மீனவர்கள் கவனத்திற்கு! மார்ச் 31-க்குள் இதைச் செய்யாவிட்டால் காப்பீடு கிடையாது - நாகை மாவட்ட ஆட்சியர் எச்சரிக்கை.
பிரதான் மந்திரி மத்சய சம்பட யோஜனா (PMMSY) திட்டத்தின் கீழ் விபத்துக் காப்பீடு பெற, மீனவர்கள் 31.03.2026-க்குள் NFDP வலைதளத்தில் கட்டாயம் பதிவு செய்ய வேண்டும் என நாகை ஆட்சியர் ப.ஆகாஷ் தெரிவித்துள்ளார்.
நாகப்பட்டினம்: நாகப்பட்டினம் மாவட்டத்தைச் சேர்ந்த மீனவர்கள் மற்றும் மீனவப் பெண்கள் மத்திய அரசின் விபத்துக் காப்பீட்டுத் திட்டத்தின் பலன்களைத் தொடர்ந்து பெறுவதற்கு, தேசிய மீன்வள டிஜிட்டல் (NFDP) வலைதளத்தில் தங்களது விவரங்களை உடனடியாகப் பதிவு செய்ய வேண்டும் என்று மாவட்ட ஆட்சியர் ப.ஆகாஷ், அறிவுத்தியுள்ளார்.
பிரதான் மந்திரி மத்சய சம்பட யோஜனா (PMMSY) திட்டத்தின் முக்கியத்துவம்
மத்திய அரசின் தேசிய மீன்வள மேம்பாட்டு வாரியம் (NFDB) மூலம் செயல்படுத்தப்படும் பிரதான் மந்திரி மத்சய சம்பட யோஜனா (PMMSY) திட்டத்தின் கீழ், மீனவர்களுக்கான 'குழு விபத்துக் காப்புறுதித் திட்டம்' (Group Accident Insurance Scheme) கடந்த 18.10.2021 முதல் வெற்றிகரமாகச் செயல்படுத்தப்பட்டு வருகிறது. கடலுக்கோ அல்லது நீர்நிலைகளுக்கோ மீன்பிடிக்கச் செல்லும் மீனவர்கள் எதிர்பாராத விதமாக விபத்துகளைச் சந்திக்கும்போது, அவர்களின் குடும்பத்திற்குப் பொருளாதாரப் பாதுகாப்பை வழங்குவதே இத்திட்டத்தின் முதன்மை நோக்கமாகும்.
காப்பீட்டுத் தொகையின் விவரங்கள்
இத்திட்டத்தின் கீழ் தகுதியுள்ள மீனவர்களுக்குப் பின்வரும் நிதியுதவிகள் காப்பீட்டுத் தொகையாக வழங்கப்படுகின்றன:
* மரணம் / முழுமையான ஊனம்: மீனவர் அல்லது மீனவ மகளிர் விபத்தில் மரணமடைந்தாலோ, நிரந்தரமான முழு ஊனம் அடைந்தாலோ அல்லது கடலில் மீன்பிடிக்கச் சென்றபோது காணாமல் போனாலோ அவர்களின் குடும்பத்திற்கு ரூ. 5.00 இலட்சம் வழங்கப்படும்.
* பகுதி ஊனம்: விபத்தினால் உடல் உறுப்புகளை இழந்து பகுதி ஊனம் ஏற்படும் நேர்வுகளில் ரூ. 2.50 இலட்சம் காப்பீட்டுத் தொகையாக வழங்கப்படும்.
*மருத்துவச் செலவுகள்: விபத்தினால் ஏற்படும் காயங்களுக்குச் சிகிச்சை பெறுவதற்கான மருத்துவச் செலவினங்களுக்காக ரூ. 25,000/- வரை வழங்க வழிவகை செய்யப்பட்டுள்ளது.
டிஜிட்டல் பதிவு ஏன் அவசியம்?
இதுவரை இத்திட்டத்தின் கீழ் பயன் பெற்று வந்த மீனவர்களுக்கு ஒரு முக்கிய மாற்றத்தை ஒன்றிய அரசு அறிவித்துள்ளது. இனிவரும் காலங்களில், தேசிய மீன்வள டிஜிட்டல் (NFDP - National Fisheries Digital Platform) வலைதளத்தில் தங்களது விவரங்களைப் பதிவேற்றம் செய்துள்ள மீனவர்கள் மற்றும் மீனவ மகளிர் மட்டுமே இந்தக் காப்பீட்டுத் திட்டத்தின் கீழ் பலன் பெற இயலும்.
மீன்பிடித் தொழிலில் ஈடுபட்டுள்ள தனிநபர் மீனவர்கள், மீனவப் பெண்கள் மற்றும் மீனவர் கூட்டுறவு சங்கங்களில் உறுப்பினர்களாக உள்ள அனைவரும் இந்த டிஜிட்டல் தளத்தில் இணைவது கட்டாயமாக்கப்பட்டுள்ளது.
கெடு விதிப்பு: மார்ச் 31-க்குள் பதிவு செய்ய வேண்டும்
இது குறித்து மாவட்ட ஆட்சியர் விடுத்துள்ள அறிக்கையில், "மீனவர்கள் தங்களது விவரங்களை வரும் 31.03.2026-க்குள் தேசிய மீன்வள டிஜிட்டல் வலைதளத்தில் பதிவேற்றம் செய்திட வேண்டும். நிர்ணயிக்கப்பட்ட இந்த காலக்கெடுவுக்குள் பதிவு செய்யாத மீனவர்கள் மற்றும் கூட்டுறவு சங்க உறுப்பினர்கள், அடுத்த நிதியாண்டான 2026-2027 ஆம் ஆண்டிற்குரிய விபத்து குழு காப்புறுதித் திட்டத்தின் கீழ் எவ்விதப் பலன்களையும் பெற முடியாது" என்று திட்டவட்டமாகத் தெரிவித்துள்ளார்.
பதிவு செய்யும் முறை
மீனவர்கள் இந்தப் பதிவினை மேற்கொள்வதற்கு எளிமையான வழிமுறைகள் செய்யப்பட்டுள்ளன.
* மீனவர்கள் தங்களுக்கு அருகில் உள்ள அரசு இ-சேவை மையங்களை அணுகலாம்.
* பதிவு செய்யச் செல்லும்போது தங்களது ஆதார் அட்டை, மீனவர் அடையாள அட்டை, வங்கி கணக்கு புத்தகம் மற்றும் குடும்ப அட்டை ஆகிய ஆவணங்களைக் கொண்டு செல்ல வேண்டும்.
* கூட்டுறவு சங்க உறுப்பினர்கள் தங்களது உறுப்பினர் சான்றிதழ் அல்லது அடையாள அட்டையையும் சமர்ப்பிக்க வேண்டும்.
ஆட்சியரின் வேண்டுகோள்
நாகப்பட்டினம் மாவட்டத்தின் கடலோரப் பகுதி மற்றும் உள்நாட்டு மீன்வளத்தைச் சார்ந்த ஆயிரக்கணக்கான மீனவர்களின் நலனைக் கருத்தில் கொண்டு இந்த அறிவிப்பு வெளியிடப்பட்டுள்ளது. "ஆபத்தான சூழலில் தொழில் செய்யும் மீனவர்களுக்கு இந்தக் காப்பீடு ஒரு மிகப்பெரிய பாதுகாப்பு அரணாகும். எனவே, கடைசி நேர நெரிசலைத் தவிர்க்கவும், காப்பீடு ரத்தாவதைத் தடுக்கவும் மீனவர்கள் உடனடியாகப் பதிவுகளை மேற்கொள்ள வேண்டும்" என ஆட்சியர் ப.ஆகாஷ் கேட்டுக்கொண்டுள்ளார்.
மேலதிக விவரங்களுக்கு மீனவர்கள் அந்தந்தப் பகுதி மீன்வளம் மற்றும் மீனவர் நலத்துறை உதவி இயக்குநர் அலுவலகங்களை அணுகலாம் என்றும் தெரிவிக்கப்பட்டுள்ளது.
தலைப்பு செய்திகள்
ட்ரெண்டிங் செய்திகள்
