தொகுதிக்குத் தேவையானதை என்னிடம் கேளுங்கள், செய்து தருகிறேன்: மயிலம் மக்களிடம் சி.வி.சண்முகம் உறுதி!

என்னை நம்பி சட்டமன்ற உறுப்பினராகத் தேர்ந்தெடுத்த மயிலம் தொகுதி மக்களுக்கு எனது கடமைகளை நான் முழுமையாகச் செய்வேன் - சி.வி.சண்முகம்

சி.வி சண்முகம்

Source : whatsapp

 விழுப்புரம்: "என்னை நம்பி சட்டமன்ற உறுப்பினராகத் தேர்ந்தெடுத்த மயிலம் தொகுதி மக்களுக்கு எனது கடமைகளை நான் முழுமையாகச் செய்வேன். தொகுதிக்குத் தேவையான திட்டங்களை என்னிடம் தயங்காமல் கேளுங்கள், என் சக்திக்கு உட்பட்டு அனைத்தையும் செய்து தரத் தயாராக இருக்கிறேன்" என்று மயிலம் தொகுதி சட்டமன்ற உறுப்பினர் சி.வி.சண்முகம் உறுதியளித்துள்ளார்.

பெருவாரியான வாக்குகள் வித்தியாசத்தில் வெற்றி

அண்மையில் நடைபெற்று முடிந்த சட்டமன்றப் பொதுத்தேர்தலில், விழுப்புரம் மாவட்டம் மயிலம் சட்டமன்றத் தொகுதியில் அதிமுக சார்பில் போட்டியிட்ட அக்கட்சியின் முக்கிய நிர்வாகியான சி.வி.சண்முகம், 30,041 வாக்குகள் என்ற பெருவாரியான வித்தியாசத்தில் அமோக வெற்றி பெற்றார். தேர்தல் முடிவுகளுக்குப் பிறகு, அதிமுகவில் நிலவி வந்த உள்விவகாரங்கள் மற்றும் அரசியல் சூழல் காரணமாகச் சென்னையில் தங்கியிருந்த சி.வி.சண்முகம், நேற்று திண்டிவனத்தில் உள்ள தனது இல்லத்திற்குத் திரும்பினார்.

கிராமம் கிராமமாகச் சென்று நன்றி அறிவிப்பு

சொந்த ஊருக்குத் திரும்பிய அவர், இன்று காலை முதல் மயிலம் தொகுதிக்கு உட்பட்ட கிராமப் பகுதிகளில் தீவிரப் சுற்றுப்பயணம் மேற்கொண்டு, வாக்களித்த பொதுமக்களுக்கு நேரில் நன்றி தெரிவித்து வருகிறார். மேல்பாக்கம், நெய்குப்பி, வடபூண்டி, கொடியம் உள்ளிட்ட பல்வேறு கிராமங்களுக்குத் திறந்த வாகனத்தில் சென்று, திரண்டு நின்ற பொதுமக்களை நோக்கித் தனது நன்றியைப் பதிவு செய்தார்.

நெய்குப்பி கிராமத்தில் உருக்கமான பேச்சு

இதன் ஒரு பகுதியாக நெய்குப்பி கிராமத்தில் திரண்டிருந்த பொதுமக்கள் மற்றும் கட்சித் தொண்டர்கள் மத்தியில் சி.வி.சண்முகம் பேசியதாவது:

"நடந்து முடிந்த சட்டமன்றத் தேர்தலில் மயிலம் தொகுதியில் போட்டியிட்ட எனக்கு, உங்களது பேராதரவை வழங்கி, பெருவாரியான வாக்குகள் வித்தியாசத்தில் வெற்றி பெற வைத்த வாக்காளப் பெருமக்களாகிய உங்களுக்கு என்னுடைய பாதம் பணிந்து, நெஞ்சார்ந்த வணக்கத்தையும் நன்றியையும் தெரிவித்துக் கொள்கிறேன்.

என்னை நம்பி உங்களது சட்டமன்ற உறுப்பினராகத் தேர்ந்தெடுத்துள்ளீர்கள். உங்களுக்குச் செய்ய வேண்டிய கடமைகளை நான் எப்போதும் முழுமையாகச் செய்வேன். உங்களுக்காக என்றென்றும் களத்தில் நின்று உழைக்க நான் கடமைப்பட்டிருக்கிறேன். இந்தத் தொகுதிக்கும், உங்களுக்குத் தேவையான அடிப்படை வசதிகள் அல்லது கோரிக்கைகள் எதுவாக இருந்தாலும், எதைப்பற்றியும் யோசிக்காமல் நேரடியாக என்னிடம் கேளுங்கள். என் சக்திக்கு உட்பட்ட அனைத்து உதவிகளையும், திட்டங்களையும் கண்டிப்பாக உங்களுக்குச் செய்து தர நான் எப்போதும் தயாராக இருக்கிறேன்."

இவ்வாறு அவர் பொதுமக்களிடையே உருக்கமுடன் பேசினார்.

தொகுதிக்கு வந்த சி.வி.சண்முகத்திற்குப் பல்வேறு கிராமங்களிலும் பொதுமக்கள் ஆரத்தி எடுத்தும், பொன்னாடை போர்த்தியும் உற்சாக வரவேற்பு அளித்தனர். இந்த நன்றி அறிவிப்புப் பயணத்தின் போது அதிமுக நிர்வாகிகள், உள்ளாட்சி அமைப்புகளின் பிரதிநிதிகள் மற்றும் கூட்டணிக் கட்சியினர் திரளாக உடனிருந்தனர்.