புதுச்சேரி: புதுச்சேரி மூலகுளம் பகுதியில் உள்ள பில்லாபாங் ஹை இன்டர்நேஷனல் பள்ளியில் 2-ம் வகுப்பு படித்து வரும் மாணவர் மாஸ்டர் என். ஆதித்யா, தனது அபாரமான நினைவாற்றல் மற்றும் தனித்திறமையால் மூன்று பிரிவுகளில் உலக சாதனை முயற்சியில் ஈடுபட்டு அனைவரையும் வியப்பில் ஆழ்த்தியுள்ளார்.
சிறு வயதிலேயே பொது அறிவு, நினைவாற்றல் மற்றும் கவனத்திறனில் சிறந்து விளங்கி வரும் மாணவர் ஆதித்யா, பல்வேறு வித்தியாசமான சாதனைகளை நிகழ்த்தி வருகிறார். அதன் தொடர்ச்சியாக, ஒரே நாளில் மூன்று வெவ்வேறு பிரிவுகளில் புதிய உலக சாதனை முயற்சியை மேற்கொண்டார். இதன்படி, முதல் முயற்சியாக 150 பொது அறிவுக் கேள்விகளுக்கு வெறும் 3 நிமிடம் 32 விநாடிகளில் பதிலளித்து தனது அபார நினைவாற்றலை வெளிப்படுத்தினார்.
இரண்டாவது முயற்சியாக, வாய்மொழி விளக்கங்களைக் கேட்டே 100 வகையான உயிரினங்களை 2 நிமிடம் 25 விநாடிகளில் அடையாளம் கண்டு பதிலளித்தார். மூன்றாவது முயற்சியாக, நிழல் உருவப் படங்களைப் பார்த்து 100 வகையான உயிரினங்களை வெறும் 53 விநாடிகளில் அடையாளம் கண்டு கூறி அசத்தினார்.
இந்த சாதனை முயற்சியின்போது, திமுக சட்டமன்ற உறுப்பினர் விக்னேஷ்கண்ணன், மாணவர் ஆதித்யாவிடம் பல்வேறு கேள்விகளை மாற்றி மாற்றிக் கேட்டார். அப்போதும் எவ்விதத் தயக்கமுமின்றி அனைத்து கேள்விகளுக்கும் சரியான பதில்களை அளித்து தனது திறமையை நிரூபித்தார். மாணவரின் உடனடி பதில்களும், அபாரமான ஞாபக சக்தியும் அங்கிருந்தவர்களை வியப்பில் ஆழ்த்தின.
இந்த நிகழ்ச்சியில் போக்குவரத்துக் காவல் கண்காணிப்பாளர் ரச்சனா சிங், பள்ளியின் முதல்வர் ஆரோக்கியராஜ், ஆசிரியர்கள், மாணவர்கள் உள்ளிட்ட பலர் கலந்துகொண்டு ஆதித்யாவின் சாதனை முயற்சியைப் பாராட்டினர்.
இந்த மூன்று சாதனை முயற்சிகளும் சர்வதேச சாதனை அமைப்புகளான International Book of Records மற்றும் World Records of Excellence ஆகியவற்றின் அங்கீகாரத்திற்காக நடத்தப்பட்டன. இளம் வயதிலேயே இத்தகைய அபாரமான நினைவாற்றல், கவனத்திறன் மற்றும் பொது அறிவுத் திறனை வெளிப்படுத்திய மாணவர் ஆதித்யாவுக்கு பள்ளி நிர்வாகம், ஆசிரியர்கள் மற்றும் பெற்றோர்கள் பாராட்டுகளையும் வாழ்த்துகளையும் தெரிவித்தனர்.
சிறு வயதிலேயே தனது தனித்திறமையால் மூன்று பிரிவுகளில் உலக சாதனை முயற்சியில் ஈடுபட்டு புதுச்சேரிக்குப் பெருமை சேர்த்துள்ள மாணவர் ஆதித்யாவின் சாதனை முயற்சி பலரது கவனத்தையும் ஈர்த்துள்ளது.