salem

161-வது ஆண்டில் எஃகு நகரம்.. சேலம் உருவான கதை தெரியுமா? வியக்கவைக்கும் வரலாற்று உண்மைகள்

ராஜேஷ். எஸ் — Sun, 1 Nov 2026 16:58:19 +0530

தமிழகத்தின் பழமை வாய்ந்த நகரங்களில் ஒன்றான சேலம் நகரம் 160 ஆண்டுகளை நிறைவு செய்து 161-வது ஆண்டில் இன்று அடியெடுத்து வைக்கிறது.

மலைகள் சூழ் மாநகரமான சேலம், நகராட்சியாக உருவெடுத்த தினம் இன்று. சேலம் நகராட்சி உருவாக்கப்பட்ட தினமான நவம்பர் 1-ந் தேதி சேலம் தினமாக கொண்டாடப்பட்டு வருகிறது. 1866-ம் ஆண்டு நகரவைத் தலைவர் மற்றும் 17 உறுப்பினர்களுடன் தொடங்கப்பட்ட சேலம் நகராட்சி 1994-ம் ஆண்டு சேலம் மாநகராட்சியாக மாற்றமடைந்து தற்போது பொலிவுறு நகரம் எனப்படும் ஸ்மார்ட் சிட்டியாக உருவெடுத்துள்ளது. 161-வது ஆண்டில் இன்று அடியெடுத்து வைக்கும் சேலத்தின் சிறப்புகள், பழமை வாய்ந்த அடையாளங்கள், ஆண்டுகள் பல கடந்தாலும் அடையாளம் மாறாத சரித்திர முக்கியத்துவம் வாய்ந்தவையாக உள்ளன.

சேலம் கோட்டையின் பாதுகாப்பிற்காக இங்கிலாந்து மன்னர் மூன்றாம் ஜார்ஜ் காலத்தில் உருவாக்கப்பட்ட பீரங்கி இன்றைக்கும் சேலம் மாநகராட்சி அலுவலக வளாகத்தில் காட்சிப்படுத்தப்பட்டுள்ளது. பொதுமக்கள் கால நேரத்தைத் தெரிந்து கொள்ளும் வகையில் நண்பகல் 12 மணிக்கு இந்த பீரங்கியின் மூலம் குண்டு போடும் வழக்கம் இருந்துள்ளது. 1873-ம் ஆண்டிற்கு பிறகு இந்த நேரம் இரவு 8 மணிக்கு மாற்றப்பட்டது. 1950ம் ஆண்டு இந்த வழக்கம் நிறைவுக்கு வந்தாலும், இதன் அடையாளமாக இன்றைக்கும் சேலத்தில் குண்டு போடும் தெரு என்ற இடம் உள்ளது. சேலம் மாநகரத்தின் வரலாற்றில் பிரிட்டிஷ் கிழக்கிந்திய கம்பெனி மற்றும் ஆங்கிலேயர் ஆட்சிக்காலத்திற்கு மிக முக்கிய பங்கு உண்டு. இந்தியாவில் உருவாக்கப்பட்ட முதல் மாவட்டமான சேலத்தில், அங்கு பணியாற்றிய ஆங்கிலேய கலெக்டர்கள் மற்றும் அதிகாரிகளின் நினைவாகப் பெயரிடப்பட்ட முக்கிய தெருக்கள் மற்றும் சாலைகள் இன்றைக்கும் புழக்கத்தில் உள்ளன.

1853 முதல் 1862 வரை சேலம் மாவட்ட கலெக்டராகப் பணியாற்றிய ஹேரி அகஸ்டஸ் பிரட்ஸ் (Harry Augustus Brett) நினைவாக சேலம் மாவட்ட ஆட்சியர் அலுவலகம் முதல் முள்ளுவாடி கேட் வரையிலான முக்கிய சாலைக்கு 'பிரட்ஸ் சாலை' என்று பெயரிடப்பட்டுள்ளது. 1870 முதல் 1881 வரையிலான காலகட்டத்தில் சேலத்தின் கலெக்டராகப் பொறுப்பு வகித்த சி.டி.லாங்லி (C.T. Langley) நினைவாக வர்த்தகச் சிறப்புமிக்க செவ்வாய்ப்பேட்டை மார்க்கெட் பகுதியில் அமைந்துள்ள முக்கிய சாலைக்கு 'லாங்லி சாலை' எனப் பெயரிடப்பட்டுள்ளது. 1914 முதல் 1919 வரை சேலம் கலெக்டராக இருந்த லீ (Leigh) என்பவரின் பெயரால் லீ பஜார் என்கிற மிகப் பெரிய வேளாண் வணிகச் சந்தை அமைக்கப்பட்டுள்ளது. வரலாற்றின் மிச்சத்தை தங்களது பெயர்களில் தாங்கி நிற்கிற சேலம் மாநகரத்தின் தெருக்கள் இன்றைக்கும் காட்சியளிக்கின்றன.

வரலாற்று ரீதியாகவும், அரசியல் ரீதியாகவும் முக்கிய இடம் பிடித்த சேலத்தின் மற்றொரு முகம் புவி அமைப்பியல் ரீதியானது. புவியியல் ஆய்வாளர்களின் சொர்க்கம் என்றழைக்கப்படும் சேலத்தின் கனிமவளம் சர்வதேசப் புகழ் பெற்றது. இந்திய அளவில் கனிம வளம் மிக்க ஜார்கண்ட் மாநிலத்திற்கு அடுத்தபடியாக, தென்னிந்திய அளவில் 134 வகையான கனிமங்கள் நிறைந்த பகுதியாக சேலம் திகழ்கிறது. மேக்னசைட், பாக்சைட், மாலிப்டினம் என எங்கும் நிறைந்த கனிமங்களுடன் சேலம் மாவட்ட மலைகள் கம்பீரமாக காட்சியளிக்கின்றன. விவசாயிகள், வர்த்தகர்கள், ஜவுளித்துறையினர், தொழிலாளர்கள் என நேரம் காலம் பார்க்காமல் உழைக்கக்கூடிய மக்களால் நிரம்பிய சேலம், ஆடித் திருவிழாவை ஒரு மாதத்திற்கு கொண்டாடக்கூடிய கொண்டாட்ட நகரமாகவும் உள்ளது.

தமிழகத்தின் வளர்ச்சி, அரசியல், வாழ்வியல், வர்த்தகம் என எந்த துறையை எடுத்துக் கொண்டாலும் சேலத்தை தவிர்த்து எந்த வரலாற்றையும் சொல்லிவிட முடியாது என்பதே சேலம் மாநகரின் மிக முக்கிய அந்தஸ்தாக உள்ளது. வேகமாக வளர்ந்து வரும் தமிழகத்தின் மிக முக்கிய நகரமான சேலத்தில் பொதுப் போக்குவரத்தை முறைப்படுத்த வேண்டும், கழிவு நீர் கால்வாயாக இருக்கும் திருமணிமுத்தாற்றினை மீட்டெடுக்க வேண்டும் என்பதே 161-வது பிறந்த நாள் காணும் சேலம் மாநகர மக்களின் நீண்டகால எதிர்பார்ப்புகளாக உள்ளது.

சேலத்தில் உதவி வரவேற்பாளர் பணி ! வயது வரம்பு, கல்வித்தகுதி, சம்பளம் முழு விவரம் !

நாகராஜ் — Fri, 30 Oct 2026 19:12:46 +0530

சேலம் மாவட்ட மாற்றுத்திறனாளிகள் நல அலுவலகத்தில் காலியாக உள்ள உதவி வரவேற்பாளர் பணியிடத்துக்கு நவம்பா் 13-ஆம் தேதிக்குள் விண்ணப்பிக்கலாம் என மாவட்ட ஆட்சியா் இளம்பகவத் தெரிவித்துள்ளாா். இதுகுறித்து அவா் வெளியிட்ட செய்திக் குறிப்பில் கூறியுள்ளதாவது, சேலம் மாவட்ட மாற்றுத்திறனாளிகள் நல அலுவலகத்தில் காலியாக உள்ள உதவி வரவேற்பாளர் பணியிடம் நிரப்பப்பட உள்ளது. இதற்குத் தகுதியானவா்களிடமிருந்து விண்ணப்பங்கள் வரவேற்கப்படுகின்றன.

இந்தப் பணிக்கு பாா்வையற்ற பட்டியல் பொதுப்பிரிவு-பெண்கள் விண்ணப்பிக்கலாம். மேலும், முழுமையாக பாா்வைத் திறனற்றவராகவும், 8-ஆம் வகுப்பு தோ்ச்சி பெற்ற 40 வயதுக்கு உள்பட்டவராகவும் இருக்க வேண்டும். நாற்காலி ஒயா் பின்னுதலில் ஓராண்டு அனுபவம் பெற்றவராக இருத்தல் அவசியம். சேலம் மாவட்ட மாற்றுத்திறனாளிகள் நல அலுவலகத்தில் 1.8.2023 முதல் காலியாக உள்ள உதவி வரவேற்பாளர் பணியிடம் நிலை-2-க்கு தோ்வு செய்யப்படுபவருக்கு மாதம் ரூ. 15,900 முதல் ரூ.50,400 என்ற ஊதிய விகிதத்தில் வழங்கப்படும்.

விருப்பம் உள்ள தகுதி வாய்ந்த விண்ணப்பத்தாரர்கள் வேலைவாய்ப்பு அலுவலகத்தில் பதிவு செய்யப்பட்டு இருந்தால் பதிவு அட்டை, பட்டியல் இனத்தவா் என்பதற்கான சான்று, தேசிய அடையாள அட்டை, தனித்துவம் வாய்ந்த அடையாள அட்டை, ஆதாா், குடும்ப அட்டை, ஜாதிச் சான்றிதழ், 2 பாஸ்போட் அளவு புகைப்படம் ஆகியவற்றுடன் மாவட்ட ஆட்சியா் அலுவலகத்தில் உள்ள மாவட்ட மாற்றுத்திறனாளி நல அலுவலர், மாவட்ட மாற்றுத்திறனாளிகள் நல அலுவலகம், அறை எண்:11, சேலம் மாவட்டம் என்ற முகவரிக்கு நேரடியாகவோ அல்லது தபால் மூலமாகவோ நவம்பா் 13-ஆம் தேதி மாலை 5 மணி வரை விண்ணப்பிக்கலாம் எனத் தெரிவிக்கப்பட்டுள்ளது.மேலும் விவரங்களுக்கு 0427- 2415242, 9499933489 என்ற எண்களில் தொடர்பு கொண்டு பயன்பெறலாம் என தெரிவிக்கப்பட்டுள்ளது.

தேர்வு எப்படி நடைபெறும்? கல்வித்தகுதி என்ன? சேலம் மாவட்ட வேலைவாய்ப்பு முழு விவரம்!

நாகராஜ் — Fri, 30 Oct 2026 17:52:25 +0530

சேலம் மாவட்ட காலநிலை மாற்ற இயக்கத்தில் ஒப்பந்த அடிப்படையில் நிரப்பப்படவுள்ள தொழில்நுட்ப உதவியாளா் பணியிடத்துக்கு நவம்பா் 8-ஆம் தேதிக்குள் விண்ணப்பிக்கலாம் என மாவட்ட ஆட்சியா் இளம்பகவத் தெரிவித்துள்ளாா்.

இதுகுறித்து அவா் வெளியிட்ட செய்திக் குறிப்பில் கூறியுள்ளதாவது. தமிழ்நாடு அரசின் சுற்றுச்சூழல் மற்றும் காலநிலை மாற்றத் துறையின் கீழ் செயல்படும் சேலம் மாவட்ட காலநிலை மாற்ற இயக்கத்தில், ஒப்பந்த அடிப்படையில் ஒரு தொழில்நுட்ப உதவியாளா் பணியிடம் நிரப்பப்பட உள்ளது. இதற்குத் தகுதியானவா்களிடமிருந்து விண்ணப்பங்கள் வரவேற்கப்படுகின்றன.

விண்ணப்பதாரா்கள் உயிரியல் அறிவியல், சுற்றுச்சூழல் அறிவியல், சூழலியல், வனவியல், வனவிலங்கு அறிவியல், பொதுக் கொள்கை அல்லது தொடா்புடைய துறையில் இளங்கலைப் பட்டம் பெற்றிருக்க வேண்டும். தமிழ், ஆங்கிலத்தில் அடிப்படைத் தட்டச்சுத் திறன் அவசியம். வயது 40-க்குள் இருக்க வேண்டும். தொடா்புடைய பணியில் குறைந்தது ஓராண்டு அனுபவம் உள்ளவா்களுக்கு முன்னுரிமை அளிக்கப்படும். குறிப்பாக, அரசு அலுவலகப் பணிகள், தரவு மேலாண்மை, ஆவணப் பராமரிப்பு மற்றும் m soffice, ms exel, power point, ஆகியவற்றில் திறன் பெற்றிருப்பது கூடுதல் தகுதியாகக் கருதப்படும்.

தோ்வு செய்யப்படுபவருக்கு மாதம் ரூ. 22,000 தொகுப்பூதியமாக வழங்கப்படும். ஒப்பந்தப் பணிக்காலம் 19 மாதங்கள். சேலம் மாவட்ட ஆட்சியா் அலுவலகம் மற்றும் தொடா்புடைய மாவட்ட அலுவலகங்களில் பணியாற்ற வேண்டும். அலுவல் பயணங்களுக்கான செலவுகள் அரசு விதிமுறைகளின்படி வழங்கப்படும்.

விண்ணப்பங்கள் தகுதியின் அடிப்படையில் பரிசீலிக்கப்பட்டு, நோ்முகத் தோ்வு மற்றும் தட்டச்சுத் தோ்வு மூலம் தகுதியானவா் தோ்வு செய்யப்படுவாா். விருப்பம் உள்ளவா்கள் தங்களது புதுப்பிக்கப்பட்ட சுயவிவரம், கல்விச் சான்றிதழ்கள் மற்றும் பணி அனுபவச் சான்றிதழ்களுடன் cmgfp.slm@gmail.com என்ற மின்னஞ்சல் முகவரிக்கு விண்ணப்பிக்க வேண்டும். விண்ணப்பிக்க நவம்பா் 8-ஆம் தேதி கடைசி நாள் என அதில் தெரிவிக்கப்பட்டுள்ளது.

பிரபல ரவுடி டேவிட்டை கொன்றது இவர்களா? - சேலத்தை உலுக்கிய கொலை வழக்கில் 7 பேர் சரண்

ராஜேஷ். எஸ் — Tue, 27 Oct 2026 12:54:57 +0530

சேலத்தில் பிரபல ரவுடி ஜங்ஷன் டேவிட் கொலை செய்யப்பட்ட வழக்கில் 7 பேர் சரணடைந்துள்ளனர்.

சேலம் மாவட்டம் ஜங்ஷன் சூரமங்கலம் அருகே உள்ள ஜாகிர் அம்மாபாளையம் கல்யாணசுந்தரம் தெரு பகுதியைச் சேர்ந்தவர் ஜங்ஷன் டேவிட் என்கிற உதயகுமார்(41). இவர் மீது கொலை, நில மோசடி உள்ளிட்ட பல்வேறு வழக்குகள் நிலுவையில் உள்ளது. கடந்த மாதம் நில மோசடி வழக்கு ஒன்றில் கைது செய்யப்பட்ட ஜங்ஷன் டேவிட் கடந்த 18 நாட்களுக்கு முன்பாக சென்னை உயர்நீதிமன்றத்தின் நிபந்தனை நிபந்தனை ஜாமின் பெற்றுள்ளார். இந்த நிலையில் நேற்று காலை மத்திய குற்றப்பிரிவு காவல் நிலையத்தில் கையெழுத்திட்டு விட்டு வந்து கொண்டிருந்ததாக கூறப்படுகிறது. இரும்பாலை ரோட்டில் உள்ள புது ரோடு மேம்பாலத்தில் இருசக்கர வாகனத்தில் வந்து கொண்டிருந்தபோது அவரை மூன்று இரு சக்கர வாகனத்தில் வந்த ஐந்துக்கும் மேற்பட்டோர் பின் தொடர்ந்து வந்துள்ளனர். அப்போது இருசக்கர வாகனத்தில் வந்தவர்கள், ஜங்ஷன் டேவிட்டை அரிவாளால் வெட்டியுள்ளனர்.

ரவுடியை வெட்டிய கும்பல் தப்பியோட்டம்

இதனையடுத்து கட்டுப்பாட்டை இழந்த ஜங்ஷன் டேவிட் இருசக்கர வாகனத்தை போட்டுவிட்டு அருகில் இருந்த மேம்பால சுவரின் மீது ஏறி தப்பி செல்வதற்காக கீழே குதித்துள்ளார். நிலை தடுமாறி அருகில் இருந்த கல்ல அருகில் விழுந்த ஜங்ஷன் தாங்கள் வைத்திருந்த ஆயுதங்களால் பலமாக வெட்டியுள்ளனர். இதில் பலத்த காயம் அடைந்த ஜங்ஷன் டேவிட் சம்பவ இடத்திலேயே உயிரிழந்தார். இதைத்தொடர்ந்து மர்ம கும்ப கும்பல் அங்கிருந்து தப்பி ஓடியது.

இது தொடர்பாக சூரமங்கலம் காவல்துறையினருக்கு தகவல் கிடைக்கவே சம்பவ இடத்திற்கு விரைந்து வந்த காவல்துறையினர், ஜங்ஷன் டேவிட்டின் உடலை கைப்பற்றி பிரேத பரிசோதனைக்காக அனுப்பி வைத்தனர். பிரபல ரவுடி மக்கள் நடமாட்டம் மிகுந்த மேம்பாலம் அருகே ஓட ஓட விரட்டி வெட்டி கொல்லப்பட்ட சம்பவம் சேலத்தில் பரபரப்பை ஏற்படுத்தியது.

7 பேர் சரண்

இதனை தொடர்ந்து, சேலம் மாவட்ட காவல் ஆணையாளர் பாபு உத்தரவின் பேரில், மூன்று தனிப்படைகள் அமைக்கப்பட்டு கொலையாளிகளை காவல்துறையினர் தேடி வந்தனர். இந்த நிலையில் சூரமங்கலம் காவல் நிலையத்தில் ரவுடி டேவிட் கொலை வழக்கில் ராஜன், கார்த்திக், சுலைமான், மோகன், ரகு, அருண்குமார், மணிகண்டன் உள்ளிட்ட ஏழு பேர் சேலம் கருப்பூர் டோல்கேட் பகுதியில் காவல்துறையினரிடம் சரண் அடைந்துள்ளனர். இவர்களிடம் காவல்துறை உயர் அதிகாரிகள் விசாரணை செய்து வருகின்றனர். கொலைக்கான காரணம் குறித்து காவல்துறை உயர் அதிகாரிகள் தீவிர விசாரணை நடத்தி வருகின்றனர்.

பட்டப்பகலில் திமுக பிரமுகர் ஓட ஓட வெட்டிக் கொலை.. சினிமாவை மிஞ்சிய சம்பவம் - பின்னணியில் என்ன நடந்தது?

ராஜேஷ். எஸ் — Mon, 26 Oct 2026 14:26:35 +0530

சேலத்தில் ரியல் எஸ்டேட் அதிபர் மக்கள் நடமாட்டம் மிகுந்த பகுதியில் பட்டப்பகலில் வெட்டி கொலை படுகொலை செய்யப்பட்ட சம்பவம் அதிர்ச்சியை ஏற்படுத்தியுள்ளது. இருசக்கர வாகனத்தில் வந்தவரைகும்பல் ஒன்று வழிமறித்து ஓட ஓட வெட்டி சாய்த்தது. இதுதொடர்பாக போலீசார் விசாரணை மேற்கொண்டு வருகின்றனர்.

கொலை நடந்தது எப்படி?

சேலம் சூரமங்கலம் பகுதியைச் சேர்ந்தவர் டேவிட். ரியல் எஸ்டேட் தொழிலில் ஈடுபட்டு வரும் இவர், இன்று காலை 11 மணியளவில் தனது வீட்டில் இருந்து இருசக்கர வாகனத்தில் புது ரோடு நோக்கி சென்று கொண்டிருந்தார். அப்பொழுது ரயில்வே மேம்பாலத்தில் மூன்று இருசக்கர வாகனத்தில் வந்த ஐந்து பேர் கொண்ட கும்பல் அவரை வழிமறித்து சரமாரியாக தாக்கியுள்ளனர். இதில் பலத்த காயம் அடைந்து ரத்த வெள்ளத்தில் அங்கிருந்து தப்பிக்க பாலத்திற்கு கீழே ஓடிச் சென்ற அவரை, ஓட ஓட விரட்டி பாலத்திற்கு கீழே பயங்கர ஆயுதங்களால் சரமாரியாக வெட்டி சாய்த்து உள்ளனர். இதில் டேவிட் ரத்த வெள்ளத்தில் சம்பவ இடத்திலேயே உயிரிழந்தார்.

இதுகுறித்து தகவல் அறிந்தவுடன் காவல்துறையினர் சம்பவ இடத்திற்கு வந்து அவரின் உடலை மீட்டு அரசு மருத்துவமனைக்கு அனுப்பி வைத்தனர். டேவிட் கொலை செய்யப்பட்ட சம்பவம் குறித்து தகவல் அறிந்த அவரது நண்பர்கள் உறவினர்கள் மேம்பாலத்தில் திரண்டதால் பெரும் பரபரப்பு நிலவியது.

திமுக பிரமுகர்

கொலை செய்யப்பட்ட டேவிட் ரியல் எஸ்டேட்டில் ஏற்பட்ட தகராறில் கடந்த சில மாதங்களுக்கு முன்பு சிறைக்குச் சென்று ஜாமீனில் 20 நாட்களுக்கு முன்பாக வெளியே வந்துள்ளார் என்பது கூறப்படுகிறது. ஜாமீனில் வெளியே வந்த அவரை நோட்டமிட்ட மர்ம கும்ப கும்பல் இன்று காலை இருசக்கர வாகனத்தில் செல்லும்போது வழிமறித்து சரமாரியாக தாக்கி கொலை செய்துள்ளனர்.

மக்கள் நடமாட்டம் மிகுந்த மேம்பாலத்தில் பட்ட பகலில் ரிலீஸ் டேட் அதிபர் கொலை செய்யப்பட்ட சம்பவம் சேலத்தில் பெரும் பரபரப்பை ஏற்படுத்தி உள்ளது. சம்பவ இடத்தில் கொலையாளிகள் பயன்படுத்திய இருசக்கர வாகனங்கள் மற்றும் காலணிகள் காவல்துறையினரால் கைப்பற்றப்பட்டுள்ளன. டேவிட் திமுக பிரமுகர் என்பது குறிப்பிடத்தக்கது.

டோல் கேட்டுகளுக்கு அல்வா... 2,400 கி.மீ. சுற்றல்: சேலத்தை அதிர வைத்த கொள்ளை; 'கில்லாடி' மாஸ்டர்மைண்ட் சிக்கியது எப்படி?

ராஜேஷ். எஸ் — Fri, 23 Oct 2026 21:22:01 +0530

சேலத்தில் 550 கிலோ வெள்ளி கொள்ளையடிக்கப்பட்ட வழக்கில் தனிப்படை போலீஸார் கும்பல் தலைவன் உள்ளிட்ட 5 பேரை அதிரடியாக கைது செய்தனர். அவர்களிடமிருந்து 323 கிலோ வெள்ளி ஆபரணங்கள் பறிமுதல் செய்யப்பட்டுள்ளன.

சேலம் பள்ளப்பட்டி சின்னேரி வயக்காடு பகுதியை சேர்ந்தவர் பாலசுப்பிரமணி (58), வெள்ளி வியாபாரியான இவரது பட்டறைக்கு கடந்த 12 ஆம் தேதி அதிகாலை முகமுடி அணிந்து வந்த 4 பேர் கொண்ட கும்பல் அங்கிருந்த காவலாளி வெங்கடேசனை இரும்பு கம்பியால் தாக்கி கை, கால்களை கட்டிப்போட்டு விட்டு, பூட்டை உடைத்து உள்ளே இருந்த 550 கிலோ வெள்ளி பொருட்களை கொள்ளையடித்து சென்றது.

கும்பலின் தலைவன் தஞ்சாவூரில் கைது

இதுதொடர்பாக மாநகர காவல் ஆணையர் ஏ.ஜி.பாபு மேற்பார்வையில், துணை ஆணையர் பாஸ்கரன் தலைமையில் 4 தனிப்படைகள் அமைக்கப்பட்டன. இந்த தனிப்படை போலீஸார் தீவிரமாக விசாரித்து வந்த நிலையில், தொழில்நுட்ப முறையிலும், பிற வகைகளிலும் தீவிர விசாரணை நடத்தினர்.

இந்நிலையில் கடந்த 12 நாட்களுக்கு பிறகு இந்த கொள்ளை கும்பலின் தலைவனான கோவையை சேர்ந்த அபிஷேக்கை தஞ்சாவூர் பேருந்து நிலையம் அருகே தனிப்படை போலீஸார் கைது செய்துள்ளனர். அவரிடம் நடத்தப்பட்ட விசாரணையில், குற்றவழக்கில் தொடர்புடைய ஸ்ரீதர், ஞானபிரகாசம், அருண்குமார், அண்ணாமலை ஆகிய 4 பேரையும் தனிப்படை போலீஸார் கைது செய்தனர். மேலும், கொள்ளைக்கு பயன்படுத்திய இரண்டு கார்களையும் பறிமுதல் செய்துள்ளனர்.

அவர்களிடம் இருந்து 323 கிலோ வெள்ளி ஆபரணங்கள் பறிமுதல் செய்யப்பட்டுள்ளன. மேலும், கொள்ளைக்கு பயன்படுத்திய முகமூடி, கையுறை, ஸ்பிரே, இரும்புக்கம்பி ஆகியவை கைப்பற்றப்பட்டுள்ளன. இது தவிர, வழக்கில் தலைமறைவாக உள்ள 3 பேரை தேடும் பணியில் தனிப்படையினர் ஈடுபட்டுள்ளனர்

இந்நிலையில், சேலம் சூரமங்கலம் காவல் ஆணையர் அலுவலகத்தில் மீட்கப்பட்ட வெள்ளிப் பொருட்களை மாநகர காவல் ஆணையர் ஏ.ஜி.பாபு வெள்ளிக்கிழமை பார்வையிட்டார்.

ஒரு இடத்தில் கூட சுங்கச்சாவடியை பயன்படுத்தவில்லை

தொடர்ந்து அவர் செய்தியாளர்களிடம் பேசுகையில், “இந்த சம்பவத்தில் பல்வேறு தொழில்நுட்பங்களை பயன்படுத்தி கொள்ளையர்களை பிடித்துள்ளோம். இன்னும் மூன்று பேர் தலைமறைவாக உள்ளனர். அவர்களை விரைவில் பிடித்து விடுவோம். கொள்ளை சம்பவத்தில் ஈடுபட்டவர்கள் ஏற்கனவே பல்வேறு குற்ற செயல்களில் ஈடுபட்டுள்ளதால், சம்பவ இடத்தில் இருந்த சிசிடிவி கேமராக்களை உடைத்துவிட்டு, ஹார்ட் டிஸ்கையும் சேதப்படுத்தியுள்ளனர். இதனால் நவீன தொழில்நுட்பம் தெரிந்தவர்களை தனிப்படையில் இணைத்து, இந்த குற்றவாளிகளை பிடித்துள்ளோம். சுமார் 2,400 கிலோ மீட்டர் சுற்றியுள்ளனர். இவர்கள் ஒரு இடத்தில் கூட சுங்கச்சாவடியை பயன்படுத்தவில்லை. இதனால் கொள்ளையடித்த இவர்களை பிடிப்பதில் சற்று சிரமம் ஏற்பட்டது. ஒரே ஒரு இடத்தில் மட்டும் சுமார் 2:30 மணி நேரம் கொள்ளைக்கு பயன்படுத்திய கார் நின்றிருந்தது. அதன் மூலமாகதான் கொள்ளையர்களை நெருங்கினோம்.

குறிப்பாக சேலத்திலிருந்து, கோவை, மதுரை சாலைகளில் உள்ள ஆயிரத்துக்கும் மேற்பட்ட சிசிடிவி கேமராக்களையும் ஆய்வு செய்தோம். இந்த குற்றவாளிகள் இரண்டு கார்களை பயன்படுத்தி உள்ளனர். அதனை பறிமுதல் செய்துள்ளோம். எஞ்சிய 3 குற்றவாளிகளை தீவிரமாக தேடி வருகிறோம். அவர்கள் பிடிபட்ட பிறகு, மீதி வெள்ளி பொருட்களும் பறிமுதல் செய்யப்படும். கைதான அனைவருக்கும் வெவ்வேறு குற்ற சம்பவங்களில் தொடர்பு உள்ளதால், அனைவரையும் மீண்டும் காவலில் எடுத்து விசாரிக்க திட்டமிட்டுள்ளோம்” என்று கூறினார். பேட்டியின் போது, மாநகர காவல் துணை ஆணையர் பாஸ்கரன், உதவி ஆணையர் ரமலி ராமலட்சுமி உள்ளிட்டோர் உடனிருந்தனர்.

வீடியோ காலில் பார்த்து கதறிய மகள்: சொந்த ஊரில் அடக்கமான தஞ்சாவூரு மண்ணெடுத்து குரல்!

ராஜேஷ். எஸ் — Fri, 23 Oct 2026 18:08:17 +0530

சென்னையில் உடல்நலக் குறைவால் உயிரிழந்த பாடகர் கிருஷ்ணராஜின் உடல் அவரது சொந்த ஊரில் நல்லடக்கம் செய்யப்பட்டது.

தேனிசைத் தென்றல் தேவாவின் இசையில், 1990-களில் பல வெற்றிப் பாடல்களைப் பாடி ரசிகர்களின் மனதில் இடம்பிடித்தவர் பின்னணிப் பாடகர் கிருஷ்ணராஜ். ‘பொற்காலம்’ திரைப்படத்தில் இடம்பெற்ற ‘தஞ்சாவூரு மண்ணெடுத்து’ பாடல் மூலம் மிகவும் பிரபலமான இவர், ‘வெள்ளரிக்கா பிஞ்சு வெள்ளரிக்கா’, ‘திருப்பதி ஏழுமலை வெங்கடேசா’, ‘காத்தடிக்குது காத்தடிக்குது’, ‘அய்யய்யோ’ உள்ளிட்ட ஏராளமான திரைப்படப் பாடல்களைப் பாடியுள்ளார். ‘தஞ்சாவூரு மண்ணெடுத்து’ பாடலுக்காகத் தமிழக அரசின் சிறந்த பின்னணிப் பாடகர் விருதையும் பெற்றுள்ளார்.

இந்நிலையில், கிருஷ்ணராஜ் உடல்நலக் குறைவால் நேற்று சென்னையில் காலமானார். அவரது மறைவு திரையுலகினர் மற்றும் இசை ரசிகர்களிடையே பெரும் சோகத்தை ஏற்படுத்தியுள்ளது. முதலமைச்சர் விஜய் கிருஷ்ணராஜின் மறைவு அதிர்ச்சியை ஏற்படுத்தியதாக இரங்கல் தெரிவித்திருந்தார்.

இதையடுத்து, அவரது உடல் சொந்த ஊரான சேலம் மாவட்டம், வேம்படிதாளத்திற்குக் கொண்டுவரப்பட்டு, கிருஷ்ணராஜன் பூர்வீக இல்லத்தில் அஞ்சலிக்காக வைக்கப்பட்டது. அவர் புகழ்பெற்ற ‘தஞ்சாவூரு மண்ணெடுத்து’ பாடல் ஒலிக்க, உறவினர்கள், நண்பர்கள் மற்றும் பொதுமக்கள் அவரது உடலுக்கு அஞ்சலி செலுத்தினர்.

இதனைத் தொடர்ந்து, வேம்படிதாளம் பகுதியில் உள்ள மயானத்தில், அவர்களது குடும்ப‌ வழக்கப்படி இறுதிச் சடங்குகள் நடைபெற்றன. அவரது முதல் மகள் ஜீவ ரேகா அமெரிக்காவில் உள்ளதால் தன்னுடைய தந்தை இறுதி ஊர்வலத்தை வீடியோ கால் மூலம் பார்த்தார். இறுதி ஊர்வலத்தில் அவரது அண்ணன் மகன் பாலச்சந்தர், பாடகர் கிருஷ்ணராஜ் பாடிய பாடல்களை இறுதி ஊர்வலத்தில் பாடியபடி ஊர்வலம் நடைபெற்றது. தொடர்ந்து, பாடகர் கிருஷ்ணராஜன் உடல் அவரது சொந்த கிராமத்தில் நல்லடக்கம் செய்யப்பட்டது.

முருகனை மனமுருகி வேண்டிய எடப்பாடி பழனிசாமி.. உலகப் புகழ்பெற்ற கோயிலுக்கு திடீர் பயணம் - காரணம் என்ன?

ராஜேஷ். எஸ் — Fri, 23 Oct 2026 17:24:35 +0530

உலகப் பிரசித்தி பெற்ற 146 அடி உயர பிரம்மாண்ட முத்துமலை முருகன் கோயிலில் அதிமுக பொதுச்செயலாளர் எடப்பாடி பழனிசாமி சுவாமி தரிசனம் செய்தார்.

சேலம் மாவட்டம், ஏத்தாப்பூரில் அமைந்துள்ளது உலகப் புகழ்பெற்ற அருள்மிகு முத்துமலை முருகன் திருக்கோயில். இந்த கோயிலுக்கு அதிமுக பொதுச்செயலாளர் எடப்பாடி பழனிசாமி இன்று நேரில் சென்று சுவாமி தரிசனம் செய்து, பக்தர்களுக்கு அன்னதானம் வழங்கினார்.

உலகிலேயே மிக உயரமான 146 அடி பிரம்மாண்ட திருவுருவத்துடன் கம்பீரமாகக் காட்சியளிக்கும் ஏத்தாப்பூர் முத்துமலை முருகன் கோயிலின் கிழக்கு நுழைவாயிலில், புதிதாகத் திருப்பணிகள் முடிக்கப்பட்டு எழிலார்ந்த ராஜகோபுரம் நிர்மாணிக்கப்பட்டுள்ளது. இத்திருக்கோபுரத்தின் மகா கும்பாபிஷேகப் பெருவிழா வரும் 25-ஆம் தேதி ஞாயிற்றுக்கிழமை வெகுவிமரிசையாக நடைபெற உள்ளது. இப்பெருவிழாவை முன்னிட்டு நாள்தோறும் வேதமந்திரங்கள் முழங்க சிறப்பு யாகசாலை பூஜைகளும், தீபாராதனைகளும் நடைபெற்று வருகின்றன.

மனமுருகிப் பாலாபிஷேகம் செய்து சிறப்பு வழிபாடு

இரண்டாம் கால யாகசாலை பூஜை நடைபெற்ற இன்று அதிமுக பொதுச்செயலாளர் எடப்பாடி பழனிசாமி நேரில் வருகை தந்தார். அவருக்குக் கோயில் நிர்வாகத்தின் சார்பிலும், அதிமுக தொண்டர்கள் மற்றும் பக்தர்கள் சார்பிலும் உற்சாக வரவேற்பு அளிக்கப்பட்டது. தொடர்ந்து, பிரம்மாண்ட முருகன் சிலையின் உச்சிப் பகுதிக்குச் சென்ற அதிமுக பொதுச் செயலாளர் எடப்பாடி பழனிசாமி, வெற்றிவேலுக்குத் தன் திருக்கரங்களால் மனமுருகிப் பாலாபிஷேகம் செய்து சிறப்பு வழிபாடு நடத்தினார்.

திருக்கரங்களால் அன்னாதானம் வழங்கினார்

அதனைத் தொடர்ந்து மூலவர் சந்நிதானத்தில் நடைபெற்ற மகா தீபாராதனையில் கலந்துகொண்டு சாமி தரிசனம் மேற்கொண்டார். பின்னர் யாகசாலை பூஜைகள் மற்றும் ஜோதிர்லிங்க வழிபாட்டிலும் பங்கேற்று உலக மக்கள் நலன் வேண்டி பிரார்த்தனை செய்தார். வழிபாட்டினைத் தொடர்ந்து அங்கு திரண்டிருந்த ஆயிரக்கணக்கான பக்தர்களுக்குக் அதிமுக பொதுச்செயலாளர் எடப்பாடி பழனிசாமி தன் திருக்கரங்களால் அன்னதானம் வழங்கி சிறப்பித்தார்.

மக்களை பதறவைக்கும் மரணப் பள்ளம்.. தொடரும் உயிர்ப்பலி - நெடுஞ்சாலை துறை என்ன செய்யப்போகிறது?

ராஜேஷ். எஸ் — Thu, 22 Oct 2026 14:19:53 +0530

சேலம் – பெங்களூரு தேசிய நெடுஞ்சாலையில் மரண பள்ளங்கள்.

உயிர் இழப்புகள் தொடர்வதை தடுக்க சாலையை புதுப்பிக்க மக்கள் கோரிக்கை.

சேலம் மாவட்டம், ஓமலூர் அருகே தேசிய நெடுஞ்சாலையில் உள்ள மரண பள்ளங்களால், அடுத்தடுத்து விபத்துகள் நிகழ்ந்து உயிரிழப்புகள் அதிகரித்து வருவது அதிர்ச்சியை ஏற்படுத்தியுள்ளது. சாலையை புதுப்பிக்க பொதுமக்கள் கோரிக்கை விடுத்துள்ளனர்.

ஓமலூர் ஆர்.சி.செட்டிப்பட்டி, காமலாபுரம் ரவுண்டானா பகுதிகளில் விபத்துகளை தடுக்க மேம்பாலம் கட்டப்பட்ட நிலையில், அதற்காக உடைத்து சேதமடைந்த சர்வீஸ் சாலைகள் இரண்டு ஆண்டுகளுக்கும் மேலாக சீரமைக்கப்படாமல் கிடக்கின்றன. தற்போது பெய்து வரும் மழையால் சாலைகள் மேலும் சிதிலமடைந்து, வாகன ஓட்டிகளுக்கு உயிராபத்தை ஏற்படுத்தும் பள்ளங்களாக மாறியுள்ளன. கடந்த ஒரு வாரத்தில் மட்டும் இரண்டு பேர் உயிரிழந்துள்ள நிலையில், 50-க்கும் மேற்பட்டோர் படுகாயமடைந்துள்ளனர். பலரும் உடல் உறுப்புகளை இழக்கும் அபாயத்தையும் எதிர்கொண்டுள்ளனர்.

பலமுறை புகார் அளித்தும் நடவடிக்கை எடுக்காத நெடுஞ்சாலை ஆணைய அதிகாரிகள் மீது பொதுமக்கள் அதிருப்தி தெரிவித்துள்ளனர்.

இன்னும் எத்தனை உயிர்களை பலிகொடுத்தால்தான் நடவடிக்கை எடுக்கப்படும். உயிரிழப்புகளை தடுக்க, சேதமடைந்த சர்வீஸ் சாலைகளை உடனடியாக சீரமைக்க வேண்டும் என ஒட்டுமொத்த மக்களும் மத்திய அரசுக்கு கோரிக்கை வைத்துள்ளனர்.

இந்த நிலையில், சம்பந்தப்பட்ட கட்டுமான ஒப்பந்ததாரருக்கு தேசிய நெடுஞ்சாலை ஆணையம் அல்லது மாவட்ட நிர்வாகத்தின் மூலம் அதிகாரப்பூர்வமாக சம்மன் அல்லது விளக்கம் கேட்பு நோட்டீஸ் அனுப்பப்பட்டு நடவடிக்கை எடுக்கப்பட்டு வருகிறது.

ஆத்தூர் வழியாக சேலம் - சென்னைக்கு புதிய பகல் நேர ரயில் எப்போது? - பயணிகளுக்கு குட் நியூஸ் வருமா?

ராஜேஷ். எஸ் — Wed, 21 Oct 2026 19:12:23 +0530

"பகல் நேரத்தில் சேலத்தில் இருந்து ஆத்தூர் வழியாக சென்னைக்கு புதிய ரயில் இயக்கப்பட வேண்டும் என பிரதமர் மற்றும் ரயில்வே துறை அமைச்சரிடம் கோரிக்கை வைக்க உள்ளேன்" என்று கே.பி.ராமலிங்கம் தெரிவித்துள்ளார்.

சேலம் - கரூர் ரயில் பாதையை இரட்டை வழி பாதையாக மாற்ற ரூ.2,241 கோடி ரூபாய் நிதி ஒதுக்கீடு செய்த பிரதமர் நரேந்திர மோடிக்கு நன்றி தெரிவிப்பதாக பாரதிய ஜனதா கட்சியின் மாநில துணைத்தலைவர் கே.பி. ராமலிங்கம் தெரிவித்துள்ளார்.

பிரதமருக்கு நன்றி

சேலம் ரயில்வே கோட்டத்திற்கு உட்பட்ட பகுதிகளில் நடைபெற்று வரும் வளர்ச்சி பணிகள் மற்றும் மேற்கொள்ள வேண்டிய திட்டங்கள் பொதுமக்களின் கோரிக்கைகள் குறித்து பாரதிய ஜனதா கட்சியின் மாநில துணைத்தலைவரும் முன்னாள் எம்.பியுமான, கே.பி.ராமலிங்கம் சேலம் ரயில்வே கோட்ட மேலாளர் பன்னா லாலை சந்தித்து கோரிக்கை மனு வழங்கினார். இதனை அடுத்து செய்தியாளர்களிடம் அவர் கூறுகையில், "சேலம், கரூர், திண்டுக்கல் ரயில் வழி பாதையில் இரட்டை பாதையாக மாற்றுவதற்காக ரூ.2,241 கோடி மத்திய அரசு ஒதுக்கீடு செய்துள்ளது. இதன் மூலம் தென் மாவட்டங்கள் தொழில் நகரங்களான நாமக்கல் சேலம் மற்றும் பெங்களூருடன் இரட்டை வழி பாதையாக இணைக்கப்படும் இதன் மூலம் ரயில்களின் காத்திருப்பு நேரம் குறைந்து கூடுதல்கள் ரயில்கள் இயக்க வாய்ப்புள்ளது. இத்தகைய வாய்ப்பை ஏற்படுத்திக் கொடுத்த பிரதமர் நரேந்திர மோடிக்கு பொதுமக்கள் சார்பாக நன்றியை தெரிவித்துக் கொள்கிறேன்.

ஆத்தூர் வழியாக சென்னைக்கு புதிய ரயில்

சமூக நல்லிணக்கம் வலிமையான பாரதம் ஆகியவற்றை மையப்படுத்தி சேலம் கோட்டத்தில் ரயில் நிலையங்களை நவீனப்படுத்துவதில் மத்திய அரசு கவனம் செலுத்தி வருகிறது. வரலாற்று சிறப்புமிக்க சங்ககிரி துர்க்கை ரயில் நிலையத்தை இதுபோன்று நவீனப்படுத்த வேண்டும் என பிரதமரிடம் கோரிக்கை வழங்க உள்ளேன். மேலும், சேலத்தில் இருந்து சென்னைக்கு இரவில் இயக்கப்படும் எக்ஸ்பிரஸ் ரயிலை கரூர் வரை இயக்க நடவடிக்கை எடுக்க வேண்டும் என்று கோரிக்கையும் அளிக்கப்பட உள்ளது. பகல் நேரத்தில் சேலத்தில் இருந்து ஆத்தூர் வழியாக சென்னைக்கு புதிய ரயில் இயக்கப்பட வேண்டும். சேலம் - பாண்டிச்சேரிக்கு ரயில் இயக்கப்பட வேண்டும் என்பது உள்ளிட்ட கோரிக்கைகளும் பிரதமர் மற்றும் ரயில்வே துறை அமைச்சரிடம் தெரிவிக்கப்பட உள்ளது. மேட்டூர் ரயில் நிலைய பகுதியில் உள்ள சக்தி காளியம்மன் கோவில் வளாகம் குறித்து ரயில்வே நிர்வாகம் நோட்டீஸ் வழங்கியுள்ள நிலையில் அது குறித்தும் சேலம் ரயில்வே கோட்ட அதிகாரிகளிடம் கோரிக்கை வைக்கப்பட்டுள்ளது” என்று தெரிவித்தார்.