புதுச்சேரி: வடகிழக்கு பருவமழை தொடங்க உள்ள நிலையில், மழை மற்றும் பலத்த காற்றால் ஏற்படக்கூடிய விபத்துகளைத் தடுக்கும் வகையில், புதுச்சேரி மாநிலத்தில் பேனர், கட்-அவுட், ஹோர்டிங், ஃப்ளெக்ஸ் போர்டு, வளைவு உள்ளிட்ட தற்காலிக விளம்பர அமைப்புகளை அமைக்க மாவட்ட பேரிடர் மேலாண்மை ஆணையம் தடை விதித்துள்ளது.
வடகிழக்கு பருவமழை காலங்களில் பலத்த காற்று, கனமழை உள்ளிட்ட இயற்கை இடர்பாடுகள் ஏற்பட வாய்ப்புள்ளதால், சாலையோரங்கள் மற்றும் பொதுமக்கள் அதிகம் கூடும் பகுதிகளில் அமைக்கப்படும் தற்காலிக விளம்பர கட்டமைப்புகள் பாதுகாப்பு அச்சுறுத்தலை ஏற்படுத்தக்கூடும். குறிப்பாக, பலத்த காற்றின்போது பேனர்கள் மற்றும் கட்-அவுட்கள் சாய்ந்து விழுவதால் உயிரிழப்பு, காயம் மற்றும் வாகனப் போக்குவரத்து பாதிப்பு ஏற்படும் அபாயம் உள்ளது.
புதிய விளம்பர அமைப்புகளுக்கு உடனடி தடை
இதனை கருத்தில் கொண்டு, செப்டம்பர் 29-ஆம் தேதி முதல் புதுச்சேரி மாநிலத்தில் புதிதாக பேனர், கட்-அவுட், ஹோர்டிங், ஃப்ளெக்ஸ் போர்டு, வளைவு உள்ளிட்ட தற்காலிக விளம்பர அமைப்புகளை நிறுவுவதற்கு தடை விதிக்கப்பட்டுள்ளது.
இந்த தடை வடகிழக்கு பருவமழை முடியும் வரை அல்லது மாவட்ட பேரிடர் மேலாண்மை ஆணையத்தால் மறு உத்தரவு பிறப்பிக்கப்படும் வரை அமலில் இருக்கும் என தெரிவிக்கப்பட்டுள்ளது.
ஏற்கனவே வைக்கப்பட்ட பேனர்களையும் அகற்ற உத்தரவு
புதிதாக விளம்பர அமைப்புகளை வைப்பதற்கு தடை விதிக்கப்பட்டுள்ளதுடன், ஏற்கனவே சாலைகள், தெருக்கள் மற்றும் பொது இடங்களில் வைக்கப்பட்டுள்ள பேனர்கள், கட்-அவுட்கள், ஹோர்டிங்ஸ் உள்ளிட்ட தற்காலிக விளம்பர அமைப்புகளையும் உடனடியாக அகற்ற வேண்டும் என சம்பந்தப்பட்ட நபர்கள் மற்றும் அமைப்புகளுக்கு உத்தரவிடப்பட்டுள்ளது.
இதன் மூலம் பருவமழை காலத்தில் காற்றின் வேகம் அதிகரிக்கும் போது விளம்பரப் பலகைகள் சாய்ந்து விழுவதால் ஏற்படும் விபத்துகளை முன்கூட்டியே தடுக்க முடியும் என அதிகாரிகள் தெரிவித்துள்ளனர்.
கண்காணிக்க சிறப்பு குழுக்கள்
தடை உத்தரவு முறையாக அமல்படுத்தப்படுகிறதா என்பதை கண்காணிக்க, நகராட்சிகள், கொம்யூன் பஞ்சாயத்துகள், பொதுப்பணித்துறை மற்றும் காவல்துறை சார்பில் சிறப்பு குழுக்கள் அமைக்கப்பட்டுள்ளன.
இந்த குழுக்கள் தங்களது பகுதிகளில் விதிமீறி அமைக்கப்படும் விளம்பரப் பலகைகள் மற்றும் ஏற்கனவே அகற்றப்படாமல் உள்ள தற்காலிக விளம்பர அமைப்புகளை கண்காணித்து நடவடிக்கை எடுக்க உள்ளன.
முன்னறிவிப்பின்றி அகற்ற நடவடிக்கை
தடை உத்தரவை மீறி பேனர், கட்-அவுட், ஹோர்டிங் உள்ளிட்டவை அமைக்கப்பட்டிருந்தால், சம்பந்தப்பட்டவர்களுக்கு முன்னறிவிப்பு வழங்காமல் அவற்றை அகற்றவும் அதிகாரிகளுக்கு உத்தரவிடப்பட்டுள்ளது.
மேலும், அதிகாரிகள் மேற்கொள்ளும் அகற்றும் பணிக்கான செலவினத்தையும் சம்பந்தப்பட்ட நபர்கள் அல்லது அமைப்புகளிடமே வசூலிக்க நடவடிக்கை எடுக்கப்படும் என தெரிவிக்கப்பட்டுள்ளது.
பேரிடர் மேலாண்மைச் சட்டத்தின் கீழ் நடவடிக்கை
இந்த தடை உத்தரவை மீறுபவர்கள் மீது பேரிடர் மேலாண்மைச் சட்டத்தின் கீழ் உரிய நடவடிக்கை எடுக்கப்படும் என மாவட்ட பேரிடர் மேலாண்மை ஆணையம் எச்சரித்துள்ளது.
வடகிழக்கு பருவமழை காலத்தில் பொதுமக்களின் பாதுகாப்பை உறுதி செய்வதற்காகவே இந்த நடவடிக்கை மேற்கொள்ளப்பட்டுள்ளதால், அரசின் உத்தரவுக்கு பொதுமக்கள், அரசியல் கட்சிகள், சமூக அமைப்புகள், வணிக நிறுவனங்கள் உள்ளிட்ட அனைத்து தரப்பினரும் ஒத்துழைக்க வேண்டும் என அதிகாரிகள் அறிவுறுத்தியுள்ளனர்.
பருவமழை காலத்தில் பேனர், கட்-அவுட் உள்ளிட்ட விளம்பர அமைப்புகள் காற்றில் சாய்ந்து விழுவதால் ஏற்படக்கூடிய உயிரிழப்பு மற்றும் போக்குவரத்து பாதிப்புகளைத் தடுக்கும் வகையில் புதுச்சேரியில் இந்த தடை உத்தரவு முக்கிய பாதுகாப்பு நடவடிக்கையாக பார்க்கப்படுகிறது.