thoothukudi

crime: பட்டப்பகலில் பெண் கொலை ! உறவினரே கொலையாளி ! 3 மணி நேரத்தில் கைதானது எப்படி?

நாகராஜ் — Thu, 29 Oct 2026 20:31:17 +0530

தூத்துக்குடியில் பட்டப்பகலில் வீடு புகுந்து பெண்ணை வெட்டிக்கொலை செய்து 4 சவரன் தாலிச் செயினை பறித்துச் சென்ற வாலிபரை, சம்பவம் நடந்த 3 மணி நேரத்தில் போலீசார் கைது செய்தனர்.

தூத்துக்குடி 3-வது மைல் கந்தன்காலனி 3-வது தெருவைச் சேர்ந்த சித்திரைவேல் மனைவி சசிகலா (வயது 45). இந்த தம்பதிக்கு ஒரு மகனும், ஒரு மகளும் உள்ளனர். மகள் சென்னையில் ஐ.டி. நிறுவனத்தில் பணியாற்றி வருகிறார். திருமணமான மகன் தனியாக வசித்து வருகிறார். கணவர் சித்திரைவேல் கேரளாவில் வேலை பார்த்து வருவதால், சசிகலா வீட்டில் தனியாக வசித்து வந்தார்.

இந்த நிலையில் நேற்று மதியம் சுமார் 2.30 மணியளவில் சசிகலாவின் வீட்டிற்குள் நுழைந்த மர்ம நபர் ஒருவர், தனியாக இருந்த சசிகலாவை அரிவாளால் சரமாரியாக வெட்டிக்கொலை செய்தார். மேலும் சசிகலா அணிந்திருந்த 4 சவரன் எடையுள்ள தாலிச் செயினை பறித்துக்கொண்டு தப்பிச் சென்றார்.

இச்சம்பவம் குறித்துத் தகவல் அறிந்த தென்பாகம் காவல் நிலைய ஆய்வாளர் ஷேக் அப்துல் காதர் உடனடியாக சம்பவ இடத்திற்கு விரைந்து சென்று, சசிகலாவின் உடலைக் கைப்பற்றி பிரேதப் பரிசோதனைக்காகத் தூத்துக்குடி அரசு மருத்துவமனைக்கு அனுப்பி வைத்தார். சம்பவ இடத்தை தூத்துக்குடி மாவட்ட எஸ்.பி. சிவபிரசாத் நேரில் பார்வையிட்டு ஆய்வு செய்தார்.

கொலையாளியை உடனடியாகப் பிடிக்க எஸ்.பி. உத்தரவின்பேரில் தனிப்படை அமைக்கப்பட்டது. தென்பாகம் காவல் நிலைய போலீசார் வழக்குப்பதிவு செய்து, அப்பகுதியில் உள்ள சி.சி.டி.வி. காட்சிகளை ஆய்வு செய்து தீவிர விசாரணை மேற்கொண்டு வந்தனர். இந்த நிலையில் கொலை நடந்த 3 மணி நேரத்திலேயே குற்றவாளியை போலீசார் கைது செய்தனர். இதுகுறித்து தூத்துக்குடி மாவட்ட எஸ்.பி. சிவபிரசாத் செய்தியாளர்களிடம் கூறியபோது, "சசிகலாவின் வீட்டின் அருகே இருந்த சி.சி.டி.வி. கேமரா பதிவுகளை ஆய்வு செய்தபோது, ஒரு வாலிபர் கையில் அரிவாளுடன் வீட்டை விட்டு வெளியேறிய காட்சி பதிவாகியிருந்தது.

அக்காட்சிகளின் அடிப்படையில் விசாரணை நடத்தியதில், கொலையாளி சசிகலாவின் உறவினரான தூத்துக்குடி அண்ணாநகர் 7-வது தெருவைச் சேர்ந்த குமார் என்பவரின் மகன் விக்னேஷ்குமார்(எ) முனீஸ்(25) என்பது தெரியவந்தது. தனிப்படை போலீசார் கொலை நடந்த 3 மணி நேரத்தில் குற்றவாளியைப் பிடித்துக் கைது செய்தனர். அவரிடமிருந்து பறிமுதல் செய்யப்பட்ட 4 சவரன் நகையும் மீட்கப்பட்டது" என்று தெரிவித்தார்.

இதையடுத்து போலீசாரின் முதற்கட்ட விசாரணையில், விக்னேஷ்குமார் தனது சித்தியான சசிகலா வீட்டிற்கு அடிக்கடி சென்று பணம் வாங்குவதை வழக்கமாகக் கொண்டிருந்தது தெரியவந்தது. சம்பவத்தன்றும் மதியம் பணம் கேட்டு சென்றுள்ளார். சசிகலா பணம் தர மறுத்ததால், ஆத்திரமடைந்த விக்னேஷ்குமார் அவரை அரிவாளால் வெட்டிக்கொலை செய்துவிட்டு, கழுத்தில் இருந்த 4 சவரன் நகையைப் பறித்துச் சென்றுள்ளார்.

பின்னர், அருகிலுள்ள மதுபானக் கடைக்குச் சென்று மது அருந்திவிட்டு, தனது வீட்டிற்குச் சென்றபோது போலீசார் அவரை வளைத்துப் பிடித்தனர். பட்டப்பகலில் குடியிருப்புப் பகுதியில் பெண் வெட்டிக்கொலை செய்யப்பட்ட சம்பவமும், அதே நேரத்தில் குற்றவாளியை 3 மணி நேரத்திற்குள் போலீசார் கைது செய்த அதிவேக நடவடிக்கையும் அப்பகுதியில் பெரும் பரபரப்பை ஏற்படுத்தியது.

தூத்துக்குடி மாவட்டத்தில் ஒரே வாரத்தில் 7 கொலைகள்.. போலீசார் கூறுவது என்ன?

நாகராஜ் — Wed, 28 Oct 2026 13:02:37 +0530

தூத்துக்குடி மாவட்டம், குலசேகரன்பட்டினம் முத்தாரம்மன் கோயில் தசரா திருவிழாவான கடந்த 21-ம் தேதி பெண்ணிடம் பாலியல் சில்மிஷ விவகரத்தில் வேல்முருகன் என்ற இளைஞர் கல்லால் தாக்கிக் கொலைசெய்யப்பட்டார். மறுநாளான 22-ம் தேதி இரவில் சாத்தான்குளம் அருகேயுள்ள பன்னம்பாறையில் கொம்பையா என்ற விவசாயி, மதுபோதையில் ஏற்பட்ட தகராறில் கல்லால் தாக்கப்பட்டதில் உயிரிழந்தார். 23-ம் தேதி அதிகாலையில் சாத்தான்குளம் அருகிலுள்ள முதலூரில் காதல் விவகாரத்தில் வீட்டுக்குள் புகுந்த காதலன், சிறுமியின் தாய் மேரி ரெஜிலாவை அரிவாளால் வெட்டிக் கொலைசெய்தார். அரிவாளால் சரமாரியாக தாக்கப்பட்டதில் சிறுமியின் தந்தை, தம்பி ஆகியோர் படுகாயம் அடைந்து சிகிச்சை பெற்று வருகின்றனர்.

அதே நாளில் இரவில் நாசரேத் அருகில் மது அருந்தும்போது ஏற்பட்ட தகராறில் சாமுவேல் என்பவரை அவரது சகோதரர் இஸ்ரவேல் என்பவர் அடித்துக் கொலைசெய்தார். அதே நாளில் மதுபோதையில் ஏரல் அரசு மருத்துவமனைக்கு சிகிச்சைக்காக வந்திருந்த கர்ப்பிணிக்குக் கொலை மிரட்டல் விடுத்த பிரபல ரெளடி தனுஷ்கோடி, கிராம மக்களால் தாக்கப்பட்டார். சிகிச்சையில் இருந்த அவர் சிகிச்சை பலனின்றி உயிரிழந்தார். கடந்த 25-ம் தேதி ஆழ்வார்கற்குளத்தில் வீட்டின் முன்பாக கழிவுநீர் ஓடுவதில் இரு தரப்பினருக்கு இடையே ஏற்பட்ட மோதலில் இசக்கிராஜா என்ற கல்லூரி மாணவர் வெட்டிக் கொலைசெய்யப்பட்டார்.

நேற்று 27-ம் தேதி கோவில்பட்டியில் தனியார் காய்கறிச்சந்தையில் உருவகேலி செய்த சுமைதூக்கும் தொழிலாளியை சக தொழிலாளியே கோடரியால் தாக்கி கொலைசெய்தார். இப்படியாக 7 நாள்களில் 7 கொலைச் சம்பவங்கள் அரங்கேறியுள்ளன. இது குறித்து மாவட்ட காவல்துறை சார்பில் கூறுகையில், தூத்துக்குடி மாவட்டத்தில் கடந்த ஒரு வாரத்தில் 7 கொலை வழக்குகள் பதிவாகியுள்ளன. இந்த கொலைச் சம்பவங்கள் சிவில் பிரச்னைகள், மதுபோதையில் ஏற்பட்ட தகராறுகள், தனிப்பட்ட முன்விரோதங்கள் காரணமாகவே நடைபெற்றுள்ளன. கடந்த 2025-ம் ஆண்டு அக்டோபர் 26-ம் தேதி வரை மாவட்டத்தில் 65 கொலை வழக்குகள் பதிவாகி இருந்தன.

இந்தாண்டில் இதே கால கட்டத்தில் 59 வழக்குகள் பதிவாகியுள்ளன. இதன் மூலம் கடந்த ஆண்டைக் காட்டிலும் 6 கொலை வழக்குகள் குறைந்துள்ளது. இது 9.2 சதவிகிதம் குறைவாகும். கொலைச் சம்பவங்களைத் தடுக்க காவல்துறை ரோந்துப் பணிகள் தீவிரப்படுத்தப்பட்டுள்ளது. கிராமங்களில் மக்கள் பிரச்னைகளைக் கேட்டறிந்து நடவடிக்கை எடுப்பதுடன் குண்டர் தடுப்புச் சட்டத்தின் கீழும் நடவடிக்கை எடுக்கப்பட்டு வருகிறது. கல்லூரி மாணவர் கொலை வழக்கில் 6 மணி நேரத்திற்குள் 4 குற்றவாளிகள் கைதுசெய்யப்பட்டுள்ளனர். கடந்த 6 மாதங்களில் மாவட்டத்தில் ரெளடிகள் கொலை, சாதியக் கொலை போன்றவை நிகழவில்லை. கஞ்சா வழக்குகள் தொடர்பான ரெளடிகளைப் பிடிக்க தனிப்படை அமைக்கப்பட்டு தீவிரமாகத் தேடி வருகிறோம். சிங்கப்பெண் படையினர் போக்சோ உள்ளிட்ட விழிப்புணர்வு நிகழ்ச்சிகளை பள்ளி, கல்லூரிகளில் தொடர்ந்து நிகழ்த்தி வருகின்றனர்” என்றனர்.

சாத்தான்குளம் கொடூரம்: தாயை கொன்று சிறுமிகளை கடத்திய நபர் கைது - எங்கு உள்ளார்?

ராஜேஷ். எஸ் — Fri, 23 Oct 2026 14:39:23 +0530

தூத்துக்குடி: சாத்தான்குளம் பெண் கொலை வழக்கில் குற்றம் சாட்டப்பட்ட ஞானபிரகாஷ் என்பவரை தனிப்படை போலீசார் கைது செய்து ரகசிய இடத்தில் வைத்துள்ளனர்.

தூத்துக்குடி மாவட்டம், தட்டார்மடம் காவல் நிலைய எல்லைக்குட்பட்ட முதலூர் பகுதியைச் சேர்ந்த முத்துக்கிருஷ்ணன் (43) என்பவரது குடும்பத்தினருக்கும், சாத்தான்குளம் ஆனந்தபுரம் பகுதியைச் சேர்ந்த ஞானபிரகாஷ் என்பவருக்கும் இடையே, முத்துகிருஷ்ணனின் 15 வயது மகளுடன் ஞானபிரகாஷ் கொண்டிருந்த காதல் தொடர்பாக முன்விரோதம் இருந்து வந்துள்ளது. இதனால் ஞானபிரகாஷ் அடிக்கடி முத்துகிருஷ்ணன் குடும்பத்தினருடன் தகராறில் ஈடுபட்டு வந்ததாகத் தெரியவருகிறது.

பெண் உயிரிழப்பு

இந்நிலையில், நேற்று (22.10.2026) இரவு முத்துகிருஷ்ணனின் வீட்டிற்குச் சென்ற ஞானபிரகாஷ், அவர்களுடன் தகராறில் ஈடுபட்டு, முத்துகிருஷ்ணன், அவரது மனைவி மேரி விஜிலா (39) மற்றும் அவர்களது 12 வயது மகன் ஆகியோரை அரிவாளால் தாக்கியுள்ளார். இதில் மேரி விஜிலா சம்பவ இடத்திலேயே உயிரிழந்தார். மேலும், அங்கிருந்த இரண்டு சிறுமிகளையும் ஞானபிரகாஷ் தன்னுடன் அழைத்துச் சென்று தனது வீட்டில் வைத்திருந்ததாக விசாரணையில் தெரியவந்துள்ளது.

கொலை செய்தவர் கைது

இச்சம்பவம் குறித்து தகவலறிந்த தட்டார்மடம் காவல் நிலைய போலீசார் உடனடியாக சம்பவ இடத்திற்குச் சென்று, காயமடைந்த முத்துக்கிருஷ்ணன் மற்றும் அவரது மகனை மீட்டு சிகிச்சைக்காக மருத்துவமனைக்கு அனுப்பி வைத்தனர். உயிரிழந்த மேரி விஜிலாவின் உடலைக் கைப்பற்றி, உடற்கூராய்வுக்காக திருநெல்வேலி அரசு மருத்துவக் கல்லூரி மருத்துவமனைக்கு அனுப்பி வைத்தனர்.

மேலும், ஞானபிரகாஷின் வீட்டில் இருந்த இரண்டு சிறுமிகளையும் காவல்துறையினர் பத்திரமாக மீட்டுள்ளனர். இச்சம்பவத்தில் தொடர்புடைய ஞானபிரகாஷைத் தேடி காவல்துறையினர் தொடர்ந்து விசாரணை மேற்கொண்டு வந்தனர்.

இந்த நிலையில், இதில் குற்றம் சாட்டப்பட்ட ஞானபிரகஷை தனிப்படை போலீசார் கைது செய்து ரகசிய இடத்தில் வைத்துள்ளனர். அவரிடம் தொடர்ந்து விசாரணை மேற்கொண்டு வருகின்றனர்.

ஒரே குடும்பத்தை குறிவைத்து தாக்குதல்? பெண் கொலை; இரு மகள்கள் கடத்தல் - அன்புமணி கண்டனம்

சிவரஞ்சித் — Fri, 23 Oct 2026 11:02:24 +0530

தூத்துக்குடி: சாத்தான்குளம் அருகே முதலூரில் நள்ளிரவில் வீட்டுக்குள் புகுந்த மர்ம கும்பல் நடத்திய அரிவாள் தாக்குதலில் பெண் ஒருவர் உயிரிழந்தார். அவரது கணவர் மற்றும் மகன் படுகாயமடைந்தனர். மேலும், இரு மகள்களைக் கடத்திச் சென்ற கும்பலால் அப்பகுதியில் பெரும் பரபரப்பு ஏற்பட்டது. பின்னர், கடத்தப்பட்ட இரு சிறுமிகளும் மீட்கப்பட்டுள்ளனர். இந்தச் சம்பவத்தில் தொடர்புடைய குற்றவாளிகளை உடனடியாகக் கைது செய்து, மாநிலம் முழுவதும் பொதுமக்களின் பாதுகாப்பை உறுதி செய்ய வேண்டும் என்று பா.ம.க. தலைவர் மருத்துவர் அன்புமணி இராமதாஸ் வலியுறுத்தியுள்ளார்.

இதுகுறித்து அவர் வெளிட்டுள்ள அறிக்கையில்.,

தூத்துக்குடி மாவட்டம் சாத்தான்குளத்தை அடுத்த முதலூரில் உள்ள ஒரு வீட்டுக்குள் நள்ளிரவில் ஆயுதங்களுடன் புகுந்த கும்பல், அங்கு உறங்கிக் கொண்டிருந்தவர்களை சரமாரியாக வெட்டியதில் மேரி ரெஜிலா என்ற பெண் உயிரிழந்திருக்கிறார். அவரது கணவர் முத்துகிருஷ்ணன், மகன் பிளசெட் ராஜா ஆகியோர் படுகாயங்களுடன் மருத்துவமனையில் அனுமதிக்கப்பட்டுள்ளனர். இரு மகள்கள் கடத்திச் செல்லப்பட்ட நிலையில், சில மணி நேரத்திற்கு பிறகு அவர்கள் மீட்கப்பட்டுள்ளனர். வீடு புகுந்து நடத்தப்பட்டுள்ள இந்தத் தாக்குதல் பொதுமக்கள் மத்தியில் பெரும் அச்சத்தை ஏற்படுத்தியுள்ளது.

நள்ளிரவில் ஆயுதங்களுடன் ஒரு கும்பல் சுதந்திரமாக உலா வந்து, வீட்டுக்குள் புகுந்து தாக்குதல் நடத்துகிறது என்றால் அதை காவல்துறையின் தோல்வியாகத் தான் கருத வேண்டும். இந்தத் கொடூரத் தாக்குதலுக்கு அந்தக் குடும்பத்திற்கும், ஞானபிரகாசம் என்பவருக்கும் இடையிலான முன்பகை தான் காரணம் என்று கூறப்படுகிறது. இரு தரப்பினரிடையே முன்பகை இருக்கும்பட்சத்தில் அதனால் கொலை உள்ளிட்ட குற்றங்கள் நடக்காமல் கண்காணிக்க வேண்டியது உள்ளூர் காவல்துறையின் கடமையாகும். அந்தக் கடமையை காவல்துறை செய்யவில்லை.

ஒரே குடும்பத்தில் ஒருவரை கொலை செய்து விட்டு, இருவரை அரிவாளால் வெட்டிய கும்பல், இரு பெண் குழந்தைகளையும் கடத்திக் கொண்டு சென்ற கும்பலிடமிருந்து குழந்தைகள் மீட்கப் பட்டிருக்கும் போதிலும், கொலையாளிகளை காவல்துறையினரால் கைது செய்ய முடியவில்லை என்பது வருந்தத்தக்கது.

மக்களுக்கு பாதுகாப்பு வழங்க வேண்டியது தான் ஓர் அரசு மற்றும் காவல்துறையின் கடமை ஆகும். இரவில் உறங்கும் போது கூட ஒரு குடும்பத்திற்கு பாதுகாப்பு இல்லை என்றால் மக்களால் நிம்மதியாக வாழ முடியாது. சாத்தான்குளம் முதலூரில் நடந்த கொலை மற்றும் கடத்தல் குற்றங்களுக்கு காரணமான கும்பலை காவல்துறை உடனடியாக கைது செய்து சட்டத்தின் முன் நிறுத்த வேண்டும். மாநிலம் முழுவதும் பொதுமக்களின் பாதுகாப்பை உறுதி செய்ய வேண்டும். இவ்வாறு அவர் தெரிவித்துள்ளார்.

தவெகவின் பெண்கள் பாதுகாப்பு வேஷம் கலைந்தது! - கனிமொழி ஆவேசம்

ராஜேஷ். எஸ் — Thu, 22 Oct 2026 14:45:42 +0530

பெண்களை மதிப்பதாகக் கூறிக்கொண்டு, எதிர்த்துக் குரல் கொடுக்கும் பெண்களைத் தரக்குறைவாக விமர்சிப்பதுதான் தவெகவின் பெண்கள் பாதுகாப்பா? என கனிமொழி எம்.பி. கேள்வி எழுப்பியுள்ளார்.

தூத்துக்குடி விமான நிலையத்தில் திமுக துணைப் பொதுச் செயலாளரும், நாடாளுமன்ற திமுக குழுத் தலைவருமான கனிமொழி ராஜாத்தி கருணாநிதி இன்ரு செய்தியாளர்களை சந்தித்தார். அப்போது பேசிய அவர், ஆட்சிப் பொறுப்பில் இருக்கக்கூடிய தவெக அரசு பருவமழையை எதிர்கொள்ள எந்தவித முன்னேற்பாடுகளையும் செய்ததாகத் தெரியவில்லை. சென்னையின் பல இடங்களில் சிறிதளவு மழை பெய்ததற்கே தண்ணீர் தேங்குவதை நாம் கண்கூடாகப் பார்க்கிறோம். இவ்வாறான சூழலில் தூத்துக்குடியில் மழை பெய்தால் அதிகளவு தண்ணீர் தேங்கும்.

தூத்துக்குடியில் நீர் தேங்க வாய்ப்பு அதிகம்

ஏனெனில், கடல் மட்டத்தைவிடக் கீழே இருக்கக்கூடிய நகரமாகத் தூத்துக்குடி இருப்பதால், தண்ணீர் தேங்கக்கூடிய வாய்ப்பு அதிகமாக உள்ளது. எனவே, இங்கு கூடுதலாகக் கவனம் செலுத்த வேண்டியிருக்கிறது. அதனால், தண்ணீர் தேங்காமல் இருப்பதற்கான நடவடிக்கைகளைப் பார்வையிட தூத்துக்குடி மேயர் ஜெகன் அவர்களோடு சென்று பருவமழை முன்னேற்பாடு பணிகளைப் பார்வையிட்டோம்.

தற்போது பருவமழையை எதிர்கொள்ள எங்களால் முடிந்தவரை பணிகளைச் செய்கிறோம். இதைத்தாண்டி தேவையுள்ள நேரத்தில் அரசு ஒத்துழைப்பு கொடுக்கவில்லை என்றால், நிச்சயமாக அதற்கு எதிர்வினையாற்றுவோம்.

கண்டுகொள்ளாத தவெக அரசு

முன்னதாக, பெண்களைத் தரக்குறைவாகப் பேசுவதாகக் கூறி தொடர்ந்து கைது நடவடிக்கைகளை மேற்கொள்ளும் தவெக அரசு, தங்கள் கட்சியினரை எதிர்த்துப் பேசும் பெண்கள் மீது தவெகவினர் சமூக வலைதளங்களில் நடத்தும் அவதூறுத் தாக்குதல்களைக் கண்டுகொள்வதில்லை. மேயர் பிரியா உள்ளிட்ட திமுகவைச் சேர்ந்த பெண்கள், தவெகவினரின் செயல்பாடுகளை விமர்சிக்கும் பெண்கள், சமூக வலைதளங்களில் இயங்கும் பெண்கள் எனப் பலரையும் குறிவைத்து, தவெகவினர் மீண்டும் மீண்டும் தரக்குறைவான பதிவுகளைப் பதிவிட்டு வருகின்றனர். இவ்வாறு பெண்களை அவமதிக்கும் இத்தகைய செயல்களுக்கு எதிராகவும் அரசு பாரபட்சமின்றி நடவடிக்கை எடுக்க வேண்டும்.

லட்சணம் இதுதானா

நேற்று தாராபுரத்தில் போட்டியிட்ட நாம் தமிழர் கட்சி வேட்பாளர் கார்த்திகாவைக் கைது செய்திருக்கிறார்கள். தங்களுக்கு எதிராகப் பதிவிடும், எதிர்த்துச் செயல்படும் பெண்களைக் குறிவைத்து, அக்கட்சியினர் சமூக வலைதளங்களில் தொடர்ந்து மிகத் தரக்குறைவான பதிவுகளைப் பதிவிட்டு வருகின்றனர். பெண்களை மதிப்பதாகவும், பாதுகாப்பதாகவும் கூறிக்கொள்ளும் இவர்களின் லட்சணம் இதுதானா என்று கேள்வி எழுப்பினார்.

தூத்துக்குடி: நாளை மறுநாள் மின்தடை; உங்கள் பகுதி உள்ளதா? விவரம் இதோ!

நாகராஜ் — Tue, 13 Oct 2026 19:46:13 +0530

தமிழ்நாட்டில் மாதாந்திர மின் பராமரிப்புப் பணிகள் காரணமாக மின்சாரம் நிறுத்தப்படும்போது, அது குறித்து முந்தைய நாள் அறிவிக்கப்படும். இந்த பராமரிப்புப் பணிகளின்போது, சிறிய பழுதுகளைச் சரிசெய்வது, மின்கம்பங்கள் மற்றும் மின்வழித்தடங்களில் உள்ள மரக்கிளைகளை அகற்றுவது போன்ற பல்வேறு பணிகளில் மின்சார வாரிய ஊழியர்கள் ஈடுபடுவார்கள். இந்நிலையில், தமிழ்நாட்டில் நாளை காலை 9 மணி முதல் பல்வேறு மாவட்டங்களில் மின் தடை செய்யப்படவுள்ளது.

தூத்துக்குடி வாகைக்குளம் துணை மின் நிலையத்தில் மாதாந்திர பராமரிப்பு பணிகள் காரணமாக நாளை மறுநாள் மின்தடை செய்யப்படும் பகுதிகள் அறிவிக்கப்பட்டுள்ளது.

இது குறித்து தூத்துக்குடி ஊரகக் கோட்டச் செயற்பொறியாளர் முனிசாமி வெளியிட்டுள்ள செய்திக்குறிப்பில் கூறியிருப்பதாவது, தமிழ்நாடு மின் உற்பத்தி மற்றும் பகிர்மானக் கழகத்தின் ஊரகக் கோட்டத்திற்குட்பட்ட வாகைக்குளம் துணை மின் நிலையத்தில் நாளை மறுநாள் (15.10.2026, வியாழக்கிழமை) மாதாந்திர பராமரிப்புப் பணிகள் நடைபெற இருப்பதால் காலை 9 மணி முதல் மதியம் 2 மணி வரை மின்தடை செய்யப்படும்.

அதன்படி சேர்வைகாரன்மடம், சக்கம்மாள்புரம், சிவஞானபுரம், முடிவைத்தானேந்தல், ராமச்சந்திராபுரம், ஏர்போர்ட், செல்வம்சிட்டி, பவானிநகர், கூட்டாம்புளி, குலையன்கரிசல், போடம்பாள்புரம், சிறுபாடு, திரவியபுரம், புதுக்கோட்டை அம்மன் கோவில்தெரு, மறவன்மடம், அந்தோணியார்புரம், பைபாஸ், டோல்கேட், கோரம்பள்ளம், பேருரணி, வர்த்தகரெட்டிபட்டி, தெய்வசெயல்பபுரம், எல்லைநாயக்கன்பட்டி, பொட்டலுரணி விலக்கு, முருகன்புரம், ஈச்சந்தாஓடை, நாணல்காட்டான்குளம், சேதுராமலிங்கபுரம், கோனார்குளம் உள்ளிட்ட இடங்களில் மின்தடை செய்யப்படும்.இவ்வாறு அவர் தெரிவித்துள்ளார்.

மின்தடை காலங்களில் தகவல்களைப் பெறுவது மிகவும் முக்கியம். மின்சாரம் மீண்டும் வழங்கப்படும் நிலை மற்றும் அவசர அறிவிப்புகள் குறித்து தெரிந்துகொள்ள, குடியிருப்போர் பேட்டரி சக்தியில் இயங்கும் வானொலிகள் அல்லது முழுமையாக சார்ஜ் செய்யப்பட்ட மொபைல் போன்களை பயன்படுத்த வேண்டும். மொபைல் பேட்டரி ஆயுளை பாதுகாக்க, பவர் சேவிங் மோடினை இயக்கி, அவசர அழைப்புகள் மற்றும் குறுந்தகவல்கள் போன்ற தேவையான பயன்பாட்டிற்கு மட்டுமே போனைக் கொண்டு செயல்படுவது நல்லது.

மின்தடை நேரத்தில் திடீர் மின்வெட்டு ஏற்படும் அபாயத்தைத் தவிர்க்க, லிப்டைப் பயன்படுத்தாமல் இருக்க வேண்டும். மேலும், அவசர தொடர்பு எண்கள் எளிதில் கிடைக்கும் வகையில் வைத்திருப்பதோடு, தண்ணீர், சிற்றுண்டி, மற்றும் முதலுதவி பெட்டி போன்ற அத்தியாவசிய பொருட்களையும் தயாராக வைத்திருக்க வேண்டும். இந்த முன்னெச்சரிக்கைகளைப் பின்பற்றுவதன் மூலம், குடியிருப்போர் மின்தடை நேரத்தை பாதுகாப்பாக சமாளிக்க முடியும்.

சினிமா துறையினருக்கு அரசுப் பதவி... தகுதி இல்லையா? - ஆவேசமடைந்த பிரபல பாடகர்

ராஜேஷ். எஸ் — Tue, 13 Oct 2026 19:01:22 +0530

திரைத்துறை என்ன தீண்டத்தகாத துறையா? திரைத்துறையில் இருந்து தான் பல ஜாம்பவான்கள் உருவாகி இருக்கிறார்கள் என திரைத்துறையினருக்கு அரசு பதவிகள் கொடுக்கப்படுவது குறித்த விமர்சனத்திற்கு அறநிலையதத்துறை தேர்வுக்குழு உறுப்பினரும் பின்னணி பாடகருமான வேல்முருகன் ஆவேசமாக பதிலளித்துள்ளார்.

தூத்துக்குடி மாவட்டம், திருச்செந்தூர் சுப்பிரமணிய சுவாமி கோயிலில் நவராத்திரி கொலுவை முன்னிட்டு நடைபெறும் பக்தி கச்சேரியில் பாடல் பாட வந்த அறநிலையத்துறை தேர்வுக்குழு உறுப்பினரும் பிரபல பாடகருமான வேல்முருகன் கோயிலில் சாமி தரிசனம் செய்தார். தொடர்ந்து நவராத்திரியை முன்னிட்டு கோயில் வசந்த மண்டபத்தில் வைக்கப்பட்டுள்ள கொலு பொம்மையை தரிசனம் செய்து பார்வையிட்டார்.

அனைத்து துறையும் சிறப்பாக உள்ளது

அப்போது செய்தியாளர்களை சந்தித்த அவர், தமிழக முதல்வர் ஜோசப் விஜய் ஆட்சி பொறுப்பு ஏற்றதும் தமிழகத்தில் உள்ள அனைத்து துறையும் சிறப்பாக உள்ளது. இதனை மக்கள் வாழ்த்துகிறார்கள் என்று தெரிவித்தார். முதன்முறையாக இந்த நவராத்திரி நாளில் இந்து சமய அறநிலைத்துறை கோயில்களில் பக்தி இன்னிசை கச்சேரி நடைபெற்று வருகிறது. இரண்டாவது நாளான இன்று நான் பாட வந்துள்ளதாக தெரிவித்தார். மேலும் தொடர்ந்து பேசிய அவர், இயல், இசை, நாடக பிரிவில் தலைவராக கிராமிய பாடகர் புஷ்பவனம் குப்புசாமி நியமிக்கப்பட்டுள்ளது உண்மையிலே சந்தோஷமாக உள்ளது என்றும் நாட்டுப்புற கலைக்கும் கிராமிய கலைக்கும் தமிழக முதல்வர் மகுடம் சூட்டியுள்ளார் எனவும் பெருமிதம் தெரிவித்த அவர், தமிழக முதல்வர் ஆட்சிக்கு வருவதற்கு முன்பே கிராமிய கலைகளுக்கு முக்கியத்துவம் கொடுத்து வந்தார், அவர் கட்சி துவக்க விழாவிலும் கிராமிய பாடகிகள் நாட்டுப்புற கலைஞர்களை பாட வைத்துள்ளார். தானும் மூன்றாவது ஆண்டு கட்சி துவக்க விழாவில் பாடியுள்ளேன் என்றும் கூறினார்.

திரைத்துறை என்ன தீண்டத்தகாத துறையா?

மேலும், எல்லாத் துறையிலும் உள்ள பதவி யாருக்கு கொடுக்க வேண்டும் என்பதை நிதானமாக சரியாக யோசனை செய்து கொடுத்துள்ளார். இது மக்களிடையே வரவேற்பை பெற்றுள்ளது என்ற அவர், திரைத்துறையினருக்கு அதிக முக்கியத்துவம் அளிக்கப்படுவதாகவும் திரைத்துறையினருக்கு அரசு முக்கிய பதவிகள் அளிக்கப்படுவது குறித்த கேள்விக்கு பதிலளித்த அவர், திரைத்துறை என்ன தீண்டத்தகாத துறையா? திரைத்துறை என்பதும் ஒரு தொழில் தானே என்றும் திரைத்துறையிலிருந்து தான் பல துறையினருக்கும் பல ஜாம்பவான்கள் வந்திருக்கிறார்கள் எனக்கூறிய அவர், திரைத்துறையும் அரசுத்துறையும் மக்களும் ஒன்றுதான் என ஆவேசமாக பதிலளித்தார்.

VOC Port: தூத்துக்குடிக்கு ரூ.17,000 கோடியில் மெகா ப்ராஜெக்ட்..! இரண்டாக உடைத்த மத்திய அரசு - டெண்டர் வருமா?

குலசேகரன் முனிரத்தினம் — Tue, 13 Oct 2026 12:15:48 +0530

Thoothukudi VOC Port: தூத்துக்குடியில் கண்டெய்னர் முனையத்தை அமைப்பதற்கான டெண்டரை வெளியிட்டு 2 ஆண்டுகள் ஆன பிறகும், யாரும் ஆர்வம் காட்டாததால் தற்போது அது இரண்டாக பிரிக்கப்பட்டுள்ளது.

தூத்துக்குடி துறைமுகம் - மறுடெண்டர் திட்டம்

தூத்துக்குடி வ.உ.சி., துறைமுகத்தில் அமைக்கப்பட உள்ள வெளிப்புற கன்டெய்னர் முனையமானது கனவுத்திட்டமாக பார்க்கப்படுகிறது. ஆனால், இதற்கான டெண்டர் வெளியிட்டு இரண்டு ஆண்டுகளாகியும் ஒருவர் கூட அதில் ஆர்வம் காட்டுவில்லை. எனவே அதனை சீர்திருத்தம் வகையில் திட்டத்தை இரண்டாக பிரித்து புதிய டெண்டரை வெளியிட முடிவு செய்துள்ளது. அதன்படி, கன்டெய்னர் முனையத்தின் முக்கிய உட்கட்டமைப்பை கட்டும் பொறுப்பு துறைமுக ஆணையத்திடமே ஒப்படைக்கப்பட உள்ளதாம். 17 ஆயிரம் கோடி ரூபாய் மதிப்பிலான இந்த மறுசீரமைக்கப்பட்ட திட்டமானது கடந்த வாரம் மத்திய அமைச்சரவையின் கவனத்திற்கு கொண்டு செல்லப்பட்டதாக கூறப்படுகிறது. இந்திய கிழக்கு கடற்கரை பிராந்தியத்தில் தூத்துக்குடி வ.உ. சி துறைமுகத்தை முக்கிய சரக்கு போக்குவரத்து மையமாக மாற்றும் நோக்கிலான இந்த திட்டத்திற்கு, கடந்த 2024ம் ஆண்டு பிப்ரவரியில் பிரதமர் மோடி அடிக்கல் நாட்டியது குறிப்பிடத்தக்கது.

புதிய திட்டம் என்ன?

ஒரே திட்டத்திற்காக 17 ஆயிரம் கோடி ரூபாயை செலவிடுவது என்பது மிகப்பெரிய முதலீடாக பார்க்கப்படுகிறது. நீண்ட கால முயற்சியின் மூலம் மட்டுமே இந்த தொகை மீண்டும் கைக்கு வரும் என்பதால், எந்தவொரு நிறுவனமும் இந்த டெண்டரை பெற ஆர்வம் காட்டவில்லை. இரண்டு முறை டெண்டர் வெளியிடப்பட்டும் யாரும் முன்வரவில்லை. அதன் காரணமாகவே தற்போது திட்டம் இரண்டாக பிரிக்கப்பட்டுள்ளது. திருத்தப்பட்ட கட்டமைப்பு திட்டத்தின் கீழ், ஹைப்ரிட் ஆண்டுத்தொகை மாதிரி மூலம் 11 ஆயிரத்து 700 கோடி ரூபாய் மதிப்பீட்டில் பொதுவான மைய உட்கட்டமைப்பு பணிகளை துறைமுக ஆணையமே மேற்கொள்ள உள்ளது. இதுபோக இயந்திரமயமாக்கல், முனைய செயல்பாடு மற்றும் பிற மேம்பாட்டு பணிகளை 5 ஆயிரத்து 400 கோடி ரூபாய் மதிப்பீட்டில் மேற்கொள்ள தனியார் முதலீட்டாளர்களுக்கு அழைப்பு விடுக்கப்பட உள்ளது.

கன்டெய்னர் முனையத்தின் விரிவான திட்ட விவரம்:

திட்டப் பணிகள் முடிவுற்றால், இந்த துறைமுகமானது 18 மீட்டர் ஆழம் தேவைப்படும் 20 அடிக்கு நிகரான 24 ஆயிரம் கன்டெய்னர்களை சுமந்து வரக்கூடிய மிகப்பெரிய கன்டெய்னர் கப்பல்களை கூட கையாளும் திறனை பெறும். இத்தகைய கப்பல்களானது சுமார் நான்கு கால்பந்து மைதானங்களுக்குச் சமமான 400 மீட்டருக்கும் அதிகமான நீளத்தை கொண்டிருக்கும் என கூறப்படுகிறது. 2024ம் ஆண்டு அனுமதி அளிக்கப்பட்ட திட்டத்தில் 40 லட்சம் கன்டெய்னர்களை கையாளும் வகையிலான இரண்டு முனையங்கள் இடம்பெற்று இருந்தனர். ஆனால், தற்போது மேம்படுத்தப்பட்டுள்ள திட்டத்தின் மூலம் இதன் கொள்ளளவானது 52 லட்சமாக உயர்த்தப்பட்டுள்ளது.

இதையும் படியுங்கள்: Perambur Hospital: இடம் ரெடி..! பெரம்பூரில் 6 ஏக்கரில் ரூ.300 கோடியில் பன்னோக்கு மருத்துவமனை - எங்கு அமைகிறது தெரியுமா?

பழைய திட்டம் என்ன?

இந்தத் திட்டம் முதலில் 2024ம் ஆண்டில் வடிவமைப்பு, கட்டுமானம், நிதி, இயக்கம் மற்றும் ஒப்படைப்பு மாதிரியில் ஒப்புதல் பெற்றது. இதுவே இத்தகைய முதல் முழுமையான பொது-தனியார் கூட்டாண்மை திட்டமாகும். இதில் ஒப்பந்ததாரர் முழு வசதியையும் கட்டமைத்து, சுமார் ரூ. 7.000 கோடி மதிப்பீட்டில் அதை இயக்க வேண்டும். இது 16 மீட்டர் ஆழம் கொண்ட, 18 ஆயிரம் கன்டெய்னர்களை சுமக்கும் திறன் வாய்ந்த கப்பல்களைக் கையாளும் வகையில் வடிவமைக்கப்பட்டது. காலம் காலமாக, துறைமுக ஆணையம் பொதுவான உட்கட்டமைப்புகளை உருவாக்கும் வேளையில், தனியார் நிறுவனங்கள் உபகரணங்களில் முதலீடு செய்து முனையங்களை இயக்கும். அதனை மாற்றும் வகையில் அரசு எடுத்த முன்னெடுப்பு வெற்றியை அளிக்காத நிலையில், மீண்டும் பழைய நிலையிலேயே வ.உ. சி., துறைமுக கன்டெய்னர் முனையத்தை அமைக்க அரசு முடிவு செய்துள்ளது.

Thiruchendur Murugan Temple: திருச்செந்தூர் கோவிலில் நடந்த அதிர்ச்சி.. அலறி அடித்து ஓடிய பக்தர்கள்.. நடந்தது என்ன?

வினோத்குமார் — Sat, 10 Oct 2026 14:44:42 +0530

தமிழ் கடவுளாகவும், அழகின் அம்சமாக போற்றி வணங்கப்படுபவர் முருகப்பெருமான். முருகப்பெருமானின் அறுபடை வீடுகளில் இரண்டாம் படை வீடு சுப்பிரமணிய சுவாமி கோயில் தூத்துக்குடி மாவட்டம் திருச்செந்தூரில் அமைந்துள்ளது. அழகிய கடற்கரையோரம் அமைந்துள்ளது. இதனால் இங்கு வரும் பக்தர்கள் கடலில் புனித நீராடுவதை பெரும் பாக்கியமாக கருதுகின்றனர்.

திருச்செந்தூர் முருகன் கோவில்

இக்கோவிலுக்கு தினமும் பல்வேறு மாவட்டங்கள், மாநிலங்கள் மற்றும் உலக நாடுகளில் இருந்து தினமும் ஆயிரக்கணக்கான பக்தர்கள் நீண்ட நேரம் காத்திருந்து முருகன் அருளை பெறுகின்றனர். அதுவும் வார விடுமுறை மற்றும் தொடர் விடுமுறை வந்துவிட்டால் சாமியை தரிசனம் செய்யவே 4 முதல் 5 மணி நேரம் ஆகிவிடும். இந்நிலையில் திருச்செந்தூர் கடற்கரையில் ஒவ்வொரு மாதமும் அமாவாசை மற்றும் பவுர்ணமி நாட்கள் மற்றும் அதற்கு முந்திய, பிந்திய நாட்களில் கடல்நீர் உள்வாங்கிய பிறகு இயல்புநிலைக்கு திரும்புவது வழக்கம்.

இதையும் படிங்க: Rain Alert: 40 முதல் 50 கி.மீ. வேகத்தில் காற்று! எந்தெந்த மாவட்டங்களில் இன்று கனமழை எச்சரிக்கை! சென்னை நிலவரம் என்ன?

மகாளய அமாவாசை தர்ப்பணம்

இந்நிலையில் மகாளய அமாவாசை தினமான இன்று பொதுமக்கள் தங்களது முன்னோர்களுக்கு நீர்நிலைகளில் தர்ப்பணம் கொடுக்க குவிந்தனர். அப்போது திடீரென திருச்செந்தூர் சுப்பிரமணிய சுவாமி கோவிலில் கடல் சுமார் 100 அடி தூரத்திற்கு உள்வாங்கியது. இதனால் பாசி படர்ந்த பச்சை நிற பாறைகள் அதிக அளவில் வெளியே காட்சி அளித்தன. மேலும் கோவிலுக்கு வருகை தந்த பக்தர்களும், சுற்றுலா பயணிகள் மற்றும் தர்ப்பணம் கொடுக்க வந்தவர்கள் பாறைகள் மீது ஆபத்தை உணராமல் நின்று செல்பி எடுத்தும், புகைப்படம் எடுத்து கொண்டனர்.

பாசி படிந்த பாறைகள்

பாசி படிந்த பாறைகளில் சிறுவர்கள் சைக்கிள் ஓட்டி விளையாடி மகிழ்ந்தனர். இதனை கண்டு அதிர்ச்சி அடைந்த பக்தர்கள் அலறியடிக்கொண்டு வெளியேறினார்.மேலும் கடல் உள்வாங்கிய பகுதிகளில் பாதுகாப்பு பணியில் இருந்த காவலர்கள் பக்தர்களை பாதுகாப்பாக குளிக்க அறிவுறுத்தினர். கடலில் நீராடும் பக்தர்கள் கவனமான முறையில் நீராடுமாறு கோயில் நிர்வாகம் சார்பாக ஒலிபெருக்கி மூலமும் எச்சரிக்கை விடுத்து வருகின்றனர்.

VOC Port: நாட்டிலேயே முதல்முறை..!தூத்துக்குடி துறைமுகத்தில் ரூ.77 கோடி மெகா ப்ராஜெக்ட் - கடலில் 6.25MW மின்சாரம்

குலசேகரன் முனிரத்தினம் — Tue, 6 Oct 2026 09:00:48 +0530

VOC Port Wind Turbine: தூத்துக்குடியில் வ.உ.சி துறைமுகத்தில் சுமார் 77 கோடி ரூபாய் செலவில் அமைக்கப்பட உள்ள காற்றாலை மூலமாக 6.25MW மின்சாரம் உற்பத்தி செய்யப்படும் என மதிப்பிடப்பட்டுள்ளது.

நாட்டிலேயே முதல்முறையாக..!

கடந்த பல தசாப்தங்களாகவே காற்றலை மூலம் மிகப்பெரிய அளவில் மின்சாரம் தயாரிக்கும் முக்கியமான மாநிலமாக தமிழ்நாடு விளங்கி வருகிறது. மலைப்பகுதிகளில் மட்டுமின்றி சமதளப்பகுதியில் உள்ள நிலங்களில் கூட காற்றாலை பரவி கிடக்கிறது. தற்போது மாநிலத்தில் இத்துறையை அடுத்தகட்டத்திற்கு கொண்டு செல்லும் வகையில் நாட்டிலே முதல்முறையாக கடலுக்குள் காற்றாலை அமைக்கப்பட உள்ளது. தூத்துக்குடி வ.உ.சி துறைமுகத்தின் தெற்கு அலைத்தடுப்பிலிருந்து சுமார் 1,650 மீட்டர் தொலைவில் 6.25 மெகாவாட் திறன் கொண்ட ஒற்றை காற்றாலை ஒன்றை நிறுவ, நாட்டின் முதல் கடல் காற்றாலை மாதிரி திட்டம் தயாராகியுள்ளது.

கடலுக்குள் காற்றாலை மின்சாரம் - ரூ.77 கோடி பட்ஜெட்:

ரூ.77 கோடி மதிப்பிலான இந்தத் திட்டத்திற்கு, இந்திய துறைமுக ரயில் மற்றும் கம்பிவடக் கழகம் டெண்டர் கோரியுள்ளது. இந்த ஒப்பந்தம் கடல் காற்றாலை விசிறியின் வடிவமைப்பு, கொள்முதல், கட்டுமானம், நிறுவுதல், சோதனை செய்தல் மற்றும் செயல்பாட்டிற்குக் கொண்டுவருதல் ஆகியவற்றை உள்ளடக்கியுள்ளது. இதனைத் தொடர்ந்து இரண்டு ஆண்டுகளுக்கான செயல்பாடு மற்றும் பராமரிப்பும் இதில் அடங்கும். உற்பத்தி செய்யப்படும் மினாரத்தை தரைக்கு கொண்டுவர, கடலுக்கு அடியில் கேபிள் அமைப்பது உள்ளிட்ட பணிகள் அடங்கிய, டெண்டருக்கான ஏற்பு கடிதம் வழங்கபட்ட 12 மாதங்களில் திட்டப் பணிகளை நிறைவு செய்ய மதிப்பிடப்பட்டுள்ளது. உற்பத்தி செய்யப்படும் மின்சாரம் மாநில மின் கட்டமைப்புக்கு அனுப்பப்படும். கரையோரத்தில் நிறுவப்பட்டுள்ள ஆற்றல் அளவிகள், TANGEDCO/TANTRANSCO விதிமுறைகளின்படி, மின் கட்டமைப்புக்கு அனுப்பப்படும் மின்சாரம், மின் கட்டமைப்பிலிருந்து பெறப்படும் மின்சாரம் பதிவு செய்யப்படும்.

இதையும் படியுங்கள்: TN Govt: கரையும் கஜானா..! அரசு செலவை குறைக்க என்னவெல்லாம் செய்யலாம்? CM விஜய் புதிய முடிவு

திட்டத்தின் நோக்கம் என்ன?

தூத்துக்குடியில் செயல்படுத்தப்பட உள்ள இந்த முன்மாதிரி காற்றாலை திட்டமானது, காற்றாலை செயல்திறன், நிறுவுதல் மற்றும் கப்பல் தளவாடங்கள், துறைமுகம் மற்றும் உள்ளூர் விநியோகச் சங்கிலி அணிதிரட்டல், மற்றும் கடலில் இருந்து மின்சாரத்தை வெளியேற்றுதல் ஆகியவற்றில் நடைமுறை அனுபவத்தை உருவாக்கும். பெரிய அளவில் கடல் காற்றாலைகளை நிறுவுவதற்குத் தேவைப்படும் பொறியியல், கடல்சார் தளவாடங்கள், மின்கட்டமைப்பு இணைப்பு மற்றும் செயல்பாடுகள் போன்ற திறன்களில் அனுபவத்தை ஏற்படுத்துவதே இந்த மாதிரி (Proto-Type) நோக்கமாகும். இது இந்தியாவின் கடற்கரையோரம் எதிர்காலத்தில் அமையவிருக்கும் பெரிய அளவிலான கடல் காற்றாலைத் திட்டங்களுக்கு ஒரு அடித்தளத்தை வழங்கும் என எதிர்பார்க்கப்படுகிறது.

தூத்துக்குடி தேர்வு செய்யப்பட்டது ஏன்?

நாட்டின் முதல் கடலுக்குள் காற்றாலை மின்சார உற்பத்தி எனும் திட்டத்தை பரிசோதிக்க, தூத்துக்குடி தேர்வு செய்யப்பட்டது ஏன்? என சிலருக்கு கேள்விகள் எழலாம். அதற்கு சாதகமான கடற்காற்று நிலைகளையும், நன்கு நிறுவப்பட்ட துறைமுகச் சூழலமைப்பு மற்றும் கடல்சார் தளவாட உள்கட்டமைப்பையும் ஒருங்கே கொண்டிருப்பதால், இத்திட்டமானது டர்பைனை மட்டுமல்லாமல், கடலில் இயந்திரங்களை நிறுவி இயக்குவதற்குத் தேவையான பரந்த சூழலமைப்பையும் சோதித்துப் பார்க்க தூத்துக்குடி துறைமுகம் தேவையான அனைத்து வாய்ப்புகளையும் வழங்கி வருகிறது.

இந்தியாவின் உற்பத்தி திறன்:

இந்தியா ஏற்கனவே கணிசமான காற்றாலை மின் உற்பத்தித் தளத்தைக் கொண்டுள்ளது. அரசாங்கத் தரவுகளின்படி, ஜூன் 30, 2026 நிலவரப்படி, நாட்டின் நிறுவப்பட்ட காற்றாலை மின் உற்பத்தித் திறன் 57,443 மெகாவாட்டாக உள்ளது. 10,734 மெகாவாட்டிற்கும் அதிகமான உற்பத்தித் திறனுடன், தமிழ்நாடு இந்தியாவின் புதுப்பிக்கத்தக்க எரிசக்தித் துறையில் ஒரு முன்னணி மாநிலமாகத் திகழ்கிறது. இதனிடையே 2025-ஆம் ஆண்டில் கடல்சார் காற்றாலைத் திட்டங்களில் நிறுவப்பட்ட காற்றாலைகளின் சராசரித் திறன் 10.3 மெகாவாட்டாக இருந்தது என்று உலகளாவிய காற்றாலை ஆற்றல் கவுன்சில் தெரிவித்துள்ளது. இதனை கருத்தில் கொண்டே, உள்நாட்டிலும் கடலுக்குள் காற்றாலை மையங்களை அமைத்து மின்சார உற்பத்தி செய்வதற்கான நடவடிக்கைகள் முன்னெடுக்கப்பட்டுள்ளன.