26 லட்சம் ஏக்கர் தரிசாகும் பேராபத்து: மேக்கேதாட்டு அணைக்கு எதிராக விழிக்குமா தமிழகம்?

காவிரி நீர் பங்கீடு தொடர்பாக தமிழ்நாட்டுக்கும் கர்நாடகத்துக்கும் இடையே 50 ஆண்டுகளுக்கும் மேலாக சட்டப் போராட்டமும், அரசியல் முரண்பாடுகளும் நீடித்து வருகின்றன.

மேகதாட்டு அணை குறித்து விவசாயிகள் அச்சம்

Source : Abpnadu Original

தஞ்சாவூர்: கர்நாடக மாநிலத்திலுள்ள மேக்கேதாட்டில் புதிய அணை கட்டுவதற்கான நடவடிக்கையை அம்மாநில அரசு முழுவீச்சில் மேற்கொண்டு வருகிறது. இதனால் தமிழகத்திற்கு வழக்கமாகக் கிடைக்கும் உபரி நீர் (மிகை நீர்) வரத்தும் முற்றிலுமாகத் தடைபடும் அபாயம் ஏற்பட்டுள்ளது. இது டெல்டா மாவட்ட விவசாயிகளிடையே பெரும் அதிர்ச்சியை ஏற்படுத்தியுள்ளது.

ஐம்பது ஆண்டு கால காவிரி நீர் போராட்டம்

காவிரி நீர் பங்கீடு தொடர்பாக தமிழ்நாட்டுக்கும் கர்நாடகத்துக்கும் இடையே 50 ஆண்டுகளுக்கும் மேலாக சட்டப் போராட்டமும், அரசியல் முரண்பாடுகளும் நீடித்து வருகின்றன. நடுவர் மன்ற இடைக்காலத் தீர்ப்பு: தமிழ்நாட்டுக்கு 205 டி.எம்.சி. தண்ணீர் வழங்க வேண்டும் என உத்தரவிடப்பட்டது. 2007 இறுதித் தீர்ப்பு: நடுவர் மன்றத்தின் இறுதித் தீர்ப்பில் இந்த அளவு 192 டி.எம்.சி.யாகக் குறைக்கப்பட்டது.

2018 உச்ச நீதிமன்றத் தீர்ப்பு: கர்நாடக அரசின் மேல்முறையீட்டால், உச்ச நீதிமன்றம் தமிழகத்திற்கான தண்ணீரின் அளவை 177.25 டி.எம்.சி.யாக மேலும் குறைத்து தீர்ப்பளித்தது.

தேவையும் யதார்த்தமும்: விவசாயிகளின் அதிருப்தி

தமிழக டெல்டா மாவட்டங்களில் குறுவை, சம்பா மற்றும் தாளடி ஆகிய முப்போக சாகுபடிகளுக்கு ஆண்டுதோறும் 250 முதல் 300 டி.எம்.சி. தண்ணீர் தேவைப்படுகிறது. ஆனால், உச்ச நீதிமன்றம் ஒதுக்கிய 177.25 டி.எம்.சி தண்ணீரே விவசாயத்திற்குப் போதுமானதாக இல்லை.

இந்தக் குறைந்தபட்சத் தண்ணீரைக் கூட கர்நாடகா தானாகத் திறப்பதில்லை. அங்குள்ள 4 அணைகளும் நிரம்பி வழிந்தால் மட்டுமே தமிழகத்திற்குத் தண்ணீர் திறந்துவிடப்படுகிறது. இதைப் பெறுவதற்கே தமிழக அரசு ஒவ்வொரு ஆண்டும் சட்டப்படி போராட வேண்டிய அவல நிலை நீடிக்கிறது.

கடந்த 25 ஆண்டுகால நீர்வரத்து புள்ளிவிவரம்

கடந்த 25 ஆண்டு கால வரலாற்றை உற்று நோக்கினால், தமிழகத்திற்குப் பெருவெள்ளக் காலங்களில் மட்டுமே உபரி நீர் கிடைத்துள்ளது தெரியவருகிறது.

பெருவெள்ள ஆண்டுகள்: கடந்த 25 ஆண்டுகளில் 5 ஆண்டுகள் மட்டுமே (2005-06, 2007-08, 2018-19, 2022-23, 2025-26) காவிரியில் பெருவெள்ளம் ஏற்பட்டு உபரி நீர் கடலில் கலந்தது.

வறட்சி ஆண்டுகள்: 6 ஆண்டுகளில் 100 டி.எம்.சி.க்கும் குறைவாகவே தண்ணீர் வந்ததால் கடும் வறட்சி நிலவியது.

பற்றாக்குறை ஆண்டுகள்: 9 ஆண்டுகளில் 200 டி.எம்.சி.க்குள்ளும், 11 ஆண்டுகளில் 200 முதல் 250 டி.எம்.சி.க்குள்ளும் மட்டுமே நீர்வரத்து இருந்தது.

இதன் காரணமாக மேட்டூர் அணை திறப்பு தள்ளிப்போய், முப்போக சாகுபடி என்பது சுருங்கி, வெறும் ஒரு போக சம்பா சாகுபடி மட்டுமே செய்யும் நிலைக்கு விவசாயிகள் தள்ளப்பட்டுள்ளனர்.

மேக்கேதாட்டு திட்டமும் கர்நாடகாவின் பிடிவாதமும்

தமிழகத்திற்கு வரும் எஞ்சிய உபரி நீரையும் தடுத்து நிறுத்த கர்நாடக அரசு திட்டமிட்டுள்ளது. காவிரியின் குறுக்கே மேக்கேதாட்டு என்ற இடத்தில் 67 டி.எம்.சி. கொள்ளளவு கொண்ட புதிய அணையைக் கட்ட அம்மாநில அரசு தீவிரம் காட்டி வருகிறது.

திட்ட மதிப்பு: இத்திட்டத்திற்காகக் கடந்த ஆண்டு ₹9,000 கோடி நிதி ஒதுக்கீடு செய்யப்பட்டு, அதில் ₹1,000 கோடி உடனடியாக விடுவிக்கப்பட்டு பணிகள் முழுவீச்சில் முடுக்கிவிடப்பட்டுள்ளன.

ஏற்கெனவே உள்ள 4 அணைகளை விடவும் இது பல மடங்கு பெரியது என்பதால், இந்த அணை கட்டப்பட்டால் தமிழகத்திற்கு ஒரு சொட்டு உபரி நீர் கூட கிடைக்காது என்பது உறுதியாகிறது.

26 லட்சம் ஏக்கர் நிலம் தரிசாகும் பேராபத்து!

இதுகுறித்து சமூகஆர்வலர்கள் தரப்பில் விடுத்துள்ள  எச்சரிக்கை:

"கர்நாடகத்தில் காவிரியின் குறுக்கே சட்டவிரோதமாக ஹேமாவதி, ஹேரங்கி, கபினி என பல அணைகள் கட்டப்பட்டு தமிழகத்தின் நீர் உரிமை முடக்கப்பட்டது. இப்போது மேக்கேதாட்டுவில் 67 டி.எம்.சி.யில் அணை கட்ட முயல்கிறார்கள். இதனால் தமிழகத்தில் உள்ள 22 மாவட்டங்களின் குடிநீர் ஆதாரம் கடுமையாகப் பாதிக்கும்.

மேலும், 12 மாவட்டங்களில் உள்ள 26 லட்சம் ஏக்கர் விளைநிலங்களுக்குப் பாசன நீர் கிடைக்காமல் அவை தரிசு நிலங்களாக மாறும். இதன் விளைவாகக் கோடிக்கணக்கான மக்கள் தங்கள் வாழ்வாதாரத்தை இழந்து அகதிகளாக மாறும் பேராபத்து உள்ளது. இதைத் தடுக்க ஒட்டுமொத்தத் தமிழ்நாடும் ஒன்றிணைந்து போராட வேண்டும் என்று தெரிவித்துள்ளனர்.

கடந்த 25 ஆண்டுகளில் மேட்டூர் அணைக்குக் கிடைத்த நீர்வரத்து (டி.எம்.சி.யில்)

ஆண்டு	நீர்வரத்து (டி.எம்.சி.)	ஆண்டு	நீர்வரத்து (டி.எம்.சி.)
2001 - 02	162.73	2014 - 15	208.10
2002 - 03	93.52	2015 - 16	96.67
2003 - 04	67.14	2016 - 17	61.08
2004 - 05	164.00	2017 - 18	110.29
2005 - 06	402.18 (பெருவெள்ளம்)	2018 - 19	371.53 (பெருவெள்ளம்)
2006 - 07	235.93	2019 - 20	258.90
2007 - 08	344.72 (பெருவெள்ளம்)	2020 - 21	204.25
2008 - 09	203.75	2021 - 22	280.25
2009 - 10	219.72	2022 - 23	657.57 (உச்சபட்ச வரத்து)
2010 - 11	202.17	2023 - 24	81.17
2011 - 12	206.78	2024 - 25	290.84
2012 - 13	69.71	2025 - 26	329.97 (பெருவெள்ளம்)
2013 - 14	235.61

மேற்கண்ட புள்ளிவிவரங்கள் உணர்த்தும் உண்மை என்னவென்றால், கர்நாடகா உபரி நீரைத் தேக்க அணை கட்டினால், தமிழகத்தின் விவசாய வரைபடமே மாறும் அபாயம் உள்ளது. தமிழக அரசு இந்த விஷயத்தில் உடனடியாகத் தலையிட்டு சட்ட ரீதியான முட்டுக்கட்டைகளைப் பலப்படுத்த வேண்டும் என்பதே விவசாயிகளின் பிரதான கோரிக்கையாக உள்ளது.

மண்ணின் மடி வறண்டு கிடந்தால்
எப்படித் தீரும் தமிழ்நாட்டின் பசி?

உபரி நீரையும் சிறைபிடிக்கத் துடிக்கும்
மேக்கேதாட்டுவின் சுவர்கள்,
முறிக்கப் பார்ப்பது வெறும் அணையை அல்ல,
நம் உழவர்களின் நரம்புகளை!

இருபத்தாறு லட்சம் ஏக்கர் நிலங்கள்
நாளை தரிசாக மாறுவதா?
சோழ வளநாடு சோற்றுக்கின்றிச் தவித்து
மக்கள் அகதிகளாய் அலைவதா?

சட்டத்தின் கதவுகளும், மக்களின் குரல்களும்
ஒன்றாக ஒலிக்கும் காலம் இது;
காவிரி என்பது வெறும் நீரல்ல,
தமிழினத்தின் உயிர்நாடி என்றுணர்ந்து
விழித்து நின்றால் மட்டுமே – நாளை
விவசாயப் பூமி தழைத்திருக்கும்! இதை உணருமா கர்நாடகம் என்று கேள்வி எழுப்புகின்றனர் விவசாயிகள் நலம் விரும்பிகள்.