ஓடும் ரயிலில் தாக்குதல் நடத்தினால் 3 ஆண்டுகள் சிறை தண்டனை விதிக்கப்படும் என ரயில்வே ஏடிஜிபி வனிதா எச்சரிக்கை விடுத்துள்ளார்.
கடந்த சில தினங்களுக்கு முன்பு சமூக வலைத்தளத்தில் வைரலாக வீடியோ ஒன்று பரவியது. அதில் ஓடும் ரயில் ஒன்றில் வடமாநிலத்தைச் சேர்ந்த இருவரை ஒரு நபர் பயங்கரமாக தாக்கும் காட்சிகள் இடம் பெற்றிருந்தது. தாக்குவது மட்டுமின்றி அந்த இளைஞர்களிடம் நீங்கள் எதற்கு இங்கே வருகிறீர்கள். நாங்கள் தான் இருக்கிறோமே, நாங்க எல்லா வேலையும் செய்து கொள்வோம் என கூறி மோசமான வார்த்தைகளை பயன்படுத்தி திட்டுவதும் அந்த வீடியோவில் பதிவாகியிருந்தது.
வீடியோவை அடிப்படையாக கொண்டு சென்னை சென்ட்ரல் ரயில்வே காவல்துறையினர் ஆபாசமாக பேசுதல், காயம் ஏற்படுத்துதல் உட்பட 3 பிரிவுகளின் கீழ் வழக்குப்பதிவு செய்தனர். ஆனால் விவரம் எதுவும் தெரியாமல் இருந்ததால் இளைஞர்களை தாக்கிய நபரை தேடப்படும் குற்றவாளியாகவும் அறிவித்தது. மேலும் சம்பந்தப்பட்ட நபர் குறித்து தகவல் அளிப்பவர்களுக்கு தக்க சன்மானம் அளிக்கப்படும் என தெரிவிக்கப்பட்டது.
இந்நிலையில் பொதுமக்கள் அளித்த தகவலின் அடிப்படையில் விழுப்புரம் மாவட்டம் கானை கிராமத்தைச் சேர்ந்த மகிமைதாஸ் என்பவரை போலீசார் கைது செய்துள்ளனர். இவர் கோயம்பேடு மார்க்கெட்டில் கூலி தொழிலாளியாக பணியாற்றி வருகிறார். கடந்த பிப்ரவரி 9 ஆம் தேதி வைகை எக்ஸ்பிரஸ் ரயிலில் விருதாச்சலம் செல்லும் போது மகிமை தாஸ் அந்த இளைஞர்களை தாக்கியதும் கண்டுபிடிக்கப்பட்டது. அவர் மீது சில வழக்குகள் உள்ள நிலையில், சென்னை அழைத்து வந்து விசாரிக்க காவல்துறையினர் முடிவு செய்துள்ளனர்.
இந்நிலையில் இந்த சம்பவம் தொடர்பாக ரயில்வே ஏடிஜிபி வனிதா செய்தியாளர்களை சந்தித்தார். அப்போது, "பொதுமக்கள் ரயிலில் ஏதாவது தப்பு நடப்பதை ட்விட்டரோ, பேஸ்புக்கிலோ,வாட்ஸ்அப்பிலோ தகவல் அனுப்புங்கள். ரயில்வே துறையில் 1512 என்ற எண்ணிற்கு பாதுகாப்பு பிரச்சினைக்கு தகவல் தெரிவிக்கலாம்.
அப்படித்தான் சமூக அக்கறையுடன் பதிவிடப்பட்ட இந்த வீடியோவை கொண்டு நாங்கள் இந்த வழக்கை கையில் எடுத்தோம். இதில் சம்பந்தப்பட்ட குற்றவாளியை பொதுமக்களின் துணையுடன் தான் பிடித்துள்ளோம்" என தெரிவித்தார். மேலும் ஓடும் ரயிலில் தாக்குதல் நடத்தினால் 3 ஆண்டுகள் சிறை தண்டனை விதிக்கப்படும் என அவர் எச்சரிக்கை விடுத்துள்ளார்.