tiruvannamalai

அக்னி ஸ்தலத்தில் இப்படி ஒரு இடமா? திருவண்ணாமலையில் ஒளிந்திருக்கும் 'ஜில்' ரகசியம் - மிஸ் பண்ணிடாதீங்க!

கிஷோர் — Fri, 1 May 2026 17:25:55 +0530

Waterfalls near Tiruvannamalai: திருவண்ணாமலை என்றாலே நம் நினைவுக்கு வருவது விண்ணை முட்டும் கோபுரங்களும், அக்னி ஸ்தலமான அண்ணாமலையார் கோயிலும் தான். கோடை காலங்களில் வெப்பம் சற்றே அதிகமாகக் காணப்படும் இந்த ஆன்மிக நகரத்திற்கு அருகிலேயே, மனதைக் குளிரவைக்கும் பல இயற்கை நீர்வீழ்ச்சிகள் ஒளிந்திருக்கின்றன என்பது பலரும் அறியாத உண்மை. குறிப்பாக ஜவ்வாது மலைத்தொடரின் மடியில் அமைந்துள்ள இந்த அருவிகள், கோடை வெப்பத்திலிருந்து தப்பிக்க நினைக்கும் சுற்றுலாப் பயணிகளுக்கு ஒரு சிறந்த புகலிடமாக விளங்குகின்றன.

ஜவ்வாது மலையின் ரத்தினம் - பீமன் அருவி

திருவண்ணாமலை மாவட்டத்தின் இயற்கை எழில் கொஞ்சும் ஜவ்வாது மலைத்தொடரில் அமைந்துள்ள மிக முக்கியமான சுற்றுலாத்தலம் பீமன் அருவி ஆகும். திருவண்ணாமலை நகரிலிருந்து சுமார் 84 கி.மீ. தொலைவில் இது அமைந்திருந்தாலும், அங்கு செல்லும் மலைப்பாதை பயணம் ஒரு தனித்துவமான அனுபவத்தை வழங்குகிறது. அடர்ந்த காடுகளுக்கு இடையே பாறைகளில் மோதி விழும் நீரின் ஓசை, நகரத்தின் இரைச்சலில் இருந்து விடுபட்டு அமைதியைத் தேடுபவர்களுக்குப் பெரிய மருந்தாக அமைகிறது.

சுமார் இரண்டு மணி நேரப் பயணத்திற்குப் பிறகு இந்த அருவியை அடையலாம் என்றாலும், வழியெங்கும் காணப்படும் பசுமையான தாவரங்களும் மூலிகை வாசனையும் பயணக் களைப்பைத் தெரியாமல் பார்த்துக்கொள்கின்றன. குடும்பத்துடன் ஒரு நாள் பொழுதைக் கழிக்கவும், இயற்கை எழிலை ரசிக்கவும் இது ஒரு மிகச்சிறந்த இடமாகும்.

அமைதி தேடுபவர்களுக்கு ஏற்ற வெட்டவலம் அருவி

பெரிய ஆரவாரம் இல்லாமல், அமைதியான சூழலில் ஒரு மாலைப் பொழுதைக் கழிக்க விரும்புபவர்களுக்கு வெட்டவலம் அருவி ஒரு வரப்பிரசாதம். திருவண்ணாமலையிலிருந்து விழுப்புரம் செல்லும் பாதையில் சுமார் 23 கி.மீ. தொலைவிலேயே இது அமைந்துள்ளது. இது மற்ற பெரிய நீர்வீழ்ச்சிகளைப் போல பிரம்மாண்டமாக இல்லாவிட்டாலும், ஒரு சிறிய குன்றின் மீது இருந்து பாறைகளின் வழியாக மென்மையாக வழிந்தோடும் நீர் ஒருவித இதமான குளிர்ச்சியைத் தருகிறது.

சாலை வசதிகள் நன்றாக இருப்பதால் கார் அல்லது பேருந்து மூலம் எளிதாகச் சென்றடையலாம். அருவிக்குச் செல்லும் குறுகிய மலைப்பாதை நடைப்பயணத்திற்கு இனிமையாக இருக்கும் என்பதால், உள்ளூர் மக்கள் வார இறுதிகளில் இங்கு அதிக அளவில் திரள்கின்றனர்.

வனமும் அருவியும் இணைந்த அமிர்தி நீர்வீழ்ச்சி

வேலூர் மற்றும் திருவண்ணாமலை மாவட்ட எல்லையில் உள்ள ஜவ்வாது மலைப்பகுதியில், அமிர்தி வனவிலங்கு பூங்காவிற்குள் இந்த அருவி அமைந்துள்ளது. இயற்கை ஆர்வலர்களுக்கும், குழந்தைகளுக்கும் இது ஒரு சொர்க்கம் என்றே சொல்லலாம். அருவிக்குச் செல்லும் வழியில் மான், நரி, காட்டுப்பன்றி மற்றும் பல அரிய வகை பறவைகளைக் காணும் வாய்ப்பு இருப்பதால், இது ஒரு சாகசப் பயணமாக அமைகிறது.

இங்குள்ள சிறிய மிருகக்காட்சி சாலை குழந்தைகளுக்குப் புதிய அனுபவத்தைத் தரும். ஜூன் முதல் நவம்பர் வரை இங்குச் செல்ல உகந்த காலம் என்றாலும், கோடை காலத்திலும் இப்பகுதி குளிர்ச்சியாகவே காணப்படுகிறது. வனப்பகுதிக்குள் அடிப்படை வசதிகள் செய்யப்பட்டிருந்தாலும், வனத்துறையின் வழிகாட்டுதல்களைப் பின்பற்றி பாதுகாப்பாகப் பயணிப்பது அவசியமாகும்.

கோடை சுற்றுலாவுக்கான கூடுதல் தகவல்கள்

திருவண்ணாமலையைச் சுற்றியுள்ள இந்த அருவிகள் ஆன்மிகப் பயணத்தோடு இயற்கையையும் இணைக்கின்றன. ஜவ்வாது மலையில் பீமன் அருவி தவிர கிளியூர் அருவி போன்ற சிறிய நீர்வீழ்ச்சிகளும் ஆங்காங்கே உள்ளன. இந்த இடங்களுக்குச் செல்லும் சுற்றுலாப் பயணிகள் தங்களுக்குத் தேவையான உணவு மற்றும் குடிநீர் வசதிகளை முன்கூட்டியே திட்டமிட்டுக் கொள்வது நல்லது, ஏனெனில் வனப்பகுதிகளில் கடைகள் குறைவாகவே இருக்கும்.

மேலும், அக்னி ஸ்தலத்தின் வெப்பத்தைத் தணிக்கச் செல்லும் போது இயற்கையை மாசுபடுத்தாமல், பிளாஸ்டிக் பயன்பாட்டைத் தவிர்த்து இந்த நீர்நிலைகளைப் பாதுகாப்பதும் நமது கடமையாகும். ஆன்மிகத் தேடலில் வருபவர்கள் ஒரு நாள் ஒதுக்கி இந்த அருவிகளுக்குச் சென்றால், மனதிற்கும் உடலுக்கும் புத்துணர்ச்சி கிடைப்பது நிச்சயம்.

Chitra pournami 2026 : பக்தர்களுக்கு குட் நியூஸ்! திருவண்ணாமலைக்கு சிறப்பு ரயில்கள் அறிவிப்பு!

சிவரஞ்சித் — Thu, 30 Apr 2026 16:40:58 +0530

திருவண்ணாமலை : திருவண்ணாமலை அருணாச்சலேஸ்வரர் கோவிலில் உலகப்புகழ் பெற்ற சித்ரா பவுர்ணமி விழா வெகுவிமரிசையாக நடைபெற உள்ளது. இவ்விழாவில் கிரிவலம் செல்ல லட்சக்கணக்கான பக்தர்கள் திரள்வார்கள் என எதிர்பார்க்கப்படுவதால், கூட்ட நெரிசலைத் தவிர்க்கவும் பயணிகளின் வசதிக்காகவும் தெற்கு ரயில்வே சார்பில் விழுப்புரம் - திருவண்ணாமலை - காட்பாடி இடையே சிறப்பு ரயில்கள் இயக்கப்பட உள்ளன.

சித்திரை மாதத்தில் வரும் பவுர்ணமி சித்ரா பவுர்ணமி என சிறப்பாகக் கொண்டாடப்படுகிறது. 2026-ம் ஆண்டு மே 1-ம் தேதி (வெள்ளிக்கிழமை) சித்ரா பவுர்ணமி வருகிறது. இந்நாளில் சூரியன் உச்ச பலத்துடனும், சந்திரன் முழுமையுடனும் காணப்படுகின்றனர். சித்திரகுப்தன் வழிபாடு, கிரிவலம், மற்றும் கர்ம வினைகளை நீக்கும் விரத வழிபாடுகள் இந்நாளின் முக்கிய அம்சங்களாகும்.

இது குறித்து தெற்கு ரயில்வே வெளியிட்டுள்ள விரிவான கால அட்டவணை இதோ:

1. விழுப்புரம் - திருவண்ணாமலை சிறப்பு ரயில் (வண்டி எண்: 06130 / 06129)

பகலில் பயணம் செய்யும் பக்தர்களுக்காக இந்த முன்பதிவில்லாத சிறப்பு ரயில் இயக்கப்படுகிறது.

இயக்கப்படும் நாட்கள்: ஏப்ரல் 30 (இன்று), மே 1 மற்றும் மே 2.

விழுப்புரம் புறப்பாடு: காலை 10.10 மணி -> திருவண்ணாமலை வருகை: காலை 11.45 மணி.

மறுமார்க்கம்: திருவண்ணாமலையில் இருந்து மதியம் 12.15 மணிக்கு புறப்பட்டு, மதியம் 1.45 மணிக்கு விழுப்புரம் வந்தடையும்.

2. விழுப்புரம் - காட்பாடி சிறப்பு ரயில் (வண்டி எண்: 06099 / 06100)

திருவண்ணாமலை வழியாக காட்பாடி செல்லும் பக்தர்களுக்காக இரவு நேர சிறப்பு ரயில் இயக்கப்படுகிறது.

இயக்கப்படும் நாட்கள்: ஏப்ரல் 30, மே 1 மற்றும் மே 2.

விழுப்புரம் புறப்பாடு: இரவு 10.40 மணி -> காட்பாடி வருகை: அதிகாலை 1.50 மணி (மறுநாள்).

மறுமார்க்கம்: காட்பாடியில் இருந்து மே 1, 2, 3 ஆகிய தேதிகளில் அதிகாலை 2.05 மணிக்கு புறப்பட்டு, காலை 5.00 மணிக்கு விழுப்புரம் வந்தடையும்.

3. விழுப்புரம் - திருவண்ணாமலை இரவு நேர ரயில் (வண்டி எண்: 06145 / 06146)

இரவு நேர கிரிவலத்திற்குச் செல்லும் பக்தர்களின் வசதிக்காக கூடுதல் ரயில்கள் ஒதுக்கப்பட்டுள்ளன.

இயக்கப்படும் நாட்கள்: ஏப்ரல் 30, மே 1 மற்றும் மே 2.

விழுப்புரம் புறப்பாடு: இரவு 9.15 மணி - திருவண்ணாமலை வருகை: இரவு 10.45 மணி.

மறுமார்க்கம்: திருவண்ணாமலையில் இருந்து மே 1, 2, 3 ஆகிய தேதிகளில் அதிகாலை 2.00 மணிக்கு புறப்பட்டு, அதிகாலை 4.00 மணிக்கு விழுப்புரம் வந்தடையும்.

முக்கிய குறிப்பு:

இந்த சிறப்பு ரயில்கள் அனைத்தும் முன்பதிவில்லாத (Unreserved) ரயில்கள் என்பதால், பக்தர்கள் சாதாரண பயணச்சீட்டு பெற்று பயணிக்கலாம். பவுர்ணமி தினங்களில் பேருந்துகளில் ஏற்படும் கடும் கூட்ட நெரிசலைத் தவிர்க்க, இந்த ரயில் சேவையைப் பக்தர்கள் பயன்படுத்திக் கொள்ளுமாறு ரயில்வே நிர்வாகம் கேட்டுக்கொண்டுள்ளது.

Tiruvannamalai: கோயில் வளாகத்தில் செங்கல் வழிபாடு.. திருவண்ணாமலையை அலற விடும் தெலுங்கு மக்கள்!

பேச்சி ஆவுடையப்பன் — Sun, 26 Apr 2026 06:57:52 +0530

திருவண்ணாமலை அருணாசலேஸ்வரர் கோயிலில் தெலுங்கு மொழி பேசும் மக்கள் செய்த செங்கல் சடங்கிற்கு கோயில் நிர்வாகம் அதிரடியாக தடை விதித்துள்ளது.

அக்னி ஸ்தலமாக திகழும் திருவண்ணாமலை

சிவபெருமானுக்குரிய பஞ்சபூத ஸ்தலங்களில் அக்னி ஸ்தலமாக திகழ்வது திருவண்ணாமலை அண்ணாமலையார் கோயிலாகும். இங்கு உண்ணாமுலையம்மன் சமேத அருணாசலேஸ்வரர் பக்தர்களுக்கு அருள்பாலிக்கிறார். ஆன்மிகத்தில் திருவண்ணாமலைக்கு என தனியிடம் உள்ளது. கோயிலின் பின்புறம் உள்ள கிரிவல மலையில் பாதயாத்திரை சென்று அண்ணாமலையாரை வழிபட்டால் நாம் நினைத்தது நடக்கும் என்பது ஐதீகமாகும். இதனால் வருடந்தோறும் அம்மாவட்டம் வெளியூர் மக்களால் நிரம்பி வழியும். குறிப்பாக பௌர்ணமி நாளில் லட்சக்கணக்கான மக்கள் திருவண்ணாமலைக்கு வருகை தந்து கிரிவலம் மேற்கொள்கிறார்கள்.

தெலுங்கு பேசும் மக்கள் வருகை

இப்படியான திருவண்ணாமலை தமிழ்நாட்டிற்குள் இருந்தாலும் கடந்த சில ஆண்டுகளாக அம்மாவட்டம் தெலுங்கு மொழி பேசும் மக்கள் வாழும் இடமாக மாறி வருகிறது. ஆந்திரா, தெலங்கானா மாநிலங்களில் இருந்து தினந்தோறும் ஆயிரக்கணக்கான மக்கள் திருவண்ணாமலைக்கு வருகை தருகின்றனர். இதனால் அங்குள்ள கடைகள், விடுதிகளில் தெலுங்கு மொழியும் பேச்சு வழக்குக்கு சேர்க்கப்படும் அளவுக்கு அம்மக்களின் இருப்பு உள்ளது. இதனால் வழிபாட்டுக்கு செல்லும்போது பக்தர்களிடையே மோதல் ஏற்பட்டு வருவது வாடிக்கையாக உள்ளது. அங்கு ஜோதிடர்கள் கிளப்பி விட்ட நம்பிக்கை அடிப்படையில் வழக்கத்தை விட மும்மடங்கு தெலுங்கு மொழி பேசும் மக்கள் திருவண்ணாமலை வருகின்றனர்.

விஜய் நெகிழ்ச்சி செயல்! |" src="https://www.youtube.com/embed/yDQFlTQ0lp0" width="805" height="453" frameborder="0" allowfullscreen="allowfullscreen">

வினோத செங்கல் வழிபாடு

இந்த நிலையில் தெலுங்கு பேசும் மாநிலங்களில் பிரபலமான நம்பிக்கையாக பக்தர்கள் தங்கள் வீட்டைக் கட்டுவதற்காக செங்கற்களை அடுக்கிப் பிரார்த்தனை செய்வது உள்ளது. இது தற்போது திருவண்ணாமலையின் அருணாசலேஸ்வரர் கோவிலில் ஒரு சர்வ சாதாரண காட்சியாகி மாறி வருகிறது.

ஆந்திரா மற்றும் தெலங்கானாவைச் சேர்ந்த மக்கள் அருணாசலேஸ்வரர் கோயிலின் ஐந்தாவது பிரகாரத்தில் பிரார்த்தனை செய்த பிறகு செங்கற்களை ஒன்றன் மேல் ஒன்றாக அடுக்கி வைப்பது வழக்கமாகி வருகிறது. இதன்மூலம் தங்கள் சொந்தவீடு கனவு விரைவில் நடைபெறும் என அவர்கள் நம்புகின்றனர். இதனை கவனித்த தமிழ்நாடு மற்றும் பிற மாநில பக்தர்களும் அதனை மேற்கொள்ள தொடங்கியுள்ளனர். இந்த விஷயம் தொடர்பான புகைப்படம் மற்றும் வீடியோ இணையத்தில் வெளியாகி பெரும் வைரலானது. பலரும் பக்தர்களின் வழிபாட்டுக்கு இடையூறாக இருப்பதாக புகார் தெரிவித்தனர். இந்த சம்பவம் கோயில் நிர்வாகத்தினர் கவனத்திற்கு சென்றது.

உடனடியாக அதிகாரிகள் பணியாளர்களை அனுப்பி செங்கலை அகற்றும் பணியில் ஈடுபட்டனர். தொடர்ந்து இதுபோன்று நடக்காமல் இருக்க நடவடிக்கை எடுக்கப்படும் என தெரிவித்தனர். எந்த மொழி பேசும் மக்கள் வேண்டுமானாலும் அண்ணாமலையார் கோயிலுக்கு வரட்டும், ஆனால் கோயிலின் புனிதத்தையும், மக்களின் நம்பிக்கையையும் கெடுக்கும் வகையிலான செயலில் ஈடுபட வேண்டாம் என பக்தர்கள் தரப்பிலும் கேட்டுக்கொள்ளப்பட்டுள்ளது.

கல்குவாரி உரிமையாளர் வீட்டில் அதிரடி சோதனை! கணக்கில் வராத பணம் குவிப்பு: திருவண்ணாமலையில் பரபரப்பு!

ராஜேஷ். எஸ் — Tue, 31 Mar 2026 19:15:07 +0530

திருவண்ணாமலை காந்திநகர் புறவழிச் சாலை ஐந்தாவது தெருவில் கல்குவாரி உரிமையாளர் வீட்டில் வருமான வரி துறையினர் சோதனையில் ஈடுபட்டபோது கணக்கில் வராத 2 கோடியே 67 லட்ச ரூபாய் பறிமுதல் செய்யப்பட்டுள்ளதாக தகவல் கிடைத்துள்ளது.

திருவண்ணாமலை காந்திநகர் புறவழிச்சாலை ஐந்தாவது தெருவை சேர்ந்தவர் ஆதிமூலம். இவர் சோமாசிபாடி என்ற கிராமத்தில் கல்குவாரி ஏலம் எடுத்து நடத்தி வருகிறார். இந்த கல்குவாரியிலிருந்து தனியார் மற்றும் அரசு பணிகளுக்கு எம்.சாண்ட் மற்றும் ஜல்லிக்கற்கள் போன்றவற்றை வழங்கி வருகிறார்.

இந்நிலையில் இன்று சோமாசிபாடியில் உள்ள கல்குவாரியில் வருமான வரித்துறையினர் சோதனையில் ஈடுபட்டனர். அதனைத் தொடர்ந்து காந்திநகர் ஐந்தாவது தெருவில் உள்ள ஆதிமூலம் என்பவர் வீட்டில் சோதனையில் ஈடுபட்டு வருகின்றனர். சுமார் 4 மணி நேரமாக நடைபெற்று வரும் இந்த சோதனையில் அவரது வீட்டில் இருந்து கணக்கில் வராத 2 கோடி 67 லட்ச ரூபாய் பணம் பறிமுதல் செய்யப்பட்டுள்ளதாக வருமான வரித்துறையினர் தகவல் அளித்துள்ளனர். தேர்தல் நடத்தை விதிமுறை அமுலில் இருக்கும் பொழுது கல்குவாரி உரிமையாளர் வீட்டில் இருந்து கணக்கில் வராத 2 கோடியே 67 லட்ச ரூபாய் பணம் பறிமுதல் செய்யப்பட்ட சம்பவம் திருவண்ணாமலை நகரத்தில் பரபரப்பை ஏற்படுத்தி உள்ளது.

அமைச்சர் எ.வ. வேலுவின் தோல்விதான் தேர்தல் திருப்புமுனையாக அமையும் - அருள் ஆறுமுகம்

ராஜேஷ். எஸ் — Tue, 31 Mar 2026 17:50:31 +0530

விவசாயிகளை குண்டர் சட்டத்தில் கைது செய்த எ.வ. வேலு தோற்கடிக்கப்படுவார் என்றும் தமிழகத்தில் விவசாயிகள் நிலங்களை கொள்ளையடிப்பதை வாடிக்கையாக கொண்டுள்ள அமைச்சர் எ.வ. வேலுவின் தோல்விதான் திருவண்ணாமலை சட்டப்பேரவை தேர்தல் திருப்புமுனையாக அமையும் என்றும் திருவண்ணாமலை தொகுதி தமிழக வெற்றிக் கழக வேட்பாளர் அருள் ஆறுமுகம் கூறியுள்ளார்.

சட்டமன்றத் தேர்தலையொட்டி தமிழகத்தில் தமிழக வெற்றி கழகம் சார்பில் 234 தொகுதிகளிலும் வேட்பாளர்களை தமிழக வெற்றி கழகம் தலைவர் விஜய் அறிவித்தார். தமிழக வெற்றி கழகம் சார்பில் திருவண்ணாமலை சட்டமன்ற தொகுதி வேட்பாளராக அருள் ஆறுமுகம் அறிவிக்கப்பட்டார். சட்டமன்ற தொகுதி வேட்பாளரை தொண்டர்கள் பட்டாசு வெடித்து இனிப்புகள் வழங்கி உற்சாக வரவேற்பு அளித்தனர்.

இதனைத் தொடர்ந்து வேட்பாளர் அருள் ஆறுமுகம் மறைந்த முன்னாள் தலைவர்கள் பெரியார் மற்றும் அம்பேத்கர் சிலைகளுக்கு மாலை அணிவித்து மரியாதை செலுத்தினார்.

பின்னார் செய்தியாளர்களுக்கு பேட்டி அளித்த அருள் ஆறுமுகம், தமிழகத்திலேயே விஜய் போட்டியிடுகின்ற தொகுதியும், நான் போட்டியிடுகின்ற திருவண்ணாமலை தொகுதியும்தான் தற்போதைய தேர்தலில் திருப்புமுனை தேர்தலாக இருக்கப் போகிறது என்றும் தமிழகத்தில் விவசாயிகள் நிலங்களை கொள்ளையடிப்பதை வாடிக்கையாக கொண்டுள்ள அமைச்சர் எ.வ. வேலுவின் தோல்விதான் திருவண்ணாமலை சட்டப்பேரவை தேர்தல் திருப்புமுனையாக அமையும் என்று தெரிவித்தார்.

நான் எ.வ. வேலு அவர்களுக்கு எதிராக போட்டியிடவில்லை என்றும் எ.வ. வேலு தான் தொடர்ச்சியாக விவசாயிகளுக்கு எதிராக செயல்பட்டு கொண்டு உள்ளார் என்றும் விவசாயிகள் வேலுவின் இடத்தை கேட்டு போராடவில்லை தங்களது நிலம் தங்களுக்கு வேண்டும் தங்கள் நிலத்தை கொடுக்கப் போவதில்லை என்று போராடி வருகிறார்கள். விவசாயிகள் மீது குண்டர் சட்டம் மட்டுமல்ல அது வெவ்வேறு சட்டங்களைப் போட்டு கைது செய்து வருகிறார். இதற்கெல்லாம் பாடம் புகட்டும் ஒரு தேர்தலாக தான் தற்போது இந்த திருவண்ணாமலை தேர்தல் த.வெ.க தொண்டர்கள் எழுச்சியாக இருக்கப் போகிறது என்றும் தன்னை யாரும் வீழ்த்த முடியாது என்று நினைத்துக் கொண்டுள்ள வேலு அவர்களுக்கு எதிராக மக்கள் கொந்தளிப்போடு உள்ளார்கள் என்றும் நிச்சயமாக தொண்டர்களின் ஆதரவுடன் திருவண்ணாமலையில் நான் வெற்றி பெறுவேன் என திருவண்ணாமலை தொகுதி தமிழக வெற்றிக்கழக வேட்பாளர் அருள் ஆறுமுகம் அவர்கள் பேட்டி அளித்தார்.

மகளிருக்கான திட்டங்கள் இந்த நிதியில் இருந்துதான் எடுக்குறாங்க - ஏர்போர்ட் மூர்த்தி பரபரப்பு குற்றச்சாட்டு

ராஜேஷ். எஸ் — Fri, 27 Mar 2026 13:40:47 +0530

ஏழாயிரம் கோடிக்கு மேல் பட்டியல் இன சமுதாய மக்களுக்கான நிதியை மாநில அரசு திருப்பி அனுப்பி உள்ளது. இந்த நிதியிலிருந்து தான் மகளிருக்கான திட்டங்கள் செயல்படுத்தப்பட்டுள்ளது புரட்சித்தமிழகம் ஏர்போர்ட் மூர்த்தி குற்றச்சாட்டு வைத்துள்ளார்.

பட்டியல் மக்களின் நிதி திருப்பி அனுப்பப்பட்டது

வருகின்ற சட்டமன்றத் தேர்தலில் ஆட்சி மாற்றத்தை உருவாக்க மக்கள் தயாராகிக் கொண்டிருக்கிறார்கள் என்றும், கடந்த ஐந்து ஆண்டுகளுக்கு முன்பாக ரூ.5 லட்சம் கோடியாக இருந்த தமிழகத்தின் கடன் கடந்த ஐந்து ஆண்டுகளில் ரூ.10 லட்சம் கோடியாக மாற்றிய இந்த ஆட்சியை அப்புறப்படுத்துவதற்கு மக்கள் தயாராகிக் கொண்டிருக்கிறார்கள் என்றும், தமிழகத்தை மிகுந்த நிதி நெருக்கடி மாநிலமாக திமுக மாற்றியுள்ளது என்றும், திமுக அரசு தொடர்ந்து மத்திய அரசின் மீது காழ்ப்புணர்ச்சியுடன் செயல்பட்டு வருவதாகவும் குறிப்பாக பிற்படுத்த மக்களுக்காக செயல்படுத்தப்படும் திட்டங்களுக்காக வழங்கப்பட்ட ரூ.7838 கோடி நிதியை இந்த அரசு திருப்பி அனுப்பி உள்ளது என்றும், மகளிர் உரிமைத் தொகை மற்றும் தற்போது வழங்கப்பட்ட 5000 ரூபாய் திட்டங்களுக்கான நிதியை பட்டியியல் சமுதாய மக்களின் நிதியிலிருந்து இந்த அரசு எடுத்து கொடுத்துள்ளதாகவும், கல்விக்காக 2200 கோடி ரூபாய் நிதி வரவில்லை என தொடர்ந்து மத்திய அரசின் மீது மாநில அரசு குற்றம் சாட்சி வருவதாகவும், ஆனால் கண்களுக்கு தெரிந்து பட்டியல் சமுதாய மக்களுக்கான நிதியை இந்த அரசு திருப்பி அனுப்பி உள்ளதாக ஏர்போர்ட் மூர்த்தி குற்றம் சாட்டினார்.

புதிய தமிழகம் கட்சிக்கு 3 தொகுதிகள்?

மத்திய அரசின் மூலம் செயல்படுத்தப்படும் பல்வேறு திட்டங்கள் குறிப்பாக ஜல்ஜீவன் திட்டம் உட்பட பல்வேறு திட்டங்கள் மாநில அரசுகளால் செயல்படுத்தப்பட்டதாக ஒரு பொய்யான தோற்றத்தை இந்த அரசு ஏற்படுத்தி உள்ளது என்றும் மத்திய அரசின் நிதி இல்லாமல் எந்த ஒரு மாநில அரசும் இயங்க முடியாது என்றும், மாறாக மத்திய அரசு எந்த ஒரு நிதியையும் தரவில்லை என்ற ஒரு மாய தோற்றத்தை இந்த அரசு ஏற்படுத்தி வருவதாகவும், திமுகவை பற்றி குறை சொல்பவர்களைப் பற்றி பேசுவதற்காகவே திமுக கூட்டணியில் உள்ளவர்கள் உள்ளனர் என்றும், சட்டம் ஒழுங்கு பிரச்சனையை அரசாங்கம் தனது கட்டுக்குள் வைத்திருக்க வேண்டும் என்றும் ஆனால் திமுக அரசு அதை செய்யவில்லை என்றும், இந்தியாவிலேயே தமிழகம் தான் வன்கொடுமை சட்டத்தில் வழக்கு பதிவு செய்யப்படும் மூன்றாவது மாநிலமாக உள்ளது என்றும் புரட்சித் தமிழகம் கட்சி என்டிஏ கூட்டணியில் மூன்று தொகுதிகள் கேட்டுள்ளதாகவும் விரைவில் எங்களுக்கு அது முடிவாகும் என்றும் தெரிவித்தார்.

விஜய் அரசியலில் நிலைக்க மாட்டார்

தமிழக வெற்றிக் கழகத்தை பொருத்தவரை ஒரு பொய்யான மாயையை உருவாக்குகின்றார்கள் என்றும் தமிழக வெற்றிக் கழகம் இந்த தேர்தலில் ஓரளவுக்கு வாக்குகளை பெறும் என்றும் அதற்கு அடுத்து வருகின்ற தேர்தலில் விஜய் அரசியலில் நிலைக்க மாட்டார் என்றும், த.வெ கவில் உள்ள பெண்களைப் பற்றி பொன்ராஜ் அவர்கள் கூறியது இழிவான ஒரு செயல் என்றும் இவர் திமுகவுடன் இருப்பதால் எந்த ஒரு நடவடிக்கையும் அரசு எடுக்கவில்லை என்றும் இதுபோன்ற செயல்கள் பொது வழியில் பேசுவது என்பது இழிவான ஒன்று என்றும் சட்டத்துக்கு புறம்பானது என்றும் கூறினார்.

கடந்த தேர்தலில் திமுக அரசு அறிவித்த பல்வேறு தேர்தல் அறிவிப்புகளை திமுக அரசு செயல்படுத்தாமல் உள்ளது. திமுக அதிமுக ரகசிய கூட்டணி அமைத்துள்ளதால்தான் கூட்டணி கட்சிகளுக்கு பல தொகுதிகளை ஒதுக்கி உள்ளார்கள் என்றும் என்ற குற்றச்சாட்டுக்கு அது அவருடைய கருத்து என்றும் நாம் அதற்கு பதில் சொல்ல முடியாது என்றும் தெரிவித்தவர் கூட்டணி கட்சிகளுக்கு தொகுதிகளை ஒதுக்குவதற்கு பல்வேறு சிக்கல்கள் அனைத்து அணியிலுமே உள்ளது என்றும் இதை குறை சொல்ல முடியாது என ஏர்போர்ட் மூர்த்தி தெரிவித்தார்.

கைதியின் பணத்தை ஆண் நண்பருக்கு அனுப்பிய பெண் எஸ்ஐ! திருவண்ணாமலை பரபரப்பு: அதிர்ச்சியில் காவல்துறை!

ராஜேஷ். எஸ் — Fri, 27 Mar 2026 13:17:47 +0530

திருவண்ணாமலையில் கைதியின் வங்கி கணக்கில் இருந்து பணத்தை தனது ஆண் நண்பருக்கு அனுப்பிய காவல் உதவி ஆய்வாளர் பணியிடை நீக்கம் செய்யப்பட்டார்.

திருவண்ணாமலை மாவட்டம் கீழ்பெண்ணாத்தூர் அடுத்த மேக்களூர் பகுதியில் பாலமுரளி (42) என்பவர் குளிர்பான கடை நடத்தி வருகிறார். கடந்த 2025 ஆம் ஆண்டு அக்டோபர் 22 ஆம் தேதி தமிழக அரசால் தடை விதிக்கப்பட்ட குட்கா பொருட்களை பதுக்கி வைத்து விற்பனை செய்ததற்காக கீழ்பென்னாத்தூர் காவல் ஆய்வாளர் லட்சுமி மற்றும் உதவி காவல் ஆய்வாளர் கவிதா ஆகிய இருவரும் கூல்ட்ரிங்க்ஸ் கடையில் இருந்த ஹான்ஸ், குட்கா உள்ளிட்ட பொருட்களை பறிமுதல் செய்து பாலமுரளியை கைது செய்து கீழ்பென்னாத்தூர் காவல் நிலையம் கொண்டு வந்துள்ளனர்.

அப்போது பாலமுரளியின் செல்போன் மற்றும் வங்கி புத்தகம், கூகுள் பே பின் நம்பர், ஏடிஎம் கார்டு பின் நம்பர் உள்ளிட்டவைகளை பெற்றுக்கொண்டு பாலமுரளியை சிறையில் அடைத்தனர். பின்னர் பாலமுரளியின் இரண்டு வங்கி கணக்குகளையும் முடக்குவதற்கு முன் ஒரு வங்கி கணக்கில் இருந்து ராஜதுரை என்பவருக்கு 23-ஆம் தேதி அன்று கூகுள் பே மூலமாக 80 ஆயிரம் ரூபாயும், 30-ம் தேதி அன்று 90 ஆயிரம் ரூபாயும் என மொத்தம் 1 லட்சத்து 70 ஆயிரம் ரூபாயை காவல் ஆய்வாளர் மற்றும் உதவி ஆய்வாளர் இருவரும் சேர்ந்து ராஜதுரைக்கு அனுப்பி உள்ளனர்.

பின்னர் சிறையில் இருந்து வந்த பாலமுரளி காவல் ஆய்வாளர் லட்சுமி மற்றும் உதவி ஆய்வாளரிடம் சென்று செல்போன் மற்றும் வங்கி கணக்கு புத்தகம் உள்ளிட்டவைகளை கேட்டுள்ளார். அப்போது செல்போனை தர மறுத்த ஆய்வாளர் மற்றும் உதவி ஆய்வாளர், பின்னர் ஒரு கட்டத்தில் செல்போனை பாலமுரளியிடம் கொடுத்துள்ளனர்.

பின்னர் செல்போனை வாங்கி வீட்டிற்கு சென்ற பாலமுரளி தனது செல்போனிலிருந்து google pay மற்றும் போன் பே மூலமாக அவரது வங்கி கணக்கில் இருந்து 1 லட்சத்து 70 ஆயிரம் ரூபாய் ராஜதுரை என்பவரது அக்கவுண்டிற்கு சென்றது தெரிய வந்துள்ளது.

இதனை அறிந்த பாலமுரளி மீண்டும் காவல் ஆய்வாளர் லட்சுமி மற்றும் உதவி ஆய்வாளர் கவிதா ஆகியோரிடம் சென்று கேட்டபோது பணத்தை தர முடியாது திருப்பி கேட்டால் உன் மீது பொய் வழக்கு போட்டு குண்டாஸில் போட்டு விடுவேன் என மிரட்டி உள்ளார். இதனால் ஆத்திரமடைந்த பாலமுரளி ஐஜி, டிஐஜி மற்றும் முதலமைச்சர் தனிப்பிரிவுக்கு புகார் மனு அளித்துள்ளார்.

இந்த புகாரின் அடிப்படையில் வடக்கு மண்டல காவல்துறை தலைவர் அஸ்ரா கார்க் தலைமையில் விசாரணை மேற்கொள்ளப்பட்டதில் காவல் உதவி ஆய்வாளர் கவிதா தனது ஆண் நண்பருக்கு பணம் அனுப்பியது உறுதிப்படுத்தப்பட்டது.

இதனைத் தொடர்ந்து காவல் உதவி ஆய்வாளர் கவிதாவை தற்காலிக பணியிடை நீக்கம் செய்து வேலூர் மண்டல ஐஜி அஸ்ரா கார்க் உத்தரவிட்டுள்ளார். பாதுகாப்பு கொடுக்க வேண்டிய காவல்துறையினரே கைதியின் வங்கி கணக்கில் இருந்து பணத்தை தனது ஆண் நண்பருக்கு அனுப்பிய சம்பவம் காவல்துறை மற்றும் பொதுமக்கள் மத்தியில் பெரும் அதிர்ச்சியை ஏற்படுத்தியுள்ளது.

செளமியா அன்புமணி தேர்தலில் போட்டியா? - அண்ணாமலையார் சன்னதியில் வேட்பாளர் பட்டியல் - சிறப்பு வழிபாடு ரகசியம் என்ன?

ராஜேஷ். எஸ் — Thu, 26 Mar 2026 15:18:03 +0530

திருவண்ணாமலை அண்ணாமலையார் திருக்கோவிலில் சௌமியா அன்புமணி தனது மகளுடன் பாமக இரண்டாம் கட்ட வேட்பாளர் பட்டியலை வைத்து சிறப்பு வழிபாடு நடத்தினார்.

திருக்கோவில் வலம் வந்து பூஜை செய்து கொண்டு சென்ற சௌமியா அன்புமணி.

பஞ்சபூத ஸ்தலங்களில் அக்னி ஸ்தலமாக விளங்கக்கூடிய திருவண்ணாமலை அண்ணாமலையார் திருக்கோவிலில் சமீப காலமாக அரசியல் பிரமுகர்கள், திரை பிரபலங்கள், தொழிலதிபர்கள் என பல்வேறு தரப்பினர் திருவண்ணாமலைக்கு வருகை தந்து அண்ணாமலையாரை தரிசனம் செய்து வருகின்றனர்.

பசுமைத்தாயகம் அமைப்பின் தலைவரும் பாமக தலைவர் அன்புமணி மனைவியுமான சௌமியா அன்புமணி தனது மகளுடன் இன்று திருவண்ணாமலை அண்ணாமலையார் திருக்கோவிலுக்கு வருகை தந்து சிறப்பு வழிபாடு செய்தார். கோவிலுக்கு வருகை தந்த அவர், சம்மந்த விநாயகர் சன்னதியில் தரிசனம் செய்து அதனைத் தொடர்ந்து அண்ணாமலையார் சன்னதிக்கு சென்று பாமகவின் இரண்டாம் கட்ட வேட்பாளர் பட்டியலை அண்ணாமலையார் சன்னதியில் வைத்து சிறப்பு வழிபாடு செய்தார். அதனைத் தொடர்ந்து உண்ணாமுலை அம்மன் சன்னதிக்கு சென்று வழிபாடு செய்து நவகிரகங்களை வழிபட்டார். சௌமியா அன்புமணிக்கு கோவில் நிர்வாகம் சார்பில் மாலை அணிவித்து கோவில் சிவாச்சாரியார்கள் பிரசாதங்களை வழங்கினர்.

இதனைத் தொடர்ந்து செய்தியாளர்கள் சந்திப்பில், நீங்கள் தேர்தலில் போட்டியிடுவீர்களா? என்ற கேள்விக்கு சிரித்தபடி எந்த பதிலும் சொல்லாமல் மௌனமாக சென்றார்.

இன்றைய தினம் திருக்கோவிலுக்கு வந்திருந்த சௌமியா அன்புமணி தனது கையில் வைத்திருந்த கவரில் பாமக நிறுவனர் டாக்டர் ராமதாஸ் என்ற அச்சிடப்பட்ட கவரை கையில் பத்திரமாக வைத்துக் கொண்டு அண்ணாமலையார் மற்றும் உண்ணாமுலை அம்மனை தரிசித்த அவர் பின்னர் அதனை பயபக்தியுடன் கொண்டு சென்றார்.

நேரடி நெல் கொள்முதல்: ஒரு மாதமாகியும் வராத பணம் - கண்ணீரில் தமிழக விவசாயிகள்!

எஸ்.ஜெகநாதன், மயிலாடுதுறை — Wed, 25 Mar 2026 14:21:52 +0530

திருவண்ணாமலை: தமிழகத்தில் காவிரி டெல்டா மாவட்டங்களைத் தவிர்த்து, திருவண்ணாமலை, விழுப்புரம், தென்காசி உள்ளிட்ட பல்வேறு மாவட்டங்களில் தேசிய நுகர்வோர் கூட்டுறவு இணையத்தின் (NCCF) கீழ் செயல்பட்டு வரும் நேரடி நெல் கொள்முதல் நிலையங்களில், நெல் விற்பனை செய்த விவசாயிகளுக்கு ஒரு மாதம் ஆகியும் அதற்கான தொகை இன்னும் வங்கி கணக்கில் வரவு வைக்கப்படவில்லை எனப் புகார் எழுந்துள்ளது.

விரிவடையும் கொள்முதல் பரப்பளவு

தமிழகத்தின் நெற்களஞ்சியமாக விளங்கும் டெல்டா மாவட்டங்களில் தமிழ்நாடு நுகர்பொருள் வாணிபக் கழகம் மூலம் நெல் கொள்முதல் செய்யப்படுவது வழக்கம். ஆனால், டெல்டா அல்லாத பிற மாவட்டங்களில் விவசாயிகளின் நலன் கருதி, மத்திய அரசின் முகமையான தேசிய நுகர்வோர் கூட்டுறவு இணையம் (National Cooperative Consumers' Federation of India - NCCF) மூலம் நேரடி நெல் கொள்முதல் நிலையங்கள் திறக்கப்பட்டு நெல் கொள்முதல் செய்யப்பட்டு வருகிறது.

நடப்பு பருவத்தில் திருவண்ணாமலை, விழுப்புரம், கள்ளக்குறிச்சி மற்றும் தென்காசி மாவட்டங்களில் நூற்றுக்கணக்கான கொள்முதல் நிலையங்கள் திறக்கப்பட்டு, ஆயிரக்கணக்கான டன் நெல் விவசாயிகளிடமிருந்து கொள்முதல் செய்யப்பட்டுள்ளது.

ஊழலற்ற நடைமுறையும் - துரித இயக்கமும்

இந்த கொள்முதல் நிலையங்களின் செயல்பாடுகள் குறித்து விவசாயிகள் ஒருபுறம் பாராட்டுத் தெரிவிக்கின்றனர். இதுகுறித்து விவசாயிகள் தரப்பில் கூறுகையில், அரசு நடத்தும் மற்ற சில கொள்முதல் நிலையங்களில் மூட்டைக்கு இவ்வளவு எனப் பணம் வசூலிக்கப்படும் புகார் இருந்து வரும் நிலையில், NCCF நிலையங்களில் எந்தவிதமான கையூட்டும் (லஞ்சம்) பெறாமல் நெல் கொள்முதல் செய்யப்படுகிறது.

மேலும் கொள்முதல் செய்யப்படும் நெல் மூட்டைகள் தேக்கமடையாமல், உடனுக்குடன் லாரிகள் மூலம் சேமிப்புக் கிடங்குகளுக்கு (CWC/TNCSC Godowns) கொண்டு செல்லப்படுகின்றன. இதனால் மழையில் நனைவது போன்ற பாதிப்புகள் தவிர்க்கப்படுகின்றன. இந்த வெளிப்படையான மற்றும் வேகமான செயல்பாடுகள் விவசாயிகளிடையே பெரும் மகிழ்ச்சியை ஏற்படுத்தியுள்ளது.

இடியாக விழுந்த பணப் பட்டுவாடா தாமதம்

இருப்பினும், இந்த மகிழ்ச்சியைப் பறிக்கும் விதமாக பணப் பட்டுவாடாவில் ஏற்பட்டுள்ள தாமதம் விவசாயிகளைப் பெரும் துயரத்தில் ஆழ்த்தியுள்ளது. பொதுவாக நெல் கொள்முதல் செய்யப்பட்ட 2 முதல் 3 வேலை நாட்களுக்குள் விவசாயிகளின் வங்கி கணக்கிற்குப் பணம் சென்றடைய வேண்டும். ஆனால், தற்போது ஒரு மாதம் கடந்தும் ஆயிரக்கணக்கான விவசாயிகளுக்கு இன்னும் பணம் கிடைக்கவில்லை.

இதுகுறித்து பாதிக்கப்பட்ட விவசாயி ஒருவர் தெரிவிக்கையில்,

"நாங்கள் பெரும் கடன் வாங்கி, வட்டிக்கு பணம் பெற்று விவசாயம் செய்துள்ளோம். அறுவடை முடிந்தவுடன் நெல்லை விற்று கடனை அடைக்கலாம் என்று நினைத்தோம். NCCF மையத்தில் லஞ்சம் வாங்காமல் நெல்லை எடுத்தது மகிழ்ச்சியாக இருந்தது. ஆனால், மூட்டைகளை எடுத்துச் சென்று ஒரு மாதம் ஆகியும் இதுவரை ஒரு பைசா கூட எங்கள் கணக்கிற்கு வரவில்லை. அதிகாரிகளிடம் கேட்டால் 'பணம் விரைவில் வரும்' என்ற பதிலைத் தவிர வேறொன்றும் சொல்வதில்லை."

விவசாயிகளின் வாழ்வாதாரப் பாதிப்பு

பணம் கிடைக்காததால் அடுத்தகட்ட விவசாயப் பணிகளான நிலத்தை உழுதல், உரம் வாங்குதல் மற்றும் விதை நெல் வாங்குதல் போன்ற பணிகளைத் தொடங்க முடியாமல் விவசாயிகள் முடங்கியுள்ளனர். மேலும், உள்ளூர் கந்துவட்டிக்காரர்களிடம் வாங்கிய கடனுக்கு வட்டி ஏறிக்கொண்டே செல்வது அவர்களை மேலும் மன உளைச்சலுக்கு ஆளாக்கியுள்ளது.

விவசாயிகளின் கோரிக்கைகள்

* நிலுவைத் தொகை: ஒரு மாதமாக நிலுவையில் உள்ள நிலுவைத் தொகையை அடுத்த 48 மணி நேரத்திற்குள் விவசாயிகளின் வங்கி கணக்கில் நேரடியாக (DBT) செலுத்த வேண்டும்.

* அரசின் தலையீடு: தமிழக அரசு மற்றும் மாவட்ட நிர்வாகம், தேசிய நுகர்வோர் கூட்டுறவு இணையத்துடன் பேசி நிதி விடுவிப்பில் உள்ள சிக்கல்களைத் தீர்க்க வேண்டும்.

* தொடர் கண்காணிப்பு: வரும் காலங்களில் கொள்முதல் செய்த அடுத்த 72 மணி நேரத்திற்குள் பணம் கிடைப்பதை மாவட்ட ஆட்சியர்கள் உறுதி செய்ய வேண்டும் என கோரிக்கை விடுத்துள்ளனர்.

Tiruvannamalai Pournami Girivalam : திருவண்ணாமலை பௌர்ணமி கிரிவலம் போறீங்களா.. பக்தர்களுக்கு எதிர்பார்த்த அறிவிப்பை சொன்ன தெற்கு ரயில்வே

கு. அஜ்மல்கான் — Tue, 3 Mar 2026 09:00:31 +0530

திருவண்ணாமலையில் கிரிவலம்

திருவண்ணாமலையில் கிரிவலம் என்பது மிகவும் பிரசித்து பெற்றதாகும், அதிலும் பௌர்ணமி கிரிவலத்தில் பங்கேற்க தமிழகத்தில் இருந்து மட்டுமல்லாமல் பல மாநிலங்களில் இருந்தும் ஏராளமான பக்தர்கள் குவிந்து வருகிறார்கள். அந்த வகையில் பல லட்சம் பேர் பௌர்ணமி கிரிவலத்திற்கு வருவதால் பயணிகள் வசதிக்காக சிறப்பு பேருந்துகள் அறிவிக்கப்பட்டுள்ளது. அதேநேரம் தற்போது சிறப்பு ரயிலுக்கான அறிவிப்பும் வெளியிடப்பட்டுள்ளது.

திருவண்ணாமலைக்கு சிறப்பு ரயில்

இது தொடர்பாக தெற்கு ரயில்வே வெளியிட்டுள்ள அறிக்கையில், திருவண்ணாமலையில் நடைபெறும் பௌர்ணமி கிரிவலத்தை முன்னிட்டு, பக்தர்கள் அதிக அளவில் பயணம் மேற்கொள்ள உள்ளதால் கூடுதல் நெரிசலை சமாளிக்க சிறப்பு ரயில்கள் இயக்கப்படுகின்றன என்று தெற்கு ரயில்வே அறிவித்துள்ளது. அந்த வகையில், திருவண்ணாமலையில் இருந்து விழுப்புரத்திற்கும், விழுப்புரத்தில் இருந்து திருவண்ணாமலைக்கும் சிறப்பு ரயில் இயக்கப்படவுள்ளது. (ரயில் எண் 06130/06129) விழுப்புரம் – திருவண்ணாமலை – விழுப்புரம் இடையே முன்பதிவு இல்லாத (Unreserved) சிறப்பு ரயில்கள் இயக்கப்படும்.

(ரயில் எண் 06130) விழுப்புரம் – திருவண்ணாமலை சிறப்பு ரயில் 03 மார்ச் 2026 (செவ்வாய்க்கிழமை) அன்று காலை 10.10 மணிக்கு விழுப்புரத்திலிருந்து புறப்பட்டு, அதே நாள் காலை 11.45 மணிக்கு திருவண்ணாமலை சென்றடையும். மறு மார்க்கத்தில் (ரயில் எண் 06129) திருவண்ணாமலை – விழுப்புரம் சிறப்பு ரயில் 03 மார்ச் 2026 அன்று மதியம் 12.40 மணிக்கு திருவண்ணாமலையிலிருந்து புறப்பட்டு, பிற்பகல் 2.15 மணிக்கு விழுப்புரம் சென்றடையும். இந்த சிறப்பு ரயிலில் 8 பெட்டிகள் கொண்ட MEMU ரயில்களாக இயக்கப்படும் என அறிவிக்கப்பட்டுள்ளது.

எந்த எந்த ரயில் நிலையங்களில் நிற்கும்

இந்த சிறப்பு ரயில் விழுப்புரம், வெங்கடேசபுரம், மாம்பலப்பட்டு, திருக்கோயிலூர், அதிச்சனூர், ஆண்டம்பள்ளம், தண்டரை மற்றும் திருவண்ணாமலை ஆகிய நிலையங்களில் நின்று செல்லும் என தெரிவிக்கப்பட்டுள்ளது. எனவே பௌர்ணமி கிரிவலத்தை முன்னிட்டு பக்தர்கள் சிரமமின்றி பயணம் செய்ய இந்த சிறப்பு ஏற்பாடு செய்யப்பட்டுள்ளதாக தெற்கு ரயில்வே தெரிவித்துள்ளது.