CM Vijay-Vaiko Meet: ’’விசிலுக்கு ஓட்டு போட்டாங்க’’ வீட்டு ஊழியர்களை அறிமுகம் செய்த துரை வைகோ- திருஷ்டி சுற்றிய விஜய்
சிலர் முதலமைச்சர் விஜய்க்கு திருஷ்டி சுற்றிக் கொண்டாடினர். பதிலுக்கு முதல்வர் விஜய் அவருக்கு திருஷ்டி சுற்றினார்.
தமிழ்நாடு முதலமைச்சர் விஜய், மரியாதை நிமித்தமாக பல்வேறு அரசியல் கட்சித் தலைவர்களைச் சந்தித்து வரும் நிலையில், மதிமுக பொதுச் செயலாளர் வைகோவை நேரில் சந்தித்தார். இன்று பிற்பகலில் அண்ணா நகரில் உள்ள வைகோ இல்லத்துக்கு நேரில் சென்றார் முதல்வர் விஜய்.
முன்னதாக முன்னாள் முதல்வர் ஸ்டாலின், துணை முதல்வர் உதயநிதியையும் நேரில் சந்தித்துப் பேசியவர் வைகோ வீட்டுக்கு வந்தார். அவரை வாசலிலேயே நின்று வரவேற்ற துரை வைகோ எம்.பி. அவரை உள்ளே அழைத்துச் சென்றார்.
வீட்டு பணிப்பெண்கள் விருப்பம்
தொடர்ந்து வைகோவிடம் பேசிக் கொண்டிருந்த முதல்வர் விஜயுடன், புகைப்படம் எடுத்துக்கொள்ள அவரின் வீட்டு பணிப் பெண்கள் விருப்பம் தெரிவித்தனர். தொடர்ந்து அவர்கள் அழைத்து வரப்பட்டனர்.
அப்போது துரை வைகோ, இவர்கள் எல்லாம் விசிலுக்குத்தான் ஓட்டு போட்டனர் என்று முதல்வர் விஜயிடம் தெரிவித்தார். தொடர்ந்து பணிப் பெண்கள் அனைவரும் அவருடன் புகைப்படம் எடுத்துக்கொண்டனர்.
திருஷ்டி சுற்றிய விஜய்
அவர்களில் சிலர் முதலமைச்சர் விஜய்க்கு திருஷ்டி சுற்றிக் கொண்டாடினர். பதிலுக்கு முதல்வர் விஜய் அவருக்கு திருஷ்டி சுற்றினார். ஒருவர் காலில் விழுந்து ஆசிர்வாதம் பெற்றார். இந்த நிகழ்வு நெகிழ்ச்சியை ஏற்படுத்தியது.
அரசியல் பெருந்தன்மை
முதலமைச்சர் விஜய் தன்னைச் சந்தித்தது குறித்துப் பேசிய வைகோ, ’’இது விஜயின் அரசியல் பெருந்தன்மையையும் முதிர்ச்சியையும் வெளிப்படுத்துகிறது; தமிழ்நாட்டில் ஆரோக்கியமான அரசியலை வளர்க்க அவர் எடுத்த முடிவு’’ என்று புகழாரம் சூட்டினார்.
தொடர்ந்து பாமக தலைவர் அன்புமணி ராமதாஸ், நாம் தமிழர் கட்சியின் தலைமை ஒருங்கிணைப்பாளர் சீமான் ஆகியோரையும் முதல்வர் விஜய் நேரில் சந்தித்து வாழ்த்துப் பெற்றார்.
இந்த சம்பவம் நாகரிக அரசியலையும் அரசியல் மாண்பையும் காட்டுவதாக, அரசியல் வல்லுநர்கள் கருத்துத் தெரிவித்துள்ளனர்.
தலைப்பு செய்திகள்
ட்ரெண்டிங் செய்திகள்
