இந்திய ரூபாயின் மதிப்பு தொடர்ந்து வீழ்ச்சியைச் சந்தித்து வருவதாலும், இந்தியாவில் மெல்ல மெல்ல அதிகரிக்கும் பொருளாதார நெருக்கடியாலும், வேலையின்மையாலும் பலர் வெளிநாடுகளுக்கு வேலை தேடிச் செல்கின்றனர். இந்நிலையில், தமிழ் நாட்டில் இருந்து கம்போடியாவுக்கு வேலைக்காகச் சென்ற 400க்கும் மேற்பட்ட தமிழர்கள் துப்பாக்கி முனையில் உணவு கூட இல்லாமல் தவித்து வருவதாக கம்போடியாவில் இருந்து வந்த சையித் இப்ராகிம் எனும் இளைஞர் தெரிவித்துள்ள கருத்து பெரும் பரபரப்பை ஏற்படுத்தியுள்ளது. மேலும் அவர், ஷானவாஸ் எனும் புரோக்கர் மூலம் கம்போடியாவுக்கு வேலைக்கு 400க்கும் மேற்பட்ட தமிழர்கள் சென்றுள்ளதாகவும், அவர்கள் அனைவரும் தற்போது, சரியான உணவு இல்லாமல், துப்பாக்கி முனையில் சிறை பிடிக்கப்பட்டுள்ளதாக கூறினார். மேலும், தமிழ் நாட்டில் அழைத்துச் செல்லப்பட்ட அனைவரையும் தலா 4000 டாலர் என சீன மோசடி கும்பலிடம் விற்று விட்டதாகவும் அவர் கூறினார். இந்த தகவல் தமிழகத்தினையே பெரும் அதிர்ச்சிக்கு உள்ளாக்கியது.
இது குறித்து பாட்டாளி மக்கள் கட்சியின் முன்னாள் தலைவர் ராமதாஸ் தனது டிவிட்டர் பக்கத்தில், கம்போடியாவில் துப்பாக்கி முனையில் தவிக்கும் தமிழர்களை மீட்க வேண்டும் என தமிழ்நாடு அரசு மற்றும் மத்திய வெளியுறவுத்துறை அமைச்சர் ஆகியோரை டேக் செய்து பதிவிட்டுள்ளார்.
மேற்கொண்டு அந்த பதிவில், கம்போடியாவில் வேலை தேடிச் சென்ற தமிழ்நாட்டைச் சேர்ந்த 400 பேர் அங்குள்ள சட்டவிரோத கும்பலிடம் சிக்கியிருப்பதாகவும், பட்டினி, உடலில் மின்சாரத்தை பாய்ச்சுதல் உள்ளிட்ட கொடுமைகளை அவர்கள் அனுபவிப்பதாகவும் அவர்களிடமிருந்து தப்பி வந்த இளைஞர் கூறியிருப்பது அதிர்ச்சியளிக்கிறது! தாய்லாந்தில் வேலைக்காக அழைத்துச் செல்லப்பட்டு மியான்மருக்கு கடத்தி கொடுமைப்படுத்தப்பட்டு வரும் தமிழர்களில் இதுவரை 13 பேர் மட்டுமே மீட்கப்பட்டுள்ள நிலையில், அடுத்தக்கட்டமாக கம்போடியாவிலும் தமிழர்கள் ஏமாற்றப்பட்டு, கொடுமைபடுத்தப்படுவதை தாங்கிக் கொள்ள முடியவில்லை!
பல லட்சம் பணம் செலுத்தி வேலை தேடி கம்போடியாவுக்கு சென்ற தமிழர்களை, அங்குள்ள தமிழ்நாட்டைச் சேர்ந்த ஒருவரே சட்டவிரோத கும்பலிடம் விற்பனை செய்ததாக கூறப்படுகிறது. வேலை தருவதாகக் கூறி தமிழர்களை அழைத்து, கடத்தி விற்பதை ஒரு கும்பல் தொழிலாகவே செய்வதை புரிந்து கொள்ள முடிகிறது!
தமிழர்களை கடத்தி வைத்துள்ள சட்டவிரோத கும்பல் துப்பாக்கி உள்ளிட்ட ஆயுதங்களை வைத்திருப்பதாகவும், அவர்களிடம் பேச அங்குள்ள இந்திய தூதரக அதிகாரிகளே அஞ்சுவதாகவும் வெளியாகியுள்ள செய்திகள், அவர்களின் பாதுகாப்பு குறித்த அச்சத்தையும், கவலையையும் ஏற்படுத்தியுள்ளன!
கம்போடியாவில் கொடுமைகளுக்கு உள்ளாக்கப்பட்டு வரும் தமிழர்களை உடனடியாக மத்திய, மாநில அரசுகள் மீட்க வேண்டும். அவர்களை இங்கிருந்து அனுப்பியவர்கள், சட்டவிரோத கும்பலுக்கு விற்றவர்களையும் அடையாளம் கண்டு கைது செய்து தண்டனை பெற்றுத் தர வேண்டும் என பாட்டாளி மக்கள் கட்சியின் முன்னாள் தலைவர் ராமதாஸ் தனது டிவிட்டர் பக்கத்தில் குறிப்பிட்டுள்ளார்.