மாணவிகளைப் பேருந்திலிருந்து தள்ளிவிட்ட கொடூரம்: புதுக்கோட்டை சம்பவத்தைக் கண்டித்து கனிமொழி ஆவேசம்!

புதுக்கோட்டையில் இறங்க மறுத்த மாணவிகளை பேருந்திலிருந்து கீழே தள்ளிவிட்டது மனித நேயமற்ற கொடூரச் செயலாகும் - கனிமொழி

கனிமொழி எம்பி

புதுக்கோட்டையில் மாணவிகள் கீழே தள்ளிவிடப்பட்ட சம்பவத்துக்கு திமுக எம்பி கனிமொழி கடும் கண்டனம் தெரிவித்துள்ளார்.

இதுதொடர்பாக அவர் தனது எக்ஸ் தளப்பக்கத்தில் பதிவிட்டிருப்பதாவது:

புதுக்கோட்டை அருகே பள்ளி செல்லும் பழங்குடியின மாணவிகள், அரசு பேருந்திலிருந்து கீழே தள்ளிவிடப்பட்டு, படுகாயமடைந்த சம்பவம் அதிர்ச்சியளிக்கிறது. பேருந்தில் கூட்டம் அதிகமாக இருப்பதாகக் கூறி, நடத்துநரும் ஓட்டுநரும் மாணவிகளை பேருந்திலிருந்து இறக்கிவிட முயன்றதும், மறுத்த மாணவிகளை கீழே தள்ளிவிட்டதும் மனிதநேயம் அற்ற கொடூரச் செயல்.

 

கல்வி கற்கச் செல்லும் குழந்தைகள் மீதே தீண்டாமைக் கொடுமையை நிகழ்த்தும் அளவுக்கு, சாதி என்னும் மனநோயால் இச்சமூகம் இன்னும் பாதிக்கப்பட்டிருப்பது வெட்கித் தலைகுனிய வேண்டிய அவலம்.

சிகிச்சை பெற்று வரும் மாணவிகளுக்குத் தேவையான அனைத்து உதவிகளையும் அரசு வழங்குவதோடு, உரிய விசாரணை நடத்தி, இச்சம்பவத்திற்குக் காரணமானவர்கள் மீது எந்தவித சமரசமுமின்றி உடனடியாக கடும் சட்ட நடவடிக்கை எடுக்க வேண்டும். இவ்வாறு அவர் கூறியுள்ளார்.

இதனிடையே, இந்த விவகாரம் தொடர்பாக போக்குவரத்துறை விளக்கமளித்துள்ளது. புதுக்கோட்டை அருகே அரசு பேருந்தின் தானியங்கி கதவு திறந்ததால், ஓடும் பேருந்தில் கீழே விழுந்த 10 மாணவிகள் காயமடைந்தனர். இதுதொடர்பாக ஓட்டுநர், நடத்துநர் சஸ்பெண்ட் செய்யப்பட்டுள்ளனர். கதவுக்கு மேல் இருக்கும் எமர்ஜென்சி பட்டனை பயணி ஒருவர் அழுத்தியதால் தனியங்கி கதவு திறந்ததாகவும் புதுக்கோட்டை அரசு போக்குவரத்து கழக பொதுமேலாளர் விளக்கமளித்துள்ளார்.