தஞ்சாவூர்: நவீனப் பொறியியல் கருவிகளோ, கணினித் தொழில்நுட்பங்களோ இல்லாத ஒரு காலகட்டத்தில், தொலைநோக்குப் பார்வையோடும் துல்லியமான திட்டமிடலோடும் கட்டப்பட்ட நீர் மேலாண்மைக் கட்டமைப்புகள் இன்றும் நம்மை வியப்பில் ஆழ்த்துகின்றன.

அந்த வகையில், தஞ்சை மாவட்டம் கண்டிதம்பட்டு பகுதியில் அமைந்துள்ள, ஆங்கிலேயர் காலத்தில் கட்டப்பட்ட "சைப்பன்கள்" (Syphons) எனப்படும் "கீழ்குமிழி" பாசனக் கட்டமைப்பு, இன்றளவும் ஒரு சொட்டு நீர் கூட கசியாமல் பொதுப்பணித்துறை பொறியாளர்களை வியக்க வைத்து வருகிறது.

'சைப்பன்கள்' அல்லது 'கீழ்குமிழி' என்றால் என்ன?

விவசாயப் பாசனத்திற்காக மனிதர்களால் வெட்டப்படும் செயற்கை ஆறுகளும், மழைக் காலங்களில் இயற்கையாகப் பெருக்கெடுத்து ஓடும் காட்டாறுகளும் ஒன்றோடொன்று கலந்துவிடக் கூடாது என்பதற்காக, ஒன்றன் மேல் ஒன்றாகச் செல்லும் வகையில் பிரத்யேகமாக வடிவமைக்கப்பட்ட நீர் வழிப்பாதைதான் "சைப்பன்" ஆகும். இதனை ஆங்கிலேயர்கள் தங்கள் ஆவணங்களில் "கீழ்குமிழி" என்று பதிவிட்டுள்ளனர்.

கல்லணைக் கால்வாய் என்ற செயற்கை ஆறு

மேட்டூர் அணை கட்டப்பட்ட அதே காலகட்டமான 1928-ம் ஆண்டு முதல் 1934-ம் ஆண்டு வரை தஞ்சாவூர் மற்றும் புதுக்கோட்டை மாவட்ட விவசாயிகள் பயன்பெறும் வகையில், "புது ஆறு" என்று அழைக்கப்படும் கல்லணைக் கால்வாய் வெட்டப்பட்டது. இது இயற்கையான ஆறு அல்ல; முற்றிலும் விவசாயிகளின் பாசனத்திற்காகத் திட்டமிட்டு வெட்டப்பட்ட ஒரு செயற்கை ஆறாகும்.

இந்த ஆறு வெட்டப்படும்போது, மழைக்கால வடிகால் நீர் இதனுடன் கலந்துவிடக் கூடாது என்பதில் ஆங்கிலேயப் பொறியாளர்கள் மிகக் கவனமாக இருந்தனர். இதனால், கல்லணைக் கால்வாயின் குறுக்கே 100-க்கும் மேற்பட்ட இடங்களில் இந்த சைப்பன்கள் அமைக்கப்பட்டன. வழக்கமான கட்டமைப்பு: பெரும்பாலான இடங்களில் பாசன ஆறு மேல் பகுதியிலும், காட்டாறு வாய்க்கால்கள் அதன் அடிப்பகுதியிலும் செல்லும்.

அபூர்வக் கட்டமைப்பு: இதற்கு நேர்மாறாக, காட்டாறு மேல் பகுதியிலும், பாசன ஆறு அதன் கீழ்ப்பகுதியிலும் செல்லும் வகையில் அடப்பன்பள்ளம், கண்டிதம்பட்டு, ஈச்சன்விடுதி உள்ளிட்ட நான்கு இடங்களில் மட்டும் மிக விசேஷமான கீழ்குமிழிகள் அமைக்கப்பட்டன.

கண்டிதம்பட்டு கீழ்குமிழியின் பொறியியல் ஆச்சரியம்

நான்கு இடங்களில் மிகவும் முக்கியத்துவம் வாய்ந்தது தஞ்சாவூர் அருகே உள்ள கண்டிதம்பட்டு கீழ்குமிழியாகும்.

இங்கு மேல் பகுதியில் "வல்லம்வாரி" எனப்படும் காட்டாறு செல்கிறது. வல்லம் மற்றும் அதன் சுற்றுவட்டாரப் பகுதிகளில் பெய்யும் மழைநீர், மழைக்காலங்களில் பெருக்கெடுத்து இந்த வாரி வழியாக 29 கிலோமீட்டர் தூரம் பயணித்து, வடுவூர் அருகே உள்ள கண்ணனாற்றில் கலக்கிறது.

கீழ்ப்பகுதியில் செல்லும் கல்லணைக் கால்வாய் ஆற்றில், இந்த கீழ்குமிழி அமைந்துள்ள இடத்தில் 8 கண்மாய்கள் (Sluices) அமைக்கப்பட்டுள்ளன. காட்டாற்றில் 4,000 கன அடி நீர் ஆர்ப்பரித்து வந்தாலும், அதனை அப்படியே உள்வாங்கி, சுமார் 100 அடி தூரத்திற்கு உள்பகுதியிலேயே பாய்ச்சி, பின்னர் வெளியேற்றும் வகையில் இந்த அரிய கட்டுமானம் வடிவமைக்கப்பட்டுள்ளது.

சுண்ணாம்புக் கலவையின் பலம்: இரும்போ, நவீன சிமெண்ட்டோ இல்லாத அக்காலத்தில், வெறும் செங்கல் மற்றும் தட்டோட்டுக் காரை (சுண்ணாம்புக் கலவை) கொண்டு மட்டுமே இக்கட்டமைப்பு உருவாக்கப்பட்டது என்பதுதான் இதன் உச்சக்கட்ட ஆச்சரியம்!

பொறியாளர் எல்லீஸின் தொலைநோக்குப் பார்வை!

ஆங்கிலேயர் ஆட்சிக் காலத்தில், திறமைமிக்க பொறியாளரான எல்லீஸ் (Ellis) என்பவரின் தலைமையில்தான் இந்த ஒட்டுமொத்த கல்லணைக் கால்வாய் திட்டமும், புது ஆறும் வெட்டப்பட்டது. அவரது தொலைநோக்குச் சிந்தனையால் உருவான கண்டிதம்பட்டு கீழ்குமிழியில், மேல் பகுதியில் காட்டாற்று வெள்ளமும், கீழ் பகுதியில் பாசன நீரும் எவ்வித இடையூறுமின்றிச் தத்தமது பாதைகளில் செல்கின்றன.

கட்டப்பட்டு 87 ஆண்டுகள் கடந்துவிட்ட நிலையிலும், கடுமையான மழை, வெள்ளப் பெருக்குகளைத் தாங்கி, இதுவரை இந்த இடத்தில் ஒரு சிறிய நீர் கசிவு கூட ஏற்பட்டது கிடையாது எனப் பொதுப்பணித்துறை பொறியாளர்கள் துல்லியமான இக்கட்டமைப்பைப் பாராட்டி வியக்கின்றனர்.

பழமை மாறாத நவீனச் சீரமைப்பு

கிட்டத்தட்ட 87 ஆண்டுகளுக்குப் பிறகு  வரலாற்றுச் சிறப்புமிக்க கீழ்குமிழிக் கட்டுமானம், அதன் பழமை மற்றும் பாரம்பரியத் தரம் சற்றும் மாறாத வகையில், நவீனத் தொழில்நுட்பத் துணையோடு மேலும் வலுப்படுத்தப்பட்டுள்ளது.

தலைமுறை தாண்டியும் டெல்டா மாவட்ட விவசாயத்தைக் காத்து வரும் இந்த கண்டிதம்பட்டு சைப்பன் கட்டமைப்பு, தமிழர்களின் நீர் மேலாண்மை வரலாற்றில் என்றும் நிலைத்து நிற்கும் ஒரு பொறியியல் விந்தையாகும்.