கரூரில் இளம் பெண்ணிற்கு கர்ப்பப்பை நீர்க்கட்டியை அகற்ற தனியார் மருத்துவமனையில் மேற்கொண்ட அறுவை சிகிச்சையால் உயிரிழந்ததாக கூறி உறவினர்கள் ஏராளமானோர் மருத்துவமனை முன்பு குவிந்தனர். இதனால் பரபரப்பு ஏற்பட்டது.
கரூர் மாவட்டம் மணவாசி கிராமத்தை சேர்ந்தவர் வளர்மதி (21). இவரது கணவர் பாலமுருகன். இவர்களுக்கு இரண்டு வயதில் பெண் குழந்தை ஒன்று உள்ளது. வளர்மதிக்கு கர்ப்பப்பையில் நீர்க்கட்டி இருந்ததால், அதனை அகற்றுவதற்காக ஆகஸ்ட் 31ம் தேதி கரூர் பேருந்து நிலையம் அருகில் அமைந்துள்ள ஶ்ரீ ரத்தினா மருத்துவமனையில் அறுவை சிகிச்சைக்காக அனுமதிக்கப்பட்டு கடந்த 1ம் தேதி அறுவை சிகிச்சை நடைபெற்றுள்ளது. அறுவை சிகிச்சைக்கு பிறகு சர்க்கரையின் அளவு சரிவர இல்லாததால், மேல் சிகிச்சைக்காக 5ம் தேதி கோவையில் உள்ள தனியார் மருத்துவமனைக்கு பரிந்துரை செய்து அனுப்பி வைத்ததாக கூறப்படுகிறது. கோவையில் உள்ள தனியார் மருத்துவமனையில் அனுமதித்து சிகிச்சை பெற்று வந்தவர் நேற்று காலை சிகிச்சை பலனின்றி உயிரிழந்துள்ளார். ஆனால், கரூர் ரத்தினா மருத்துவமனையில் அறுவை சிகிச்சையை தவறாக செய்ததன் காரணமாகவே வளர்மதி உயிரிழந்துள்ளார் என்று கூறி, கரூரில் மருத்துவமனை முன்பு போராட்டத்தில் ஈடுபடுவதற்காக அவரது உறவினர்கள் மற்றும் ஊர் பொதுமக்கள் என 200க்கும் மேற்பட்டோர் குவிந்தனர்.
வளர்மதியின் பிரேதத்தை கோவையிலிருந்து தனியார் ஆம்புலன்ஸ் மூலமாக கரூர் எடுத்து வந்தனர். ஆனால், செல்லும் வழியிலேயே வளர்மதி உயிரிழந்தார். இதனால், வளர்மதியின் உடலை மீண்டும் கரூருக்கு கொண்டு வந்து, தனியார் மருத்துவமனை முன் ஆர்ப்பாட்டம் நடத்த வளர்மதியின் உறவினர்கள் திட்டமிட்டனர். தகவல் அறிந்த போலீசார் வளர்மதி உடல் வந்த ஆம்புலன்ஸ் வேனை கரூர் - கோவை சாலை ரெட்டிபாளையத்தில் நிறுத்தி வைத்தனர்.
இதனால், ஆத்திரத்தில் இருந்த வளர்மதியின் உறவினர்கள் கரூரில் உள்ள தனியார் மருத்துவமனையை மாலை முற்றுகையிட்டனர். அவர்களிடம், மருத்துவமனை சார்பில், பேச்சுவார்த்தை நடத்தப்பட்டது. பிறகு, இது குறித்து புகார் கொடுத்ததால், மேல் நடவடிக்கை எடுக்கப்படும் என வளர்மதியின் உறவினர்களிடம் போலீசார் தெரிவித்தனர். இதைஅடுத்து, போராட்டத்தை கைவிட்டு களைந்து சென்றனர். அதை தொடர்ந்து ரெட்டிபாளையத்தில் வளர்மதி உடலுடன் நிறுத்தி வைக்கப்பட்டிருந்த ஆம்புலன்ஸ் வேன், அவரின் சொந்த ஊருக்கு புறப்பட்டு சென்றது.
அங்கு அவருக்கு இறுதிச் சடங்கு செய்தனர். இரண்டு வயதில் ஒரு பெண் குழந்தையை விட்டுவிட்டு வளர்மதி இறந்தது குடும்பத்தினர் மற்றும் உறவினர்களிடையே பெரும் சோகத்தை ஏற்படுத்தியுள்ளது. மேலும் வளர்மதி இறந்ததற்கு சரியான ஒரு தீர்வை வழங்க வேண்டும் என்று வளர்மதியின் உறவினர்கள் மற்றும் ஊர் பொதுமக்களால் எதிர்பார்க்கப்படுகிறது. கரூர் தனியார் மருத்துவமனையில் இச்சம்பவம் அரங்கேறியது என்பது கரூர் பொதுமக்களிடையே பெரும் அச்சத்தையும், பரபரப்பையும் ஏற்படுத்தியுள்ளது.