”திமுக கூட்டணியில் தொகுதி பங்கீடு ஆலோசனை” - கோவையில் செய்தியாளர்களிடம் ஈஸ்வரன் ஓபன் டாக்
நிலையான அரசு தான் வளர்ச்சிக்கு அடிப்படை என கூட்டணி அரசியல் குறித்து கோவையில் ஈஸ்வரன் கருத்து.
கோவையில் நடைபெற்ற திருமண நிகழ்ச்சியில் கலந்து கொண்ட கொங்கு கட்சியின் தலைவர் ஈஸ்வரன், பின்னர் செய்தியாளர்களை சந்தித்து பல்வேறு அரசியல் கேள்விகளுக்கு பதிலளித்தார்.
திராவிட முன்னேற்றக் கழக (Dravida Munnetra Kazhagam) கூட்டணியில் தொகுதி பங்கீடு தொடர்பாக நாளை அழைப்பு விடுக்கப்பட்டுள்ளதாகவும், அதற்காக தாங்கள் செல்வதாகவும் தெரிவித்தார்.
அதிக கட்சிகள் இருப்பதால் கூட்டணிகள் குறையும் என்ற தகவல்கள் குறித்து கேட்கப்பட்டபோது, “திமுகவினர் அவ்வாறு கூறியதாக தெரியவில்லை” என பதிலளித்தார். எத்தனை தொகுதிகள் கேட்பீர்கள் என்ற கேள்விக்கு, “நாங்கள் முடிவு செய்து அறிவிப்போம்” என்றார்.
தமிழகத்தில் கூட்டணி ஆட்சி குறித்து அவர் கூறுகையில், “நிலையான அரசாங்கம் முக்கியம். அது இல்லாமல் மாநில வளர்ச்சி உறுதி செய்ய முடியாது. ஒற்றைக் கட்சி அரசாங்கம் இருந்தால் அது நிலைத்தன்மையுடன் இருக்கலாம். ஆனால் சூழ்நிலையே முடிவு செய்யும்” என்றார்.
கூட்டணி ஆட்சி என்பது அனைத்திந்திய அண்ணா திராவிட முன்னேற்றக் கழகத்தின் பலவீனம் காரணமா என்ற கேள்விக்கு, “அதை அப்படி கூற முடியாது. ஒவ்வொரு தேர்தலிலும் இத்தகைய விவாதங்கள் எழுவது இயல்பானது” என பதிலளித்தார். புதிய கட்சிகள் உருவாகி வருவதால் கூட்டணி அரசியல் குறித்து அதிகமாக பேசப்படுகிறது என்றும் தெரிவித்தார்.
எதிர்க்கட்சிகளின் தேர்தல் வாக்குறுதிகள் குறித்த கேள்விக்கு, “ஆட்சிக்கு வர வேண்டும் என்பதற்காக வாக்குறுதிகள் வழங்கப்படுகின்றன. தற்போதைய ஆட்சியில் மக்கள் பெற்ற நன்மைகளை கருத்தில் கொண்டு அறிவிப்புகள் வெளியிடப்படுகின்றன” என்றார்.
மேலும், “எங்கள் கூட்டணியில் மகளிருக்கு ரூ.5,000 வழங்கப்பட்டுள்ளது. இதனை தேர்தல் வாக்குறுதியாக முன்வைக்கவில்லை. கடந்த தேர்தலில் கூறியவற்றை நிறைவேற்றியுள்ளோம். அதனால் மக்கள் எங்களிடம் நம்பிக்கை வைத்துள்ளனர்” என தெரிவித்தார்.
“கல்லாப்பெட்டி கட்சி” என்ற விமர்சனங்கள் குறித்து கேட்கப்பட்டபோது, “தேர்தல் நேரத்தில் இதுபோன்ற குற்றச்சாட்டுகள் சாதாரணம். தங்களின் குறைகள் வெளிப்படாதபடி மற்றவர்கள் பேசுவது வழக்கம்” என்று பதிலளித்தார்.
தலைப்பு செய்திகள்
ட்ரெண்டிங் செய்திகள்
