TVK Vijay: ஒரு பக்கம் ஜனநாயகன்.. மறுபக்கம் தவெக! பிறந்த நாளில் டபுள் ட்ரீட் தரப்போகும் விஜய்?

தமிழக வெற்றிக் கழகத்தின் தலைவர் விஜய்யின் பிறந்தநாளை முன்னிட்டு ஜனநாயகன் மற்றும் அவரது அரசியல் சுற்றுப்பயணம் குறித்த முக்கிய அறிவிப்புகள் வெளியாகும் என்று எதிர்பார்க்கப்படுகிறது.

தவெக தலைவர் விஜய்

Source : twitter

தமிழ் திரையுலகின் உச்சநட்சத்திரமாக உலா வருபவர் நடிகர் விஜய். இவர் கடந்தாண்டு பிப்ரவரி மாதம் தமிழக வெற்றிக் கழகத்தை தொடங்கியது முதல் அடுத்தடுத்து பல பரபரப்பான முடிவுகளை எடுத்தார். அதாவது திரைப்படங்களில் நடிப்பதில் இருந்து விடைபெறுவதாகவும் முழுமூச்சில் நடிப்பில் கவனம் செலுத்துவதாகவும் அறிவித்தார். 

விஜய்யின் பிறந்த நாள்:

அவரது கடைசி படமான ஜனநாயகனின் படத்தின் படப்பிடிப்பு முடிந்து படத்தின் இறுதிக்கட்ட பணிகள் விறுவிறுப்பாக நடந்து வருகிறது. இந்த நிலையில், வரும் 22ம் தேதி நடிகர் விஜய்யின் பிறந்தநாள் கொண்டாடப்பட உள்ளது. அவரது பிறந்தநாளை கோலாகலமாக கொண்டாட தமிழக வெற்றிக் கழகத்தினர் திட்டமிட்டுள்ளனர். 

அடுத்தாண்டு சட்டமன்ற தேர்தல் நடைபெற உள்ள நிலையில் நடிகர் விஜய் தனது நகர்வுகளை தீவிரமாக முன்னெடுக்க உள்ளார். தங்களுடைய அரசியல் எதிரி திமுக-தான் என்றும், அவர்களை எதிர்த்தே தமிழ்நாட்டில் அரசியல் செய்வதாகவும் திட்டவட்டமாக விஜய் அறிவித்துவிட்டார். 

வெளியாகும் முக்கிய அறிவிப்பு?

இந்த நிலையில், அவரது பிறந்த நாளை முன்னிட்டு விஜய் ரசிகர்களுக்கும், தமிழக வெற்றிக் கழகத்தின் தொண்டர்களுக்கும் விருந்தாக முக்கிய அறிவிப்பு வெளியாக உள்ளது. விஜய்யின் கடைசி படமான ஜனநாயகன் குறித்த ஏதாவது ஒரு முக்கிய அறிவிப்பு, போஸ்டர் ஏதாவது வெளியாகும் என்று கருதப்படுகிறது. 

அதேபோல, தமிழ்நாட்டில் சட்டமன்ற தேர்தலுக்கு இன்னும் 10 மாதங்களே உள்ள நிலையில் விஜய் தமிழ்நாடு முழுவதும் சுற்றுப்பயணம் மேற்கொள்ள உள்ளார். ஆனால், அவரது சுற்றுப்பயணம் குறித்த அதிகாரப்பூர்வ அறிவிப்பு இதுவரை வெளியாகவில்லை. இதனால், விஜய்யின் பிறந்தநாளில் சுற்றுப்பயணம் குறித்த முக்கிய அறிவிப்பு வெளியாக வாய்ப்பு உள்ளதாகவும் கூறப்படுகிறது. 

கூட்டணி கணக்கு:

மேலும், அவரது பிறந்தநாளை முன்னிட்டு அவர் தமிழக வெற்றிக் கழகத்தின் தொண்டர்களையும், நிர்வாகிகளையும் சந்திக்கவும் உள்ளதாக கூறப்படுகிறது. ஜனநாயகன் படத்தின் படப்பிடிப்பு முழுவதும் நிறைவடைந்துள்ள நிலையில் நடிகர் விஜய் இனி முழுவதும் அரசியலிலே கவனம் செலுத்த முடிவு செய்துள்ளார். 
திமுக-வை மிக கடுமையாக விமர்சித்து வரும் விஜய் மறுமுனையில் கூட்டணிக்கான நடவடிக்கையிலும் தீவிரமாக முயன்று வருகிறார்.  வரும் 22ம் தேதி விஜய்யின் 51வது பிறந்தநாளில் அவரது திரை ரசிகர்களுக்கும், தவெக தொண்டர்களுக்கும் மகிழ்ச்சி தரும் விதமாக அறிவிப்புகள் வெளியாகும் என்று கூறப்படுகிறது. 

சட்டமன்ற தேர்தலில் களமிறங்கும் விஜய் தனது தவெக-வை பூத் வாரியாக பலப்படுத்த ஏற்கனவே நிர்வாகிகளுக்கு உத்தரவிட்டுள்ளார். தேர்தல் வியூகங்களை பிரசாந்த கிஷோர், ஆதவ் அர்ஜுனா, ஜான் ஆரோக்கியசாமி ஆகியோருடன் இணைந்தும் வகுத்து வருகிறார்.