தள்ளுவண்டி கடைகளால் பெருச்சாளி தொல்லை, நோய் அபாயம்; முதல்வர் விஜய்க்கு பாஜக முக்கிய கோரிக்கை!
சென்னையில் நாளுக்கு நாள் அதிகரித்து வரும் தெருவோர உணவு தள்ளுவண்டி கடைகள் குறித்தும் அரசு தீவிர கவனம் செலுத்த வேண்டியது அவசியமாகி உள்ளது- பாஜக.
தெருவோர உணவு தள்ளுவண்டி கடைகளால் பெருச்சாளி தொல்லை உருவாகி உள்ளதாகவும் அவற்றை அகற்றுவதற்கு பதிலாக உணவுக் கட்டுப்பாட்டு மையம் அமைக்க வேண்டும் எனவும் முதல்வர் விஜய்க்கு பாஜக கோரிக்கை விடுத்துள்ளது.
இதுகுறித்து பாஜக தொண்டு நிறுவனங்கள் பிரிவு மாநிலத் தலைவர் அர்ஜூன மூர்த்தி தனது எக்ஸ் பக்கத்தில் கூறி உள்ளதாவது:
’’தமிழக மாநில முதலமைச்சர் ஜோசப் விஜய் முயற்சியால் மக்கள் முகம் சுளித்த 717 டாஸ்மாக் கடைகள் அகற்றப்பட்டிருப்பது மகிழ்ச்சியளிக்கிறது. பொதுமக்களின் மனநிலையை உணர்ந்து செயல்படும் இந்த முயற்சிக்கு எனது மனமார்ந்த வாழ்த்துக்கள்.
குடியிருப்பு பகுதிகளில் பெருச்சாளி தொல்லை
அதேபோல், சென்னையில் நாளுக்கு நாள் அதிகரித்து வரும் தெருவோர உணவு தள்ளுவண்டி கடைகள் குறித்தும் அரசு தீவிர கவனம் செலுத்த வேண்டியது அவசியமாகி உள்ளது. பல இடங்களில் பகல் மற்றும் இரவு நேரங்களில் இயங்கும் இத்தகைய கடைகள் காரணமாக குடியிருப்பு பகுதிகளில் பெருச்சாளி தொல்லை அதிகரித்து வருகிறது.
மேலும் வீடுகளின் முன்பாக அதிகளவில் கார்கள் மற்றும் இருசக்கர வாகனங்கள் நிறுத்தப்படுவதால் பொதுமக்கள் தங்களது வீட்டிற்குள் வாகனங்களை நிறுத்த முடியாமல் சிரமப்படுவதுடன், தேவையற்ற சண்டை சச்சரவுகளும் உருவாகின்றன.
உடல்நலப் பாதிப்பு அபாயம்
இதனுடன், போதிய உணவு சுகாதார கட்டுப்பாடுகள் இல்லாமல் உணவு விற்பனை செய்யப்படுவதால் பொதுமக்கள் உடல்நலப் பாதிப்புகளுக்கும் ஆளாகும் அபாயம் உள்ளது.
உணவு கட்டுப்பாட்டு மையங்கள்
ஆகையால், தெருவோர உணவகங்களை முழுமையாக அகற்றுவதற்குப் பதிலாக, சிங்கப்பூர் போன்ற முன்னேறிய நகரங்களில் உள்ளதைப் போல சுகாதார கட்டுப்பாடுகளுடன், போக்குவரத்திற்கும் குடியிருப்பு பகுதிகளுக்கும் இடையூறு இல்லாத வகையில் “உணவு கட்டுப்பாட்டு மையங்கள்” (Food Courts / Hawker Centres) அமைக்கும் திட்டத்தை தமிழக அரசு பரிசீலிக்க வேண்டுகிறேன்.
நகர வளர்ச்சியும், பொதுச் சுகாதாரமும், சிறு வியாபாரிகளின் வாழ்வாதாரமும் சமநிலையுடன் பாதுகாக்கப்படும் ஒரு நிர்வாக மாதிரியை தமிழக அரசு உருவாக்க வேண்டும் என்பதே மக்களின் எதிர்பார்ப்பு என்று அர்ஜூன மூர்த்தி தெரிவித்துள்ளார்.
Before You Go
Bungee Jumping Accident | உயிரைப் பறித்த BUNGEE JUMPING! கயிறு கட்ட மறந்த ஊழியர்கள்..பரிதாபமாக உயிரிழந்த பெண்
தலைப்பு செய்திகள்
ட்ரெண்டிங் செய்திகள்
