தஞ்சாவூர்: தமிழகத்தில் கிடுகிடுவென உயர்ந்து வரும் அரிசி விலையால் ஏழை, நடுத்தரக் குடும்பங்கள் அதிர்ச்சியில் உறைந்துள்ளன. குறிப்பாக, சன்னரக அரிசியின் விலை விண்ணை முட்டும் நிலையில், குடும்ப பட்ஜெட்டில் துண்டு விழாமல் தடுக்க முடியாமல் இல்லத்தரசிகள் தவித்து வருகின்றனர். சந்தையில் அரிசி விலையைக் கட்டுப்படுத்துவதும், தட்டுப்பாடின்றி வரத்தை உறுதி செய்வதும் தமிழக அரசுக்கு உடனடி சவாலாக உருவெடுத்துள்ளது.
தமிழகத்தில் அத்தியாவசிய உணவுப் பொருளான அரிசியின் விலை கடந்த சில மாதங்களாகத் தொடர்ந்து உயர்ந்து வருவது பொதுமக்களிடையே அதிர்ச்சியை ஏற்படுத்தியுள்ளது. குறிப்பாக, பொன்னி, கர்நாடகா பொன்னி உள்ளிட்ட சன்னரக அரிசிகளின் விலை கணிசமாக உயர்ந்துள்ளதால், மாதாந்திர மளிகைச் செலவைக் கட்டுப்படுத்த முடியாமல் குடும்பத் தலைவிகள் தவித்து வருகின்றனர்.
சில ரக அரிசிகள் கிலோ ரூ.75 முதல் ரூ.90 வரை விற்பனை செய்யப்படும் நிலையில், விலையைக் கட்டுப்படுத்த தமிழக அரசு கூட்டுறவு மற்றும் அமுதம் அங்காடிகள் மூலம் கிலோ ரூ.30-க்கு சன்னரக அரிசி விற்பனை செய்யும் திட்டத்தைத் தொடங்கியுள்ளது. இந்த அரிசி சில இடங்களில் தரம் மிகவும் மோசமாக உள்ளதாக பொதுமக்கள் குற்றமும் சாட்டி வருகின்றனர்.
கிலோவுக்கு ரூ.20 முதல் ரூ.27 வரை உயர்வு
தமிழகத்தில் கடந்த ஜூலை மாதம் முதல் அக்டோபர் மாதம் வரையிலான காலகட்டத்தில் அரிசி விலையில் குறிப்பிடத்தக்க உயர்வு ஏற்பட்டுள்ளதாக வணிகர்கள் தரப்பில் தெரிவித்துள்ளனர். அக்டோபர் 11-ம் தேதி வரை மாநிலத்தில் பல்வேறு ரக அரிசிகளின் விலை கிலோவுக்கு ரூ.20 முதல் ரூ.27 வரை உயர்ந்துள்ளது. இதனால் அரிசி வாங்கும் ஒவ்வொரு குடும்பத்திற்கும் கூடுதல் செலவு ஏற்பட்டுள்ளது. முக்கியமாக நடுத்தர குடும்பத்தினரின் பட்ஜெட்டில் மிகப்பெரிய பள்ளமே ஏற்படும் அளவில் இந்த விலை உயர்வு அமைந்துள்ளது.
குறிப்பாக, சன்னரக மற்றும் உயர்தர அரிசி வகைகளின் விலை அதிகரித்திருப்பது சந்தையில் முக்கியப் பேசுபொருளாக மாறியுள்ளது. அக்டோபர் 12-ம் தேதி வெளியான விலை விவரங்களின்படி, 26 கிலோ கொண்ட சூப்பர் சன்னரக அரிசி மூட்டையின் விலை ரூ.1,720-ல் இருந்து ரூ.1,950 ஆக உயர்ந்துள்ளது. அதாவது, ஒரே மூட்டைக்கு ரூ.230 அதிகரித்துள்ளது.
இதேபோல், 26 கிலோ கொண்ட சன்னரக அரிசி மூட்டையின் விலை ரூ.1,500-ல் இருந்து ரூ.1,640 ஆக உயர்ந்துள்ளது. இதில் ரூ.140 அதிகரித்துள்ளது. இந்த விலை மாற்றங்கள் சில்லறை விற்பனை சந்தையில் அரிசி வாங்கும் பொதுமக்களுக்கு கூடுதல் சுமையை ஏற்படுத்தியுள்ளன.
எந்த அரிசி எவ்வளவு விலை?
சூப்பர் சன்னரக அரிசி- ரூ.75 / கிலோ26 கிலோ மூட்டை ரூ.1,950; முன்பு ரூ.1,720.
சன்னரக அரிசிசுமார் ரூ.63 / கிலோ26 கிலோ மூட்டை ரூ.1,640; முன்பு ரூ.1,500.
புழுங்கல் பொன்னி அரிசிசுமார் ரூ.73/ கிலோ26 கிலோ மூட்டை ஜூலையில் சுமார் ரூ.1,400; அக்டோபரில் ரூ.1,900.
பல்வேறு உயர்தர பொன்னி ரகங்கள்ரூ.75–ரூ.90 / கிலோ
இந்த விலை கடை, தரம், பிராண்ட், விற்பனைப் பகுதி ஆகியவற்றைப் பொறுத்து உண்மையான சில்லறை விலையில் மாற்றம் உள்ளது.
விலை உயர்வுக்கு என்ன காரணம்?
அரிசி விலை உயர்வுக்குப் பின்னால் பல காரணங்கள் இருப்பதாக வணிகர்கள் மற்றும் அரிசி ஆலை உரிமையாளர்கள் கூறுகின்றனர்.
நெல் வரத்து குறைவு: தமிழகத்தில் போதிய மழையின்மை, பாசனப் பாதிப்புகள் மற்றும் சில பகுதிகளில் குறைந்த மகசூல் காரணமாக நெல் வரத்து பாதிக்கப்பட்டுள்ளது. ஆந்திரப் பிரதேசம், தெலங்கானா, கர்நாடகா உள்ளிட்ட பக்கத்து மாநிலங்களில் இருந்தும் எதிர்பார்த்த அளவுக்கு நெல் மற்றும் அரிசி கிடைக்காதது சந்தையில் தாக்கத்தை ஏற்படுத்தியுள்ளது.
சென்னை, மதுரை, கோவை போன்ற நகரங்களில் சன்னரக மற்றும் உயர்தர அரிசிக்கான தேவை அதிகமாக உள்ளது. இந்தத் தேவைக்கு ஏற்ற அளவில் வரத்து இல்லாதபோது விலை உயர்வதற்கான வாய்ப்பு அதிகரிக்கிறது.
2026 செப்டம்பர் 1 முதல் தமிழகத்தில் நெல்லுக்கான கொள்முதல் விலை உயர்த்தப்பட்டுள்ளது. சன்னரக நெல்லுக்கு குவிண்டாலுக்கு ரூ.2,750 என்றும், பொது ரக நெல்லுக்கு ரூ.2,600 என்றும் நிர்ணயிக்கப்பட்டுள்ளது. அரசு கொள்முதல் மையங்களில் விவசாயிகள் அதிக அளவில் நெல்லை விற்பனை செய்ததும், தனியார் அரிசி ஆலைகளுக்குக் கிடைக்கும் நெல் அளவில் தாக்கத்தை ஏற்படுத்தியிருக்கலாம் எனத் தொழில்துறையினர் கூறுகின்றனர்.
உரம், எரிபொருள், தொழிலாளர் கூலி உள்ளிட்ட செலவுகள் அதிகரித்திருப்பதும் அரிசி உற்பத்தி மற்றும் விற்பனைச் செலவுகளை உயர்த்தும் காரணிகளாகக் கூறப்படுகின்றன. அதோடு, 25 கிலோ வரையிலான முன்பொதியிடப்பட்ட, முன்அச்சிடப்பட்ட விலை விவரங்களைக் கொண்ட அரிசிப் பைகளுக்கு விதிக்கப்படும் 5 சதவீத ஜி.எஸ்.டி.யையும் விலை உயர்வுடன் தொழில்துறையினர் தொடர்புபடுத்துகின்றனர்.
கிலோ ரூ.30-க்கு அரிசி: தமிழக அரசின் அதிரடி நடவடிக்கை
சந்தையில் அரிசி விலை உயர்ந்து வரும் நிலையில், பொதுமக்களின் சுமையைக் குறைக்க தமிழக அரசு மானிய விலையில் சன்னரக அரிசி விற்பனையைத் தொடங்கியுள்ளது.
அக்டோபர் 17-ம் தேதி தொடங்கப்பட்ட இந்தத் திட்டத்தின் கீழ், அக்டோபர் 18-ம் தேதி மாநிலம் முழுவதும் 201 கூட்டுறவு விற்பனை நிலையங்கள் மற்றும் 49 அமுதம் அங்காடிகள் என மொத்தம் 250 இடங்களில் அரிசி விற்பனை செய்ய ஏற்பாடு செய்யப்பட்டுள்ளது. முதற்கட்டமாக 25,000 மெட்ரிக் டன் அரிசி கிலோ ரூ.30 என்ற விலையில் விற்பனைக்குக் கொண்டு வரப்பட்டுள்ளது. தேவையைப் பொறுத்து, ஒரு நுகர்வோர் அதிகபட்சமாக 5 கிலோ வரை வாங்கலாம்.
இதன் மூலம், வெளிச்சந்தையில் கிலோ ரூ.75 முதல் ரூ.90 வரை விற்கப்படும் சில உயர்தர அரிசி வகைகளுடன் ஒப்பிடும்போது, குடும்பங்கள் குறைந்த விலையில் அரிசி வாங்குவதற்கான வாய்ப்பு உருவாகியுள்ளது. மேலும், ஒரு லட்சம் மெட்ரிக் டன் உயர்தர அரிசியைக் கொள்முதல் செய்ய அரசு திட்டமிட்டுள்ளதாகவும் தெரிய வந்துள்ளது. இந்த ரூ.30 சன்னரக அரிசி பல இடங்களில் மோசமான நிலையில் இருந்துள்ளது. இதை பல இடங்களில் பொதுமக்கள் வேதனையுடன் குற்றம்சாட்டி உள்ளனர். சில இடங்களில் அரிசியின் தரம் நன்றாக உள்ளதாகவும் தகவல்கள் வெளியாகி உள்ளது.
பொங்கல் அறுவடை வரை விலை குறையுமா?
தமிழகத்தில் செப்டம்பர் முதல் நவம்பர் வரையிலான இடைப்பட்ட காலத்தில், குறுவை அறுவடைக்குப் பிறகும் சம்பா அறுவடை தொடங்குவதற்கு முன்பும் அரிசி விலையில் வழக்கமாக ஓரளவு உயர்வு ஏற்படுவது உண்டு. இந்த ஆண்டு சன்னரக அரிசி விலை உயர்வு வழக்கத்தைவிட அதிகமாக இருப்பதாகத் தொழில்துறையினர் கூறுகின்றனர்.
தமிழகத்தின் ஆண்டு அரிசித் தேவை சுமார் 91 லட்சம் மெட்ரிக் டன் எனக் கணக்கிடப்படுகிறது. இதில் 70 முதல் 75 லட்சம் மெட்ரிக் டன் வரை மாநிலத்திலேயே உற்பத்தி செய்யப்படுகிறது. மீதமுள்ள தேவைக்கு பக்கத்து மாநிலங்களைச் சார்ந்திருக்க வேண்டியுள்ளது. எனவே, தமிழகத்தின் உள்ளூர் உற்பத்தி மட்டுமின்றி வெளிமாநில வரத்தும் விலையை நிர்ணயிப்பதில் முக்கியப் பங்கு வகிக்கிறது.
சம்பா அறுவடை முடிந்து ஜனவரி மாதத்திற்குப் பிறகு நெல் வரத்து அதிகரித்தால் விலை உயர்வு தணிய வாய்ப்புள்ளதாகத் தொழில்துறைப் பிரதிநிதிகள் நம்பிக்கை தெரிவித்துள்ளனர்.
குடும்ப பட்ஜெட்டில் என்ன தாக்கம்?
ஒரு குடும்பம் மாதம் 25 கிலோ அரிசி வாங்குவதாகக் கணக்கிட்டால், கிலோவுக்கு ரூ.20 கூடுதலாகச் செலுத்த வேண்டிய நிலை ஏற்பட்டால் மாதச் செலவு ரூ.500 அதிகரிக்கும். கிலோவுக்கு ரூ.27 உயர்ந்திருந்தால் கூடுதல் செலவு ரூ.675 ஆகும். அரிசி விலை உயர்வு என்பது குடும்பங்களின் உணவுச் செலவை மட்டுமின்றி, உணவகங்கள், சிறிய உணவகங்கள், விடுதிகள் மற்றும் உணவு தயாரிப்பு நிறுவனங்களின் செலவுகளையும் பாதிக்கக்கூடும். மொத்தத்தில், தமிழகத்தில் அரிசி விலை உயர்வுக்குப் பல காரணங்கள் இருந்தாலும், சன்னரக அரிசியின் வரத்து மற்றும் விலையைக் கட்டுப்படுத்துவது உடனடி சவாலாக உள்ளது.