

ஐந்து சட்டசபை தொகுதிகள்

அதேபோல், இந்த ரயில் பாதை திட்டத்தின் வழித்தடத்தில் திண்டிவனம், மயிலம், செஞ்சி, கீழ்பெண்ணாத்தூர் மற்றும் திருவண்ணாமலை ஆகிய ஐந்து சட்டசபை தொகுதிகளும் இடம்பெறுகின்றன.

இந்த தொகுதிகளில் திண்டிவனம் தொகுதியில் வி.சி.க.வைச் சேர்ந்த அமைச்சர் வன்னி அரசு, மயிலம் தொகுதியில் அ.தி.மு.க.வைச் சேர்ந்த முன்னாள் அமைச்சர் சி.வி.சண்முகம், செஞ்சி தொகுதியில் பா.ம.க.வைச் சேர்ந்த கணேஷ்குமார், கீழ்பெண்ணாத்தூர் தொகுதியில் அ.தி.மு.க.வைச் சேர்ந்த ராமச்சந்திரன், திருவண்ணாமலை தொகுதியில் தி.மு.க.வைச் சேர்ந்த முன்னாள் அமைச்சர் வேலு ஆகியோர் எம்.எல்.ஏ.,க்களாக உள்ளனர்.

ஒருங்கிணைந்து நடவடிக்கை தேவை

நீண்ட காலமாக எதிர்பார்க்கப்பட்ட இந்த ரயில் பாதை திட்டம் தற்போது மீண்டும் செயல்படுத்தப்படும் சூழல் உருவாகியுள்ளதால், அதற்குத் தேவையான நிலம் கையகப்படுத்தும் பணியை விரைந்து முடிப்பது முக்கியமானதாக உள்ளது.

இதற்காக விழுப்புரம் மற்றும் திருவண்ணாமலை மாவட்ட நிர்வாகங்கள், தமிழக அரசு மற்றும் ரயில்வே துறை ஆகியவற்றுடன் சம்பந்தப்பட்ட எம்.பி., எம்.எல்.ஏ.,க்கள் ஒருங்கிணைந்து செயல்பட வேண்டும் என கோரிக்கை எழுந்துள்ளது.

குறிப்பாக, இன்னும் கையகப்படுத்தப்பட வேண்டிய 243 ஹெக்டேர் நிலத்துக்கான பணிகளை விரைவுபடுத்தி, நில உரிமையாளர்களுடன் பேச்சுவார்த்தை நடத்துதல், தேவையான நிர்வாக நடவடிக்கைகளை மேற்கொள்ளுதல் உள்ளிட்ட பணிகளை துரிதப்படுத்த வேண்டும் என பொதுமக்கள் வலியுறுத்துகின்றனர்.

பல ஆண்டுகளாக எதிர்பார்ப்பில் உள்ள இந்த ரயில் பாதை திட்டம் மீண்டும் கைவிடப்படாமல், நிர்ணயிக்கப்பட்ட காலக்கெடுவுக்குள் பணிகள் தொடங்கி நிறைவடைய வேண்டும் என்பதே திண்டிவனம், செஞ்சி, திருவண்ணாமலை மற்றும் சுற்றுவட்டார மக்களின் எதிர்பார்ப்பாக உள்ளது.

பௌர்ணமி கிரிவலம் செல்லும் பக்தர்களே... செப்.26ல் விழுப்புரத்தில் இருந்து திருவண்ணாமலைக்கு சிறப்பு ரயில்! நேரம் இதோ

சிவரஞ்சித் — Tue, 22 Sep 2026 14:18:20 +0530

விழுப்புரம்: திருவண்ணாமலையில் நடைபெற உள்ள பெளர்ணமி கிரிவலத்தையொட்டி, பக்தர்கள் மற்றும் பயணிகளின் வசதிக்காக விழுப்புரத்தில் இருந்து திருவண்ணாமலைக்கு செப்டம்பர் 26-ஆம் தேதி சிறப்பு முன்பதிவில்லா ரயில் இயக்கப்படும் என்று தெற்கு ரயில்வே அறிவித்துள்ளது.

திருவண்ணாமலை அருள்மிகு அருணாச்சலேசுவரர் திருக்கோயிலைச் சுற்றி நடைபெறும் பெளர்ணமி கிரிவலத்தில் தமிழகம் மட்டுமின்றி பல்வேறு பகுதிகளில் இருந்தும் ஏராளமான பக்தர்கள் பங்கேற்பது வழக்கம். இதனால் பெளர்ணமி தினங்களில் திருவண்ணாமலைக்கு செல்லும் சாலைகள் மற்றும் ரயில் நிலையங்களில் பயணிகள் கூட்டம் அதிகரிக்கும்.

இந்த நிலையில், பக்தர்கள் எளிதாகவும் பாதுகாப்பாகவும் பயணம் மேற்கொள்ளும் வகையில், தெற்கு ரயில்வே சார்பில் விழுப்புரம்-திருவண்ணாமலை இடையே சிறப்பு ரயில் இயக்க ஏற்பாடு செய்யப்பட்டுள்ளது.

காலை 10.10 மணிக்கு விழுப்புரத்தில் புறப்படும்

செப்டம்பர் 26-ஆம் தேதி சனிக்கிழமை, வண்டி எண் 06130 கொண்ட விழுப்புரம்-திருவண்ணாமலை முன்பதிவில்லா சிறப்பு ரயில் விழுப்புரம் ரயில் நிலையத்தில் இருந்து காலை 10.10 மணிக்கு புறப்படும்.

இந்த ரயில் பல்வேறு இடங்களில் நின்று சென்று, முற்பகல் 11.45 மணிக்கு திருவண்ணாமலை ரயில் நிலையத்தை சென்றடையும் என தெரிவிக்கப்பட்டுள்ளது.

திருவண்ணாமலையில் இருந்து மதியம் புறப்படும்

அதே நாளில் திருவண்ணாமலை-விழுப்புரம் இடையே எதிர்திசையில் சிறப்பு ரயில் இயக்கப்படுகிறது.

வண்டி எண் 06129 கொண்ட திருவண்ணாமலை-விழுப்புரம் முன்பதிவில்லா சிறப்பு ரயில், திருவண்ணாமலை ரயில் நிலையத்தில் இருந்து பிற்பகல் 12.40 மணிக்கு புறப்பட்டு, பிற்பகல் 2.15 மணிக்கு விழுப்புரம் ரயில் நிலையத்தை வந்தடையும்.

இதன் மூலம் திருவண்ணாமலைக்கு கிரிவலத்துக்காக செல்லும் பக்தர்கள், சிறப்பு ரயில் சேவையை பயன்படுத்தி பயணிக்க முடியும்.

எந்தெந்த ரயில் நிலையங்களில் நிற்கும்?

விழுப்புரம்-திருவண்ணாமலை சிறப்பு ரயில் மற்றும் திருவண்ணாமலை-விழுப்புரம் சிறப்பு ரயில் ஆகியவை வழித்தடத்தில் உள்ள முக்கிய ரயில் நிலையங்களில் நின்று செல்லும்.

அதன்படி,

வெங்கடேசபுரம்
மாம்பழப்பட்டு
ஆயந்தூர்
திருக்கோவிலூர்
ஆதிச்சனூர்
அண்டம்பள்ளம்
தண்டரை

ஆகிய ரயில் நிலையங்களில் இந்த சிறப்பு ரயில்கள் நின்று செல்லும்.

8 பெட்டிகளுடன் சிறப்பு ரயில்

பயணிகளின் தேவையை கருத்தில் கொண்டு இயக்கப்படும் இந்த சிறப்பு ரயில் 8 பெட்டிகளைக் கொண்டதாக இருக்கும் என தெற்கு ரயில்வே தெரிவித்துள்ளது. மேலும், இந்த சிறப்பு சேவை முன்பதிவில்லா ரயிலாக இயக்கப்படுவதால், கிரிவலத்துக்கு செல்லும் பக்தர்கள் இதனை பயன்படுத்திக் கொள்ளலாம்.

பெளர்ணமி கிரிவலத்தை முன்னிட்டு திருவண்ணாமலையில் பக்தர்கள் கூட்டம் அதிகரிக்கும் என்பதால், பயணிகள் தங்களது பயணத்தை முன்கூட்டியே திட்டமிட்டு, ரயில் புறப்படும் நேரத்துக்கு முன்னதாகவே நிலையத்துக்கு வருமாறு அறிவுறுத்தப்படுகின்றனர்.

பெளர்ணமி கிரிவலத்தை முன்னிட்டு ஒரே நாளில் விழுப்புரம்-திருவண்ணாமலை இடையே சிறப்பு ரயில் சேவை வழங்கப்படுவது, இந்த வழித்தடத்தில் பயணிக்கும் பக்தர்களுக்கு கூடுதல் வசதியாக அமையும்.

திருவண்ணாமலை முதல் புனே வரை.. மேங்கோ ஹில் ஹோட்டல்ஸின் அடுத்தகட்ட விரிவாக்கம்!

கிஷோர் — Fri, 18 Sep 2026 16:32:09 +0530

இந்தியாவின் விருந்தோம்பல் துறையில் செயல்பட்டு வரும் மேங்கோ ஹில் ஹோட்டல்ஸ் நிறுவனம், தனது ஹோட்டல் வலையமைப்பை மேலும் விரிவுபடுத்தும் வகையில் புதிய நகரங்களில் கால் பதிக்கத் திட்டமிட்டுள்ளது. இதன் ஒரு பகுதியாக மகாராஷ்டிர மாநிலத்தின் புனே மற்றும் தமிழ்நாட்டின் திருவண்ணாமலை, ஸ்ரீபெரும்புதூர், திருச்சி ஆகிய முக்கிய நகரங்களில் புதிய ஹோட்டல்களைத் தொடங்க நிறுவனம் திட்டமிட்டுள்ளது. இதன் மூலம் சுற்றுலா, ஆன்மீகம் மற்றும் தொழில் சார்ந்த பயணங்களுக்கான தங்குமிடத் தேவையைப் பூர்த்தி செய்யும் வகையில் தனது சேவைகளை விரிவுபடுத்த மேங்கோ ஹில் ஹோட்டல்ஸ் நடவடிக்கை எடுத்து வருகிறது.

பல்வேறு நகரங்களில் ஏற்கெனவே செயல்பாடு

மேங்கோ ஹில் ஹோட்டல்ஸ் நிறுவனம் தற்போது சென்னை, கோயம்புத்தூர், கொடைக்கானல், ஊட்டி, புதுச்சேரி, வேளாங்கண்ணி மற்றும் ஏற்காடு உள்ளிட்ட பல்வேறு நகரங்கள் மற்றும் சுற்றுலாத் தலங்களில் செயல்பட்டு வருகிறது. சுற்றுலாப் பயணிகள் அதிகம் வருகை தரும் மலைப் பகுதிகள், ஆன்மீக முக்கியத்துவம் வாய்ந்த நகரங்கள் மற்றும் முக்கிய நகர்ப்புறப் பகுதிகளில் தனது ஹோட்டல் சேவையை வழங்கி வரும் நிறுவனம், தற்போது இந்த வலையமைப்பை மேலும் விரிவுபடுத்துகிறது.

புதிய விரிவாக்கத்தின் மூலம் தமிழ்நாட்டின் முக்கிய நகரங்களுடன் மகாராஷ்டிர மாநிலத்திலும் தனது இருப்பை உருவாக்க நிறுவனம் திட்டமிட்டுள்ளது. குறிப்பாக புனேவில் புதிய ஹோட்டல் தொடங்கப்படுவது, தமிழ்நாட்டைத் தாண்டி மேங்கோ ஹில் ஹோட்டல்ஸ் தனது வணிகத்தை விரிவுபடுத்தும் நடவடிக்கையாக பார்க்கப்படுகிறது.

புனே முதல் திருவண்ணாமலை வரை புதிய இலக்குகள்

புதிய ஹோட்டல்களுக்காகத் தேர்வு செய்யப்பட்டுள்ள நகரங்கள் ஒவ்வொன்றும் வெவ்வேறு வகையான வணிக மற்றும் சுற்றுலா வாய்ப்புகளைக் கொண்டுள்ளன. மகாராஷ்டிராவின் புனே, கல்வி, தொழில்துறை மற்றும் தகவல் தொழில்நுட்பம் உள்ளிட்ட பல்வேறு துறைகளில் முக்கியத்துவம் பெற்ற நகரமாக உள்ளது. இதனால் வணிகம் மற்றும் தொழில் சார்ந்து பயணிக்கும் வாடிக்கையாளர்களை மையமாகக் கொண்டு இங்கு ஹோட்டல் சேவையை விரிவுபடுத்த நிறுவனம் திட்டமிட்டுள்ளது.

தமிழ்நாட்டில் தொழில் வளர்ச்சியின் முக்கிய மையமாக உருவெடுத்துள்ள ஸ்ரீபெரும்புதூரும் புதிய விரிவாக்கப் பட்டியலில் இடம்பெற்றுள்ளது. சென்னை மற்றும் அதன் புறநகர் பகுதிகளுடன் இணையும் முக்கிய தொழில் மற்றும் வர்த்தகப் பாதையில் அமைந்துள்ள ஸ்ரீபெரும்புதூரில் புதிய ஹோட்டல் தொடங்கப்படுவதன் மூலம் தொழில் நிறுவனங்கள், வர்த்தகப் பயணிகள் மற்றும் பிற வாடிக்கையாளர்களுக்கான தங்குமிட வசதியை வழங்குவதில் நிறுவனம் கவனம் செலுத்துகிறது.

ஆன்மீக சுற்றுலாவுக்கு முக்கியத்துவம்

திருவண்ணாமலை மற்றும் திருச்சி ஆகிய நகரங்களும் மேங்கோ ஹில் ஹோட்டல்ஸ் நிறுவனத்தின் புதிய விரிவாக்கத்தில் முக்கிய இடம் பெற்றுள்ளன. திருவண்ணாமலை, அருணாசலேஸ்வரர் கோவில் மற்றும் கிரிவலம் உள்ளிட்ட ஆன்மீக காரணங்களுக்காக தமிழகம் மட்டுமின்றி பல்வேறு பகுதிகளில் இருந்து பக்தர்கள் மற்றும் சுற்றுலாப் பயணிகள் வருகை தரும் முக்கிய நகரமாக உள்ளது.

அதேபோல், திருச்சி நகரம் முக்கியமான ஆன்மீக மற்றும் சுற்றுலா மையமாக மட்டுமல்லாமல், மத்திய தமிழ்நாட்டின் முக்கிய நகரமாகவும் விளங்குகிறது. ஸ்ரீரங்கம், திருவானைக்காவல் உள்ளிட்ட பல்வேறு ஆன்மீகத் தலங்களுக்கு வரும் பக்தர்கள் மற்றும் சுற்றுலாப் பயணிகளுக்கான தங்குமிடத் தேவையை கருத்தில் கொண்டு புதிய ஹோட்டல் அமைக்கப்பட உள்ளது.

கொடைக்கானலிலும் சேவை விரிவாக்கம்

புதிய நகரங்களில் ஹோட்டல்களைத் தொடங்குவதுடன், ஏற்கெனவே செயல்பட்டு வரும் கொடைக்கானல் சந்தையிலும் தனது சேவையை மேலும் வலுப்படுத்த மேங்கோ ஹில் ஹோட்டல்ஸ் நிறுவனம் திட்டமிட்டுள்ளது. இதன் மூலம் புதிய சந்தைகளுக்குள் நுழைவதோடு, ஏற்கெனவே வாடிக்கையாளர்கள் மத்தியில் அறிமுகமான சுற்றுலாத் தலங்களிலும் தனது இருப்பை அதிகரிக்க நிறுவனம் நடவடிக்கை மேற்கொள்கிறது.

ஒவ்வொரு நகரத்துக்கும் ஏற்ற ஹோட்டல் அணுகுமுறை

இந்த விரிவாக்கத் திட்டம் குறித்து பேசிய மேங்கோ ஹில் ஹோட்டல்ஸ் நிறுவனத்தின் நிர்வாக இயக்குநர் காயத்ரி ஓ.எம்., நிறுவனத்தின் தற்போதைய செயல்பாடுகள் பல்வேறு வகையான இடங்களையும் அவற்றின் வாடிக்கையாளர் தேவைகளையும் புரிந்துகொள்ள வலுவான அனுபவத்தை வழங்கியுள்ளதாக தெரிவித்துள்ளார்.

இந்தியாவின் பல்வேறு பகுதிகளில் பன்முகத்தன்மை கொண்ட ஹோட்டல் வலையமைப்பை உருவாக்குவதில் அடுத்தகட்டமாக கவனம் செலுத்தி வருவதாகவும், புதிய ஹோட்டல்கள் புதிய சந்தைகளுக்குள் நுழைய உதவுவதுடன் ஏற்கெனவே நிறுவனம் செயல்பட்டு வரும் இடங்களில் சேவையை மேலும் வலுப்படுத்தும் என்றும் அவர் குறிப்பிட்டுள்ளார்.

சுற்றுலா, ஆன்மீகம், வர்த்தகம் என விரிவான கவனம்

ஒவ்வொரு நகரத்திற்கும் தனித்துவமான தேவைகள் இருப்பதை கருத்தில் கொண்டு, அந்தந்த உள்ளூர் சந்தைக்கு ஏற்ற வகையில் ஹோட்டல்களை உருவாக்குவதே நிறுவனத்தின் வளர்ச்சி உத்தியாக உள்ளது. ஒரே மாதிரியான அணுகுமுறையை அனைத்து இடங்களிலும் பின்பற்றுவதற்கு பதிலாக, அந்தப் பகுதியின் சுற்றுலா, ஆன்மீக மற்றும் வர்த்தக தேவைகளுக்கு ஏற்ப சேவைகளை வடிவமைக்க நிறுவனம் திட்டமிட்டுள்ளது.

இதன் மூலம் ஓய்வுக்கால சுற்றுலா மேற்கொள்பவர்கள், ஆன்மீகப் பயணம் மேற்கொள்ளும் பக்தர்கள் மற்றும் தொழில் அல்லது வர்த்தக காரணங்களுக்காக பயணம் செய்பவர்கள் என வெவ்வேறு வகையான வாடிக்கையாளர்களையும் ஒரே வலையமைப்பின் கீழ் சேவை செய்யும் நோக்கத்தை மேங்கோ ஹில் ஹோட்டல்ஸ் கொண்டுள்ளது.

புதிய நகரங்களில் கிளைகளைத் தொடங்குவதன் மூலம் தமிழ்நாட்டில் தனது இருப்பை மேலும் வலுப்படுத்துவதோடு, புனே வழியாக பிற மாநிலங்களிலும் விரிவாக்கத்திற்கான அடித்தளத்தை அமைக்கும் வகையில் மேங்கோ ஹில் ஹோட்டல்ஸ் நிறுவனத்தின் அடுத்தகட்ட வளர்ச்சித் திட்டம் அமைந்துள்ளது.

Kanchipuram Vandavasi 4-Lane Expressway: காஞ்சிபுரம் - வந்தவாசி மக்களுக்கு மெகா குட் நியூஸ்! இனி டிராஃபிக் பிரச்சனையே இருக்காது! அரசின் மாஸ் திட்டம்..

கிஷோர் — Mon, 31 Aug 2026 16:02:57 +0530

காஞ்சிபுரம் - வந்தவாசி சாலையை நான்கு வழிச் சாலையாக விரிவாக்கம் செய்யும் முக்கியத் திட்டம், முதலமைச்சரின் சாலை மேம்பாட்டுத் திட்டத்தின் (CMRDP) கீழ் தற்போது மிக வேகமாக நடைபெற்று வருகிறது. செய்யாறு மற்றும் வெம்பாக்கம் பகுதிகளில் அமைந்துள்ள சிப்காட் தொழிற்பேட்டைகளின் அபாரமான தொழில் வளர்ச்சியை மனதில்கொண்டு இந்தச் சாலை அகலப்படுத்தும் பணிகள் முன்னெடுக்கப்பட்டுள்ளன.

மேலும், இந்தச் சாலை மானம்பாதியில் சென்னை புறவெளி வட்டச் சாலையுடன் (CPRR) இணைக்கப்பட உள்ளது. இதன் மூலம், தென் மாவட்டங்கள் மற்றும் தொழிற்பேட்டைகளில் இருந்து சென்னை மற்றும் எண்ணூர் துறைமுகங்களுக்குச் செல்லும் சரக்கு வாகனங்கள் எந்தவிதமான போக்குவரத்தும் இன்றி தடையின்றி விரைவாகச் சென்று சேர வழிவகை ஏற்படும்.

தொழில் வளர்ச்சிக்கு முட்டுக்கட்டையாக இருந்த போக்குவரத்து நெரிசல்

செய்யாறு மற்றும் வெம்பாக்கம் சிப்காட் பகுதிகள் வட தமிழகத்தின் முக்கியத் தொழில் மண்டலங்களாக உருவெடுத்து வருகின்றன. இருப்பினும், காஞ்சிபுரம் - வந்தவாசி சாலையில் நிலவி வந்த கடும் போக்குவரத்து நெரிசல் காரணமாகத் தொழிற்சாலைகளுக்குத் தேவையான மூலப்பொருட்களைக் கொண்டு வருவதிலும், உற்பத்தி செய்யப்பட்ட பொருள்களைத் துறைமுகங்களுக்கும் பிற இடங்களுக்கும் கொண்டு செல்வதிலும் பெரும் காலதாமதம் ஏற்பட்டு வந்தது.

அதுமட்டுமன்றி, குறுகலான சாலையில் அடிக்கடி நேரிட்ட விபத்துகள், தொழிலாளர்கள் சரியான நேரத்திற்குப் பணிக்குச் செல்ல முடியாத நிலை போன்ற பல்வேறு சவால்கள் நிலவின. இதனால் தொழிலதிபர்கள், தொழிற்சாலை ஊழியர்கள் மற்றும் அப்பகுதி பொதுமக்கள் காஞ்சிபுரம் - வந்தவாசி சாலையை நான்கு வழிச் சாலையாக மாற்ற வேண்டும் என்று நீண்டகால கோரிக்கை விடுத்து வந்தனர்.

நான்கு கட்டங்களாக நடைபெறும் விரிவாக்கப் பணிகள்

பொதுமக்களின் கோரிக்கையை ஏற்று, இந்தச் சாலை விரிவாக்கப் பணிகள் மொத்தம் நான்கு கட்டங்களாகத் திட்டமிடப்பட்டுச் செயல்படுத்தப்பட்டு வருகின்றன. இதில் முதல் கட்டமாக, மங்கலம் முதல் மானம்பாதி சந்திப்பு வரையிலான 9 கிலோமீட்டர் தொலைவுள்ள சாலை ரூ. 78 கோடி மதிப்பீட்டில் அகலப்படுத்தப்பட்டு வருகிறது.

இதில் தற்போதைய இருவழிச் சாலையை நான்கு வழிச் சாலையாக மாற்றுவதுடன், தேவையான இடங்களில் சிறிய பாலங்கள் மற்றும் மதகுகளைப் புதிதாகக் கட்டுதல் அல்லது விரிவாக்கம் செய்தல் போன்ற பணிகள் சேர்க்கப்பட்டுள்ளன. மழைக்காலங்களில் சாலைகளில் நீர் தேங்குவதைத் தவிர்க்கும் வகையில், குடியிருப்புகள் நிறைந்த பகுதிகளில் மழைநீர் வடிகால் அமைப்புகளும் சிறப்பாக உருவாக்கப்பட்டு வருகின்றன.

நில எடுப்பு மற்றும் இரண்டாம் கட்டத் திட்டங்கள்

திட்டத்தின் இரண்டாம் கட்டமாக, செய்யாறு சிப்காட் அருகிலுள்ள மானம்பாதியிலிருந்து திருவண்ணாமலை வரையிலான 72 கிலோமீட்டர் தொலைவுள்ள சாலையை அகலப்படுத்த அரசு நடவடிக்கை எடுத்துள்ளது. தொடக்கத்தில் இந்த விரிவாக்கம் வந்தவாசி வரை மட்டுமே திட்டமிடப்பட்டிருந்தது. ஆனால், பிற்காலத்தில் இதனைப் விரிவான பொருளாதாரச் சாலை பிணையத்துடன் (Economic Corridor) இணைக்கும் நோக்கில் திருவண்ணாமலை வரை நீட்டிக்கப்பட்டது.

செய்யாறு சாலையை ஓரகடம் தொழிற்பேட்டையுடன் இணைப்பதன் மூலம் சென்னையைச் சுற்றியுள்ள தொழில் மண்டலங்களும் செய்யாறு சிப்காட்டும் ஒன்றிணைக்கப்பட்டு, வட தமிழகத்தில் மிகப்பெரிய தொழில் இணைப்புச் சாலை உருவாகும்.

இந்த இரண்டாம் கட்ட விரிவாக்கத்திற்காக வந்தவாசியில் 14 கிராமங்கள், செய்யாறில் 7, கீழ்பென்னாத்தூரில் 8 மற்றும் திருவண்ணாமலையில் 5 கிராமங்கள் என மொத்தம் 34 கிராமங்களில் உள்ள சுமார் 307 ஏக்கர் நிலத்தைக் கையகப்படுத்த அரசு அரசாணை வெளியிட்டுள்ளது.

வருவாய்த் துறை மூலம் நிலத்தின் மதிப்பு நிர்ணயிக்கப்பட்ட பிறகு இதற்கான முதன்மை கட்டுமான டெண்டர்கள் கோரப்பட உள்ளன. இந்த இரண்டாம் கட்டச் சாலையில் மையத் தடுப்புகள் (Center medians), பேருந்துகள் ஒதுங்கிச் செல்லும் பகுதிகள் (Bus lay-by zones) மற்றும் சீரான வடிகால் வசதிகள் அமைக்கப்படவுள்ளன.

மேம்பாலத் திட்டம் மற்றும் எதிர்பார்க்கப்படும் பயன்கள்

காஞ்சிபுரம் நகருக்குள் நுழையும் பகுதியில் ஏற்படும் கடுமையான போக்குவரத்து நெரிசலைக் குறைக்கும் வகையில், செவிலிமேடு பாலத்தின் அருகே ஒரு புதிய உயர்மட்ட மேம்பாலம் கட்டத் திட்டமிடப்பட்டுள்ளது. இந்த மேம்பாலப் பணிகள் 2028-ஆம் ஆண்டிற்குள் நிறைவடையும் என எதிர்பார்க்கப்படுகிறது.

அனைத்துக் கட்ட விரிவாக்கப் பணிகளும் முழுமையாக முடிவடையும் போது, இச்சாலை ஒரு அதிவேக இணைப்பாக மாறி, திருவண்ணாமலை மற்றும் சுற்றியுள்ள மாவட்டங்களில் இருந்து சென்னைத் துறைமுகத்திற்குப் பொருட்களை ஏற்றிச் செல்லும் லாரிகளுக்கு ஒரு வேகமான, நம்பகமான பாதையாக அமையும். இது காஞ்சிபுரம் பகுதிக்கு வரும் பக்தர்களுக்கும் சுற்றுலாப் பயணிகளுக்கும் போக்குவரத்துச் சிக்கலற்ற பயணத்தை வழங்குவதோடு, ஒட்டுமொத்தப் பிராந்தியத்தின் பொருளாதார வளர்ச்சிக்கும் பெரும் பக்கபலமாக இருக்கும்.

NH-77 நான்கு வழிச்சாலையாகுமா? திண்டிவனம்-திருவண்ணாமலை சாலையில் அதிகரிக்கும் போக்குவரத்து... விபத்துகளால் அதிர்ச்சி!

சிவரஞ்சித் — Sun, 30 Aug 2026 21:31:47 +0530

புதுச்சேரியில் இருந்து கர்நாடக மாநில தலைநகர் பெங்களூருவை இணைக்கும் மிக முக்கியப் பாதையாக விளங்கும் திண்டிவனம் - திருவண்ணாமலை தேசிய நெடுஞ்சாலையில் (NH 77), நாளுக்கு நாள் வாகனப் போக்குவரத்து பல மடங்கு அதிகரித்துள்ளது. தொடர்ந்து நிகழும் விபத்துகளைத் தடுக்கவும், சீரான போக்குவரத்தை உறுதி செய்யவும் இச்சாலையை உடனடியாக நான்கு வழிச்சாலையாக விரிவுபடுத்த வேண்டும் என பொதுமக்கள் மற்றும் வாகன ஓட்டிகள் தேசிய நெடுஞ்சாலை ஆணையத்திற்கு கோரிக்கை விடுத்துள்ளனர்.

NH 77: முக்கிய போக்குவரத்து இணைப்பு

புதுச்சேரியில் தொடங்கும் தேசிய நெடுஞ்சாலை எண் 77 (NH 77), திண்டிவனம், செஞ்சி, திருவண்ணாமலை, செங்கம், ஊத்தங்கரை வழியாக கிருஷ்ணகிரியை அடைகிறது. அங்கிருந்து தேசிய நெடுஞ்சாலை வழியாக பெங்களூருவை இணைக்கிறது. மொத்தம் 178 கி.மீ. நீளம் கொண்ட இந்த சாலை, வரலாற்றுக்காலம் தொட்டே ஆன்மீக, வணிக மற்றும் சுற்றுலா ரீதியாக முதன்மை வழித்தடமாகத் திகழ்ந்து வருகிறது.

திட்டத்தில் நேர்ந்த மாற்றம்

கடந்த 2011-ஆம் ஆண்டு இச்சாலையை 1,200 கோடி மதிப்பீட்டில் 4 வழிச்சாலையாக மாற்ற மத்திய அரசு திட்டமிட்டது. ஆனால், அப்போது மேற்கொள்ளப்பட்ட வாகனக் கணக்கெடுப்பில் போக்குவரத்து குறைவாக இருப்பதாகக் கூறி, திட்டம் மாற்றியமைக்கப்பட்டது. இதைத் தொடர்ந்து, 624.24 கோடி செலவில் 10 மீட்டர் அகலம் கொண்ட இருவழிச்சாலையாக விரிவுபடுத்தும் பணி 2012-இல் தொடங்கி, பல ஆண்டுகள் தாமதத்திற்குப் பின் 2024-இல் நிறைவடைந்தது. தற்போது இச்சாலையில் 3 இடங்களில் சுங்கச்சாவடிகள் அமைக்கப்பட்டு கட்டணம் வசூலிக்கப்பட்டு வருகிறது.

போக்குவரத்து பலமடங்கு உயரக் காரணங்கள்

பணிகள் நிறைவடைந்த நிலையில், சாலை மேம்படுத்தப்பட்டதால் இவ்வழியாகச் செல்லும் வாகனங்களின் எண்ணிக்கை பன்மடங்கு உயர்ந்துள்ளது.
பெங்களூரு தொடர்பு: வார இறுதி நாட்கள் மற்றும் பண்டிகைக் காலங்களில் பெங்களூருவில் பணிபுரியும் ஆயிரக்கணக்கானோர் புதுச்சேரி மற்றும் சுற்றியுள்ள மாவட்டங்களுக்கு வந்து செல்ல இச்சாலையையே பயன்படுத்துகின்றனர்.

வணிகப் போக்குவரத்து:

புதுச்சேரியில் உற்பத்தியாகும் தொழிற்சாலைப் பொருட்கள் மற்றும் நுகர்பொருட்கள் பெங்களூரு மற்றும் வடமாநிலங்களுக்கு கொண்டு செல்லப்படுவதால், கனரகச் சரக்கு வாகனங்களின் எண்ணிக்கை கணிசமாக உயர்ந்துள்ளது.

திருவண்ணாமலை பக்தர்களின் வருகை: முன்பு கார்த்திகை தீபத் திருவிழா காலத்தில் மட்டுமே பக்தர்கள் அதிக அளவில் வந்தனர். ஆனால் தற்போது பௌர்ணமி, பிரதோஷம், வார விடுமுறை நாட்களில் லட்சக்கணக்கான பக்தர்கள் திருவண்ணாமலை அருணாசலேஸ்வரர் கோவிலுக்கு வருகை தருகின்றனர். சென்னை மற்றும் புதுச்சேரியிலிருந்து வரும் பெரும்பாலான வாகனங்கள் திண்டிவனம் - திருவண்ணாமலை வழியையே தேர்ந்தெடுக்கின்றன.

அதிகரிக்கும் விபத்துகள்: பொதுமக்கள் கோரிக்கை

இருவழிச்சாலையாக மட்டுமே இருப்பதால், குறுகிய பாதையில் அதிவேகமாக வரும் வாகனங்களால் திண்டிவனம் முதல் திருவண்ணாமலை வரையிலான பகுதியில் அடிக்கடி பயங்கர விபத்துகள் ஏற்பட்டு உயிரிழப்புகளும், படுகாயங்களும் தொடர்கதையாகி வருகின்றன. எனவே, தேசிய நெடுஞ்சாலைத்துறை ஆணையம் உடனடியாக இச்சாலையில் புதிய வாகன கணக்கெடுப்பை (Traffic Survey) நடத்தி, தற்போதைய தேவைக் கேற்ப திண்டிவனம் - திருவண்ணாமலை இடையிலான தேசிய நெடுஞ்சாலை 77-ஐ விரைவாக 4 வழிச்சாலையாக உயர்த்த நடவடிக்கை எடுக்க வேண்டும் என அப்பகுதி மக்களும் பயணிகளும் எதிர்பார்க்கின்றனர்.