தஞ்சாவூர் அருகே 7 ஏக்கரில் 216 வகையான பழமையான மரங்களை கொண்ட விருட்ச வனம் அமைக்கப்பட்டுள்ளது. இதன் ஓராண்டு நிறைவு நாளில் பள்ளி மாணவ, மாணவிகளை வரவழைத்து மரங்களை பற்றி எடுத்துக்கூறி விளக்கம் அளித்தார் மாவட்ட கலெக்டர் தினேஷ் பொன்ராஜ் ஆலிவர். தஞ்சாவூர் அருகே திருமலைசமுத்திரம் ஊராட்சியில் 216 வகையான அரிய, பாரம்பரிய மரங்களை கொண்டு 7 ஏக்கரில் உருவாக்கப்பட்ட விருட்ச வனத்துக்கு மாணவ, மாணவிகளை வரவழைத்து, மரங்களை பற்றி எடுத்துரைத்தார் மாவட்ட கலெக்டர் தினேஷ் பொன்ராஜ் ஆலிவர். தஞ்சாவூர் அருகே திருமலைசமுத்திரம் ஊராட்சியில் அரசுக்கு சொந்தமான 7 ஏக்கரில் பாரம்பரிய, அரிய வகையான மரக்கன்றுகளை நட்டு பராமரிக்கும் வகையில் விருட்ச வனம் உருவாக்கப்பட்டது. கடந்தாண்டு செப்.15-ம் தேதி இந்த விருட்ச வனத்தில் மரக்கன்றுகள் நடப்பட்டது. இதில் கருவாலி, திருவோடு, இத்தி, சிவகுண்டலம், அத்தி, எட்டி, மாவிலங்கை, ருத்ராட்சம் என 216 வகையான 500 மரக்கன்றுகள் நடப்பட்டது. இந்த மரக்கன்றுகள் நடப்பட்டு ஓராண்டு நிறைவு அடைந்துள்ளது. இதையடுத்து திருமலைசமுத்திரம் பகுதியில் உள்ள அரசு பள்ளி மாணவ, மாணவிகளை விருட்ச வனத்துக்கு மாவட்ட கலெக்டர் தினேஷ் பொன்ராஜ் ஆலிவர் வரவழைத்தார். பின்னர் விருட்ச வனத்தில் உள்ள மரங்களைப் பற்றியும், அதன் தன்மைகளைப் பற்றியும் விளக்கமாக மாணவ, மாணவிகளுக்கு எடுத்துக்கூறினார். பின்னர் மாணவர்களுக்கு மரக்கன்றுகளை வழங்கினார் கலெக்டர் தினேஷ் பொன்ராஜ் ஆலிவர்.

தொடர்ந்து நிருபர்களிடம் கலெக்டர் கூறியதாவது: கடந்தாண்டு செப்.15-ம் தேதி திருமலை சமுத்திரம் கிராமத்தில் வன விருட்சம் என்ற மரங்கள் சரணாலயம் தொடங்கப்பட்டது. தற்போது ஓராண்டு நிறைவு பெற்றுள்ளது. இதில் 216 வகையான மரக்கன்றுகள் நடப்பட்டுள்ளது. இந்த சரணாலயத்தில் பன்முகத் தன்மையை பிரதிபலிக்கும் வகையில் புங்கனூர் பசுக்கள் மற்றும் காளை வளர்க்கப்படுகிறது. அதே போல் உலகத்திலேயே சிறிய ரகமான கோழி மற்றும் பெரிய கோழி இனங்களும் வளர்க்கப்படுகிறது.

மேலும், ஒருங்கிணைந்த பண்ணையம் திட்டத்தின் கீழ் மீன் பண்ணை குட்டையும், காய்கறி தோட்டமும் அமைக்கப்பட்டுள்ளது. இந்த சரணாலயம் பெரிய அளவில் உருவாக்கப்பட்டு வருகிறது. வருங்காலத்தில் பள்ளி, கல்லூரி மாணவர்களுக்கு இந்த மரங்களின் சரணாலயம் பெரிய அளவில் உதவிடும். இன்று முதல் பள்ளி, கல்லூரி மாணவர்கள் இந்த சரணாலயத்தை பார்வையிடலாம். இன்னும் மூன்று வார காலத்தில் சுற்றுலாப் பயணிகளும் இந்த சரணாலயத்துக்கு வந்து பார்வையிட ஏற்பாடுகள் செய்யப்பட்டு வருகிறது என்றார். நிகழ்ச்சியில் கூடுதல் ஆட்சியர் ஸ்ரீகாந்த், கோட்டாட்சியர் ரஞ்சித், வட்டாட்சியர் மணிகண்டன், திருமலைசமுத்திரம் ஊராட்சி மன்றத் தலைவர் வெங்கடேஷ் மற்றும் அனைத்து அரசுத்துறை அதிகாரிகள் கலந்து கொண்டனர். இந்த நிகழ்ச்சியில் பங்கேற்ற மாணவர்கள் தரப்பில் கூறுகையில், இங்குள்ள மரங்கள் பற்றி அறிந்து கொண்டது பயன் உள்ள ஒன்றாக இருந்தது. இந்த நாளை மறக்க முடியாத நாளாக மாற்றி விட்டது என்றனர்.