12 ஆம் வகுப்பு தேர்வில் சாதிய வன்முறையால் பாதிக்கப்பட்ட நிலையிலும் சாதித்த மாணவர் சின்னதுரையை நடிகர் தாடி பாலாஜி நேரில் சென்று பாராட்டியுள்ளார். 


 திருநெல்வேலி மாவட்டம் நாங்குநேரியில் கடந்த ஆண்டு ஆகஸ்ட் மாதம் 12 ஆம் வகுப்பு படித்து வந்த சின்னதுரை மற்றும் அவரது தங்கை சக மாணவர்களால் சாதிய வன்முறை காரணமாக அரிவாளால் கொடூரமாக வெட்டப்பட்ட சம்பவம் மக்கள் மத்தியில் பெரும் பரபரப்பை ஏற்படுத்தியிருந்தது. மாணவனை அரிவாளால் வெட்டிய சக மாணவர்கள் ஆறு பேர் கைது செய்யப்பட்டு நெல்லை அரசு கூர்நோக்கு இல்லத்தில் அடைக்கப்பட்டனர். 


இந்த சம்பவத்தில் பலத்த காயமடைந்த சின்னதுரை திருநெல்வேலி அரசு கல்லூரி மருத்துவமனையில் தீவிர சிகிச்சைக்குப் பின் உடல்நலம் தேறினார். சிகிச்சை பெற்று வந்த சமயத்தில் தான் மருத்துவனையில் இருந்தவாறே சின்னதுரை காலாண்டு தேர்வு எழுதினார். இதனிடையே தமிழகத்தில் 2023 - 24 ஆம் கல்வியாண்டுக்கான 12 ஆம் வகுப்பு பொதுத் தேர்வு முடிவுகள் கடந்த மே 6ஆம் தேதி வெளியானது.


அதில் மாணவர் சின்னதுரை 12 ஆம் வகுப்பு பொதுத்தேர்வில் 469 மதிப்பெண்கள் பெற்று சாதனைப் படைத்தார். இந்தத் தேர்வில் அவர், தமிழ் - 71, ஆங்கிலம் - 93, பொருளியல் - 42, வணிகவியல் - 84, கணக்குப்பதிவியில் - 85, கணினி அறிவியல் - 94 என மொத்தம் 469 மதிப்பெண்கள் பெற்று தேர்ச்சி அடைந்துள்ளார். இக்கட்டான சூழலுக்கு மத்தியிலும் மிகச்சிறந்த மதிப்பெண்ணை பெற்ற சின்னதுரைக்கு பாராட்டுகள் குவிந்து வருகிறது.


அவரின் உயர்கல்விக்கான செலவை தமிழக அரசு ஏற்றுள்ளது. தான் பி.காம் படித்து ஆடிட்டராக வேண்டுமென சின்னதுரை விருப்பம் தெரிவித்திருந்தார். இதனைத் தொடர்ந்து முதலமைச்சர் ஸ்டாலின் சின்னதுரை மற்றும் அவரது குடும்பத்தினரை நேரில் அழைத்து பாராட்டினார். அப்போது செய்தியாளர்களை சந்தித்த சின்னதுரையிடம், தன் மீது தாக்குதல் நடத்திய மாணவர்கள் குறித்தும் கேள்வி எழுப்பப்பட்டது. 


அதற்கு அந்த மாணவர்களும் படித்து மேலே வரட்டும் என பதிலளித்ததை தொடர்ந்து சின்னதுரைக்கு சமூக வலைத்தளங்களில் பாராட்டுகள் குவிந்து வருகிறது. இந்நிலையில் பிரபல காமெடி நடிகர் தாடி பாலாஜி நெல்லைக்கு நேரில் சென்று   மாணவர் சின்னதுரை மற்றும் அவரது குடும்பத்தினரை நேரில் அழைத்து பாராட்டினார். அந்த மாணவருக்கு புதிய ஆடையை பரிசாக வழங்கி எந்த உதவி வேண்டுமானாலும் கேள் செய்து கொடுக்கிறேன் என கூறி விட்டு சென்றார். பின் செய்தியாளர்களை சந்தித்த தாடி பாலாஜி தன் மீது தாக்குதல் நடத்திய மாணவர்களும் படித்து உயர வேண்டுமென சொன்ன சின்னதுரையின் அந்த ஒரு வார்த்தைக்காவே அவரை பார்க்க வந்தேன் என நெகிழ்ச்சியாக தெரிவித்தார்.