சென்னை மழை பாதிப்பு குறித்து முதலமைச்சர் பார்வையிடும் இடங்கள் பற்றி போட்டோஷாப் செய்யப்பட்ட புகைப்படங்கள் சமூக வலைத்தளங்களில் பகிரப்படுவதாக தமிழ்நாடு பாரதிய ஜனதா தலைவர் அண்ணாமலை புகார் எழுப்பியுள்ளார்.
சென்னையில் கடந்த சில தினங்களாகப் பெய்துவரும் தொடர் மழையால் சாலைகளில் நீர் தேங்கி மக்கள் வசிக்கும் பகுதிகள் குளங்களாக மாறி வருகின்றன. செம்பரம்பாக்கம் அணையில் நீர் திறக்கப்பட்டதை அடுத்து கரையோரம் வசிக்கும் பகுதிகளில் வெள்ளம் சூழ்ந்துள்ளது. இதற்கிடையே மழையால் பாதிக்கப்பட்ட பகுதிகளை முதலமைச்சர் ஸ்டாலின் தொடர்ந்து பார்வையிட்டு வருகிறார். முதலமைச்சர் பார்வையிடும் பகுதிகள் பற்றி அரசின் அதிகாரப் பூர்வ ட்விட்டர் பக்கத்தில் பகிரப்பட்டும் வருகிறது.
இதற்கிடையே முதலமைச்சர் பார்வையிடும் பகுதிகள் போட்டோஷாப் செய்யப்பட்டு பகிரப்படுகின்றன மேலும் முதலமைச்சரை நெருங்காத வகையில் மக்கள் வீடுகளைச் சுற்றிக் கயிறுகள் கட்டப்படுகின்றன இதுதான் திமுக அரசின் மாடல் எனக் குற்றம் சாட்டி ட்விட்டரில் பகிர்ந்துள்ளார் பாரதிய ஜனதா தலைவர் அண்ணாமலை. இன்று முதல்வரின் கொளத்தூர் தொகுதிக்குச் சென்று பார்வையிட்ட அவர் இதனைப் பகிர்ந்துள்ளார்.
அண்ணாமலையின் இந்த குற்றச்சாட்டு பேரிடர் சூழலில் பரபரப்பை ஏற்படுத்தியுள்ளது.