தமிழக அரசின் தொழில் முனைவோர் மேம்பாட்டு திட்டம் மூலம், இளைஞர்கள் மற்றும் பெண்கள், தங்கள் வாழ்வாதாரத்தை உயர்த்திக்கொள்ள பல்வேறு பயிற்சிகள் வழங்கப்படுகின்றன. அந்த வகையில், பல்வேறு தொழில்கள் குறித்து பயிற்சி வழங்குவதோடு, சான்றிதழ் மற்றும் வேலை வாய்ப்பு ஆலோசனைகளும் வழங்கப்படுகின்றன. அதன் ஒரு பகுதியாக, சென்னையில் தினை வகைகளைக் கொண்டு, பேக்கரி பொருட்கள் தயாரித்தல் பயிற்சி 4 நாட்களுக்கு வழங்கப்படுகிறது. 10-ம்  வகுப்பு கல்வித் தகுதி கொண்ட ஆண்கள் மற்றும் பெண்கள், இந்த பயிற்சிக்கு விண்ணப்பிக்கலாம்.

பயிற்சியின் விவரங்கள்

இந்த பயிற்சி தொடர்பாக வெளியிடப்பட்டுள்ள அறிவிப்பில், தமிழக அரசின் தொழில் முனைவோர் மேம்பாடு மற்றும் புத்தாக்க நிறுவனம், சென்னையில், 4 நாட்கள் தொழில் முனைவோர் மேம்பாட்டு திட்டம் மூலம், தினை வகைகளைக் கொண்டு, பேக்கரி பொருட்கள் தயாரித்தல் பயிற்சி வரும் 21.07.2025 முதல் 24.07.2025 தேதி வரை, காலை 9.30 மணி முதல் மாலை 6 மணி வரை நடைபெற உள்ளதாக தெரிவிக்கப்பட்டள்ளத. 

இந்த பயிற்சியில், ராகி நெய் குக்கீக்கள், சத்துமாவு, கோதுமை தேங்காய் குக்கீக்கள், முத்து சோக்கோ தினை(கம்பு) குக்கீக்கள், கோடோ முந்திரி தினை(வரகு) குக்கீக்கள், சிறிய முந்திரி தினை (சாமை) குக்கீகள், சோளம் பிஸ்தா குக்கீகள், பர்னார்ட் ஜீரா(குதிரைவாளி) குக்கீகள், மசாலா குக்கீகள், முழு கோதுமை ரொட்டி, பழ ரொட்டி, ராகி தினை ரொட்டி, பல தானிய ரொட்டி, ராகி சாக்கோ ரொட்டி, ராகி ப்ரவுனி, குதிரைவாலி தினை ப்ரவுனி, கருப்புகோவ்னி தினை ப்ரவுனி, பல தினை வால்நட் ப்ரவுனி, டேட்ஸ் தினை ப்ரவுனி, கோதுமை பிளம் கேக், ராகி சாக்லேட் கேக், ஜோவர் கேரட்(சோளம்) கேக், ஃபாக்ஸ்டெயில் மற்றும் டேட்ஸ்(தினை) கேக், வாழைப்பழம் வால்நட் கேக், தினை வெல்லம் வெண்ணெய் கேக், முழு கோதுமை பீட்சா, முழு கோதுமை பூண்டு ரொட்டி, ராகி கருப்பு காடு கேக், பட்டர் க்ரீம் ஃப்ரோஸ்டிங்குடன் தினை வெண்ணிலா கேக் வகைகளை எப்படி தயாரிப்பது என்பது குறித்து இந்த பயிற்சியில் விளக்குவார்கள். மேலும், தயாரிப்பு சந்தைப்படுத்துதலின் அம்சங்கள், பேக்கிங், லேபிளிங் மற்றும் அதற்கான விலை வழிமுறைகள் ஆகியனவும் கற்றுத்தரப்படும். அரசு வழங்கும் உதவிகள் மற்றும் மானியங்கள் ஆகியவை குறித்தும் விளக்கப்படும்.

விண்ணப்பிக்கும் விவரங்கள்

இந்த பயிற்சியில் பங்குபெற ஆர்வமுள்ள ஆண், பெண் தொழில் முனைவோர், 18 வயதுக்கு மேற்பட்டவர்களாக இருக்க வேண்டும். குறைந்தபட்ச கல்வித் தகுதி 10-ம் வகுப்புடன் விண்ணப்பிக்கலாம். இப்பயிற்சியில் பங்குபெறும் பயனாளிகளுக்கு, குறைந்த வாடகையில், குளிரூட்டப்பட்ட தங்கும் விடுதி வசதி உள்ளது. தேவைப்படுபவர்கள் இதற்கு விண்ணப்பித்து பெற்றுக் கொள்ளலாம். இப்பயிற்சி பற்றிய கூடுதல் விவரங்களை தெரிந்துகொள்ள விரும்புவோர், www.editn.in என்ற இணையதள முகவரியில் தெரிந்து கொள்ளலாம்.

இந்த பயிற்சி முடிந்த உடன், அரசு சான்றிதழும் வழங்கப்படும் என தெரிவிக்கப்பட்டுள்ளது. தொழில் முனைவோர் ஆக விரும்பும் ஆண்கள், பெண்கள் இந்த நல்ல வாய்ப்பை பயன்படுததிக்கொள்ளலாம்.