Annamalai: தமிழ்நாட்டு மக்களுக்கு புரியும் மொழியில் பாஜக பேசவில்லை - அண்ணாமலை ராஜினாமா கடித விவரங்கள்

Annamalai: தமிழ்நாடு அரசியல் சார்ந்த விவகாரங்களில் தேசிய தலைமையுடன் ஒத்துப்போகவில்லை என, பாஜக தலைமைக்கு எழுதிய ராஜினாமா கடிதத்தில் அண்ணாமலை தெரிவித்துள்ளார்.

அண்ணாமலை

Source : twitter

Annamalai: கட்சிக்குள்ளும் வெளியேயும் பல தடைகளை தாண்டி வந்துள்ளேன் என, பாஜக தலைமைக்கு எழுதிய ராஜினாமா கடிதத்தில் அண்ணாமலை தெரிவித்துள்ளார்.

அண்ணாமலை ராஜினாமா கடிதம்

பாஜகவில் இருந்து விலகுவது தொடர்பாக கட்சி தலைமைக்கு அண்ணாமலை வழங்கிய ராஜினாமா கடிதம் வெளியாகியுள்ளது. அதில், நமது மாண்புமிகு பிரதமர் நரேந்திர மோடியின் தலைமையால் ஈர்க்கப்பட்டு, தமிழ்நாட்டில் நேர்மறையான மாற்றத்தை ஏற்படுத்தவும், அரசியல் எவ்வாறு நடத்தப்படுகிறது என்பதை மேம்படுத்தவும் என்ற நோக்கத்துடன் ஆறு ஆண்டுகளுக்கு முன்பு நான் பாரதிய ஜனதா கட்சியில் இணைந்தேன். மிக முக்கியமாக, அரசியல் என்பது உயரடுக்கு மக்களுக்கும் தேர்ந்தெடுக்கப்பட்ட சிலருக்குமான பாதை மட்டுமல்ல; சாதாரண மக்களுக்குமான பாதையாகவும் இருக்க வேண்டும் என்ற எண்ணத்துடன் செயல்பட்டேன். மிக இளம் வயதிலும், அனுபவம் குறைந்த நிலையிலும் என்மீது நம்பிக்கை வைத்து முக்கிய பொறுப்புகளையும் தலைமைப் பொறுப்புகளையும் வழங்கிய பாஜக தலைமைக்கு நான் மிகுந்த நன்றியுள்ளவன்.

கட்சிக்குள்ளேயே பல தடைகள் - அண்ணாமலை

பல தசாப்தங்களாக நிலவிய அரசியல் உரையாடல்களால் சோர்வடைந்திருந்த தமிழ்நாட்டு மக்கள் மாற்றத்தை ஏங்கிக் கொண்டிருந்தனர். கடந்த பத்து ஆண்டுகளில் பல்வேறு தருணங்களில் அந்த மாற்றத்திற்கான வாய்ப்புகள் உருவாகின. ஆனால் அவை நிலைத்து நிற்க முடியாமல், விரைவாக மக்களின் நினைவிலிருந்து மறைந்துவிட்டன. தேசியக் கட்சிகள் தமிழ்நாட்டு மக்கள் புரிந்துகொள்ளும் மொழியில் பேசவில்லை. அந்த நிலையை மாற்ற நான் முயற்சி செய்தேன். அதேசமயம், கட்சிக்குள்ளும் வெளியிலும் இருந்த பல்வேறு தடைகள், எதிர்ப்புகள் மற்றும் சவால்களை மீறியும் குறிப்பிடத்தக்க வெற்றியைப் பெற்றிருக்கிறேன்.

தலைமையுடன் ஒத்துப்போகவில்லை - அண்ணாமலை

பிராந்திய மக்களின் விருப்பங்களிலும் உணர்வுகளிலும் ஆழமாக வேரூன்றிய ஒரு தேசியவாதியாக, என் மொழியின் செழுமை, என் கலாச்சாரத்தின் பல்வகைமை மற்றும் என் மண்ணின் தனித்துவமான பாரம்பரியம் ஆகியவற்றில் நான் பெருமை கொள்கிறேன். இந்தியா வலிமையாகவும் ஒன்றுபட்டதாகவும் இருக்க வேண்டுமெனில், அதன் அனைத்து மாநிலங்களின் மற்றும் சமூகங்களின் வலிமை, கண்ணியம் மற்றும் அபிலாஷைகளின் மீது அது கட்டமைக்கப்பட வேண்டும் என்று நான் உறுதியாக நம்புகிறேன். நான் தொடர்ந்து முன்வைத்து வந்த பல்வேறு கோரிக்கைகள் மற்றும் கவலைகளுக்கு உறுதியான ஆதரவு வழங்கிய பாரதிய ஜனதா கட்சியின் மூத்த தலைமையினருக்கு என் நன்றியைத் தெரிவித்துக்கொள்கிறேன்.

18 மாதங்களாக பிரச்னை - அண்ணாமலை

கடந்த 18 மாதங்களில் கட்சியின் உயர்மட்ட தலைமையுடன் பலமுறை நான் விவாதங்களும் கருத்து வேறுபாடுகளும் கொண்டிருந்தேன். தமிழ்நாட்டில் வளர்ச்சி நோக்கத்துடனும், பண்பாட்டு வேர்களுடனும் கூடிய அரசியலை முன்னெடுத்துச் செல்ல வேண்டிய பாதை குறித்து எனக்கு இருந்த எண்ணங்களால் மேலதிக சுமையை தலைமையின் மீது ஏற்படுத்த விரும்பவில்லை. மூத்த தலைவர்களுடன் பலமுறை கலந்துரையாடிய பிறகு, தமிழ்நாட்டை அணுகும் முறையில் எங்களது கருத்துக்கள் ஒன்றிணைவதில்லை என்ற முடிவுக்கு வந்துள்ளேன்.

நீண்ட சிந்தனைக்குப் பிறகு, நான் கட்சியிலிருந்து விலகி, அரசியலுக்குள் நுழைந்ததன் உண்மையான நோக்கத்தை மீண்டும் சிந்தித்து, எதிர்காலம் என்னை எங்கு அழைத்துச் செல்கிறதோ அந்தப் பாதையில் செல்ல வேண்டிய நேரம் வந்துவிட்டது என்று நம்புகிறேன். எனவே, எனக்கு வழங்கப்பட்ட அனைத்து அமைப்புப் பொறுப்புகளிலிருந்தும் உடனடியாக விடுவிக்குமாறும், பாஜகவின் அடிப்படை உறுப்பினர் பதவியிலிருந்தும் நான் அளிக்கும் ராஜினாமாவை உடனடியாக ஏற்றுக்கொள்ளுமாறும் பணிவன்புடன் கேட்டுக்கொள்கிறேன்” என அண்ணாமலை தனது ராஜினாமா கடிதத்தில் தெரிவித்துள்ளார்.