தமிழக வெற்றிக் கழகம்


பிப்ரவரி மாதம் 2-ஆம் தேதி கட்சியை தொடங்கியதாக அதிகாரப்பூர்வமாக அறிவித்தார், தமிழக வெற்றிக் கழகம் தலைவர் விஜய். இதையடுத்து, கடந்த ஆகஸ்ட் 22 ஆம் தேதி, கட்சி கொடி மற்றும் கட்சி பாடல் வெளியானது. மேலும், கட்சி கொள்கைகள் மற்றும்  கொடியில் உள்ள சின்னங்கள் தொடர்பான விளக்கங்களை , முதல் மாநாட்டில் தெரிவிப்பதாக அறிவித்திருந்தார். 


இந்நிலையில், விழுப்புரம் மாவட்டம் விக்கிரவாண்டி அருகே உள்ள வி.சாலை பகுதியில் தவெக மாநாடு நடைபெற்றது. மாநாட்டில் 110 உயரமுள்ள கொடி கம்பத்தில் கட்சி கொடி ஏற்றப்பட்டது. அதை தொடர்ந்து , கட்சி கொள்கை பாடல் வெளியானது. தொடர்ந்து கட்சியின் தலைவர் விஜய் அரசியல் வழிகாட்டிகள் யார் என்பது குறித்து பேசுகையில், பெரியார், அம்பேத்கர், காமராஜர், வேலுநாச்சியார், அஞ்சலையம்மாள் ஆகியோர் கட்சியின் அரசியல் வழிகாட்டிகளாக இருப்பார்கள் என விஜய் தெரிவித்தார்.


டாஸ்மாக் கடைகளில் மதுவாங்க குவிந்த தொண்டர்கள் 


தமிழக வெற்றிக்கழக மாநாடு கடந்த  27 ஆம் தேதி விக்கிரவாண்டி வி.சாலையில் ஞாயிற்று கிழமை நடைபெற்றது. அன்றைய தினத்தில் கன்னியாகுமார், தூத்துக்குடி, திருப்பூர், திருநெல்வேலி உள்ளிட்ட பல்வேறு மாவட்டங்களிலிருந்து ஏராளாமான தவெக நிர்வாகிகள் வி.சாலை பகுதிக்கு வாகனங்கள் மூலம் வருகை புரிந்தனர். இதனால் போக்குவரத்து நெரிசல் அதிகமாக காணப்பட்ட நிலையில் மது கடைகளில் அமோகமாக மது  விற்பனை நடைபெற்றுள்ளது. 


இவர்கள் அருகில் உள்ள டாஸ்மாக் கடைகளில் மதுவாங்க தொண்டர்கள் முண்டியடித்தனர். இந்நிலையில், த.வெ.க மாநாட்டையொட்டி 26 மற்றும் 27ம் தேதிகளில் மட்டும் விழுப்புரம், கள்ளக்குறிச்சி மாவட்டத்தில் ரூ. 10 கோடிக்கு மது விற்பனை நடைபெற்றுள்ளது. விழுப்புரம், கள்ளக்குறிச்சி மாவட்டத்தில் 220 டாஸ்மாக் கடைகள் செயல்பட்டு வருகின்றன.


சுமார் ரூ. 6 கோடிக்கு மது விற்பனையானதாக தகவல்


ஒவ்வொரு கடைகளிலும் நாளொன்றுக்கு ரூ. 2 முதல் ரூ. 3 லட்சத்திற்கு மது விற்பனை என ஒரு நாளைக்கு மொத்தமாக அதிகபட்சம் ரூ. 3.75 கோடி வரை மது விற்பனை நடைபெறுவது வழக்கம். மாநாடு நடைபெற்ற தினத்தில் ஒரு கோடியே 6 லட்சத்து 32 ஆயிரம் ரூபாய் அதிகரித்து, சுமார் ரூ. 6 கோடிக்கு மது விற்பனையானதாக தகவல்கள் வெளியாகி உள்ளன.


முன்னதாக மாநாடு நடைபெறும் முதல் நாள் ஆயிரக்கணக்கில் இளைஞர்கள் வந்ததாலும் மதுபானங்கள் அதிகமாக விற்பனை நடந்து உள்ளது. அதாவது கடந்த 26ம் தேதி 4 கோடியே 69 லட்சம் ரூபாய்க்கு மதுபானங்கள் விற்பனையானது. இரண்டு நாள் சேர்த்து ரூ. 10 கோடிக்கு மேல் விற்பனை ஆகி உள்ளது.


ரூ. 8 முதல் ரூ. 10 லட்சத்திற்கு பீர், பிராந்தி விற்பனை


விழுப்புரம் மாவட்டத்திற்கு வரும் வழியில் கள்ளக்குறிச்சியில் தொடங்கி உளுந்தூர்பேட்டை, விழுப்புரம், விக்கிவாண்டி டாஸ்மாக் கடைகளில் அதிகபட்சமாக ஒவ்வொரு கடைகளிலும் ரூ. 8 முதல் ரூ. 10 லட்சத்திற்கு பீர், பிராந்தி விற்பனையாகியுள்ளது. மாநாடுக்கு அருகில் இருந்த டாஸ்மாக் கடையில் வழக்கமாக ரூ. 1 லட்சத்து 80 ஆயிரம் மது விற்பனை நடைபெறும்.


தீபாவளி, பொங்கல் பண்டிகையைப்போல் பல மடங்கு மது விற்பனை


மாநாடு நடந்த அன்று ரூ. 8 லட்சத்துக்கு மேல் விற்பனை ஆகி உள்ளது. தீபாவளி, பொங்கல் பண்டிகையை போல் பல மடங்கு மது விற்பனை நடைபெற்றுள்ளது. இதேபோல் புதுச்சேரி எல்லையான திருக்கனூர், மதகடிப்பட்டு, மடுகரை உள்ளிட்ட பகுதிகளிலும் மது விற்பனை அன்றையதினம் அதிகரித்தது.