"பொய் பேசுவதே அமித்ஷாவுக்கு வேலை" - போட்டுத்தாக்கிய பொன்முடி!
திமுக தலைமையிலான கூட்டணியை யாராலும் உடைக்கவோ, பிரிக்கவோ முடியாது" - முன்னாள் அமைச்சர் பொன்முடி
விழுப்புரம்: "தமிழகம் வளர்ச்சி அடைவது பிரதமர் மோடிக்கும், உள்துறை அமைச்சர் அமித்ஷாவுக்கும் பிடிக்கவில்லை. திமுக தலைமையிலான கூட்டணியை யாராலும் உடைக்கவோ, பிரிக்கவோ முடியாது" என்று முன்னாள் அமைச்சர் பொன்முடி அவர்கள் திருவெண்ணெய்நல்லூரில் நடைபெற்ற கண்டன ஆர்ப்பாட்டத்தில் ஆவேசமாக உரையாற்றினார்.
மத்திய அரசைக் கண்டித்து ஆர்ப்பாட்டம்:
சமையல் எரிவாயு சிலிண்டர் தட்டுப்பாட்டைக் கட்டுப்படுத்தத் தவறிய மத்திய அரசைக் கண்டித்தும், தமிழகத்திற்கு வழங்க வேண்டிய உரிய நிதிப் பங்கீட்டை வழங்க மறுக்கும் மத்திய பாஜக அரசின் போக்கைக் கண்டித்தும், விழுப்புரம் மாவட்டம் திருவெண்ணெய்நல்லூர் கடைவீதியில் திமுக சார்பில் கண்டன ஆர்ப்பாட்டம் நடைபெற்றது. இந்த ஆர்ப்பாட்டத்திற்குத் தலைமை தாங்கி முன்னாள் அமைச்சர் பொன்முடி கண்டன முழக்கங்களை எழுப்பினார்.
நிறுத்தி வைக்கப்பட்ட கோடிக்கணக்கான நிதி:
ஆர்ப்பாட்டத்தில் தொண்டர்களிடையே உரையாற்றிய பொன்முடி, மத்திய அரசு தமிழகத்திற்கு இழைக்கும் நிதி அநீதிகளைப் பட்டியலிட்டார், அப்போது, கல்வி நிதி 3,458 கோடி நிறுத்தம், 100 நாள் வேலைத் திட்டம் 2,000 கோடி நிலுவை, குடிநீர் இணைப்புத் திட்டம் 3,112 கோடி நிதி வழங்கப்படவில்லை.
"தமிழகத்திற்கு நியாயமாகக் கிடைக்க வேண்டிய நிதியை முடக்கி வைத்துவிட்டு, தமிழகத்தின் வளர்ச்சியைத் தடுக்க மத்திய அரசு பார்க்கிறது. ஆனால், இக்கட்டான சூழலிலும் தமிழக முதல்வர் மின் கட்டணத்தில் ₹2 மானியம் வழங்கி மக்களுக்குப் பக்கபலமாக இருக்கிறார்" என்று அவர் புகழாரம் சூட்டினார்.
மோடி - அமித்ஷா மீதான விமர்சனம்:
மத்திய ஆட்சியாளர்களைக் கடுமையாக விமர்சித்த பொன்முடி, "தமிழ்நாடு அடைந்து வரும் அபரிமிதமான வளர்ச்சியைப் பார்த்து பிரதமர் மோடிக்கும், அமித்ஷாவுக்கும் பொறாமை ஏற்பட்டுள்ளது. பொய் பேசுவதையே தொழிலாகக் கொண்டுள்ள அமித்ஷா, தமிழ்நாட்டைக் குறிவைத்து ஏதேனும் செய்யத் துடிக்கிறார். ஆனால், அவரது முயற்சிகள் இங்கே ஒருபோதும் பலிக்காது. திமுகவின் கூட்டணிக் கட்சிகள் கொள்கை ரீதியாக ஒன்றுபட்டு நிற்கின்றன. இந்த கூட்டணியை யாராலும் அசைக்க முடியாது," என்று தெரிவித்தார்.
மதவாத அரசியலுக்கு எதிரான முழக்கம்:
ஒன்றிய அரசு முன்னெடுக்கும் மதவாத அரசியலைத் தமிழக மக்கள் ஒருபோதும் ஏற்க மாட்டார்கள் என்று குறிப்பிட்ட அவர், இத்தகைய பிரிவினைவாத அரசியலை எதிர்கொள்ள திமுகவும் அதன் தோழமைக் கட்சிகளும் தொடர்ந்து ஓரணியில் நின்று போராடும் என்று உறுதிபடத் தெரிவித்தார். இந்த ஆர்ப்பாட்டத்தில் திமுக நிர்வாகிகள், உள்ளாட்சிப் பிரதிநிதிகள் மற்றும் பொதுமக்கள் என ஏராளமானோர் கலந்து கொண்டு மத்திய அரசுக்கு எதிராகக் கண்டன முழக்கங்களை எழுப்பினர்.
தலைப்பு செய்திகள்
ட்ரெண்டிங் செய்திகள்
