ஆரோவில்லில் நள்ளிரவு வேட்டை: கும்மிருட்டில் புகுந்து என்.எஸ்.ஜி (NSG) கமாண்டோக்கள் அதிரடி!

விழுப்புரம் மாவட்டக் காவல்துறையுடன் இணைந்து பிப்ரவரி 9 முதல் 11 வரை நடைபெற்ற இந்த பயிற்சியில், 120-க்கும் மேற்பட்ட என்.எஸ்.ஜி கமாண்டோக்கள் பங்கேற்றனர்

ஆரோவிலில் என்.எஸ்.ஜி அதிரடிப் படைப் பயிற்சி

Source : ABP NADU

ஆரோவில்: ஆரோவில் சர்வதேச நகரியத்தில் என்.எஸ்.ஜி அதிரடிப் படைப் பயிற்சி நடைபெற்றது, இதில்'அடுத்த தலைமுறை' தொழில்நுட்பங்களுடன் பயங்கரவாத எதிர்ப்பு ஒத்திகை பயிற்சி நடைபெற்றது.

என்.எஸ்.ஜி அதிரடிப் படைப் பயிற்சி

சர்வதேச அமைதி நகரமான ஆரோவில்லில், தேசிய பாதுகாப்புப் படையின் (NSG) 27-வது சிறப்பு கூட்டுக்குழு (SCG), அதிநவீன தொழில்நுட்பங்கள் மற்றும் உத்திகளை உள்ளடக்கிய மூன்று நாள் தீவிரப் பயிற்சியை வெற்றிகரமாக நிறைவு செய்துள்ளது.

விழுப்புரம் மாவட்டக் காவல்துறையுடன் இணைந்து பிப்ரவரி 9 முதல் 11 வரை நடைபெற்ற இந்த பயிற்சியில், 120-க்கும் மேற்பட்ட என்.எஸ்.ஜி கமாண்டோக்கள் பங்கேற்றனர். நாட்டின் முக்கிய இலக்குகள் மீது பயங்கரவாதத் தாக்குதல்கள் நடத்தப்பட்டால், அதை எதிர்கொள்ளவும் பொதுமக்களைப் பாதுகாக்கவும் எடுக்கப்பட வேண்டிய நடவடிக்கைகள் குறித்து இந்தப் பயிற்சியில் விரிவாக ஆய்வு செய்யப்பட்டது.

கும்மிருட்டில் கமாண்டோக்களின் அதிரடி: 'Dark Night Operation'

இந்த மூன்று நாள் பயிற்சியின் மிக முக்கியமான அம்சம், எவ்வித செயற்கை வெளிச்சமும் இன்றி நள்ளிரவில் மேற்கொள்ளப்பட்ட 'டார்க் நைட் ஆபரேஷன்' (Dark Night Operation) ஆகும். தற்காலப் போர்முறையில் இருளைச் சாதகமாகப் பயன்படுத்தித் தாக்குதல் நடத்தும் பயங்கரவாதிகளை முறியடிக்க இத்தகு பயிற்சி அவசியமாகிறது.

இதற்காகப் பயன்படுத்தப்பட்ட தொழில்நுட்பங்கள்:

தெர்மல் கண்காணிப்பு:

மனிதர்களின் உடல் வெப்பத்தை வைத்து அவர்களின் நடமாட்டத்தைக் கண்டறியும் 'தெர்மல் கண்காணிப்பு கேமராக்கள்' (Thermal Surveillance) மூலம் கமாண்டோக்கள் இலக்குகளைக் கண்காணித்தனர்.

இரவு நேர ட்ரோன்கள்: 

இருளில் இயங்கும் திறன் கொண்ட ட்ரோன்கள் மூலம் வான்வழியாகப் பயிற்சிக் களத்தின் ஒவ்வொரு அசைவும் துல்லியமாகக் கண்காணிக்கப்பட்டது.

வீரர்களுக்குத் துணையாகப் போர்க்கள நாய்கள்:

இந்த பயிற்சியில் என்.எஸ்.ஜி குழுவின் பிரத்யேகப் பயிற்சி பெற்ற நாய்கள் முக்கியப் பங்காற்றின.

வெடிகுண்டு கண்டறியும் நாய்கள் (ED Dogs): 

வெடிபொருட்கள் பதுக்கி வைக்கப்பட்டிருப்பதை நுகர்வுத் திறன் மூலம் கண்டறிந்து, அவற்றைச் செயலிழக்கச் செய்யும் நுணுக்கங்களை இவை வெளிப்படுத்தின.

மாதிரிப் போர் ஒத்திகைகள் 

பிப்ரவரி 10 நள்ளிரவில், ஆரோவில் அறக்கட்டளை அலுவலகத்தை மையமாக வைத்து ஒரு தத்ரூபமான போர் ஒத்திகை நடைபெற்றது.

அலுவலகத்திற்குள் தீவிரவாதிகள் புகுந்தால், ஊழியர்களைப் பாதுகாப்பாக மீட்பது மற்றும் தொழில்நுட்ப உதவியுடன் கட்டிடத்தைக் கைப்பற்றுவது குறித்து கமாண்டோக்கள் செயல்முறை விளக்கம் அளித்தனர்.

இந்த மூலோபாயப் பயிற்சியினை ஆரோவில் அறக்கட்டளைச் செயலாளரும், குஜராத் மாநில கூடுதல் தலைமைச் செயலாளருமான டாக்டர் ஜெயந்தி எஸ். ரவி, I.A.S. வழிநடத்தினார். அறக்கட்டளையின் சிறப்புப் பணி அலுவலர் (OSD) டாக்டர் ஜி. சீதாராமன், என்.எஸ்.ஜி அதிகாரிகளுடன் கலந்துரையாடி நவீன உபகரணங்களின் செயல்திறனை நேரில் பார்வையிட்டார்.

ஆரோவில்லின் அமைதியுடன் நிறைவுற்ற பயிற்சி

மூன்று நாட்கள் உடல் மற்றும் மனதிற்குப் பெரும் சவாலாக அமைந்த இந்தப் பயிற்சியை, கமாண்டோக்கள் ஒரு புதுமையான முறையில் நிறைவு செய்தனர். பிப்ரவரி 11 காலை, அனைத்து வீரர்களும் ஆரோவில்லின் அடையாளமான மாத்ரிமந்திர் வளாகத்திற்குச் சென்றனர். அங்கு அமைதியான சூழலில் தியானத்தில் ஈடுபட்ட கமாண்டோக்கள், தங்களின் தீவிரப் பயிற்சியை மன அமைதியுடன் நிறைவு செய்தனர்.

அதிநவீன தொழில்நுட்பங்கள் மற்றும் தரைப்படையின் வீரம் இணைந்த இந்தப் பயிற்சி, ஆரோவில் மற்றும் அதன் சுற்றுவட்டாரப் பகுதிகளின் பாதுகாப்புத் தயார் நிலையை உறுதிப்படுத்தும் வகையில் அமைந்திருந்தது.