முதலமைச்சர் விஜயை கண்டித்து சென்னையில் நடந்த ஆர்ப்பாட்டத்தில் திமுக அமைப்புச் செயலாளர் ஆர்.எஸ்.பாரதி உள்ளிட்டோர் அவரை தரக்குறைவாக விமர்சித்த சம்பவம் சர்ச்சையைக் கிளப்பியுள்ளது. 

Continues below advertisement

சட்டமன்றத்தில் முதலமைச்சர் விஜய், மிசா காலம் பற்றி பேசும்போது திமுக தலைவர் மு.க.ஸ்டாலினை குறித்து கூறிய கருத்துகள் கடும் சர்ச்சையானது. இதற்கு திமுக கடும் எதிர்ப்பு தெரிவித்தது. இந்த நிலையில் முதல்வர் விஜயின் ஆணவப்பேச்சைக் கண்டித்து மாவட்ட தலைநகரங்களில் திமுகவினர் இன்று ஆர்ப்பாட்டத்தில் ஈடுபட்டனர். இதில் சென்னை சைதாப்பேட்டையில் நடைபெற்ற ஆர்ப்பாட்டத்தில் மா.சுப்பிரமணியன், ஆர்.எஸ்.பாரதி,சேகர்பாபு, மேயர் பிரியா, தமிழச்சி தங்கபாண்டியன், ஆ.ராசா, எழிலன் உள்ளிட்ட பலரும் கலந்து கொண்டனர். 

Continues below advertisement

இந்நிகழ்வில் பேசிய ஆர்.எஸ்.பாரதி, “இந்த கண்டன கூட்டம் சட்டமன்றத்தில் முதலமைச்சர் விஜய் மாண்புகளை மறந்து, மரியாதை இழந்து பேசியுள்ளார். நாயை குளிப்பாட்டி நடுவீட்டில் வைத்தால் அது ஏதோ செய்யும் என கூறுவதைப் போல சட்டமன்றத்திற்கு துரதிஷ்டவசமாக தமிழ்நாடு மக்களால் அனுப்பப்பட்ட விஜய், தன்னுடைய பழைய புத்தியை காட்டும் வகையில் பேசியுள்ளார். திமுகவில் இருக்கும் கடைசி தொண்டனும் கொதித்தெழுந்துள்ளனர். சட்டமன்றத்தில் விஜய் பேசிவிட்டு சென்ற பிறகு எத்தனை தொலைபேசி அழைப்புகள் எனக்கு வந்தது தெரியுமா?.. அதில் பேசியவர்கள் எல்லாரும் கதறி கதறி அழுதார்கள். திமுக தொண்டர்கள் மட்டுமல்லாமல் அரசியல் பண்பு தெரிந்தவர்கள் கூட முதலமைச்சர் விஜயின் பேச்சை வேதனையோடு பேசினார்கள். இதனை எப்படி தாங்குவது, எத்தனை நாட்களுக்கு தாங்குவது என வயிற்றெரிச்சலோடு சொன்னார்கள். 

விஜயை ஓடுகாலி என சேகர்பாபு சொன்னார். நான் ஓட்ட கால் என சொல்கிறேன். அவரை நேராக ஓடச் சொல்லுங்கள் பார்க்கலாம். இந்த மாதிரி எங்களுக்கும் பேச தெரியும். திமுகவினரை பேச விட்டால் நீ தாங்க மாட்டாய் என சொல்லிக் கொள்கிறேன். மிசாவை பற்றி பேசும் யோக்கியதை விஜய்க்கு அறவே கிடையாது. இன்றைய இளம் தலைமுறையினருக்கு மிசா காலக்கட்டம் பற்றி தெரியாது. எவனோ எழுதிக் கொடுத்ததை விஜய் பேசியுள்ளார். தமிழக அரசின் அதிகாரிகள் எல்லாரும் 60க்கு கீழ் தான் இருக்க வேண்டும். அவர்கள் மிசா காலத்தை நேரடியாக பார்த்தவர்கள் கிடையாது. ஆனால் நான் நேரில் பார்த்துள்ளேன் என ஆர்.எஸ்.பாரதி தெரிவித்துள்ளார். 

தொடர்ந்து திமுக எம்பி ஆ.ராசா பேசும்போது, முதலமைச்சர் விஜய்க்கு கொழுப்பு என்பது மூளையில் இருக்கிறதா?.. கேட்ட கேள்விக்கு பதில் சொல்ல முடியாதா?.. நீ தற்குறியாக இருந்தாலும் ஒரு முதலமைச்சராக உன்னை நான் மதிக்கிறேன். சட்டமன்றத்தில் அநாகரிகமாக விஜய் பேசுகிறார். திமுக ஆட்சியில் நடந்தால் அது சட்டம் ஒழுங்கு பிரச்னை. தவெக ஆட்சியில் நடந்தால் அது தனிநபர் பிரச்னை என சொல்கிறார் என தெரிவித்துள்ளார்.