TN Election 2026: 20 தொகுதிகளில் பாஜகவின் நிலைமை..! ஆட்டம் போடும் டெல்லி, டான்ஸ் ஆடும் களநிலவரம் - 2026 எப்படி?

TN Assembly Election 2026 BJP: தமிழ்நாடு சட்டமன்ற தேர்தல் நெருங்கி வரும் நிலையில், 2021 பொதுத்தேர்தலின் போது பாஜக போட்டியிட்ட தொகுதிகளின் முடிவுகள் குறித்து இந்த தொகுப்பில் அறியலாம்.

தமிழ்நாடு சட்டமன்ற தேர்தல் 2026

Source : ABP

TN Assembly Election 2026 BJP: கடந்த 2021ம் ஆண்டு தமிழ்நாடு சட்டமன்ற தேர்தலில், பாஜக போட்டியிட்ட தொகுதிகள், பெற்ற வாக்கு சதவிகிதம் உள்ளிட்ட விவரங்கள் கீழே பட்டியலிடப்பட்டுள்ளன.

சட்டமன்ற தேர்தல் 2026:

தமிழ்நாடு சட்டமன்ற தேர்தலுக்கான தேதி நெருங்கிக் கொண்டுள்ளது. திமுக கூட்டணி, அதிமுக கூட்டணி, நாம் தமிழர் கட்சி மற்றும் தமிழக வெற்றிக் கழகம் என, நான்கு முனை போட்டி நிலவுவது கிட்டத்தட்ட உறுதியாகிவிட்டது. கூட்டணியில் எப்படியும் கடந்த முறையை காட்டிலும் கூடுதல் தொகுதிகளை பெற்று விட வேண்டுமென, தேசிய கட்சிகள் தொடங்கி சிறிய மாநில கட்சிகள் கூட முனைப்பு காட்டி வருகின்றன. குறிப்பாக மத்தியில் ஆளுங்கட்சியாக உள்ள பாஜக, அதிமுக கூட்டணியில் கடந்த முறை போட்டியிட்டதை காட்டிலும் கூடுதல் தொகுதிகளில் தான் இந்தமுறை போட்டியிட வேண்டும் என்பதில் தீர்மானமாக உள்ளதாக கூறப்படுகிறது. இதற்கான தனது அத்தனை பலத்தையும் பயன்படுத்தவும் டெல்லி தலைமை தயாராக உள்ளதாம். இந்நிலையில், 2021ம் ஆண்டில் பாஜக போட்டியிட்ட தொகுதிகள், களமிறங்கிய வேட்பாளர்கள், வெற்றியாளர்கள் மற்றும் பெற்ற வாக்கு சதவிகிதம் குறித்து இந்த தொகுப்பில் அறியலாம்.

அதிமுக ஒதுக்கிய 20 தொகுதிகள்:

கடந்த 2021 சட்டமன்ற தேர்தலின்போது பாமகவிற்கு அடுத்தபடியாக அதிமுக கூட்டணியில் இருந்த, மிகப்பெரிய கட்சியாக பாஜக கருதப்பட்டது. அதன்படி அந்த கட்சிக்கு 20 தொகுதிகள் ஒதுக்கப்பட்டன. தமிழ்நாடு அரசியலில் பாஜகவிற்கு இது மிகப்பெரிய முன்னேற்றமாக கருதப்பட்டது. ஆனால், முடிவுகள் டெல்லி தலைமை எதிர்பார்த்ததை போல அமையவில்லை. போட்டியிட்ட இடங்களில் ஐந்தில் ஒரு பங்கில் மட்டுமே வெற்றி பெற முடிந்தது. மேலும், புதியதாக தொடங்கப்பட்டு இருந்த மக்கள் நீதி மய்யம் கட்சிக்கு இணையான, 2.62 சதவிகித வாக்குகளை மட்டுமே பெற்று இருந்தது.

பாஜகவின் வெற்றி வேட்பாளர்கள்

தொகுதி	வேட்பாளர்கள்	பெற்ற வாக்குகள்	வாக்கு வித்தியாசம்	முடிவுகள்
கோயம்புத்தூர் தெற்கு	வானதி ஸ்ரீனிவாசன்	53,209	1,540	வெற்றி
திருநெல்வேலி	நயினார் நாகேந்திரன்	92,282	23,402	வெற்றி
நாகர்கோவில்	எம்.ஆர். காந்தி	88,804	11,669	வெற்றி
மொடக்குறிச்சி	சி. சரஸ்வதி	78,125	281	வெற்றி

மண்ணை கவ்விய 16 வேட்பாளர்கள்

தொகுதிகள்	வேட்பாளர்கள்	பெற்ற வாக்குகள்	தோல்வியில் வாக்கு வித்தியாசம்	வெற்றியாளர்
சென்னை துறைமுகம்	வினோஜ் பி. செல்வம்	32,043	27,274	சேகர்பாபு, திமுக
ஆயிரம் விளக்கு	குஷ்பு சுந்தர்	39,405	32,462	எழிலன், திமுக
அரவக்குறிச்சி	அண்ணாமலை	68,553	24,816	இளங்கோ, திமுக
தாராபுரம் (தனி)	எல்.முருகன்	88,063	1393	கயல்விழி, திமுக
காரைக்குடி	எச். ராஜா	54,365	21,589	மாங்குடி, காங்கிரஸ்
வடக்கு மதுரை	சரவணன்	50,094	22,916	தளபதி, திமுக
தளி	நாகேஷ்குமார்	64,415	56,226	ராமச்சந்திரன், சிபிஐ
ஊட்டி	போஜராஜன்	60,182	5,348	ஆர். கணேஷ், காங்கிரஸ்
திருவண்ணாமலை	தனிகைவேல்	43,203	94,673	எ.வ. வேலு, திமுக
திருக்கோயிலூர்	கலிவர்தன்	51,300	59,680	பொன்முடி, திமுக
திட்டக்குடி	பெரியசாமி	62,163	21,563	சி.வி. கணேசன் திமுக
திருவையாறு	பூண்டி எஸ். வெங்கடேசன்	49,560	53,650	துரை சந்திரசேகரன், திமுக
விருதுநகர்	பாண்டுரங்கன்	51,958	21,339	சீனிவாசன், திமுக
ராமநாதபுரம்	குப்புராம்	60,603	50,479	காதர்பாட்ஷா முத்துராமலிங்கம், திமுக
குளச்சல்	ரமேஷ்	65,849	24,832	ப்ரின்ஸ்,காங்க்லிரஸ்
விளவங்கோடு	ஜெயசீலன்	58,804	28,69	விஜயதாரணி, காங்கிரஸ்

ஆட்டம் போடும் டெல்லி..

கடந்த தேர்தலில் 14 இடங்களில் திமுக உடன் நேரடியாக போட்டியிட்டு, வெறும் 3 இடங்களில் மட்டுமே வெற்றி பெற்றது. வெற்றி பெற்றவர்களில் கூட நயினார் நாகேந்திரன் மற்றும் காந்தி ஆகியோர் மட்டுமே குறிப்பிடத்தக்க அளவிலான வாக்கு வித்தியாசத்தில் எதிராளியை வீழ்த்தியுள்ளனர். சரஸ்வதி மற்றும் வானதி ஸ்ரீனிவாசன் ஆகியோர் மிகவும் கணிசமான வாக்கு வித்தியாசத்திலேயே வெற்றியை வசப்படுத்தியுள்ளனர். அந்த எண்ணிக்கையை மேலும் அதிகரிக்க, பாஜக கூடுதல் தொகுதிகளில் போட்டியிட வேண்டும் என டெல்லி தலைமை தீவிரமாக முயன்று வருகிறது. அதன்மூலம் வாக்கு சதவிகதத்தை அதிகரித்து, மாநிலத்தில் பலமான தேசிய கட்சி எனவும் நிரூபிக்க பார்க்கிறது.

டான்ஸ் ஆடும் களநிலவரம்

அதேநேரம், அதிமுக கூட்டணி இல்லாவிட்டால் பாஜக இன்னும் தமிழ்நாட்டில் ஒர் பலவீனமாக கட்சியாகவே உள்ளது. அதற்கு உதாரணமாக தான் 2024 நாடாளுமன்ற தேர்தல் அமைந்தது. அதிமுக கூட்டணியிலிருந்து விலகி தனது தலைமையில் சுயமாக கூட்டணி 23 தொகுதிகளில் பாஜக களம் கண்டது. ஆனால், அதில் 10 தொகுதிகளில் பாஜக வேட்பாளர்கள் டெபாசிட் கூட வாங்கமுடியாமல் படுதோல்வி கண்டனர். ஆனாலும், தங்கள் கட்சி தமிழ்நாட்டில் வளர்ந்துவிட்டது என வலுவாக பேசி, அதிமுகவிடமிருந்து கூடுதல் தொகுதிகளை பெற பாஜக முனைப்பு காட்டி வருகிறது. புதிய கட்சிகளின் ஆதரவு ஏதுமின்றி, கடந்த 2021ம் ஆண்டு கூட்டணி அதிமுகவில் அப்படியே தொடர்கிறது. அப்ப்டி இருந்தும் பாஜக தனது வெற்றியை மேலும் விரிவுபடுத்துமா? என்பதை பொறுத்து இருந்து தான் பார்க்க வேண்டும்.