TN Cabinet: எடப்பாடிக்கு சவாலா..! கல்விக் கடன் ரத்து - இன்றைய அமைச்சரவைக் கூட்டத்தில் ஸ்டாலின் முடிவு?

TN Cabinet CM Stalin: முதலமைச்சர் ஸ்டாலின் தலைமையில் தமிழ்நாடு அமைச்சரவை கூட்டம் இன்று நடைபெற உள்ளது.

முதலமைச்சர் ஸ்டாலின்

Source : X

TN Cabinet CM Stalin: பட்ஜெட் தொடர்பாகவும், எடப்பாடிக்கு சவால் விடுக்கும் வகையிலான தேர்தல் அறிக்கைகள் குறித்தும் அமைச்சரவை கூட்டத்தில் விவாதிக்கப்படும் என எதிர்பார்க்கப்படுகிறது.

தமிழ்நாடு அமைச்சரவைக் கூட்டம்

தமிழ்நாடு சட்டமன்ற தேர்தல் நடைபெற உள்ளதை முன்னிட்டு, திமுக தலைமையிலான அரசு இடைக்கால பட்ஜெட்டை தயார்படுத்தி வருகிறது. விரைவில் சட்டமன்றத்திலும் தாக்கல் செய்யப்பட உள்ள நிலையில், அதை முன்னிட்டு இன்று முதலமைச்சர் ஸ்டாலின் தலைமையில் அமைச்சரவைக் கூட்டம் திட்டமிடப்பட்டுள்ளது. இதில் பட்ஜெட்டில் இடம்பெற வேண்டிய முக்கிய திட்டங்கள், தேர்தலை கருத்தில் கொண்டு அறிவிக்கப்பட வேண்டிய திட்டங்கள், எந்த திட்டங்கள் மூலம் மக்களுக்கு நேரடி பலன் கிடைக்கும், இடைக்கால பட்ஜெட்டில் எந்த துறைகளுக்கு முக்கியத்துவம் அளிக்க வேண்டும் என்பது குறித்து விவாதிக்கப்பட உள்ளதாம்.

பட்ஜெட்டில் கூடுதல் சலுகைகளா?

கடைசியாக நடைபெற்ற அமைச்சரவை கூட்டத்திற்குப் பிறகு தமிழ்நாட்டில் தொழில் தொடங்க விண்ணப்பித்த பல நிறுவனங்களுக்கு, இந்த அமைச்சரவைக் கூட்டத்தில் ஒப்புதல் அளிக்கப்பட உள்ளது. இதுபோக தேர்தலை மையமாக கொண்டு பட்ஜெட்டில் என்ன மாதிரியான திட்டங்களுக்கு முன்னுரிமை அளிக்கலாம்? மகளிர் உரிமைத்தொகையை உயர்த்தி வழங்குவது, மக்களுக்கு நேரடியாக பணப்பலன் கிடைக்கும் வகையிலான புதிய திட்டங்கள் குறித்தும் விவாதிக்கப்படலாம் என எதிர்பார்க்கப்படுகிறது. பெண்கள், வேலையில்லா இளைஞர்கள், விவசாயிகள் மற்றும் நலிவடைந்த மக்களுக்கான புதிய திட்டங்களும் பரிசீலிக்கப்படலாம் என எதிர்பார்க்கப்படுகிறது.

எடப்பாடிக்கு சவாலா?

சட்டமன்ற தேர்தல் நெருங்கி வரும் நிலையில், பிரதான எதிர்க்கட்சியான அதிமுக அதிரடியான பல தேர்தல் வாக்குறுதிகளை அறிவித்து வருகிறது. மாணவர்களுக்கான கல்விக் கடன் இலவசம், ஆண்டுக்கு மூன்று சிலிண்டர்கள் இலவசம், கூட்டுறவு வங்கிகளில் மாற்றுத்திறனாளிகளுக்கான கடன் தள்ளுபடி, ஆண்களுக்கும் இலவச பேருந்து பயணம் என கவனத்தை ஈர்கக் கூடிய பல அறிவிப்புகளை eடப்பாடி பழனிசாமி வெளியிட்டுள்ளார். இதனை ஈடுகட்டும் வகையிலான அறிவிப்புகள் குறித்தும், முதலமைச்சர் ஸ்டாலின் இன்றைய அமைச்சரவை கூட்டத்தில் விவாதிப்பார் என கூறப்படுகிறது. குறிப்பாக, மாணவர்களின் கல்விக் கடன் ரத்து என்பது, கடந்த 2021ம் ஆண்டு வெளியான திமுகவின் தேர்தல் வாக்குறுதிகளில் ஒன்றாகும். ஆனால்,தற்போது வரை அது நிறைவேற்றப்படவில்லை என்பது குறிப்பிடத்தக்கது. எனவே, ஆட்சி அமைந்தால் அதிமுக தள்ளுபடி செய்யும் என்றும் வாக்குறுதியை தவிடுபொடியாக்க, தேர்தல் அறிக்கையின்படி உடனடியாக கல்விக் கடனை திமுக தள்ளுபடி செய்யுமா? என்பதே தற்போதைய எதிர்பார்ப்பாக உள்ளது.

முக்கியத்துவம் வாய்ந்த இடைக்கால பட்ஜெட்

தற்போதைய திமுக அரசு தாக்கல் செய்ய உள்ள கடைசி பட்ஜெட் இதுவாகும். இதன் மூலமே தேர்தல் அறிவிப்பிற்கு முன்பாகவே, அதிரடியான திட்டங்களை அறிவித்து வாக்காளர்களிடையே கவனத்தை ஈர்க்க திமுக முனைப்பு காட்டி வருகிறதாம். அதன்படி, பல அதிரடியான திட்டங்கள் இந்த இடைக்கால பட்ஜெட்டில் இடம்பெறக்கூடும் என எதிர்பார்க்கப்படுகிறது.