சாஸ்த்ரா பல்கலைக்கழக பொறியியல் சேர்க்கை 2026: தரவரிசைப் பட்டியலில் சென்னை மாணவர் சாதனை

2026–27 ஆம் கல்வியாண்டிற்கான சாஸ்த்ரா நிகர்நிலைப் பல்கலைக்கழகத்தின் (SASTRA Deemed University) பொறியியல் சேர்க்கைக்கான தரவரிசைப் பட்டியல் அதிகாரப்பூர்வமாக வெளியிடப்பட்டுள்ளது.

தஞ்சாவூர் சாஸ்த்ரா பல்கலைக்கழக பொறியியல் சேர்க்கை தரவரிசை

Source : Abpnadu Original

தஞ்சாவூர்: சாஸ்த்ரா பல்கலைக்கழகப் பொறியியல் சேர்க்கைக்கான தரவரிசைப் பட்டியல் வெளியிடப்பட்டுள்ளது. இதில் சென்னையைச் சேர்ந்த மாணவர் முதலிடம் பிடித்துள்ளார்.

2026–27 ஆம் கல்வியாண்டிற்கான சாஸ்த்ரா நிகர்நிலைப் பல்கலைக்கழகத்தின் (SASTRA Deemed University) பொறியியல் சேர்க்கைக்கான தரவரிசைப் பட்டியல் அதிகாரப்பூர்வமாக வெளியிடப்பட்டுள்ளது. இதில் சென்னையைச் சேர்ந்த மாணவர் அகில இந்திய அளவில் முதலிடம் பிடித்து சாதனை படைத்துள்ளார்.

சென்னையைச் சேர்ந்த மாணவர் சாதனை

சாஸ்த்ரா பல்கலைக்கழகம் வெளியிட்டுள்ள தரவரிசைப் பட்டியலில், ஸ்ட்ரீம் 1 மற்றும் ஸ்ட்ரீம் 2 ஆகிய இரு பிரிவுகளிலும் சென்னையைச் சேர்ந்த மாணவர் ஆர். அபிநவ் முதலிடம் பெற்றுள்ளார். இவர் தனது 12-ஆம் வகுப்பு பொதுத்தேர்வில் 97.8 சதவீத மதிப்பெண்களையும், தேசிய அளவிலான ஜே.இ.இ மெயின் (JEE Main) தேர்வில் 99.6909 மதிப்பெண்களையும் பெற்று இந்தச் சாதனையைப் படைத்துள்ளார். மாணவர் அபிநவ், சென்னையில் உள்ள ஸ்ரீமதி சுந்தரவல்லி நினைவு பள்ளியில் பயின்றவர் என்பது குறிப்பிடத்தக்கது.

37 ஆயிரத்துக்கும் மேற்பட்ட விண்ணப்பங்கள்

இந்த ஆண்டு பொறியியல் சேர்க்கைக்காக இந்தியா முழுவதும் இருந்து சுமார் 37,000-க்கும் மேற்பட்ட மாணவர்கள் ஆர்வத்துடன் விண்ணப்பித்திருந்தனர். 2026 ஜூன் 5-ஆம் தேதி மாலை 5.00 மணி வரை பெறப்பட்ட அனைத்து விண்ணப்பங்களும் முழுமையாகப் பரிசீலிக்கப்பட்டு, அன்றைய தினமே இரவு 9.00 மணிக்குத் தரவரிசைப் பட்டியல் வெளியிடப்பட்டது.

சேர்க்கை நடைமுறைகள் (ஸ்ட்ரீம் 1 மற்றும் 2)

பல்கலைக்கழகத்தின் மொத்த இடங்கள் இரண்டு பிரிவுகளாகப் பிரிக்கப்பட்டு சேர்க்கை நடைபெறுகிறது:

ஸ்ட்ரீம் 1 (Stream 1): மொத்த இடங்களில் 50 சதவீத இடங்கள் இந்தப் பிரிவின் கீழ் நிரப்பப்படுகின்றன. இதில் மாணவர்களின் 12-ஆம் வகுப்பு மொத்த மதிப்பெண்கள் மற்றும் JEE Main தேர்வில் பெற்ற மதிப்பெண்கள் ஆகிய இரண்டும் அடிப்படையாகக் கொள்ளப்படும்.

ஸ்ட்ரீம் 2 (Stream 2): மீதமுள்ள 50 சதவீத இடங்கள் இந்தப் பிரிவின் கீழ் நிரப்பப்படுகின்றன. இதற்கு 12-ஆம் வகுப்பு பொதுத்தேர்வில் பெற்ற மொத்த மதிப்பெண்கள் மட்டுமே கணக்கில் எடுத்துக்கொள்ளப்படும்.

உள்ளூர் மற்றும் சிறப்பு இட ஒதுக்கீடு

உள்ளூர் மாணவர்களை ஊக்குவிக்கும் வகையில், திருச்சி மற்றும் தஞ்சாவூர் மாவட்டங்களைச் சேர்ந்த மாணவர்களுக்கென பிரத்யேகமாக 20 சதவீத இடங்கள் ஒதுக்கப்பட்டுள்ளன.

மேலும், வடகிழக்கு மாநிலங்கள், ஜம்மு & காஷ்மீர், அந்தமான் & நிக்கோபார் தீவுகள் மற்றும் லட்சத்தீவு ஆகிய பகுதிகளைச் சேர்ந்த மாணவர்களுக்கும் சிறப்பு ஒதுக்கீடுகள் வழங்கப்பட்டுள்ளன. இதுதவிர, இந்திய ஆயுதப் படைகளில் பணியாற்றும் வீரர்கள் மற்றும் நாட்டிற்காக வீரமரணம் அடைந்த தியாகிகளின் குழந்தைகளுக்காகச் சிறப்புக் கல்வி உதவித்தொகைகளும் (Scholarships) பல்கலைக்கழக நிர்வாகத்தால் வழங்கப்படுகின்றன.

ஆகஸ்ட் 3 முதல் வகுப்புகள் தொடக்கம்

இதுகுறித்து சாஸ்த்ரா நிகர்நிலைப் பல்கலைக்கழகத்தின் துணைவேந்தர் டாக்டர் எஸ். வைத்தியசுப்பிரமணியம் தெரிவிக்கையில்:

"கலந்தாய்வு மற்றும் சேர்க்கை தொடர்பான அனைத்து விரிவான தகவல்களும் பல்கலைக்கழகத்தின் அதிகாரப்பூர்வ இணையதளத்தில் (www.sastra.edu) கிடைக்கின்றன. 2026-ஆம் ஆண்டு முதலாம் ஆண்டு மாணவர்களுக்கான வகுப்புகள் ஆகஸ்ட் 3, 2026 முதல் தொடங்கும்."

மேலும், பல்கலைக்கழகச் சேர்க்கைக்கு விண்ணப்பித்துள்ள அனைத்து மாணவர்களுக்கும் அவர் தனது மனமார்ந்த வாழ்த்துகளைத் தெரிவித்தார்.