tiruvannamalai

திருவண்ணாமலையில் ஷாக்கிங் சம்பவம்! கோயிலுக்குள் கேமரா கண்ணாடியுடன் வந்த ஆசாமி... அலட்சியமாக இருக்கிறதா பாதுகாப்பு?

ராஜேஷ். எஸ் — Sat, 8 Aug 2026 16:18:33 +0530

திருவண்ணாமலை அண்ணாமலையார் கோயிலுக்குள் கண் கண்ணாடியில் கேமரா வைத்த நபர் நுழைந்ததால் பரபரப்பு ஏற்பட்டது.

திருண்ணாமலை அண்ணாமலையார் கோயிலுக்கு விஷேஷ நாட்கள் மட்டுமல்லாமல், அனைத்து நாட்களிலும் பக்தர்கள் கூட்டம் நிரம்பி வழிகிறது. அண்டை மாநிலங்களான ஆந்திரா, தெலங்கானா, கர்நாடகா மாநிலங்களில் இருந்தும் பக்தர்கள் வருவதால் கோயில் எப்பொழுதுமே கூட்டமாக காட்சியளிக்கிறது.

ஆனால், இந்து அறநிலையத்துறையின் கட்டுப்பாட்டில் உள்ள அண்ணாமலையார் திருக்கோயிலில் பாதுகாப்பு கேள்விக்குறியாக இருக்கிறது. அண்ணாமலையார் கோயிலின் ஐந்தாம் பிரகாரத்தில் இருந்து மர்ம நபர் ஒருவர் லாரியை எடுத்துச் சென்ற நிலையில் இன்று மீண்டும் கண் கண்ணாடியில் கேமரா வைத்து கோயிலுக்குள் நுழைந்த நபரால் பரபரப்பு ஏற்பட்டுள்ளது.

திருவண்ணாமலை அண்ணாமலையார் திருக்கோயிலுக்கு உள்துறை அமைச்சர் அமித்ஷா வரவுள்ள நிலையில் பவுனேஷ், மகேஷ் ஆகிய நபர்கள் கேமரா வைத்த கண் கண்ணாடி அணிந்து வந்துள்ள நிலையில் அண்ணாமலையார் கோயிலில் பரபரப்பை ஏற்படுத்தியுள்ளது.

போலீசார் அந்த நபர்களிடம் அண்ணாமலையார் கோயிலில் புகைப்படம் எடுக்க வந்தார்களா அல்லது வேறு ஏதாவது காரணமாய் என பல்வேறு கோணங்களில் விசாரணை மேற்கொண்டு வருகின்றனர். குறிப்பாக அண்ணாமலையார் கோயிலில் கடந்த இரு தினங்களுக்கு முன்பு லாரி ஒன்றை மர்ம நபர் எடுத்துச் சென்றதாக பரபரப்பை ஏற்படுத்திய நிலையில், தற்போது அண்ணாமலையார் கோயிலுக்குள் மிகத் துல்லியமான கண் கண்ணாடி கேமராவை இணைந்து வந்திருப்பது மேலும் பரபரப்பை ஏற்படுத்தியுள்ளது.

மர்மமான முறையில் அண்ணாமலையார் கோயிலின் ஐந்தாம் பிரகாரத்தில் இருந்து லாரியை எடுத்துச் சென்ற நபரை சிசிடிவி காட்சிகளைக் கொண்டு போலீசார் தீவிரமாக தேடி வரும் நிலையில் அண்ணாமலையார் திருக்கோவில் அனைத்து கோவில் ஊழியர்கள் சாவிகளை போட்டு பூட்டி வைக்கும் நிலையிலும் யாருடைய கண்ணுக்கும் தெரியாமல் எப்படி கோயிலுக்குள் இந்த நபர் வந்தார் என்ற கேள்வி எழுந்துள்ளது.

திடீர் வருகை... திகைப்பில் அரசியல் களம்! – ஆகஸ்ட் 8-ல் தமிழகம், புதுச்சேரிக்கு வருகிறார் அமித் ஷா!

சிவரஞ்சித் — Thu, 6 Aug 2026 16:15:29 +0530

புதுச்சேரி: மத்திய உள்துறை அமைச்சர் அமித் ஷா வரும் 8-ம் தேதி இரண்டு நாள் அரசுமுறைப் பயணமாகப் புதுச்சேரி மற்றும் தமிழகத்திற்கு வருகை தரவுள்ளார். இப்பயணத்தின் போது புதுச்சேரி காவல் துறைக்குக் குடியரசுத் தலைவரின் 'வண்ண விருது' வழங்குதல், திருவண்ணாமலையில் கோவில் தரிசனம் மற்றும் தமிழக பாஜக மூத்த தலைவர்களுடனான முக்கிய ஆலோசனை எனப் பல்வேறு நிகழ்வுகளில் அவர் பங்கேற்கிறார்.

ஒத்திவைக்கப்பட்ட பயணம் மீண்டும் உறுதி:

புதுச்சேரி காவல் துறையின் நீண்டகால சிறப்பான சேவை, மிகச் சிறந்த ஒழுக்கம் மற்றும் பொதுமக்களின் பாதுகாப்பை உறுதி செய்வதில் அவர்கள் ஆற்றிய தன்னிகரற்ற பங்களிப்பைப் பாராட்டி, குடியரசுத் தலைவரின் உயரிய ‘வண்ண விருது’ (President's Police Colour) அறிவிக்கப்பட்டது. இந்த விருதினை வழங்கும் விழா புதுச்சேரி காவல் மைதானத்தில் கடந்த மாதமே நடைபெற திட்டமிடப்பட்டு, அதில் மத்திய அமைச்சர் அமித் ஷா பங்கேற்பதாக இருந்தது. ஆனால், டெல்லியில் மாணவர்கள் மற்றும் இளைஞர்களின் போராட்டங்கள் தீவிரமடைந்ததால், அவரது பாதுகாப்பு கருதி அப்பயணம் அப்போது ரத்து செய்யப்பட்டது. இந்நிலையில், ஒத்திவைக்கப்பட்ட அந்த விழா தற்போது மீண்டும் உறுதி செய்யப்பட்டு, அதற்கான பயணத்திட்டம் இறுதி செய்யப்பட்டுள்ளது.

அமித் ஷாவின் இரண்டு நாள் பயணத்திட்டம்:

ஆகஸ்ட் 8 (இரவு): டெல்லியிலிருந்து புறப்படும் மத்திய அமைச்சர் அமித் ஷா, அன்றைய தினம் இரவு புதுச்சேரி வந்தடைந்து அங்குத் தங்கி ஓய்வெடுக்கிறார்.

ஆகஸ்ட் 9 (காலை): புதுச்சேரி காவல் மைதானத்தில் நடைபெறும் பிரம்மாண்ட விழாவில் பங்கேற்று, புதுச்சேரி காவல் துறைக்குக் குடியரசுத் தலைவரின் 'வண்ண விருதை' வழங்கி கௌரவிக்கிறார்.

ஆகஸ்ட் 9 (மதியம்): புதுச்சேரி நிகழ்வுகளை முடித்துக் கொண்டு, சாலை மார்க்கமாகத் திருவண்ணாமலைக்குச் செல்கிறார். அங்குள்ள உலகப்புகழ் பெற்ற ஸ்ரீ ரமண மகரிஷி ஆசிரமத்தில் நடைபெறும் நிகழ்வுகளில் கலந்து கொள்கிறார். அதனைத் தொடர்ந்து, வரலாற்றுச் சிறப்புமிக்க அருள்மிகு அண்ணாமலையார் திருக்கோயிலில் சாமி தரிசனம் செய்யவுள்ளார்.

ஆகஸ்ட் 9 (மாலை/இரவு): திருவண்ணாமலை பயணத்தை முடித்துக் கொண்டு சென்னை விமான நிலையம் வந்தடையும் அவர், அங்கேயே தமிழக பாஜகவின் மூத்த தலைவர்களுடன் மாநில அரசியல் நிலவரங்கள் மற்றும் கட்சி நடவடிக்கைகள் குறித்து முக்கிய ஆலோசனை நடத்துகிறார். ஆலோசனைக் கூட்டம் நிறைவடைந்ததும், அன்றைய தினமே தனி விமானம் மூலம் டெல்லிக்குப் புறப்பட்டுச் செல்கிறார்.

பலத்த பாதுகாப்பு ஏற்பாடுகள்:

மத்திய உள்துறை அமைச்சரின் வருகையை முன்னிட்டு புதுச்சேரி மற்றும் திருவண்ணாமலையில் பலத்த போலீஸ் பாதுகாப்பு ஏற்பாடுகள் செய்யப்பட்டு வருகின்றன. முக்கிய இடங்கள், அவர் பயணிக்கும் பாதைகள் மற்றும் தங்கும் விடுதிகள் அனைத்தும் தீவிர கண்காணிப்பின் கீழ் கொண்டு வரப்பட்டுள்ளன.

சென்னை, காஞ்சி, செங்கல்பட்டு வாசிகளே தயாரா இருங்க... இன்றிரவு வரப்போகும் அந்த திடீர் மாற்றம்!

கிஷோர் — Mon, 3 Aug 2026 13:11:45 +0530

தமிழகத்தில் வளிமண்டல சுழற்சி மற்றும் காற்றழுத்த தாழ்வுப் பாதை காரணமாக, இன்று 6 மாவட்டங்களில் இடி, மின்னலுடன் கூடிய கனமழை பெய்ய வாய்ப்புள்ளதாக சென்னை வானிலை ஆய்வு மையம் தெரிவித்துள்ளது.

மேல்பவானியில் கொட்டித்தீர்த்த கனமழை

தமிழகத்தில் நேற்று காலை 8:00 மணியுடன் முடிவடைந்த கடந்த 24 மணி நேர நிலவரப்படி, நீலகிரி மாவட்டம் மேல்பவானி பகுதியில் அதிகபட்சமாக 21.7 சென்டிமீட்டர் மழை பதிவாகியுள்ளது. அதேவேளையில், மாநிலத்தின் பல பகுதிகளில் மழை பெய்த போதிலும், சில இடங்களில் வெப்பத்தின் தாக்கமும் உணரப்பட்டது.

தொண்டியில் 104.9°F வெயில் வெப்பநிலை உயர்வு!

கடந்த 24 மணி நேரத்தில் தமிழகம், புதுச்சேரி மற்றும் காரைக்காலின் ஒருசில பகுதிகளில் இயல்பான அளவை விட 4 டிகிரி செல்சியஸ் வரை வெப்பநிலை அதிகரித்து காணப்பட்டது. குறிப்பாக, ராமநாதபுரம் மாவட்டம் தொண்டியில் அதிகபட்சமாக 104.9 டிகிரி ஃபாரன்ஹீட் வெப்பம் பதிவாகி பொதுமக்கள் மற்றும் வாகன ஓட்டிகளை அவதிக்குள்ளாக்கியது.

நிலவும் இரண்டு காற்றழுத்த தாழ்வுப் பாதைகள்!

தற்போது வளிமண்டலத்தில் நிலவும் வானிலை மாற்றங்கள் குறித்து சென்னை வானிலை ஆய்வு மையம் வெளியிட்டுள்ள அறிக்கையில், வட உள் கர்நாடகப் பகுதியில் தொடங்கி தென் உள் கர்நாடகா, கேரளா மற்றும் தமிழகம் வழியாக குமரிக்கடல் பகுதி வரை ஒரு காற்றழுத்த தாழ்வுப் பாதை நிலவுகிறது. தெற்கு குஜராத் பகுதியில் தொடங்கி கேரளா வரை மற்றொரு காற்றழுத்த தாழ்வுப் பாதை நிலவி வருகிறது. இந்த இரு வேறு வளிமண்டல சுழற்சிகளின் காரணமாக தமிழகத்தில் பல்வேறு இடங்களில் பரவலாக மழை பெய்யக்கூடும் என எதிர்பார்க்கப்படுகிறது.

கனமழை எச்சரிக்கை விடுக்கப்பட்டுள்ள 6 மாவட்டங்கள்

காற்றழுத்த தாழ்வுப் பாதைகளின் தாக்கத்தால், இன்று தமிழகத்தின் நீலகிரி, தேனி, திருவண்ணாமலை, விழுப்புரம், கடலூர் மற்றும் கோவை மாவட்டத்தின் மலைப்பகுதிகள் ஆகிய 6 மாவட்டங்களிலும், புதுச்சேரியிலும் சில இடங்களில் இடி, மின்னல் மற்றும் பலத்த காற்றுடன் கூடிய கனமழை பெய்ய வாய்ப்புள்ளது.

மேலும், மேற்கு தொடர்ச்சி மலையை ஒட்டிய மாவட்டங்கள், காவிரி டெல்டா மாவட்டங்கள், வடகடலோர தமிழக மாவட்டங்கள் மற்றும் காரைக்கால் பகுதிகளில் ஒருசில இடங்களில் மிதமான மழை பெய்யக்கூடும். மாநிலத்தின் ஏனைய பகுதிகளில் ஓரிரு இடங்களில் லேசானது முதல் மிதமான மழை வரை பெய்ய வாய்ப்புள்ளது.

சென்னை, காஞ்சிபுரம் மற்றும் செங்கல்பட்டு மாவட்ட வானிலை நிலவரம்!

வடகடலோர மாவட்டங்களான சென்னை, காஞ்சிபுரம் மற்றும் செங்கல்பட்டு பகுதிகளில் இன்று வானம் ஓரளவு மேகமூட்டத்துடன் காணப்படும். பகல் நேரத்தில் லேசான வெப்பம் நிலவினாலும், மாலை அல்லது இரவு நேரங்களில் இவ்விரு மாவட்டங்கள் மற்றும் சென்னை புறநகர்ப் பகுதிகளின் சில இடங்களில் இடி, மின்னலுடன் கூடிய மிதமான மழை பெய்யக்கூடும் என வானிலை ஆய்வு மையம் கணித்துள்ளது.

அண்ணாமலையார் பாதத்தில் தனுஷ்! திடீர் ஆன்மீகப் பயணம் அரசியல் என்ட்ரிக்கு அச்சாரமா?

ராஜேஷ். எஸ் — Mon, 3 Aug 2026 12:10:20 +0530

நடிகர் தனுஷ் திருவண்ணாமலை அண்ணாமலையார் திருக்கோயிலில் இன்று அதிகாலை தனது மகன்களுடன் சாமி தரிசனம் செய்தார். ஆன்மீக பக்தர்கள் மற்றும் அண்ணாமலையார் கோயில் ஊழியர்கள் அவரோடு நின்று செல்பி புகைப்படம் எடுத்துக் கொண்டனர்.

திருவண்ணாமலை அதன் சுற்றுவட்டார பகுதிகளில் கடந்த ஒரு சில தினங்களாக நடிகர் தனுஷ் நடிக்கும் ‘ஓம்’ திரைப்படத்தின் பட காட்சிகள் படமாக்கப்பட்ட வருகிறது.

இந்நிலையில் இன்று அதிகாலை அண்ணாமலையார் திருக்கோயிலுக்கு நடிகர் தனுஷ் தனது இரண்டு மகன்களுடன் வருகை தந்தார். முன்னதாக சம்பந்த விநாயகரை தரிசனம் செய்தார்.

அண்ணாமலையார் திருக்கோயிலில் நடைபெற்ற கோ கோபூஜை பசுவுக்கு அகத்திக்கீரை கொடுத்தார். இதனைத் தொடர்ந்து யாக பூஜையில் கலந்து கொண்டார். தொடர்ந்து அண்ணாமலையார், உண்ணாமுலை அம்மன் நவகிரகத்தை தரிசனம் செய்தார். சிவாச்சாரியார்கள் வேத மந்திரங்கள் முழங்க நடிகர் தனுசுக்கு மாலை அணிவித்து பிரசாதங்களை வழங்கினார்.

அண்ணாமலையார் கோவிலில் சாமி தரிசனம் செய்ய வந்த பக்தர்கள் மற்றும் கோவில் ஊழியர்கள் அவரோடு செல்பி புகைப்படம் எடுத்துக் கொண்டனர்.

சமீபத்தில் தனது பிறந்தநாளை முன்னிட்டு தனியார் கல்லூரியில் ரசிகர்களை சந்தித்து நலத்திட்ட உதவிகளை வழங்கினார். அப்போது மேடையில் தனுஷின் பேச்சு அரசியலுக்கு வருவதை போன்றே இருந்தது. விஜய் கட்சி தொடங்கி வெற்றி பெற்றதை போல, தானும் எதிர்காலத்தில் கட்சி தொடங்கி தமிழக அரசியலில் நுழைய வேண்டும் என்று எண்ணத்துடன் இருப்பதாகவும் ஆனால், இது நடப்பது அவ்வளவு சாத்தியமில்லை என்று அரசியல் விமர்சகர்கள் தெரிவிக்கின்றனர்.

Tiruvannamalai Bypass Project: திருவண்ணாமலை புறவழிச்சாலை திட்டம் ரெடி - சாமி தரிசனம் டூ பொருளாதாரம் - 100KM ஸ்பீட்

குலசேகரன் முனிரத்தினம் — Sun, 2 Aug 2026 09:15:49 +0530

Tiruvannamalai Bypass Project: சுமார் 22.71 கிலோ மீட்டர் நீளத்திற்கான திருவண்ணாமலை புறவழிச்சாலை திட்டத்திற்கு, 623 கோடியே 28 லட்சம் ரூபாய் செலவாகும் என மதிப்பிடப்பட்டுள்ளது.

திருவண்ணாமலை புறவழிச்சாலை திட்டம்:

மிக நீண்டகால காத்திருப்புக்குப் பிறகு திருவண்ணாமலை புறவழிச்சாலை திட்டத்திற்காக, மத்திய அரசின் சாலை போக்குவரத்து மற்றும் நெடுஞ்சாலை அமைச்சகம் டெண்டர் வெளியிட்டுள்ளது. சுமார் 22.71 கிலோ மீட்டர் நீளத்திற்கு சாலை அமைக்கும் இந்த பணிக்காக 623 கோடியே 28 லட்சம் ரூபாய் செலவாகும் என மதிப்பிடப்பட்டுள்ளது. புதிய புறவழிச்சாலை திட்டமான கோயில் நகரமான திருவண்ணாமலையில் போக்குவரத்து நெரிசலை குறைக்க உதவும் என கூறப்படுகிறது. மேலும், வேலூர் தொடங்கி தூத்துக்குடியில் உள்ள வ.வு, சிதம்பரனார் துறைமுகம் வரை 604 கிலோ மீட்டருக்கு நீண்டு, விழுப்புரம், பெரம்பலூர், திருவண்ணாமலை, திருச்சி மற்றும் மதுரை உள்ளிட்ட மாவட்டங்கள் வழியாக செல்லும் தேசிய நெடுஞ்சாலை 38 உடனான, திருவண்ணாமலை மாவட்டத்தின் இணைப்பை மேம்படுத்தவும் புதிய புறவழிச்சாலை திட்டம் உதவும்.

22.71 கிலோ மீட்டர் நீளத்திற்கான சாலை:

திட்டமிடப்பட்ட புறவழிச்சாலையானது, புதிய தேசிய நெடுஞ்சாலையான 38-ஐ ஒட்டியுள்ள வேலக்கண்டல் அருகே தொடங்கி திருவண்ணாமலை நகரை ஒட்டி எண்டால் அருகே முடிவடைய உள்ளது. மொத்தம் மதிப்பிடப்பட்டுள்ள 22.71 கிலோ மீட்டர் நீளத்திற்கான திட்டத்தில் சுமார் 13.1 கிலோ மீட்டர் தூரம் ஒரு புதிய பசுமை வழிப்பாதையில் உருவாக்கப்பட உள்ளது. மீதமுள்ள 9.6 கிலோ மீட்டர் நீளத்திற்கான சாலையானது, ஏற்கனவே உள்ள தேசிய நெடுஞ்சாலை 77 வழித்தடத்தை பயன்படுத்தி, மேம்படுத்தி மீண்டும் புதிய பாதையுடன் இணைக்கப்படும்.இதனால், புதியதாக நிலத்தை கையப்படுத்த வேண்டிய தேவை மிகப்பெரிய அளவில் குறைக்கப்படுகிறது. இந்த திட்டத்தை 2 ஆண்டுகளில் முடிக்க முடிவு செய்யப்பட்டுள்ளது.

திருவண்ணாமலை புறவழிச்சாலை - கட்டுமான டிசைன்

அணுகல் கட்டுப்படுத்தப்பட்ட வழித்தடமாக வடிவமைக்கப்பட்டுள்ள திருவண்ணாமலை புறவழிச்சாலையானது, குறிப்பிட்ட சந்திப்புகள், இணைப்புச் சாலைகள் மற்றும் சேவைச் சாலைகள் வழியாக மட்டுமே உள்ளே நுழைவதையும் வெளியேறுவதையும் அனுமதிக்க உள்ளது. இது நீண்ட தூரப் போக்குவரத்தை உள்ளூர் போக்குவரத்திலிருந்து பிரித்து, அதன் தடையற்ற இயக்கத்தை சாத்தியமாக்குகிறது. அருகிலுள்ள பகுதிகளுக்கு அணுகலை வழங்குவதற்காக, இந்தத் திட்டத்தில் 25 கிலோ மீட்டருக்கும் அதிகமான சேவைச் சாலைகளும், 6 கிலோ மீட்டருக்கும் மேற்பட்ட இணைப்புச் சாலைகளும் அமைக்கப்பட உள்ளன.

இந்த வழித்தடமானது, தேசிய நெடுஞ்சாலை-77 (NH-77), மாநில நெடுஞ்சாலைகள் 236, 6, 9A மற்றும் 9 ஆகியவற்றுடன், ஒரு முக்கிய மாவட்டச் சாலை மற்றும் பல கிராமச் சாலைகளையும் கடந்து செல்லும். தடையற்ற போக்குவரத்தை எளிதாக உறுதி செய்யும் வகையில், மூன்று மேம்பாலங்களை உள்ளடக்கியுள்ளது. அவற்றுள் ஒன்று வேலக்கண்டல் தொடக்கப் புள்ளியிலும், இரண்டாவது தேசிய நெடுஞ்சாலை-38 உடனான எண்டால் முனையச் சந்திப்பிலும், மற்றொன்று தேசிய நெடுஞ்சாலை-77 சந்திப்பிலும் அமையவுள்ளது.

இதையும் படியுங்கள்: Cars Sales: 18,000 யூனிட்களை விற்ற ஒற்றை மாடல் - ஜுலை மாத கார் விற்பனை, ஜப்பான் நிறுவனங்கள் ஆதிக்கம்

போக்குவரத்து நெரிசலை குறைக்க திட்டம்

நேரடிப் போக்குவரத்திற்கு இடையூறு விளைவிக்காமல், அணுகல் கட்டுப்படுத்தப்பட்ட வழித்தடம் முழுவதும் இணைப்பைப் பேணுவதற்காக, முக்கிய இடங்களில் ஐந்து வாகனக் கீழ்ப்பாலங்களும் ஐந்து இலகுரக வாகனக் கீழ்ப்பாலங்களும் திட்டத்தில் இடம்பெற்றுள்ளன. அதேநேரம் பெரிய பாலங்கள், ரயில்வே மேம்பாலங்கள் அல்லது ரயில்வே கேட்களை கடக்கும் சூழல் எதுவும் இடம்பெறவில்லை. இருப்பினும், தற்போதுள்ள NH-77 வழித்தடத்தில் நான்கு சிறிய பாலங்களின் புனரமைப்பு அல்லது அகலப்படுத்துதல் மற்றும் 19 சிறுபாலங்களை அகலப்படுத்துதல் ஆகிய பணிகள் மேற்கொள்ளப்படும். இந்த சாலையில் மணிக்கு 100 கிலோ மீட்டர் வேகத்தில் பயணிக்க முடியுமாம்.

திருவண்ணாமலை புறவழிச்சாலை - பலன், அதிகபட்ச வேகம்

திருவண்ணாமலை புறவழிச்சாலை அமைத்து முடிக்கப்பட்டதும், அண்ணாமலையார் கோயிலுக்குச் செல்லும் பக்தர்கள் மற்றும் தேசிய நெடுஞ்சாலையான 38 வழித்தடத்தைப் பயன்படுத்தும் மாவட்டங்களுக்கு இடையேயான போக்குவரத்து காரணமாக, அதிக போக்குவரத்தை காணும் திருவண்ணாமலையிலிருந்து வாகன நெரிசல் கடுமையாக குறைக்கப்படும் என்று எதிர்பார்க்கப்படுகிறது.

கனரக வாகனங்கள் மற்றும் நீண்ட தூர பயணங்களுக்கான பேருந்துகள் நகருக்குள் வருவது குறையும்.
நகரின் மையப் பகுதிக்குள் வாகனங்களின் ஒட்டுமொத்த போக்குவரத்து சுமார் 13.5 கி.மீ அளவிற்கு குறையும் என கணக்கிடப்பட்டுள்ளது.
இந்த பகுதியை கடக்க முயலும் பயணிகளுக்கு சுமார் 30 நிமிடங்கள் மிச்சமாகும்.
போளூர், செய்யாறு, ஆரணி மற்றும் காஞ்சிபுரத்திலிருந்து சேலம் அல்லது செங்கம் நோக்கிச் செல்லும் வாகனங்கள், நகருக்குள் போக்குவரத்து நெரிசல் மிகுந்த 13 கி.மீ. நீளமுள்ள சாலைகளை தவிர்த்து பயணிக்க முடியும்.
திருவண்ணாமலை அரசு மருத்துவக் கல்லூரி மருத்துவமனை அமைந்துள்ள வேலனந்தல் கிராமத்திற்கு அருகில் இது நேரடியாக இணைகிறது
தண்டராம்பட்டு மற்றும் அதனைச் சுற்றியுள்ள கிராம மக்கள் தற்போது மேற்கொள்ள வேண்டிய சிரமமான 25 கிலோ மீட்டர் தூரத்திற்கான நீளமான பயணம், வெறும் 10 கிலோ மீட்டர் நேரடிப் பயணமாக மாற உள்ளது
NH-38, NH-77 மற்றும் பல முக்கிய மாநில நெடுஞ்சாலைகளை (SH-236, SH-6, SH-9A, SH-9) புதிய புறவழிச்சாலை இணைக்கிறது
பெங்களூரு, வேலூர், புதுச்சேரி மற்றும் சேலம் போன்ற முக்கிய நகரங்களுக்கு இடையே பயணிக்கும் சரக்கு வாகனங்களுக்குத் தடையற்ற மாற்றுப் பாதையை உருவாக்குகிறது.

இதனிடையே, திருவண்ணாமலை புறவழிச்சாலை பணிகள் முடிந்த பிறகு 10 ஆண்டுகளுக்கு நெடுஞ்சாலையைப் பராமரிக்கும் பொறுப்பும் ஒப்பந்ததாரரையே சேரும் என தெரிவிக்கப்பட்டுள்ளது.

25 ஆண்டுக்கால பிரச்சனைக்கு எண்ட் கார்டு! செவிலிமேடு பாலாறு மேம்பாலப் பணிகள் தொடங்கியது! எப்போது முடியும்?

கிஷோர் — Sun, 5 Jul 2026 10:20:34 +0530

Vandavasi to Kanchipuram road update: காஞ்சிபுரம் அருகே செவிலிமேடு பகுதியில், பாலாற்றின் குறுக்கே புதிய உயர்மட்டப் பாலம் அமைக்கும் பணிகள் விறுவிறுப்பாகத் தொடங்கியுள்ளன. நெடுஞ்சாலைத் துறையின் மூலம் மேற்கொள்ளப்படும் இந்த முக்கிய உள்கட்டமைப்புத் திட்டம், அப்பகுதி மக்களின் நீண்ட நாள் போக்குவரத்து தேவையைப் பூர்த்தி செய்யும் வகையில் அமையவுள்ளது.

பின்னணியும் புதிய பாலத்தின் தேவையும் - Sevilimedu high level bridge

காஞ்சிபுரத்தில் இருந்து வந்தவாசி செல்லும் வழியில் அமைந்துள்ள தற்போதைய பாலாறு பாலம், சுமார் 25 ஆண்டுகளுக்கு முன்பு கட்டப்பட்டது. இந்த வழித்தடத்தில் கனரக வாகனங்களின் போக்குவரத்து கணிசமாக அதிகரித்ததால், காலப்போக்கில் பாலம் மிகவும் சேதமடைந்து மோசமான நிலையை எட்டியது. நெடுஞ்சாலைத் துறையினர் பலமுறை இந்த பாலத்தைச் சீரமைக்கும் பணிகளை மேற்கொண்ட போதிலும், அதற்கு நிரந்தரத் தீர்வு கிடைக்கவில்லை. இதன் காரணமாக, செவிலிமேடு பாலாறு பாலத்திற்கு மாற்றாக, அதன் அருகிலேயே புதிதாக ஒரு நவீன உயர்மட்டப் பாலத்தைக் கட்ட நெடுஞ்சாலைத் துறையினர் திட்டமிட்டனர். இதற்கான ஆரம்பக்கட்ட ஆய்வுப் பணிகளும் முன்னதாகவே முழுமையாக நிறைவடைந்தன.

செவிலிமேடு புதிய பாலத்தின் திட்ட மதிப்பீடு என்ன?

பாலாற்றின் குறுக்கே புதிய உயர்மட்டப் பாலம் கட்டுவதற்காகத் தமிழக அரசு கடந்த ஆண்டு ஆகஸ்ட் மாதம் ரூ.60 கோடி நிதி ஒதுக்கீடு செய்து அரசாணை பிறப்பித்தது. அதனைத் தொடர்ந்து, டெண்டர் நடைமுறைகள் அனைத்தும் வெற்றிகரமாக முடிக்கப்பட்டு, கடந்த பிப்ரவரி மாதம் இதற்கான பூமி பூஜை போடப்பட்டது. சட்டசபை தேர்தலுக்குப் பிறகு, தற்போது ஆற்றில் தூண்கள் அமைப்பதற்கான முதல்கட்டப் பணிகளை நெடுஞ்சாலைத் துறையினர் தீவிரமாகத் தொடங்கி மேற்கொண்டு வருகின்றனர்.

பாலத்தின் சிறப்பம்சங்கள் என்னென்ன ?

புதிதாக அமைக்கப்பட உள்ள இந்த உயர்மட்டப் பாலம் பின்வரும் சிறப்பம்சங்களுடன் பிரம்மாண்டமாக வடிவமைக்கப்பட்டுள்ளது:

நீளம்: 885 மீட்டர்

ஒட்டுமொத்த அகலம்: 13.2 மீட்டர்

ஓடு பாதையின் அகலம்: 10.5 மீட்டர்

கூடுதல் வசதிகள்: பாலத்தின் இரு புறங்களிலும் பொதுமக்கள் பாதுகாப்பாகச் செல்வதற்கான நடைபாதையும் (Footpath), பக்கவாட்டுத் தடுப்புச் சுவர்களும் (Retaining walls) அமைக்கப்பட உள்ளன.

செவிலிமேடு பாலத்தின் பணிகள் முடிவடைவது எப்போது ? Kanchipuram sevilimedu New Bridge Openning Date

இந்த புதிய மேம்பாலப் பணிகளை வரும் 2028-ஆம் ஆண்டுக்குள் முழுமையாக முடித்து மக்கள் பயன்பாட்டிற்குக் கொண்டு வர நெடுஞ்சாலைத் துறையினர் திட்டமிட்டு இலக்கு நிர்ணயித்துள்ளனர். அதுவரை, தற்போது பயன்பாட்டில் இருக்கும் பழைய பாலமே தடையற்ற போக்குவரத்திற்குத் தொடர்ந்து பயன்படுத்தப்படும் என்றும் நெடுஞ்சாலைத் துறை அதிகாரிகள் தரப்பில் தெரிவிக்கப்பட்டுள்ளது.

மொத்தமாய் மாறப்போகும் பழங்குடியினரின் எதிர்காலம்; தமிழக அரசின் அசத்தல் திட்டம் - அமைச்சர் வன்னியரசு சொன்ன சூப்பர் பிளான்

ராஜேஷ். எஸ் — Mon, 22 Jun 2026 12:29:58 +0530

தமிழ்நாடும் முழுவதும் பழங்குடியின மக்களின் பிரச்சனைகளுக்கு தீர்வுக்காண ஆய்வு செய்யப்பட்டு பழங்குடியின மக்களுக்கு கல்வி, வேலைவாய்ப்பு உருவாக்கும் வகையில் தமிழக அரசின் 5 ஆண்டு தொலைநோக்கு திட்டமாக செயல்படுத்தப்பட உள்ளதாக சமூக நீதித்துறை அமைச்சர் வன்னியரசு தெரிவித்துள்ளார்.

திருவண்ணாமலை மாவட்டம் அய்யம்பாளையம் கிராமத்திற்கு வருகை தந்த சமூக நீதித்துறை அமைச்சர் வன்னியரசு, அப்பகுதியில் வசித்து வரும் பழங்குடியினத்தை சேர்ந்த கனிக்கர்(குடுகுடுப்பை) இன மக்களை சந்தித்து அவர்களின் குறைகளை கேட்டறிந்து அவர்களிடமிருந்து மனுக்களை பெற்றுக்கொண்டார்.

பின்னர் செய்தியாளர்களிடம் அவர் பேசுகையில், "திருவண்ணாமலை மாவட்டத்தில் அய்யம்பாளையம் பகுதியில் 65 ஆண்டுகாலமாக குடுகுடுப்பை தொழில் செய்யும் பழங்குடியினத்தை சேர்ந்த கனிக்கர் இன மக்கள் வாழ்ந்து வருகிறார்கள். இவர்கள் நீண்டகாலமாக பழங்குடியின சாதி சான்று வேண்டி கோரிக்கை வைத்து வருகிறார்கள். அவர்களுக்கு சாதி சான்று வழங்க நடவடிக்கை எடுக்கப்படும். மேலும் கல்வி, வேலைவாய்ப்பு வழங்கவும் நடவடிக்கை மேற்கொள்ளப்படும்..

தமிழ்நாடு முழுவதும் உள்ள பழங்குடியின மக்களின் பிரச்சனைகளை போக்க ஆய்வு செய்யப்பட உள்ளது. இந்த மக்களின் பிரதான கோரிக்கையான மனை, மனைப்பட்டா, சாதிசான்று இவற்றை வழங்கவும், பழங்குடியின மக்களுக்கு கல்வி, வேலைவாய்ப்பு வழங்க தமிழக அரசின் 5 ஆண்டு கால தொலை நோக்கு பார்வையாக செயல்படுத்தப்பட உள்ளது.

சாதிவாரி கணக்கெடுப்பு தேவை. அதை விடுதலை சிறுத்தை கட்சி ஆதரிக்கிறது. சாதிவாரி கணக்கெடுப்பு இந்தியா முழுவதும் நடத்த வேண்டும்” என்று கூறினார்.

சமூக நீதித்துறை அமைச்சராக வன்னியரசு பொறுப்பேற்றது முதல் பட்டியல் இனமக்களின் பல்வேறு கோரிக்கைகளை நிறைவேற்றி வருகிறார். நீண்டகாலமாக கிடைக்காத வீட்டு மனை பட்டாக்கள், பல ஆண்டுகளாக சில கிராமங்களுக்கு விடப்படாத அரசுப் பேருந்துகள் என்பன உள்ளிட்ட பல கோரிக்கைகளை அவர் நிறைவேற்றி வருவது குறிப்பிடத்தக்கது.

சாமியார்களுக்கே 'விபூதி' அடித்த போலீஸ் - திருவண்ணாமலை கிரிவலப் பாதையில் இருந்த கஞ்சா - சிக்கியது எப்படி?

ராஜேஷ். எஸ் — Sun, 21 Jun 2026 13:44:00 +0530

திருவண்ணாமலை கிரிவலப் பாதையில் கஞ்சா புழக்கம் இருப்பதாக புகார் எழுந்த நிலையில், மாற்று உடையில் சோதனை செய்த போலீசார் இரண்டு பேரை கைது செய்து நடவடிக்கை மேற்கொண்டனர்.

பஞ்சபூத ஸ்தலங்களில் அக்னி ஸ்தலமாகவும் நினைத்தாலே முக்தி அளிக்கும் திருத்தலமாக விளங்கும் திருவண்ணாமலை அண்ணாமலையார் கோயிலில் அனுதினமும் ஆயிரக்கணக்கான பக்தர்கள் சாமி செய்து வருகின்றனர். இதுமட்டுமின்றி அண்ணாமலையார் கோயிலின் பின்புறம் உள்ள 2668 உயரம் கொண்ட மலையை சிவனாக கருதி அனுதினமும் ஏராளமான பக்தர்கள் 14 கிலோமீட்டர் கிரிவலம் மேற்கொண்டு வருகின்றனர்.

இந்நிலையில், கிரிவலப் பாதையில் சுமார் 500க்கும் மேற்பட்ட சாதுக்கள் பக்தர்களிடம் யாசகம் பெற்று வாழ்ந்து வருகின்றனர். சாதுக்கள் கஞ்சா புகைக்கும் பழக்கம் உள்ளதாக காவல்துறையினருக்கு பல்வேறு புகார்கள் வந்துள்ளது.

இதனைத் தொடர்ந்து இன்று திருவண்ணாமலை மேற்கு காவல் நிலையத்தில் நூற்றுக்கும் மேற்பட்ட காவல்துறையினர் மாற்று உடையில் அணிவகுத்து நின்று செங்கம் சாலை முதல் கிரிவலப் பாதை முழுவதும் நடந்து சென்று அதிரடி சோதனையில் ஈடுபட்டனர்.

குறிப்பாக கிரிவலப் பாதையில் உள்ள சாதுக்கள் தங்குமிடம் அவர்கள் வைத்திருக்கும் உடமைகள் உள்ளிட்ட பல்வேறு இடங்களில் கஞ்சா பழக்கம் உள்ளதா என்று அதிரடியாக ஆய்வு செய்யப்பட்டதுடன் யாரேனும் கஞ்சா வைத்திருந்தாலோ அல்லது விற்பனை செய்தாலோ கைது செய்யப்பட்டு சிறையில் அடைக்கப்படுவார்கள் என்று காவல்துறையினர் எச்சரிக்கை விடுத்தனர்.

இந்நிலையில், ராஜா செந்தில் என்ற இரண்டு சன்னியாசிகள் தலா ஐம்பது கிராம் கஞ்சா வைத்துள்ளதாக திருவண்ணாமலை மேற்கு காவல் துறையினர் கைது செய்து விசாரணை நடத்தி வருகிறார்கள். இந்த சம்பவம் அங்குள்ளவர்கள் இடையே அதிர்ச்சியை ஏற்படுத்தியுள்ளது.

கிரிவலப் பக்தர்களுக்கு இனி நோ டென்ஷன்; அண்ணாமலையாரை விரைவாகத் தரிசிக்க புதிய திட்டம்

ராஜேஷ். எஸ் — Fri, 19 Jun 2026 16:57:07 +0530

திருவண்ணாமலை மாவட்ட ஆட்சியர் வந்தனா கார்க் அண்ணாமலையார் கோவிலில் பக்தர்கள் விரைவாக தரிசனம் செய்வதற்கு மேற்கொள்ள வேண்டிய நடவடிக்கைகள் குறித்து ஆய்வு மேற்கொண்டார்.

திருவண்ணாமலை அண்ணாமலையார் கோயிலுக்கு பக்தர்கள் வருகை நாளுக்கு நாள் அதிகரித்து வருவதால் கூட்ட நெரிசலை முறைப்படுத்தி முறையான வரிசைகளை அமைத்து பக்தர்கள் எளிதில் தரிசனம் செய்ய பல்வேறு நடவடிக்கைகள் மாவட்ட நிர்வாகம் சார்பில் மேற்கொள்ளப்பட்டு வருகிறது.

இந்நிலையில், இன்று மாவட்ட ஆட்சியர் வந்தனா கார்க் கோயில் இராஜ கோபுரத்திலிருந்து தொடங்கி திருக்கோயில் உட்புற வளாகம், பேகோபுரம் மற்றும் அம்மணி அம்மன் கோபுரம் ஆகிய கோபுர வாயில்களுக்கு சென்று கூட்ட நெரிசலை முறைப்படுத்தி பக்தர்கள் விரைவாக தரிசனம் செய்யும் வகையில் மேற்கொள்ள வேண்டிய நடவடிக்கைகள் குறித்து ஆய்வு மேற்கொண்டார்.

அண்ணாமலையார் கோயிலுக்குள் கோடை வெப்பத்திலிருந்து பக்தர்களை பாதுகாக்க தேவையான இடங்களில் நிழற்பந்தல்கள் மற்றும் தரை விரிப்பு அமைக்கப்பட்டுள்ளதையும், கூட்ட நெரிசலில் இருந்து பக்தர்கள் அமைதியான முறையில் தரிசனம் செய்ய க்யூ லைன் வசதிகள் அமைக்கப்பட்டுள்ளதையும், மாற்றுத்திறனாளிகள், வயதானவர்கள், கர்ப்பிணி பெண்கள், கைக்குழந்தையுடன் வரும் பெண்கள் ஆகியோர் சிரமமின்றி சுவாமி தரிசனம் செய்ய தனி வரிசை ஏற்படுத்தப்பட்டுள்ளதையும் ஆய்வு செய்தார்.

Also Read| Annamalai: ”திமுகவின் நிதி நிர்வாக சீர்கேடுகள்” CM விஜய்க்கு வாழ்த்துடன் அட்வைஸ் தந்த அண்ணாமலை

திருவண்ணாமலை கோயிலுக்கு கடந்த சில ஆண்டுகளாக அண்டை மாநிலங்களைச் சேர்ந்த பக்தர்கள் வருவதால் கூட்டம் நிரம்பி வழிகிறது. முன்பெல்லாம், பக்தர்கள் பெளர்ணமி நாட்களில் கிரிவலம் வருவது வழக்கம். தற்போது, அனைத்து நாட்களிலும் கிரிவலம் செல்கின்றனர். அத்துடன் கோயிலுக்கு சென்று சாமியை தரிசிக்கின்றனர். இதனால், தினந்தோறும் பக்தர்களின் கூட்டம் அதிகரித்து வருகின்றன. குறிப்பாக, வெளிமாநில மக்களின் கூட்டம் அதிகமாக இருக்கிறது. இதன்காரணமாக, உள்ளூர் மக்கள் கோயிலுக்கு சென்று சாமியை தரிசிக்க சிரமப்படுகின்றனர். இதுதொடர்பாக அவர்களும் தொடர்ந்து புகார்கள் தெரிவித்து வருகின்றனர். மாவட்ட ஆட்சியரின் ஆய்வுக்கு பிறகு விரைவு தரிசனம் கிடைக்கும் என்று பக்தர்கள் எதிர்பார்த்துள்ளனர்.

தமிழகத்தை அதிரவைக்கும் சிஎம் விஜய் பர்த்டே - தங்கத்தேர் பவனி மற்றும் இலவச பூங்கா விசிட்; குஷியில் ரசிகர்கள்

ராஜேஷ். எஸ் — Thu, 18 Jun 2026 15:05:05 +0530

தமிழ்நாடு முதலமைச்சர் விஜயின் பிறந்தநாளை முன்னிட்டு திருவண்ணாமலை அண்ணாமலையார் கோயிலில் தவெக கட்சியினர் தங்கத் தேர் இழுத்து வழிபாடு செய்தனர்.

பஞ்சபூத ஸ்தலங்களில் அக்னி ஸ்தலமாகவும் நினைத்தாலே முக்தி அளிக்கும் திருத்தலமாக விளங்கும் திருவண்ணாமலை அண்ணாமலையார் கோயிலில் தவெக கட்சியினர் தங்கத்தேர் இழுத்து வழிபாடு செய்தனர். திருவண்ணாமலை அண்ணாமலையார் கோயிலில் தங்கத்தேர் உள்ளது. இந்த தங்கத் தேரை அரசியல் கட்சி தலைவர்களின் பிறந்தநாள் வரும்போது அண்ணாமலையார் கோயிலில் கட்சியினர் பணம் கட்டி கோயிலில் மூன்றாம் பிரகாரத்தில் சுற்றி வந்து வழிபாடு செய்வது வழக்கம்.

இந்நிலையில், வரும் 22ம் தேதி தமிழக முதல்வர் விஜய்யின் பிறந்தநாளை ரசிகர்கள் மற்றும் தவெக கட்சியினரால் கொண்டாடப்பட உள்ளது. இந்த நிலையில், பிறந்தநாளை முன்னிட்டு இன்று அண்ணாமலையார் கோயிலில் தவெக கட்சியினர் தங்கத்தை இழுத்து வழிபாடு மேற்கொண்டனர்.

முன்னதாக, முதலமைச்சர் விஜய்யின் 52-வது பிறந்த நாளை முன்னிட்டு வண்டலூர் உள்ளிட்ட 3 உயிரியல் பூங்காக்களுக்கு 2 நாட்கள் கட்டணமில்லா அனுமதி என வனத்துறைஉ அமைச்சர் ஆர்.வீ.இரஞ்சித்குமார் அறிவித்திருந்தார்.

Also Read| சட்டப்பேரவையில் தேசிய கீதம்.. டம்மி CMக்கு வெக்கமே இல்லையா? - விஜயை சாடிய திமுக ஐடி விங்!

ஜூன் 21-ஆம் தேதி (ஞாயிற்றுக்கிழமை) மற்றும் ஜூன் 22-ஆம் தேதி (திங்கள்கிழமை) ஆகிய இரண்டு நாட்களுக்கு செங்கல்பட்டு மாவட்டத்தின் வண்டலூர் அறிஞர் அண்ணா உயிரியல் பூங்கா, வேலூர் மாவட்டத்தில் உள்ள அமிர்தி சிறு உயிரியல் பூங்கா மற்றும் சேலம் குரும்பட்டியிலுள்ள வன உயிரியல் பூங்கா ஆகிய மூன்று பூங்காக்களிலும் பெரியவர்கள் முதல் குழந்தைகள் வரை அனைவரும் எவ்வித கட்டணமுமின்றி அனுமதிக்கப்படுவார்கள் என்று அமைச்சர் தெரிவித்துள்ளார்.