தமிழ்நாடு முதலமைச்சராக மு.க.ஸ்டாலின் இன்று பதவியேற்றுக்கொண்டார். ராஜ்பவனில் நடைபெற்ற விழாவில், அவருக்கு ஆளுநர் பன்வாரி லால் புரோகித் பதவிப்பிரமாணம் செய்து வைத்தார். ”முத்துவேல் கருணாநிதி ஸ்டாலின் எனும் நான்”.... என்று உறுதி மொழி ஏற்றார் முதலமைச்சர் மு.க.ஸ்டாலின். இதைப்பார்த்த அவரது மனைவி துர்கா ஸ்டாலின் ஆனந்த கண்ணீர் உகுத்தார். அவரின் பக்கத்தில் அமர்ந்திருந்த உதயநிதி ஸ்டாலினும் ஆனந்த கண்ணீருடன் தனது தந்தை பதவியேற்பதை பார்த்தார். தமிழ்நாட்டின் முதல்வராக மு.க.ஸ்டாலின் பதவியேற்றதையடுத்து அவரது காரில் இருந்த திமுக கொடி எடுக்கப்பட்டு, தேசியக் கொடி பொறுத்தப்பட்டது.
முதல்வர் ஆவதற்கு ராசி வேண்டும், மு.க ஸ்டாலினுக்கு ராசி இல்லை என அரசியல் கட்சி தலைவர்கள் கருத்து தெரிவித்திருந்தனர். இந்நிலையில் இன்று தமிழக முதலமைச்சராக மு.க ஸ்டாலின் பதவி ஏற்றுக்கொண்டதற்கு, அரசியல் கட்சி தலைவர்கள், பிரபலங்கள் வாழ்த்து தெரிவித்து வருகின்றனர். இது குறித்து ட்வீட் செய்துள்ள பிரபல தமிழ்ப்பட இயக்குனர், சி.எஸ் அமுதன், “ஜோதிடம் ஃபிராடு என்பது அதிகாரப்பூர்வமாக நிரூபணமாகிவிட்டது” என பதிவிட்டுள்ளார். இதேபோன்ற கருத்துக்கள் சமூக வலைதளத்தில் இப்போது வைரலாகி வருகிறது.
இந்நிலையில், தமிழ்நாட்டின் முதலமைச்சராக மு.க.ஸ்டாலின் பதவியேற்றுக்கொண்ட நிலையில், அவருக்கு நடிகர் சூர்யா இன்று வாழ்த்து கூறியுள்ளார். ‘முடியுமா நம்மால்?’ என்பது தோல்விக்கு முன்பு தயக்கம்… ’முடிந்தே தீருவோம்!’ என்பது வெற்றிக்கான தொடக்கம்… ‘முத்தமிழ் அறிஞர்’ கலைஞர் கூறியதை தனது வாழ்த்து அறிக்கையில் குறிப்பிட்டுள்ளார் சூர்யா.
திமுக அமைச்சரவை பதவியேற்பு விழாவில், மக்கள் நீதி மய்யம் தலைவர் கமல்ஹாசன் மற்றும் அதிமுக ஒருங்கிணைப்பாளர் ஓ.பன்னீர்செல்வம் மற்றும் பல கட்சி தலைவர்கள் கலந்து கொண்டனர் என்பது குறிப்பிடத்தக்கது. சி.எஸ் அமுதல் தொலைக்காட்சி தேர்தல் பரப்புரைகளுக்கான வீடியோக்களை இயக்கியவர் என்பது குறிப்பிடத்தக்கது.