Vijay Tamilan Parthiban: அன்று விஜய் படத்தில் வாய்ப்பு.. இன்று அமைச்சரவையில் இடம்.. யார் இந்த சேலம் தமிழன் பார்த்திபன்?

Vijay Tamilan Parthiban TVK Minister: தமிழக அமைச்சரவையில் இடம்பெற்றுள்ள சேலம் தெற்கு தொகுதி எம்.எல்.ஏ. சேலம் தமிழன் பார்த்திபன், விஜயுடன் 3 படங்களில் நடித்துள்ளார். தற்போது அமைச்சராகவும் மாறியுள்ளார்.

அமைச்சர் விஜய் தமிழன் பார்த்திபன்

Source : ABP

தமிழக வெற்றிக் கழகத்தின் அமைச்சரவையில் சேலம் தெற்கு தொகுதி தவெக எம்.எல்.ஏ.,விஜய் தமிழன் பார்த்திபன் இடம்பெற்றுள்ளார். அவரின் பின்னணி பற்றிக் காணலாம். 

தமிழக அமைச்சரவை விரிவாக்கம்

தமிழ்நாட்டில் புதிதாக பொறுப்பேற்றுள்ள தமிழக வெற்றிக் கழகத்தின் அரசில் முதலமைச்சர் விஜய் மற்றும் 8 ஆண், ஒரு பெண் என 9 அமைச்சர்கள் கடந்த மே 10ம் தேதி பதவியேற்றனர். இந்த நிலையில் தமிழக அமைச்சரவை விரிவாக்கம் செய்யப்பட்டு 23 புதிய அமைச்சர்கள் இன்று பொறுப்பேற்றுக் கொண்டனர். இதில் 21 தமிழக வெற்றிக் கழக அமைச்சர்களும், 2 காங்கிரஸ் அமைச்சர்களும் பதவியேற்றுள்ளனர். இதன்மூலம் தமிழ்நாட்டில் முதல்முறையாக கூட்டணி ஆட்சி அமைந்துள்ளது. ஆளுநர் மாளிகையில் அமைச்சர்கள் பதவியேற்றுக் கொண்ட நிலையில் விரைவில் அவர்களுக்கான துறைகள் ஒதுக்கீடு செய்யப்படும் என சொல்லப்படுகிறது. 

சேலம் விஜய் தமிழன் பார்த்திபன் யார்?

இந்த நிலையில் தவெக எம்.எல்.ஏ., விஜய் தமிழன் பார்த்திபனுக்கு அமைச்சரவையில் இடம் கொடுக்கப்பட்டுள்ளது. 2026 ஆம் ஆண்டு தமிழ்நாடு சட்டமன்றத் தேர்தலில், சேலம் (தெற்கு) தொகுதியில் இருந்து தமிழக வெற்றிக் கழகம் சார்பில் விஜய் தமிழன் பார்த்திபன் களம் கண்டார். 12ம் வகுப்பு வரை படித்துள்ள இவர் எலக்ட்ரானிக்ஸ் தொழில் செய்து வருகிறார். விஜயின் தீவிர ரசிகராக இருந்து அவரின் ரசிகர் மன்றம், மக்கள் இயக்கம் மூலமாக தன்னுடைய அர்ப்பணிப்பை வெளிப்படுத்தி விஜயின் குட்புக்கில் விஜய் தமிழன் பார்த்திபன் இடம் பெற்றிருந்தார். 

சேலம் மாவட்டம் அம்மாபேட்டை பகுதியில் உள்ள கிருஷ்ணா நகரில் இவர் வசித்து வருகிறார். தமிழக வெற்றிக் கழகம் கட்சியை விஜய் தொடங்கிய நிலையில் விஜய் தமிழன் பார்த்திபன் சேலம் மாவட்டச் செயலாளராக பணியாற்றி வருகிறார். இவரை சேலம் தெற்கு தொகுதியில் வேட்பாளராக விஜய் நிறுத்தினார். தேர்தல் அறிவிப்பு முன்னர் ஒருமுறை விஜய் சேலம் சென்று பரப்புரை மேற்கொண்டார். இந்த தேர்தலில் திமுகவின் லோகநாதனை விட சுமார் 33,369 வாக்குகள் வித்தியாசத்தில் விஜய் தமிழன் பார்த்துபன் வெற்றி பெற்றார். 

அவர் அமைச்சரவையில் இடம்பெறுவார் என சொல்லப்பட்ட நிலையில், அதன்படியே அமைச்சராக பொறுப்பேற்றுள்ளார். இந்த நிலையில் விஜய் இவருக்கு தன்னுடைய கத்தி, ஜில்லா, கோட் ஆகிய படங்களில் சிறிய வேடங்களில் நடிக்க சான்ஸ் கொடுத்திருந்தார். 3 படங்களிலும் விஜய் தமிழன் பார்த்திபன் போலீஸ் கேரக்டரில் தான் நடித்திருப்பார். அந்த அளவுக்கு விஜய் தமிழன் பார்த்திபன் மீது விஜய் அளவு கடந்த பிரியம் வைத்திருந்தார். தற்போது தனது அமைச்சரவையிலும் இடம் கொடுத்து அன்பை வெளிக்காட்டியுள்ளார் என்பது குறிப்பிடத்தக்கது. 

இதையும் படிக்க

Minister Kamali: தமிழ்நாட்டின் இளம் மினிஸ்டர்.. தவெக MLA டூ அமைச்சர்.. யார் இந்த அவிநாசி கமலி?

வரலாற்றில் முதல் முறை.. தமிழக அரசில் 7 பட்டியலின அமைச்சர்கள்.. சாதனை செய்த விஜய்!