CM Vijay: தூயசக்திக்கு அர்த்தம் தெரியுமா முதல்வரே... விஜயை வெளுத்து வாங்கிய ஹெச்.ராஜா!

தவெக ஆட்சி அமைந்து ஒரு மாதம் நிறைவுப் பெறுகிறது. இந்த ஒரு மாத காலத்தில் சட்டம் ஒழுங்கு உள்ளிட்ட ஏகப்பட்ட பிரச்னைகளை தமிழ்நாடு சந்தித்தது. அதனை தடுக்க விஜய் தலைமையிலான அரசு கடுமையான நடவடிக்கைகளை எடுத்து வருகிறது.

முதலமைச்சர் விஜய், ஹெச்.ராஜா

Source : ABP

தமிழக வெற்றிக் கழகம் தன்னுடைய ஒரு மாத கால ஆட்சியில் தூய சக்தி என நிரூபிக்கவே இல்லை என பாஜக மூத்த தலைவர் ஹெச்.ராஜா விளாசியுள்ளார். 

2026 சட்டமன்ற தேர்தலில் வெற்றி பெற்று கடந்த மே 10ம் தேதி தமிழக வெற்றிக் கழகம் ஆட்சி பொறுப்பேற்றது. முதலமைச்சராக விஜய் செயல்பட்டு வரும் நிலையில் தவெக ஆட்சி அமைந்து ஒரு மாதம் நிறைவுப் பெறுகிறது. இந்த ஒரு மாத காலத்தில் சட்டம் ஒழுங்கு உள்ளிட்ட ஏகப்பட்ட பிரச்னைகளை தமிழ்நாடு சந்தித்தது. அதனை தடுக்க விஜய் தலைமையிலான அரசு கடுமையான நடவடிக்கைகளை எடுத்து வருகிறது. இப்படியான நிலையில் தவெக  ஒரு தூயசக்தி என மக்களிடம் நிரூபிக்கவே இல்லை என ஹெச்.ராஜா சாடியுள்ளார். அதன் பின்னணி என்ன என்பதைக் காணலாம். 

ஒரு மாத தவெக ஆட்சியின் நிலைமை

இதுதொடர்பாக அவர் வெளியிட்டுள்ள எக்ஸ் வலைத்தளப் பதிவில், “தமிழக முதலமைச்சர் ஜோசப் விஜய் தூயசக்தி எனும் தூய்மையான ஆட்சிக்கு அர்த்தம் தெரியாதவர். நியாயம், நீதி,உண்மை, நேர்மை மற்றும் வெளிப்படைத்தன்மை ஆகியவை ஒட்டுமொத்தமாக சேர்ந்தாலே அது தூயசக்தி எனப்படும்.  ஒருமாத கால ஆட்சியில் அது எவ்வளவு தூரம் இருந்தது என எடை போடுவோம். 

நியாயம் என்ற வகையில் தவெக அரசின் செயல்பாடுகளையும் அமைச்சர்களின் திறத்தையும் வெட்டவெளியில் போட்டு கேள்விகளால் துளைத்து இந்த அரசை விமர்சித்த யூடியூபர் மாரிதாஸ் எந்த ஒரு விசாரணையும் இன்றி நேரடியாக கைது செய்யப்படுகிறார். இது அநியாயமில்லையா?

நீதி வகையில் திருப்பரங்குன்ற தீபம் ஏற்றும் விவகாரத்தில் ‘நாங்கள் இரண்டு ஆண்டுகளுக்கு முன்னால் என்ன நடைமுறை இருந்ததோ அதையே தான் பின்பற்றுவோம் என உங்களது அமைச்சர்கள் சொல்கிறார்கள். இதுதான் மத நல்லிணக்கதோடு இருப்பதற்கான லட்சணமா? இதற்குப் பெயர் அநீதி!

உண்மை என்ற பிரிவில் மின்சாரத்துறையிலிருந்து முதலில் ஒன்று என தொடங்கி தற்போது 18 ஹாட் டிஸ்க்குகளை காணவில்லை என செய்தி வந்திருக்கிறது.  இதுதான் உங்களது உண்மைத்தன்மையா?

நேர்மை என்பது உங்களிடத்தில் துளியும் இல்லை. அனைத்து மக்களுக்கும் 200 யூனிட் மின்சாரம் இலவசம் என சொல்லி 500 யூனிட் பயன்படுத்துவர்களுக்கு மட்டும் இலவசம் என சொல்லி இக்கு வைப்பது, பயிர்க்கடன் தள்ளுபடி என கூறி விவசாயிகளை ஏமாற்றியது என்று இதற்குப் பெயர் நேர்மையல்ல, அதற்கு நேர்மாறு!

வெளிப்படைத்தன்மை தவெக ஆட்சியில் எங்கும் எதிலும் இல்லை. உங்களுக்கு பெரும்பான்மை இல்லையென்றபோது பாஜகவின் ஜனநாயக கூட்டணியில் நின்று வெற்றி பெற்ற அதிமுக சட்டமன்ற உறுப்பினர்கள் சிலரிடம்  நீங்கள் எப்படியெல்லாம் மறைமுக பேரம் பேசி உங்கள் பக்கம் இழுத்துள்ளீர்கள் என்பதை இந்த நாடே நன்கு அறியும். உங்கள் பம்மாத்து அரசியலை வெத்துவேட்டு அரசியல் என அழைக்கலாம். 

தன்னை தூயசக்தி என அழைத்துக் கொள்ளும் வாய்ச்சொல் வீரர்களும் தீயசக்தி திமுகவின் நீட்சியே..நீட்சியே..நீட்சியே என ஹெச்.ராஜா தனது பதிவில் காட்டமாக விமர்சித்துள்ளார்.