" தலை துண்டித்து கொலை "
நெல்லை மணிமூர்த்தீஸ்வரத்தைச் சேர்ந்தவர் பாஸ்கரன் ( வயது 42 ) பெயின்டர். கடந்த 30 - ம் தேதி மாலையில் பாஸ்கரன் மொபட்டில் தச்சநல்லூர் பைபாஸ் ரோட்டில் சென்ற போது அந்த வழியாக பைக்கில் வந்த கும்பல் , பாஸ்கரனை தலையை துண்டித்து கொலை செய்ததோடு தலையை 200 மீட்டர் தூரம் தள்ளி வீசிச் சென்றது
இந்த கொடூர கொலை தொடர்பாக தச்சநல்லூர் போலீசார் வழக்குப் பதிவு செய்து தச்சநல்லூர் மணிமூர்த்தீஸ்வரம் வாழவந்த அம்மன் கோவில் பகுதியைச் சேர்ந்த மணிகண்டன் ( வயது 24 ), பொன்ராஜ் ( வயது 25 ), மகாராஜன் ( வயது 28), வினோத் ( வயது 28) , மாயகிருஷ்ணன் என்ற கோபி ( வயது 40 ) , கட்டுடையார்குடியிருப்பைச் சேர்ந்த மகேந்திரன் (எ) வெள்ளத்துரை ( வயது 28) ஆகிய 6 பேரை கைது செய்திருந்தனர். இந்நிலையில் மணிமூர்த்தீஸ்வரத்தை சேர்ந்த வெள்ளப்பாண்டி மகன்கள் மதன் ( வயது 26 ), பெருமாள் ( வயது 25) ஆகியோரை போலீசார் கைது செய்தனர்.
"பணம் கொடுக்கல் - வாங்கல் தகராறு"
இவர்கள் 2 பேரும் ஏற்கனவே கைது செய்யப்பட்ட மணிகண்டனின் சகோதரர்கள் ஆவர். மேலும் நடந்த தேடுதல் வேட்டையில் மணிமூர்த்தீஸ்வரத்தை சேர்ந்த விமல் ( வயது 55 ) என்பவரை போலீசார் கைது செய்தனர். அவர் சென்னையில் உள்ள அரசு உயர் நிலைப்பள்ளியில் ஆசிரியராக பணியாற்றி வருகிறார்.
கடந்த 2023 - ம் ஆண்டில் பணம் கொடுக்கல் , வாங்கல் தகராறில் கொலையுண்ட பாஸ்கரன் தனது உறவினர்களுடன் சேர்ந்து விமலை அரிவாளால் வெட்டியதாகவும் , அந்த முன் விரோதத்தில் தற்போது பாஸ்கரன் கொலையில் அவர் சம்பந்தப்பட்டிருப்பதாகவும் போலீசார் தெரிவித்தனர். இதுவரை இந்தக் கொலையில் 9 பேர் கைது செய்யப்பட்டுள்ள நிலையில் , மணிமூர்த்தீஸ்வரத்தை சேர்ந்த கோபி என்ற மேலும் ஒரு வாலிபரை போலீசார் தேடி வருகின்றனர்.