அமெரிக்க வரி விதிப்பால் திருப்பூர் அதிர்ச்சி! ரூ.3000 கோடி இழப்பு: முதல்வர் ஸ்டாலின் அவசர கோரிக்கை!

தமிழ்நாட்டின் ஜவுளி தலைநகரமான திருப்பூர் இதனால் கடுமையாக பாதிக்கப்பட்டு வருகிறது. இதைக் குறிப்பிட்ட முதல்வர் ஸ்டாலின், மத்திய அரசுக்குக் கோரிக்கை விடுத்துள்ளார். 

முதல்வர் ஸ்டாலின், ஆயத்த ஆடை

Source : சிறப்பு ஏற்பாடு

அமெரிக்கா இந்தியாவின் மீது விதித்துள்ள 50 சதவீத வரி விதிப்பால், திருப்பூரில் 3 ஆயிரம் கோடி ரூபாய் வரை இழப்பு ஏற்படுவதாகவும் உடனடியாக நிவாரணம் வழங்கவும் முதல்வர் ஸ்டாலின் வலியுறுத்தி உள்ளார்.

இதுகுறித்து இன்று அவர் வெளியிட்டுள்ள எக்ஸ் பதிவில், ’’அமெரிக்கா, இந்தியா மீது விதித்துள்ள வரி 50% ஆக உயர்த்தப்பட்டிருப்பது தமிழ்நாட்டின் ஏற்றுமதியை கடுமையாகப் பாதித்துள்ளது. குறிப்பாக ஜவுளி மையமான திருப்பூரில் கிட்டத்தட்ட ரூ.3,000 கோடி வர்த்தகப் பாதிப்பை ஏற்படுத்தியுள்ளது.

மேலும் ஆயிரக்கணக்கான வேலைகள் ஆபத்தில் உள்ளன. எனவே நமது தொழில்கள் மற்றும் தொழிலாளர்களைப் பாதுகாக்க உடனடி நிவாரணம் மற்றும் கட்டமைப்பு சீர்திருத்தங்களைக் கொண்டு வரக் கோரி மத்திய அரசை வலியுறுத்துகிறேன்’’ என்று தெரிவித்துள்ளார்.

நடந்தது என்ன?

இந்தியா ரஷ்ய நாட்டிடம் இருந்து கச்சா எண்ணெயை வாங்குவதாலேயே உக்ரைன் - ரஷ்யா போரில், ரஷ்யாவுக்கு அதிக நிதியுதவி கிடைப்பதாக அமெரிக்கா குற்றம்சாட்டி வருகிறது. இதனால் ரஷ்யாவிடம் இருந்து எந்த பொருளையும் இறக்குமதி செய்யக்கூடாது என்று அமெரிக்க அதிபர் ட்ரம்ப் எச்சரிக்கை விடுத்தார். 

எனினும் இந்தியா தொடர்ந்து ரஷ்யாவிடம் இருந்து கச்சா எண்ணெயை இறக்குமதி செய்து வருகிறது. இதை எதிர்த்து ட்ரம்ப், இந்தியப் பொருட்களுக்கு 50 சதவீத வரி விதித்துள்ளார். அவர் அறிவித்த 50 சதவிகித வரியானது, நேற்று (ஆக. 27) நள்ளிரவு முதல் இந்திய பொருட்கள் மீது அமலுக்கு வந்துள்ளது.

கடும் பின்னடைவு

இதனால், உள்நாட்டு ஏற்றுமதியாளர்கள் கடும் பின்னடைவைச் சந்திப்பார்கள் என கணிக்கப்பட்டுள்ளது. இதற்கான மாற்று வழியை ஏற்படுத்த வேண்டும் என்பதே, மத்திய அரசிடம் வணிகர்கள் தற்போது முன்வைக்கும் கோரிக்கையாக உள்ளது.

இந்த நிலையில், தமிழ்நாட்டின் ஜவுளி தலைநகரமான திருப்பூர் இதனால் கடுமையாக பாதிக்கப்பட்டு வருகிறது. இதைக் குறிப்பிட்ட முதல்வர் ஸ்டாலின், மத்திய அரசுக்குக் கோரிக்கை விடுத்துள்ளார்.