CM Stalin Tweet: “தமிழ்நாடுதான் இந்தியாவுக்கான மாடல்” அரசின் சாதனைகளை குறிப்பிட்டு முதலமைச்சர் ஸ்டாலின் பதிவு

தமிழ்நாடு இடைக்கால நிதிநிலை அறிக்கை தாக்கல் செய்யப்பட்ட நிலையில், திமுக அரசின் சாதனைகளை பட்டியலிட்டு பதிவிட்டுள்ள முதலமைச்சர் மு.க. ஸ்டாலின், தமிழ்நாடுதான் இந்தியாவுக்கான மாடல் என கூறியுள்ளார்.

பட்ஜெட் குறித்து முதலமைச்சர் மு.க. ஸ்டாலின் பதிவு

Source : ABP Nadu Spl Arrangement

தமிழ்நாடு சட்டப்பேரவையில் இன்று தமிழ்நாட்டின் இடைக்கால பட்ஜெட்டை நிதி அமைச்சர் தங்கம் தென்னரசு தாக்கல் செய்தார். அதைத் தொடர்ந்து, வேளாண் நிதிநிலை அறிக்கையை வேளாண் துறை அமைச்சர் எம்ஆர்கே பன்னீர்செல்வம் தாக்கல் செய்தார். இந்த இரண்டு பட்ஜெட் தாக்கலின்போதும், கடந்த 5 ஆண்டுகளில் திமுக அரசு பல்வேறு துறைகளில் செய்துள்ள சாதனைகள் குறித்து பட்டியலிடப்பட்டது. இந்நிலையில், முதலமைச்சர் மு.க. ஸ்டாலின், திமுக அரசின் சாதனைகள் அடங்கிய பட்டியலுடன் தனது எக்ஸ் தள பக்கத்தில் பதிவிட்டுள்ளார். அந்த பதிவில் அவர் என்ன கூறியுள்ளார் என்பதை இப்போது பார்க்கலாம்.

“தமிழ்நாடுதான் இந்தியாவுக்கான மாடல்”

தமிழ்நாடு அரசின் இடைக்கால பட்ஜெட் தாக்கல் செய்யப்பட்ட நிலையில், அது குறித்து பதிவிட்டுள்ள  திமுக தலைவரும், முதலமைச்சருமான மு.க. ஸ்டாலின், “இதுதான் வளர்ச்சி! தமிழ்நாடுதான் இந்தியாவுக்கான மாடல்” என்று அனைவரும் பாராட்டிடும் ஐந்தாண்டு சாதனைகளின் தொகுப்பாக, இடைக்கால நிதிநிலை அறிக்கையைத் தாக்கல் செய்திருக்கிறார் தங்கம் தென்னரசு என்று குறிப்பிட்டுள்ளார்.

மேலும், அவர்கள்! ஒன்றிய அரசின் ஓரவஞ்சனைகளை மீறி, அவர்களது வஞ்சகங்களைத் திறமையாகக் கையாண்டு, வளர்ச்சியில் சாதனை படைத்திருக்கும் ஐந்தாண்டுகளை நிறைவு செய்கிறோம்! என்று கூறியுள்ள முதலமைச்சர், ஜூலை மாதம் திராவிட மாடல் 2.0-வில், புதிய அறிவிப்புகளுடன் இன்னும் பிரமாண்டமான சாதனைகளுக்கு அடித்தளமிடும் நிதிநிலை அறிக்கையைத் தாக்கல் செய்வோம்! என்றும் கூறியுள்ளார்.

அதோடு, நமது திராவிட மாடல் அரசின் சாதனைகளில் சிலவற்றையும், மத்திய பா.ஜ.க. அரசு செய்துவரும் ஓரவஞ்சனைகளில் சிலவற்றையும் உங்களின் பார்வைக்குப் பகிர்கிறேன் எனக் கூறி, அதற்கான புகைப்பட விளக்கத்தை பகிர்ந்துள்ளார். அது, கீழ்கண்ட அவரது இந்த பதிவில் இடம்பெற்றுள்ளது.

“இதுதான் வளர்ச்சி! தமிழ்நாடுதான் இந்தியாவுக்கான மாடல்” என்று அனைவரும் பாராட்டிடும் ஐந்தாண்டு சாதனைகளின் தொகுப்பாக, இடைக்கால நிதிநிலை அறிக்கையைத் தாக்கல் செய்திருக்கிறார் மாண்புமிகு @TThenarasu அவர்கள்!

ஒன்றிய அரசின் ஓரவஞ்சனைகளை மீறி, அவர்களது வஞ்சகங்களைத் திறமையாகக் கையாண்டு,… pic.twitter.com/IGH6qAkNcx

— M.K.Stalin - தமிழ்நாட்டை தலைகுனிய விடமாட்டேன் (@mkstalin) February 17, 2026

பட்ஜெட் குறித்து எதிர்க்கட்சித் தலைவர் கடுமையாக விமர்சித்துள்ள நிலையில், முதலமைச்சரின் இந்த பதிவு வெளியாகியுள்ளது.