100 அடி கம்பத்தில் பறந்த கொடி... தமிழகத்தின் புதிய முதல்வராக விஜய் பதவியேற்பு !

தமிழக முதல்வராக விஜய் பதவியேற்பு: வி.சாலையில் 100 அடி உயரக் கொடியேற்றி தவெக தொண்டர்கள் பிரம்மாண்ட கொண்டாட்டம்!

100அடி உயர கொடிக்கம்பத்தில் பறந்த புதிய கொடி

Source : WhatsApp

விழுப்புரம்: தமிழக அரசியல் களத்தில் பெரும் எதிர்பார்ப்புகளுக்கு மத்தியில், தமிழக வெற்றிக் கழகத்தின் தலைவர் விஜய் இன்று தமிழகத்தின் முதல்வராகப் பதவியேற்ற நிலையில் தமிழகம் முழுவதும் அக்கட்சியினர் உற்சாகக் கொண்டாட்டங்களில் ஈடுபட்டு வருகின்றனர்.

தமிழக அரசியல் வரலாற்றில் ஒரு முக்கிய திருப்பமாக, தமிழக வெற்றி கழகத்தின் (தவெக) தலைவர் விஜய் இன்று தமிழக முதல்வராகப் பதவியேற்றார். இதையொட்டி தமிழகம் முழுவதும் அக்கட்சித் தொண்டர்கள் உற்சாகமாகக் கொண்டாடி வரும் நிலையில், அக்கட்சியின் முதல் மாநாடு நடைபெற்ற விழுப்புரம் மாவட்டம் விக்கிரவாண்டி அடுத்த வி.சாலையில் தொண்டர்கள் பிரம்மாண்ட கொண்டாட்டங்களில் ஈடுபட்டனர்.

​வெற்றி சாலையாக மாறிய வி.சாலை

​தேர்தல் முடிவுகளில் ஆட்சி அமைப்பதற்கான பெரும்பான்மை இடங்களைப் பெறுவதில் நிலவிய நீண்ட இழுபறிக்குப் பிறகு, தற்போது விஜய் முதல்வராகப் பொறுப்பேற்கிறார். தனது அரசியல் பயணத்தின் முதல் அடியை எடுத்து வைத்த மாநாடு நடைபெற்ற வி.சாலை திடல், தற்போது 'வெற்றி சாலையாக' மாறியுள்ளதாகத் தொண்டர்கள் நெகிழ்ச்சியுடன் தெரிவித்தனர்.
​

ஆஞ்சநேயர் கோயிலில் சிறப்புப் பூஜை
​

கொண்டாட்டத்தின் ஒரு பகுதியாக, மாநாட்டு திடல் அருகே அமைந்துள்ள வீர ஆஞ்சநேயர் கோயிலில் தவெக தொண்டர்கள் திரண்டனர். தமிழகத்தின் முதல்வராகப் பொறுப்பேற்கும் விஜய்யின் பெயரில் சிறப்பு அர்ச்சனைகளும், கட்சி வெற்றிக்கான சிறப்புப் பூஜைகளும் நடத்தப்பட்டன. கட்சியின் கொடியை வைத்து வழிபாடு செய்த பின், தொண்டர்கள் அங்கிருந்து ஊர்வலமாகப் புறப்பட்டனர்.

​100 அடி கம்பத்தில் பறந்த 40 அடி கொடி

​கோயிலில் இருந்து தவெக கொடியை ஏந்தியபடி ஊர்வலமாக வந்த தொண்டர்கள், மாநாடு நடைபெற்ற திடலில் உள்ள 100 அடி உயரக் கொடி கம்பத்தில், 40 அடி நீளம் கொண்ட பிரம்மாண்டமான கட்சித் கொடியினை ஏற்றினர். கொடி உயரே பறந்தபோது தொண்டர்கள் ஆரவாரம் செய்து தங்களின் மகிழ்ச்சியை வெளிப்படுத்தினர்.
​உற்சாக முழக்கங்கள் மற்றும் இனிப்பு வழங்கல்

​கொடியேற்ற நிகழ்வின் போது, தொண்டர்கள் உணர்ச்சிப்பூர்வமான கோஷங்களை எழுப்பினர்:
​"கடமை ஏற்போம்.. கடமை ஏற்போம்.. மக்கள் பணி செய்வதைக் கடமை ஏற்போம்!" ​"நன்றி தெரிவிப்போம்.. நன்றி தெரிவிப்போம்.. தமிழக மக்களுக்கு நன்றி தெரிவிப்போம்!" இந்த முழக்கங்கள் அந்தப் பகுதி முழுவதும் எதிரொலித்தன. இதனைத் தொடர்ந்து, பொதுமக்களுக்கும் வழிப்போக்கர்களுக்கும் இனிப்புகளை வழங்கிய தொண்டர்கள், தங்களின் தலைவரின் பதவியேற்பு விழாவை ஒரு திருவிழாவைப் போலக் கொண்டாடி மகிழ்ந்தனர்.