காஞ்சிபுரம் வரதராஜ பெருமாள் கோவில் வைகாசி பிரம்மோற்சவம்: வெட்டிவேர் சப்பரத்தில் பெருமாள் வீதி உலா!

"காஞ்சிபுரம் வரதராஜ பெருமாள் கோவில் வைகாசி பிரம்மோற்சவத்தில் நிறைவு விழாவை முன்னிட்டு பெருமாள் வீதி உலா நடைபெற்றது."

காஞ்சிபுரம் வரதராஜப் பெருமாள் கோவில்

Source : ABPLIVE AI

108 வைணவ திவ்ய தேசங்களில் ஒன்றானதும், உலகப் பிரசித்தி பெற்ற அத்தி வரதர் ஆலயம் என அழைக்கப்படுவதுமான காஞ்சிபுரம் அருள்மிகு வரதராஜ பெருமாள் திருக்கோவிலின் வருடாந்திர வைகாசி பிரம்மோற்சவ பெருவிழா நேற்று இரவுடன் மிகச் சிறப்பாக நிறைவடைந்தது.

கொடியேற்றத்துடன் தொடங்கிய பிரம்மோற்சவம்

இவ்விழாவானது கடந்த மே மாதம் 28-ஆம் தேதி அன்று திருக்கோவில் கொடிமரத்தில் முறைப்படி கொடியேற்றத்துடன் விமரிசையாகத் தொடங்கியது. அதனைத் தொடர்ந்து, விழா நாட்களின் முக்கிய நிகழ்வுகளான உலகப் புகழ்பெற்ற கருட சேவை உற்சவம் மே 30-ஆம் தேதியும், லட்சக்கணக்கான பக்தர்கள் வடம் பிடித்து இழுத்த திருத்தேர் உற்சவம் ஜூன் 3-ஆம் தேதியும் , மற்றும் தீர்த்தவாரி உற்சவம் ஜூன் 5-ஆம் தேதியும் பக்தி பரவசத்துடன் நடைபெற்று முடிந்தன.

பிரம்மோற்சவத்தின் பத்து நாட்களும் வரதராஜ பெருமாள் நாள்தோறும் காலை மற்றும் மாலை என இரு வேளைகளிலும், வெவ்வேறு விதமான வாகனங்களில் எழுந்தருளி காஞ்சிபுரம் நகரின் ராஜ வீதிகளில் வலம் வந்து பல்லாயிரக்கணக்கான பக்தர்களுக்கு அருள் பாலித்தார்.

மணமிக்க வெட்டிவேர் சப்பரத்தில் சுவாமி புறப்பாடு

விழாவின் நிறைவு நாளான நேற்று, வரதராஜ பெருமாளுக்கு சிறப்பு அபிஷேக ஆராதனைகள் மற்றும் பூஜைகள் நடைபெற்றன. அதனைத் தொடர்ந்து, ஸ்ரீதேவி மற்றும் பூதேவி தாயார்களுடன் வண்ணமயமான மலர்களாலும், மணமிக்க வெட்டிவேரினாலும் பிரத்யேகமாக வடிவமைக்கப்பட்ட மண்டபம் போன்ற சப்பரத்தில் பேரருளாளன் எழுந்தருளினார்.

பக்தி கோஷங்களுடன் மாடவீதி உலா

மங்கள இசை ஒலிக்க, பேண்டு வாத்தியங்கள் மற்றும் மேளதாள நாதஸ்வர வாத்தியங்கள் முழங்க பெருமாளின் வீதி உலா தொடங்கியது. பஜனை கோஷ்டியினர் பக்தி பாடல்களைப் பாடி வர, வேத விற்பன்னர்கள் வேத பாராயணம் செய்ய சன்னதி வீதி மற்றும் மாட வீதிகளில் பெருமாள் மெதுவாக உலா வந்தார்.

வெட்டிவேர் சப்பரத்தில் கம்பீரமாக காட்சியளித்த வரதராஜ பெருமாளை தரிசிக்க, வீதிகளின் இருபுறமும் திரளான பக்தர்கள் நீண்ட வரிசையில் காத்திருந்தனர். சுவாமி தங்கள் பகுதிக்கு வந்தபோது, கற்பூர ஆரத்தி காண்பித்து, தேங்காய், பழம் படைத்து பக்தி பெருக்கோடு வணங்கி வழிபட்டனர்.

கொடியிறக்கத்துடன் விழா இனிதே நிறைவு

மாட வீதிகளை வலம் வந்த வெட்டிவேர் சப்பரம், இரவில் மீண்டும் திருக்கோவிலை வந்தடைந்தது. அதனைத் தொடர்ந்து, பிரம்மோற்சவ தொடக்கத்தின் போது ஏற்றப்பட்ட கருடாழ்வார் முத்திரை பதிக்கப்பட்ட கொடியினை, கோவில் பட்டாச்சாரியார்கள் வேத மந்திரங்கள் முழங்க முறைப்படி இறக்கி வைத்தனர். கொடியிறக்க நிகழ்வைத் தொடர்ந்து, இந்த ஆண்டிற்கான வைகாசி பிரம்மோற்சவ பெருவிழா நேற்று இரவுடன் முறைப்படி நிறைவு பெற்றது. விழா ஏற்பாடுகளை கோவில் நிர்வாகத்தினரும், உபயதாரர்களும் சிறப்பாக செய்திருந்தனர். விழா நடைபெற்ற 10 நாட்களும் காஞ்சிபுரம் மாநகரமே விழாக்கோலம் பூண்டிருந்தது குறிப்பிடத்தக்கது.